| Library / Tipiṭaka / திபிடக • Tipiṭaka / நெத்திப்பகரண-டீகா • Nettippakaraṇa-ṭīkā |
12. ஓதரணஹாரவிப⁴ங்க³வண்ணனா
12. Otaraṇahāravibhaṅgavaṇṇanā
42. இந்த்³ரியேஹீதி கரணே கரணவசனங் ‘‘மக்³கே³ன க³ச்ச²தீ’’திஆதீ³ஸு விய, ‘‘ப²ரஸுனா சி²ந்த³தீ’’தி ஏவமாதீ³ஸு விய ச. ஓதரணாதி அனுப்பவேஸனா.
42.Indriyehīti karaṇe karaṇavacanaṃ ‘‘maggena gacchatī’’tiādīsu viya, ‘‘pharasunā chindatī’’ti evamādīsu viya ca. Otaraṇāti anuppavesanā.
பஞ்ஞாக்க²ந்தே⁴ ஸங்க³ண்ஹனவஸேன ஸம்மாஸங்கப்போ வியாதி யோஜனா. அதி⁴சித்தஅனுயுத்தானங் ஸத்³த³ஹனுஸ்ஸஹனுபட்டா²னஸமாத³ஹனேஹி ஸத்³தா⁴தீ³ஸு உபகரொந்தேஸு ஏவ பஞ்ஞா த³ஸ்ஸனகிச்சங் ஸாதே⁴தீதி த³ஸ்ஸெந்தோ ‘‘ஸத்³தா⁴..பே॰… வுத்தானீ’’தி ஆஹ. நோ ச ப⁴வங்கா³தி தேஸங் ஸங்கா²ரானங் பவத்திகாரணதாபா⁴வங் த³ஸ்ஸேதி.
Paññākkhandhe saṅgaṇhanavasena sammāsaṅkappo viyāti yojanā. Adhicittaanuyuttānaṃ saddahanussahanupaṭṭhānasamādahanehi saddhādīsu upakarontesu eva paññā dassanakiccaṃ sādhetīti dassento ‘‘saddhā..pe… vuttānī’’ti āha. No ca bhavaṅgāti tesaṃ saṅkhārānaṃ pavattikāraṇatābhāvaṃ dasseti.
43. ததா² வுத்தோதி ‘‘நிஸ்ஸயோ’’தி வுத்தோ. சேதனாஸீஸேன தண்ஹங் ஏவ வத³தி சேதனாஸஹசரணதோ.
43.Tathā vuttoti ‘‘nissayo’’ti vutto. Cetanāsīsena taṇhaṃ eva vadati cetanāsahacaraṇato.
ரத்தஸ்ஸாதி மக்³கே³ன அஸமுச்சி²ன்னராக³ஸ்ஸ. யேன புக்³க³லோ ‘‘ரத்தோ’’தி வுச்சதி, தஸ்ஸ ராக³ஸ்ஸ ஸம்ப³ந்தி⁴னீ ஸுகா² வேத³னா வுத்தா தத்த² தஸ்ஸ அனுஸயனதோ. தேனாஹ ‘‘ஸுகா²ய…பே॰… வுத்த’’ந்தி. ஏஸ நயோ ஸேஸேஸுபி. தேனாஹ ‘‘ததா²’’திஆதி³.
Rattassāti maggena asamucchinnarāgassa. Yena puggalo ‘‘ratto’’ti vuccati, tassa rāgassa sambandhinī sukhā vedanā vuttā tattha tassa anusayanato. Tenāha ‘‘sukhāya…pe… vutta’’nti. Esa nayo sesesupi. Tenāha ‘‘tathā’’tiādi.
தானி ஏவ இந்த்³ரியானீதி ஸுக²ஸோமனஸ்ஸுபெக்கி²ந்த்³ரியானி. ‘‘ஸங்கா²ரபரியாபன்னானீ’’தி வசனங் ஸந்தா⁴யாஹ ‘‘இத⁴ வேத³னாஸீஸேன சேதனா வுத்தா’’தி. ந ஹி வேத³னா ஸங்கா²ரக்க²ந்த⁴பரியாபன்னா ஹோதி. தண்ஹாய, தி³ட்டி²யாதி ச உபயோகே³ கரணவசனந்தி த³ஸ்ஸெந்தோ ‘‘தண்ஹாயா’’திஆதி³மாஹ. இதா³னி உபயோக³வஸேனேவ ‘‘தண்ஹாயா’’திஆதீ³னங் அத்த²ங் த³ஸ்ஸேதுங் ‘‘யதா² வா’’திஆதி³மாஹ. தத்த² ஸேஸத⁴ம்மானந்தி தண்ஹாவஜ்ஜிதஅவிஸிட்ட²த⁴ம்மானங். தண்ஹாய நிஸ்ஸயபா⁴வேதி யதா³ தண்ஹா தேஸங் நிஸ்ஸயோ ஹோதி.
Tāni eva indriyānīti sukhasomanassupekkhindriyāni. ‘‘Saṅkhārapariyāpannānī’’ti vacanaṃ sandhāyāha ‘‘idha vedanāsīsena cetanā vuttā’’ti. Na hi vedanā saṅkhārakkhandhapariyāpannā hoti. Taṇhāya, diṭṭhiyāti ca upayoge karaṇavacananti dassento ‘‘taṇhāyā’’tiādimāha. Idāni upayogavaseneva ‘‘taṇhāyā’’tiādīnaṃ atthaṃ dassetuṃ ‘‘yathā vā’’tiādimāha. Tattha sesadhammānanti taṇhāvajjitaavisiṭṭhadhammānaṃ. Taṇhāya nissayabhāveti yadā taṇhā tesaṃ nissayo hoti.
தண்ஹாய ஸேஸத⁴ம்மானங் பச்சயபா⁴வேதி யதா³ ஸேஸத⁴ம்மா தண்ஹாபச்சயா ஹொந்தி. ‘‘கரஜகாயஸன்னிஸ்ஸிதா’’தி இமினா வேத³னாதி³க்க²ந்த⁴த்தயனிஸ்ஸிதாபி க³ஹிதா காயப்பஸ்ஸத்³தி⁴பா⁴வதோ. காரணபா⁴வந்தி பரம்பரஹேதுபா⁴வங். தண்ஹாதி³ட்டி²உபயேனாதி தி³ட்டி²உபயேன ச தி³ட்டி²ஸஹக³ததண்ஹாஉபயேன ச.
Taṇhāya sesadhammānaṃ paccayabhāveti yadā sesadhammā taṇhāpaccayā honti. ‘‘Karajakāyasannissitā’’ti iminā vedanādikkhandhattayanissitāpi gahitā kāyappassaddhibhāvato. Kāraṇabhāvanti paramparahetubhāvaṃ. Taṇhādiṭṭhiupayenāti diṭṭhiupayena ca diṭṭhisahagatataṇhāupayena ca.
‘‘ஆக³தீதி இதா⁴க³தி, க³தீதி பேச்சப⁴வோ’’தி பத³த்³வயேன வுத்தமேவத்த²ங் பாகடதரங் காதுங் பாளியங் ‘‘ஆக³திக³தீபி ந ப⁴வந்தீ’’தி வுத்தங். இத⁴ ஹுரந்தி த்³வாராரம்மணத⁴ம்மா த³ஸ்ஸிதா ஆஸன்னதூ³ரபா⁴வேஹி த்³வாராரம்மணேஹி வினிவத்தெத்வா க³ஹிதத்தா. இத⁴ த்³வாரப்பவத்தத⁴ம்மா ‘‘உப⁴யமந்தரேனா’’தி பத³ஸ்ஸ அத்த²பா⁴வேன வுத்தா. சதுப்³யூஹஹாரே பன அனிந்த்³ரியப³த்³த⁴ரூபத⁴ம்மா ததா² வுத்தா. காரணபூ⁴தேன அனந்தரபச்சயபூ⁴தேன, உபனிஸ்ஸயபச்சயபூ⁴தேன ச. யே த⁴ம்மா உபாதா³ய ‘‘அத்தா’’தி ஸமஞ்ஞா, தேஸங் விஞ்ஞாணாதி³த⁴ம்மானங் அபா⁴வேன அனுப்பாத³த⁴ம்மதங் ஆபாதி³தத்தாதி அத்தோ². ‘‘அனிஸ்ஸிதஸ்ஸ சலிதங் நத்தீ²’’திஆதி³னா படிலோமதோ பச்சயபா⁴வோ த³ஸ்ஸிதோதி த³ஸ்ஸெந்தோ பாளியங் ‘‘ஏஸேவந்தோ து³க்க²ஸ்ஸாதி படிச்சஸமுப்பாதோ³’’தி வத்வா நனு ‘‘அவிஜ்ஜாபச்சயா ஸங்கா²ரா’’திஆதி³கோ படிச்சஸமுப்பாதோ³தி சோத³னங் ஸந்தா⁴ய யதா²வுத்தஸ்ஸ படிச்சஸமுப்பாத³பா⁴வங் த³ஸ்ஸேதுங் ‘‘ஸோ து³விதோ⁴’’திஆதி³னா லோகியலோகுத்தரவஸேன படிச்சஸமுப்பாதோ³ விப⁴த்தோ. தத³த்த²தாயாதி வீதராக³விமுத்திஅத்த²தாய. தப்³பா⁴வந்தி லோகுத்தரபடிச்சஸமுப்பாத³பா⁴வங்.
‘‘Āgatītiidhāgati, gatīti peccabhavo’’ti padadvayena vuttamevatthaṃ pākaṭataraṃ kātuṃ pāḷiyaṃ ‘‘āgatigatīpi na bhavantī’’ti vuttaṃ. Idha huranti dvārārammaṇadhammā dassitā āsannadūrabhāvehi dvārārammaṇehi vinivattetvā gahitattā. Idha dvārappavattadhammā ‘‘ubhayamantarenā’’ti padassa atthabhāvena vuttā. Catubyūhahāre pana anindriyabaddharūpadhammā tathā vuttā. Kāraṇabhūtena anantarapaccayabhūtena, upanissayapaccayabhūtena ca. Ye dhammā upādāya ‘‘attā’’ti samaññā, tesaṃ viññāṇādidhammānaṃ abhāvena anuppādadhammataṃ āpāditattāti attho. ‘‘Anissitassa calitaṃ natthī’’tiādinā paṭilomato paccayabhāvo dassitoti dassento pāḷiyaṃ ‘‘esevanto dukkhassāti paṭiccasamuppādo’’ti vatvā nanu ‘‘avijjāpaccayā saṅkhārā’’tiādiko paṭiccasamuppādoti codanaṃ sandhāya yathāvuttassa paṭiccasamuppādabhāvaṃ dassetuṃ ‘‘so duvidho’’tiādinā lokiyalokuttaravasena paṭiccasamuppādo vibhatto. Tadatthatāyāti vītarāgavimuttiatthatāya. Tabbhāvanti lokuttarapaṭiccasamuppādabhāvaṃ.
ஓதரணஹாரவிப⁴ங்க³வண்ணனா நிட்டி²தா.
Otaraṇahāravibhaṅgavaṇṇanā niṭṭhitā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / கு²த்³த³கனிகாய • Khuddakanikāya / நெத்திப்பகரணபாளி • Nettippakaraṇapāḷi / 12. ஓதரணஹாரவிப⁴ங்கோ³ • 12. Otaraṇahāravibhaṅgo
அட்ட²கதா² • Aṭṭhakathā / ஸுத்தபிடக (அட்ட²கதா²) • Suttapiṭaka (aṭṭhakathā) / கு²த்³த³கனிகாய (அட்ட²கதா²) • Khuddakanikāya (aṭṭhakathā) / நெத்திப்பகரண-அட்ட²கதா² • Nettippakaraṇa-aṭṭhakathā / 12. ஓதரணஹாரவிப⁴ங்க³வண்ணனா • 12. Otaraṇahāravibhaṅgavaṇṇanā
டீகா • Tīkā / ஸுத்தபிடக (டீகா) • Suttapiṭaka (ṭīkā) / கு²த்³த³கனிகாய (டீகா) • Khuddakanikāya (ṭīkā) / நெத்திவிபா⁴வினீ • Nettivibhāvinī / 12. ஓதரணஹாரவிப⁴ங்க³விபா⁴வனா • 12. Otaraṇahāravibhaṅgavibhāvanā
