| Library / Tipiṭaka / திபிடக • Tipiṭaka / விமதிவினோத³னீ-டீகா • Vimativinodanī-ṭīkā |
3. ஓவாத³வக்³கோ³
3. Ovādavaggo
1. ஓவாத³ஸிக்கா²பத³வண்ணனா
1. Ovādasikkhāpadavaṇṇanā
144. ததியவக்³க³ஸ்ஸ பட²மே திரச்சா²னபூ⁴தந்தி திரோகரணபூ⁴தங், பா³ஹிரபூ⁴தந்தி அத்தோ². ஸமித்³தோ⁴தி பரிபுண்ணோ. ஸஹிதத்தோ² அத்த²யுத்தோ. அத்த²க³ம்பீ⁴ரதாதி³னா க³ம்பீ⁴ரோ.
144. Tatiyavaggassa paṭhame tiracchānabhūtanti tirokaraṇabhūtaṃ, bāhirabhūtanti attho. Samiddhoti paripuṇṇo. Sahitattho atthayutto. Atthagambhīratādinā gambhīro.
145-147. பரதோதி உத்தரி. கரொந்தோவாதி பரிபா³ஹிரே கரொந்தோ. விப⁴ங்கே³தி ஜா²னவிப⁴ங்கே³. சரணந்தி நிப்³பா³னக³மனாய பாத³ங்.
145-147.Paratoti uttari. Karontovāti paribāhire karonto. Vibhaṅgeti jhānavibhaṅge. Caraṇanti nibbānagamanāya pādaṃ.
யத³ஸ்ஸாதி யங் அஸ்ஸ. தா⁴ரேதீதி அவினஸ்ஸமானங் தா⁴ரேதி. பரிகத²னத்த²ந்தி பகிண்ணககதா²வஸேன பரிச்சி²ன்னத⁴ம்மகத²னத்த²ங். திஸ்ஸோ அனுமோத³னாதி ஸங்க⁴ப⁴த்தாதீ³ஸு தா³னானிஸங்ஸப்படிஸங்யுத்தா நிதி⁴குண்ட³ஸுத்தாதி³ (கு²॰ பா॰ 8.1 ஆத³யோ) -அனுமோத³னா, கே³ஹப்பவேஸமங்க³லாதீ³ஸு மங்க³லஸுத்தாதி³ (கு²॰ பா॰ 5.1 ஆத³யோ; ஸு॰ நி॰ மங்க³லஸுத்த) -அனுமோத³னா, மதகப⁴த்தாதி³அமங்க³லேஸு திரோகுட்டாதி³ (கு²॰ பா॰ 7.1 ஆத³யோ; பே॰ வ॰ 14 ஆத³யோ) -அனுமோத³னாதி இமா திஸ்ஸோ அனுமோத³னா. கம்மாகம்மவினிச்ச²யோதி பரிவாராவஸானே கம்மவக்³கே³ (பரி॰ 482 ஆத³யோ) வுத்தவினிச்ச²யோ. ஸமாதி⁴வஸேனாதி ஸமத²புப்³ப³கவஸேன. விபஸ்ஸனாவஸேன வாதி தி³ட்டி²விஸுத்³தி⁴ஆதி³காய ஸுக்க²விபஸ்ஸனாய வஸேன. அத்தனோ ஸீலரக்க²ணத்த²ங் அபரானபெக்க²தாய யேன காமங் க³ந்துங் சதஸ்ஸோ தி³ஸா அரஹதி, அஸ்ஸ வா ஸந்தி, தாஸு வா ஸாதூ⁴தி சாதுத்³தி³ஸோ.
Yadassāti yaṃ assa. Dhāretīti avinassamānaṃ dhāreti. Parikathanatthanti pakiṇṇakakathāvasena paricchinnadhammakathanatthaṃ. Tisso anumodanāti saṅghabhattādīsu dānānisaṃsappaṭisaṃyuttā nidhikuṇḍasuttādi (khu. pā. 8.1 ādayo) -anumodanā, gehappavesamaṅgalādīsu maṅgalasuttādi (khu. pā. 5.1 ādayo; su. ni. maṅgalasutta) -anumodanā, matakabhattādiamaṅgalesu tirokuṭṭādi (khu. pā. 7.1 ādayo; pe. va. 14 ādayo) -anumodanāti imā tisso anumodanā. Kammākammavinicchayoti parivārāvasāne kammavagge (pari. 482 ādayo) vuttavinicchayo. Samādhivasenāti samathapubbakavasena. Vipassanāvasena vāti diṭṭhivisuddhiādikāya sukkhavipassanāya vasena. Attano sīlarakkhaṇatthaṃ aparānapekkhatāya yena kāmaṃ gantuṃ catasso disā arahati, assa vā santi, tāsu vā sādhūti cātuddiso.
அபி⁴வினயேதி பாதிமொக்க²ஸங்வரஸங்கா²தே ஸங்வரவினயே, தப்பகாஸகே வா வினயபிடகே. வினேதுந்தி ஸிக்கா²பேதுங் பகாஸேதுங். பகு³ணா வாசுக்³க³தாதி பாட²தோ ச அத்த²தோ ச பகு³ணா முகே² ஸன்னிதா⁴பனவஸேன வாசுக்³க³தா காதப்³பா³. அத்த²மத்தவஸேனபெத்த² யோஜனங் கரொந்தி. அபி⁴த⁴ம்மேதி லக்க²ணரஸாதி³வஸேன பரிச்சி²ன்னே நாமரூபத⁴ம்மே. புப்³பே³ கிர மஹாதே²ரா பரியத்திஅனந்தரதா⁴னாய ஏகேகஸ்ஸ க³ணஸ்ஸ தீ³க⁴னிகாயாதி³ஏகேகத⁴ம்மகொட்டா²ஸங் நிய்யாதெந்தா ‘‘தும்ஹே ஏதங் பாளிதோ ச அட்ட²கதா²தோ ச பரிஹரத², ஸக்கொந்தா உத்தரிபி உக்³க³ண்ஹதா²’’தி ஏவங் ஸகலத⁴ம்மங் க³ந்த²வஸேன நிய்யாதெந்தி, தத்த² தே ச பி⁴க்கூ² க³ந்த²னாமேன தீ³க⁴பா⁴ணகா மஜ்ஜி²மபா⁴ணகாதி வோஹரீயந்தி, தே ச அத்தனோ பா⁴ரபூ⁴தங் கொட்டா²ஸங் பரிச்சஜித்வா அஞ்ஞங் உக்³க³ஹேதுங் ந லப⁴ந்தி. தங் ஸந்தா⁴யாஹ ‘‘ஸசே மஜ்ஜி²மபா⁴ணகோ ஹோதீ’’திஆதி³.
Abhivinayeti pātimokkhasaṃvarasaṅkhāte saṃvaravinaye, tappakāsake vā vinayapiṭake. Vinetunti sikkhāpetuṃ pakāsetuṃ. Paguṇā vācuggatāti pāṭhato ca atthato ca paguṇā mukhe sannidhāpanavasena vācuggatā kātabbā. Atthamattavasenapettha yojanaṃ karonti. Abhidhammeti lakkhaṇarasādivasena paricchinne nāmarūpadhamme. Pubbe kira mahātherā pariyattianantaradhānāya ekekassa gaṇassa dīghanikāyādiekekadhammakoṭṭhāsaṃ niyyātentā ‘‘tumhe etaṃ pāḷito ca aṭṭhakathāto ca pariharatha, sakkontā uttaripi uggaṇhathā’’ti evaṃ sakaladhammaṃ ganthavasena niyyātenti, tattha te ca bhikkhū ganthanāmena dīghabhāṇakā majjhimabhāṇakāti voharīyanti, te ca attano bhārabhūtaṃ koṭṭhāsaṃ pariccajitvā aññaṃ uggahetuṃ na labhanti. Taṃ sandhāyāha ‘‘sace majjhimabhāṇako hotī’’tiādi.
தத்த² ஹெட்டி²மா வா தயோ வக்³கா³தி மஹாவக்³க³தோ ஹெட்டி²மா ஸகா³த²கவக்³கோ³ (ஸங்॰ நி॰ 1.1 ஆத³யோ), நிதா³னவக்³கோ³ (ஸங்॰ நி॰ 2.1 ஆத³யோ), க²ந்த⁴வக்³கோ³தி (ஸங்॰ நி॰ 3.1 ஆதி³யோ) இமே தயோ வக்³கா³. திகனிபாததோ பட்டா²ய ஹெட்டா²தி ஏககனிபாதது³கனிபாதே ஸந்தா⁴ய வுத்தங். த⁴ம்மபத³ம்பி ஸஹ வத்து²னா ஜாதகபா⁴ணகேன அத்தனோ ஜாதகேன ஸத்³தி⁴ங் உக்³க³ஹேதப்³ப³ங். ததோ ஓரங் ந வட்டதீதி மஹாபச்சரிவாத³ஸ்ஸ அதி⁴ப்பாயோ. ததோ ததோதி தீ³க⁴னிகாயாதி³தோ. உச்சினித்வா உக்³க³ஹிதங் ஸத்³த⁴ம்மஸ்ஸ டி²தியா, பி⁴க்கு²னோபி புப்³பா³பரானுஸந்தி⁴ஆதி³குஸலதாய ச ந ஹோதீதி ‘‘தங் ந வட்டதீ’’தி படிக்கி²த்தங். அபி⁴த⁴ம்மே கிஞ்சி உக்³க³ஹேதப்³ப³ந்தி ந வுத்தந்தி எத்த² யஸ்மா வினயே குஸலத்திகாதி³விபா⁴கோ³, ஸுத்தந்தேஸு ஸமத²விபஸ்ஸனாமக்³கோ³ ச அபி⁴த⁴ம்மபாட²ங் வினா ந விஞ்ஞாயதி, அந்த⁴காரே பவிட்ட²காலோ விய ஹோதி, தஸ்மா ஸுத்தவினயானங் க³ஹணவஸேன அபி⁴த⁴ம்மக்³க³ஹணங் வுத்தமேவாதி விஸுங் ந வுத்தந்தி வேதி³தப்³ப³ங். யதா² ‘‘போ⁴ஜனங் பு⁴ஞ்ஜிதப்³ப³’’ந்தி வுத்தே ‘‘ப்³யஞ்ஜனங் கா²தி³தப்³ப³’’ந்தி அவுத்தம்பி வுத்தமேவ ஹோதி தத³வினாபா⁴வதோ, ஏவங்ஸம்பத³மித³ங் த³ட்ட²ப்³ப³ங்.
Tattha heṭṭhimā vā tayo vaggāti mahāvaggato heṭṭhimā sagāthakavaggo (saṃ. ni. 1.1 ādayo), nidānavaggo (saṃ. ni. 2.1 ādayo), khandhavaggoti (saṃ. ni. 3.1 ādiyo) ime tayo vaggā. Tikanipātato paṭṭhāya heṭṭhāti ekakanipātadukanipāte sandhāya vuttaṃ. Dhammapadampi saha vatthunā jātakabhāṇakena attano jātakena saddhiṃ uggahetabbaṃ. Tato oraṃ na vaṭṭatīti mahāpaccarivādassa adhippāyo. Tato tatoti dīghanikāyādito. Uccinitvā uggahitaṃ saddhammassa ṭhitiyā, bhikkhunopi pubbāparānusandhiādikusalatāya ca na hotīti ‘‘taṃ na vaṭṭatī’’ti paṭikkhittaṃ. Abhidhamme kiñci uggahetabbanti na vuttanti ettha yasmā vinaye kusalattikādivibhāgo, suttantesu samathavipassanāmaggo ca abhidhammapāṭhaṃ vinā na viññāyati, andhakāre paviṭṭhakālo viya hoti, tasmā suttavinayānaṃ gahaṇavasena abhidhammaggahaṇaṃ vuttamevāti visuṃ na vuttanti veditabbaṃ. Yathā ‘‘bhojanaṃ bhuñjitabba’’nti vutte ‘‘byañjanaṃ khāditabba’’nti avuttampi vuttameva hoti tadavinābhāvato, evaṃsampadamidaṃ daṭṭhabbaṃ.
பரிமண்ட³லபத³ப்³யஞ்ஜனாயாதி பரிமண்ட³லானி பரிபுண்ணானி பதே³ஸு ஸிதி²லத⁴னிதாதி³ப்³யஞ்ஜனானி யஸ்ஸங், தாய. புரஸ்ஸ ஏஸாதி போரீ, நக³ரவாஸீனங் கதா²தி அத்தோ². அனேலக³ளாயாதி எத்த² ஏலாதி கே²ளங் தக்³க³ளனவிரஹிதாய. கல்யாணவாக்கரணோதி எத்த² வாசா ஏவ வாக்கரணங், உதா³ஹரணகோ⁴ஸோ. கல்யாணங் மது⁴ரங் வாக்கரணமஸ்ஸாதி கல்யாணவாக்கரணோ. உபஸம்பன்னாய மேது²னேனேவ அப⁴ப்³போ³ ஹோதி, ந ஸிக்க²மானாஸாமணேரீஸூதி ஆஹ ‘‘பி⁴க்கு²னியா காயஸங்ஸக்³க³ங் வா’’திஆதி³.
Parimaṇḍalapadabyañjanāyāti parimaṇḍalāni paripuṇṇāni padesu sithiladhanitādibyañjanāni yassaṃ, tāya. Purassa esāti porī, nagaravāsīnaṃ kathāti attho. Anelagaḷāyāti ettha elāti kheḷaṃ taggaḷanavirahitāya. Kalyāṇavākkaraṇoti ettha vācā eva vākkaraṇaṃ, udāharaṇaghoso. Kalyāṇaṃ madhuraṃ vākkaraṇamassāti kalyāṇavākkaraṇo. Upasampannāya methuneneva abhabbo hoti, na sikkhamānāsāmaṇerīsūti āha ‘‘bhikkhuniyā kāyasaṃsaggaṃ vā’’tiādi.
148. க³ருகேஹீதி க³ருகப⁴ண்டே³ஹி. ஏகதோஉபஸம்பன்னாயாதி உபயோக³த்தே² பு⁴ம்மவசனங். பி⁴க்கூ²னங் ஸந்திகே உபஸம்பன்னா நாம பரிவத்தலிங்கா³ வா பஞ்சஸதஸாகியானியோ வா. ஏதா பன ஏகதோஉபஸம்பன்னா ஓவத³ந்தஸ்ஸ பாசித்தியமேவ.
148.Garukehīti garukabhaṇḍehi. Ekatoupasampannāyāti upayogatthe bhummavacanaṃ. Bhikkhūnaṃ santike upasampannā nāma parivattaliṅgā vā pañcasatasākiyāniyo vā. Etā pana ekatoupasampannā ovadantassa pācittiyameva.
149. ந நிமந்திதா ஹுத்வா க³ந்துகாமாதி நிமந்திதா ஹுத்வா போ⁴ஜனபரியோஸானே க³ந்துகாமா ந ஹொந்தி, தத்தே²வ வஸிதுகாமா ஹொந்தீதி அத்தோ². யதோதி பி⁴க்கு²னுபஸ்ஸயதோ. யாசித்வாதி ‘‘தும்ஹேஹி ஆனீதஓவாதே³னேவ மயம்பி வஸிஸ்ஸாமா’’தி யாசித்வா. தத்தா²தி தஸ்மிங் பி⁴க்கு²னுபஸ்ஸயே. அபி⁴க்கு²காவாஸே வஸ்ஸங் வஸந்தியா பாசித்தியங், அபக³ச்ச²ந்தியா து³க்கடங்.
149.Na nimantitā hutvā gantukāmāti nimantitā hutvā bhojanapariyosāne gantukāmā na honti, tattheva vasitukāmā hontīti attho. Yatoti bhikkhunupassayato. Yācitvāti ‘‘tumhehi ānītaovādeneva mayampi vasissāmā’’ti yācitvā. Tatthāti tasmiṃ bhikkhunupassaye. Abhikkhukāvāse vassaṃ vasantiyā pācittiyaṃ, apagacchantiyā dukkaṭaṃ.
இமாஸு கதராபத்தி பரிஹரிதப்³பா³தி சோத³னங் பரிஹரந்தோ ஆஹ ‘‘ஸா ரக்கி²தப்³பா³’’தி. ஸா வஸ்ஸானுக³மனமூலிகா ஆபத்தி ரக்கி²தப்³பா³, இதராய அனாபத்திகாரணங் அத்தீ²தி அதி⁴ப்பாயோ. தேனாஹ ‘‘ஆபதா³ஸு ஹீ’’திஆதி³.
Imāsu katarāpatti pariharitabbāti codanaṃ pariharanto āha ‘‘sā rakkhitabbā’’ti. Sā vassānugamanamūlikā āpatti rakkhitabbā, itarāya anāpattikāraṇaṃ atthīti adhippāyo. Tenāha ‘‘āpadāsu hī’’tiādi.
ஓவாத³த்தா²யாதி ஓவாதே³ யாசனத்தா²ய. த்³வே திஸ்ஸோதி த்³வீஹி தீஹி, கரணத்தே² சேதங் பச்சத்தவசனங். பாஸாதி³கேனாதி பஸாத³ஜனகேன காயகம்மாதி³னா. ஸம்பாதே³தூதி திவித⁴ங் ஸிக்க²ங் ஸம்பாதே³து. அஸம்மததா, பி⁴க்கு²னியா பரிபுண்ணூபஸம்பன்னதா, ஓவாத³வஸேன அட்ட²க³ருத⁴ம்மதா³னந்தி இமானெத்த² தீணி அங்கா³னி.
Ovādatthāyāti ovāde yācanatthāya. Dve tissoti dvīhi tīhi, karaṇatthe cetaṃ paccattavacanaṃ. Pāsādikenāti pasādajanakena kāyakammādinā. Sampādetūti tividhaṃ sikkhaṃ sampādetu. Asammatatā, bhikkhuniyā paripuṇṇūpasampannatā, ovādavasena aṭṭhagarudhammadānanti imānettha tīṇi aṅgāni.
ஓவாத³ஸிக்கா²பத³வண்ணனா நிட்டி²தா.
Ovādasikkhāpadavaṇṇanā niṭṭhitā.
Related texts:
திபிடக (மூல) • Tipiṭaka (Mūla) / வினயபிடக • Vinayapiṭaka / மஹாவிப⁴ங்க³ • Mahāvibhaṅga / 3. ஓவாத³வக்³கோ³ • 3. Ovādavaggo
அட்ட²கதா² • Aṭṭhakathā / வினயபிடக (அட்ட²கதா²) • Vinayapiṭaka (aṭṭhakathā) / மஹாவிப⁴ங்க³-அட்ட²கதா² • Mahāvibhaṅga-aṭṭhakathā / 1. ஓவாத³ஸிக்கா²பத³வண்ணனா • 1. Ovādasikkhāpadavaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / ஸாரத்த²தீ³பனீ-டீகா • Sāratthadīpanī-ṭīkā / 1. ஓவாத³ஸிக்கா²பத³வண்ணனா • 1. Ovādasikkhāpadavaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / வஜிரபு³த்³தி⁴-டீகா • Vajirabuddhi-ṭīkā / 1. ஓவாத³ஸிக்கா²பத³வண்ணனா • 1. Ovādasikkhāpadavaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / பாசித்யாதி³யோஜனாபாளி • Pācityādiyojanāpāḷi / 1. ஓவாத³ஸிக்கா²பத³-அத்த²யோஜனா • 1. Ovādasikkhāpada-atthayojanā
