| Library / Tipiṭaka / তিপিটক • Tipiṭaka / নেত্তিৰিভাৰিনী • Nettivibhāvinī |
১২. ওতরণহারসম্পাতৰিভাৰনা
12. Otaraṇahārasampātavibhāvanā
৭৪. যেন যেন পঞ্ঞত্তিহারসম্পাতেন পঞ্ঞত্তিপ্পভেদা নিদ্ধারিতা, সো পঞ্ঞত্তিহারসম্পাতো পরিপুণ্ণো, ‘‘কতমো ওতরণো হারসম্পাতো’’তি পুচ্ছিতব্বত্তা ‘‘তত্থ কতমো ওতরণো হারসম্পাতো’’তিআদিমাহ।
74. Yena yena paññattihārasampātena paññattippabhedā niddhāritā, so paññattihārasampāto paripuṇṇo, ‘‘katamo otaraṇo hārasampāto’’ti pucchitabbattā ‘‘tattha katamo otaraṇo hārasampāto’’tiādimāha.
‘‘তত্থ তিস্সং গাথাযং কতমানি ইন্দ্রিযানি নিদ্ধারেত্ৰা কতমেহি নিদ্ধারিতেহি ধম্মেহি ওতরতী’’তি পুচ্ছিতব্বত্তা ‘‘তস্মা’’তিআদি ৰুত্তং। যা ‘‘তস্মা রক্খিতচিত্তস্সা’’তিআদিগাথা ৰুত্তা, তিস্সং গাথাযং ‘‘তস্মা…পে॰… পুরেক্খারো’’তি সুত্তপ্পদেসেন সম্মাদিট্ঠি গহিতা, সম্মাদিট্ঠিযা গহিতায পঞ্চিন্দ্রিযানি সদ্ধাদিপঞ্চিন্দ্রিযানি গহিতানি ভৰন্তি।
‘‘Tattha tissaṃ gāthāyaṃ katamāni indriyāni niddhāretvā katamehi niddhāritehi dhammehi otaratī’’ti pucchitabbattā ‘‘tasmā’’tiādi vuttaṃ. Yā ‘‘tasmā rakkhitacittassā’’tiādigāthā vuttā, tissaṃ gāthāyaṃ ‘‘tasmā…pe… purekkhāro’’ti suttappadesena sammādiṭṭhi gahitā, sammādiṭṭhiyā gahitāya pañcindriyāni saddhādipañcindriyāni gahitāni bhavanti.
তানিযেৰ সদ্ধাদিপঞ্চিন্দ্রিযানি ৰিজ্জায উপকারত্তা ৰা পদট্ঠানত্তা ৰা ৰিজ্জা ভৰন্তি, ৰিজ্জুপ্পাদা তাদিসায ৰিজ্জায উপ্পাদা উপ্পাদহেতুতো অৰিজ্জানিরোধো সম্ভৰতি, অৰিজ্জানিরোধা সঙ্খারনিরোধো সম্ভৰতি…পে॰… জাতিনিরোধা জরামরণনিরোধো সম্ভৰতীতি। অযং ওতরণা পটিচ্চসমুপ্পাদেন পঞ্চিন্দ্রিযানং ওতরণা নাম।
Tāniyeva saddhādipañcindriyāni vijjāya upakārattā vā padaṭṭhānattā vā vijjā bhavanti, vijjuppādā tādisāya vijjāya uppādā uppādahetuto avijjānirodho sambhavati, avijjānirodhā saṅkhāranirodho sambhavati…pe… jātinirodhā jarāmaraṇanirodho sambhavatīti. Ayaṃ otaraṇā paṭiccasamuppādena pañcindriyānaṃ otaraṇā nāma.
তানিযেৰ পঞ্চিন্দ্রিযানি সীলক্খন্ধেন সমাধিক্খন্ধেন পঞ্ঞাক্খন্ধেন তীহি খন্ধেহি সঙ্গহিতানি ভৰন্তি সদ্ধাৰীরিযেহি সীলসম্ভৰতো, সতিযা চ পঞ্ঞানুৰত্তকত্তা। অযং ওতরণা খন্ধেহি পঞ্চিন্দ্রিযানং ওতরণা নাম।
Tāniyeva pañcindriyāni sīlakkhandhena samādhikkhandhena paññākkhandhena tīhi khandhehi saṅgahitāni bhavanti saddhāvīriyehi sīlasambhavato, satiyā ca paññānuvattakattā. Ayaṃ otaraṇā khandhehi pañcindriyānaṃ otaraṇā nāma.
তানিযেৰ পঞ্চিন্দ্রিযানি সঙ্খারপরিযাপন্নানি ভৰন্তি। যে সঙ্খারা অনাসৰা ভৰন্তি, ভৰঙ্গা ভৰহেতূ নো ভৰন্তি, তে অনাসৰা সঙ্খারা ধম্মধাতুসঙ্গহিতা ভৰন্তি ধম্মধাতুযা অন্তোগধত্তা। অযং ওতরণা ধাতূহি পঞ্চিন্দ্রিযানং ওতরণা নাম।
Tāniyeva pañcindriyāni saṅkhārapariyāpannāni bhavanti. Ye saṅkhārā anāsavā bhavanti, bhavaṅgā bhavahetū no bhavanti, te anāsavā saṅkhārā dhammadhātusaṅgahitā bhavanti dhammadhātuyā antogadhattā. Ayaṃ otaraṇā dhātūhi pañcindriyānaṃ otaraṇā nāma.
সা অনাসৰা ধম্মধাতু ধম্মাযতনপরিযাপন্না ভৰতি, যং আযতনং অনাসৰং ভৰতি, ভৰঙ্গং ভৰহেতু নো ভৰতি। অযং ওতরণা আযতনেহি ধম্মধাতুযা ওতরণা নাম।
Sā anāsavā dhammadhātu dhammāyatanapariyāpannā bhavati, yaṃ āyatanaṃ anāsavaṃ bhavati, bhavaṅgaṃ bhavahetu no bhavati. Ayaṃ otaraṇā āyatanehi dhammadhātuyā otaraṇā nāma.
‘‘এত্তকোৰ ওতরণো হারসম্পাতো পরিপুণ্ণো’’তি ৰত্তব্বত্তা ‘‘নিযুত্তো ওতরণো হারসম্পাতো’’তি ৰুত্তং। যেন যেন সংৰণ্ণনাৰিসেসভূতেন ওতরণহারসম্পাতেন সুত্তপ্পদেসত্থা ওতরিতব্বা, সো সো সংৰণ্ণনাৰিসেসভূতো ওতরণো হারসম্পাতো নিযুত্তো যথারহং নিদ্ধারেত্ৰা যুজ্জিতব্বোতি অত্থো গহেতব্বোতি।
‘‘Ettakova otaraṇo hārasampāto paripuṇṇo’’ti vattabbattā ‘‘niyutto otaraṇo hārasampāto’’ti vuttaṃ. Yena yena saṃvaṇṇanāvisesabhūtena otaraṇahārasampātena suttappadesatthā otaritabbā, so so saṃvaṇṇanāvisesabhūto otaraṇo hārasampāto niyutto yathārahaṃ niddhāretvā yujjitabboti attho gahetabboti.
ইতি ওতরণহারসম্পাতে সত্তিবলানুরূপা রচিতা
Iti otaraṇahārasampāte sattibalānurūpā racitā
ৰিভাৰনা নিট্ঠিতা।
Vibhāvanā niṭṭhitā.
পণ্ডিতেহি পন…পে॰… গহেতব্বোতি।
Paṇḍitehi pana…pe… gahetabboti.
ইতো পট্ঠায ‘‘তত্থ কতমো’’তিআদিঅনুসন্ধ্যত্থো চ পরিযোসানে ‘‘নিযুত্তো’’তিআদিঅনুসন্ধ্যত্থো চ ৰুত্তনযানুসারেনেৰ ৰিঞ্ঞাতব্বো। কত্থচি কত্থচি পাঠে অপাকটংযেৰ যথাবলং কথযিস্সাম।
Ito paṭṭhāya ‘‘tattha katamo’’tiādianusandhyattho ca pariyosāne ‘‘niyutto’’tiādianusandhyattho ca vuttanayānusāreneva viññātabbo. Katthaci katthaci pāṭhe apākaṭaṃyeva yathābalaṃ kathayissāma.
Related texts:
তিপিটক (মূল) • Tipiṭaka (Mūla) / সুত্তপিটক • Suttapiṭaka / খুদ্দকনিকায • Khuddakanikāya / নেত্তিপ্পকরণপাল়ি • Nettippakaraṇapāḷi / ১২. ওতরণহারসম্পাতো • 12. Otaraṇahārasampāto
