| Library / Tipiṭaka / ཏིཔིཊཀ • Tipiṭaka / མཧཱཝགྒཔཱལི༹ • Mahāvaggapāḷi |
༢༧༧. ཨོསཱརཎཱནུཛཱནནཱ
277. Osāraṇānujānanā
༤༧༤. ཨཐ ཁོ ཏསྶ ཨུཀྑིཏྟཀསྶ བྷིཀྑུནོ དྷམྨཉྩ ཝིནཡཉྩ པཙྩཝེཀྑནྟསྶ ཨེཏདཧོསི – ‘‘ཨཱཔཏྟི ཨེསཱ, ནེསཱ ཨནཱཔཏྟི། ཨཱཔནྣོམྷི, ནམྷི ཨནཱཔནྣོ། ཨུཀྑིཏྟོམྷི, ནམྷི ཨནུཀྑིཏྟོ། དྷམྨིཀེནམྷི ཀམྨེན ཨུཀྑིཏྟོ ཨཀུཔྤེན ཋཱནཱརཧེནཱ’’ཏི། ཨཐ ཁོ སོ ཨུཀྑིཏྟཀོ བྷིཀྑུ ཡེན ཨུཀྑིཏྟཱནུཝཏྟཀཱ བྷིཀྑཱུ ཏེནུཔསངྐམི, ཨུཔསངྐམིཏྭཱ ཨུཀྑིཏྟཱནུཝཏྟཀེ བྷིཀྑཱུ ཨེཏདཝོཙ – ‘‘ཨཱཔཏྟི ཨེསཱ, ཨཱཝུསོ; ནེསཱ ཨནཱཔཏྟི། ཨཱཔནྣོམྷི, ནམྷི ཨནཱཔནྣོ། ཨུཀྑིཏྟོམྷི, ནམྷི ཨནུཀྑིཏྟོ། དྷམྨིཀེནམྷི ཀམྨེན ཨུཀྑིཏྟོ ཨཀུཔྤེན ཋཱནཱརཧེན། ཨེཐ མཾ ཨཱཡསྨནྟོ ཨོསཱརེཐཱ’’ཏི། ཨཐ ཁོ ཏེ ཨུཀྑིཏྟཱནུཝཏྟཀཱ བྷིཀྑཱུ ཏཾ ཨུཀྑིཏྟཀཾ བྷིཀྑུཾ ཨཱདཱཡ ཡེན བྷགཝཱ ཏེནུཔསངྐམིཾསུ, ཨུཔསངྐམིཏྭཱ བྷགཝནྟཾ ཨབྷིཝཱདེཏྭཱ ཨེཀམནྟཾ ནིསཱིདིཾསུ། ཨེཀམནྟཾ ནིསིནྣཱ ཁོ ཏེ བྷིཀྑཱུ བྷགཝནྟཾ ཨེཏདཝོཙུཾ – ‘‘ཨཡཾ, བྷནྟེ, ཨུཀྑིཏྟཀོ བྷིཀྑུ ཨེཝམཱཧ – ‘ཨཱཔཏྟི ཨེསཱ , ཨཱཝུསོ; ནེསཱ ཨནཱཔཏྟི། ཨཱཔནྣོམྷི, ནམྷི ཨནཱཔནྣོ། ཨུཀྑིཏྟོམྷི, ནམྷི ཨནུཀྑིཏྟོ། དྷམྨིཀེནམྷི ཀམྨེན ཨུཀྑིཏྟོ ཨཀུཔྤེན ཋཱནཱརཧེན། ཨེཐ མཾ ཨཱཡསྨནྟོ ཨོསཱརེཐཱ’ཏི། ཀཐཾ ནུ ཁོ, བྷནྟེ, པཊིཔཛྫིཏབྦ’’ནྟི? ‘‘ཨཱཔཏྟི ཨེསཱ, བྷིཀྑཝེ; ནེསཱ ཨནཱཔཏྟི། ཨཱཔནྣོ ཨེསོ བྷིཀྑུ, ནེསོ བྷིཀྑུ ཨནཱཔནྣོ། ཨུཀྑིཏྟོ ཨེསོ བྷིཀྑུ, ནེསོ བྷིཀྑུ ཨནུཀྑིཏྟོ ། དྷམྨིཀེན ཀམྨེན ཨུཀྑིཏྟོ ཨཀུཔྤེན ཋཱནཱརཧེན། ཡཏོ ཙ ཁོ སོ, བྷིཀྑཝེ, བྷིཀྑུ ཨཱཔནྣོ ཙ ཨུཀྑིཏྟོ ཙ པསྶཏི ཙ, ཏེན ཧི, བྷིཀྑཝེ, ཏཾ བྷིཀྑུཾ ཨོསཱརེཐཱ’’ཏི།
474. Atha kho tassa ukkhittakassa bhikkhuno dhammañca vinayañca paccavekkhantassa etadahosi – ‘‘āpatti esā, nesā anāpatti. Āpannomhi, namhi anāpanno. Ukkhittomhi, namhi anukkhitto. Dhammikenamhi kammena ukkhitto akuppena ṭhānārahenā’’ti. Atha kho so ukkhittako bhikkhu yena ukkhittānuvattakā bhikkhū tenupasaṅkami, upasaṅkamitvā ukkhittānuvattake bhikkhū etadavoca – ‘‘āpatti esā, āvuso; nesā anāpatti. Āpannomhi, namhi anāpanno. Ukkhittomhi, namhi anukkhitto. Dhammikenamhi kammena ukkhitto akuppena ṭhānārahena. Etha maṃ āyasmanto osārethā’’ti. Atha kho te ukkhittānuvattakā bhikkhū taṃ ukkhittakaṃ bhikkhuṃ ādāya yena bhagavā tenupasaṅkamiṃsu, upasaṅkamitvā bhagavantaṃ abhivādetvā ekamantaṃ nisīdiṃsu. Ekamantaṃ nisinnā kho te bhikkhū bhagavantaṃ etadavocuṃ – ‘‘ayaṃ, bhante, ukkhittako bhikkhu evamāha – ‘āpatti esā , āvuso; nesā anāpatti. Āpannomhi, namhi anāpanno. Ukkhittomhi, namhi anukkhitto. Dhammikenamhi kammena ukkhitto akuppena ṭhānārahena. Etha maṃ āyasmanto osārethā’ti. Kathaṃ nu kho, bhante, paṭipajjitabba’’nti? ‘‘Āpatti esā, bhikkhave; nesā anāpatti. Āpanno eso bhikkhu, neso bhikkhu anāpanno. Ukkhitto eso bhikkhu, neso bhikkhu anukkhitto . Dhammikena kammena ukkhitto akuppena ṭhānārahena. Yato ca kho so, bhikkhave, bhikkhu āpanno ca ukkhitto ca passati ca, tena hi, bhikkhave, taṃ bhikkhuṃ osārethā’’ti.
ཨོསཱརཎཱནུཛཱནནཱ ནིཊྛིཏཱ།
Osāraṇānujānanā niṭṭhitā.
