| Library / Tipiṭaka / තිපිටක • Tipiṭaka / මහාවග්‌ගපාළි • Mahāvaggapāḷi |
150. ඔමුක්‌කගුණඞ්‌ගුණූපාහනානුජානනා
150. Omukkaguṇaṅguṇūpāhanānujānanā
247. අථ ඛො භගවා පුබ්‌බණ්‌හසමයං නිවාසෙත්‌වා පත්‌තචීවරමාදාය රාජගහං පිණ්‌ඩාය පාවිසි, අඤ්‌ඤතරෙන භික්‌ඛුනා පච්‌ඡාසමණෙන. අථ ඛො සො භික්‌ඛු ඛඤ්‌ජමානො භගවන්‌තං පිට්‌ඨිතො පිට්‌ඨිතො අනුබන්‌ධි. අද්‌දසා ඛො අඤ්‌ඤතරො උපාසකො ගුණඞ්‌ගුණූපාහනා ආරොහිත්‌වා භගවන්‌තං දූරතොව ආගච්‌ඡන්‌තං; දිස්‌වා උපාහනා ආරොහිත්‌වා යෙන භගවා තෙනුපසඞ්‌කමි; උපසඞ්‌කමිත්‌වා භගවන්‌තං අභිවාදෙත්‌වා යෙන සො භික්‌ඛු තෙනුපසඞ්‌කමි; උපසඞ්‌කමිත්‌වා තං භික්‌ඛුං අභිවාදෙත්‌වා එතදවොච – ‘‘කිස්‌ස, භන්‌තෙ, අය්‍යො ඛඤ්‌ජතී’’ති ? ‘‘පාදා මෙ, ආවුසො, ඵලිතා’’ති 1. ‘‘හන්‌ද, භන්‌තෙ, උපාහනායො’’ති. ‘‘අලං , ආවුසො, පටික්‌ඛිත්‌තා භගවතා ගුණඞ්‌ගුණූපාහනා’’ති. ‘‘ගණ්‌හාහෙතා, භික්‌ඛු, උපාහනායො’’ති. අථ ඛො භගවා එතස්‌මිං නිදානෙ එතස්‌මිං පකරණෙ ධම්‌මිං කථං කත්‌වා භික්‌ඛූ ආමන්‌තෙසි – ‘‘අනුජානාමි, භික්‌ඛවෙ, ඔමුක්‌කං ගුණඞ්‌ගුණූපාහනං. න, භික්‌ඛවෙ, නවා ගුණඞ්‌ගුණූපාහනා ධාරෙතබ්‌බා. යො ධාරෙය්‍ය, ආපත්‌ති දුක්‌කටස්‌සා’’ති.
247. Atha kho bhagavā pubbaṇhasamayaṃ nivāsetvā pattacīvaramādāya rājagahaṃ piṇḍāya pāvisi, aññatarena bhikkhunā pacchāsamaṇena. Atha kho so bhikkhu khañjamāno bhagavantaṃ piṭṭhito piṭṭhito anubandhi. Addasā kho aññataro upāsako guṇaṅguṇūpāhanā ārohitvā bhagavantaṃ dūratova āgacchantaṃ; disvā upāhanā ārohitvā yena bhagavā tenupasaṅkami; upasaṅkamitvā bhagavantaṃ abhivādetvā yena so bhikkhu tenupasaṅkami; upasaṅkamitvā taṃ bhikkhuṃ abhivādetvā etadavoca – ‘‘kissa, bhante, ayyo khañjatī’’ti ? ‘‘Pādā me, āvuso, phalitā’’ti 2. ‘‘Handa, bhante, upāhanāyo’’ti. ‘‘Alaṃ , āvuso, paṭikkhittā bhagavatā guṇaṅguṇūpāhanā’’ti. ‘‘Gaṇhāhetā, bhikkhu, upāhanāyo’’ti. Atha kho bhagavā etasmiṃ nidāne etasmiṃ pakaraṇe dhammiṃ kathaṃ katvā bhikkhū āmantesi – ‘‘anujānāmi, bhikkhave, omukkaṃ guṇaṅguṇūpāhanaṃ. Na, bhikkhave, navā guṇaṅguṇūpāhanā dhāretabbā. Yo dhāreyya, āpatti dukkaṭassā’’ti.
ඔමුක්‌කගුණඞ්‌ගුණූපාහනානුජානනා නිට්‌ඨිතා.
Omukkaguṇaṅguṇūpāhanānujānanā niṭṭhitā.
Footnotes:
Related texts:
අට්‌ඨකථා • Aṭṭhakathā / විනයපිටක (අට්‌ඨකථා) • Vinayapiṭaka (aṭṭhakathā) / මහාවග්‌ග-අට්‌ඨකථා • Mahāvagga-aṭṭhakathā / සබ්‌බනීලිකාදිපටික්‌ඛෙපකථා • Sabbanīlikādipaṭikkhepakathā
ටීකා • Tīkā / විනයපිටක (ටීකා) • Vinayapiṭaka (ṭīkā) / පාචිත්‍යාදියොජනාපාළි • Pācityādiyojanāpāḷi / 149. සබ්‌බනීලිකාදිපටික්‌ඛෙපකථා • 149. Sabbanīlikādipaṭikkhepakathā
