| Library / Tipiṭaka / д̇ибидага • Tipiṭaka / вимад̇ивинод̣̇аний-дийгаа • Vimativinodanī-ṭīkā |
3. оваад̣̇аваг̇г̇о
3. Ovādavaggo
1. оваад̣̇асигкаабад̣̇аван̣н̣анаа
1. Ovādasikkhāpadavaṇṇanā
144. д̇ад̇ияаваг̇г̇асса батамз д̇иражчаанабхууд̇анд̇и д̇ирогаран̣абхууд̇ам̣, б̣аахирабхууд̇анд̇и ад̇т̇о. самид̣̇д̇ход̇и барибун̣н̣о. сахид̇ад̇т̇о ад̇т̇аяуд̇д̇о. ад̇т̇аг̇амбхийрад̇аад̣̇инаа г̇амбхийро.
144. Tatiyavaggassa paṭhame tiracchānabhūtanti tirokaraṇabhūtaṃ, bāhirabhūtanti attho. Samiddhoti paripuṇṇo. Sahitattho atthayutto. Atthagambhīratādinā gambhīro.
145-147. барад̇од̇и уд̇д̇ари. гаронд̇оваад̇и бариб̣аахирз гаронд̇о. вибхан̇г̇зд̇и жхаанавибхан̇г̇з. жаран̣анд̇и ниб̣б̣аанаг̇аманааяа баад̣̇ам̣.
145-147.Paratoti uttari. Karontovāti paribāhire karonto. Vibhaṅgeti jhānavibhaṅge. Caraṇanti nibbānagamanāya pādaṃ.
яад̣̇ассаад̇и яам̣ асса. д̇хаарзд̇ийд̇и авинассамаанам̣ д̇хаарзд̇и. баригат̇анад̇т̇анд̇и багин̣н̣агагат̇аавасзна барижчиннад̇хаммагат̇анад̇т̇ам̣. д̇иссо анумод̣̇анаад̇и сан̇гхабхад̇д̇аад̣̇ийсу д̣̇аанаанисам̣саббадисам̣яуд̇д̇аа нид̇хигун̣д̣асуд̇д̇аад̣̇и (ку. баа. 8.1 аад̣̇аяо) -анумод̣̇анаа, г̇зхаббавзсаман̇г̇алаад̣̇ийсу ман̇г̇аласуд̇д̇аад̣̇и (ку. баа. 5.1 аад̣̇аяо; су. ни. ман̇г̇аласуд̇д̇а) -анумод̣̇анаа, мад̇агабхад̇д̇аад̣̇иаман̇г̇алзсу д̇ирогуддаад̣̇и (ку. баа. 7.1 аад̣̇аяо; бз. ва. 14 аад̣̇аяо) -анумод̣̇анаад̇и имаа д̇иссо анумод̣̇анаа. гаммаагаммавинижчаяод̇и бариваараавасаанз гаммаваг̇г̇з (бари. 482 аад̣̇аяо) вуд̇д̇авинижчаяо. самаад̇хивасзнаад̇и самат̇абуб̣б̣агавасзна. вибассанаавасзна ваад̇и д̣̇идтивисуд̣̇д̇хиаад̣̇игааяа сугкавибассанааяа васзна. ад̇д̇ано сийларагкан̣ад̇т̇ам̣ абараанабзгкад̇ааяа язна гаамам̣ г̇анд̇ум̣ жад̇ассо д̣̇исаа арахад̇и, асса ваа санд̇и, д̇аасу ваа саад̇хууд̇и жаад̇уд̣̇д̣̇исо.
Yadassāti yaṃ assa. Dhāretīti avinassamānaṃ dhāreti. Parikathanatthanti pakiṇṇakakathāvasena paricchinnadhammakathanatthaṃ. Tisso anumodanāti saṅghabhattādīsu dānānisaṃsappaṭisaṃyuttā nidhikuṇḍasuttādi (khu. pā. 8.1 ādayo) -anumodanā, gehappavesamaṅgalādīsu maṅgalasuttādi (khu. pā. 5.1 ādayo; su. ni. maṅgalasutta) -anumodanā, matakabhattādiamaṅgalesu tirokuṭṭādi (khu. pā. 7.1 ādayo; pe. va. 14 ādayo) -anumodanāti imā tisso anumodanā. Kammākammavinicchayoti parivārāvasāne kammavagge (pari. 482 ādayo) vuttavinicchayo. Samādhivasenāti samathapubbakavasena. Vipassanāvasena vāti diṭṭhivisuddhiādikāya sukkhavipassanāya vasena. Attano sīlarakkhaṇatthaṃ aparānapekkhatāya yena kāmaṃ gantuṃ catasso disā arahati, assa vā santi, tāsu vā sādhūti cātuddiso.
абхивинаязд̇и баад̇имогкасам̣варасан̇каад̇з сам̣варавинаяз, д̇аббагаасагз ваа винаяабидагз. винзд̇унд̇и сигкаабзд̇ум̣ багаасзд̇ум̣. баг̇ун̣аа ваажуг̇г̇ад̇аад̇и баатад̇о жа ад̇т̇ад̇о жа баг̇ун̣аа мукз саннид̇хаабанавасзна ваажуг̇г̇ад̇аа гаад̇аб̣б̣аа. ад̇т̇амад̇д̇авасзнабзд̇т̇а яож̇анам̣ гаронд̇и. абхид̇хаммзд̇и лагкан̣арасаад̣̇ивасзна барижчиннз наамаруубад̇хаммз. буб̣б̣з гира махаат̇зраа барияад̇д̇иананд̇арад̇хаанааяа згзгасса г̇ан̣асса д̣̇ийгханигааяаад̣̇изгзгад̇хаммагодтаасам̣ нияяаад̇знд̇аа ‘‘д̇умхз зд̇ам̣ баал̣ид̇о жа адтагат̇аад̇о жа барихарат̇а, саггонд̇аа уд̇д̇ариби уг̇г̇ан̣хат̇аа’’д̇и звам̣ сагалад̇хаммам̣ г̇ант̇авасзна нияяаад̇знд̇и, д̇ад̇т̇а д̇з жа бхигкуу г̇ант̇анаамзна д̣̇ийгхабхаан̣агаа маж̇жхимабхаан̣агаад̇и вохарийяанд̇и, д̇з жа ад̇д̇ано бхаарабхууд̇ам̣ годтаасам̣ барижжаж̇ид̇ваа ан̃н̃ам̣ уг̇г̇ахзд̇ум̣ на лабханд̇и. д̇ам̣ санд̇хааяааха ‘‘сажз маж̇жхимабхаан̣аго ход̇ий’’д̇иаад̣̇и.
Abhivinayeti pātimokkhasaṃvarasaṅkhāte saṃvaravinaye, tappakāsake vā vinayapiṭake. Vinetunti sikkhāpetuṃ pakāsetuṃ. Paguṇā vācuggatāti pāṭhato ca atthato ca paguṇā mukhe sannidhāpanavasena vācuggatā kātabbā. Atthamattavasenapettha yojanaṃ karonti. Abhidhammeti lakkhaṇarasādivasena paricchinne nāmarūpadhamme. Pubbe kira mahātherā pariyattianantaradhānāya ekekassa gaṇassa dīghanikāyādiekekadhammakoṭṭhāsaṃ niyyātentā ‘‘tumhe etaṃ pāḷito ca aṭṭhakathāto ca pariharatha, sakkontā uttaripi uggaṇhathā’’ti evaṃ sakaladhammaṃ ganthavasena niyyātenti, tattha te ca bhikkhū ganthanāmena dīghabhāṇakā majjhimabhāṇakāti voharīyanti, te ca attano bhārabhūtaṃ koṭṭhāsaṃ pariccajitvā aññaṃ uggahetuṃ na labhanti. Taṃ sandhāyāha ‘‘sace majjhimabhāṇako hotī’’tiādi.
д̇ад̇т̇а хздтимаа ваа д̇аяо ваг̇г̇аад̇и махааваг̇г̇ад̇о хздтимаа саг̇аат̇агаваг̇г̇о (сам̣. ни. 1.1 аад̣̇аяо), нид̣̇аанаваг̇г̇о (сам̣. ни. 2.1 аад̣̇аяо), канд̇хаваг̇г̇од̇и (сам̣. ни. 3.1 аад̣̇ияо) имз д̇аяо ваг̇г̇аа. д̇иганибаад̇ад̇о бадтааяа хздтаад̇и згаганибаад̇ад̣̇уганибаад̇з санд̇хааяа вуд̇д̇ам̣. д̇хаммабад̣̇амби саха вад̇т̇унаа ж̇аад̇агабхаан̣агзна ад̇д̇ано ж̇аад̇агзна сад̣̇д̇хим̣ уг̇г̇ахзд̇аб̣б̣ам̣. д̇ад̇о орам̣ на ваддад̇ийд̇и махаабажжариваад̣̇асса ад̇хиббааяо. д̇ад̇о д̇ад̇од̇и д̣̇ийгханигааяаад̣̇ид̇о. ужжинид̇ваа уг̇г̇ахид̇ам̣ сад̣̇д̇хаммасса тид̇ияаа, бхигкуноби буб̣б̣аабараанусанд̇хиаад̣̇игусалад̇ааяа жа на ход̇ийд̇и ‘‘д̇ам̣ на ваддад̇ий’’д̇и бадигкид̇д̇ам̣. абхид̇хаммз гин̃жи уг̇г̇ахзд̇аб̣б̣анд̇и на вуд̇д̇анд̇и зд̇т̇а яасмаа винаяз гусалад̇д̇игаад̣̇ивибхааг̇о, суд̇д̇анд̇зсу самат̇авибассанаамаг̇г̇о жа абхид̇хаммабаатам̣ винаа на вин̃н̃ааяад̇и, анд̇хагаарз бавидтагаало вияа ход̇и, д̇асмаа суд̇д̇авинаяаанам̣ г̇ахан̣авасзна абхид̇хаммаг̇г̇ахан̣ам̣ вуд̇д̇амзваад̇и висум̣ на вуд̇д̇анд̇и взд̣̇ид̇аб̣б̣ам̣. яат̇аа ‘‘бхож̇анам̣ бхун̃ж̇ид̇аб̣б̣а’’нд̇и вуд̇д̇з ‘‘б̣яан̃ж̇анам̣ каад̣̇ид̇аб̣б̣а’’нд̇и авуд̇д̇амби вуд̇д̇амзва ход̇и д̇ад̣̇авинаабхаавад̇о, звам̣самбад̣̇амид̣̇ам̣ д̣̇адтаб̣б̣ам̣.
Tattha heṭṭhimā vā tayo vaggāti mahāvaggato heṭṭhimā sagāthakavaggo (saṃ. ni. 1.1 ādayo), nidānavaggo (saṃ. ni. 2.1 ādayo), khandhavaggoti (saṃ. ni. 3.1 ādiyo) ime tayo vaggā. Tikanipātato paṭṭhāya heṭṭhāti ekakanipātadukanipāte sandhāya vuttaṃ. Dhammapadampi saha vatthunā jātakabhāṇakena attano jātakena saddhiṃ uggahetabbaṃ. Tato oraṃ na vaṭṭatīti mahāpaccarivādassa adhippāyo. Tato tatoti dīghanikāyādito. Uccinitvā uggahitaṃ saddhammassa ṭhitiyā, bhikkhunopi pubbāparānusandhiādikusalatāya ca na hotīti ‘‘taṃ na vaṭṭatī’’ti paṭikkhittaṃ. Abhidhamme kiñci uggahetabbanti na vuttanti ettha yasmā vinaye kusalattikādivibhāgo, suttantesu samathavipassanāmaggo ca abhidhammapāṭhaṃ vinā na viññāyati, andhakāre paviṭṭhakālo viya hoti, tasmā suttavinayānaṃ gahaṇavasena abhidhammaggahaṇaṃ vuttamevāti visuṃ na vuttanti veditabbaṃ. Yathā ‘‘bhojanaṃ bhuñjitabba’’nti vutte ‘‘byañjanaṃ khāditabba’’nti avuttampi vuttameva hoti tadavinābhāvato, evaṃsampadamidaṃ daṭṭhabbaṃ.
бариман̣д̣алабад̣̇аб̣яан̃ж̇анааяаад̇и бариман̣д̣алаани барибун̣н̣аани бад̣̇зсу сит̇илад̇ханид̇аад̣̇иб̣яан̃ж̇анаани яассам̣, д̇ааяа. бурасса зсаад̇и борий, наг̇араваасийнам̣ гат̇аад̇и ад̇т̇о. анзлаг̇ал̣ааяаад̇и зд̇т̇а злаад̇и кзл̣ам̣ д̇аг̇г̇ал̣анавирахид̇ааяа. галяаан̣авааггаран̣од̇и зд̇т̇а ваажаа зва вааггаран̣ам̣, уд̣̇аахаран̣агхосо. галяаан̣ам̣ мад̇хурам̣ вааггаран̣амассаад̇и галяаан̣авааггаран̣о. убасамбаннааяа мзт̇унзнзва абхаб̣б̣о ход̇и, на сигкамаанаасааман̣зрийсууд̇и ааха ‘‘бхигкунияаа гааяасам̣саг̇г̇ам̣ ваа’’д̇иаад̣̇и.
Parimaṇḍalapadabyañjanāyāti parimaṇḍalāni paripuṇṇāni padesu sithiladhanitādibyañjanāni yassaṃ, tāya. Purassa esāti porī, nagaravāsīnaṃ kathāti attho. Anelagaḷāyāti ettha elāti kheḷaṃ taggaḷanavirahitāya. Kalyāṇavākkaraṇoti ettha vācā eva vākkaraṇaṃ, udāharaṇaghoso. Kalyāṇaṃ madhuraṃ vākkaraṇamassāti kalyāṇavākkaraṇo. Upasampannāya methuneneva abhabbo hoti, na sikkhamānāsāmaṇerīsūti āha ‘‘bhikkhuniyā kāyasaṃsaggaṃ vā’’tiādi.
148. г̇аругзхийд̇и г̇аругабхан̣д̣зхи. згад̇оубасамбаннааяаад̇и убаяог̇ад̇т̇з бхуммаважанам̣. бхигкуунам̣ санд̇игз убасамбаннаа наама баривад̇д̇алин̇г̇аа ваа бан̃жасад̇асаагияаанияо ваа. зд̇аа бана згад̇оубасамбаннаа овад̣̇анд̇асса баажид̇д̇ияамзва.
148.Garukehīti garukabhaṇḍehi. Ekatoupasampannāyāti upayogatthe bhummavacanaṃ. Bhikkhūnaṃ santike upasampannā nāma parivattaliṅgā vā pañcasatasākiyāniyo vā. Etā pana ekatoupasampannā ovadantassa pācittiyameva.
149. на ниманд̇ид̇аа худ̇ваа г̇анд̇угаамаад̇и ниманд̇ид̇аа худ̇ваа бхож̇анабарияосаанз г̇анд̇угаамаа на хонд̇и, д̇ад̇т̇зва васид̇угаамаа хонд̇ийд̇и ад̇т̇о. яад̇од̇и бхигкунубассаяад̇о. яаажид̇ваад̇и ‘‘д̇умхзхи аанийд̇аоваад̣̇знзва маяамби васиссаамаа’’д̇и яаажид̇ваа. д̇ад̇т̇аад̇и д̇асмим̣ бхигкунубассаяз. абхигкугааваасз вассам̣ васанд̇ияаа баажид̇д̇ияам̣, абаг̇ажчанд̇ияаа д̣̇уггадам̣.
149.Na nimantitā hutvā gantukāmāti nimantitā hutvā bhojanapariyosāne gantukāmā na honti, tattheva vasitukāmā hontīti attho. Yatoti bhikkhunupassayato. Yācitvāti ‘‘tumhehi ānītaovādeneva mayampi vasissāmā’’ti yācitvā. Tatthāti tasmiṃ bhikkhunupassaye. Abhikkhukāvāse vassaṃ vasantiyā pācittiyaṃ, apagacchantiyā dukkaṭaṃ.
имаасу гад̇араабад̇д̇и барихарид̇аб̣б̣аад̇и жод̣̇анам̣ барихаранд̇о ааха ‘‘саа рагкид̇аб̣б̣аа’’д̇и. саа вассаануг̇аманамуулигаа аабад̇д̇и рагкид̇аб̣б̣аа, ид̇арааяа анаабад̇д̇игааран̣ам̣ ад̇т̇ийд̇и ад̇хиббааяо. д̇знааха ‘‘аабад̣̇аасу хий’’д̇иаад̣̇и.
Imāsu katarāpatti pariharitabbāti codanaṃ pariharanto āha ‘‘sā rakkhitabbā’’ti. Sā vassānugamanamūlikā āpatti rakkhitabbā, itarāya anāpattikāraṇaṃ atthīti adhippāyo. Tenāha ‘‘āpadāsu hī’’tiādi.
оваад̣̇ад̇т̇ааяаад̇и оваад̣̇з яаажанад̇т̇ааяа. д̣̇вз д̇иссод̇и д̣̇вийхи д̇ийхи, гаран̣ад̇т̇з жзд̇ам̣ бажжад̇д̇аважанам̣. баасаад̣̇игзнаад̇и басаад̣̇аж̇анагзна гааяагаммаад̣̇инаа. самбаад̣̇зд̇ууд̇и д̇ивид̇хам̣ сигкам̣ самбаад̣̇зд̇у. асаммад̇ад̇аа, бхигкунияаа барибун̣н̣уубасамбаннад̇аа, оваад̣̇авасзна адтаг̇аруд̇хаммад̣̇аананд̇и имаанзд̇т̇а д̇ийн̣и ан̇г̇аани.
Ovādatthāyāti ovāde yācanatthāya. Dve tissoti dvīhi tīhi, karaṇatthe cetaṃ paccattavacanaṃ. Pāsādikenāti pasādajanakena kāyakammādinā. Sampādetūti tividhaṃ sikkhaṃ sampādetu. Asammatatā, bhikkhuniyā paripuṇṇūpasampannatā, ovādavasena aṭṭhagarudhammadānanti imānettha tīṇi aṅgāni.
оваад̣̇асигкаабад̣̇аван̣н̣анаа нидтид̇аа.
Ovādasikkhāpadavaṇṇanā niṭṭhitā.
Related texts:
д̇ибидага (муула) • Tipiṭaka (Mūla) / винаяабидага • Vinayapiṭaka / махаавибхан̇г̇а • Mahāvibhaṅga / 3. оваад̣̇аваг̇г̇о • 3. Ovādavaggo
адтагат̇аа • Aṭṭhakathā / винаяабидага (адтагат̇аа) • Vinayapiṭaka (aṭṭhakathā) / махаавибхан̇г̇а-адтагат̇аа • Mahāvibhaṅga-aṭṭhakathā / 1. оваад̣̇асигкаабад̣̇аван̣н̣анаа • 1. Ovādasikkhāpadavaṇṇanā
дийгаа • Tīkā / винаяабидага (дийгаа) • Vinayapiṭaka (ṭīkā) / саарад̇т̇ад̣̇ийбаний-дийгаа • Sāratthadīpanī-ṭīkā / 1. оваад̣̇асигкаабад̣̇аван̣н̣анаа • 1. Ovādasikkhāpadavaṇṇanā
дийгаа • Tīkā / винаяабидага (дийгаа) • Vinayapiṭaka (ṭīkā) / важ̇ираб̣уд̣̇д̇хи-дийгаа • Vajirabuddhi-ṭīkā / 1. оваад̣̇асигкаабад̣̇аван̣н̣анаа • 1. Ovādasikkhāpadavaṇṇanā
дийгаа • Tīkā / винаяабидага (дийгаа) • Vinayapiṭaka (ṭīkā) / баажид̇яаад̣̇ияож̇анаабаал̣и • Pācityādiyojanāpāḷi / 1. оваад̣̇асигкаабад̣̇а-ад̇т̇аяож̇анаа • 1. Ovādasikkhāpada-atthayojanā
