| Library / Tipiṭaka / তিপিটক • Tipiṭaka / দ্ৰেমাতিকাপাল়ি • Dvemātikāpāḷi |
৩. ওৰাদৰগ্গো
3. Ovādavaggo
১. ওৰাদসিক্খাপদৰণ্ণনা
1. Ovādasikkhāpadavaṇṇanā
ওৰাদৰগ্গস্স পঠমে অসম্মতোতি যা অট্ঠঙ্গসমন্নাগতস্স ভিক্খুনো ভগৰতা ঞত্তিচতুত্থেন কম্মেন (পাচি॰ ১৪৬) ভিক্খুনোৰাদকসম্মুতি অনুঞ্ঞাতা, তায অসম্মতো। ওৰদেয্যাতি ভিক্খুনিসঙ্ঘং ৰা সম্বহুলা ৰা একং ভিক্খুনিং ৰা ‘‘ৰস্সসতূপসম্পন্নায ভিক্খুনিযা তদহুপসম্পন্নস্স ভিক্খুনো অভিৰাদনং পচ্চুট্ঠানং অঞ্জলিকম্মং সামীচিকম্মং কাতব্ব’’ন্তি আদিকে (চূল়ৰ॰ ৪০৩) অট্ঠ গরুধম্মে ওৰাদৰসেন ওসারেন্তো ওৰদেয্য। পাচিত্তিযন্তি ওৰাদপরিযোসানে পাচিত্তিযং।
Ovādavaggassa paṭhame asammatoti yā aṭṭhaṅgasamannāgatassa bhikkhuno bhagavatā ñatticatutthena kammena (pāci. 146) bhikkhunovādakasammuti anuññātā, tāya asammato. Ovadeyyāti bhikkhunisaṅghaṃ vā sambahulā vā ekaṃ bhikkhuniṃ vā ‘‘vassasatūpasampannāya bhikkhuniyā tadahupasampannassa bhikkhuno abhivādanaṃ paccuṭṭhānaṃ añjalikammaṃ sāmīcikammaṃ kātabba’’nti ādike (cūḷava. 403) aṭṭha garudhamme ovādavasena osārento ovadeyya. Pācittiyanti ovādapariyosāne pācittiyaṃ.
সাৰত্থিযং ছব্বগ্গিযে ভিক্খূ আরব্ভ ওৰদনৰত্থুস্মিং পঞ্ঞত্তং, অসাধারণপঞ্ঞত্তি, অনাণত্তিকং, অঞ্ঞেন ৰা ধম্মেন ভিক্খুনীসু উপসম্পন্নমত্তং ৰা ওৰদতো দুক্কটং। সম্মতস্সাপি তঞ্চে সম্মুতিকম্মং অধম্মকম্মং হোতি, তস্মিং অধম্মকম্মে অধম্মকম্মসঞ্ঞিনো ৰগ্গে ভিক্খুনিসঙ্ঘে ওৰদতো তিকপাচিত্তিযং, তথা ৰেমতিকস্স ধম্মকম্মসঞ্ঞিনো চাতি নৰ পাচিত্তিযানি, সমগ্গেপি ভিক্খুনিসঙ্ঘেন ৰাতি অধম্মকম্মৰসেন অট্ঠারস। সচে পন তং ধম্মকম্মং হোতি, ‘‘ধম্মকম্মে ধম্মকম্মসঞ্ঞী সমগ্গং ভিক্খুনিসঙ্ঘং সমগ্গসঞ্ঞী ওৰদতী’’তি (পাচি॰ ১৫১) ইদং অৰসানপদং ঠপেত্ৰা তেনেৰ নযেন সত্তরস দুক্কটানি, ‘‘সমগ্গম্হায্যা’’তি চ ৰুত্তে অঞ্ঞং ধম্মং, ‘‘ৰগ্গম্হায্যা’’তি চ ৰুত্তে অট্ঠ গরুধম্মে ভণন্তস্স, ওৰাদঞ্চ অনিয্যাতেত্ৰা অঞ্ঞং ধম্মং ভণন্তস্স দুক্কটমেৰ। যো পন ধম্মকম্মে ধম্মকম্মসঞ্ঞী সমগ্গং ভিক্খুনিসঙ্ঘং সমগ্গসঞ্ঞী ওৰদতি, গরুধম্মপাল়িং উদ্দেসং দেতি, পরিপুচ্ছং দেতি, ‘‘ওসারেহি অয্যা’’তি ৰুচ্চমানো ওসারেতি, পঞ্হং পুট্ঠো কথেতি, ভিক্খুনীনং সুণমানানং অঞ্ঞস্সত্থায ভণতি, সিক্খমানায ৰা সামণেরিযা ৰা ভণতি, তস্স, উম্মত্তকাদীনঞ্চ অনাপত্তি। অসম্মততা, ভিক্খুনিযা পরিপুণ্ণূপসম্পন্নতা, ওৰাদৰসেন অট্ঠগরুধম্মভণনন্তি ইমানেত্থ তীণি অঙ্গানি। সমুট্ঠানাদীনি পদসোধম্মসদিসানেৰাতি।
Sāvatthiyaṃ chabbaggiye bhikkhū ārabbha ovadanavatthusmiṃ paññattaṃ, asādhāraṇapaññatti, anāṇattikaṃ, aññena vā dhammena bhikkhunīsu upasampannamattaṃ vā ovadato dukkaṭaṃ. Sammatassāpi tañce sammutikammaṃ adhammakammaṃ hoti, tasmiṃ adhammakamme adhammakammasaññino vagge bhikkhunisaṅghe ovadato tikapācittiyaṃ, tathā vematikassa dhammakammasaññino cāti nava pācittiyāni, samaggepi bhikkhunisaṅghena vāti adhammakammavasena aṭṭhārasa. Sace pana taṃ dhammakammaṃ hoti, ‘‘dhammakamme dhammakammasaññī samaggaṃ bhikkhunisaṅghaṃ samaggasaññī ovadatī’’ti (pāci. 151) idaṃ avasānapadaṃ ṭhapetvā teneva nayena sattarasa dukkaṭāni, ‘‘samaggamhāyyā’’ti ca vutte aññaṃ dhammaṃ, ‘‘vaggamhāyyā’’ti ca vutte aṭṭha garudhamme bhaṇantassa, ovādañca aniyyātetvā aññaṃ dhammaṃ bhaṇantassa dukkaṭameva. Yo pana dhammakamme dhammakammasaññī samaggaṃ bhikkhunisaṅghaṃ samaggasaññī ovadati, garudhammapāḷiṃ uddesaṃ deti, paripucchaṃ deti, ‘‘osārehi ayyā’’ti vuccamāno osāreti, pañhaṃ puṭṭho katheti, bhikkhunīnaṃ suṇamānānaṃ aññassatthāya bhaṇati, sikkhamānāya vā sāmaṇeriyā vā bhaṇati, tassa, ummattakādīnañca anāpatti. Asammatatā, bhikkhuniyā paripuṇṇūpasampannatā, ovādavasena aṭṭhagarudhammabhaṇananti imānettha tīṇi aṅgāni. Samuṭṭhānādīni padasodhammasadisānevāti.
ওৰাদসিক্খাপদৰণ্ণনা নিট্ঠিতা।
Ovādasikkhāpadavaṇṇanā niṭṭhitā.
২. অত্থঙ্গতসিক্খাপদৰণ্ণনা
2. Atthaṅgatasikkhāpadavaṇṇanā
দুতিযে ওৰদেয্যাতি অট্ঠগরুধম্মেহি ৰা অঞ্ঞেন ৰা ধম্মেন ওৰদন্তস্স সম্মতস্সাপি পাচিত্তিযমেৰ।
Dutiye ovadeyyāti aṭṭhagarudhammehi vā aññena vā dhammena ovadantassa sammatassāpi pācittiyameva.
সাৰত্থিযং আযস্মন্তং চূল়পন্থকং আরব্ভ অত্থঙ্গতে সূরিযে ওৰদনৰত্থুস্মিং পঞ্ঞত্তং, অসাধারণপঞ্ঞত্তি, অনাণত্তিকং, তিকপাচিত্তিযং, সূরিযে অত্থঙ্গতে অত্থঙ্গতসঞ্ঞিনো ৰেমতিকস্স ৰা, একতোউপসম্পন্নং ওৰদন্তস্স চ দুক্কটং। পুরিমসিক্খাপদে ৰিয উদ্দেসাদিনযেন অনাপত্তি। অত্থঙ্গতসূরিযতা, পরিপুণ্ণূপসম্পন্নতা, ওৰদনন্তি ইমানেত্থ তীণি অঙ্গানি। সমুট্ঠানাদীনি পদসোধম্মসদিসানেৰাতি।
Sāvatthiyaṃ āyasmantaṃ cūḷapanthakaṃ ārabbha atthaṅgate sūriye ovadanavatthusmiṃ paññattaṃ, asādhāraṇapaññatti, anāṇattikaṃ, tikapācittiyaṃ, sūriye atthaṅgate atthaṅgatasaññino vematikassa vā, ekatoupasampannaṃ ovadantassa ca dukkaṭaṃ. Purimasikkhāpade viya uddesādinayena anāpatti. Atthaṅgatasūriyatā, paripuṇṇūpasampannatā, ovadananti imānettha tīṇi aṅgāni. Samuṭṭhānādīni padasodhammasadisānevāti.
অত্থঙ্গতসিক্খাপদৰণ্ণনা নিট্ঠিতা।
Atthaṅgatasikkhāpadavaṇṇanā niṭṭhitā.
৩. ভিক্খুনুপস্সযসিক্খাপদৰণ্ণনা
3. Bhikkhunupassayasikkhāpadavaṇṇanā
ততিযে ভিক্খুনুপস্সযন্তি ভিক্খুনিযা একরত্তং ৰসনট্ঠানম্পি। ওৰদেয্যাতি ইধ গরুধম্মেহি ওৰদন্তস্সেৰ পাচিত্তিযং। সচে পন অসম্মতো হোতি, দ্ৰে পাচিত্তিযানি। সচে পন সূরিযেপি অত্থঙ্গতে ওৰদতি, তীণি হোন্তি। সম্মতস্স পন রত্তিং ওৰদন্তস্সপি দ্ৰে এৰ হোন্তি। সম্মতত্তা হি ভিক্খুস্স গরুধম্মোৰাদমূলকং পাচিত্তিযং নত্থি। গিলানাতি ন সক্কোতি ওৰাদায ৰা সংৰাসায ৰা গন্তুং।
Tatiye bhikkhunupassayanti bhikkhuniyā ekarattaṃ vasanaṭṭhānampi. Ovadeyyāti idha garudhammehi ovadantasseva pācittiyaṃ. Sace pana asammato hoti, dve pācittiyāni. Sace pana sūriyepi atthaṅgate ovadati, tīṇi honti. Sammatassa pana rattiṃ ovadantassapi dve eva honti. Sammatattā hi bhikkhussa garudhammovādamūlakaṃ pācittiyaṃ natthi. Gilānāti na sakkoti ovādāya vā saṃvāsāya vā gantuṃ.
সক্কেসু ছব্বগ্গিযে ভিক্খূ আরব্ভ ভিক্খুনুপস্সযং উপসঙ্কমিত্ৰা ওৰদনৰত্থুস্মিং পঞ্ঞত্তং, ‘‘অঞ্ঞত্র সমযা’’তি অযমেত্থ অনুপঞ্ঞত্তি, অসাধারণপঞ্ঞত্তি, অনাণত্তিকং, তিকপাচিত্তিযং, অনুপসম্পন্নায উপসম্পন্নসঞ্ঞিনো ৰেমতিকস্স ৰা, একতোউপসম্পন্নং যেন কেনচি, ইতরং অঞ্ঞেন ধম্মেন ওৰদন্তস্স চ দুক্কটং। সমযে, অনুপসম্পন্নায, পুরিমসিক্খাপদে ৰিয উদ্দেসাদিনযেন চ অনাপত্তি। উপস্সযূপগমনং, পরিপুণ্ণূপসম্পন্নতা, সমযাভাৰো, গরুধম্মেহি ওৰদনন্তি ইমানেত্থ চত্তারি অঙ্গানি। সমুট্ঠানাদীনি পঠমকথিনসদিসানি, ইদং পন কিরিযং হোতীতি।
Sakkesu chabbaggiye bhikkhū ārabbha bhikkhunupassayaṃ upasaṅkamitvā ovadanavatthusmiṃ paññattaṃ, ‘‘aññatra samayā’’ti ayamettha anupaññatti, asādhāraṇapaññatti, anāṇattikaṃ, tikapācittiyaṃ, anupasampannāya upasampannasaññino vematikassa vā, ekatoupasampannaṃ yena kenaci, itaraṃ aññena dhammena ovadantassa ca dukkaṭaṃ. Samaye, anupasampannāya, purimasikkhāpade viya uddesādinayena ca anāpatti. Upassayūpagamanaṃ, paripuṇṇūpasampannatā, samayābhāvo, garudhammehi ovadananti imānettha cattāri aṅgāni. Samuṭṭhānādīni paṭhamakathinasadisāni, idaṃ pana kiriyaṃ hotīti.
ভিক্খুনুপস্সযসিক্খাপদৰণ্ণনা নিট্ঠিতা।
Bhikkhunupassayasikkhāpadavaṇṇanā niṭṭhitā.
৪. আমিসসিক্খাপদৰণ্ণনা
4. Āmisasikkhāpadavaṇṇanā
চতুত্থে আমিসহেতূতি চীৰরাদীনং অঞ্ঞতরহেতু। ভিক্খূতি সম্মতা ভিক্খূ ইধাধিপ্পেতা। পাচিত্তিযন্তি এৰরূপে ভিক্খূ অৰণ্ণকামতায এৰং ভণন্তস্স পাচিত্তিযং।
Catutthe āmisahetūti cīvarādīnaṃ aññatarahetu. Bhikkhūti sammatā bhikkhū idhādhippetā. Pācittiyanti evarūpe bhikkhū avaṇṇakāmatāya evaṃ bhaṇantassa pācittiyaṃ.
সাৰত্থিযং ছব্বগ্গিযে ভিক্খূ আরব্ভ ‘‘আমিসহেতু ওৰদন্তী’’তি ভণনৰত্থুস্মিং পঞ্ঞত্তং, অসাধারণপঞ্ঞত্তি, অনাণত্তিকং, ধম্মকম্মে তিকপাচিত্তিযং, অধম্মকম্মে তিকদুক্কটং, অসম্মতং উপসম্পন্নঞ্চ, অনুপসম্পন্নঞ্চ সম্মতং ৰা অসম্মতং ৰা এৰং ভণন্তস্স দুক্কটমেৰ। তত্থ যো ভিক্খু কালে সম্মুতিং লভিত্ৰা সামণেরভূমিযং সণ্ঠিতো, অযং সম্মতো নাম অনুপসম্পন্নো। পকতিযা চীৰরাদিহেতু ওৰদন্তং পন এৰং ভণন্তস্স , উম্মত্তকাদীনঞ্চ অনাপত্তি। উপসম্পন্নতা, ধম্মেন লদ্ধসম্মুতিতা, অনামিসন্তরতা, অৰণ্ণকামতায এৰং ভণনন্তি ইমানেত্থ চত্তারি অঙ্গানি। সমুট্ঠানাদীনি অদিন্নাদানসদিসানি, ইদং পন দুক্খৰেদনমেৰাতি।
Sāvatthiyaṃ chabbaggiye bhikkhū ārabbha ‘‘āmisahetu ovadantī’’ti bhaṇanavatthusmiṃ paññattaṃ, asādhāraṇapaññatti, anāṇattikaṃ, dhammakamme tikapācittiyaṃ, adhammakamme tikadukkaṭaṃ, asammataṃ upasampannañca, anupasampannañca sammataṃ vā asammataṃ vā evaṃ bhaṇantassa dukkaṭameva. Tattha yo bhikkhu kāle sammutiṃ labhitvā sāmaṇerabhūmiyaṃ saṇṭhito, ayaṃ sammato nāma anupasampanno. Pakatiyā cīvarādihetu ovadantaṃ pana evaṃ bhaṇantassa , ummattakādīnañca anāpatti. Upasampannatā, dhammena laddhasammutitā, anāmisantaratā, avaṇṇakāmatāya evaṃ bhaṇananti imānettha cattāri aṅgāni. Samuṭṭhānādīni adinnādānasadisāni, idaṃ pana dukkhavedanamevāti.
আমিসসিক্খাপদৰণ্ণনা নিট্ঠিতা।
Āmisasikkhāpadavaṇṇanā niṭṭhitā.
৫. চীৰরদানসিক্খাপদৰণ্ণনা
5. Cīvaradānasikkhāpadavaṇṇanā
পঞ্চমে সাৰত্থিযং অঞ্ঞতরং ভিক্খুং আরব্ভ চীৰরদানৰত্থুস্মিং পঞ্ঞত্তং, সেসকথামগ্গো পনেত্থ চীৰরপ্পটিগ্গহণসিক্খাপদে ৰুত্তনযেনেৰ ৰেদিতব্বো। তত্র হি ভিক্খু পটিগ্গাহকো, ইধ ভিক্খুনী, অযং ৰিসেসো, সেসং তাদিসমেৰাতি।
Pañcame sāvatthiyaṃ aññataraṃ bhikkhuṃ ārabbha cīvaradānavatthusmiṃ paññattaṃ, sesakathāmaggo panettha cīvarappaṭiggahaṇasikkhāpade vuttanayeneva veditabbo. Tatra hi bhikkhu paṭiggāhako, idha bhikkhunī, ayaṃ viseso, sesaṃ tādisamevāti.
চীৰরদানসিক্খাপদৰণ্ণনা নিট্ঠিতা।
Cīvaradānasikkhāpadavaṇṇanā niṭṭhitā.
৬. চীৰরসিব্বনসিক্খাপদৰণ্ণনা
6. Cīvarasibbanasikkhāpadavaṇṇanā
ছট্ঠে চীৰরন্তি নিৰাসনপারুপনুপগং। সিব্বেয্য ৰা সিব্বাপেয্যা ৰাতি এত্থ সযং সিব্বন্তস্স সূচিং পৰেসেত্ৰা পৰেসেত্ৰা নীহরণে পাচিত্তিযং, সতক্খত্তুম্পি ৰিজ্ঝিত্ৰা সকিং নীহরন্তস্স একমেৰ পাচিত্তিযং। ‘সিব্বা’তি ৰুত্তো পন সচেপি সব্বং সূচিকম্মং নিট্ঠাপেতি, আণাপকস্স একমেৰ পাচিত্তিযং। অথ ‘‘যং এত্থ চীৰরে কত্তব্বং, সব্বং তং তৰ ভারো’’তি ৰুত্তো নিট্ঠাপেতি, তস্স আরাপথে আরাপথে পাচিত্তিযং। আণাপকস্স একৰাচায সম্বহুলানিপি, পুনপ্পুনং আণত্তিযং পন ৰত্তব্বমেৰ নত্থি।
Chaṭṭhe cīvaranti nivāsanapārupanupagaṃ. Sibbeyya vā sibbāpeyyā vāti ettha sayaṃ sibbantassa sūciṃ pavesetvā pavesetvā nīharaṇe pācittiyaṃ, satakkhattumpi vijjhitvā sakiṃ nīharantassa ekameva pācittiyaṃ. ‘Sibbā’ti vutto pana sacepi sabbaṃ sūcikammaṃ niṭṭhāpeti, āṇāpakassa ekameva pācittiyaṃ. Atha ‘‘yaṃ ettha cīvare kattabbaṃ, sabbaṃ taṃ tava bhāro’’ti vutto niṭṭhāpeti, tassa ārāpathe ārāpathe pācittiyaṃ. Āṇāpakassa ekavācāya sambahulānipi, punappunaṃ āṇattiyaṃ pana vattabbameva natthi.
সাৰত্থিযং উদাযিত্থেরং আরব্ভ চীৰরসিব্বনৰত্থুস্মিং পঞ্ঞত্তং, অসাধারণপঞ্ঞত্তি, সাণত্তিকং, তিকপাচিত্তিযং, ঞাতিকায অঞ্ঞাতিকসঞ্ঞিনো ৰা ৰেমতিকস্স ৰা, একতোউপসম্পন্নায সিব্বন্তস্স চ দুক্কটং। অঞ্ঞং থৰিকাদিপরিক্খারং সিব্বন্তস্স, ঞাতিকায, সিক্খমানসামণেরীনঞ্চ চীৰরম্পি সিব্বন্তস্স, উম্মত্তকাদীনঞ্চ অনাপত্তি। অঞ্ঞাতিকায ভিক্খুনিযা সন্তকতা , নিৰাসনপারুপনুপগতা, ৰুত্তলক্খণং সিব্বনং ৰা সিব্বাপনং ৰাতি ইমানেত্থ তীণি অঙ্গানি। সমুট্ঠানাদীনি সঞ্চরিত্তসদিসানেৰাতি।
Sāvatthiyaṃ udāyittheraṃ ārabbha cīvarasibbanavatthusmiṃ paññattaṃ, asādhāraṇapaññatti, sāṇattikaṃ, tikapācittiyaṃ, ñātikāya aññātikasaññino vā vematikassa vā, ekatoupasampannāya sibbantassa ca dukkaṭaṃ. Aññaṃ thavikādiparikkhāraṃ sibbantassa, ñātikāya, sikkhamānasāmaṇerīnañca cīvarampi sibbantassa, ummattakādīnañca anāpatti. Aññātikāya bhikkhuniyā santakatā , nivāsanapārupanupagatā, vuttalakkhaṇaṃ sibbanaṃ vā sibbāpanaṃ vāti imānettha tīṇi aṅgāni. Samuṭṭhānādīni sañcarittasadisānevāti.
চীৰরসিব্বনসিক্খাপদৰণ্ণনা নিট্ঠিতা।
Cīvarasibbanasikkhāpadavaṇṇanā niṭṭhitā.
৭. সংৰিধানসিক্খাপদৰণ্ণনা
7. Saṃvidhānasikkhāpadavaṇṇanā
সত্তমে সংৰিধাযাতি সংৰিদহিত্ৰা, গমনকালে সঙ্কেতং কত্ৰাতি অত্থো। একদ্ধানমগ্গন্তি একং অদ্ধানসঙ্খাতং মগ্গং, একতো ৰা অদ্ধানমগ্গং। সত্থগমনীযোতি সত্থেন সদ্ধিং গন্তব্বো, সেসং উত্তানপদত্থমেৰ। অযং পনেত্থ ৰিনিচ্ছযো – অকপ্পিযভূমিযং সংৰিদহন্তস্স সংৰিদহনপচ্চযা তাৰ দুক্কটং। তত্থ ঠপেত্ৰা ভিক্খুনুপস্সযং অন্তরারামং আসনসালং তিত্থিযসেয্যঞ্চ সেসা অকপ্পিযভূমি, তত্থ ঠত্ৰা সংৰিদহন্তস্সাতি অত্থো। সংৰিদহিত্ৰা পন ‘‘অজ্জ ৰা স্ৰে ৰা’’তি নিযমিতং কালং ৰিসঙ্কেতং অকত্ৰা, দ্ৰারৰিসঙ্কেতং পন মগ্গৰিসঙ্কেতং ৰা কত্ৰাপি ভিক্খুনিযা সদ্ধিং গচ্ছন্তস্স যাৰ আসন্নস্সাপি অঞ্ঞস্স গামস্স ‘‘অযং ইমস্স উপচারো’’তি মনুস্সেহি ঠপিতং উপচারং ন ওক্কমতি, তাৰ অনাপত্তি। তং ওক্কমন্তস্স পন পঠমপাদে দুক্কটং, দুতিযপাদে পাচিত্তিযং, ইতি গামূপচারোক্কমনগণনায পাচিত্তিযানি। অদ্ধযোজনাতিক্কমে পন গামে অসতি অদ্ধযোজনগণনায পাচিত্তিযং।
Sattame saṃvidhāyāti saṃvidahitvā, gamanakāle saṅketaṃ katvāti attho. Ekaddhānamagganti ekaṃ addhānasaṅkhātaṃ maggaṃ, ekato vā addhānamaggaṃ. Satthagamanīyoti satthena saddhiṃ gantabbo, sesaṃ uttānapadatthameva. Ayaṃ panettha vinicchayo – akappiyabhūmiyaṃ saṃvidahantassa saṃvidahanapaccayā tāva dukkaṭaṃ. Tattha ṭhapetvā bhikkhunupassayaṃ antarārāmaṃ āsanasālaṃ titthiyaseyyañca sesā akappiyabhūmi, tattha ṭhatvā saṃvidahantassāti attho. Saṃvidahitvā pana ‘‘ajja vā sve vā’’ti niyamitaṃ kālaṃ visaṅketaṃ akatvā, dvāravisaṅketaṃ pana maggavisaṅketaṃ vā katvāpi bhikkhuniyā saddhiṃ gacchantassa yāva āsannassāpi aññassa gāmassa ‘‘ayaṃ imassa upacāro’’ti manussehi ṭhapitaṃ upacāraṃ na okkamati, tāva anāpatti. Taṃ okkamantassa pana paṭhamapāde dukkaṭaṃ, dutiyapāde pācittiyaṃ, iti gāmūpacārokkamanagaṇanāya pācittiyāni. Addhayojanātikkame pana gāme asati addhayojanagaṇanāya pācittiyaṃ.
সাৰত্থিযং ছব্বগ্গিযে ভিক্খূ আরব্ভ একদ্ধানমগ্গপ্পটিপজ্জনৰত্থুস্মিং পঞ্ঞত্তং, ‘‘অঞ্ঞত্র সমযা’’তি অযমেত্থ অনুপঞ্ঞত্তি, অসাধারণপঞ্ঞত্তি, অনাণত্তিকং, তিকপাচিত্তিযং, অসংৰিদহিতে সংৰিদহিতসঞ্ঞিনো ৰেমতিকস্স ৰা, যো চ ভিক্খুনিযা অসংৰিদহন্তিযা কেৰলং অত্তনাৰ সংৰিদহতি, তস্স দুক্কটং। সমযে সংৰিদহিত্ৰাপি গচ্ছন্তস্স, অত্তনা অসংৰিদহন্তস্স, ৰিসঙ্কেতেন ৰা, আপদাসু গচ্ছন্তস্স, উম্মত্তকাদীনঞ্চ অনাপত্তি। দ্ৰিন্নম্পি সংৰিদহিত্ৰা মগ্গপ্পটিপত্তি, অৰিসঙ্কেততা, সমযাভাৰো, অনাপদা, গামন্তরোক্কমনং ৰা অদ্ধযোজনাতিক্কমো ৰাতি ইমানেত্থ পঞ্চ অঙ্গানি। একতোউপসম্পন্নাদীহি পন সদ্ধিং মাতুগামসিক্খাপদেন আপত্তি, অদ্ধানসমুট্ঠানং, কিরিযং, নোসঞ্ঞাৰিমোক্খং, অচিত্তকং, পণ্ণত্তিৰজ্জং, কাযকম্মং, ৰচীকম্মং, তিচিত্তং, তিৰেদনন্তি।
Sāvatthiyaṃ chabbaggiye bhikkhū ārabbha ekaddhānamaggappaṭipajjanavatthusmiṃ paññattaṃ, ‘‘aññatra samayā’’ti ayamettha anupaññatti, asādhāraṇapaññatti, anāṇattikaṃ, tikapācittiyaṃ, asaṃvidahite saṃvidahitasaññino vematikassa vā, yo ca bhikkhuniyā asaṃvidahantiyā kevalaṃ attanāva saṃvidahati, tassa dukkaṭaṃ. Samaye saṃvidahitvāpi gacchantassa, attanā asaṃvidahantassa, visaṅketena vā, āpadāsu gacchantassa, ummattakādīnañca anāpatti. Dvinnampi saṃvidahitvā maggappaṭipatti, avisaṅketatā, samayābhāvo, anāpadā, gāmantarokkamanaṃ vā addhayojanātikkamo vāti imānettha pañca aṅgāni. Ekatoupasampannādīhi pana saddhiṃ mātugāmasikkhāpadena āpatti, addhānasamuṭṭhānaṃ, kiriyaṃ, nosaññāvimokkhaṃ, acittakaṃ, paṇṇattivajjaṃ, kāyakammaṃ, vacīkammaṃ, ticittaṃ, tivedananti.
সংৰিধানসিক্খাপদৰণ্ণনা নিট্ঠিতা।
Saṃvidhānasikkhāpadavaṇṇanā niṭṭhitā.
৮. নাৰাভিরুহনসিক্খাপদৰণ্ণনা
8. Nāvābhiruhanasikkhāpadavaṇṇanā
অট্ঠমে সংৰিধাযাতি কীল়াপুরেক্খারো সংৰিদহিত্ৰা, অভিরুহনকালে সঙ্কেতং কত্ৰাতি অত্থো। উদ্ধংগামিনিন্তি কীল়াৰসেন উদ্ধং নদিযা পটিসোতং গচ্ছন্তিং। অধোগামিনিন্তি তথেৰ অধো অনুসোতং গচ্ছন্তিং। যং পন তিত্থপ্পটিপাদনত্থং উদ্ধং ৰা অধো ৰা হরন্তি, এত্থ অনাপত্তি। অঞ্ঞত্র তিরিযং তরণাযাতি উপযোগত্থে নিস্সক্কৰচনং, যা তিরিযং তরণা, তং ঠপেত্ৰাতি অত্থো। পাচিত্তিযন্তি সগামকতীরপস্সেন গমনকালে গামন্তরগণনায, অগামকতীরপস্সেন ৰা যোজনৰিত্থতায নদিযা মজ্ঝেন ৰা গমনকালে অদ্ধযোজনগণনায পাচিত্তিযং, সমুদ্দে পন যথাসুখং গন্তুং ৰট্টতি।
Aṭṭhame saṃvidhāyāti kīḷāpurekkhāro saṃvidahitvā, abhiruhanakāle saṅketaṃ katvāti attho. Uddhaṃgāmininti kīḷāvasena uddhaṃ nadiyā paṭisotaṃ gacchantiṃ. Adhogāmininti tatheva adho anusotaṃ gacchantiṃ. Yaṃ pana titthappaṭipādanatthaṃ uddhaṃ vā adho vā haranti, ettha anāpatti. Aññatra tiriyaṃ taraṇāyāti upayogatthe nissakkavacanaṃ, yā tiriyaṃ taraṇā, taṃ ṭhapetvāti attho. Pācittiyanti sagāmakatīrapassena gamanakāle gāmantaragaṇanāya, agāmakatīrapassena vā yojanavitthatāya nadiyā majjhena vā gamanakāle addhayojanagaṇanāya pācittiyaṃ, samudde pana yathāsukhaṃ gantuṃ vaṭṭati.
সাৰত্থিযং ছব্বগ্গিযে ভিক্খূ আরব্ভ নাৰাভিরুহনৰত্থুস্মিং পঞ্ঞত্তং, ‘‘অঞ্ঞত্র তিরিযং তরণাযা’’তি অযমেত্থ অনুপঞ্ঞত্তি, সেসং অনন্তরসিক্খাপদে ৰুত্তনযেনেৰ ৰেদিতব্বন্তি।
Sāvatthiyaṃ chabbaggiye bhikkhū ārabbha nāvābhiruhanavatthusmiṃ paññattaṃ, ‘‘aññatra tiriyaṃ taraṇāyā’’ti ayamettha anupaññatti, sesaṃ anantarasikkhāpade vuttanayeneva veditabbanti.
নাৰাভিরুহনসিক্খাপদৰণ্ণনা নিট্ঠিতা।
Nāvābhiruhanasikkhāpadavaṇṇanā niṭṭhitā.
৯. পরিপাচিতসিক্খাপদৰণ্ণনা
9. Paripācitasikkhāpadavaṇṇanā
নৰমে ভিক্খুনিপরিপাচিতন্তি ভিক্খুনিযা পরিপাচিতং, নেৰ তস্স নাত্তনো ঞাতকপ্পৰারিতানং গিহীনং সন্তিকে ভিক্খুস্স গুণং পকাসেত্ৰা ‘‘দেথ অয্যস্স, করোথ অয্যস্সা’’তি এৰং নিপ্ফাদিতং লদ্ধব্বং কতন্তি অত্থো। পুব্বে গিহিসমারম্ভাতি এত্থ সমারম্ভোতি সমারদ্ধং, পটিযাদিতস্সেতং নামং। গিহীনং সমারম্ভো গিহিসমারম্ভো, ভিক্খুনিযা পরিপাচনতো পুব্বে পঠমতরংযেৰ যং ভিক্খূনং অত্থায গিহীনং পটিযাদিতভত্তং, ঞাতকপ্পৰারিতানং ৰা সন্তকং, তং ঠপেত্ৰা অঞ্ঞং জানং ভুঞ্জন্তস্স পাচিত্তিযন্তি অত্থো। তঞ্চ খো অজ্ঝোহরণগণনায, পটিগ্গহণে পনস্স দুক্কটং।
Navame bhikkhuniparipācitanti bhikkhuniyā paripācitaṃ, neva tassa nāttano ñātakappavāritānaṃ gihīnaṃ santike bhikkhussa guṇaṃ pakāsetvā ‘‘detha ayyassa, karotha ayyassā’’ti evaṃ nipphāditaṃ laddhabbaṃ katanti attho. Pubbe gihisamārambhāti ettha samārambhoti samāraddhaṃ, paṭiyāditassetaṃ nāmaṃ. Gihīnaṃ samārambho gihisamārambho, bhikkhuniyā paripācanato pubbe paṭhamataraṃyeva yaṃ bhikkhūnaṃ atthāya gihīnaṃ paṭiyāditabhattaṃ, ñātakappavāritānaṃ vā santakaṃ, taṃ ṭhapetvā aññaṃ jānaṃ bhuñjantassa pācittiyanti attho. Tañca kho ajjhoharaṇagaṇanāya, paṭiggahaṇe panassa dukkaṭaṃ.
রাজগহে দেৰদত্তং আরব্ভ ভিক্খুনিপরিপাচিতপিণ্ডপাতভুঞ্জনৰত্থুস্মিং পঞ্ঞত্তং, ‘‘অঞ্ঞত্র পুব্বে গিহিসমারম্ভা’’তি অযমেত্থ অনুপঞ্ঞত্তি, অসাধারণপঞ্ঞত্তি, অনাণত্তিকং, একতোউপসম্পন্নায পরিপাচিতং ভুঞ্জন্তস্স , অপরিপাচিতে পরিপাচিতসঞ্ঞিনো, উভযত্থ ৰেমতিকস্স চ দুক্কটং। উভযত্থ অপরিপাচিতসঞ্ঞিনো, গিহিসমারম্ভে, সিক্খমানসামণেরাদীহি পরিপাচিতে, পঞ্চ ভোজনানি ঠপেত্ৰা অৰসেসে, উম্মত্তকাদীনঞ্চ অনাপত্তি। ভিক্খুনিযা পরিপাচিততা, পরিপাচিতভাৰজাননং, গিহিসমারম্ভাভাৰো, ওদনাদীনং অঞ্ঞতরতা, তস্স অজ্ঝোহরণন্তি ইমানেত্থ পঞ্চ অঙ্গানি। সমুট্ঠানাদীনি পঠমপারাজিকসঅসানি, ইদং পন পণ্ণত্তিৰজ্জং, তিচিত্তং, তিৰেদনন্তি।
Rājagahe devadattaṃ ārabbha bhikkhuniparipācitapiṇḍapātabhuñjanavatthusmiṃ paññattaṃ, ‘‘aññatra pubbe gihisamārambhā’’ti ayamettha anupaññatti, asādhāraṇapaññatti, anāṇattikaṃ, ekatoupasampannāya paripācitaṃ bhuñjantassa , aparipācite paripācitasaññino, ubhayattha vematikassa ca dukkaṭaṃ. Ubhayattha aparipācitasaññino, gihisamārambhe, sikkhamānasāmaṇerādīhi paripācite, pañca bhojanāni ṭhapetvā avasese, ummattakādīnañca anāpatti. Bhikkhuniyā paripācitatā, paripācitabhāvajānanaṃ, gihisamārambhābhāvo, odanādīnaṃ aññataratā, tassa ajjhoharaṇanti imānettha pañca aṅgāni. Samuṭṭhānādīni paṭhamapārājikasaasāni, idaṃ pana paṇṇattivajjaṃ, ticittaṃ, tivedananti.
পরিপাচিতসিক্খাপদৰণ্ণনা নিট্ঠিতা।
Paripācitasikkhāpadavaṇṇanā niṭṭhitā.
১০. রহোনিসজ্জসিক্খাপদৰণ্ণনা
10. Rahonisajjasikkhāpadavaṇṇanā
দসমে সব্বোপি কথামগ্গো দুতিযঅনিযতে ৰুত্তনযেনেৰ ৰেদিতব্বো। ইদঞ্হি সিক্খাপদং দুতিযঅনিযতেন চ উপরি উপনন্দস্স চতুত্থসিক্খাপদেন চ একপরিচ্ছেদং, অট্ঠুপ্পত্তিৰসেন পন ৰিসুং পঞ্ঞত্তন্তি।
Dasame sabbopi kathāmaggo dutiyaaniyate vuttanayeneva veditabbo. Idañhi sikkhāpadaṃ dutiyaaniyatena ca upari upanandassa catutthasikkhāpadena ca ekaparicchedaṃ, aṭṭhuppattivasena pana visuṃ paññattanti.
রহোনিসজ্জসিক্খাপদৰণ্ণনা নিট্ঠিতা।
Rahonisajjasikkhāpadavaṇṇanā niṭṭhitā.
ওৰাদৰগ্গো ততিযো।
Ovādavaggo tatiyo.
