| Library / Tipiṭaka / திபிடக • Tipiṭaka / கங்கா²விதரணீ-அபி⁴னவ-டீகா • Kaṅkhāvitaraṇī-abhinava-ṭīkā |
3. ஓவாத³வக்³கோ³
3. Ovādavaggo
1. ஓவாத³ஸிக்கா²பத³வண்ணனா
1. Ovādasikkhāpadavaṇṇanā
அட்ட²ங்க³ஸமன்னாக³தஸ்ஸாதி ‘‘ஸீலவா ஹோதீ’’திஆதீ³ஹி (பாசி॰ 147) அட்ட²ஹி அங்கே³ஹி ஸமன்னாக³தஸ்ஸ. அனுஞ்ஞாதாதி இமஸ்ஸ ஸிக்கா²பத³ஸ்ஸ நிதா³னே அனுஞ்ஞாதா . ‘‘வஸ்ஸஸதூபஸம்பன்னாயா’’திஆதி³ வக்க²மானஅட்ட²க³ருத⁴ம்மத³ஸ்ஸனங். தத்த² ஸாமீசிகம்மந்தி மக்³க³ஸம்பதா³னபீ³ஜனபானீயாபுச்ச²னாதி³கங் அனுச்ச²விகங் வத்தங். ஆதி³ஸத்³தே³ன –
Aṭṭhaṅgasamannāgatassāti ‘‘sīlavā hotī’’tiādīhi (pāci. 147) aṭṭhahi aṅgehi samannāgatassa. Anuññātāti imassa sikkhāpadassa nidāne anuññātā . ‘‘Vassasatūpasampannāyā’’tiādi vakkhamānaaṭṭhagarudhammadassanaṃ. Tattha sāmīcikammanti maggasampadānabījanapānīyāpucchanādikaṃ anucchavikaṃ vattaṃ. Ādisaddena –
‘‘ந பி⁴க்கு²னியா அபி⁴க்கு²கே ஆவாஸே வஸ்ஸங் வஸிதப்³ப³ங், அன்வத்³த⁴மாஸங் பி⁴க்கு²னியா பி⁴க்கு²ஸங்க⁴தோ த்³வே த⁴ம்மா பச்சாஸீஸிதப்³பா³ உபோஸத²புச்ச²கஞ்ச ஓவாதூ³பஸங்கமனஞ்ச, வஸ்ஸங்வுட்டா²ய பி⁴க்கு²னியா உப⁴தோஸங்கே⁴ தீஹி டா²னேஹி பவாரேதப்³ப³ங் தி³ட்டே²ன வா ஸுதேன வா பரிஸங்காய வா, க³ருத⁴ம்மங் அஜ்ஜா²பன்னாய பி⁴க்கு²னியா உப⁴தோஸங்கே⁴ பக்க²மானத்தங் சரிதப்³ப³ங், த்³வே வஸ்ஸானி ச²ஸு த⁴ம்மேஸு ஸிக்கி²தஸிக்கா²ய ஸிக்க²மானாய உப⁴தோஸங்கே⁴ உபஸம்பதா³ பரியேஸிதப்³பா³, ந பி⁴க்கு²னியா கேனசி பரியாயேன பி⁴க்கு² அக்கோஸிதப்³போ³ பரிபா⁴ஸிதப்³போ³, அஜ்ஜதக்³கே³ ஓவடோ பி⁴க்கு²னீனங் பி⁴க்கூ²ஸு வசனபதோ², அனோவடோ பி⁴க்கூ²னங் பி⁴க்கு²னீஸு வசனபதோ²’’தி (சூளவ॰ 403; அ॰ நி॰ 8.51) –
‘‘Na bhikkhuniyā abhikkhuke āvāse vassaṃ vasitabbaṃ, anvaddhamāsaṃ bhikkhuniyā bhikkhusaṅghato dve dhammā paccāsīsitabbā uposathapucchakañca ovādūpasaṅkamanañca, vassaṃvuṭṭhāya bhikkhuniyā ubhatosaṅghe tīhi ṭhānehi pavāretabbaṃ diṭṭhena vā sutena vā parisaṅkāya vā, garudhammaṃ ajjhāpannāya bhikkhuniyā ubhatosaṅghe pakkhamānattaṃ caritabbaṃ, dve vassāni chasu dhammesu sikkhitasikkhāya sikkhamānāya ubhatosaṅghe upasampadā pariyesitabbā, na bhikkhuniyā kenaci pariyāyena bhikkhu akkositabbo paribhāsitabbo, ajjatagge ovaṭo bhikkhunīnaṃ bhikkhūsu vacanapatho, anovaṭo bhikkhūnaṃ bhikkhunīsu vacanapatho’’ti (cūḷava. 403; a. ni. 8.51) –
இமே ஸத்த த⁴ம்மே ஸங்க³ண்ஹாதி. க³ருத⁴ம்மேதி க³ருகே த⁴ம்மே. தே ஹி கா³ரவங் கத்வா பி⁴க்கு²னீஹி ஸம்படிச்சி²தப்³ப³த்தா ‘‘க³ருத⁴ம்மா’’தி வுச்சந்தி.
Ime satta dhamme saṅgaṇhāti. Garudhammeti garuke dhamme. Te hi gāravaṃ katvā bhikkhunīhi sampaṭicchitabbattā ‘‘garudhammā’’ti vuccanti.
அஞ்ஞேன வா த⁴ம்மேனாதி ட²பெத்வா அட்ட² க³ருத⁴ம்மே அஞ்ஞேன யேன கேனசி த⁴ம்மேன. பி⁴க்கு²னீஸு உபஸம்பன்னமத்தங் வா ஓவத³தோதி பி⁴க்கு²னீஸு உபஸம்பன்னமத்தங் க³ருத⁴ம்மேன ஓவத³தோ வா. பி⁴க்கூ²னங் ஸந்திகே உபஸம்பன்னாய யதா²வத்து²கமேவ. ‘‘அத⁴ம்மகம்மே’’திஆதீ³ஸு பி⁴க்கு²னோவாத³ஸம்முதிகம்மங் ‘‘கம்ம’’ந்தி வேதி³தப்³ப³ந்தி ஆஹ ‘‘ஸம்மதஸ்ஸாபீ’’திஆதி³. வக்³கே³ பி⁴க்கு²னிஸங்கே⁴ ஓவத³தோ திகபாசித்தியந்தி வக்³கே³ பி⁴க்கு²னிஸங்கே⁴ ஓவத³தோ வக்³க³ஸஞ்ஞிவேமதிகஸமக்³க³ஸஞ்ஞீனங் வஸேன தீணி பாசித்தியானி. ததா² வேமதிகஸ்ஸ சாதி அத⁴ம்மகம்மே வேமதிகஸ்ஸ ச வக்³கே³ பி⁴க்கு²னிஸங்கே⁴ ஓவத³தோ திகபாசித்தியந்தி அத்தோ². ஏஸ நயோ த⁴ம்மகம்மஸஞ்ஞினோ சாதி எத்தா²பி. யதா² ச வக்³கே³ பி⁴க்கு²னிஸங்கே⁴ ஓவத³தோ நவ பாசித்தியானி, ஏவங் அத⁴ம்மகம்மே அத⁴ம்மகம்மஸஞ்ஞினோ ஸமக்³கே³ பி⁴க்கு²னிஸங்கே⁴ ஓவத³தோ தஸ்மிங் ஸங்கே⁴ வக்³க³ஸஞ்ஞிவேமதிகஸமக்³க³ஸஞ்ஞீனங் வஸேன திகபாசித்தியங், ததா² வேமதிகஸ்ஸ ச த⁴ம்மகம்மஸஞ்ஞினோ சாதி நவ பாசித்தியானி. தேனாஹ ‘‘ஸமக்³கே³பி பி⁴க்கு²னிஸங்கே⁴ நவா’’திஆதி³. த⁴ம்மகம்மே பன அத⁴ம்மகம்மஸஞ்ஞினோ வக்³க³ங் பி⁴க்கு²னிஸங்க⁴ங் ஓவத³தோ திகது³க்கடங், ததா² வேமதிகஸ்ஸ, த⁴ம்மகம்மஸஞ்ஞினோ சாதி நவ து³க்கடானி. ஸமக்³க³ங் பன பி⁴க்கு²னிஸங்க⁴ங் ஓவத³தோ அட்டா²தி ஸத்தரஸ து³க்கடானி. தேனாஹ ‘‘ஸசே பனா’’திஆதி³. அஞ்ஞங் த⁴ம்மந்தி அஞ்ஞங் ஸுத்தந்தங் வா அபி⁴த⁴ம்மங் வா. ‘‘ஸமக்³கா³ம்ஹாய்யா’’தி வசனேன ஹி ஓவாத³ங் பச்சாஸீஸந்தி. தஸ்மா ட²பெத்வா ஓவாத³ங் அஞ்ஞங் த⁴ம்மங் ப⁴ணந்தஸ்ஸ து³க்கடங். ஓவாத³ஞ்ச அனிய்யாதெத்வாதி ‘‘ஏஸோ ப⁴கி³னி ஓவாதோ³’’தி அவத்வா. பரிபுச்ச²ங் தே³தீதி தஸ்ஸாயேவ பகு³ணாய க³ருத⁴ம்மபாளியா அத்த²ங் ப⁴ணதி. ஓஸாரேஹீதி உச்சாரேஹி, கதே²ஹீதி அத்தோ². ஓஸாரேதீதி அட்ட²க³ருத⁴ம்மபாளிங் வத³தி. பஞ்ஹங் புட்டோ²தி க³ருத⁴ம்மனிஸ்ஸிதங் வா க²ந்தா⁴தி³னிஸ்ஸிதங் வா பஞ்ஹங் பி⁴க்கு²னியா புட்டோ².
Aññena vā dhammenāti ṭhapetvā aṭṭha garudhamme aññena yena kenaci dhammena. Bhikkhunīsu upasampannamattaṃ vā ovadatoti bhikkhunīsu upasampannamattaṃ garudhammena ovadato vā. Bhikkhūnaṃ santike upasampannāya yathāvatthukameva. ‘‘Adhammakamme’’tiādīsu bhikkhunovādasammutikammaṃ ‘‘kamma’’nti veditabbanti āha ‘‘sammatassāpī’’tiādi. Vagge bhikkhunisaṅghe ovadato tikapācittiyanti vagge bhikkhunisaṅghe ovadato vaggasaññivematikasamaggasaññīnaṃ vasena tīṇi pācittiyāni. Tathā vematikassa cāti adhammakamme vematikassa ca vagge bhikkhunisaṅghe ovadato tikapācittiyanti attho. Esa nayo dhammakammasaññino cāti etthāpi. Yathā ca vagge bhikkhunisaṅghe ovadato nava pācittiyāni, evaṃ adhammakamme adhammakammasaññino samagge bhikkhunisaṅghe ovadato tasmiṃ saṅghe vaggasaññivematikasamaggasaññīnaṃ vasena tikapācittiyaṃ, tathā vematikassa ca dhammakammasaññino cāti nava pācittiyāni. Tenāha ‘‘samaggepi bhikkhunisaṅghe navā’’tiādi. Dhammakamme pana adhammakammasaññino vaggaṃ bhikkhunisaṅghaṃ ovadato tikadukkaṭaṃ, tathā vematikassa, dhammakammasaññino cāti nava dukkaṭāni. Samaggaṃ pana bhikkhunisaṅghaṃ ovadato aṭṭhāti sattarasa dukkaṭāni. Tenāha ‘‘sace panā’’tiādi. Aññaṃ dhammanti aññaṃ suttantaṃ vā abhidhammaṃ vā. ‘‘Samaggāmhāyyā’’ti vacanena hi ovādaṃ paccāsīsanti. Tasmā ṭhapetvā ovādaṃ aññaṃ dhammaṃ bhaṇantassa dukkaṭaṃ. Ovādañca aniyyātetvāti ‘‘eso bhagini ovādo’’ti avatvā. Paripucchaṃ detīti tassāyeva paguṇāya garudhammapāḷiyā atthaṃ bhaṇati. Osārehīti uccārehi, kathehīti attho. Osāretīti aṭṭhagarudhammapāḷiṃ vadati. Pañhaṃ puṭṭhoti garudhammanissitaṃ vā khandhādinissitaṃ vā pañhaṃ bhikkhuniyā puṭṭho.
ஓவாத³ஸிக்கா²பத³வண்ணனா நிட்டி²தா.
Ovādasikkhāpadavaṇṇanā niṭṭhitā.
