| Library / Tipiṭaka / तिपिटक • Tipiṭaka / नेत्तिप्पकरणपाळि • Nettippakaraṇapāḷi |
१२. ओतरणहारसम्पातो
12. Otaraṇahārasampāto
७४. तत्थ कतमो ओतरणो हारसम्पातो?
74. Tattha katamo otaraṇo hārasampāto?
‘‘तस्मा रक्खितचित्तस्स, सम्मासङ्कप्पगोचरो’’ति गाथा। ‘‘तस्मा रक्खितचित्तस्स, सम्मासङ्कप्पगोचरो’’ । ‘‘सम्मादिट्ठिपुरेक्खारो’’ति सम्मादिट्ठिया गहिताय गहितानि भवन्ति पञ्चिन्द्रियानि, अयं इन्द्रियेहि ओतरणा।
‘‘Tasmā rakkhitacittassa, sammāsaṅkappagocaro’’ti gāthā. ‘‘Tasmā rakkhitacittassa, sammāsaṅkappagocaro’’ . ‘‘Sammādiṭṭhipurekkhāro’’ti sammādiṭṭhiyā gahitāya gahitāni bhavanti pañcindriyāni, ayaṃ indriyehi otaraṇā.
तानियेव इन्द्रियानि विज्जा, विज्जुप्पादा अविज्जानिरोधो, अविज्जानिरोधा सङ्खारनिरोधो, सङ्खारनिरोधा विञ्ञाणनिरोधो, एवं सब्बं, अयं पटिच्चसमुप्पादेन ओतरणा।
Tāniyeva indriyāni vijjā, vijjuppādā avijjānirodho, avijjānirodhā saṅkhāranirodho, saṅkhāranirodhā viññāṇanirodho, evaṃ sabbaṃ, ayaṃ paṭiccasamuppādena otaraṇā.
तानियेव पञ्चिन्द्रियानि तीहि खन्धेहि सङ्गहितानि – सीलक्खन्धेन समाधिक्खन्धेन पञ्ञाक्खन्धेन। अयं खन्धेहि ओतरणा।
Tāniyeva pañcindriyāni tīhi khandhehi saṅgahitāni – sīlakkhandhena samādhikkhandhena paññākkhandhena. Ayaṃ khandhehi otaraṇā.
तानि येव पञ्चिन्द्रियानि सङ्खारपरियापन्नानि। ये सङ्खारा अनासवा नो च भवङ्गा, ते सङ्खारा धम्मधातुसङ्गहिता, अयं धातूहि ओतरणा।
Tāni yeva pañcindriyāni saṅkhārapariyāpannāni. Ye saṅkhārā anāsavā no ca bhavaṅgā, te saṅkhārā dhammadhātusaṅgahitā, ayaṃ dhātūhi otaraṇā.
सा धम्मधातु धम्मायतनपरियापन्ना, यं आयतनं अनासवं नो च भवङ्गं, अयं आयतनेहि ओतरणा।
Sā dhammadhātu dhammāyatanapariyāpannā, yaṃ āyatanaṃ anāsavaṃ no ca bhavaṅgaṃ, ayaṃ āyatanehi otaraṇā.
नियुत्तो ओतरणो हारसम्पातो।
Niyutto otaraṇo hārasampāto.
Related texts:
टीका • Tīkā / सुत्तपिटक (टीका) • Suttapiṭaka (ṭīkā) / खुद्दकनिकाय (टीका) • Khuddakanikāya (ṭīkā) / नेत्तिविभाविनी • Nettivibhāvinī / १२. ओतरणहारसम्पातविभावना • 12. Otaraṇahārasampātavibhāvanā
