| Library / Tipiṭaka / තිපිටක • Tipiṭaka / අඞ්‌ගුත්‌තරනිකාය • Aṅguttaranikāya |
2. ඔවාදසුත්‌තං
2. Ovādasuttaṃ
52. එකං සමයං භගවා වෙසාලියං විහරති මහාවනෙ කූටාගාරසාලායං. අථ ඛො ආයස්‌මා ආනන්‌දො යෙන භගවා තෙනුපසඞ්‌කමි; උපසඞ්‌කමිත්‌වා භගවන්‌තං අභිවාදෙත්‌වා එකමන්‌තං නිසීදි. එකමන්‌තං නිසින්‌නො ඛො ආයස්‌මා ආනන්‌දො භගවන්‌තං එතදවොච – ‘‘කතිහි නු ඛො, භන්‌තෙ, ධම්‌මෙහි සමන්‌නාගතො භික්‌ඛු භික්‌ඛුනොවාදකො සම්‌මන්‌නිතබ්‌බො’’ති?
52. Ekaṃ samayaṃ bhagavā vesāliyaṃ viharati mahāvane kūṭāgārasālāyaṃ. Atha kho āyasmā ānando yena bhagavā tenupasaṅkami; upasaṅkamitvā bhagavantaṃ abhivādetvā ekamantaṃ nisīdi. Ekamantaṃ nisinno kho āyasmā ānando bhagavantaṃ etadavoca – ‘‘katihi nu kho, bhante, dhammehi samannāgato bhikkhu bhikkhunovādako sammannitabbo’’ti?
1 ‘‘අට්‌ඨහි ඛො, ආනන්‌ද, ධම්‌මෙහි සමන්‌නාගතො භික්‌ඛු භික්‌ඛුනොවාදකො සම්‌මන්‌නිතබ්‌බො. කතමෙහි අට්‌ඨහි? ඉධානන්‌ද, භික්‌ඛු සීලවා හොති…පෙ.… සමාදාය සික්‌ඛති සික්‌ඛාපදෙසු; බහුස්‌සුතො හොති…පෙ.… දිට්‌ඨියා සුප්‌පටිවිද්‌ධා; උභයානි ඛො පනස්‌ස පාතිමොක්‌ඛානි විත්‌ථාරෙන ස්‌වාගතානි හොන්‌ති සුවිභත්‌තානි සුප්‌පවත්‌තීනි සුවිනිච්‌ඡිතානි සුත්‌තසො අනුබ්‍යඤ්‌ජනසො; කල්‍යාණවාචො හොති කල්‍යාණවාක්‌කරණො, පොරියා වාචාය සමන්‌නාගතො විස්‌සට්‌ඨාය 2 අනෙලගළාය 3 අත්‌ථස්‌ස විඤ්‌ඤාපනියා; පටිබලො හොති භික්‌ඛුනිසඞ්‌ඝස්‌ස ධම්‌මියා කථාය සන්‌දස්‌සෙතුං සමාදපෙතුං සමුත්‌තෙජෙතුං සම්‌පහංසෙතුං; යෙභුය්‍යෙන භික්‌ඛුනීනං පියො හොති මනාපො; න ඛො පනෙතං භගවන්‌තං උද්‌දිස්‌ස පබ්‌බජිතාය කාසායවත්‌ථනිවසනාය ගරුධම්‌මං අජ්‌ඣාපන්‌නපුබ්‌බො හොති; වීසතිවස්‌සො වා හොති අතිරෙකවීසතිවස්‌සො වා. ඉමෙහි ඛො, ආනන්‌ද, අට්‌ඨහි ධම්‌මෙහි සමන්‌නාගතො භික්‌ඛු භික්‌ඛුනොවාදකො සම්‌මන්‌නිතබ්‌බො’’ති. දුතියං.
4 ‘‘Aṭṭhahi kho, ānanda, dhammehi samannāgato bhikkhu bhikkhunovādako sammannitabbo. Katamehi aṭṭhahi? Idhānanda, bhikkhu sīlavā hoti…pe… samādāya sikkhati sikkhāpadesu; bahussuto hoti…pe… diṭṭhiyā suppaṭividdhā; ubhayāni kho panassa pātimokkhāni vitthārena svāgatāni honti suvibhattāni suppavattīni suvinicchitāni suttaso anubyañjanaso; kalyāṇavāco hoti kalyāṇavākkaraṇo, poriyā vācāya samannāgato vissaṭṭhāya 5 anelagaḷāya 6 atthassa viññāpaniyā; paṭibalo hoti bhikkhunisaṅghassa dhammiyā kathāya sandassetuṃ samādapetuṃ samuttejetuṃ sampahaṃsetuṃ; yebhuyyena bhikkhunīnaṃ piyo hoti manāpo; na kho panetaṃ bhagavantaṃ uddissa pabbajitāya kāsāyavatthanivasanāya garudhammaṃ ajjhāpannapubbo hoti; vīsativasso vā hoti atirekavīsativasso vā. Imehi kho, ānanda, aṭṭhahi dhammehi samannāgato bhikkhu bhikkhunovādako sammannitabbo’’ti. Dutiyaṃ.
Footnotes:
Related texts:
අට්‌ඨකථා • Aṭṭhakathā / සුත්‌තපිටක (අට්‌ඨකථා) • Suttapiṭaka (aṭṭhakathā) / අඞ්‌ගුත්‌තරනිකාය (අට්‌ඨකථා) • Aṅguttaranikāya (aṭṭhakathā) / 2. ඔවාදසුත්‌තවණ්‌ණනා • 2. Ovādasuttavaṇṇanā
ටීකා • Tīkā / සුත්‌තපිටක (ටීකා) • Suttapiṭaka (ṭīkā) / අඞ්‌ගුත්‌තරනිකාය (ටීකා) • Aṅguttaranikāya (ṭīkā) / 1-3. ගොතමීසුත්‌තාදිවණ්‌ණනා • 1-3. Gotamīsuttādivaṇṇanā
