| Library / Tipiṭaka / ತಿಪಿಟಕ • Tipiṭaka / ನೇತ್ತಿವಿಭಾವಿನೀ • Nettivibhāvinī |
೧೨. ಓತರಣಹಾರಸಮ್ಪಾತವಿಭಾವನಾ
12. Otaraṇahārasampātavibhāvanā
೭೪. ಯೇನ ಯೇನ ಪಞ್ಞತ್ತಿಹಾರಸಮ್ಪಾತೇನ ಪಞ್ಞತ್ತಿಪ್ಪಭೇದಾ ನಿದ್ಧಾರಿತಾ, ಸೋ ಪಞ್ಞತ್ತಿಹಾರಸಮ್ಪಾತೋ ಪರಿಪುಣ್ಣೋ, ‘‘ಕತಮೋ ಓತರಣೋ ಹಾರಸಮ್ಪಾತೋ’’ತಿ ಪುಚ್ಛಿತಬ್ಬತ್ತಾ ‘‘ತತ್ಥ ಕತಮೋ ಓತರಣೋ ಹಾರಸಮ್ಪಾತೋ’’ತಿಆದಿಮಾಹ।
74. Yena yena paññattihārasampātena paññattippabhedā niddhāritā, so paññattihārasampāto paripuṇṇo, ‘‘katamo otaraṇo hārasampāto’’ti pucchitabbattā ‘‘tattha katamo otaraṇo hārasampāto’’tiādimāha.
‘‘ತತ್ಥ ತಿಸ್ಸಂ ಗಾಥಾಯಂ ಕತಮಾನಿ ಇನ್ದ್ರಿಯಾನಿ ನಿದ್ಧಾರೇತ್ವಾ ಕತಮೇಹಿ ನಿದ್ಧಾರಿತೇಹಿ ಧಮ್ಮೇಹಿ ಓತರತೀ’’ತಿ ಪುಚ್ಛಿತಬ್ಬತ್ತಾ ‘‘ತಸ್ಮಾ’’ತಿಆದಿ ವುತ್ತಂ। ಯಾ ‘‘ತಸ್ಮಾ ರಕ್ಖಿತಚಿತ್ತಸ್ಸಾ’’ತಿಆದಿಗಾಥಾ ವುತ್ತಾ, ತಿಸ್ಸಂ ಗಾಥಾಯಂ ‘‘ತಸ್ಮಾ…ಪೇ॰… ಪುರೇಕ್ಖಾರೋ’’ತಿ ಸುತ್ತಪ್ಪದೇಸೇನ ಸಮ್ಮಾದಿಟ್ಠಿ ಗಹಿತಾ, ಸಮ್ಮಾದಿಟ್ಠಿಯಾ ಗಹಿತಾಯ ಪಞ್ಚಿನ್ದ್ರಿಯಾನಿ ಸದ್ಧಾದಿಪಞ್ಚಿನ್ದ್ರಿಯಾನಿ ಗಹಿತಾನಿ ಭವನ್ತಿ।
‘‘Tattha tissaṃ gāthāyaṃ katamāni indriyāni niddhāretvā katamehi niddhāritehi dhammehi otaratī’’ti pucchitabbattā ‘‘tasmā’’tiādi vuttaṃ. Yā ‘‘tasmā rakkhitacittassā’’tiādigāthā vuttā, tissaṃ gāthāyaṃ ‘‘tasmā…pe… purekkhāro’’ti suttappadesena sammādiṭṭhi gahitā, sammādiṭṭhiyā gahitāya pañcindriyāni saddhādipañcindriyāni gahitāni bhavanti.
ತಾನಿಯೇವ ಸದ್ಧಾದಿಪಞ್ಚಿನ್ದ್ರಿಯಾನಿ ವಿಜ್ಜಾಯ ಉಪಕಾರತ್ತಾ ವಾ ಪದಟ್ಠಾನತ್ತಾ ವಾ ವಿಜ್ಜಾ ಭವನ್ತಿ, ವಿಜ್ಜುಪ್ಪಾದಾ ತಾದಿಸಾಯ ವಿಜ್ಜಾಯ ಉಪ್ಪಾದಾ ಉಪ್ಪಾದಹೇತುತೋ ಅವಿಜ್ಜಾನಿರೋಧೋ ಸಮ್ಭವತಿ, ಅವಿಜ್ಜಾನಿರೋಧಾ ಸಙ್ಖಾರನಿರೋಧೋ ಸಮ್ಭವತಿ…ಪೇ॰… ಜಾತಿನಿರೋಧಾ ಜರಾಮರಣನಿರೋಧೋ ಸಮ್ಭವತೀತಿ। ಅಯಂ ಓತರಣಾ ಪಟಿಚ್ಚಸಮುಪ್ಪಾದೇನ ಪಞ್ಚಿನ್ದ್ರಿಯಾನಂ ಓತರಣಾ ನಾಮ।
Tāniyeva saddhādipañcindriyāni vijjāya upakārattā vā padaṭṭhānattā vā vijjā bhavanti, vijjuppādā tādisāya vijjāya uppādā uppādahetuto avijjānirodho sambhavati, avijjānirodhā saṅkhāranirodho sambhavati…pe… jātinirodhā jarāmaraṇanirodho sambhavatīti. Ayaṃ otaraṇā paṭiccasamuppādena pañcindriyānaṃ otaraṇā nāma.
ತಾನಿಯೇವ ಪಞ್ಚಿನ್ದ್ರಿಯಾನಿ ಸೀಲಕ್ಖನ್ಧೇನ ಸಮಾಧಿಕ್ಖನ್ಧೇನ ಪಞ್ಞಾಕ್ಖನ್ಧೇನ ತೀಹಿ ಖನ್ಧೇಹಿ ಸಙ್ಗಹಿತಾನಿ ಭವನ್ತಿ ಸದ್ಧಾವೀರಿಯೇಹಿ ಸೀಲಸಮ್ಭವತೋ, ಸತಿಯಾ ಚ ಪಞ್ಞಾನುವತ್ತಕತ್ತಾ। ಅಯಂ ಓತರಣಾ ಖನ್ಧೇಹಿ ಪಞ್ಚಿನ್ದ್ರಿಯಾನಂ ಓತರಣಾ ನಾಮ।
Tāniyeva pañcindriyāni sīlakkhandhena samādhikkhandhena paññākkhandhena tīhi khandhehi saṅgahitāni bhavanti saddhāvīriyehi sīlasambhavato, satiyā ca paññānuvattakattā. Ayaṃ otaraṇā khandhehi pañcindriyānaṃ otaraṇā nāma.
ತಾನಿಯೇವ ಪಞ್ಚಿನ್ದ್ರಿಯಾನಿ ಸಙ್ಖಾರಪರಿಯಾಪನ್ನಾನಿ ಭವನ್ತಿ। ಯೇ ಸಙ್ಖಾರಾ ಅನಾಸವಾ ಭವನ್ತಿ, ಭವಙ್ಗಾ ಭವಹೇತೂ ನೋ ಭವನ್ತಿ, ತೇ ಅನಾಸವಾ ಸಙ್ಖಾರಾ ಧಮ್ಮಧಾತುಸಙ್ಗಹಿತಾ ಭವನ್ತಿ ಧಮ್ಮಧಾತುಯಾ ಅನ್ತೋಗಧತ್ತಾ। ಅಯಂ ಓತರಣಾ ಧಾತೂಹಿ ಪಞ್ಚಿನ್ದ್ರಿಯಾನಂ ಓತರಣಾ ನಾಮ।
Tāniyeva pañcindriyāni saṅkhārapariyāpannāni bhavanti. Ye saṅkhārā anāsavā bhavanti, bhavaṅgā bhavahetū no bhavanti, te anāsavā saṅkhārā dhammadhātusaṅgahitā bhavanti dhammadhātuyā antogadhattā. Ayaṃ otaraṇā dhātūhi pañcindriyānaṃ otaraṇā nāma.
ಸಾ ಅನಾಸವಾ ಧಮ್ಮಧಾತು ಧಮ್ಮಾಯತನಪರಿಯಾಪನ್ನಾ ಭವತಿ, ಯಂ ಆಯತನಂ ಅನಾಸವಂ ಭವತಿ, ಭವಙ್ಗಂ ಭವಹೇತು ನೋ ಭವತಿ। ಅಯಂ ಓತರಣಾ ಆಯತನೇಹಿ ಧಮ್ಮಧಾತುಯಾ ಓತರಣಾ ನಾಮ।
Sā anāsavā dhammadhātu dhammāyatanapariyāpannā bhavati, yaṃ āyatanaṃ anāsavaṃ bhavati, bhavaṅgaṃ bhavahetu no bhavati. Ayaṃ otaraṇā āyatanehi dhammadhātuyā otaraṇā nāma.
‘‘ಏತ್ತಕೋವ ಓತರಣೋ ಹಾರಸಮ್ಪಾತೋ ಪರಿಪುಣ್ಣೋ’’ತಿ ವತ್ತಬ್ಬತ್ತಾ ‘‘ನಿಯುತ್ತೋ ಓತರಣೋ ಹಾರಸಮ್ಪಾತೋ’’ತಿ ವುತ್ತಂ। ಯೇನ ಯೇನ ಸಂವಣ್ಣನಾವಿಸೇಸಭೂತೇನ ಓತರಣಹಾರಸಮ್ಪಾತೇನ ಸುತ್ತಪ್ಪದೇಸತ್ಥಾ ಓತರಿತಬ್ಬಾ, ಸೋ ಸೋ ಸಂವಣ್ಣನಾವಿಸೇಸಭೂತೋ ಓತರಣೋ ಹಾರಸಮ್ಪಾತೋ ನಿಯುತ್ತೋ ಯಥಾರಹಂ ನಿದ್ಧಾರೇತ್ವಾ ಯುಜ್ಜಿತಬ್ಬೋತಿ ಅತ್ಥೋ ಗಹೇತಬ್ಬೋತಿ।
‘‘Ettakova otaraṇo hārasampāto paripuṇṇo’’ti vattabbattā ‘‘niyutto otaraṇo hārasampāto’’ti vuttaṃ. Yena yena saṃvaṇṇanāvisesabhūtena otaraṇahārasampātena suttappadesatthā otaritabbā, so so saṃvaṇṇanāvisesabhūto otaraṇo hārasampāto niyutto yathārahaṃ niddhāretvā yujjitabboti attho gahetabboti.
ಇತಿ ಓತರಣಹಾರಸಮ್ಪಾತೇ ಸತ್ತಿಬಲಾನುರೂಪಾ ರಚಿತಾ
Iti otaraṇahārasampāte sattibalānurūpā racitā
ವಿಭಾವನಾ ನಿಟ್ಠಿತಾ।
Vibhāvanā niṭṭhitā.
ಪಣ್ಡಿತೇಹಿ ಪನ…ಪೇ॰… ಗಹೇತಬ್ಬೋತಿ।
Paṇḍitehi pana…pe… gahetabboti.
ಇತೋ ಪಟ್ಠಾಯ ‘‘ತತ್ಥ ಕತಮೋ’’ತಿಆದಿಅನುಸನ್ಧ್ಯತ್ಥೋ ಚ ಪರಿಯೋಸಾನೇ ‘‘ನಿಯುತ್ತೋ’’ತಿಆದಿಅನುಸನ್ಧ್ಯತ್ಥೋ ಚ ವುತ್ತನಯಾನುಸಾರೇನೇವ ವಿಞ್ಞಾತಬ್ಬೋ। ಕತ್ಥಚಿ ಕತ್ಥಚಿ ಪಾಠೇ ಅಪಾಕಟಂಯೇವ ಯಥಾಬಲಂ ಕಥಯಿಸ್ಸಾಮ।
Ito paṭṭhāya ‘‘tattha katamo’’tiādianusandhyattho ca pariyosāne ‘‘niyutto’’tiādianusandhyattho ca vuttanayānusāreneva viññātabbo. Katthaci katthaci pāṭhe apākaṭaṃyeva yathābalaṃ kathayissāma.
Related texts:
ತಿಪಿಟಕ (ಮೂಲ) • Tipiṭaka (Mūla) / ಸುತ್ತಪಿಟಕ • Suttapiṭaka / ಖುದ್ದಕನಿಕಾಯ • Khuddakanikāya / ನೇತ್ತಿಪ್ಪಕರಣಪಾಳಿ • Nettippakaraṇapāḷi / ೧೨. ಓತರಣಹಾರಸಮ್ಪಾತೋ • 12. Otaraṇahārasampāto
