| Library / Tipiṭaka / திபிடக • Tipiṭaka / ஸங்யுத்தனிகாய (அட்ட²கதா²) • Saṃyuttanikāya (aṭṭhakathā) |
6. ஓவாத³ஸுத்தவண்ணனா
6. Ovādasuttavaṇṇanā
149. ச²ட்டே² அஹங் வாதி கஸ்மா ஆஹ? தே²ரங் அத்தனோ டா²னே ட²பனத்த²ங். கிங் ஸாரிபுத்தமொக்³க³ல்லானா நத்தீ²தி? அத்தி². ஏவங் பனஸ்ஸ அஹோஸி ‘‘இமே ந சிரங் ட²ஸ்ஸந்தி, கஸ்ஸபோ பன வீஸவஸ்ஸஸதாயுகோ, ஸோ மயி பரினிப்³பு³தே ஸத்தபண்ணிகு³ஹாயங் நிஸீதி³த்வா த⁴ம்மவினயஸங்க³ஹங் கத்வா மம ஸாஸனங் பஞ்சவஸ்ஸஸஹஸ்ஸபரிமாணகாலபவத்தனகங் கரிஸ்ஸதி, அத்தனோ தங் டா²னே ட²பேமி, ஏவங் பி⁴க்கூ² கஸ்ஸபஸ்ஸ ஸுஸ்ஸூஸிதப்³ப³ங் மஞ்ஞிஸ்ஸந்தீ’’தி. தஸ்மா ஏவமாஹ. து³ப்³ப³சாதி து³க்கே²ன வத்தப்³பா³. தோ³வசஸ்ஸகரணேஹீதி து³ப்³ப³சபா⁴வகரணேஹி. அப்பத³க்கி²ணக்³கா³ஹினோதி அனுஸாஸனிங் ஸுத்வா பத³க்கி²ணங் ந க³ண்ஹந்தி யதா²னுஸிட்ட²ங் ந படிபஜ்ஜந்தி, அப்படிபஜ்ஜந்தா வாமகா³ஹினோ நாம ஜாதாதி த³ஸ்ஸேதி. அச்சாவத³ந்தேதி அதிக்கம்ம வத³ந்தே, ஸுதபரியத்திங் நிஸ்ஸாய அதிவிய வாத³ங் கரொந்தேதி அத்தோ². கோ ப³ஹுதரங் பா⁴ஸிஸ்ஸதீதி த⁴ம்மங் கதெ²ந்தோ கோ ப³ஹுங் பா⁴ஸிஸ்ஸதி, கிங் த்வங், உதா³ஹு அஹந்தி? கோ ஸுந்த³ரதரந்தி, ஏகோ ப³ஹுங் பா⁴ஸந்தோ அஸஹிதங் அமது⁴ரங் பா⁴ஸதி, ஏகோ ஸஹிதங் மது⁴ரங், தங் ஸந்தா⁴யாஹ ‘‘கோ ஸுந்த³ரதர’’ந்தி? ஏகோ பன ப³ஹுஞ்ச ஸுந்த³ரஞ்ச கதெ²ந்தோ சிரங் ந பா⁴ஸதி, லஹுஞ்ஞேவ உட்டா²தி, ஏகோ அத்³தா⁴னங் பாபேதி, தங் ஸந்தா⁴யாஹ ‘‘கோ சிரதர’’ந்தி? ச²ட்ட²ங்.
149. Chaṭṭhe ahaṃ vāti kasmā āha? Theraṃ attano ṭhāne ṭhapanatthaṃ. Kiṃ sāriputtamoggallānā natthīti? Atthi. Evaṃ panassa ahosi ‘‘ime na ciraṃ ṭhassanti, kassapo pana vīsavassasatāyuko, so mayi parinibbute sattapaṇṇiguhāyaṃ nisīditvā dhammavinayasaṅgahaṃ katvā mama sāsanaṃ pañcavassasahassaparimāṇakālapavattanakaṃ karissati, attano taṃ ṭhāne ṭhapemi, evaṃ bhikkhū kassapassa sussūsitabbaṃ maññissantī’’ti. Tasmā evamāha. Dubbacāti dukkhena vattabbā. Dovacassakaraṇehīti dubbacabhāvakaraṇehi. Appadakkhiṇaggāhinoti anusāsaniṃ sutvā padakkhiṇaṃ na gaṇhanti yathānusiṭṭhaṃ na paṭipajjanti, appaṭipajjantā vāmagāhino nāma jātāti dasseti. Accāvadanteti atikkamma vadante, sutapariyattiṃ nissāya ativiya vādaṃ karonteti attho. Ko bahutaraṃ bhāsissatīti dhammaṃ kathento ko bahuṃ bhāsissati, kiṃ tvaṃ, udāhu ahanti? Ko sundarataranti, eko bahuṃ bhāsanto asahitaṃ amadhuraṃ bhāsati, eko sahitaṃ madhuraṃ, taṃ sandhāyāha ‘‘ko sundaratara’’nti? Eko pana bahuñca sundarañca kathento ciraṃ na bhāsati, lahuññeva uṭṭhāti, eko addhānaṃ pāpeti, taṃ sandhāyāha ‘‘ko ciratara’’nti? Chaṭṭhaṃ.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / ஸங்யுத்தனிகாய • Saṃyuttanikāya / 6. ஓவாத³ஸுத்தங் • 6. Ovādasuttaṃ
டீகா • Tīkā / ஸுத்தபிடக (டீகா) • Suttapiṭaka (ṭīkā) / ஸங்யுத்தனிகாய (டீகா) • Saṃyuttanikāya (ṭīkā) / 6. ஓவாத³ஸுத்தவண்ணனா • 6. Ovādasuttavaṇṇanā
