| Library / Tipiṭaka / ತಿಪಿಟಕ • Tipiṭaka / ಅಪದಾನ-ಅಟ್ಠಕಥಾ • Apadāna-aṭṭhakathā |
೫. ಓಪವಯ್ಹತ್ಥೇರಅಪದಾನವಣ್ಣನಾ
5. Opavayhattheraapadānavaṇṇanā
ಪದುಮುತ್ತರಬುದ್ಧಸ್ಸಾತಿಆದಿಕಂ ಆಯಸ್ಮತೋ ಓಪವಯ್ಹತ್ಥೇರಸ್ಸ ಅಪದಾನಂ। ಅಯಮ್ಪಿ ಪುರಿಮಬುದ್ಧೇಸು ಕತಾಧಿಕಾರೋ ತತ್ಥ ತತ್ಥ ಭವೇ ವಿವಟ್ಟೂಪನಿಸ್ಸಯಾನಿ ಪುಞ್ಞಾನಿ ಉಪಚಿನನ್ತೋ ಪದುಮುತ್ತರಜಿನಾದಿಚ್ಚೇ ಲೋಕೇ ಪಾತುಭೂತೇ ಏಕಸ್ಮಿಂ ವಿಭವಸಮ್ಪನ್ನಕುಲೇ ನಿಬ್ಬತ್ತೋ ವುದ್ಧಿಮನ್ವಾಯ ಮಹದ್ಧನೋ ಮಹಾಭೋಗೋ ಘರಾವಾಸಂ ವಸಮಾನೋ ಸಾಸನೇ ಪಸನ್ನೋ ಸತ್ಥರಿ ಪಸಾದಬಹುಮಾನೋ ಆಜಾನೀಯೇನ ಸಿನ್ಧವೇನ ಪೂಜಂ ಅಕಾಸಿ, ಪೂಜೇತ್ವಾ ಚ ಪನ ‘‘ಬುದ್ಧಾದೀನಂ ಸಮಣಾನಂ ಹತ್ಥಿಅಸ್ಸಾದಯೋ ನ ಕಪ್ಪನ್ತಿ, ಕಪ್ಪಿಯಭಣ್ಡಂ ದಸ್ಸಾಮೀ’’ತಿ ಚಿನ್ತೇತ್ವಾ ತಂ ಅಗ್ಘಾಪೇತ್ವಾ ತದಗ್ಘನಕೇನ ಕಹಾಪಣೇನ ಕಪ್ಪಿಯಂ ಕಪ್ಪಾಸಿಕಕಮ್ಬಲಕೋಜವಾದಿಕಂ ಚೀವರಂ ಕಪ್ಪೂರತಕ್ಕೋಲಾದಿಕಂ ಭೇಸಜ್ಜಪರಿಕ್ಖಾರಞ್ಚ ಅದಾಸಿ। ಸೋ ತೇನ ಪುಞ್ಞಕಮ್ಮೇನ ಯಾವತಾಯುಕಂ ಠತ್ವಾ ತತೋ ಚುತೋ ದೇವೇಸು ಚ ಮನುಸ್ಸೇಸು ಚ ಹತ್ಥಿಅಸ್ಸಾದಿಅನೇಕವಾಹನಸಮ್ಪನ್ನೋ ಸುಖಂ ಅನುಭವಿತ್ವಾ ಇಮಸ್ಮಿಂ ಬುದ್ಧುಪ್ಪಾದೇ ಏಕಸ್ಮಿಂ ಕುಲಗೇಹೇ ನಿಬ್ಬತ್ತೋ ವಿಞ್ಞುತಂ ಪತ್ತೋ ಸದ್ಧಾಸಮ್ಪನ್ನೋ ಸಾಸನೇ ಪಬ್ಬಜಿತ್ವಾ ಕಮ್ಮಟ್ಠಾನಂ ಗಹೇತ್ವಾ ವಿಪಸ್ಸನಂ ವಡ್ಢೇತ್ವಾ ಮಗ್ಗಪಟಿಪಾಟಿಯಾ ಅರಹತ್ತೇ ಪತಿಟ್ಠಾಸಿ, ಪುಬ್ಬೇ ಕತಪುಞ್ಞಸಮ್ಭಾರವಸೇನ ಓಪವಯ್ಹತ್ಥೇರೋತಿ ಪಾಕಟೋ ಅಹೋಸಿ।
Padumuttarabuddhassātiādikaṃ āyasmato opavayhattherassa apadānaṃ. Ayampi purimabuddhesu katādhikāro tattha tattha bhave vivaṭṭūpanissayāni puññāni upacinanto padumuttarajinādicce loke pātubhūte ekasmiṃ vibhavasampannakule nibbatto vuddhimanvāya mahaddhano mahābhogo gharāvāsaṃ vasamāno sāsane pasanno satthari pasādabahumāno ājānīyena sindhavena pūjaṃ akāsi, pūjetvā ca pana ‘‘buddhādīnaṃ samaṇānaṃ hatthiassādayo na kappanti, kappiyabhaṇḍaṃ dassāmī’’ti cintetvā taṃ agghāpetvā tadagghanakena kahāpaṇena kappiyaṃ kappāsikakambalakojavādikaṃ cīvaraṃ kappūratakkolādikaṃ bhesajjaparikkhārañca adāsi. So tena puññakammena yāvatāyukaṃ ṭhatvā tato cuto devesu ca manussesu ca hatthiassādianekavāhanasampanno sukhaṃ anubhavitvā imasmiṃ buddhuppāde ekasmiṃ kulagehe nibbatto viññutaṃ patto saddhāsampanno sāsane pabbajitvā kammaṭṭhānaṃ gahetvā vipassanaṃ vaḍḍhetvā maggapaṭipāṭiyā arahatte patiṭṭhāsi, pubbe katapuññasambhāravasena opavayhattheroti pākaṭo ahosi.
೩೩. ಸೋ ‘‘ಕೇನ ನು ಖೋ ಕಾರಣೇನ ಇದಂ ಮಯಾ ಸನ್ತಿಪದಂ ಅಧಿಗತ’’ನ್ತಿ ಉಪಧಾರೇನ್ತೋ ಪುಬ್ಬಕಮ್ಮಂ ಞಾಣೇನ ಪಚ್ಚಕ್ಖತೋ ಞತ್ವಾ ಸೋಮನಸ್ಸಜಾತೋ ಪುಬ್ಬಚರಿತಾಪದಾನಂ ಉದಾನವಸೇನ ಪಕಾಸೇನ್ತೋ ಪದುಮುತ್ತರಬುದ್ಧಸ್ಸಾತಿಆದಿಮಾಹ। ತಂ ವುತ್ತತ್ಥಮೇವ। ಆಜಾನೀಯಮದಾಸಹನ್ತಿ ಆಜಾನೀಯಂ ಉತ್ತಮಜಾತಿಸಿನ್ಧವಂ ಅಹಂ ಅದಾಸಿಂ ಪೂಜೇಸಿನ್ತಿ ಅತ್ಥೋ।
33. So ‘‘kena nu kho kāraṇena idaṃ mayā santipadaṃ adhigata’’nti upadhārento pubbakammaṃ ñāṇena paccakkhato ñatvā somanassajāto pubbacaritāpadānaṃ udānavasena pakāsento padumuttarabuddhassātiādimāha. Taṃ vuttatthameva. Ājānīyamadāsahanti ājānīyaṃ uttamajātisindhavaṃ ahaṃ adāsiṃ pūjesinti attho.
೩೫. ಸಪತ್ತಭಾರೋತಿ ಸಸ್ಸ ಅತ್ತನೋ ಪತ್ತಾನಿ ಅಟ್ಠ ಪರಿಕ್ಖಾರಾನಿ ಭಾರಾನಿ ಯಸ್ಸ ಸೋ ಸಪತ್ತಭಾರೋ, ಅಟ್ಠಪರಿಕ್ಖಾರಯುತ್ತೋತಿ ಅತ್ಥೋ।
35.Sapattabhāroti sassa attano pattāni aṭṭha parikkhārāni bhārāni yassa so sapattabhāro, aṭṭhaparikkhārayuttoti attho.
೩೬. ಖಮನೀಯಮದಾಸಹನ್ತಿ ಖಮನೀಯಯೋಗ್ಗಂ ಚೀವರಾದಿಕಪ್ಪಿಯಪರಿಕ್ಖಾರನ್ತಿ ಅತ್ಥೋ।
36.Khamanīyamadāsahanti khamanīyayoggaṃ cīvarādikappiyaparikkhāranti attho.
೪೦. ಚರಿಮೋತಿ ಪರಿಯೋಸಾನೋ ಕೋಟಿಪ್ಪತ್ತೋ ಭವೋತಿ ಅತ್ಥೋ। ಸೇಸಂ ಸುವಿಞ್ಞೇಯ್ಯಮೇವಾತಿ।
40.Carimoti pariyosāno koṭippatto bhavoti attho. Sesaṃ suviññeyyamevāti.
ಓಪವಯ್ಹತ್ಥೇರಅಪದಾನವಣ್ಣನಾ ಸಮತ್ತಾ।
Opavayhattheraapadānavaṇṇanā samattā.
Related texts:
ತಿಪಿಟಕ (ಮೂಲ) • Tipiṭaka (Mūla) / ಸುತ್ತಪಿಟಕ • Suttapiṭaka / ಖುದ್ದಕನಿಕಾಯ • Khuddakanikāya / ಅಪದಾನಪಾಳಿ • Apadānapāḷi / ೫. ಓಪವಯ್ಹತ್ಥೇರಅಪದಾನಂ • 5. Opavayhattheraapadānaṃ
