| Library / Tipiṭaka / திபிடக • Tipiṭaka / மஹாவக்³க³பாளி • Mahāvaggapāḷi |
277. ஓஸாரணானுஜானநா
277. Osāraṇānujānanā
474. அத² கோ² தஸ்ஸ உக்கி²த்தகஸ்ஸ பி⁴க்கு²னோ த⁴ம்மஞ்ச வினயஞ்ச பச்சவெக்க²ந்தஸ்ஸ ஏதத³ஹோஸி – ‘‘ஆபத்தி ஏஸா, நேஸா அனாபத்தி. ஆபன்னொம்ஹி, நம்ஹி அனாபன்னோ. உக்கி²த்தொம்ஹி, நம்ஹி அனுக்கி²த்தோ. த⁴ம்மிகேனம்ஹி கம்மேன உக்கி²த்தோ அகுப்பேன டா²னாரஹேனா’’தி. அத² கோ² ஸோ உக்கி²த்தகோ பி⁴க்கு² யேன உக்கி²த்தானுவத்தகா பி⁴க்கூ² தேனுபஸங்கமி, உபஸங்கமித்வா உக்கி²த்தானுவத்தகே பி⁴க்கூ² ஏதத³வோச – ‘‘ஆபத்தி ஏஸா, ஆவுஸோ; நேஸா அனாபத்தி. ஆபன்னொம்ஹி, நம்ஹி அனாபன்னோ. உக்கி²த்தொம்ஹி, நம்ஹி அனுக்கி²த்தோ. த⁴ம்மிகேனம்ஹி கம்மேன உக்கி²த்தோ அகுப்பேன டா²னாரஹேன. ஏத² மங் ஆயஸ்மந்தோ ஓஸாரேதா²’’தி. அத² கோ² தே உக்கி²த்தானுவத்தகா பி⁴க்கூ² தங் உக்கி²த்தகங் பி⁴க்கு²ங் ஆதா³ய யேன ப⁴க³வா தேனுபஸங்கமிங்ஸு, உபஸங்கமித்வா ப⁴க³வந்தங் அபி⁴வாதெ³த்வா ஏகமந்தங் நிஸீதி³ங்ஸு. ஏகமந்தங் நிஸின்னா கோ² தே பி⁴க்கூ² ப⁴க³வந்தங் ஏதத³வோசுங் – ‘‘அயங், ப⁴ந்தே, உக்கி²த்தகோ பி⁴க்கு² ஏவமாஹ – ‘ஆபத்தி ஏஸா , ஆவுஸோ; நேஸா அனாபத்தி. ஆபன்னொம்ஹி, நம்ஹி அனாபன்னோ. உக்கி²த்தொம்ஹி, நம்ஹி அனுக்கி²த்தோ. த⁴ம்மிகேனம்ஹி கம்மேன உக்கி²த்தோ அகுப்பேன டா²னாரஹேன. ஏத² மங் ஆயஸ்மந்தோ ஓஸாரேதா²’தி. கத²ங் நு கோ², ப⁴ந்தே, படிபஜ்ஜிதப்³ப³’’ந்தி? ‘‘ஆபத்தி ஏஸா, பி⁴க்க²வே; நேஸா அனாபத்தி. ஆபன்னோ ஏஸோ பி⁴க்கு², நேஸோ பி⁴க்கு² அனாபன்னோ. உக்கி²த்தோ ஏஸோ பி⁴க்கு², நேஸோ பி⁴க்கு² அனுக்கி²த்தோ . த⁴ம்மிகேன கம்மேன உக்கி²த்தோ அகுப்பேன டா²னாரஹேன. யதோ ச கோ² ஸோ, பி⁴க்க²வே, பி⁴க்கு² ஆபன்னோ ச உக்கி²த்தோ ச பஸ்ஸதி ச, தேன ஹி, பி⁴க்க²வே, தங் பி⁴க்கு²ங் ஓஸாரேதா²’’தி.
474. Atha kho tassa ukkhittakassa bhikkhuno dhammañca vinayañca paccavekkhantassa etadahosi – ‘‘āpatti esā, nesā anāpatti. Āpannomhi, namhi anāpanno. Ukkhittomhi, namhi anukkhitto. Dhammikenamhi kammena ukkhitto akuppena ṭhānārahenā’’ti. Atha kho so ukkhittako bhikkhu yena ukkhittānuvattakā bhikkhū tenupasaṅkami, upasaṅkamitvā ukkhittānuvattake bhikkhū etadavoca – ‘‘āpatti esā, āvuso; nesā anāpatti. Āpannomhi, namhi anāpanno. Ukkhittomhi, namhi anukkhitto. Dhammikenamhi kammena ukkhitto akuppena ṭhānārahena. Etha maṃ āyasmanto osārethā’’ti. Atha kho te ukkhittānuvattakā bhikkhū taṃ ukkhittakaṃ bhikkhuṃ ādāya yena bhagavā tenupasaṅkamiṃsu, upasaṅkamitvā bhagavantaṃ abhivādetvā ekamantaṃ nisīdiṃsu. Ekamantaṃ nisinnā kho te bhikkhū bhagavantaṃ etadavocuṃ – ‘‘ayaṃ, bhante, ukkhittako bhikkhu evamāha – ‘āpatti esā , āvuso; nesā anāpatti. Āpannomhi, namhi anāpanno. Ukkhittomhi, namhi anukkhitto. Dhammikenamhi kammena ukkhitto akuppena ṭhānārahena. Etha maṃ āyasmanto osārethā’ti. Kathaṃ nu kho, bhante, paṭipajjitabba’’nti? ‘‘Āpatti esā, bhikkhave; nesā anāpatti. Āpanno eso bhikkhu, neso bhikkhu anāpanno. Ukkhitto eso bhikkhu, neso bhikkhu anukkhitto . Dhammikena kammena ukkhitto akuppena ṭhānārahena. Yato ca kho so, bhikkhave, bhikkhu āpanno ca ukkhitto ca passati ca, tena hi, bhikkhave, taṃ bhikkhuṃ osārethā’’ti.
ஓஸாரணானுஜானநா நிட்டி²தா.
Osāraṇānujānanā niṭṭhitā.
