| Library / Tipiṭaka / তিপিটক • Tipiṭaka / সারত্থদীপনী-টীকা • Sāratthadīpanī-ṭīkā |
৩. ওৰাদৰগ্গো
3. Ovādavaggo
১. ওৰাদসিক্খাপদৰণ্ণনা
1. Ovādasikkhāpadavaṇṇanā
১৪৪. ভিক্খুনিৰগ্গস্স পঠমসিক্খাপদে কথানুসারেনাতি ‘‘সো থেরো কিংসীলো কিংসমাচারো কতরকুলা পব্বজিতো’’তিআদিনা পুচ্ছন্তানং পুচ্ছাকথানুসারেন। কথেতুং ৰট্টন্তীতি নিরামিসেনেৰ চিত্তেন কথেতুং ৰট্টন্তি। অনিয্যানিকত্তা সগ্গমোক্খমগ্গানং তিরচ্ছানভূতা কথা তিরচ্ছানকথাতি আহ ‘‘সগ্গমগ্গগমনেপী’’তিআদি। অপি-সদ্দেন পগেৰ মোক্খমগ্গগমনেতি দীপেতি। তিরচ্ছানভূতন্তি তিরোকরণভূতং, বাধিকন্তি ৰুত্তং হোতি। লদ্ধাসেৰনা হি তিরচ্ছানকথা সগ্গমোক্খানং বাধিকাৰ হোতি। সমিদ্ধোতি পরিপুণ্ণো। সহিতত্থোতি যুত্তত্থো। অত্থগম্ভীরতাদিযোগতো গম্ভীরো। বহুরসোতি অত্থরসাদিবহুরসো। লক্খণপটিৰেধসংযুত্তোতি অনিচ্চাদিলক্খণপটিৰেধরসআৰহনতো লক্খণপটিৰেধসংযুত্তো।
144. Bhikkhunivaggassa paṭhamasikkhāpade kathānusārenāti ‘‘so thero kiṃsīlo kiṃsamācāro katarakulā pabbajito’’tiādinā pucchantānaṃ pucchākathānusārena. Kathetuṃ vaṭṭantīti nirāmiseneva cittena kathetuṃ vaṭṭanti. Aniyyānikattā saggamokkhamaggānaṃ tiracchānabhūtā kathā tiracchānakathāti āha ‘‘saggamaggagamanepī’’tiādi. Api-saddena pageva mokkhamaggagamaneti dīpeti. Tiracchānabhūtanti tirokaraṇabhūtaṃ, bādhikanti vuttaṃ hoti. Laddhāsevanā hi tiracchānakathā saggamokkhānaṃ bādhikāva hoti. Samiddhoti paripuṇṇo. Sahitatthoti yuttattho. Atthagambhīratādiyogato gambhīro. Bahurasoti attharasādibahuraso. Lakkhaṇapaṭivedhasaṃyuttoti aniccādilakkhaṇapaṭivedharasaāvahanato lakkhaṇapaṭivedhasaṃyutto.
১৪৫-১৪৭. পরতোতি পরত্থ, উত্তরিন্তি অত্থো। করোন্তোৰাতি পরিবাহিরে করোন্তোযেৰ। পাতিমোক্খোতি চারিত্তৰারিত্তপ্পভেদং সিক্খাপদসীলং । তঞ্হি যো নং পাতি রক্খতি, তং মোক্খেতি মোচেতি আপাযিকাদীহি দুক্খেহি, তস্মা ‘‘পাতিমোক্খ’’ন্তি ৰুচ্চতি। সংৰরণং সংৰরো, কাযৰচীদ্ৰারানং পিদহনং। যেন হি তে সংৰুতা পিহিতা হোন্তি, সো সংৰরো, কাযিকৰাচসিকস্স অৰীতিক্কমস্সেতং নামং। পাতিমোক্খসংৰরেন সংৰুতোতি পাতিমোক্খসংৰরেন পিহিতকাযৰচীদ্ৰারো। তথাভূতো চ যস্মা তেন সমঙ্গী নাম হোতি, তস্মা ৰুত্তং ‘‘সমন্নাগতো’’তি । ৰত্ততীতি অত্তভাৰং পৰত্তেতি। ৰিহরতীতি ইমিনা পাতিমোক্খসংৰরসীলে ঠিতস্স ভিক্খুনো ইরিযাপথৰিহারো দস্সিতো।
145-147.Paratoti parattha, uttarinti attho. Karontovāti paribāhire karontoyeva. Pātimokkhoti cārittavārittappabhedaṃ sikkhāpadasīlaṃ . Tañhi yo naṃ pāti rakkhati, taṃ mokkheti moceti āpāyikādīhi dukkhehi, tasmā ‘‘pātimokkha’’nti vuccati. Saṃvaraṇaṃ saṃvaro, kāyavacīdvārānaṃ pidahanaṃ. Yena hi te saṃvutā pihitā honti, so saṃvaro, kāyikavācasikassa avītikkamassetaṃ nāmaṃ. Pātimokkhasaṃvarena saṃvutoti pātimokkhasaṃvarena pihitakāyavacīdvāro. Tathābhūto ca yasmā tena samaṅgī nāma hoti, tasmā vuttaṃ ‘‘samannāgato’’ti . Vattatīti attabhāvaṃ pavatteti. Viharatīti iminā pātimokkhasaṃvarasīle ṭhitassa bhikkhuno iriyāpathavihāro dassito.
সঙ্খেপতো ৰুত্তমত্থং ৰিত্থারতো পাল়িযা ৰিভাৰেতুং ‘‘ৰুত্তঞ্হেত’’ন্তিআদি আরদ্ধং। তত্থ ৰিভঙ্গেতি ঝানৰিভঙ্গে। সীলং পতিট্ঠাতিআদীনি পাতিমোক্খস্সেৰ ৰেৰচনানি। তত্থ (ৰিভ॰ অট্ঠ॰ ৫১১) সীলন্তি কামঞ্চেতং সহ কম্মৰাচাপরিযোসানেন ইজ্ঝনকস্স পাতিমোক্খস্সেৰ ৰেৰচনং, এৰং সন্তেপি ধম্মতো এতং সীলং নাম পাণাতিপাতাদীহি ৰা ৰিরমন্তস্স ৰত্তপটিপত্তিং ৰা পূরেন্তস্স চেতনাদযো ধম্মা ৰেদিতব্বা। যস্মা পন পাতিমোক্খসীলেন ভিক্খু সাসনে পতিট্ঠাতি নাম, তস্মা তং ‘‘পতিট্ঠা’’তি ৰুত্তং। পতিট্ঠহতি ৰা এত্থ ভিক্খু, কুসলধম্মা এৰ ৰা এত্থ পতিট্ঠহন্তীতি পতিট্ঠা। অযমত্থো ‘‘সীলে পতিট্ঠায নরো সপঞ্ঞো’’তি (সং॰ নি॰ ১.২৩, ১৯২) চ ‘‘পতিট্ঠা, মহারাজ, সীলং সব্বেসং কুসলানং ধম্মান’’ন্তি (মি॰ প॰ ২.১.৯) চ ‘‘সীলে পতিট্ঠিতস্স খো, মহারাজ, সব্বে কুসলা ধম্মা ন পরিহাযন্তী’’তি চ আদিসুত্তৰসেন ৰেদিতব্বো।
Saṅkhepato vuttamatthaṃ vitthārato pāḷiyā vibhāvetuṃ ‘‘vuttañheta’’ntiādi āraddhaṃ. Tattha vibhaṅgeti jhānavibhaṅge. Sīlaṃ patiṭṭhātiādīni pātimokkhasseva vevacanāni. Tattha (vibha. aṭṭha. 511) sīlanti kāmañcetaṃ saha kammavācāpariyosānena ijjhanakassa pātimokkhasseva vevacanaṃ, evaṃ santepi dhammato etaṃ sīlaṃ nāma pāṇātipātādīhi vā viramantassa vattapaṭipattiṃ vā pūrentassa cetanādayo dhammā veditabbā. Yasmā pana pātimokkhasīlena bhikkhu sāsane patiṭṭhāti nāma, tasmā taṃ ‘‘patiṭṭhā’’ti vuttaṃ. Patiṭṭhahati vā ettha bhikkhu, kusaladhammā eva vā ettha patiṭṭhahantīti patiṭṭhā. Ayamattho ‘‘sīle patiṭṭhāya naro sapañño’’ti (saṃ. ni. 1.23, 192) ca ‘‘patiṭṭhā, mahārāja, sīlaṃ sabbesaṃ kusalānaṃ dhammāna’’nti (mi. pa. 2.1.9) ca ‘‘sīle patiṭṭhitassa kho, mahārāja, sabbe kusalā dhammā na parihāyantī’’ti ca ādisuttavasena veditabbo.
তদেতং পুব্বুপ্পত্তিঅত্থেন আদি। ৰুত্তম্পি চেতং –
Tadetaṃ pubbuppattiatthena ādi. Vuttampi cetaṃ –
‘‘তস্মাতিহ ত্ৰং, উত্তিয, আদিমেৰ ৰিসোধেহি কুসলেসু ধম্মেসু। কো চাদি কুসলানং ধম্মানং? সীলঞ্চ সুৰিসুদ্ধং দিট্ঠি চ উজুকা’’তি (সং॰ নি॰ ৫.৩৮২)।
‘‘Tasmātiha tvaṃ, uttiya, ādimeva visodhehi kusalesu dhammesu. Ko cādi kusalānaṃ dhammānaṃ? Sīlañca suvisuddhaṃ diṭṭhi ca ujukā’’ti (saṃ. ni. 5.382).
যথা হি নগরৰড্ঢকী নগরং মাপেতুকামো পঠমং নগরট্ঠানং সোধেতি, ততো অপরভাগে ৰীথিচতুক্কসিঙ্ঘাটকাদিপরিচ্ছেদেন ৰিভজিত্ৰা নগরং মাপেতি, এৰমেৰ যোগাৰচরো আদিম্হি সীলং সোধেতি, ততো অপরভাগে সমাধিৰিপস্সনামগ্গফলনিব্বানানি সচ্ছিকরোতি। যথা ৰা পন রজকো পঠমং তীহি খারেহি ৰত্থং ধোৰিত্ৰা পরিসুদ্ধে ৰত্থে যদিচ্ছকং রঙ্গজাতং উপনেতি, যথা ৰা পন ছেকো চিত্তকারো রূপং লিখিতুকামো আদিতো ভিত্তিপরিকম্মং করোতি, ততো অপরভাগে রূপং সমুট্ঠাপেতি, এৰমেৰ যোগাৰচরো আদিতোৰ সীলং ৰিসোধেত্ৰা অপরভাগে সমথৰিপস্সনাদযো ধম্মে সচ্ছিকরোতি। তস্মা সীলং ‘‘আদী’’তি ৰুত্তং।
Yathā hi nagaravaḍḍhakī nagaraṃ māpetukāmo paṭhamaṃ nagaraṭṭhānaṃ sodheti, tato aparabhāge vīthicatukkasiṅghāṭakādiparicchedena vibhajitvā nagaraṃ māpeti, evameva yogāvacaro ādimhi sīlaṃ sodheti, tato aparabhāge samādhivipassanāmaggaphalanibbānāni sacchikaroti. Yathā vā pana rajako paṭhamaṃ tīhi khārehi vatthaṃ dhovitvā parisuddhe vatthe yadicchakaṃ raṅgajātaṃ upaneti, yathā vā pana cheko cittakāro rūpaṃ likhitukāmo ādito bhittiparikammaṃ karoti, tato aparabhāge rūpaṃ samuṭṭhāpeti, evameva yogāvacaro āditova sīlaṃ visodhetvā aparabhāge samathavipassanādayo dhamme sacchikaroti. Tasmā sīlaṃ ‘‘ādī’’ti vuttaṃ.
তদেতং চরণসরিক্খতায চরণং। ‘‘চরণা’’তি পাদা ৰুচ্চন্তি। যথা হি ছিন্নচরণস্স পুরিসস্স দিসংগমনাভিসঙ্খারো ন জাযতি, পরিপুণ্ণপাদস্সেৰ জাযতি, এৰমেৰ যস্স সীলং ভিন্নং হোতি খণ্ডং অপরিপুণ্ণং, তস্স নিব্বানগমনায ঞাণগমনং ন সম্পজ্জতি। যস্স পন তং অভিন্নং হোতি অখণ্ডং পরিপুণ্ণং, তস্স নিব্বানগমনায ঞাণগমনং সম্পজ্জতি। তস্মা সীলং ‘‘চরণ’’ন্তি ৰুত্তং।
Tadetaṃ caraṇasarikkhatāya caraṇaṃ. ‘‘Caraṇā’’ti pādā vuccanti. Yathā hi chinnacaraṇassa purisassa disaṃgamanābhisaṅkhāro na jāyati, paripuṇṇapādasseva jāyati, evameva yassa sīlaṃ bhinnaṃ hoti khaṇḍaṃ aparipuṇṇaṃ, tassa nibbānagamanāya ñāṇagamanaṃ na sampajjati. Yassa pana taṃ abhinnaṃ hoti akhaṇḍaṃ paripuṇṇaṃ, tassa nibbānagamanāya ñāṇagamanaṃ sampajjati. Tasmā sīlaṃ ‘‘caraṇa’’nti vuttaṃ.
তদেতং সংযমনৰসেন সংযমো, সংৰরণৰসেন সংৰরোতি উভযেনপি সীলসংযমো চেৰ সীলসংৰরো চ কথিতো। ৰচনত্থো পনেত্থ সংযমেতি ৰীতিক্কমৰিপ্ফন্দনং, পুগ্গলং ৰা সংযমেতি ৰীতিক্কমৰসেন তস্স ৰিপ্ফন্দিতুং ন দেতীতি সংযমো, ৰীতিক্কমস্স পৰেসনদ্ৰারং সংৰরতি পিদহতীতি সংৰরো। মোক্খন্তি উত্তমং মুখভূতং ৰা। যথা হি সত্তানং চতুব্বিধো আহারো মুখেন পৰিসিত্ৰা অঙ্গমঙ্গানি ফরতি, এৰং যোগিনোপি চতুভূমককুসলং সীলমুখেন পৰিসিত্ৰা অত্থসিদ্ধিং সম্পাদেতি। তেন ৰুত্তং ‘‘মোক্খ’’ন্তি। পমুখে সাধূতি পমোক্খং, পুব্বঙ্গমং সেট্ঠং পধানন্তি অত্থো। কুসলানং ধম্মানং সমাপত্তিযাতি চতুভূমককুসলানং পটিলাভত্থায পমোক্খং পুব্বঙ্গমং সেট্ঠং পধানন্তি ৰেদিতব্বং।
Tadetaṃ saṃyamanavasena saṃyamo, saṃvaraṇavasena saṃvaroti ubhayenapi sīlasaṃyamo ceva sīlasaṃvaro ca kathito. Vacanattho panettha saṃyameti vītikkamavipphandanaṃ, puggalaṃ vā saṃyameti vītikkamavasena tassa vipphandituṃ na detīti saṃyamo, vītikkamassa pavesanadvāraṃ saṃvarati pidahatīti saṃvaro. Mokkhanti uttamaṃ mukhabhūtaṃ vā. Yathā hi sattānaṃ catubbidho āhāro mukhena pavisitvā aṅgamaṅgāni pharati, evaṃ yoginopi catubhūmakakusalaṃ sīlamukhena pavisitvā atthasiddhiṃ sampādeti. Tena vuttaṃ ‘‘mokkha’’nti. Pamukhe sādhūti pamokkhaṃ, pubbaṅgamaṃ seṭṭhaṃ padhānanti attho. Kusalānaṃ dhammānaṃ samāpattiyāti catubhūmakakusalānaṃ paṭilābhatthāya pamokkhaṃ pubbaṅgamaṃ seṭṭhaṃ padhānanti veditabbaṃ.
কাযিকো অৰীতিক্কমোতি তিৰিধং কাযসুচরিতং। ৰাচসিকোতি চতুব্বিধং ৰচীসুচরিতং। কাযিকৰাচসিকোতি তদুভযং। ইমিনা আজীৰট্ঠমকসীলং পরিযাদায দস্সেতি। সংৰুতোতি পিহিতো, সংৰুতিন্দ্রিযো পিহিতিন্দ্রিযোতি অত্থো। যথা হি সংৰুতদ্ৰারং গেহং ‘‘সংৰুতগেহং পিহিতগেহ’’ন্তি ৰুচ্চতি, এৰমিধ সংৰুতিন্দ্রিযো ‘‘সংৰুতো’’তি ৰুত্তো। পাতিমোক্খসংৰরেনাতি পাতিমোক্খসঙ্খাতেন সংৰরেন। উপেতোতিআদীনি সব্বানি অঞ্ঞমঞ্ঞৰেৰচনানি।
Kāyiko avītikkamoti tividhaṃ kāyasucaritaṃ. Vācasikoti catubbidhaṃ vacīsucaritaṃ. Kāyikavācasikoti tadubhayaṃ. Iminā ājīvaṭṭhamakasīlaṃ pariyādāya dasseti. Saṃvutoti pihito, saṃvutindriyo pihitindriyoti attho. Yathā hi saṃvutadvāraṃ gehaṃ ‘‘saṃvutagehaṃ pihitageha’’nti vuccati, evamidha saṃvutindriyo ‘‘saṃvuto’’ti vutto. Pātimokkhasaṃvarenāti pātimokkhasaṅkhātena saṃvarena. Upetotiādīni sabbāni aññamaññavevacanāni.
ইরিযতীতিআদীহি সত্তহিপি পদেহি পাতিমোক্খসংৰরসীলে ঠিতস্স ভিক্খুনো ইরিযাপথৰিহারো কথিতো। তত্থ ইরিযতীতি চতুন্নং ইরিযাপথানং অঞ্ঞতরসমঙ্গিভাৰতো ইরিযতি। তেহি ইরিযাপথচতুক্কেহি কাযসকটৰত্তনেন ৰত্ততি। একং ইরিযাপথদুক্খং অপরেন ইরিযাপথেন ৰিচ্ছিন্দিত্ৰা চিরট্ঠিতিভাৰেন সরীররক্খণতো পালেতি। একস্মিং ইরিযাপথে অসণ্ঠহিত্ৰা সব্বইরিযাপথে ৰত্তনতো যপেতি। তেন তেন ইরিযাপথেন তথা তথা কাযস্স যাপনতো যাপেতি। চিরকালৰত্তাপনতো চরতি। ইরিযাপথেন ইরিযাপথং ৰিচ্ছিন্দিত্ৰা জীৰিতহরণতো ৰিহরতি।
Iriyatītiādīhi sattahipi padehi pātimokkhasaṃvarasīle ṭhitassa bhikkhuno iriyāpathavihāro kathito. Tattha iriyatīti catunnaṃ iriyāpathānaṃ aññatarasamaṅgibhāvato iriyati. Tehi iriyāpathacatukkehi kāyasakaṭavattanena vattati. Ekaṃ iriyāpathadukkhaṃ aparena iriyāpathena vicchinditvā ciraṭṭhitibhāvena sarīrarakkhaṇato pāleti. Ekasmiṃ iriyāpathe asaṇṭhahitvā sabbairiyāpathe vattanato yapeti. Tena tena iriyāpathena tathā tathā kāyassa yāpanato yāpeti. Cirakālavattāpanato carati. Iriyāpathena iriyāpathaṃ vicchinditvā jīvitaharaṇato viharati.
মিচ্ছাজীৰপটিসেধকেনাতি –
Micchājīvapaṭisedhakenāti –
‘‘ইধেকচ্চো ৰেল়ুদানেন ৰা পত্তদানেন ৰা পুপ্ফ ফল সিনানদন্তকট্ঠদানেন ৰা চাটুকম্যতায ৰা মুগ্গসূপ্যতায ৰা পারিভটযতায ৰা জঙ্ঘপেসনিকেন ৰা অঞ্ঞতরঞ্ঞতরেন ৰা বুদ্ধপটিকুট্ঠেন মিচ্ছাআজীৰেন জীৰিকং কপ্পেতি, অযং ৰুচ্চতি অনাচারো’’তি (ৰিভ॰ ৫১৩) –
‘‘Idhekacco veḷudānena vā pattadānena vā puppha phala sinānadantakaṭṭhadānena vā cāṭukamyatāya vā muggasūpyatāya vā pāribhaṭayatāya vā jaṅghapesanikena vā aññataraññatarena vā buddhapaṭikuṭṭhena micchāājīvena jīvikaṃ kappeti, ayaṃ vuccati anācāro’’ti (vibha. 513) –
এৰং ৰুত্তঅনাচারসঙ্খাতমিচ্ছাজীৰপটিপক্খেন।
Evaṃ vuttaanācārasaṅkhātamicchājīvapaṭipakkhena.
ন ৰেল়ুদানাদিনা আচারেনাতি –
Na veḷudānādinā ācārenāti –
‘‘ইধেকচ্চো ন ৰেল়ুদানেন ন পত্ত ন পুপ্ফ ন ফল ন সিনান ন দন্তকট্ঠ ন চাটুকম্যতায ন মুগ্গসূপ্যতায ন পারিভটযতায ন জঙ্ঘপেসনিকেন ন অঞ্ঞতরঞ্ঞতরেন বুদ্ধপটিকুট্ঠেন মিচ্ছাআজীৰেন জীৰিকং কপ্পেতি, অযং ৰুচ্চতি আচারো’’তি (ৰিভ॰ ৫১৩) –
‘‘Idhekacco na veḷudānena na patta na puppha na phala na sināna na dantakaṭṭha na cāṭukamyatāya na muggasūpyatāya na pāribhaṭayatāya na jaṅghapesanikena na aññataraññatarena buddhapaṭikuṭṭhena micchāājīvena jīvikaṃ kappeti, ayaṃ vuccati ācāro’’ti (vibha. 513) –
এৰং ৰুত্তেন ন ৰেল়ুদানাদিনা আচারেন।
Evaṃ vuttena na veḷudānādinā ācārena.
ৰেসিযাদিঅগোচরং পহাযাতি –
Vesiyādiagocaraṃ pahāyāti –
‘‘ইধেকচ্চো ৰেসিযগোচরো ৰা হোতি ৰিধৰ থুল্লকুমারি পণ্ডক ভিক্খুনি পানাগারগোচরো ৰা, সংসট্ঠো ৰিহরতি রাজূহি রাজমহামত্তেহি তিত্থিযেহি তিত্থিযসাৰকেহি অননুলোমিকেন সংসগ্গেন, যানি পন তানি কুলানি অস্সদ্ধানি অপ্পসন্নানি অনোপানভূতানি অক্কোসকপরিভাসকানি অনত্থকামানি অহিতকামানি অফাসুককামানি অযোগক্খেমকামানি ভিক্খূনং ভিক্খুনীনং উপাসকানং উপাসিকানং, তথারূপানি কুলানি সেৰতি ভজতি পযিরুপাসতি, অযং ৰুচ্চতি অগোচরো’’তি (ৰিভ॰ ৫১৪) –
‘‘Idhekacco vesiyagocaro vā hoti vidhava thullakumāri paṇḍaka bhikkhuni pānāgāragocaro vā, saṃsaṭṭho viharati rājūhi rājamahāmattehi titthiyehi titthiyasāvakehi ananulomikena saṃsaggena, yāni pana tāni kulāni assaddhāni appasannāni anopānabhūtāni akkosakaparibhāsakāni anatthakāmāni ahitakāmāni aphāsukakāmāni ayogakkhemakāmāni bhikkhūnaṃ bhikkhunīnaṃ upāsakānaṃ upāsikānaṃ, tathārūpāni kulāni sevati bhajati payirupāsati, ayaṃ vuccati agocaro’’ti (vibha. 514) –
এৰমাগতং ৰেসিযাদিঅগোচরং পহায।
Evamāgataṃ vesiyādiagocaraṃ pahāya.
সদ্ধাসম্পন্নকুলাদিনাতি এত্থ আদি-সদ্দেন উপনিস্সযগোচরাদিং সঙ্গণ্হাতি। তিৰিধো হি গোচরো উপনিস্সযগোচরো আরক্খগোচরো উপনিবন্ধগোচরোতি। কতমো উপনিস্সযগোচরো? দসকথাৰত্থুগুণসমন্নাগতো কল্যাণমিত্তো, যং নিস্সায অসুতং সুণাতি, সুতং পরিযোদপেতি, কঙ্খং ৰিতরতি, দিট্ঠিং উজুং করোতি, চিত্তং পসাদেতি। যস্স ৰা পন অনুসিক্খমানো সদ্ধায ৰড্ঢতি, সীলেন সুতেন চাগেন পঞ্ঞায ৰড্ঢতি, অযং উপনিস্সযগোচরো। কতমো আরক্খগোচরো? ইধ ভিক্খু অন্তরঘরং পৰিট্ঠো ৰীথিং পটিপন্নো ওক্খিত্তচক্খু যুগমত্তদস্সাৰী সংৰুতো গচ্ছতি, ন হত্থিং ওলোকেন্তো, ন অস্সং, ন রথং, ন পত্তিং, ন ইত্থিং, ন পুরিসং ওলোকেন্তো, ন উদ্ধং ওলোকেন্তো, ন অধো ওলোকেন্তো, ন দিসাৰিদিসং ৰিপেক্খমানো গচ্ছতি, অযং আরক্খগোচরো। কতমো উপনিবন্ধগোচরো? চত্তারো সতিপট্ঠানা, যত্থ চিত্তং উপনিবন্ধতি। ৰুত্তঞ্হেতং ভগৰতা ‘‘কো চ, ভিক্খৰে, ভিক্খুনো গোচরো সকো পেত্তিকো ৰিসযো? যদিদং চত্তারো সতিপট্ঠানা’’তি (সং॰ নি॰ ৫.৩৭২), অযং উপনিবন্ধগোচরো। ইতি অযং তিৰিধো গোচরো ইধ আদি-সদ্দেন সঙ্গহিতোতি দট্ঠব্বো।
Saddhāsampannakulādināti ettha ādi-saddena upanissayagocarādiṃ saṅgaṇhāti. Tividho hi gocaro upanissayagocaro ārakkhagocaro upanibandhagocaroti. Katamo upanissayagocaro? Dasakathāvatthuguṇasamannāgato kalyāṇamitto, yaṃ nissāya asutaṃ suṇāti, sutaṃ pariyodapeti, kaṅkhaṃ vitarati, diṭṭhiṃ ujuṃ karoti, cittaṃ pasādeti. Yassa vā pana anusikkhamāno saddhāya vaḍḍhati, sīlena sutena cāgena paññāya vaḍḍhati, ayaṃ upanissayagocaro. Katamo ārakkhagocaro? Idha bhikkhu antaragharaṃ paviṭṭho vīthiṃ paṭipanno okkhittacakkhu yugamattadassāvī saṃvuto gacchati, na hatthiṃ olokento, na assaṃ, na rathaṃ, na pattiṃ, na itthiṃ, na purisaṃ olokento, na uddhaṃ olokento, na adho olokento, na disāvidisaṃ vipekkhamāno gacchati, ayaṃ ārakkhagocaro. Katamo upanibandhagocaro? Cattāro satipaṭṭhānā, yattha cittaṃ upanibandhati. Vuttañhetaṃ bhagavatā ‘‘ko ca, bhikkhave, bhikkhuno gocaro sako pettiko visayo? Yadidaṃ cattāro satipaṭṭhānā’’ti (saṃ. ni. 5.372), ayaṃ upanibandhagocaro. Iti ayaṃ tividho gocaro idha ādi-saddena saṅgahitoti daṭṭhabbo.
অপ্পমত্তকেসু ৰজ্জেসূতি অসঞ্চিচ্চ আপন্নসেখিযঅকুসলচিত্তুপ্পাদাদিভেদেসু ৰজ্জেসু। ভযতো দস্সনসীলোতি পরমাণুমত্তং ৰজ্জং অট্ঠসট্ঠিযোজনসতসহস্সুব্বেধসিনেরুপব্বতসদিসং কত্ৰা দস্সনসভাৰো, সব্বলহুকং ৰা দুব্ভাসিতমত্তং পারাজিকসদিসং কত্ৰা দস্সনসভাৰো। সম্মা আদাযাতি সম্মদেৰ সক্কচ্চং সব্বসো ৰা আদিযিত্ৰা।
Appamattakesu vajjesūti asañcicca āpannasekhiyaakusalacittuppādādibhedesu vajjesu. Bhayato dassanasīloti paramāṇumattaṃ vajjaṃ aṭṭhasaṭṭhiyojanasatasahassubbedhasinerupabbatasadisaṃ katvā dassanasabhāvo, sabbalahukaṃ vā dubbhāsitamattaṃ pārājikasadisaṃ katvā dassanasabhāvo. Sammā ādāyāti sammadeva sakkaccaṃ sabbaso vā ādiyitvā.
ৰট্টদুক্খনিস্সরণত্থিকেহি সোতব্বতো সুতং, পরিযত্তিধম্মো। তং ধারেতীতি সুতধরো, সুতস্স আধারভূতো। যস্স হি ইতো গহিতং এত্তো পলাযতি, ছিদ্দঘটে উদকং ৰিয ন তিট্ঠতি, পরিসমজ্ঝে একং সুত্তং ৰা জাতকং ৰা কথেতুং ৰা ৰাচেতুং ৰা ন সক্কোতি, অযং ন সুতধরো নাম। যস্স পন উগ্গহিতং বুদ্ধৰচনং উগ্গহিতকালসদিসমেৰ হোতি, দসপি ৰীসতিপি ৰস্সানি সজ্ঝাযং অকরোন্তস্স ন নস্সতি, অযং সুতধরো নাম। তেনেৰাহ ‘‘যদস্স ত’’ন্তিআদি। একপদম্পি একক্খরম্পি অৰিনট্ঠং হুত্ৰা সন্নিচিযতীতি সন্নিচযো, সুতং সন্নিচযো এতস্মিন্তি সুতসন্নিচযোতি আহ ‘‘সুতং সন্নিচিতং অস্মিন্তি সুতসন্নিচযো’’তি। যস্স হি সুতং হদযমঞ্জুসাযং সন্নিচিতং সিলায লেখা ৰিয সুৰণ্ণঘটে পক্খিত্তা সীহৰসা ৰিয চ সাধু তিট্ঠতি, অযং সুতসন্নিচযো নাম। তেনাহ ‘‘এতেন…পে॰… অৰিনাসং দস্সেতী’’তি।
Vaṭṭadukkhanissaraṇatthikehi sotabbato sutaṃ, pariyattidhammo. Taṃ dhāretīti sutadharo, sutassa ādhārabhūto. Yassa hi ito gahitaṃ etto palāyati, chiddaghaṭe udakaṃ viya na tiṭṭhati, parisamajjhe ekaṃ suttaṃ vā jātakaṃ vā kathetuṃ vā vācetuṃ vā na sakkoti, ayaṃ na sutadharo nāma. Yassa pana uggahitaṃ buddhavacanaṃ uggahitakālasadisameva hoti, dasapi vīsatipi vassāni sajjhāyaṃ akarontassa na nassati, ayaṃ sutadharo nāma. Tenevāha ‘‘yadassa ta’’ntiādi. Ekapadampi ekakkharampi avinaṭṭhaṃ hutvā sanniciyatīti sannicayo, sutaṃ sannicayo etasminti sutasannicayoti āha ‘‘sutaṃ sannicitaṃ asminti sutasannicayo’’ti. Yassa hi sutaṃ hadayamañjusāyaṃ sannicitaṃ silāya lekhā viya suvaṇṇaghaṭe pakkhittā sīhavasā viya ca sādhu tiṭṭhati, ayaṃ sutasannicayo nāma. Tenāha ‘‘etena…pe… avināsaṃ dassetī’’ti.
ধাতাতি পগুণা ৰাচুগ্গতা। একস্স হি উগ্গহিতবুদ্ধৰচনং নিচ্চকালিকং ন হোতি, ‘‘অসুকসুত্তং ৰা জাতকং ৰা কথেহী’’তি ৰুত্তে ‘‘সজ্ঝাযিত্ৰা অঞ্ঞেহি সংসন্দিত্ৰা পরিপুচ্ছাৰসেন অত্থং ওগাহিত্ৰা জানিস্সামী’’তি ৰদতি। একস্স পগুণং পবন্ধৰিচ্ছেদাভাৰতো গঙ্গাসোতসদিসং ভৰঙ্গসোতসদিসঞ্চ অকিত্তিমং সুখপ্পৰত্তি হোতি, ‘‘অসুকসুত্তং ৰা জাতকং ৰা কথেহী’’তি ৰুত্তে উদ্ধরিত্ৰা তমেৰ কথেতি। তং সন্ধায ৰুত্তং ‘‘ধাতা’’তি। ৰাচায পগুণা কতাতি সুত্তদসকৰগ্গদসকপণ্ণাসদসকৰসেন ৰাচায সজ্ঝাযিতা, দস সুত্তানি গতানি, দস ৰগ্গানি গতানীতিআদিনা সল্লক্খেত্ৰা ৰাচায সজ্ঝাযিতাতি অত্থো। সুত্তেকদেসস্স হি সুত্তমত্তস্স চ ৰচসা পরিচযো ইধ নাধিপ্পেতো, অথ খো ৰগ্গাদিৰসেনেৰ। মনসা অনুপেক্খিতাতি মনসা অনু অনু পেক্খিতা, ভাগসো নিজ্ঝাযিতা চিন্তিতাতি অত্থো। আৰজ্জন্তস্সাতি ৰাচায সজ্ঝাযিতুং বুদ্ধৰচনং মনসা চিন্তেন্তস্স। সুট্ঠু পটিৰিদ্ধাতি নিজ্জটং নিগ্গুম্বং কত্ৰা সুট্ঠু যাথাৰতো পটিৰিদ্ধা।
Dhātāti paguṇā vācuggatā. Ekassa hi uggahitabuddhavacanaṃ niccakālikaṃ na hoti, ‘‘asukasuttaṃ vā jātakaṃ vā kathehī’’ti vutte ‘‘sajjhāyitvā aññehi saṃsanditvā paripucchāvasena atthaṃ ogāhitvā jānissāmī’’ti vadati. Ekassa paguṇaṃ pabandhavicchedābhāvato gaṅgāsotasadisaṃ bhavaṅgasotasadisañca akittimaṃ sukhappavatti hoti, ‘‘asukasuttaṃ vā jātakaṃ vā kathehī’’ti vutte uddharitvā tameva katheti. Taṃ sandhāya vuttaṃ ‘‘dhātā’’ti. Vācāya paguṇā katāti suttadasakavaggadasakapaṇṇāsadasakavasena vācāya sajjhāyitā, dasa suttāni gatāni, dasa vaggāni gatānītiādinā sallakkhetvā vācāya sajjhāyitāti attho. Suttekadesassa hi suttamattassa ca vacasā paricayo idha nādhippeto, atha kho vaggādivaseneva. Manasā anupekkhitāti manasā anu anu pekkhitā, bhāgaso nijjhāyitā cintitāti attho. Āvajjantassāti vācāya sajjhāyituṃ buddhavacanaṃ manasā cintentassa. Suṭṭhu paṭividdhāti nijjaṭaṃ niggumbaṃ katvā suṭṭhu yāthāvato paṭividdhā.
দ্ৰে মাতিকাতি ভিক্খুমাতিকা ভিক্খুনীমাতিকা চ। ৰাচুগ্গতাতি পুরিমস্সেৰ ৰেৰচনং। তিস্সো অনুমোদনাতি সঙ্ঘভত্তে দানানিসংসপটিসংযুত্তঅনুমোদনা, ৰিহারাদিমঙ্গলে মঙ্গলসুত্তাদিঅনুমোদনা, মতকভত্তাদিঅৰমঙ্গলে তিরোকুট্টাদিঅনুমোদনাতি ইমা তিস্সো অনুমোদনা । কম্মাকম্মৰিনিচ্ছযোতি পরিৰারাৰসানে কম্মৰগ্গে ৰুত্তৰিনিচ্ছযো। ‘‘ৰিপস্সনাৰসেন উগ্গণ্হন্তেন চতুধাতুৰৰত্থানমুখেন উগ্গহেতব্ব’’ন্তি তীসুপি গণ্ঠিপদেসু ৰুত্তং। চতূসু দিসাসু অপ্পটিহতত্তা চতস্সো দিসা এতস্সাতি চতুদ্দিসো, চতুদ্দিসোযেৰ চাতুদ্দিসো, চতস্সো ৰা দিসা অরহতি, চতূসু ৰা দিসাসু সাধূতি চাতুদ্দিসো।
Dve mātikāti bhikkhumātikā bhikkhunīmātikā ca. Vācuggatāti purimasseva vevacanaṃ. Tisso anumodanāti saṅghabhatte dānānisaṃsapaṭisaṃyuttaanumodanā, vihārādimaṅgale maṅgalasuttādianumodanā, matakabhattādiavamaṅgale tirokuṭṭādianumodanāti imā tisso anumodanā . Kammākammavinicchayoti parivārāvasāne kammavagge vuttavinicchayo. ‘‘Vipassanāvasena uggaṇhantena catudhātuvavatthānamukhena uggahetabba’’nti tīsupi gaṇṭhipadesu vuttaṃ. Catūsu disāsu appaṭihatattā catasso disā etassāti catuddiso, catuddisoyeva cātuddiso, catasso vā disā arahati, catūsu vā disāsu sādhūti cātuddiso.
অভিৰিনযেতি সকলে ৰিনযপিটকে। ৰিনেতুন্তি সিক্খাপেতুং। ‘‘দ্ৰে ৰিভঙ্গা পগুণা ৰাচুগ্গতা কাতব্বাতি ইদং পরিপুচ্ছাৰসেন উগ্গহণম্পি সন্ধায ৰুত্ত’’ন্তি ৰদন্তি। একস্স পমুট্ঠং, ইতরস্স পগুণং হোতীতি আহ ‘‘তীহি জনেহি সদ্ধিং পরিৰত্তনক্খমা কাতব্বা’’তি। অভিধম্মেতি নামরূপপরিচ্ছেদে। হেট্ঠিমা ৰা তযো ৰগ্গাতি মহাৰগ্গতো হেট্ঠা সগাথকৰগ্গো নিদানৰগ্গো খন্ধকৰগ্গোতি ইমে তযো ৰগ্গা। ‘‘ধম্মপদম্পি সহ ৰত্থুনা উগ্গহেতুং ৰট্টতী’’তি মহাপচ্চরিযং ৰুত্তত্তা জাতকভাণকেন সাট্ঠকথং জাতকং উগ্গহেত্ৰাপি ধম্মপদম্পি সহ ৰত্থুনা উগ্গহেতব্বমেৰ।
Abhivinayeti sakale vinayapiṭake. Vinetunti sikkhāpetuṃ. ‘‘Dve vibhaṅgā paguṇā vācuggatā kātabbāti idaṃ paripucchāvasena uggahaṇampi sandhāya vutta’’nti vadanti. Ekassa pamuṭṭhaṃ, itarassa paguṇaṃ hotīti āha ‘‘tīhi janehi saddhiṃ parivattanakkhamā kātabbā’’ti. Abhidhammeti nāmarūpaparicchede. Heṭṭhimā vā tayo vaggāti mahāvaggato heṭṭhā sagāthakavaggo nidānavaggo khandhakavaggoti ime tayo vaggā. ‘‘Dhammapadampi saha vatthunā uggahetuṃ vaṭṭatī’’ti mahāpaccariyaṃ vuttattā jātakabhāṇakena sāṭṭhakathaṃ jātakaṃ uggahetvāpi dhammapadampi saha vatthunā uggahetabbameva.
কল্যাণা সুন্দরা পরিমণ্ডলপদব্যঞ্জনা ৰাচা অস্সাতি কল্যাণৰাচো। তেনাহ ‘‘সিথিলধনিতাদীনং…পে॰… ৰাচায সমন্নাগতো’’তি। তত্থ পরিমণ্ডলপদব্যঞ্জনাযাতি ঠানকরণসম্পত্তিযা সিক্খাসম্পত্তিযা চ কত্থচিপি অনূনতায পরিমণ্ডলপদানি ব্যঞ্জনানি অক্খরানি এতিস্সাতি পরিমণ্ডলপদব্যঞ্জনা, পদমেৰ ৰা অত্থস্স ব্যঞ্জনতো পদব্যঞ্জনং, তং অক্খরপারিপূরিং কত্ৰা সিথিলধনিতাদিদসৰিধং ব্যঞ্জনবুদ্ধিং অপরিহাপেত্ৰা ৰুত্তং পরিমণ্ডলং নাম হোতি। অক্খরপারিপূরিযা হি পদব্যঞ্জনস্স পরিমণ্ডলতা। তেন ৰুত্তং ‘‘সিথিলধনিতাদীনং যথাৰিধানৰচনেনা’’তি, পরিমণ্ডলং পদব্যঞ্জনং এতিস্সাতি পরিমণ্ডলপদব্যঞ্জনা। অথ ৰা পজ্জতি ঞাযতি অত্থো এতেনাতি পদং, নামাদি। যথাধিপ্পেতমত্থং ব্যঞ্জেতীতি ব্যঞ্জনং, ৰাক্যং। তেসং পরিপুণ্ণতায পরিমণ্ডলপদব্যঞ্জনা।
Kalyāṇā sundarā parimaṇḍalapadabyañjanā vācā assāti kalyāṇavāco. Tenāha ‘‘sithiladhanitādīnaṃ…pe… vācāya samannāgato’’ti. Tattha parimaṇḍalapadabyañjanāyāti ṭhānakaraṇasampattiyā sikkhāsampattiyā ca katthacipi anūnatāya parimaṇḍalapadāni byañjanāni akkharāni etissāti parimaṇḍalapadabyañjanā, padameva vā atthassa byañjanato padabyañjanaṃ, taṃ akkharapāripūriṃ katvā sithiladhanitādidasavidhaṃ byañjanabuddhiṃ aparihāpetvā vuttaṃ parimaṇḍalaṃ nāma hoti. Akkharapāripūriyā hi padabyañjanassa parimaṇḍalatā. Tena vuttaṃ ‘‘sithiladhanitādīnaṃyathāvidhānavacanenā’’ti, parimaṇḍalaṃ padabyañjanaṃ etissāti parimaṇḍalapadabyañjanā. Atha vā pajjati ñāyati attho etenāti padaṃ, nāmādi. Yathādhippetamatthaṃ byañjetīti byañjanaṃ, vākyaṃ. Tesaṃ paripuṇṇatāya parimaṇḍalapadabyañjanā.
অপিচ যো ভিক্খু পরিসতি ধম্মং দেসেন্তো সুত্তং ৰা জাতকং ৰা নিক্খিপিত্ৰা অঞ্ঞং উপারম্ভকরং সুত্তং আহরতি, তস্স উপমং কথেতি, তদত্থং ওতারেতি, এৰং ইদং গহেত্ৰা এত্থ খিপন্তো একপস্সেনেৰ পরিহরন্তো কালং ঞত্ৰা ৰুট্ঠহতি, নিক্খিত্তসুত্তং পন নিক্খিত্তমত্তমেৰ হোতি, তস্স কথা অপরিমণ্ডলা নাম হোতি অত্থস্স অপরিপুণ্ণভাৰতো। যো পন সুত্তং ৰা জাতকং ৰা নিক্খিপিত্ৰা বহি একপদম্পি অগন্ত্ৰা যথানিক্খিত্তস্স সুত্তস্স অত্থসংৰণ্ণনাৰসেনেৰ সুত্তন্তরম্পি আনেন্তো পাল়িযা অনুসন্ধিঞ্চ পুব্বাপরঞ্চ অপেক্খন্তো আচরিযেহি দিন্ননযে ঠত্ৰা তুলিকায পরিচ্ছিন্দন্তো ৰিয তং তং অত্থং সুৰৰত্থিতং কত্ৰা দস্সেন্তো গম্ভীরমাতিকায উদকং পেসেন্তো ৰিয গম্ভীরমত্থং গমেন্তো ৰগ্গিহারিগতিযা পদে পদং কোট্টেন্তো সিন্ধৰাজানীযো ৰিয একংযেৰ পদং অনেকেহি পরিযাযেহি পুনপ্পুনং সংৰণ্ণন্তো গচ্ছতি, তস্স কথা পরিমণ্ডলা নাম হোতি ধম্মতো অত্থতো অনুসন্ধিতো পুব্বাপরতো আচরিযুগ্গহতোতি সব্বসো পরিপুণ্ণভাৰতো। এৰরূপম্পি কথং সন্ধায ‘‘পরিমণ্ডলপদব্যঞ্জনাযা’’তি ৰুত্তং।
Apica yo bhikkhu parisati dhammaṃ desento suttaṃ vā jātakaṃ vā nikkhipitvā aññaṃ upārambhakaraṃ suttaṃ āharati, tassa upamaṃ katheti, tadatthaṃ otāreti, evaṃ idaṃ gahetvā ettha khipanto ekapasseneva pariharanto kālaṃ ñatvā vuṭṭhahati, nikkhittasuttaṃ pana nikkhittamattameva hoti, tassa kathā aparimaṇḍalā nāma hoti atthassa aparipuṇṇabhāvato. Yo pana suttaṃ vā jātakaṃ vā nikkhipitvā bahi ekapadampi agantvā yathānikkhittassa suttassa atthasaṃvaṇṇanāvaseneva suttantarampi ānento pāḷiyā anusandhiñca pubbāparañca apekkhanto ācariyehi dinnanaye ṭhatvā tulikāya paricchindanto viya taṃ taṃ atthaṃ suvavatthitaṃ katvā dassento gambhīramātikāya udakaṃ pesento viya gambhīramatthaṃ gamento vaggihārigatiyā pade padaṃ koṭṭento sindhavājānīyo viya ekaṃyeva padaṃ anekehi pariyāyehi punappunaṃ saṃvaṇṇanto gacchati, tassa kathā parimaṇḍalā nāma hoti dhammato atthato anusandhito pubbāparato ācariyuggahatoti sabbaso paripuṇṇabhāvato. Evarūpampi kathaṃ sandhāya ‘‘parimaṇḍalapadabyañjanāyā’’ti vuttaṃ.
গুণপরিপুণ্ণভাৰেন পুরে ভৰাতি পোরী, তস্স ভিক্খুনো তেনেতং ভাসিতব্বং অত্থস্স গুণপরিপুণ্ণভাৰেন পুরে পুণ্ণভাৰে ভৰাতি অত্থো। পুরে ৰা ভৰত্তা পোরিযা নাগরিকিত্থিযা সুখুমালত্তনেন সদিসাতি পোরী, পুরে সংৰড্ঢনারী ৰিয সুকুমারাতি অত্থো। পুরস্স এসাতিপি পোরী, পুরস্স এসাতি নগরৰাসীনং কথাতি অত্থো। নগরৰাসিনো হি যুত্তকথা হোন্তি পিতিমত্তং ‘‘পিতা’’তি, ভাতিমত্তং ‘‘ভাতা’’তি ৰদন্তি। এৰরূপী হি কথা বহুনো জনস্স কন্তা হোতি মনাপা, তায পোরিযা।
Guṇaparipuṇṇabhāvena pure bhavāti porī, tassa bhikkhuno tenetaṃ bhāsitabbaṃ atthassa guṇaparipuṇṇabhāvena pure puṇṇabhāve bhavāti attho. Pure vā bhavattā poriyā nāgarikitthiyā sukhumālattanena sadisāti porī, pure saṃvaḍḍhanārī viya sukumārāti attho. Purassa esātipi porī, purassa esāti nagaravāsīnaṃ kathāti attho. Nagaravāsino hi yuttakathā honti pitimattaṃ ‘‘pitā’’ti, bhātimattaṃ ‘‘bhātā’’ti vadanti. Evarūpī hi kathā bahuno janassa kantā hoti manāpā, tāya poriyā.
ৰিস্সট্ঠাযাতি পিত্তসেম্হাদীহি অপলিবুদ্ধায সন্দিট্ঠৰিলম্বিতাদিদোসরহিতায। অথ ৰা নাতিসীঘং নাতিসণিকং নিরন্তরং একরসঞ্চ কত্ৰা পরিসায অজ্ঝাসযানুরূপং ধম্মং কথেন্তস্স ৰাচা ৰিস্সট্ঠা নাম। যো হি ভিক্খু ধম্মং কথেন্তো সুত্তং ৰা জাতকং ৰা আরভিত্ৰা আরদ্ধকালতো পট্ঠায তুরিততুরিতো অরণিং মন্থেন্তো ৰিয উণ্হখাদনীযং খাদন্তো ৰিয পাল়িযা অনুসন্ধিপুব্বাপরেসু গহিতং গহিতমেৰ, অগ্গহিতং অগ্গহিতমেৰ কত্ৰা পুরাণপণ্ণন্তরেসু চরমানং গোধং উট্ঠাপেন্তো ৰিয তত্থ তত্থ পহরন্তো ওসাপেত্ৰা উট্ঠায গচ্ছতি । পুরাণপণ্ণন্তরেসু হি পরিপাতিযমানা গোধা কদাচি দিস্সতি কদাচি ন দিস্সতি, এৰমেকচ্চস্স অত্থৰণ্ণনা কত্থচি দিস্সতি কত্থচি ন দিস্সতি। যোপি ধম্মং কথেন্তো কালেন সীঘং, কালেন সণিকং, কালেন মন্দং, কালেন মহাসদ্দং, কালেন খুদ্দকসদ্দং করোতি, যথা নিজ্ঝামতণ্হিকপেতস্স মুখতো নিচ্ছরণকঅগ্গি কালেন জলতি কালেন নিব্বাযতি, এৰং পেতধম্মকথিকো নাম হোতি, পরিসায উট্ঠাতুকামায পুন আরভতি। যোপি কথেন্তো তত্থ তত্থ ৰিত্থাযতি, অপ্পটিভানতায আপজ্জতি, কেনচি রোগেন নিত্থুনন্তো ৰিয কন্দন্তো ৰিয কথেতি, ইমেসং সব্বেসম্পি কথা ৰিস্সট্ঠা নাম ন হোতি সুখেন অপ্পৰত্তভাৰতো। যো পন সুত্তং আহরিত্ৰা আচরিযেহি দিন্ননযে ঠিতো আচরিযুগ্গহং অমুঞ্চন্তো যথা চ আচরিযা তং তং সুত্তং সংৰণ্ণেসুং, তেনেৰ নযেন সংৰণ্ণেন্তো নাতিসীঘং নাতিসণিকন্তিআদিনা ৰুত্তনযেন কথাপবন্ধং অৰিচ্ছিন্নং কত্ৰা নদীসোতো ৰিয পৰত্তেতি, আকাসগঙ্গাতো ভস্সমানউদকং ৰিয নিরন্তরকথং পৰত্তেতি, তস্স কথা ৰিস্সট্ঠা নাম হোতি। তং সন্ধায ৰুত্তং ‘‘ৰিস্সট্ঠাযা’’তি।
Vissaṭṭhāyāti pittasemhādīhi apalibuddhāya sandiṭṭhavilambitādidosarahitāya. Atha vā nātisīghaṃ nātisaṇikaṃ nirantaraṃ ekarasañca katvā parisāya ajjhāsayānurūpaṃ dhammaṃ kathentassa vācā vissaṭṭhā nāma. Yo hi bhikkhu dhammaṃ kathento suttaṃ vā jātakaṃ vā ārabhitvā āraddhakālato paṭṭhāya turitaturito araṇiṃ manthento viya uṇhakhādanīyaṃ khādanto viya pāḷiyā anusandhipubbāparesu gahitaṃ gahitameva, aggahitaṃ aggahitameva katvā purāṇapaṇṇantaresu caramānaṃ godhaṃ uṭṭhāpento viya tattha tattha paharanto osāpetvā uṭṭhāya gacchati . Purāṇapaṇṇantaresu hi paripātiyamānā godhā kadāci dissati kadāci na dissati, evamekaccassa atthavaṇṇanā katthaci dissati katthaci na dissati. Yopi dhammaṃ kathento kālena sīghaṃ, kālena saṇikaṃ, kālena mandaṃ, kālena mahāsaddaṃ, kālena khuddakasaddaṃ karoti, yathā nijjhāmataṇhikapetassa mukhato niccharaṇakaaggi kālena jalati kālena nibbāyati, evaṃ petadhammakathiko nāma hoti, parisāya uṭṭhātukāmāya puna ārabhati. Yopi kathento tattha tattha vitthāyati, appaṭibhānatāya āpajjati, kenaci rogena nitthunanto viya kandanto viya katheti, imesaṃ sabbesampi kathā vissaṭṭhā nāma na hoti sukhena appavattabhāvato. Yo pana suttaṃ āharitvā ācariyehi dinnanaye ṭhito ācariyuggahaṃ amuñcanto yathā ca ācariyā taṃ taṃ suttaṃ saṃvaṇṇesuṃ, teneva nayena saṃvaṇṇento nātisīghaṃ nātisaṇikantiādinā vuttanayena kathāpabandhaṃ avicchinnaṃ katvā nadīsoto viya pavatteti, ākāsagaṅgāto bhassamānaudakaṃ viya nirantarakathaṃ pavatteti, tassa kathā vissaṭṭhā nāma hoti. Taṃ sandhāya vuttaṃ ‘‘vissaṭṭhāyā’’ti.
অনেলগল়াযাতি এলগল়ৰিরহিতায। কস্সচি হি কথেন্তস্স এলং গল়তি, লালা পগ্ঘরতি, খেল়ফুসিতানি ৰা নিক্খমন্তি, তস্স ৰাচা এলগল়া নাম হোতি, তব্বিপরীতাযাতি অত্থো। অত্থস্স ৰিঞ্ঞাপনিযাতি আদিমজ্ঝপরিযোসানং পাকটং কত্ৰা ভাসিতত্থস্স ৰিঞ্ঞাপনসমত্থতায অত্থঞাপনে সাধনায।
Anelagaḷāyāti elagaḷavirahitāya. Kassaci hi kathentassa elaṃ gaḷati, lālā paggharati, kheḷaphusitāni vā nikkhamanti, tassa vācā elagaḷā nāma hoti, tabbiparītāyāti attho. Atthassa viññāpaniyāti ādimajjhapariyosānaṃ pākaṭaṃ katvā bhāsitatthassa viññāpanasamatthatāya atthañāpane sādhanāya.
ৰাচাৰ করণন্তি ৰাক্করণং, উদাহারঘোসো। কল্যাণং মধুরং ৰাক্করণং অস্সাতি কল্যাণৰাক্করণো। তেনেৰাহ ‘‘মধুরস্সরো’’তি। হীল়েতীতি অৰজানাতি। মাতুগামোতি সম্বন্ধো। মনং অপাযতি ৰড্ঢেতীতি মনাপো। তেনাহ ‘‘মনৰড্ঢনকো’’তি। ৰট্টভযেন তজ্জেত্ৰাতি যোব্বনমদাদিমত্তা ভিক্খুনিযো সংসারভযেন তাসেত্ৰা। গিহিকালেতি অত্তনো গিহিকালে। ভিক্খুনিযা মেথুনেন ভিক্খুনীদূসকো হোতীতি ভিক্খুনিযা কাযসংসগ্গমেৰ ৰদতি। সিক্খমানাসামণেরীসু পন মেথুনেনপি ভিক্খুনীদূসকো ন হোতীতি আহ ‘‘সিক্খমানাসামণেরীসু মেথুনধম্ম’’ন্তি। ‘‘কাসাযৰত্থৰসনাযা’’তি ৰচনতো দুস্সীলাসু ভিক্খুনীসিক্খমানাসামণেরীসু গরুধম্মং অজ্ঝাপন্নপুব্বো পটিক্খিত্তোযেৰাতি দট্ঠব্বং। তস্সা ভিক্খুনিযা অভাৰেপি যা যা তস্সা ৰচনং অস্সোসুং, তা তা তথেৰ মঞ্ঞন্তীতি আহ ‘‘মাতুগামো হী’’তিআদি।
Vācāva karaṇanti vākkaraṇaṃ, udāhāraghoso. Kalyāṇaṃ madhuraṃ vākkaraṇaṃ assāti kalyāṇavākkaraṇo. Tenevāha ‘‘madhurassaro’’ti. Hīḷetīti avajānāti. Mātugāmoti sambandho. Manaṃ apāyati vaḍḍhetīti manāpo. Tenāha ‘‘manavaḍḍhanako’’ti. Vaṭṭabhayena tajjetvāti yobbanamadādimattā bhikkhuniyo saṃsārabhayena tāsetvā. Gihikāleti attano gihikāle. Bhikkhuniyā methunena bhikkhunīdūsako hotīti bhikkhuniyā kāyasaṃsaggameva vadati. Sikkhamānāsāmaṇerīsu pana methunenapi bhikkhunīdūsako na hotīti āha ‘‘sikkhamānāsāmaṇerīsu methunadhamma’’nti. ‘‘Kāsāyavatthavasanāyā’’ti vacanato dussīlāsu bhikkhunīsikkhamānāsāmaṇerīsu garudhammaṃ ajjhāpannapubbo paṭikkhittoyevāti daṭṭhabbaṃ. Tassā bhikkhuniyā abhāvepi yā yā tassā vacanaṃ assosuṃ, tā tā tatheva maññantīti āha ‘‘mātugāmo hī’’tiādi.
ইদানি অট্ঠ অঙ্গানি সমোধানেত্ৰা দস্সেতুং ‘‘এত্থ চা’’তিআদি আরদ্ধং। ইমেহি পন অট্ঠহঙ্গেহি অসমন্নাগতং ঞত্তিচতুত্থেন কম্মেন সম্মন্নেন্তো দুক্কটং আপজ্জতি, ভিক্খু পন সম্মতোযেৰ হোতি।
Idāni aṭṭha aṅgāni samodhānetvā dassetuṃ ‘‘ettha cā’’tiādi āraddhaṃ. Imehi pana aṭṭhahaṅgehi asamannāgataṃ ñatticatutthena kammena sammannento dukkaṭaṃ āpajjati, bhikkhu pana sammatoyeva hoti.
১৪৮. গরুকেহীতি গরুকাতব্বেহি। একতোউপসম্পন্নাযাতি উপযোগত্থে ভুম্মৰচনং। ‘‘ওৰদতী’’তি ৰা ইমস্স ‘‘ৰদতী’’তি অত্থে সতি সম্পদানৰচনম্পি যুজ্জতি। ভিক্খূনং সন্তিকে উপসম্পন্না নাম পরিৰত্তলিঙ্গা ৰা পঞ্চসতসাকিযানিযো ৰা।
148.Garukehīti garukātabbehi. Ekatoupasampannāyāti upayogatthe bhummavacanaṃ. ‘‘Ovadatī’’ti vā imassa ‘‘vadatī’’ti atthe sati sampadānavacanampi yujjati. Bhikkhūnaṃ santike upasampannā nāma parivattaliṅgā vā pañcasatasākiyāniyo vā.
১৪৯. আসনং পঞ্ঞপেত্ৰাতি এত্থ ‘‘সচে ভূমি মনাপা হোতি, আসনং অপঞ্ঞাপেতুম্পি ৰট্টতী’’তি তীসুপি গণ্ঠিপদেসু ৰুত্তং। মাতুগামগ্গহণেন ভিক্খুনীপি সঙ্গহিতাতি আহ ‘‘ধম্মদেসনাপত্তিমোচনত্থ’’ন্তি। সম্মতস্স ভিক্খুনো সন্তিকং পাটিপদে ওৰাদত্থায সব্বাহি ভিক্খুনীহি আগন্তব্বতো ‘‘সমগ্গাত্থ ভগিনিযো’’তি ইমিনা সব্বাসং আগমনং পুচ্ছতীতি আহ ‘‘সব্বা আগতাত্থা’’তি। গিলানাসু অনাগতাসুপি গিলানানং অনাগমনস্স অনুঞ্ঞাতত্তা আগন্তুং সমত্থাহি চ সব্বাহি আগতত্তা ‘‘সমগ্গাম্হয্যা’’তি ৰত্তুং ৰট্টতি। অন্তোগামে ৰাতিআদীসু যত্থ পঞ্চ অঙ্গানি ভূমিযং পতিট্ঠাপেত্ৰা ৰন্দিতুং ন সক্কা হোতি, তত্থ ঠিতায এৰ কাযং পুরতো নামেত্ৰা ‘‘ৰন্দামি অয্যা’’তি অঞ্জলিং পগ্গয্হ গন্তুম্পি ৰট্টতি। অন্তরঘরন্তি কত্থচি নগরদ্ৰারস্স বহিইন্দখীলতো পট্ঠায অন্তোগামো ৰুচ্চতি, কত্থচি ঘরুম্মারতো পট্ঠায অন্তোগেহং। ইধ পন ‘‘অন্তোগামে ৰা’’তি ৰিসুং ৰুত্তত্তা ‘‘অন্তরঘরে ৰা’’তি অন্তোগেহং সন্ধায ৰুত্তন্তি দট্ঠব্বং। যত্থ কত্থচীতি অন্তোগামাদীসু যত্থ কত্থচি।
149.Āsanaṃ paññapetvāti ettha ‘‘sace bhūmi manāpā hoti, āsanaṃ apaññāpetumpi vaṭṭatī’’ti tīsupi gaṇṭhipadesu vuttaṃ. Mātugāmaggahaṇena bhikkhunīpi saṅgahitāti āha ‘‘dhammadesanāpattimocanattha’’nti. Sammatassa bhikkhuno santikaṃ pāṭipade ovādatthāya sabbāhi bhikkhunīhi āgantabbato ‘‘samaggāttha bhaginiyo’’ti iminā sabbāsaṃ āgamanaṃ pucchatīti āha ‘‘sabbā āgatātthā’’ti. Gilānāsu anāgatāsupi gilānānaṃ anāgamanassa anuññātattā āgantuṃ samatthāhi ca sabbāhi āgatattā ‘‘samaggāmhayyā’’ti vattuṃ vaṭṭati. Antogāme vātiādīsu yattha pañca aṅgāni bhūmiyaṃ patiṭṭhāpetvā vandituṃ na sakkā hoti, tattha ṭhitāya eva kāyaṃ purato nāmetvā ‘‘vandāmi ayyā’’ti añjaliṃ paggayha gantumpi vaṭṭati. Antaragharanti katthaci nagaradvārassa bahiindakhīlato paṭṭhāya antogāmo vuccati, katthaci gharummārato paṭṭhāya antogehaṃ. Idha pana ‘‘antogāme vā’’ti visuṃ vuttattā ‘‘antaraghare vā’’ti antogehaṃ sandhāya vuttanti daṭṭhabbaṃ. Yattha katthacīti antogāmādīsu yattha katthaci.
ৰট্টতীতি ‘‘ৰসথ অয্যে, মযং ভিক্খূ আনেস্সামা’’তি ৰুত্তৰচনং সদ্দহন্তীহি ৰসিতুং ৰট্টতি। ন নিমন্তিতা হুত্ৰা গন্তুকামাতি মনুস্সেহি নিমন্তিতা হুত্ৰা গন্তুকামা ন হোন্তীতি অত্থো, তত্থেৰ ৰস্সং উপগন্তুকামা হোন্তীতি অধিপ্পাযো। যতোতি ভিক্খুনুপস্সযতো। যাচিত্ৰাতি ‘‘তুম্হেহি আনীতওৰাদেনেৰ মযম্পি ৰসিস্সামা’’তি যাচিত্ৰা। তত্থাতি তস্মিং ভিক্খুনুপস্সযে। আগতানং সন্তিকে ওৰাদেন ৰসিতব্বন্তি পচ্ছিমিকায ৰস্সং ৰসিতব্বং। অভিক্খুকাৰাসে ৰসন্তিযা আপত্তীতি চোদনামুখেন সামঞ্ঞতো আপত্তিপ্পসঙ্গং ৰদতি, ন পন তস্সা আপত্তি। ৰস্সচ্ছেদং কত্ৰা গচ্ছন্তিযাপি আপত্তীতি ৰস্সানুপগমমূলং আপত্তিং ৰদতি। ইতরায আপত্তিযা অনাপত্তিকারণসব্ভাৰতো ‘‘সা রক্খিতব্বা’’তি ৰুত্তং, সা ৰস্সানুপগমমূলা আপত্তি রক্খিতব্বাতি অত্থো, অভিক্খুকেপি আৰাসে ঈদিসাসু আপদাসু ৰস্সং উপগন্তব্বন্তি অধিপ্পাযো। তেনাহ ‘‘আপদাসু হি…পে॰… অনাপত্তি ৰুত্তা’’তি। ইতরায পন আপত্তিযা অনাপত্তি, কারণে অসতি পচ্ছিমিকাযপি ৰস্সং ন উপগন্তব্বং। সন্তেসু হি ভিক্খূসু ৰস্সং অনুপগচ্ছন্তিযা আপত্তি। তত্থ গন্ত্ৰা পৰারেতব্বন্তি এত্থ অপৰারেন্তীনং আপত্তিসম্ভৰতো। সচে দূরেপি ভিক্খূনং ৰসনট্ঠানং হোতি, সক্কা চ হোতি নৰমিযং গন্ত্ৰা পৰারেতুং, তত্থ গন্ত্ৰা পৰারেতব্বং। সচে পন নৰমিযং নিক্খমিত্ৰা সম্পাপুণিতুং ন সক্কা হোতি, অগচ্ছন্তীনং অনাপত্তি।
Vaṭṭatīti ‘‘vasatha ayye, mayaṃ bhikkhū ānessāmā’’ti vuttavacanaṃ saddahantīhi vasituṃ vaṭṭati. Na nimantitā hutvā gantukāmāti manussehi nimantitā hutvā gantukāmā na hontīti attho, tattheva vassaṃ upagantukāmā hontīti adhippāyo. Yatoti bhikkhunupassayato. Yācitvāti ‘‘tumhehi ānītaovādeneva mayampi vasissāmā’’ti yācitvā. Tatthāti tasmiṃ bhikkhunupassaye. Āgatānaṃ santike ovādena vasitabbanti pacchimikāya vassaṃ vasitabbaṃ. Abhikkhukāvāse vasantiyā āpattīti codanāmukhena sāmaññato āpattippasaṅgaṃ vadati, na pana tassā āpatti. Vassacchedaṃ katvā gacchantiyāpi āpattīti vassānupagamamūlaṃ āpattiṃ vadati. Itarāya āpattiyā anāpattikāraṇasabbhāvato ‘‘sā rakkhitabbā’’ti vuttaṃ, sā vassānupagamamūlā āpatti rakkhitabbāti attho, abhikkhukepi āvāse īdisāsu āpadāsu vassaṃ upagantabbanti adhippāyo. Tenāha ‘‘āpadāsu hi…pe… anāpatti vuttā’’ti. Itarāya pana āpattiyā anāpatti, kāraṇe asati pacchimikāyapi vassaṃ na upagantabbaṃ. Santesu hi bhikkhūsu vassaṃ anupagacchantiyā āpatti. Tattha gantvā pavāretabbanti ettha apavārentīnaṃ āpattisambhavato. Sace dūrepi bhikkhūnaṃ vasanaṭṭhānaṃ hoti, sakkā ca hoti navamiyaṃ gantvā pavāretuṃ, tattha gantvā pavāretabbaṃ. Sace pana navamiyaṃ nikkhamitvā sampāpuṇituṃ na sakkā hoti, agacchantīnaṃ anāpatti.
উপোসথস্স পুচ্ছনং উপোসথপুচ্ছা, সাযেৰ ক-প্পচ্চযং রস্সত্তঞ্চ কত্ৰা উপোসথপুচ্ছকন্তি ৰুত্তাতি আহ ‘‘উপোসথপুচ্ছন’’ন্তি। উপোসথো পুচ্ছিতব্বোতি ‘‘কদা, অয্য, উপোসথো’’তি পুচ্ছিতব্বো। ভিক্খুনাপি ‘‘স্ৰে, ভগিনি, উপোসথো’’তি ৰত্তব্বং। ভিক্খূ কদাচি কেনচি কারণেন পন্নরসিকং ৰা চাতুদ্দসীউপোসথং, চাতুদ্দসিকং ৰা পন্নরসীউপোসথং করোন্তি, যস্মিঞ্চ দিৰসে ভিক্খূহি উপোসথো কতো, তস্মিংযেৰ ভিক্খুনীহিপি উপোসথো কাতব্বোতি অধিপ্পাযেন ‘‘পক্খস্স তেরসিযংযেৰ গন্ত্ৰা’’তিআদি ৰুত্তং। এৰং পুচ্ছিতেন ভিক্খুনা সচে চাতুদ্দসিযং উপোসথং করোন্তি, ‘‘চাতুদ্দসিকো ভগিনী’’তি ৰত্তব্বং। সচে পন পন্নরসিযং করোন্তি, ‘‘পন্নরসিকো ভগিনী’’তি আচিক্খিতব্বং। ওৰাদত্থাযাতি ওৰাদযাচনত্থায। পাটিপদদিৰসতো পন পট্ঠায ধম্মসৰনত্থায গন্তব্বন্তি পাটিপদদিৰসে ওৰাদগ্গহণত্থায দুতিযদিৰসতো পট্ঠায অন্তরন্তরা ধম্মসৰনত্থায গন্তব্বং। ওৰাদগ্গহণম্পি হি ‘‘ধম্মসৰনমেৰা’’তি অভেদেন ৰুত্তং। নিরন্তরং ৰিহারং উপসঙ্কমিংসূতি যেভুয্যেন উপসঙ্কমনং সন্ধায ৰুত্তং। ৰুত্তঞ্হেতন্তিআদিনা যথানুসিট্ঠং পটিপজ্জিস্সামাতি সব্বাসংযেৰ ভিক্খুনীনং উপসঙ্কমনদীপনত্থং পাল়ি নিদস্সিতা। ওৰাদং গচ্ছতীতি ওৰাদং যাচিতুং গচ্ছতি। দ্ৰে তিস্সোতি দ্ৰীহি তীহি। করণত্থে চেতং পচ্চত্তৰচনং।
Uposathassa pucchanaṃ uposathapucchā, sāyeva ka-ppaccayaṃ rassattañca katvā uposathapucchakanti vuttāti āha ‘‘uposathapucchana’’nti. Uposatho pucchitabboti ‘‘kadā, ayya, uposatho’’ti pucchitabbo. Bhikkhunāpi ‘‘sve, bhagini, uposatho’’ti vattabbaṃ. Bhikkhū kadāci kenaci kāraṇena pannarasikaṃ vā cātuddasīuposathaṃ, cātuddasikaṃ vā pannarasīuposathaṃ karonti, yasmiñca divase bhikkhūhi uposatho kato, tasmiṃyeva bhikkhunīhipi uposatho kātabboti adhippāyena ‘‘pakkhassa terasiyaṃyeva gantvā’’tiādi vuttaṃ. Evaṃ pucchitena bhikkhunā sace cātuddasiyaṃ uposathaṃ karonti, ‘‘cātuddasiko bhaginī’’ti vattabbaṃ. Sace pana pannarasiyaṃ karonti, ‘‘pannarasiko bhaginī’’ti ācikkhitabbaṃ. Ovādatthāyāti ovādayācanatthāya. Pāṭipadadivasato pana paṭṭhāya dhammasavanatthāya gantabbanti pāṭipadadivase ovādaggahaṇatthāya dutiyadivasato paṭṭhāya antarantarā dhammasavanatthāya gantabbaṃ. Ovādaggahaṇampi hi ‘‘dhammasavanamevā’’ti abhedena vuttaṃ. Nirantaraṃ vihāraṃ upasaṅkamiṃsūti yebhuyyena upasaṅkamanaṃ sandhāya vuttaṃ. Vuttañhetantiādinā yathānusiṭṭhaṃ paṭipajjissāmāti sabbāsaṃyeva bhikkhunīnaṃ upasaṅkamanadīpanatthaṃ pāḷi nidassitā. Ovādaṃ gacchatīti ovādaṃ yācituṃ gacchati. Dve tissoti dvīhi tīhi. Karaṇatthe cetaṃ paccattavacanaṃ.
পাসাদিকেনাতি পসাদজনকেন নিদ্দোসেন কাযকম্মাদিনা। সম্পাদেতূতি তিৰিধং সিক্খং সম্পাদেতু। সচে পাতিমোক্খুদ্দেসকংযেৰ দিস্ৰা তাহি ভিক্খুনীহি ওৰাদো যাচিতো ভৰেয্য, তেন কিং কাতব্বন্তি? উপোসথগ্গে সন্নিপতিতে ভিক্খুসঙ্ঘে পুব্বকিচ্চৰসেন ‘‘অত্থি কাচি ভিক্খুনিযো ওৰাদং যাচমানা’’তি পুচ্ছিযমানে ‘‘এৰং ৰদেহী’’তি ওৰাদপটিগ্গাহকেন ৰত্তব্বৰচনং অঞ্ঞেন ভিক্খুনা কথাপেত্ৰা পাতিমোক্খুদ্দেসকেন ৰত্তব্বৰচনং অত্তনা ৰত্ৰা পুন সযমেৰ গন্ত্ৰা ভিক্খুনীনং আরোচেতব্বং, অঞ্ঞেন ৰা ভিক্খুনা তস্মিং দিৰসে পাতিমোক্খং উদ্দিসাপেতব্বং। এতং ৰুত্তন্তি ‘‘তাহী’’তি এতং বহুৰচনং ৰুত্তং।
Pāsādikenāti pasādajanakena niddosena kāyakammādinā. Sampādetūti tividhaṃ sikkhaṃ sampādetu. Sace pātimokkhuddesakaṃyeva disvā tāhi bhikkhunīhi ovādo yācito bhaveyya, tena kiṃ kātabbanti? Uposathagge sannipatite bhikkhusaṅghe pubbakiccavasena ‘‘atthi kāci bhikkhuniyo ovādaṃ yācamānā’’ti pucchiyamāne ‘‘evaṃ vadehī’’ti ovādapaṭiggāhakena vattabbavacanaṃ aññena bhikkhunā kathāpetvā pātimokkhuddesakena vattabbavacanaṃ attanā vatvā puna sayameva gantvā bhikkhunīnaṃ ārocetabbaṃ, aññena vā bhikkhunā tasmiṃ divase pātimokkhaṃ uddisāpetabbaṃ. Etaṃ vuttanti ‘‘tāhī’’ti etaṃ bahuvacanaṃ vuttaṃ.
একা ভিক্খুনী ৰাতি ইদং বহূহি ভিক্খুনুপস্সযেহি একায এৰ ভিক্খুনিযা সাসনপটিগ্গহণং সন্ধায ৰুত্তং, ন পন দুতিযিকায অভাৰং সন্ধায। বহূহি ভিক্খুনুপস্সযেহীতি অন্তরামগ্গে ৰা তস্মিংযেৰ ৰা গামে বহূহি ভিক্খুনুপস্সযেহি। ‘‘ভিক্খুনিসঙ্ঘো চ অয্য ভিক্খুনিযো চ ভিক্খুনী চা’’তি ইমিনা নানাউপস্সযেহি সাসনং গহেত্ৰা আগতভিক্খুনিযা ৰত্তব্বৰচনং দস্সেতি। ইদঞ্চ একেন পকারেন মুখমত্তনিদস্সনত্থং ৰুত্তং, তস্মিং তস্মিং পন ভিক্খুনুপস্সযে ভিক্খুনীনং পমাণং সল্লক্খেত্ৰা তদনুরূপেন নযেন ৰত্তব্বং। ভিক্খুসঙ্ঘস্স অয্যানং অয্যস্সাতি ইদং সঙ্খিপিত্ৰা ৰুত্তং।
Ekā bhikkhunī vāti idaṃ bahūhi bhikkhunupassayehi ekāya eva bhikkhuniyā sāsanapaṭiggahaṇaṃ sandhāya vuttaṃ, na pana dutiyikāya abhāvaṃ sandhāya. Bahūhi bhikkhunupassayehīti antarāmagge vā tasmiṃyeva vā gāme bahūhi bhikkhunupassayehi. ‘‘Bhikkhunisaṅgho ca ayya bhikkhuniyo ca bhikkhunī cā’’ti iminā nānāupassayehi sāsanaṃ gahetvā āgatabhikkhuniyā vattabbavacanaṃ dasseti. Idañca ekena pakārena mukhamattanidassanatthaṃ vuttaṃ, tasmiṃ tasmiṃ pana bhikkhunupassaye bhikkhunīnaṃ pamāṇaṃ sallakkhetvā tadanurūpena nayena vattabbaṃ. Bhikkhusaṅghassa ayyānaṃ ayyassāti idaṃ saṅkhipitvā vuttaṃ.
পাতিমোক্খুদ্দেসকেনপীতি ইদং সঙ্ঘুপোসথৰসেনেৰ দস্সিতং। যত্থ পন তিণ্ণং দ্ৰিন্নং ৰা ৰসনট্ঠানে পাতিমোক্খুদ্দেসো নত্থি, তত্থাপি ঞত্তিঠপনকেন ইতরেন ৰা ভিক্খুনা ইমিনাৰ নযেন ৰত্তব্বং। একপুগ্গলেনপি উপোসথদিৰসে ওৰাদযাচনং সম্পটিচ্ছিত্ৰা পাটিপদে আগতানং ভিক্খুনীনং ‘‘নত্থি কোচী’’তিআদি ৰত্তব্বমেৰ। সচে সযমেৰ, ‘‘সম্মতো অহ’’ন্তি ৰত্তব্বং। ইমং ৰিধিং অজানন্তো ইধ বালোতি অধিপ্পেতো।
Pātimokkhuddesakenapīti idaṃ saṅghuposathavaseneva dassitaṃ. Yattha pana tiṇṇaṃ dvinnaṃ vā vasanaṭṭhāne pātimokkhuddeso natthi, tatthāpi ñattiṭhapanakena itarena vā bhikkhunā imināva nayena vattabbaṃ. Ekapuggalenapi uposathadivase ovādayācanaṃ sampaṭicchitvā pāṭipade āgatānaṃ bhikkhunīnaṃ ‘‘natthi kocī’’tiādi vattabbameva. Sace sayameva, ‘‘sammato aha’’nti vattabbaṃ. Imaṃ vidhiṃ ajānanto idha bāloti adhippeto.
১৫০. অধম্মকম্মে অধম্মকম্মসঞ্ঞী ৰগ্গং ভিক্খুনিসঙ্ঘং ৰগ্গসঞ্ঞী ওৰদতি, আপত্তি পাচিত্তিযস্সাতিআদীসু ৰিজ্জমানেসুপি ৰগ্গাদিভাৰনিমিত্তেসু দুক্কটেসু অধম্মকম্মমূলকং পাচিত্তিযমেৰ পাল়িযং সব্বত্থ ৰুত্তন্তি আহ ‘‘অধম্মকম্মে দ্ৰিন্নং নৰকানং ৰসেন অট্ঠারস পাচিত্তিযানী’’তি। সেসমেত্থ উত্তানমেৰ। অসম্মততা, ভিক্খুনিযা পরিপুণ্ণূপসম্পন্নতা, ওৰাদৰসেন অট্ঠগরুধম্মভণনন্তি ইমানি পনেত্থ তীণি অঙ্গানি।
150.Adhammakamme adhammakammasaññī vaggaṃ bhikkhunisaṅghaṃ vaggasaññī ovadati, āpatti pācittiyassātiādīsu vijjamānesupi vaggādibhāvanimittesu dukkaṭesu adhammakammamūlakaṃ pācittiyameva pāḷiyaṃ sabbattha vuttanti āha ‘‘adhammakamme dvinnaṃ navakānaṃ vasena aṭṭhārasa pācittiyānī’’ti. Sesamettha uttānameva. Asammatatā, bhikkhuniyā paripuṇṇūpasampannatā, ovādavasena aṭṭhagarudhammabhaṇananti imāni panettha tīṇi aṅgāni.
ওৰাদসিক্খাপদৰণ্ণনা নিট্ঠিতা।
Ovādasikkhāpadavaṇṇanā niṭṭhitā.
Related texts:
তিপিটক (মূল) • Tipiṭaka (Mūla) / ৰিনযপিটক • Vinayapiṭaka / মহাৰিভঙ্গ • Mahāvibhaṅga / ৩. ওৰাদৰগ্গো • 3. Ovādavaggo
অট্ঠকথা • Aṭṭhakathā / ৰিনযপিটক (অট্ঠকথা) • Vinayapiṭaka (aṭṭhakathā) / মহাৰিভঙ্গ-অট্ঠকথা • Mahāvibhaṅga-aṭṭhakathā / ১. ওৰাদসিক্খাপদৰণ্ণনা • 1. Ovādasikkhāpadavaṇṇanā
টীকা • Tīkā / ৰিনযপিটক (টীকা) • Vinayapiṭaka (ṭīkā) / ৰজিরবুদ্ধি-টীকা • Vajirabuddhi-ṭīkā / ১. ওৰাদসিক্খাপদৰণ্ণনা • 1. Ovādasikkhāpadavaṇṇanā
টীকা • Tīkā / ৰিনযপিটক (টীকা) • Vinayapiṭaka (ṭīkā) / ৰিমতিৰিনোদনী-টীকা • Vimativinodanī-ṭīkā / ১. ওৰাদসিক্খাপদৰণ্ণনা • 1. Ovādasikkhāpadavaṇṇanā
টীকা • Tīkā / ৰিনযপিটক (টীকা) • Vinayapiṭaka (ṭīkā) / পাচিত্যাদিযোজনাপাল়ি • Pācityādiyojanāpāḷi / ১. ওৰাদসিক্খাপদ-অত্থযোজনা • 1. Ovādasikkhāpada-atthayojanā
