| Library / Tipiṭaka / திபிடக • Tipiṭaka / நெத்திவிபா⁴வினீ • Nettivibhāvinī |
12. ஓதரணஹாரஸம்பாதவிபா⁴வனா
12. Otaraṇahārasampātavibhāvanā
74. யேன யேன பஞ்ஞத்திஹாரஸம்பாதேன பஞ்ஞத்திப்பபே⁴தா³ நித்³தா⁴ரிதா, ஸோ பஞ்ஞத்திஹாரஸம்பாதோ பரிபுண்ணோ, ‘‘கதமோ ஓதரணோ ஹாரஸம்பாதோ’’தி புச்சி²தப்³ப³த்தா ‘‘தத்த² கதமோ ஓதரணோ ஹாரஸம்பாதோ’’திஆதி³மாஹ.
74. Yena yena paññattihārasampātena paññattippabhedā niddhāritā, so paññattihārasampāto paripuṇṇo, ‘‘katamo otaraṇo hārasampāto’’ti pucchitabbattā ‘‘tattha katamo otaraṇo hārasampāto’’tiādimāha.
‘‘தத்த² திஸ்ஸங் கா³தா²யங் கதமானி இந்த்³ரியானி நித்³தா⁴ரெத்வா கதமேஹி நித்³தா⁴ரிதேஹி த⁴ம்மேஹி ஓதரதீ’’தி புச்சி²தப்³ப³த்தா ‘‘தஸ்மா’’திஆதி³ வுத்தங். யா ‘‘தஸ்மா ரக்கி²தசித்தஸ்ஸா’’திஆதி³கா³தா² வுத்தா, திஸ்ஸங் கா³தா²யங் ‘‘தஸ்மா…பே॰… புரெக்கா²ரோ’’தி ஸுத்தப்பதே³ஸேன ஸம்மாதி³ட்டி² க³ஹிதா, ஸம்மாதி³ட்டி²யா க³ஹிதாய பஞ்சிந்த்³ரியானி ஸத்³தா⁴தி³பஞ்சிந்த்³ரியானி க³ஹிதானி ப⁴வந்தி.
‘‘Tattha tissaṃ gāthāyaṃ katamāni indriyāni niddhāretvā katamehi niddhāritehi dhammehi otaratī’’ti pucchitabbattā ‘‘tasmā’’tiādi vuttaṃ. Yā ‘‘tasmā rakkhitacittassā’’tiādigāthā vuttā, tissaṃ gāthāyaṃ ‘‘tasmā…pe… purekkhāro’’ti suttappadesena sammādiṭṭhi gahitā, sammādiṭṭhiyā gahitāya pañcindriyāni saddhādipañcindriyāni gahitāni bhavanti.
தானியேவ ஸத்³தா⁴தி³பஞ்சிந்த்³ரியானி விஜ்ஜாய உபகாரத்தா வா பத³ட்டா²னத்தா வா விஜ்ஜா ப⁴வந்தி, விஜ்ஜுப்பாதா³ தாதி³ஸாய விஜ்ஜாய உப்பாதா³ உப்பாத³ஹேதுதோ அவிஜ்ஜானிரோதோ⁴ ஸம்ப⁴வதி, அவிஜ்ஜானிரோதா⁴ ஸங்கா²ரனிரோதோ⁴ ஸம்ப⁴வதி…பே॰… ஜாதினிரோதா⁴ ஜராமரணனிரோதோ⁴ ஸம்ப⁴வதீதி. அயங் ஓதரணா படிச்சஸமுப்பாதே³ன பஞ்சிந்த்³ரியானங் ஓதரணா நாம.
Tāniyeva saddhādipañcindriyāni vijjāya upakārattā vā padaṭṭhānattā vā vijjā bhavanti, vijjuppādā tādisāya vijjāya uppādā uppādahetuto avijjānirodho sambhavati, avijjānirodhā saṅkhāranirodho sambhavati…pe… jātinirodhā jarāmaraṇanirodho sambhavatīti. Ayaṃ otaraṇā paṭiccasamuppādena pañcindriyānaṃ otaraṇā nāma.
தானியேவ பஞ்சிந்த்³ரியானி ஸீலக்க²ந்தே⁴ன ஸமாதி⁴க்க²ந்தே⁴ன பஞ்ஞாக்க²ந்தே⁴ன தீஹி க²ந்தே⁴ஹி ஸங்க³ஹிதானி ப⁴வந்தி ஸத்³தா⁴வீரியேஹி ஸீலஸம்ப⁴வதோ, ஸதியா ச பஞ்ஞானுவத்தகத்தா. அயங் ஓதரணா க²ந்தே⁴ஹி பஞ்சிந்த்³ரியானங் ஓதரணா நாம.
Tāniyeva pañcindriyāni sīlakkhandhena samādhikkhandhena paññākkhandhena tīhi khandhehi saṅgahitāni bhavanti saddhāvīriyehi sīlasambhavato, satiyā ca paññānuvattakattā. Ayaṃ otaraṇā khandhehi pañcindriyānaṃ otaraṇā nāma.
தானியேவ பஞ்சிந்த்³ரியானி ஸங்கா²ரபரியாபன்னானி ப⁴வந்தி. யே ஸங்கா²ரா அனாஸவா ப⁴வந்தி, ப⁴வங்கா³ ப⁴வஹேதூ நோ ப⁴வந்தி, தே அனாஸவா ஸங்கா²ரா த⁴ம்மதா⁴துஸங்க³ஹிதா ப⁴வந்தி த⁴ம்மதா⁴துயா அந்தோக³த⁴த்தா. அயங் ஓதரணா தா⁴தூஹி பஞ்சிந்த்³ரியானங் ஓதரணா நாம.
Tāniyeva pañcindriyāni saṅkhārapariyāpannāni bhavanti. Ye saṅkhārā anāsavā bhavanti, bhavaṅgā bhavahetū no bhavanti, te anāsavā saṅkhārā dhammadhātusaṅgahitā bhavanti dhammadhātuyā antogadhattā. Ayaṃ otaraṇā dhātūhi pañcindriyānaṃ otaraṇā nāma.
ஸா அனாஸவா த⁴ம்மதா⁴து த⁴ம்மாயதனபரியாபன்னா ப⁴வதி, யங் ஆயதனங் அனாஸவங் ப⁴வதி, ப⁴வங்க³ங் ப⁴வஹேது நோ ப⁴வதி. அயங் ஓதரணா ஆயதனேஹி த⁴ம்மதா⁴துயா ஓதரணா நாம.
Sā anāsavā dhammadhātu dhammāyatanapariyāpannā bhavati, yaṃ āyatanaṃ anāsavaṃ bhavati, bhavaṅgaṃ bhavahetu no bhavati. Ayaṃ otaraṇā āyatanehi dhammadhātuyā otaraṇā nāma.
‘‘எத்தகோவ ஓதரணோ ஹாரஸம்பாதோ பரிபுண்ணோ’’தி வத்தப்³ப³த்தா ‘‘நியுத்தோ ஓதரணோ ஹாரஸம்பாதோ’’தி வுத்தங். யேன யேன ஸங்வண்ணனாவிஸேஸபூ⁴தேன ஓதரணஹாரஸம்பாதேன ஸுத்தப்பதே³ஸத்தா² ஓதரிதப்³பா³, ஸோ ஸோ ஸங்வண்ணனாவிஸேஸபூ⁴தோ ஓதரணோ ஹாரஸம்பாதோ நியுத்தோ யதா²ரஹங் நித்³தா⁴ரெத்வா யுஜ்ஜிதப்³போ³தி அத்தோ² க³ஹேதப்³போ³தி.
‘‘Ettakova otaraṇo hārasampāto paripuṇṇo’’ti vattabbattā ‘‘niyutto otaraṇo hārasampāto’’ti vuttaṃ. Yena yena saṃvaṇṇanāvisesabhūtena otaraṇahārasampātena suttappadesatthā otaritabbā, so so saṃvaṇṇanāvisesabhūto otaraṇo hārasampāto niyutto yathārahaṃ niddhāretvā yujjitabboti attho gahetabboti.
இதி ஓதரணஹாரஸம்பாதே ஸத்திப³லானுரூபா ரசிதா
Iti otaraṇahārasampāte sattibalānurūpā racitā
விபா⁴வனா நிட்டி²தா.
Vibhāvanā niṭṭhitā.
பண்டி³தேஹி பன…பே॰… க³ஹேதப்³போ³தி.
Paṇḍitehi pana…pe… gahetabboti.
இதோ பட்டா²ய ‘‘தத்த² கதமோ’’திஆதி³அனுஸந்த்⁴யத்தோ² ச பரியோஸானே ‘‘நியுத்தோ’’திஆதி³அனுஸந்த்⁴யத்தோ² ச வுத்தனயானுஸாரேனேவ விஞ்ஞாதப்³போ³. கத்த²சி கத்த²சி பாடே² அபாகடங்யேவ யதா²ப³லங் கத²யிஸ்ஸாம.
Ito paṭṭhāya ‘‘tattha katamo’’tiādianusandhyattho ca pariyosāne ‘‘niyutto’’tiādianusandhyattho ca vuttanayānusāreneva viññātabbo. Katthaci katthaci pāṭhe apākaṭaṃyeva yathābalaṃ kathayissāma.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / கு²த்³த³கனிகாய • Khuddakanikāya / நெத்திப்பகரணபாளி • Nettippakaraṇapāḷi / 12. ஓதரணஹாரஸம்பாதோ • 12. Otaraṇahārasampāto
