| Library / Tipiṭaka / ติปิฎก • Tipiṭaka / สํยุตฺตนิกาย (ฎีกา) • Saṃyuttanikāya (ṭīkā) |
๖. โอวาทสุตฺตวณฺณนา
6. Ovādasuttavaṇṇanā
๑๔๙. อตฺตโน ฐาเนติ สพฺรหฺมจารีนํ โอวาทกวิญฺญาปกภาเวน อตฺตโน มหาสาวกฎฺฐาเน ฐปนตฺถํฯ อถ วา ยสฺมา ‘‘อหํ ทานิ น จิรํ ฐสฺสามิ, ตถา สาริปุตฺตโมคฺคลฺลานา, อยํ ปน วีสํวสฺสตายุโก, โอวทโนฺต อนุสาสโนฺต มมจฺจเยน ภิกฺขูนํ มยา กาตพฺพกิจฺจํ กริสฺสตี’’ติ อธิปฺปาเยน ภควา อิมํ เทสนํ อารภิฯ ตสฺมา อตฺตโน ฐาเนติ สตฺถารา กาตพฺพโอวาททายกฎฺฐาเนฯ เตนาห ‘‘เอวํ ปนสฺสา’’ติอาทิฯ ยถาห ภควา ‘‘โอวท, กสฺสป…เป.… ตฺวํ วา’’ติฯ ทุเกฺขน วตฺตพฺพา อปฺปทกฺขิณคฺคาหิภาวโตฯ ทุพฺพจภาวกรเณหีติ โกธูปนาหาทีหิฯ อนุสาสนิยา ปทกฺขิณคฺคหณํ นาม อนุธมฺมจรณํ, ฉินฺนปฎิปตฺติ กตา วามคฺคาโห นามาติ อาห ‘‘อนุสาสนิ’’นฺติอาทิฯ อติกฺกมฺม วทเนฺตติ อญฺญมญฺญํ อติกฺกมิตฺวา อติมญฺญิตฺวา วทเนฺตฯ พหุํ ภาสิสฺสตีติ ธมฺมํ กเถโนฺต โก วิปุลํ กตฺวา กเถสฺสติฯ อสหิตนฺติ ปุเพฺพนาปรํ นสหิตํ เหตุปมาวิรหิตํฯ อมธุรนฺติ น มธุรํ น กณฺณสุขํ น เปมนียํฯ ลหุเญฺญว อุฎฺฐาติ อปฺปวตฺตเนน กูลฎฺฐานํ วิย ตสฺส กถนํฯ
149.Attano ṭhāneti sabrahmacārīnaṃ ovādakaviññāpakabhāvena attano mahāsāvakaṭṭhāne ṭhapanatthaṃ. Atha vā yasmā ‘‘ahaṃ dāni na ciraṃ ṭhassāmi, tathā sāriputtamoggallānā, ayaṃ pana vīsaṃvassatāyuko, ovadanto anusāsanto mamaccayena bhikkhūnaṃ mayā kātabbakiccaṃ karissatī’’ti adhippāyena bhagavā imaṃ desanaṃ ārabhi. Tasmā attano ṭhāneti satthārā kātabbaovādadāyakaṭṭhāne. Tenāha ‘‘evaṃ panassā’’tiādi. Yathāha bhagavā ‘‘ovada, kassapa…pe… tvaṃ vā’’ti. Dukkhena vattabbā appadakkhiṇaggāhibhāvato. Dubbacabhāvakaraṇehīti kodhūpanāhādīhi. Anusāsaniyā padakkhiṇaggahaṇaṃ nāma anudhammacaraṇaṃ, chinnapaṭipatti katā vāmaggāho nāmāti āha ‘‘anusāsani’’ntiādi. Atikkamma vadanteti aññamaññaṃ atikkamitvā atimaññitvā vadante. Bahuṃ bhāsissatīti dhammaṃ kathento ko vipulaṃ katvā kathessati. Asahitanti pubbenāparaṃ nasahitaṃ hetupamāvirahitaṃ. Amadhuranti na madhuraṃ na kaṇṇasukhaṃ na pemanīyaṃ. Lahuññeva uṭṭhāti appavattanena kūlaṭṭhānaṃ viya tassa kathanaṃ.
โอวาทสุตฺตวณฺณนา นิฎฺฐิตาฯ
Ovādasuttavaṇṇanā niṭṭhitā.
Related texts:
ติปิฎก (มูล) • Tipiṭaka (Mūla) / สุตฺตปิฎก • Suttapiṭaka / สํยุตฺตนิกาย • Saṃyuttanikāya / ๖. โอวาทสุตฺตํ • 6. Ovādasuttaṃ
อฎฺฐกถา • Aṭṭhakathā / สุตฺตปิฎก (อฎฺฐกถา) • Suttapiṭaka (aṭṭhakathā) / สํยุตฺตนิกาย (อฎฺฐกถา) • Saṃyuttanikāya (aṭṭhakathā) / ๖. โอวาทสุตฺตวณฺณนา • 6. Ovādasuttavaṇṇanā
