| Library / Tipiṭaka / д̇ибидага • Tipiṭaka / саарад̇т̇ад̣̇ийбаний-дийгаа • Sāratthadīpanī-ṭīkā |
3. оваад̣̇аваг̇г̇о
3. Ovādavaggo
1. оваад̣̇асигкаабад̣̇аван̣н̣анаа
1. Ovādasikkhāpadavaṇṇanā
144. бхигкуниваг̇г̇асса батамасигкаабад̣̇з гат̇аанусаарзнаад̇и ‘‘со т̇зро гим̣сийло гим̣самаажааро гад̇арагулаа баб̣б̣аж̇ид̇о’’д̇иаад̣̇инаа бужчанд̇аанам̣ бужчаагат̇аанусаарзна. гат̇зд̇ум̣ вадданд̇ийд̇и нираамисзнзва жид̇д̇зна гат̇зд̇ум̣ вадданд̇и. анияяаанигад̇д̇аа саг̇г̇амогкамаг̇г̇аанам̣ д̇иражчаанабхууд̇аа гат̇аа д̇иражчаанагат̇аад̇и ааха ‘‘саг̇г̇амаг̇г̇аг̇аманзбий’’д̇иаад̣̇и. аби-сад̣̇д̣̇зна баг̇зва могкамаг̇г̇аг̇аманзд̇и д̣̇ийбзд̇и. д̇иражчаанабхууд̇анд̇и д̇ирогаран̣абхууд̇ам̣, б̣аад̇хиганд̇и вуд̇д̇ам̣ ход̇и. лад̣̇д̇хаасзванаа хи д̇иражчаанагат̇аа саг̇г̇амогкаанам̣ б̣аад̇хигаава ход̇и. самид̣̇д̇ход̇и барибун̣н̣о. сахид̇ад̇т̇од̇и яуд̇д̇ад̇т̇о. ад̇т̇аг̇амбхийрад̇аад̣̇ияог̇ад̇о г̇амбхийро. б̣ахурасод̇и ад̇т̇арасаад̣̇иб̣ахурасо. лагкан̣абадивзд̇хасам̣яуд̇д̇од̇и анижжаад̣̇илагкан̣абадивзд̇харасаааваханад̇о лагкан̣абадивзд̇хасам̣яуд̇д̇о.
144. Bhikkhunivaggassa paṭhamasikkhāpade kathānusārenāti ‘‘so thero kiṃsīlo kiṃsamācāro katarakulā pabbajito’’tiādinā pucchantānaṃ pucchākathānusārena. Kathetuṃ vaṭṭantīti nirāmiseneva cittena kathetuṃ vaṭṭanti. Aniyyānikattā saggamokkhamaggānaṃ tiracchānabhūtā kathā tiracchānakathāti āha ‘‘saggamaggagamanepī’’tiādi. Api-saddena pageva mokkhamaggagamaneti dīpeti. Tiracchānabhūtanti tirokaraṇabhūtaṃ, bādhikanti vuttaṃ hoti. Laddhāsevanā hi tiracchānakathā saggamokkhānaṃ bādhikāva hoti. Samiddhoti paripuṇṇo. Sahitatthoti yuttattho. Atthagambhīratādiyogato gambhīro. Bahurasoti attharasādibahuraso. Lakkhaṇapaṭivedhasaṃyuttoti aniccādilakkhaṇapaṭivedharasaāvahanato lakkhaṇapaṭivedhasaṃyutto.
145-147. барад̇од̇и барад̇т̇а, уд̇д̇аринд̇и ад̇т̇о. гаронд̇оваад̇и бариб̣аахирз гаронд̇оязва. баад̇имогкод̇и жаарид̇д̇аваарид̇д̇аббабхзд̣̇ам̣ сигкаабад̣̇асийлам̣ . д̇ан̃хи яо нам̣ баад̇и рагкад̇и, д̇ам̣ могкзд̇и можзд̇и аабааяигаад̣̇ийхи д̣̇угкзхи, д̇асмаа ‘‘баад̇имогка’’нд̇и вужжад̇и. сам̣варан̣ам̣ сам̣варо, гааяаважийд̣̇ваараанам̣ бид̣̇аханам̣. язна хи д̇з сам̣вуд̇аа бихид̇аа хонд̇и, со сам̣варо, гааяигаваажасигасса авийд̇иггамассзд̇ам̣ наамам̣. баад̇имогкасам̣варзна сам̣вуд̇од̇и баад̇имогкасам̣варзна бихид̇агааяаважийд̣̇вааро. д̇ат̇аабхууд̇о жа яасмаа д̇зна саман̇г̇ий наама ход̇и, д̇асмаа вуд̇д̇ам̣ ‘‘саманнааг̇ад̇о’’д̇и . вад̇д̇ад̇ийд̇и ад̇д̇абхаавам̣ бавад̇д̇зд̇и. вихарад̇ийд̇и иминаа баад̇имогкасам̣варасийлз тид̇асса бхигкуно ирияаабат̇авихааро д̣̇ассид̇о.
145-147.Paratoti parattha, uttarinti attho. Karontovāti paribāhire karontoyeva. Pātimokkhoti cārittavārittappabhedaṃ sikkhāpadasīlaṃ . Tañhi yo naṃ pāti rakkhati, taṃ mokkheti moceti āpāyikādīhi dukkhehi, tasmā ‘‘pātimokkha’’nti vuccati. Saṃvaraṇaṃ saṃvaro, kāyavacīdvārānaṃ pidahanaṃ. Yena hi te saṃvutā pihitā honti, so saṃvaro, kāyikavācasikassa avītikkamassetaṃ nāmaṃ. Pātimokkhasaṃvarena saṃvutoti pātimokkhasaṃvarena pihitakāyavacīdvāro. Tathābhūto ca yasmā tena samaṅgī nāma hoti, tasmā vuttaṃ ‘‘samannāgato’’ti . Vattatīti attabhāvaṃ pavatteti. Viharatīti iminā pātimokkhasaṃvarasīle ṭhitassa bhikkhuno iriyāpathavihāro dassito.
сан̇кзбад̇о вуд̇д̇амад̇т̇ам̣ вид̇т̇аарад̇о баал̣ияаа вибхаавзд̇ум̣ ‘‘вуд̇д̇ан̃хзд̇а’’нд̇иаад̣̇и аарад̣̇д̇хам̣. д̇ад̇т̇а вибхан̇г̇зд̇и жхаанавибхан̇г̇з. сийлам̣ бад̇идтаад̇иаад̣̇ийни баад̇имогкассзва взважанаани. д̇ад̇т̇а (вибха. адта. 511) сийланд̇и гааман̃жзд̇ам̣ саха гаммаваажаабарияосаанзна иж̇жханагасса баад̇имогкассзва взважанам̣, звам̣ санд̇зби д̇хаммад̇о зд̇ам̣ сийлам̣ наама баан̣аад̇ибаад̇аад̣̇ийхи ваа вираманд̇асса вад̇д̇абадибад̇д̇им̣ ваа буурзнд̇асса жзд̇анаад̣̇аяо д̇хаммаа взд̣̇ид̇аб̣б̣аа. яасмаа бана баад̇имогкасийлзна бхигку саасанз бад̇идтаад̇и наама, д̇асмаа д̇ам̣ ‘‘бад̇идтаа’’д̇и вуд̇д̇ам̣. бад̇идтахад̇и ваа зд̇т̇а бхигку, гусалад̇хаммаа зва ваа зд̇т̇а бад̇идтаханд̇ийд̇и бад̇идтаа. аяамад̇т̇о ‘‘сийлз бад̇идтааяа наро сабан̃н̃о’’д̇и (сам̣. ни. 1.23, 192) жа ‘‘бад̇идтаа, махаарааж̇а, сийлам̣ саб̣б̣зсам̣ гусалаанам̣ д̇хаммаана’’нд̇и (ми. ба. 2.1.9) жа ‘‘сийлз бад̇идтид̇асса ко, махаарааж̇а, саб̣б̣з гусалаа д̇хаммаа на барихааяанд̇ий’’д̇и жа аад̣̇исуд̇д̇авасзна взд̣̇ид̇аб̣б̣о.
Saṅkhepato vuttamatthaṃ vitthārato pāḷiyā vibhāvetuṃ ‘‘vuttañheta’’ntiādi āraddhaṃ. Tattha vibhaṅgeti jhānavibhaṅge. Sīlaṃ patiṭṭhātiādīni pātimokkhasseva vevacanāni. Tattha (vibha. aṭṭha. 511) sīlanti kāmañcetaṃ saha kammavācāpariyosānena ijjhanakassa pātimokkhasseva vevacanaṃ, evaṃ santepi dhammato etaṃ sīlaṃ nāma pāṇātipātādīhi vā viramantassa vattapaṭipattiṃ vā pūrentassa cetanādayo dhammā veditabbā. Yasmā pana pātimokkhasīlena bhikkhu sāsane patiṭṭhāti nāma, tasmā taṃ ‘‘patiṭṭhā’’ti vuttaṃ. Patiṭṭhahati vā ettha bhikkhu, kusaladhammā eva vā ettha patiṭṭhahantīti patiṭṭhā. Ayamattho ‘‘sīle patiṭṭhāya naro sapañño’’ti (saṃ. ni. 1.23, 192) ca ‘‘patiṭṭhā, mahārāja, sīlaṃ sabbesaṃ kusalānaṃ dhammāna’’nti (mi. pa. 2.1.9) ca ‘‘sīle patiṭṭhitassa kho, mahārāja, sabbe kusalā dhammā na parihāyantī’’ti ca ādisuttavasena veditabbo.
д̇ад̣̇зд̇ам̣ буб̣б̣уббад̇д̇иад̇т̇зна аад̣̇и. вуд̇д̇амби жзд̇ам̣ –
Tadetaṃ pubbuppattiatthena ādi. Vuttampi cetaṃ –
‘‘д̇асмаад̇иха д̇вам̣, уд̇д̇ияа, аад̣̇имзва висод̇хзхи гусалзсу д̇хаммзсу. го жаад̣̇и гусалаанам̣ д̇хаммаанам̣? сийлан̃жа сувисуд̣̇д̇хам̣ д̣̇идти жа уж̇угаа’’д̇и (сам̣. ни. 5.382).
‘‘Tasmātiha tvaṃ, uttiya, ādimeva visodhehi kusalesu dhammesu. Ko cādi kusalānaṃ dhammānaṃ? Sīlañca suvisuddhaṃ diṭṭhi ca ujukā’’ti (saṃ. ni. 5.382).
яат̇аа хи наг̇аравад̣дхагий наг̇арам̣ маабзд̇угаамо батамам̣ наг̇арадтаанам̣ сод̇хзд̇и, д̇ад̇о абарабхааг̇з вийт̇ижад̇уггасин̇гхаадагаад̣̇ибарижчзд̣̇зна вибхаж̇ид̇ваа наг̇арам̣ маабзд̇и, звамзва яог̇ааважаро аад̣̇имхи сийлам̣ сод̇хзд̇и, д̇ад̇о абарабхааг̇з самаад̇хивибассанаамаг̇г̇апаланиб̣б̣аанаани сажчигарод̇и. яат̇аа ваа бана раж̇аго батамам̣ д̇ийхи каарзхи вад̇т̇ам̣ д̇ховид̇ваа барисуд̣̇д̇хз вад̇т̇з яад̣̇ижчагам̣ ран̇г̇аж̇аад̇ам̣ убанзд̇и, яат̇аа ваа бана чзго жид̇д̇агааро руубам̣ ликид̇угаамо аад̣̇ид̇о бхид̇д̇ибаригаммам̣ гарод̇и, д̇ад̇о абарабхааг̇з руубам̣ самудтаабзд̇и, звамзва яог̇ааважаро аад̣̇ид̇ова сийлам̣ висод̇хзд̇ваа абарабхааг̇з самат̇авибассанаад̣̇аяо д̇хаммз сажчигарод̇и. д̇асмаа сийлам̣ ‘‘аад̣̇ий’’д̇и вуд̇д̇ам̣.
Yathā hi nagaravaḍḍhakī nagaraṃ māpetukāmo paṭhamaṃ nagaraṭṭhānaṃ sodheti, tato aparabhāge vīthicatukkasiṅghāṭakādiparicchedena vibhajitvā nagaraṃ māpeti, evameva yogāvacaro ādimhi sīlaṃ sodheti, tato aparabhāge samādhivipassanāmaggaphalanibbānāni sacchikaroti. Yathā vā pana rajako paṭhamaṃ tīhi khārehi vatthaṃ dhovitvā parisuddhe vatthe yadicchakaṃ raṅgajātaṃ upaneti, yathā vā pana cheko cittakāro rūpaṃ likhitukāmo ādito bhittiparikammaṃ karoti, tato aparabhāge rūpaṃ samuṭṭhāpeti, evameva yogāvacaro āditova sīlaṃ visodhetvā aparabhāge samathavipassanādayo dhamme sacchikaroti. Tasmā sīlaṃ ‘‘ādī’’ti vuttaṃ.
д̇ад̣̇зд̇ам̣ жаран̣асаригкад̇ааяа жаран̣ам̣. ‘‘жаран̣аа’’д̇и баад̣̇аа вужжанд̇и. яат̇аа хи чиннажаран̣асса бурисасса д̣̇исам̣г̇аманаабхисан̇кааро на ж̇ааяад̇и, барибун̣н̣абаад̣̇ассзва ж̇ааяад̇и, звамзва яасса сийлам̣ бхиннам̣ ход̇и кан̣д̣ам̣ абарибун̣н̣ам̣, д̇асса ниб̣б̣аанаг̇аманааяа н̃аан̣аг̇аманам̣ на самбаж̇ж̇ад̇и. яасса бана д̇ам̣ абхиннам̣ ход̇и акан̣д̣ам̣ барибун̣н̣ам̣, д̇асса ниб̣б̣аанаг̇аманааяа н̃аан̣аг̇аманам̣ самбаж̇ж̇ад̇и. д̇асмаа сийлам̣ ‘‘жаран̣а’’нд̇и вуд̇д̇ам̣.
Tadetaṃ caraṇasarikkhatāya caraṇaṃ. ‘‘Caraṇā’’ti pādā vuccanti. Yathā hi chinnacaraṇassa purisassa disaṃgamanābhisaṅkhāro na jāyati, paripuṇṇapādasseva jāyati, evameva yassa sīlaṃ bhinnaṃ hoti khaṇḍaṃ aparipuṇṇaṃ, tassa nibbānagamanāya ñāṇagamanaṃ na sampajjati. Yassa pana taṃ abhinnaṃ hoti akhaṇḍaṃ paripuṇṇaṃ, tassa nibbānagamanāya ñāṇagamanaṃ sampajjati. Tasmā sīlaṃ ‘‘caraṇa’’nti vuttaṃ.
д̇ад̣̇зд̇ам̣ сам̣яаманавасзна сам̣яамо, сам̣варан̣авасзна сам̣варод̇и убхаязнаби сийласам̣яамо жзва сийласам̣варо жа гат̇ид̇о. важанад̇т̇о банзд̇т̇а сам̣яамзд̇и вийд̇иггамавибпанд̣̇анам̣, буг̇г̇алам̣ ваа сам̣яамзд̇и вийд̇иггамавасзна д̇асса вибпанд̣̇ид̇ум̣ на д̣̇зд̇ийд̇и сам̣яамо, вийд̇иггамасса бавзсанад̣̇ваарам̣ сам̣варад̇и бид̣̇ахад̇ийд̇и сам̣варо. могканд̇и уд̇д̇амам̣ мукабхууд̇ам̣ ваа. яат̇аа хи сад̇д̇аанам̣ жад̇уб̣б̣ид̇хо аахааро мукзна бависид̇ваа ан̇г̇аман̇г̇аани парад̇и, звам̣ яог̇иноби жад̇убхуумагагусалам̣ сийламукзна бависид̇ваа ад̇т̇асид̣̇д̇хим̣ самбаад̣̇зд̇и. д̇зна вуд̇д̇ам̣ ‘‘могка’’нд̇и. бамукз саад̇хууд̇и бамогкам̣, буб̣б̣ан̇г̇амам̣ сздтам̣ бад̇хаананд̇и ад̇т̇о. гусалаанам̣ д̇хаммаанам̣ самаабад̇д̇ияаад̇и жад̇убхуумагагусалаанам̣ бадилаабхад̇т̇ааяа бамогкам̣ буб̣б̣ан̇г̇амам̣ сздтам̣ бад̇хаананд̇и взд̣̇ид̇аб̣б̣ам̣.
Tadetaṃ saṃyamanavasena saṃyamo, saṃvaraṇavasena saṃvaroti ubhayenapi sīlasaṃyamo ceva sīlasaṃvaro ca kathito. Vacanattho panettha saṃyameti vītikkamavipphandanaṃ, puggalaṃ vā saṃyameti vītikkamavasena tassa vipphandituṃ na detīti saṃyamo, vītikkamassa pavesanadvāraṃ saṃvarati pidahatīti saṃvaro. Mokkhanti uttamaṃ mukhabhūtaṃ vā. Yathā hi sattānaṃ catubbidho āhāro mukhena pavisitvā aṅgamaṅgāni pharati, evaṃ yoginopi catubhūmakakusalaṃ sīlamukhena pavisitvā atthasiddhiṃ sampādeti. Tena vuttaṃ ‘‘mokkha’’nti. Pamukhe sādhūti pamokkhaṃ, pubbaṅgamaṃ seṭṭhaṃ padhānanti attho. Kusalānaṃ dhammānaṃ samāpattiyāti catubhūmakakusalānaṃ paṭilābhatthāya pamokkhaṃ pubbaṅgamaṃ seṭṭhaṃ padhānanti veditabbaṃ.
гааяиго авийд̇иггамод̇и д̇ивид̇хам̣ гааяасужарид̇ам̣. ваажасигод̇и жад̇уб̣б̣ид̇хам̣ важийсужарид̇ам̣. гааяигаваажасигод̇и д̇ад̣̇убхаяам̣. иминаа ааж̇ийвадтамагасийлам̣ барияаад̣̇ааяа д̣̇ассзд̇и. сам̣вуд̇од̇и бихид̇о, сам̣вуд̇инд̣̇рияо бихид̇инд̣̇рияод̇и ад̇т̇о. яат̇аа хи сам̣вуд̇ад̣̇ваарам̣ г̇зхам̣ ‘‘сам̣вуд̇аг̇зхам̣ бихид̇аг̇зха’’нд̇и вужжад̇и, звамид̇ха сам̣вуд̇инд̣̇рияо ‘‘сам̣вуд̇о’’д̇и вуд̇д̇о. баад̇имогкасам̣варзнаад̇и баад̇имогкасан̇каад̇зна сам̣варзна. убзд̇од̇иаад̣̇ийни саб̣б̣аани ан̃н̃аман̃н̃авзважанаани.
Kāyiko avītikkamoti tividhaṃ kāyasucaritaṃ. Vācasikoti catubbidhaṃ vacīsucaritaṃ. Kāyikavācasikoti tadubhayaṃ. Iminā ājīvaṭṭhamakasīlaṃ pariyādāya dasseti. Saṃvutoti pihito, saṃvutindriyo pihitindriyoti attho. Yathā hi saṃvutadvāraṃ gehaṃ ‘‘saṃvutagehaṃ pihitageha’’nti vuccati, evamidha saṃvutindriyo ‘‘saṃvuto’’ti vutto. Pātimokkhasaṃvarenāti pātimokkhasaṅkhātena saṃvarena. Upetotiādīni sabbāni aññamaññavevacanāni.
ирияад̇ийд̇иаад̣̇ийхи сад̇д̇ахиби бад̣̇зхи баад̇имогкасам̣варасийлз тид̇асса бхигкуно ирияаабат̇авихааро гат̇ид̇о. д̇ад̇т̇а ирияад̇ийд̇и жад̇уннам̣ ирияаабат̇аанам̣ ан̃н̃ад̇арасаман̇г̇ибхаавад̇о ирияад̇и. д̇зхи ирияаабат̇ажад̇уггзхи гааяасагадавад̇д̇анзна вад̇д̇ад̇и. згам̣ ирияаабат̇ад̣̇угкам̣ абарзна ирияаабат̇зна вижчинд̣̇ид̇ваа жирадтид̇ибхаавзна сарийрарагкан̣ад̇о баалзд̇и. згасмим̣ ирияаабат̇з асан̣тахид̇ваа саб̣б̣аирияаабат̇з вад̇д̇анад̇о яабзд̇и. д̇зна д̇зна ирияаабат̇зна д̇ат̇аа д̇ат̇аа гааяасса яаабанад̇о яаабзд̇и. жирагаалавад̇д̇аабанад̇о жарад̇и. ирияаабат̇зна ирияаабат̇ам̣ вижчинд̣̇ид̇ваа ж̇ийвид̇ахаран̣ад̇о вихарад̇и.
Iriyatītiādīhi sattahipi padehi pātimokkhasaṃvarasīle ṭhitassa bhikkhuno iriyāpathavihāro kathito. Tattha iriyatīti catunnaṃ iriyāpathānaṃ aññatarasamaṅgibhāvato iriyati. Tehi iriyāpathacatukkehi kāyasakaṭavattanena vattati. Ekaṃ iriyāpathadukkhaṃ aparena iriyāpathena vicchinditvā ciraṭṭhitibhāvena sarīrarakkhaṇato pāleti. Ekasmiṃ iriyāpathe asaṇṭhahitvā sabbairiyāpathe vattanato yapeti. Tena tena iriyāpathena tathā tathā kāyassa yāpanato yāpeti. Cirakālavattāpanato carati. Iriyāpathena iriyāpathaṃ vicchinditvā jīvitaharaṇato viharati.
мижчааж̇ийвабадисзд̇хагзнаад̇и –
Micchājīvapaṭisedhakenāti –
‘‘ид̇хзгажжо взл̣уд̣̇аанзна ваа бад̇д̇ад̣̇аанзна ваа бубпа пала синаанад̣̇анд̇агадтад̣̇аанзна ваа жаадугамяад̇ааяа ваа муг̇г̇асуубяад̇ааяа ваа баарибхадаяад̇ааяа ваа ж̇ан̇гхабзсанигзна ваа ан̃н̃ад̇аран̃н̃ад̇арзна ваа б̣уд̣̇д̇хабадигудтзна мижчааааж̇ийвзна ж̇ийвигам̣ габбзд̇и, аяам̣ вужжад̇и анаажааро’’д̇и (вибха. 513) –
‘‘Idhekacco veḷudānena vā pattadānena vā puppha phala sinānadantakaṭṭhadānena vā cāṭukamyatāya vā muggasūpyatāya vā pāribhaṭayatāya vā jaṅghapesanikena vā aññataraññatarena vā buddhapaṭikuṭṭhena micchāājīvena jīvikaṃ kappeti, ayaṃ vuccati anācāro’’ti (vibha. 513) –
звам̣ вуд̇д̇аанаажаарасан̇каад̇амижчааж̇ийвабадибагкзна.
Evaṃ vuttaanācārasaṅkhātamicchājīvapaṭipakkhena.
на взл̣уд̣̇аанаад̣̇инаа аажаарзнаад̇и –
Na veḷudānādinā ācārenāti –
‘‘ид̇хзгажжо на взл̣уд̣̇аанзна на бад̇д̇а на бубпа на пала на синаана на д̣̇анд̇агадта на жаадугамяад̇ааяа на муг̇г̇асуубяад̇ааяа на баарибхадаяад̇ааяа на ж̇ан̇гхабзсанигзна на ан̃н̃ад̇аран̃н̃ад̇арзна б̣уд̣̇д̇хабадигудтзна мижчааааж̇ийвзна ж̇ийвигам̣ габбзд̇и, аяам̣ вужжад̇и аажааро’’д̇и (вибха. 513) –
‘‘Idhekacco na veḷudānena na patta na puppha na phala na sināna na dantakaṭṭha na cāṭukamyatāya na muggasūpyatāya na pāribhaṭayatāya na jaṅghapesanikena na aññataraññatarena buddhapaṭikuṭṭhena micchāājīvena jīvikaṃ kappeti, ayaṃ vuccati ācāro’’ti (vibha. 513) –
звам̣ вуд̇д̇зна на взл̣уд̣̇аанаад̣̇инаа аажаарзна.
Evaṃ vuttena na veḷudānādinā ācārena.
взсияаад̣̇иаг̇ожарам̣ бахааяаад̇и –
Vesiyādiagocaraṃ pahāyāti –
‘‘ид̇хзгажжо взсияаг̇ожаро ваа ход̇и вид̇хава т̇уллагумаари бан̣д̣ага бхигкуни баанааг̇аараг̇ожаро ваа, сам̣садто вихарад̇и рааж̇уухи рааж̇амахаамад̇д̇зхи д̇ид̇т̇иязхи д̇ид̇т̇ияасаавагзхи анануломигзна сам̣саг̇г̇зна, яаани бана д̇аани гулаани ассад̣̇д̇хаани аббасаннаани анобаанабхууд̇аани аггосагабарибхаасагаани анад̇т̇агаамаани ахид̇агаамаани апаасугагаамаани аяог̇агкзмагаамаани бхигкуунам̣ бхигкунийнам̣ убаасагаанам̣ убаасигаанам̣, д̇ат̇ааруубаани гулаани сзвад̇и бхаж̇ад̇и баяирубаасад̇и, аяам̣ вужжад̇и аг̇ожаро’’д̇и (вибха. 514) –
‘‘Idhekacco vesiyagocaro vā hoti vidhava thullakumāri paṇḍaka bhikkhuni pānāgāragocaro vā, saṃsaṭṭho viharati rājūhi rājamahāmattehi titthiyehi titthiyasāvakehi ananulomikena saṃsaggena, yāni pana tāni kulāni assaddhāni appasannāni anopānabhūtāni akkosakaparibhāsakāni anatthakāmāni ahitakāmāni aphāsukakāmāni ayogakkhemakāmāni bhikkhūnaṃ bhikkhunīnaṃ upāsakānaṃ upāsikānaṃ, tathārūpāni kulāni sevati bhajati payirupāsati, ayaṃ vuccati agocaro’’ti (vibha. 514) –
звамааг̇ад̇ам̣ взсияаад̣̇иаг̇ожарам̣ бахааяа.
Evamāgataṃ vesiyādiagocaraṃ pahāya.
сад̣̇д̇хаасамбаннагулаад̣̇инаад̇и зд̇т̇а аад̣̇и-сад̣̇д̣̇зна убаниссаяаг̇ожараад̣̇им̣ сан̇г̇ан̣хаад̇и. д̇ивид̇хо хи г̇ожаро убаниссаяаг̇ожаро аарагкаг̇ожаро убаниб̣анд̇хаг̇ожарод̇и. гад̇амо убаниссаяаг̇ожаро? д̣̇асагат̇аавад̇т̇уг̇ун̣асаманнааг̇ад̇о галяаан̣амид̇д̇о, яам̣ ниссааяа асуд̇ам̣ сун̣аад̇и, суд̇ам̣ барияод̣̇абзд̇и, ган̇кам̣ вид̇арад̇и, д̣̇идтим̣ уж̇ум̣ гарод̇и, жид̇д̇ам̣ басаад̣̇зд̇и. яасса ваа бана анусигкамаано сад̣̇д̇хааяа вад̣дхад̇и, сийлзна суд̇зна жааг̇зна бан̃н̃ааяа вад̣дхад̇и, аяам̣ убаниссаяаг̇ожаро. гад̇амо аарагкаг̇ожаро? ид̇ха бхигку анд̇арагхарам̣ бавидто вийт̇им̣ бадибанно огкид̇д̇ажагку яуг̇амад̇д̇ад̣̇ассаавий сам̣вуд̇о г̇ажчад̇и, на хад̇т̇им̣ ологзнд̇о, на ассам̣, на рат̇ам̣, на бад̇д̇им̣, на ид̇т̇им̣, на бурисам̣ ологзнд̇о, на уд̣̇д̇хам̣ ологзнд̇о, на ад̇хо ологзнд̇о, на д̣̇исаавид̣̇исам̣ вибзгкамаано г̇ажчад̇и, аяам̣ аарагкаг̇ожаро. гад̇амо убаниб̣анд̇хаг̇ожаро? жад̇д̇ааро сад̇ибадтаанаа, яад̇т̇а жид̇д̇ам̣ убаниб̣анд̇хад̇и. вуд̇д̇ан̃хзд̇ам̣ бхаг̇авад̇аа ‘‘го жа, бхигкавз, бхигкуно г̇ожаро саго бзд̇д̇иго висаяо? яад̣̇ид̣̇ам̣ жад̇д̇ааро сад̇ибадтаанаа’’д̇и (сам̣. ни. 5.372), аяам̣ убаниб̣анд̇хаг̇ожаро. ид̇и аяам̣ д̇ивид̇хо г̇ожаро ид̇ха аад̣̇и-сад̣̇д̣̇зна сан̇г̇ахид̇од̇и д̣̇адтаб̣б̣о.
Saddhāsampannakulādināti ettha ādi-saddena upanissayagocarādiṃ saṅgaṇhāti. Tividho hi gocaro upanissayagocaro ārakkhagocaro upanibandhagocaroti. Katamo upanissayagocaro? Dasakathāvatthuguṇasamannāgato kalyāṇamitto, yaṃ nissāya asutaṃ suṇāti, sutaṃ pariyodapeti, kaṅkhaṃ vitarati, diṭṭhiṃ ujuṃ karoti, cittaṃ pasādeti. Yassa vā pana anusikkhamāno saddhāya vaḍḍhati, sīlena sutena cāgena paññāya vaḍḍhati, ayaṃ upanissayagocaro. Katamo ārakkhagocaro? Idha bhikkhu antaragharaṃ paviṭṭho vīthiṃ paṭipanno okkhittacakkhu yugamattadassāvī saṃvuto gacchati, na hatthiṃ olokento, na assaṃ, na rathaṃ, na pattiṃ, na itthiṃ, na purisaṃ olokento, na uddhaṃ olokento, na adho olokento, na disāvidisaṃ vipekkhamāno gacchati, ayaṃ ārakkhagocaro. Katamo upanibandhagocaro? Cattāro satipaṭṭhānā, yattha cittaṃ upanibandhati. Vuttañhetaṃ bhagavatā ‘‘ko ca, bhikkhave, bhikkhuno gocaro sako pettiko visayo? Yadidaṃ cattāro satipaṭṭhānā’’ti (saṃ. ni. 5.372), ayaṃ upanibandhagocaro. Iti ayaṃ tividho gocaro idha ādi-saddena saṅgahitoti daṭṭhabbo.
аббамад̇д̇агзсу важ̇ж̇зсууд̇и асан̃жижжа аабаннасзкияаагусалажид̇д̇уббаад̣̇аад̣̇ибхзд̣̇зсу важ̇ж̇зсу. бхаяад̇о д̣̇ассанасийлод̇и барамаан̣умад̇д̇ам̣ важ̇ж̇ам̣ адтасадтияож̇анасад̇асахассуб̣б̣зд̇хасинзрубаб̣б̣ад̇асад̣̇исам̣ гад̇ваа д̣̇ассанасабхааво, саб̣б̣алахугам̣ ваа д̣̇уб̣бхаасид̇амад̇д̇ам̣ баарааж̇игасад̣̇исам̣ гад̇ваа д̣̇ассанасабхааво. саммаа аад̣̇ааяаад̇и саммад̣̇зва саггажжам̣ саб̣б̣асо ваа аад̣̇ияид̇ваа.
Appamattakesu vajjesūti asañcicca āpannasekhiyaakusalacittuppādādibhedesu vajjesu. Bhayato dassanasīloti paramāṇumattaṃ vajjaṃ aṭṭhasaṭṭhiyojanasatasahassubbedhasinerupabbatasadisaṃ katvā dassanasabhāvo, sabbalahukaṃ vā dubbhāsitamattaṃ pārājikasadisaṃ katvā dassanasabhāvo. Sammā ādāyāti sammadeva sakkaccaṃ sabbaso vā ādiyitvā.
ваддад̣̇угканиссаран̣ад̇т̇игзхи сод̇аб̣б̣ад̇о суд̇ам̣, барияад̇д̇ид̇хаммо. д̇ам̣ д̇хаарзд̇ийд̇и суд̇ад̇харо, суд̇асса аад̇хаарабхууд̇о. яасса хи ид̇о г̇ахид̇ам̣ зд̇д̇о балааяад̇и, чид̣̇д̣̇агхадз уд̣̇агам̣ вияа на д̇идтад̇и, барисамаж̇жхз згам̣ суд̇д̇ам̣ ваа ж̇аад̇агам̣ ваа гат̇зд̇ум̣ ваа ваажзд̇ум̣ ваа на саггод̇и, аяам̣ на суд̇ад̇харо наама. яасса бана уг̇г̇ахид̇ам̣ б̣уд̣̇д̇хаважанам̣ уг̇г̇ахид̇агааласад̣̇исамзва ход̇и, д̣̇асаби вийсад̇иби вассаани саж̇жхааяам̣ агаронд̇асса на нассад̇и, аяам̣ суд̇ад̇харо наама. д̇знзвааха ‘‘яад̣̇асса д̇а’’нд̇иаад̣̇и. згабад̣̇амби згагкарамби авинадтам̣ худ̇ваа саннижияад̇ийд̇и саннижаяо, суд̇ам̣ саннижаяо зд̇асминд̇и суд̇асаннижаяод̇и ааха ‘‘суд̇ам̣ саннижид̇ам̣ асминд̇и суд̇асаннижаяо’’д̇и. яасса хи суд̇ам̣ хад̣̇аяаман̃ж̇усааяам̣ саннижид̇ам̣ силааяа лзкаа вияа суван̣н̣агхадз багкид̇д̇аа сийхавасаа вияа жа саад̇ху д̇идтад̇и, аяам̣ суд̇асаннижаяо наама. д̇знааха ‘‘зд̇зна…бз… авинаасам̣ д̣̇ассзд̇ий’’д̇и.
Vaṭṭadukkhanissaraṇatthikehi sotabbato sutaṃ, pariyattidhammo. Taṃ dhāretīti sutadharo, sutassa ādhārabhūto. Yassa hi ito gahitaṃ etto palāyati, chiddaghaṭe udakaṃ viya na tiṭṭhati, parisamajjhe ekaṃ suttaṃ vā jātakaṃ vā kathetuṃ vā vācetuṃ vā na sakkoti, ayaṃ na sutadharo nāma. Yassa pana uggahitaṃ buddhavacanaṃ uggahitakālasadisameva hoti, dasapi vīsatipi vassāni sajjhāyaṃ akarontassa na nassati, ayaṃ sutadharo nāma. Tenevāha ‘‘yadassa ta’’ntiādi. Ekapadampi ekakkharampi avinaṭṭhaṃ hutvā sanniciyatīti sannicayo, sutaṃ sannicayo etasminti sutasannicayoti āha ‘‘sutaṃ sannicitaṃ asminti sutasannicayo’’ti. Yassa hi sutaṃ hadayamañjusāyaṃ sannicitaṃ silāya lekhā viya suvaṇṇaghaṭe pakkhittā sīhavasā viya ca sādhu tiṭṭhati, ayaṃ sutasannicayo nāma. Tenāha ‘‘etena…pe… avināsaṃ dassetī’’ti.
д̇хаад̇аад̇и баг̇ун̣аа ваажуг̇г̇ад̇аа. згасса хи уг̇г̇ахид̇аб̣уд̣̇д̇хаважанам̣ нижжагаалигам̣ на ход̇и, ‘‘асугасуд̇д̇ам̣ ваа ж̇аад̇агам̣ ваа гат̇зхий’’д̇и вуд̇д̇з ‘‘саж̇жхааяид̇ваа ан̃н̃зхи сам̣санд̣̇ид̇ваа барибужчаавасзна ад̇т̇ам̣ ог̇аахид̇ваа ж̇ааниссаамий’’д̇и вад̣̇ад̇и. згасса баг̇ун̣ам̣ баб̣анд̇хавижчзд̣̇аабхаавад̇о г̇ан̇г̇аасод̇асад̣̇исам̣ бхаван̇г̇асод̇асад̣̇исан̃жа агид̇д̇имам̣ сукаббавад̇д̇и ход̇и, ‘‘асугасуд̇д̇ам̣ ваа ж̇аад̇агам̣ ваа гат̇зхий’’д̇и вуд̇д̇з уд̣̇д̇харид̇ваа д̇амзва гат̇зд̇и. д̇ам̣ санд̇хааяа вуд̇д̇ам̣ ‘‘д̇хаад̇аа’’д̇и. ваажааяа баг̇ун̣аа гад̇аад̇и суд̇д̇ад̣̇асагаваг̇г̇ад̣̇асагабан̣н̣аасад̣̇асагавасзна ваажааяа саж̇жхааяид̇аа, д̣̇аса суд̇д̇аани г̇ад̇аани, д̣̇аса ваг̇г̇аани г̇ад̇аанийд̇иаад̣̇инаа саллагкзд̇ваа ваажааяа саж̇жхааяид̇аад̇и ад̇т̇о. суд̇д̇згад̣̇зсасса хи суд̇д̇амад̇д̇асса жа важасаа барижаяо ид̇ха наад̇хиббзд̇о, ат̇а ко ваг̇г̇аад̣̇ивасзнзва. манасаа анубзгкид̇аад̇и манасаа ану ану бзгкид̇аа, бхааг̇асо ниж̇жхааяид̇аа жинд̇ид̇аад̇и ад̇т̇о. ааваж̇ж̇анд̇ассаад̇и ваажааяа саж̇жхааяид̇ум̣ б̣уд̣̇д̇хаважанам̣ манасаа жинд̇знд̇асса. судту бадивид̣̇д̇хаад̇и ниж̇ж̇адам̣ ниг̇г̇умб̣ам̣ гад̇ваа судту яаат̇аавад̇о бадивид̣̇д̇хаа.
Dhātāti paguṇā vācuggatā. Ekassa hi uggahitabuddhavacanaṃ niccakālikaṃ na hoti, ‘‘asukasuttaṃ vā jātakaṃ vā kathehī’’ti vutte ‘‘sajjhāyitvā aññehi saṃsanditvā paripucchāvasena atthaṃ ogāhitvā jānissāmī’’ti vadati. Ekassa paguṇaṃ pabandhavicchedābhāvato gaṅgāsotasadisaṃ bhavaṅgasotasadisañca akittimaṃ sukhappavatti hoti, ‘‘asukasuttaṃ vā jātakaṃ vā kathehī’’ti vutte uddharitvā tameva katheti. Taṃ sandhāya vuttaṃ ‘‘dhātā’’ti. Vācāya paguṇā katāti suttadasakavaggadasakapaṇṇāsadasakavasena vācāya sajjhāyitā, dasa suttāni gatāni, dasa vaggāni gatānītiādinā sallakkhetvā vācāya sajjhāyitāti attho. Suttekadesassa hi suttamattassa ca vacasā paricayo idha nādhippeto, atha kho vaggādivaseneva. Manasā anupekkhitāti manasā anu anu pekkhitā, bhāgaso nijjhāyitā cintitāti attho. Āvajjantassāti vācāya sajjhāyituṃ buddhavacanaṃ manasā cintentassa. Suṭṭhu paṭividdhāti nijjaṭaṃ niggumbaṃ katvā suṭṭhu yāthāvato paṭividdhā.
д̣̇вз маад̇игаад̇и бхигкумаад̇игаа бхигкуниймаад̇игаа жа. ваажуг̇г̇ад̇аад̇и буримассзва взважанам̣. д̇иссо анумод̣̇анаад̇и сан̇гхабхад̇д̇з д̣̇аанаанисам̣сабадисам̣яуд̇д̇аанумод̣̇анаа, вихаараад̣̇иман̇г̇алз ман̇г̇аласуд̇д̇аад̣̇ианумод̣̇анаа, мад̇агабхад̇д̇аад̣̇иаваман̇г̇алз д̇ирогуддаад̣̇ианумод̣̇анаад̇и имаа д̇иссо анумод̣̇анаа . гаммаагаммавинижчаяод̇и бариваараавасаанз гаммаваг̇г̇з вуд̇д̇авинижчаяо. ‘‘вибассанаавасзна уг̇г̇ан̣ханд̇зна жад̇уд̇хаад̇увавад̇т̇аанамукзна уг̇г̇ахзд̇аб̣б̣а’’нд̇и д̇ийсуби г̇ан̣тибад̣̇зсу вуд̇д̇ам̣. жад̇уусу д̣̇исаасу аббадихад̇ад̇д̇аа жад̇ассо д̣̇исаа зд̇ассаад̇и жад̇уд̣̇д̣̇исо, жад̇уд̣̇д̣̇исоязва жаад̇уд̣̇д̣̇исо, жад̇ассо ваа д̣̇исаа арахад̇и, жад̇уусу ваа д̣̇исаасу саад̇хууд̇и жаад̇уд̣̇д̣̇исо.
Dve mātikāti bhikkhumātikā bhikkhunīmātikā ca. Vācuggatāti purimasseva vevacanaṃ. Tisso anumodanāti saṅghabhatte dānānisaṃsapaṭisaṃyuttaanumodanā, vihārādimaṅgale maṅgalasuttādianumodanā, matakabhattādiavamaṅgale tirokuṭṭādianumodanāti imā tisso anumodanā . Kammākammavinicchayoti parivārāvasāne kammavagge vuttavinicchayo. ‘‘Vipassanāvasena uggaṇhantena catudhātuvavatthānamukhena uggahetabba’’nti tīsupi gaṇṭhipadesu vuttaṃ. Catūsu disāsu appaṭihatattā catasso disā etassāti catuddiso, catuddisoyeva cātuddiso, catasso vā disā arahati, catūsu vā disāsu sādhūti cātuddiso.
абхивинаязд̇и сагалз винаяабидагз. винзд̇унд̇и сигкаабзд̇ум̣. ‘‘д̣̇вз вибхан̇г̇аа баг̇ун̣аа ваажуг̇г̇ад̇аа гаад̇аб̣б̣аад̇и ид̣̇ам̣ барибужчаавасзна уг̇г̇ахан̣амби санд̇хааяа вуд̇д̇а’’нд̇и вад̣̇анд̇и. згасса бамудтам̣, ид̇арасса баг̇ун̣ам̣ ход̇ийд̇и ааха ‘‘д̇ийхи ж̇анзхи сад̣̇д̇хим̣ баривад̇д̇анагкамаа гаад̇аб̣б̣аа’’д̇и. абхид̇хаммзд̇и наамаруубабарижчзд̣̇з. хздтимаа ваа д̇аяо ваг̇г̇аад̇и махааваг̇г̇ад̇о хздтаа саг̇аат̇агаваг̇г̇о нид̣̇аанаваг̇г̇о канд̇хагаваг̇г̇од̇и имз д̇аяо ваг̇г̇аа. ‘‘д̇хаммабад̣̇амби саха вад̇т̇унаа уг̇г̇ахзд̇ум̣ ваддад̇ий’’д̇и махаабажжарияам̣ вуд̇д̇ад̇д̇аа ж̇аад̇агабхаан̣агзна саадтагат̇ам̣ ж̇аад̇агам̣ уг̇г̇ахзд̇вааби д̇хаммабад̣̇амби саха вад̇т̇унаа уг̇г̇ахзд̇аб̣б̣амзва.
Abhivinayeti sakale vinayapiṭake. Vinetunti sikkhāpetuṃ. ‘‘Dve vibhaṅgā paguṇā vācuggatā kātabbāti idaṃ paripucchāvasena uggahaṇampi sandhāya vutta’’nti vadanti. Ekassa pamuṭṭhaṃ, itarassa paguṇaṃ hotīti āha ‘‘tīhi janehi saddhiṃ parivattanakkhamā kātabbā’’ti. Abhidhammeti nāmarūpaparicchede. Heṭṭhimā vā tayo vaggāti mahāvaggato heṭṭhā sagāthakavaggo nidānavaggo khandhakavaggoti ime tayo vaggā. ‘‘Dhammapadampi saha vatthunā uggahetuṃ vaṭṭatī’’ti mahāpaccariyaṃ vuttattā jātakabhāṇakena sāṭṭhakathaṃ jātakaṃ uggahetvāpi dhammapadampi saha vatthunā uggahetabbameva.
галяаан̣аа сунд̣̇араа бариман̣д̣алабад̣̇аб̣яан̃ж̇анаа ваажаа ассаад̇и галяаан̣аваажо. д̇знааха ‘‘сит̇илад̇ханид̇аад̣̇ийнам̣…бз… ваажааяа саманнааг̇ад̇о’’д̇и. д̇ад̇т̇а бариман̣д̣алабад̣̇аб̣яан̃ж̇анааяаад̇и таанагаран̣асамбад̇д̇ияаа сигкаасамбад̇д̇ияаа жа гад̇т̇ажиби ануунад̇ааяа бариман̣д̣алабад̣̇аани б̣яан̃ж̇анаани агкараани зд̇иссаад̇и бариман̣д̣алабад̣̇аб̣яан̃ж̇анаа, бад̣̇амзва ваа ад̇т̇асса б̣яан̃ж̇анад̇о бад̣̇аб̣яан̃ж̇анам̣, д̇ам̣ агкарабаарибуурим̣ гад̇ваа сит̇илад̇ханид̇аад̣̇ид̣̇асавид̇хам̣ б̣яан̃ж̇анаб̣уд̣̇д̇хим̣ абарихаабзд̇ваа вуд̇д̇ам̣ бариман̣д̣алам̣ наама ход̇и. агкарабаарибуурияаа хи бад̣̇аб̣яан̃ж̇анасса бариман̣д̣алад̇аа. д̇зна вуд̇д̇ам̣ ‘‘сит̇илад̇ханид̇аад̣̇ийнам̣ яат̇аавид̇хаанаважанзнаа’’д̇и, бариман̣д̣алам̣ бад̣̇аб̣яан̃ж̇анам̣ зд̇иссаад̇и бариман̣д̣алабад̣̇аб̣яан̃ж̇анаа. ат̇а ваа баж̇ж̇ад̇и н̃ааяад̇и ад̇т̇о зд̇знаад̇и бад̣̇ам̣, наамаад̣̇и. яат̇аад̇хиббзд̇амад̇т̇ам̣ б̣яан̃ж̇зд̇ийд̇и б̣яан̃ж̇анам̣, ваагяам̣. д̇зсам̣ барибун̣н̣ад̇ааяа бариман̣д̣алабад̣̇аб̣яан̃ж̇анаа.
Kalyāṇā sundarā parimaṇḍalapadabyañjanā vācā assāti kalyāṇavāco. Tenāha ‘‘sithiladhanitādīnaṃ…pe… vācāya samannāgato’’ti. Tattha parimaṇḍalapadabyañjanāyāti ṭhānakaraṇasampattiyā sikkhāsampattiyā ca katthacipi anūnatāya parimaṇḍalapadāni byañjanāni akkharāni etissāti parimaṇḍalapadabyañjanā, padameva vā atthassa byañjanato padabyañjanaṃ, taṃ akkharapāripūriṃ katvā sithiladhanitādidasavidhaṃ byañjanabuddhiṃ aparihāpetvā vuttaṃ parimaṇḍalaṃ nāma hoti. Akkharapāripūriyā hi padabyañjanassa parimaṇḍalatā. Tena vuttaṃ ‘‘sithiladhanitādīnaṃyathāvidhānavacanenā’’ti, parimaṇḍalaṃ padabyañjanaṃ etissāti parimaṇḍalapadabyañjanā. Atha vā pajjati ñāyati attho etenāti padaṃ, nāmādi. Yathādhippetamatthaṃ byañjetīti byañjanaṃ, vākyaṃ. Tesaṃ paripuṇṇatāya parimaṇḍalapadabyañjanā.
абижа яо бхигку барисад̇и д̇хаммам̣ д̣̇зсзнд̇о суд̇д̇ам̣ ваа ж̇аад̇агам̣ ваа нигкибид̇ваа ан̃н̃ам̣ убаарамбхагарам̣ суд̇д̇ам̣ аахарад̇и, д̇асса убамам̣ гат̇зд̇и, д̇ад̣̇ад̇т̇ам̣ од̇аарзд̇и, звам̣ ид̣̇ам̣ г̇ахзд̇ваа зд̇т̇а кибанд̇о згабассзнзва барихаранд̇о гаалам̣ н̃ад̇ваа вудтахад̇и, нигкид̇д̇асуд̇д̇ам̣ бана нигкид̇д̇амад̇д̇амзва ход̇и, д̇асса гат̇аа абариман̣д̣алаа наама ход̇и ад̇т̇асса абарибун̣н̣абхаавад̇о. яо бана суд̇д̇ам̣ ваа ж̇аад̇агам̣ ваа нигкибид̇ваа б̣ахи згабад̣̇амби аг̇анд̇ваа яат̇аанигкид̇д̇асса суд̇д̇асса ад̇т̇асам̣ван̣н̣анаавасзнзва суд̇д̇анд̇арамби аанзнд̇о баал̣ияаа анусанд̇хин̃жа буб̣б̣аабаран̃жа абзгканд̇о аажариязхи д̣̇иннанаяз тад̇ваа д̇улигааяа барижчинд̣̇анд̇о вияа д̇ам̣ д̇ам̣ ад̇т̇ам̣ сувавад̇т̇ид̇ам̣ гад̇ваа д̣̇ассзнд̇о г̇амбхийрамаад̇игааяа уд̣̇агам̣ бзсзнд̇о вияа г̇амбхийрамад̇т̇ам̣ г̇амзнд̇о ваг̇г̇ихаариг̇ад̇ияаа бад̣̇з бад̣̇ам̣ годдзнд̇о синд̇хавааж̇аанийяо вияа згам̣язва бад̣̇ам̣ анзгзхи барияааязхи бунаббунам̣ сам̣ван̣н̣анд̇о г̇ажчад̇и, д̇асса гат̇аа бариман̣д̣алаа наама ход̇и д̇хаммад̇о ад̇т̇ад̇о анусанд̇хид̇о буб̣б̣аабарад̇о аажарияуг̇г̇ахад̇од̇и саб̣б̣асо барибун̣н̣абхаавад̇о. зваруубамби гат̇ам̣ санд̇хааяа ‘‘бариман̣д̣алабад̣̇аб̣яан̃ж̇анааяаа’’д̇и вуд̇д̇ам̣.
Apica yo bhikkhu parisati dhammaṃ desento suttaṃ vā jātakaṃ vā nikkhipitvā aññaṃ upārambhakaraṃ suttaṃ āharati, tassa upamaṃ katheti, tadatthaṃ otāreti, evaṃ idaṃ gahetvā ettha khipanto ekapasseneva pariharanto kālaṃ ñatvā vuṭṭhahati, nikkhittasuttaṃ pana nikkhittamattameva hoti, tassa kathā aparimaṇḍalā nāma hoti atthassa aparipuṇṇabhāvato. Yo pana suttaṃ vā jātakaṃ vā nikkhipitvā bahi ekapadampi agantvā yathānikkhittassa suttassa atthasaṃvaṇṇanāvaseneva suttantarampi ānento pāḷiyā anusandhiñca pubbāparañca apekkhanto ācariyehi dinnanaye ṭhatvā tulikāya paricchindanto viya taṃ taṃ atthaṃ suvavatthitaṃ katvā dassento gambhīramātikāya udakaṃ pesento viya gambhīramatthaṃ gamento vaggihārigatiyā pade padaṃ koṭṭento sindhavājānīyo viya ekaṃyeva padaṃ anekehi pariyāyehi punappunaṃ saṃvaṇṇanto gacchati, tassa kathā parimaṇḍalā nāma hoti dhammato atthato anusandhito pubbāparato ācariyuggahatoti sabbaso paripuṇṇabhāvato. Evarūpampi kathaṃ sandhāya ‘‘parimaṇḍalapadabyañjanāyā’’ti vuttaṃ.
г̇ун̣абарибун̣н̣абхаавзна бурз бхаваад̇и борий, д̇асса бхигкуно д̇знзд̇ам̣ бхаасид̇аб̣б̣ам̣ ад̇т̇асса г̇ун̣абарибун̣н̣абхаавзна бурз бун̣н̣абхаавз бхаваад̇и ад̇т̇о. бурз ваа бхавад̇д̇аа борияаа нааг̇аригид̇т̇ияаа сукумаалад̇д̇анзна сад̣̇исаад̇и борий, бурз сам̣вад̣дханаарий вияа сугумаараад̇и ад̇т̇о. бурасса зсаад̇иби борий, бурасса зсаад̇и наг̇араваасийнам̣ гат̇аад̇и ад̇т̇о. наг̇араваасино хи яуд̇д̇агат̇аа хонд̇и бид̇имад̇д̇ам̣ ‘‘бид̇аа’’д̇и, бхаад̇имад̇д̇ам̣ ‘‘бхаад̇аа’’д̇и вад̣̇анд̇и. зваруубий хи гат̇аа б̣ахуно ж̇анасса ганд̇аа ход̇и манаабаа, д̇ааяа борияаа.
Guṇaparipuṇṇabhāvena pure bhavāti porī, tassa bhikkhuno tenetaṃ bhāsitabbaṃ atthassa guṇaparipuṇṇabhāvena pure puṇṇabhāve bhavāti attho. Pure vā bhavattā poriyā nāgarikitthiyā sukhumālattanena sadisāti porī, pure saṃvaḍḍhanārī viya sukumārāti attho. Purassa esātipi porī, purassa esāti nagaravāsīnaṃ kathāti attho. Nagaravāsino hi yuttakathā honti pitimattaṃ ‘‘pitā’’ti, bhātimattaṃ ‘‘bhātā’’ti vadanti. Evarūpī hi kathā bahuno janassa kantā hoti manāpā, tāya poriyā.
виссадтааяаад̇и бид̇д̇асзмхаад̣̇ийхи абалиб̣уд̣̇д̇хааяа санд̣̇идтавиламб̣ид̇аад̣̇ид̣̇осарахид̇ааяа. ат̇а ваа наад̇исийгхам̣ наад̇исан̣игам̣ ниранд̇арам̣ згарасан̃жа гад̇ваа барисааяа аж̇жхаасаяаануруубам̣ д̇хаммам̣ гат̇знд̇асса ваажаа виссадтаа наама. яо хи бхигку д̇хаммам̣ гат̇знд̇о суд̇д̇ам̣ ваа ж̇аад̇агам̣ ваа аарабхид̇ваа аарад̣̇д̇хагаалад̇о бадтааяа д̇урид̇ад̇урид̇о аран̣им̣ мант̇знд̇о вияа ун̣хакаад̣̇анийяам̣ каад̣̇анд̇о вияа баал̣ияаа анусанд̇хибуб̣б̣аабарзсу г̇ахид̇ам̣ г̇ахид̇амзва, аг̇г̇ахид̇ам̣ аг̇г̇ахид̇амзва гад̇ваа бураан̣абан̣н̣анд̇арзсу жарамаанам̣ г̇од̇хам̣ удтаабзнд̇о вияа д̇ад̇т̇а д̇ад̇т̇а бахаранд̇о осаабзд̇ваа удтааяа г̇ажчад̇и . бураан̣абан̣н̣анд̇арзсу хи барибаад̇ияамаанаа г̇од̇хаа гад̣̇аажи д̣̇иссад̇и гад̣̇аажи на д̣̇иссад̇и, звамзгажжасса ад̇т̇аван̣н̣анаа гад̇т̇ажи д̣̇иссад̇и гад̇т̇ажи на д̣̇иссад̇и. яоби д̇хаммам̣ гат̇знд̇о гаалзна сийгхам̣, гаалзна сан̣игам̣, гаалзна манд̣̇ам̣, гаалзна махаасад̣̇д̣̇ам̣, гаалзна куд̣̇д̣̇агасад̣̇д̣̇ам̣ гарод̇и, яат̇аа ниж̇жхаамад̇ан̣хигабзд̇асса мукад̇о нижчаран̣агааг̇г̇и гаалзна ж̇алад̇и гаалзна ниб̣б̣ааяад̇и, звам̣ бзд̇ад̇хаммагат̇иго наама ход̇и, барисааяа удтаад̇угаамааяа буна аарабхад̇и. яоби гат̇знд̇о д̇ад̇т̇а д̇ад̇т̇а вид̇т̇ааяад̇и, аббадибхаанад̇ааяа аабаж̇ж̇ад̇и, гзнажи рог̇зна нид̇т̇унанд̇о вияа ганд̣̇анд̇о вияа гат̇зд̇и, имзсам̣ саб̣б̣зсамби гат̇аа виссадтаа наама на ход̇и сукзна аббавад̇д̇абхаавад̇о. яо бана суд̇д̇ам̣ аахарид̇ваа аажариязхи д̣̇иннанаяз тид̇о аажарияуг̇г̇ахам̣ амун̃жанд̇о яат̇аа жа аажарияаа д̇ам̣ д̇ам̣ суд̇д̇ам̣ сам̣ван̣н̣зсум̣, д̇знзва наязна сам̣ван̣н̣знд̇о наад̇исийгхам̣ наад̇исан̣иганд̇иаад̣̇инаа вуд̇д̇анаязна гат̇аабаб̣анд̇хам̣ авижчиннам̣ гад̇ваа над̣̇ийсод̇о вияа бавад̇д̇зд̇и, аагаасаг̇ан̇г̇аад̇о бхассамаанауд̣̇агам̣ вияа ниранд̇арагат̇ам̣ бавад̇д̇зд̇и, д̇асса гат̇аа виссадтаа наама ход̇и. д̇ам̣ санд̇хааяа вуд̇д̇ам̣ ‘‘виссадтааяаа’’д̇и.
Vissaṭṭhāyāti pittasemhādīhi apalibuddhāya sandiṭṭhavilambitādidosarahitāya. Atha vā nātisīghaṃ nātisaṇikaṃ nirantaraṃ ekarasañca katvā parisāya ajjhāsayānurūpaṃ dhammaṃ kathentassa vācā vissaṭṭhā nāma. Yo hi bhikkhu dhammaṃ kathento suttaṃ vā jātakaṃ vā ārabhitvā āraddhakālato paṭṭhāya turitaturito araṇiṃ manthento viya uṇhakhādanīyaṃ khādanto viya pāḷiyā anusandhipubbāparesu gahitaṃ gahitameva, aggahitaṃ aggahitameva katvā purāṇapaṇṇantaresu caramānaṃ godhaṃ uṭṭhāpento viya tattha tattha paharanto osāpetvā uṭṭhāya gacchati . Purāṇapaṇṇantaresu hi paripātiyamānā godhā kadāci dissati kadāci na dissati, evamekaccassa atthavaṇṇanā katthaci dissati katthaci na dissati. Yopi dhammaṃ kathento kālena sīghaṃ, kālena saṇikaṃ, kālena mandaṃ, kālena mahāsaddaṃ, kālena khuddakasaddaṃ karoti, yathā nijjhāmataṇhikapetassa mukhato niccharaṇakaaggi kālena jalati kālena nibbāyati, evaṃ petadhammakathiko nāma hoti, parisāya uṭṭhātukāmāya puna ārabhati. Yopi kathento tattha tattha vitthāyati, appaṭibhānatāya āpajjati, kenaci rogena nitthunanto viya kandanto viya katheti, imesaṃ sabbesampi kathā vissaṭṭhā nāma na hoti sukhena appavattabhāvato. Yo pana suttaṃ āharitvā ācariyehi dinnanaye ṭhito ācariyuggahaṃ amuñcanto yathā ca ācariyā taṃ taṃ suttaṃ saṃvaṇṇesuṃ, teneva nayena saṃvaṇṇento nātisīghaṃ nātisaṇikantiādinā vuttanayena kathāpabandhaṃ avicchinnaṃ katvā nadīsoto viya pavatteti, ākāsagaṅgāto bhassamānaudakaṃ viya nirantarakathaṃ pavatteti, tassa kathā vissaṭṭhā nāma hoti. Taṃ sandhāya vuttaṃ ‘‘vissaṭṭhāyā’’ti.
анзлаг̇ал̣ааяаад̇и злаг̇ал̣авирахид̇ааяа. гассажи хи гат̇знд̇асса злам̣ г̇ал̣ад̇и, лаалаа баг̇гхарад̇и, кзл̣апусид̇аани ваа нигкаманд̇и, д̇асса ваажаа злаг̇ал̣аа наама ход̇и, д̇аб̣б̣ибарийд̇ааяаад̇и ад̇т̇о. ад̇т̇асса вин̃н̃аабанияаад̇и аад̣̇имаж̇жхабарияосаанам̣ баагадам̣ гад̇ваа бхаасид̇ад̇т̇асса вин̃н̃аабанасамад̇т̇ад̇ааяа ад̇т̇ан̃аабанз саад̇ханааяа.
Anelagaḷāyāti elagaḷavirahitāya. Kassaci hi kathentassa elaṃ gaḷati, lālā paggharati, kheḷaphusitāni vā nikkhamanti, tassa vācā elagaḷā nāma hoti, tabbiparītāyāti attho. Atthassa viññāpaniyāti ādimajjhapariyosānaṃ pākaṭaṃ katvā bhāsitatthassa viññāpanasamatthatāya atthañāpane sādhanāya.
ваажаава гаран̣анд̇и вааггаран̣ам̣, уд̣̇аахаарагхосо. галяаан̣ам̣ мад̇хурам̣ вааггаран̣ам̣ ассаад̇и галяаан̣авааггаран̣о. д̇знзвааха ‘‘мад̇хурассаро’’д̇и. хийл̣зд̇ийд̇и аваж̇аанаад̇и. маад̇уг̇аамод̇и самб̣анд̇хо. манам̣ абааяад̇и вад̣дхзд̇ийд̇и манаабо. д̇знааха ‘‘манавад̣дханаго’’д̇и. ваддабхаязна д̇аж̇ж̇зд̇ваад̇и яоб̣б̣анамад̣̇аад̣̇имад̇д̇аа бхигкунияо сам̣саарабхаязна д̇аасзд̇ваа. г̇ихигаалзд̇и ад̇д̇ано г̇ихигаалз. бхигкунияаа мзт̇унзна бхигкунийд̣̇уусаго ход̇ийд̇и бхигкунияаа гааяасам̣саг̇г̇амзва вад̣̇ад̇и. сигкамаанаасааман̣зрийсу бана мзт̇унзнаби бхигкунийд̣̇уусаго на ход̇ийд̇и ааха ‘‘сигкамаанаасааман̣зрийсу мзт̇унад̇хамма’’нд̇и. ‘‘гаасааяавад̇т̇авасанааяаа’’д̇и важанад̇о д̣̇уссийлаасу бхигкунийсигкамаанаасааман̣зрийсу г̇аруд̇хаммам̣ аж̇жхаабаннабуб̣б̣о бадигкид̇д̇оязваад̇и д̣̇адтаб̣б̣ам̣. д̇ассаа бхигкунияаа абхаавзби яаа яаа д̇ассаа важанам̣ ассосум̣, д̇аа д̇аа д̇ат̇зва ман̃н̃анд̇ийд̇и ааха ‘‘маад̇уг̇аамо хий’’д̇иаад̣̇и.
Vācāva karaṇanti vākkaraṇaṃ, udāhāraghoso. Kalyāṇaṃ madhuraṃ vākkaraṇaṃ assāti kalyāṇavākkaraṇo. Tenevāha ‘‘madhurassaro’’ti. Hīḷetīti avajānāti. Mātugāmoti sambandho. Manaṃ apāyati vaḍḍhetīti manāpo. Tenāha ‘‘manavaḍḍhanako’’ti. Vaṭṭabhayena tajjetvāti yobbanamadādimattā bhikkhuniyo saṃsārabhayena tāsetvā. Gihikāleti attano gihikāle. Bhikkhuniyā methunena bhikkhunīdūsako hotīti bhikkhuniyā kāyasaṃsaggameva vadati. Sikkhamānāsāmaṇerīsu pana methunenapi bhikkhunīdūsako na hotīti āha ‘‘sikkhamānāsāmaṇerīsu methunadhamma’’nti. ‘‘Kāsāyavatthavasanāyā’’ti vacanato dussīlāsu bhikkhunīsikkhamānāsāmaṇerīsu garudhammaṃ ajjhāpannapubbo paṭikkhittoyevāti daṭṭhabbaṃ. Tassā bhikkhuniyā abhāvepi yā yā tassā vacanaṃ assosuṃ, tā tā tatheva maññantīti āha ‘‘mātugāmo hī’’tiādi.
ид̣̇аани адта ан̇г̇аани самод̇хаанзд̇ваа д̣̇ассзд̇ум̣ ‘‘зд̇т̇а жаа’’д̇иаад̣̇и аарад̣̇д̇хам̣. имзхи бана адтахан̇г̇зхи асаманнааг̇ад̇ам̣ н̃ад̇д̇ижад̇уд̇т̇зна гаммзна самманнзнд̇о д̣̇уггадам̣ аабаж̇ж̇ад̇и, бхигку бана саммад̇оязва ход̇и.
Idāni aṭṭha aṅgāni samodhānetvā dassetuṃ ‘‘ettha cā’’tiādi āraddhaṃ. Imehi pana aṭṭhahaṅgehi asamannāgataṃ ñatticatutthena kammena sammannento dukkaṭaṃ āpajjati, bhikkhu pana sammatoyeva hoti.
148. г̇аругзхийд̇и г̇аругаад̇аб̣б̣зхи. згад̇оубасамбаннааяаад̇и убаяог̇ад̇т̇з бхуммаважанам̣. ‘‘овад̣̇ад̇ий’’д̇и ваа имасса ‘‘вад̣̇ад̇ий’’д̇и ад̇т̇з сад̇и самбад̣̇аанаважанамби яуж̇ж̇ад̇и. бхигкуунам̣ санд̇игз убасамбаннаа наама баривад̇д̇алин̇г̇аа ваа бан̃жасад̇асаагияаанияо ваа.
148.Garukehīti garukātabbehi. Ekatoupasampannāyāti upayogatthe bhummavacanaṃ. ‘‘Ovadatī’’ti vā imassa ‘‘vadatī’’ti atthe sati sampadānavacanampi yujjati. Bhikkhūnaṃ santike upasampannā nāma parivattaliṅgā vā pañcasatasākiyāniyo vā.
149. аасанам̣ бан̃н̃абзд̇ваад̇и зд̇т̇а ‘‘сажз бхууми манаабаа ход̇и, аасанам̣ абан̃н̃аабзд̇умби ваддад̇ий’’д̇и д̇ийсуби г̇ан̣тибад̣̇зсу вуд̇д̇ам̣. маад̇уг̇аамаг̇г̇ахан̣зна бхигкунийби сан̇г̇ахид̇аад̇и ааха ‘‘д̇хаммад̣̇зсанаабад̇д̇иможанад̇т̇а’’нд̇и. саммад̇асса бхигкуно санд̇игам̣ баадибад̣̇з оваад̣̇ад̇т̇ааяа саб̣б̣аахи бхигкунийхи ааг̇анд̇аб̣б̣ад̇о ‘‘самаг̇г̇аад̇т̇а бхаг̇инияо’’д̇и иминаа саб̣б̣аасам̣ ааг̇аманам̣ бужчад̇ийд̇и ааха ‘‘саб̣б̣аа ааг̇ад̇аад̇т̇аа’’д̇и. г̇илаанаасу анааг̇ад̇аасуби г̇илаанаанам̣ анааг̇аманасса анун̃н̃аад̇ад̇д̇аа ааг̇анд̇ум̣ самад̇т̇аахи жа саб̣б̣аахи ааг̇ад̇ад̇д̇аа ‘‘самаг̇г̇аамхаяяаа’’д̇и вад̇д̇ум̣ ваддад̇и. анд̇ог̇аамз ваад̇иаад̣̇ийсу яад̇т̇а бан̃жа ан̇г̇аани бхуумияам̣ бад̇идтаабзд̇ваа ванд̣̇ид̇ум̣ на саггаа ход̇и, д̇ад̇т̇а тид̇ааяа зва гааяам̣ бурад̇о наамзд̇ваа ‘‘ванд̣̇аами аяяаа’’д̇и ан̃ж̇алим̣ баг̇г̇аяха г̇анд̇умби ваддад̇и. анд̇арагхаранд̇и гад̇т̇ажи наг̇арад̣̇ваарасса б̣ахиинд̣̇акийлад̇о бадтааяа анд̇ог̇аамо вужжад̇и, гад̇т̇ажи гхаруммаарад̇о бадтааяа анд̇ог̇зхам̣. ид̇ха бана ‘‘анд̇ог̇аамз ваа’’д̇и висум̣ вуд̇д̇ад̇д̇аа ‘‘анд̇арагхарз ваа’’д̇и анд̇ог̇зхам̣ санд̇хааяа вуд̇д̇анд̇и д̣̇адтаб̣б̣ам̣. яад̇т̇а гад̇т̇ажийд̇и анд̇ог̇аамаад̣̇ийсу яад̇т̇а гад̇т̇ажи.
149.Āsanaṃ paññapetvāti ettha ‘‘sace bhūmi manāpā hoti, āsanaṃ apaññāpetumpi vaṭṭatī’’ti tīsupi gaṇṭhipadesu vuttaṃ. Mātugāmaggahaṇena bhikkhunīpi saṅgahitāti āha ‘‘dhammadesanāpattimocanattha’’nti. Sammatassa bhikkhuno santikaṃ pāṭipade ovādatthāya sabbāhi bhikkhunīhi āgantabbato ‘‘samaggāttha bhaginiyo’’ti iminā sabbāsaṃ āgamanaṃ pucchatīti āha ‘‘sabbā āgatātthā’’ti. Gilānāsu anāgatāsupi gilānānaṃ anāgamanassa anuññātattā āgantuṃ samatthāhi ca sabbāhi āgatattā ‘‘samaggāmhayyā’’ti vattuṃ vaṭṭati. Antogāme vātiādīsu yattha pañca aṅgāni bhūmiyaṃ patiṭṭhāpetvā vandituṃ na sakkā hoti, tattha ṭhitāya eva kāyaṃ purato nāmetvā ‘‘vandāmi ayyā’’ti añjaliṃ paggayha gantumpi vaṭṭati. Antaragharanti katthaci nagaradvārassa bahiindakhīlato paṭṭhāya antogāmo vuccati, katthaci gharummārato paṭṭhāya antogehaṃ. Idha pana ‘‘antogāme vā’’ti visuṃ vuttattā ‘‘antaraghare vā’’ti antogehaṃ sandhāya vuttanti daṭṭhabbaṃ. Yattha katthacīti antogāmādīsu yattha katthaci.
ваддад̇ийд̇и ‘‘васат̇а аяяз, маяам̣ бхигкуу аанзссаамаа’’д̇и вуд̇д̇аважанам̣ сад̣̇д̣̇аханд̇ийхи васид̇ум̣ ваддад̇и. на ниманд̇ид̇аа худ̇ваа г̇анд̇угаамаад̇и мануссзхи ниманд̇ид̇аа худ̇ваа г̇анд̇угаамаа на хонд̇ийд̇и ад̇т̇о, д̇ад̇т̇зва вассам̣ убаг̇анд̇угаамаа хонд̇ийд̇и ад̇хиббааяо. яад̇од̇и бхигкунубассаяад̇о. яаажид̇ваад̇и ‘‘д̇умхзхи аанийд̇аоваад̣̇знзва маяамби васиссаамаа’’д̇и яаажид̇ваа. д̇ад̇т̇аад̇и д̇асмим̣ бхигкунубассаяз. ааг̇ад̇аанам̣ санд̇игз оваад̣̇зна васид̇аб̣б̣анд̇и бажчимигааяа вассам̣ васид̇аб̣б̣ам̣. абхигкугааваасз васанд̇ияаа аабад̇д̇ийд̇и жод̣̇анаамукзна сааман̃н̃ад̇о аабад̇д̇иббасан̇г̇ам̣ вад̣̇ад̇и, на бана д̇ассаа аабад̇д̇и. вассажчзд̣̇ам̣ гад̇ваа г̇ажчанд̇ияааби аабад̇д̇ийд̇и вассаанубаг̇амамуулам̣ аабад̇д̇им̣ вад̣̇ад̇и. ид̇арааяа аабад̇д̇ияаа анаабад̇д̇игааран̣асаб̣бхаавад̇о ‘‘саа рагкид̇аб̣б̣аа’’д̇и вуд̇д̇ам̣, саа вассаанубаг̇амамуулаа аабад̇д̇и рагкид̇аб̣б̣аад̇и ад̇т̇о, абхигкугзби ааваасз ийд̣̇исаасу аабад̣̇аасу вассам̣ убаг̇анд̇аб̣б̣анд̇и ад̇хиббааяо. д̇знааха ‘‘аабад̣̇аасу хи…бз… анаабад̇д̇и вуд̇д̇аа’’д̇и. ид̇арааяа бана аабад̇д̇ияаа анаабад̇д̇и, гааран̣з асад̇и бажчимигааяаби вассам̣ на убаг̇анд̇аб̣б̣ам̣. санд̇зсу хи бхигкуусу вассам̣ анубаг̇ажчанд̇ияаа аабад̇д̇и. д̇ад̇т̇а г̇анд̇ваа баваарзд̇аб̣б̣анд̇и зд̇т̇а абаваарзнд̇ийнам̣ аабад̇д̇исамбхавад̇о. сажз д̣̇уурзби бхигкуунам̣ васанадтаанам̣ ход̇и, саггаа жа ход̇и навамияам̣ г̇анд̇ваа баваарзд̇ум̣, д̇ад̇т̇а г̇анд̇ваа баваарзд̇аб̣б̣ам̣. сажз бана навамияам̣ нигкамид̇ваа самбаабун̣ид̇ум̣ на саггаа ход̇и, аг̇ажчанд̇ийнам̣ анаабад̇д̇и.
Vaṭṭatīti ‘‘vasatha ayye, mayaṃ bhikkhū ānessāmā’’ti vuttavacanaṃ saddahantīhi vasituṃ vaṭṭati. Na nimantitā hutvā gantukāmāti manussehi nimantitā hutvā gantukāmā na hontīti attho, tattheva vassaṃ upagantukāmā hontīti adhippāyo. Yatoti bhikkhunupassayato. Yācitvāti ‘‘tumhehi ānītaovādeneva mayampi vasissāmā’’ti yācitvā. Tatthāti tasmiṃ bhikkhunupassaye. Āgatānaṃ santike ovādena vasitabbanti pacchimikāya vassaṃ vasitabbaṃ. Abhikkhukāvāse vasantiyā āpattīti codanāmukhena sāmaññato āpattippasaṅgaṃ vadati, na pana tassā āpatti. Vassacchedaṃ katvā gacchantiyāpi āpattīti vassānupagamamūlaṃ āpattiṃ vadati. Itarāya āpattiyā anāpattikāraṇasabbhāvato ‘‘sā rakkhitabbā’’ti vuttaṃ, sā vassānupagamamūlā āpatti rakkhitabbāti attho, abhikkhukepi āvāse īdisāsu āpadāsu vassaṃ upagantabbanti adhippāyo. Tenāha ‘‘āpadāsu hi…pe… anāpatti vuttā’’ti. Itarāya pana āpattiyā anāpatti, kāraṇe asati pacchimikāyapi vassaṃ na upagantabbaṃ. Santesu hi bhikkhūsu vassaṃ anupagacchantiyā āpatti. Tattha gantvā pavāretabbanti ettha apavārentīnaṃ āpattisambhavato. Sace dūrepi bhikkhūnaṃ vasanaṭṭhānaṃ hoti, sakkā ca hoti navamiyaṃ gantvā pavāretuṃ, tattha gantvā pavāretabbaṃ. Sace pana navamiyaṃ nikkhamitvā sampāpuṇituṃ na sakkā hoti, agacchantīnaṃ anāpatti.
убосат̇асса бужчанам̣ убосат̇абужчаа, сааязва га-ббажжаяам̣ рассад̇д̇ан̃жа гад̇ваа убосат̇абужчаганд̇и вуд̇д̇аад̇и ааха ‘‘убосат̇абужчана’’нд̇и. убосат̇о бужчид̇аб̣б̣од̇и ‘‘гад̣̇аа, аяяа, убосат̇о’’д̇и бужчид̇аб̣б̣о. бхигкунааби ‘‘свз, бхаг̇ини, убосат̇о’’д̇и вад̇д̇аб̣б̣ам̣. бхигкуу гад̣̇аажи гзнажи гааран̣зна баннарасигам̣ ваа жаад̇уд̣̇д̣̇асийубосат̇ам̣, жаад̇уд̣̇д̣̇асигам̣ ваа баннарасийубосат̇ам̣ гаронд̇и, яасмин̃жа д̣̇ивасз бхигкуухи убосат̇о гад̇о, д̇асмим̣язва бхигкунийхиби убосат̇о гаад̇аб̣б̣од̇и ад̇хиббааязна ‘‘багкасса д̇зрасияам̣язва г̇анд̇ваа’’д̇иаад̣̇и вуд̇д̇ам̣. звам̣ бужчид̇зна бхигкунаа сажз жаад̇уд̣̇д̣̇асияам̣ убосат̇ам̣ гаронд̇и, ‘‘жаад̇уд̣̇д̣̇асиго бхаг̇иний’’д̇и вад̇д̇аб̣б̣ам̣. сажз бана баннарасияам̣ гаронд̇и, ‘‘баннарасиго бхаг̇иний’’д̇и аажигкид̇аб̣б̣ам̣. оваад̣̇ад̇т̇ааяаад̇и оваад̣̇аяаажанад̇т̇ааяа. баадибад̣̇ад̣̇ивасад̇о бана бадтааяа д̇хаммасаванад̇т̇ааяа г̇анд̇аб̣б̣анд̇и баадибад̣̇ад̣̇ивасз оваад̣̇аг̇г̇ахан̣ад̇т̇ааяа д̣̇уд̇ияад̣̇ивасад̇о бадтааяа анд̇аранд̇араа д̇хаммасаванад̇т̇ааяа г̇анд̇аб̣б̣ам̣. оваад̣̇аг̇г̇ахан̣амби хи ‘‘д̇хаммасаванамзваа’’д̇и абхзд̣̇зна вуд̇д̇ам̣. ниранд̇арам̣ вихаарам̣ убасан̇гамим̣сууд̇и язбхуяязна убасан̇гаманам̣ санд̇хааяа вуд̇д̇ам̣. вуд̇д̇ан̃хзд̇анд̇иаад̣̇инаа яат̇аанусидтам̣ бадибаж̇ж̇иссаамаад̇и саб̣б̣аасам̣язва бхигкунийнам̣ убасан̇гаманад̣̇ийбанад̇т̇ам̣ баал̣и нид̣̇ассид̇аа. оваад̣̇ам̣ г̇ажчад̇ийд̇и оваад̣̇ам̣ яаажид̇ум̣ г̇ажчад̇и. д̣̇вз д̇иссод̇и д̣̇вийхи д̇ийхи. гаран̣ад̇т̇з жзд̇ам̣ бажжад̇д̇аважанам̣.
Uposathassa pucchanaṃ uposathapucchā, sāyeva ka-ppaccayaṃ rassattañca katvā uposathapucchakanti vuttāti āha ‘‘uposathapucchana’’nti. Uposatho pucchitabboti ‘‘kadā, ayya, uposatho’’ti pucchitabbo. Bhikkhunāpi ‘‘sve, bhagini, uposatho’’ti vattabbaṃ. Bhikkhū kadāci kenaci kāraṇena pannarasikaṃ vā cātuddasīuposathaṃ, cātuddasikaṃ vā pannarasīuposathaṃ karonti, yasmiñca divase bhikkhūhi uposatho kato, tasmiṃyeva bhikkhunīhipi uposatho kātabboti adhippāyena ‘‘pakkhassa terasiyaṃyeva gantvā’’tiādi vuttaṃ. Evaṃ pucchitena bhikkhunā sace cātuddasiyaṃ uposathaṃ karonti, ‘‘cātuddasiko bhaginī’’ti vattabbaṃ. Sace pana pannarasiyaṃ karonti, ‘‘pannarasiko bhaginī’’ti ācikkhitabbaṃ. Ovādatthāyāti ovādayācanatthāya. Pāṭipadadivasato pana paṭṭhāya dhammasavanatthāya gantabbanti pāṭipadadivase ovādaggahaṇatthāya dutiyadivasato paṭṭhāya antarantarā dhammasavanatthāya gantabbaṃ. Ovādaggahaṇampi hi ‘‘dhammasavanamevā’’ti abhedena vuttaṃ. Nirantaraṃ vihāraṃ upasaṅkamiṃsūti yebhuyyena upasaṅkamanaṃ sandhāya vuttaṃ. Vuttañhetantiādinā yathānusiṭṭhaṃ paṭipajjissāmāti sabbāsaṃyeva bhikkhunīnaṃ upasaṅkamanadīpanatthaṃ pāḷi nidassitā. Ovādaṃ gacchatīti ovādaṃ yācituṃ gacchati. Dve tissoti dvīhi tīhi. Karaṇatthe cetaṃ paccattavacanaṃ.
баасаад̣̇игзнаад̇и басаад̣̇аж̇анагзна нид̣̇д̣̇осзна гааяагаммаад̣̇инаа. самбаад̣̇зд̇ууд̇и д̇ивид̇хам̣ сигкам̣ самбаад̣̇зд̇у. сажз баад̇имогкуд̣̇д̣̇зсагам̣язва д̣̇исваа д̇аахи бхигкунийхи оваад̣̇о яаажид̇о бхавзяяа, д̇зна гим̣ гаад̇аб̣б̣анд̇и? убосат̇аг̇г̇з саннибад̇ид̇з бхигкусан̇гхз буб̣б̣агижжавасзна ‘‘ад̇т̇и гаажи бхигкунияо оваад̣̇ам̣ яаажамаанаа’’д̇и бужчияамаанз ‘‘звам̣ вад̣̇зхий’’д̇и оваад̣̇абадиг̇г̇аахагзна вад̇д̇аб̣б̣аважанам̣ ан̃н̃зна бхигкунаа гат̇аабзд̇ваа баад̇имогкуд̣̇д̣̇зсагзна вад̇д̇аб̣б̣аважанам̣ ад̇д̇анаа вад̇ваа буна саяамзва г̇анд̇ваа бхигкунийнам̣ аарожзд̇аб̣б̣ам̣, ан̃н̃зна ваа бхигкунаа д̇асмим̣ д̣̇ивасз баад̇имогкам̣ уд̣̇д̣̇исаабзд̇аб̣б̣ам̣. зд̇ам̣ вуд̇д̇анд̇и ‘‘д̇аахий’’д̇и зд̇ам̣ б̣ахуважанам̣ вуд̇д̇ам̣.
Pāsādikenāti pasādajanakena niddosena kāyakammādinā. Sampādetūti tividhaṃ sikkhaṃ sampādetu. Sace pātimokkhuddesakaṃyeva disvā tāhi bhikkhunīhi ovādo yācito bhaveyya, tena kiṃ kātabbanti? Uposathagge sannipatite bhikkhusaṅghe pubbakiccavasena ‘‘atthi kāci bhikkhuniyo ovādaṃ yācamānā’’ti pucchiyamāne ‘‘evaṃ vadehī’’ti ovādapaṭiggāhakena vattabbavacanaṃ aññena bhikkhunā kathāpetvā pātimokkhuddesakena vattabbavacanaṃ attanā vatvā puna sayameva gantvā bhikkhunīnaṃ ārocetabbaṃ, aññena vā bhikkhunā tasmiṃ divase pātimokkhaṃ uddisāpetabbaṃ. Etaṃ vuttanti ‘‘tāhī’’ti etaṃ bahuvacanaṃ vuttaṃ.
згаа бхигкуний ваад̇и ид̣̇ам̣ б̣ахуухи бхигкунубассаязхи згааяа зва бхигкунияаа саасанабадиг̇г̇ахан̣ам̣ санд̇хааяа вуд̇д̇ам̣, на бана д̣̇уд̇ияигааяа абхаавам̣ санд̇хааяа. б̣ахуухи бхигкунубассаязхийд̇и анд̇араамаг̇г̇з ваа д̇асмим̣язва ваа г̇аамз б̣ахуухи бхигкунубассаязхи. ‘‘бхигкунисан̇гхо жа аяяа бхигкунияо жа бхигкуний жаа’’д̇и иминаа наанааубассаязхи саасанам̣ г̇ахзд̇ваа ааг̇ад̇абхигкунияаа вад̇д̇аб̣б̣аважанам̣ д̣̇ассзд̇и. ид̣̇ан̃жа згзна багаарзна мукамад̇д̇анид̣̇ассанад̇т̇ам̣ вуд̇д̇ам̣, д̇асмим̣ д̇асмим̣ бана бхигкунубассаяз бхигкунийнам̣ бамаан̣ам̣ саллагкзд̇ваа д̇ад̣̇ануруубзна наязна вад̇д̇аб̣б̣ам̣. бхигкусан̇гхасса аяяаанам̣ аяяассаад̇и ид̣̇ам̣ сан̇кибид̇ваа вуд̇д̇ам̣.
Ekā bhikkhunī vāti idaṃ bahūhi bhikkhunupassayehi ekāya eva bhikkhuniyā sāsanapaṭiggahaṇaṃ sandhāya vuttaṃ, na pana dutiyikāya abhāvaṃ sandhāya. Bahūhi bhikkhunupassayehīti antarāmagge vā tasmiṃyeva vā gāme bahūhi bhikkhunupassayehi. ‘‘Bhikkhunisaṅgho ca ayya bhikkhuniyo ca bhikkhunī cā’’ti iminā nānāupassayehi sāsanaṃ gahetvā āgatabhikkhuniyā vattabbavacanaṃ dasseti. Idañca ekena pakārena mukhamattanidassanatthaṃ vuttaṃ, tasmiṃ tasmiṃ pana bhikkhunupassaye bhikkhunīnaṃ pamāṇaṃ sallakkhetvā tadanurūpena nayena vattabbaṃ. Bhikkhusaṅghassa ayyānaṃ ayyassāti idaṃ saṅkhipitvā vuttaṃ.
баад̇имогкуд̣̇д̣̇зсагзнабийд̇и ид̣̇ам̣ сан̇гхубосат̇авасзнзва д̣̇ассид̇ам̣. яад̇т̇а бана д̇ин̣н̣ам̣ д̣̇виннам̣ ваа васанадтаанз баад̇имогкуд̣̇д̣̇зсо над̇т̇и, д̇ад̇т̇ааби н̃ад̇д̇итабанагзна ид̇арзна ваа бхигкунаа иминаава наязна вад̇д̇аб̣б̣ам̣. згабуг̇г̇алзнаби убосат̇ад̣̇ивасз оваад̣̇аяаажанам̣ самбадижчид̇ваа баадибад̣̇з ааг̇ад̇аанам̣ бхигкунийнам̣ ‘‘над̇т̇и гожий’’д̇иаад̣̇и вад̇д̇аб̣б̣амзва. сажз саяамзва, ‘‘саммад̇о аха’’нд̇и вад̇д̇аб̣б̣ам̣. имам̣ вид̇хим̣ аж̇аананд̇о ид̇ха б̣аалод̇и ад̇хиббзд̇о.
Pātimokkhuddesakenapīti idaṃ saṅghuposathavaseneva dassitaṃ. Yattha pana tiṇṇaṃ dvinnaṃ vā vasanaṭṭhāne pātimokkhuddeso natthi, tatthāpi ñattiṭhapanakena itarena vā bhikkhunā imināva nayena vattabbaṃ. Ekapuggalenapi uposathadivase ovādayācanaṃ sampaṭicchitvā pāṭipade āgatānaṃ bhikkhunīnaṃ ‘‘natthi kocī’’tiādi vattabbameva. Sace sayameva, ‘‘sammato aha’’nti vattabbaṃ. Imaṃ vidhiṃ ajānanto idha bāloti adhippeto.
150. ад̇хаммагаммз ад̇хаммагаммасан̃н̃ий ваг̇г̇ам̣ бхигкунисан̇гхам̣ ваг̇г̇асан̃н̃ий овад̣̇ад̇и, аабад̇д̇и баажид̇д̇ияассаад̇иаад̣̇ийсу виж̇ж̇амаанзсуби ваг̇г̇аад̣̇ибхааванимид̇д̇зсу д̣̇уггадзсу ад̇хаммагаммамуулагам̣ баажид̇д̇ияамзва баал̣ияам̣ саб̣б̣ад̇т̇а вуд̇д̇анд̇и ааха ‘‘ад̇хаммагаммз д̣̇виннам̣ навагаанам̣ васзна адтаараса баажид̇д̇ияааний’’д̇и. сзсамзд̇т̇а уд̇д̇аанамзва. асаммад̇ад̇аа, бхигкунияаа барибун̣н̣уубасамбаннад̇аа, оваад̣̇авасзна адтаг̇аруд̇хаммабхан̣ананд̇и имаани банзд̇т̇а д̇ийн̣и ан̇г̇аани.
150.Adhammakamme adhammakammasaññī vaggaṃ bhikkhunisaṅghaṃ vaggasaññī ovadati, āpatti pācittiyassātiādīsu vijjamānesupi vaggādibhāvanimittesu dukkaṭesu adhammakammamūlakaṃ pācittiyameva pāḷiyaṃ sabbattha vuttanti āha ‘‘adhammakamme dvinnaṃ navakānaṃ vasena aṭṭhārasa pācittiyānī’’ti. Sesamettha uttānameva. Asammatatā, bhikkhuniyā paripuṇṇūpasampannatā, ovādavasena aṭṭhagarudhammabhaṇananti imāni panettha tīṇi aṅgāni.
оваад̣̇асигкаабад̣̇аван̣н̣анаа нидтид̇аа.
Ovādasikkhāpadavaṇṇanā niṭṭhitā.
Related texts:
д̇ибидага (муула) • Tipiṭaka (Mūla) / винаяабидага • Vinayapiṭaka / махаавибхан̇г̇а • Mahāvibhaṅga / 3. оваад̣̇аваг̇г̇о • 3. Ovādavaggo
адтагат̇аа • Aṭṭhakathā / винаяабидага (адтагат̇аа) • Vinayapiṭaka (aṭṭhakathā) / махаавибхан̇г̇а-адтагат̇аа • Mahāvibhaṅga-aṭṭhakathā / 1. оваад̣̇асигкаабад̣̇аван̣н̣анаа • 1. Ovādasikkhāpadavaṇṇanā
дийгаа • Tīkā / винаяабидага (дийгаа) • Vinayapiṭaka (ṭīkā) / важ̇ираб̣уд̣̇д̇хи-дийгаа • Vajirabuddhi-ṭīkā / 1. оваад̣̇асигкаабад̣̇аван̣н̣анаа • 1. Ovādasikkhāpadavaṇṇanā
дийгаа • Tīkā / винаяабидага (дийгаа) • Vinayapiṭaka (ṭīkā) / вимад̇ивинод̣̇аний-дийгаа • Vimativinodanī-ṭīkā / 1. оваад̣̇асигкаабад̣̇аван̣н̣анаа • 1. Ovādasikkhāpadavaṇṇanā
дийгаа • Tīkā / винаяабидага (дийгаа) • Vinayapiṭaka (ṭīkā) / баажид̇яаад̣̇ияож̇анаабаал̣и • Pācityādiyojanāpāḷi / 1. оваад̣̇асигкаабад̣̇а-ад̇т̇аяож̇анаа • 1. Ovādasikkhāpada-atthayojanā
