| Library / Tipiṭaka / တိပိဋက • Tipiṭaka / မဟာဝဂ္ဂပာဠိ • Mahāvaggapāḷi |
၁၅၀. ဩမုက္ကဂုဏင္ဂုဏူပာဟနာနုဇာနနာ
150. Omukkaguṇaṅguṇūpāhanānujānanā
၂၄၇. အထ ခော ဘဂဝာ ပုဗ္ဗဏ္ဟသမယံ နိဝာသေတ္ဝာ ပတ္တစီဝရမာဒာယ ရာဇဂဟံ ပိဏ္ဍာယ ပာဝိသိ, အညတရေန ဘိက္ခုနာ ပစ္ဆာသမဏေန။ အထ ခော သော ဘိက္ခု ခဉ္ဇမာနော ဘဂဝန္တံ ပိဋ္ဌိတော ပိဋ္ဌိတော အနုဗန္ဓိ။ အဒ္ဒသာ ခော အညတရော ဥပာသကော ဂုဏင္ဂုဏူပာဟနာ အာရောဟိတ္ဝာ ဘဂဝန္တံ ဒူရတောဝ အာဂစ္ဆန္တံ; ဒိသ္ဝာ ဥပာဟနာ အာရောဟိတ္ဝာ ယေန ဘဂဝာ တေနုပသင္ကမိ; ဥပသင္ကမိတ္ဝာ ဘဂဝန္တံ အဘိဝာဒေတ္ဝာ ယေန သော ဘိက္ခု တေနုပသင္ကမိ; ဥပသင္ကမိတ္ဝာ တံ ဘိက္ခုံ အဘိဝာဒေတ္ဝာ ဧတဒဝောစ – ‘‘ကိသ္သ, ဘန္တေ, အယ္ယော ခဉ္ဇတီ’’တိ ? ‘‘ပာဒာ မေ, အာဝုသော, ဖလိတာ’’တိ 1။ ‘‘ဟန္ဒ, ဘန္တေ, ဥပာဟနာယော’’တိ။ ‘‘အလံ , အာဝုသော, ပဋိက္ခိတ္တာ ဘဂဝတာ ဂုဏင္ဂုဏူပာဟနာ’’တိ။ ‘‘ဂဏ္ဟာဟေတာ, ဘိက္ခု, ဥပာဟနာယော’’တိ။ အထ ခော ဘဂဝာ ဧတသ္မိံ နိဒာနေ ဧတသ္မိံ ပကရဏေ ဓမ္မိံ ကထံ ကတ္ဝာ ဘိက္ခူ အာမန္တေသိ – ‘‘အနုဇာနာမိ, ဘိက္ခဝေ, ဩမုက္ကံ ဂုဏင္ဂုဏူပာဟနံ။ န, ဘိက္ခဝေ, နဝာ ဂုဏင္ဂုဏူပာဟနာ ဓာရေတဗ္ဗာ။ ယော ဓာရေယ္ယ, အာပတ္တိ ဒုက္ကဋသ္သာ’’တိ။
247. Atha kho bhagavā pubbaṇhasamayaṃ nivāsetvā pattacīvaramādāya rājagahaṃ piṇḍāya pāvisi, aññatarena bhikkhunā pacchāsamaṇena. Atha kho so bhikkhu khañjamāno bhagavantaṃ piṭṭhito piṭṭhito anubandhi. Addasā kho aññataro upāsako guṇaṅguṇūpāhanā ārohitvā bhagavantaṃ dūratova āgacchantaṃ; disvā upāhanā ārohitvā yena bhagavā tenupasaṅkami; upasaṅkamitvā bhagavantaṃ abhivādetvā yena so bhikkhu tenupasaṅkami; upasaṅkamitvā taṃ bhikkhuṃ abhivādetvā etadavoca – ‘‘kissa, bhante, ayyo khañjatī’’ti ? ‘‘Pādā me, āvuso, phalitā’’ti 2. ‘‘Handa, bhante, upāhanāyo’’ti. ‘‘Alaṃ , āvuso, paṭikkhittā bhagavatā guṇaṅguṇūpāhanā’’ti. ‘‘Gaṇhāhetā, bhikkhu, upāhanāyo’’ti. Atha kho bhagavā etasmiṃ nidāne etasmiṃ pakaraṇe dhammiṃ kathaṃ katvā bhikkhū āmantesi – ‘‘anujānāmi, bhikkhave, omukkaṃ guṇaṅguṇūpāhanaṃ. Na, bhikkhave, navā guṇaṅguṇūpāhanā dhāretabbā. Yo dhāreyya, āpatti dukkaṭassā’’ti.
ဩမုက္ကဂုဏင္ဂုဏူပာဟနာနုဇာနနာ နိဋ္ဌိတာ။
Omukkaguṇaṅguṇūpāhanānujānanā niṭṭhitā.
Footnotes:
Related texts:
အဋ္ဌကထာ • Aṭṭhakathā / ဝိနယပိဋက (အဋ္ဌကထာ) • Vinayapiṭaka (aṭṭhakathā) / မဟာဝဂ္ဂ-အဋ္ဌကထာ • Mahāvagga-aṭṭhakathā / သဗ္ဗနီလိကာဒိပဋိက္ခေပကထာ • Sabbanīlikādipaṭikkhepakathā
ဋီကာ • Tīkā / ဝိနယပိဋက (ဋီကာ) • Vinayapiṭaka (ṭīkā) / ပာစိတ္ယာဒိယောဇနာပာဠိ • Pācityādiyojanāpāḷi / ၁၄၉. သဗ္ဗနီလိကာဒိပဋိက္ခေပကထာ • 149. Sabbanīlikādipaṭikkhepakathā
