| Library / Tipiṭaka / තිපිටක • Tipiṭaka / පරිවාරපාළි • Parivārapāḷi |
3. ඔවාදවග්‌ගො
3. Ovādavaggo
74. අසම්‌මතෙන භික්‌ඛුනියො ඔවදන්‌තස්‌ස පාචිත්‌තියං කත්‌ථ පඤ්‌ඤත්‌තන්‌ති? සාවත්‌ථියං පඤ්‌ඤත්‌තං. කං ආරබ්‌භාති? ඡබ්‌බග්‌ගියෙ භික්‌ඛූ ආරබ්‌භ. කිස්‌මිං වත්‌ථුස්‌මින්‌ති? ඡබ්‌බග්‌ගියා භික්‌ඛූ අසම්‌මතා භික්‌ඛුනියො ඔවදිංසු, තස්‌මිං වත්‌ථුස්‌මිං. අත්‌ථි තත්‌ථ පඤ්‌ඤත්‌ති, අනුපඤ්‌ඤත්‌ති, අනුප්‌පන්‌නපඤ්‌ඤත්‌තීති? එකා පඤ්‌ඤත්‌ති, එකා අනුපඤ්‌ඤත්‌ති. අනුප්‌පන්‌නපඤ්‌ඤත්‌ති තස්‌මිං නත්‌ථි. ඡන්‌නං ආපත්‌තිසමුට්‌ඨානානං ද්‌වීහි සමුට්‌ඨානෙහි සමුට්‌ඨාති – සියා වාචතො සමුට්‌ඨාති, න කායතො න චිත්‌තතො; සියා වාචතො ච චිත්‌තතො ච සමුට්‌ඨාති, න කායතො…පෙ.….
74. Asammatena bhikkhuniyo ovadantassa pācittiyaṃ kattha paññattanti? Sāvatthiyaṃ paññattaṃ. Kaṃ ārabbhāti? Chabbaggiye bhikkhū ārabbha. Kismiṃ vatthusminti? Chabbaggiyā bhikkhū asammatā bhikkhuniyo ovadiṃsu, tasmiṃ vatthusmiṃ. Atthi tattha paññatti, anupaññatti, anuppannapaññattīti? Ekā paññatti, ekā anupaññatti. Anuppannapaññatti tasmiṃ natthi. Channaṃ āpattisamuṭṭhānānaṃ dvīhi samuṭṭhānehi samuṭṭhāti – siyā vācato samuṭṭhāti, na kāyato na cittato; siyā vācato ca cittato ca samuṭṭhāti, na kāyato…pe….
75. අත්‌ථඞ්‌ගතෙ සූරියෙ භික්‌ඛුනියො ඔවදන්‌තස්‌ස පාචිත්‌තියං කත්‌ථ පඤ්‌ඤත්‌තන්‌ති? සාවත්‌ථියං පඤ්‌ඤත්‌තං. කං ආරබ්‌භාති? ආයස්‌මන්‌තං චූළපන්‌ථකං ආරබ්‌භ. කිස්‌මිං වත්‌ථුස්‌මින්‌ති? ආයස්‌මා චූළපන්‌ථකො අත්‌ථඞ්‌ගතෙ සූරියෙ භික්‌ඛුනියො ඔවදි, තස්‌මිං වත්‌ථුස්‌මිං. එකා පඤ්‌ඤත්‌ති. ඡන්‌නං ආපත්‌තිසමුට්‌ඨානානං ද්‌වීහි සමුට්‌ඨානෙහි සමුට්‌ඨාති පදසොධම්‌මෙ…පෙ.….
75. Atthaṅgate sūriye bhikkhuniyo ovadantassa pācittiyaṃ kattha paññattanti? Sāvatthiyaṃ paññattaṃ. Kaṃ ārabbhāti? Āyasmantaṃ cūḷapanthakaṃ ārabbha. Kismiṃ vatthusminti? Āyasmā cūḷapanthako atthaṅgate sūriye bhikkhuniyo ovadi, tasmiṃ vatthusmiṃ. Ekā paññatti. Channaṃ āpattisamuṭṭhānānaṃ dvīhi samuṭṭhānehi samuṭṭhāti padasodhamme…pe….
76. භික්‌ඛුනුපස්‌සයං උපසඞ්‌කමිත්‌වා භික්‌ඛුනියො ඔවදන්‌තස්‌ස පාචිත්‌තියං කත්‌ථ පඤ්‌ඤත්‌තන්‌ති? සක්‌කෙසු පඤ්‌ඤත්‌තං. කං ආරබ්‌භාති? ඡබ්‌බග්‌ගියෙ භික්‌ඛූ ආරබ්‌භ. කිස්‌මිං වත්‌ථුස්‌මින්‌ති? ඡබ්‌බග්‌ගියා භික්‌ඛූ භික්‌ඛුනුපස්‌සයං උපසඞ්‌කමිත්‌වා භික්‌ඛුනියො ඔවදිංසු, තස්‌මිං වත්‌ථුස්‌මිං. එකා පඤ්‌ඤත්‌ති, එකා අනුපඤ්‌ඤත්‌ති. ඡන්‌නං ආපත්‌තිසමුට්‌ඨානානං ද්‌වීහි සමුට්‌ඨානෙහි සමුට්‌ඨාති කථිනකෙ…පෙ.….
76. Bhikkhunupassayaṃ upasaṅkamitvā bhikkhuniyo ovadantassa pācittiyaṃ kattha paññattanti? Sakkesu paññattaṃ. Kaṃ ārabbhāti? Chabbaggiye bhikkhū ārabbha. Kismiṃ vatthusminti? Chabbaggiyā bhikkhū bhikkhunupassayaṃ upasaṅkamitvā bhikkhuniyo ovadiṃsu, tasmiṃ vatthusmiṃ. Ekā paññatti, ekā anupaññatti. Channaṃ āpattisamuṭṭhānānaṃ dvīhi samuṭṭhānehi samuṭṭhāti kathinake…pe….
77. ‘‘ආමිසහෙතු භික්‌ඛූ භික්‌ඛුනියො ඔවදන්‌තී’’ති භණන්‌තස්‌ස පාචිත්‌තියං කත්‌ථ පඤ්‌ඤත්‌තන්‌ති? සාවත්‌ථියං පඤ්‌ඤත්‌තං. කං ආරබ්‌භාති? ඡබ්‌බග්‌ගියෙ භික්‌ඛූ ආරබ්‌භ. කිස්‌මිං වත්‌ථුස්‌මින්‌ති? ඡබ්‌බග්‌ගියා භික්‌ඛූ ‘‘ආමිසහෙතු භික්‌ඛූ භික්‌ඛුනියො ඔවදන්‌තී’’ති භණිංසු, තස්‌මිං වත්‌ථුස්‌මිං. එකා පඤ්‌ඤත්‌ති. ඡන්‌නං ආපත්‌තිසමුට්‌ඨානානං තීහි සමුට්‌ඨානෙහි සමුට්‌ඨාති…පෙ.….
77. ‘‘Āmisahetu bhikkhū bhikkhuniyo ovadantī’’ti bhaṇantassa pācittiyaṃ kattha paññattanti? Sāvatthiyaṃ paññattaṃ. Kaṃ ārabbhāti? Chabbaggiye bhikkhū ārabbha. Kismiṃ vatthusminti? Chabbaggiyā bhikkhū ‘‘āmisahetu bhikkhū bhikkhuniyo ovadantī’’ti bhaṇiṃsu, tasmiṃ vatthusmiṃ. Ekā paññatti. Channaṃ āpattisamuṭṭhānānaṃ tīhi samuṭṭhānehi samuṭṭhāti…pe….
78. අඤ්‌ඤාතිකාය භික්‌ඛුනියා චීවරං දෙන්‌තස්‌ස පාචිත්‌තියං කත්‌ථ පඤ්‌ඤත්‌තන්‌ති? සාවත්‌ථියං පඤ්‌ඤත්‌තං. කං ආරබ්‌භාති? අඤ්‌ඤතරං භික්‌ඛුං ආරබ්‌භ. කිස්‌මිං වත්‌ථුස්‌මින්‌ති? අඤ්‌ඤතරො භික්‌ඛු අඤ්‌ඤාතිකාය භික්‌ඛුනියා චීවරං අදාසි, තස්‌මිං වත්‌ථුස්‌මිං. එකා පඤ්‌ඤත්‌ති, එකා අනුපඤ්‌ඤත්‌ති. ඡන්‌නං ආපත්‌තිසමුට්‌ඨානානං ඡහි සමුට්‌ඨානෙහි සමුට්‌ඨාති…පෙ.….
78. Aññātikāya bhikkhuniyā cīvaraṃ dentassa pācittiyaṃ kattha paññattanti? Sāvatthiyaṃ paññattaṃ. Kaṃ ārabbhāti? Aññataraṃ bhikkhuṃ ārabbha. Kismiṃ vatthusminti? Aññataro bhikkhu aññātikāya bhikkhuniyā cīvaraṃ adāsi, tasmiṃ vatthusmiṃ. Ekā paññatti, ekā anupaññatti. Channaṃ āpattisamuṭṭhānānaṃ chahi samuṭṭhānehi samuṭṭhāti…pe….
79. අඤ්‌ඤාතිකාය භික්‌ඛුනියා චීවරං සිබ්‌බෙන්‌තස්‌ස පාචිත්‌තියං කත්‌ථ පඤ්‌ඤත්‌තන්‌ති? සාවත්‌ථියං පඤ්‌ඤත්‌තං. කං ආරබ්‌භාති? ආයස්‌මන්‌තං උදායිං ආරබ්‌භ. කිස්‌මිං වත්‌ථුස්‌මින්‌ති? ආයස්‌මා උදායී අඤ්‌ඤාතිකාය භික්‌ඛුනියා චීවරං සිබ්‌බෙසි, තස්‌මිං වත්‌ථුස්‌මිං. එකා පඤ්‌ඤත්‌ති. ඡන්‌නං ආපත්‌තිසමුට්‌ඨානානං ඡහි සමුට්‌ඨානෙහි සමුට්‌ඨාති …පෙ.….
79. Aññātikāya bhikkhuniyā cīvaraṃ sibbentassa pācittiyaṃ kattha paññattanti? Sāvatthiyaṃ paññattaṃ. Kaṃ ārabbhāti? Āyasmantaṃ udāyiṃ ārabbha. Kismiṃ vatthusminti? Āyasmā udāyī aññātikāya bhikkhuniyā cīvaraṃ sibbesi, tasmiṃ vatthusmiṃ. Ekā paññatti. Channaṃ āpattisamuṭṭhānānaṃ chahi samuṭṭhānehi samuṭṭhāti …pe….
80. භික්‌ඛුනියා සද්‌ධිං සංවිධාය එකද්‌ධානමග්‌ගං පටිපජ්‌ජන්‌තස්‌ස පාචිත්‌තියං කත්‌ථ පඤ්‌ඤත්‌තන්‌ති? සාවත්‌ථියං පඤ්‌ඤත්‌තං. කං ආරබ්‌භාති? ඡබ්‌බග්‌ගියෙ භික්‌ඛූ ආරබ්‌භ. කිස්‌මිං වත්‌ථුස්‌මින්‌ති? ඡබ්‌බග්‌ගියා භික්‌ඛූ භික්‌ඛුනීහි සද්‌ධිං සංවිධාය එකද්‌ධානමග්‌ගං පටිපජ්‌ජිංසු, තස්‌මිං වත්‌ථුස්‌මිං. එකා පඤ්‌ඤත්‌ති, එකා අනුපඤ්‌ඤත්‌ති. ඡන්‌නං ආපත්‌තිසමුට්‌ඨානානං චතූහි සමුට්‌ඨානෙහි සමුට්‌ඨාති – සියා කායතො සමුට්‌ඨාති, න වාචතො න චිත්‌තතො; සියා කායතො ච වාචතො ච සමුට්‌ඨාති, න චිත්‌තතො; සියා කායතො ච චිත්‌තතො ච සමුට්‌ඨාති, න වාචතො; සියා කායතො ච වාචතො ච චිත්‌තතො ච සමුට්‌ඨාති…පෙ.….
80. Bhikkhuniyā saddhiṃ saṃvidhāya ekaddhānamaggaṃ paṭipajjantassa pācittiyaṃ kattha paññattanti? Sāvatthiyaṃ paññattaṃ. Kaṃ ārabbhāti? Chabbaggiye bhikkhū ārabbha. Kismiṃ vatthusminti? Chabbaggiyā bhikkhū bhikkhunīhi saddhiṃ saṃvidhāya ekaddhānamaggaṃ paṭipajjiṃsu, tasmiṃ vatthusmiṃ. Ekā paññatti, ekā anupaññatti. Channaṃ āpattisamuṭṭhānānaṃ catūhi samuṭṭhānehi samuṭṭhāti – siyā kāyato samuṭṭhāti, na vācato na cittato; siyā kāyato ca vācato ca samuṭṭhāti, na cittato; siyā kāyato ca cittato ca samuṭṭhāti, na vācato; siyā kāyato ca vācato ca cittato ca samuṭṭhāti…pe….
81. භික්‌ඛුනියා සද්‌ධිං සංවිධාය එකං නාවං අභිරුහන්‌තස්‌ස පාචිත්‌තියං කත්‌ථ පඤ්‌ඤත්‌තන්‌ති? සාවත්‌ථියං පඤ්‌ඤත්‌තං. කං ආරබ්‌භාති? ඡබ්‌බග්‌ගියෙ භික්‌ඛූ ආරබ්‌භ. කිස්‌මිං වත්‌ථුස්‌මින්‌ති? ඡබ්‌බග්‌ගියා භික්‌ඛූ භික්‌ඛුනීහි සද්‌ධිං සංවිධාය එකං නාවං අභිරුහිංසු, තස්‌මිං වත්‌ථුස්‌මිං. එකා පඤ්‌ඤත්‌ති, එකා අනුපඤ්‌ඤත්‌ති. ඡන්‌නං ආපත්‌තිසමුට්‌ඨානානං චතූහි සමුට්‌ඨානෙහි සමුට්‌ඨාති…පෙ.….
81. Bhikkhuniyā saddhiṃ saṃvidhāya ekaṃ nāvaṃ abhiruhantassa pācittiyaṃ kattha paññattanti? Sāvatthiyaṃ paññattaṃ. Kaṃ ārabbhāti? Chabbaggiye bhikkhū ārabbha. Kismiṃ vatthusminti? Chabbaggiyā bhikkhū bhikkhunīhi saddhiṃ saṃvidhāya ekaṃ nāvaṃ abhiruhiṃsu, tasmiṃ vatthusmiṃ. Ekā paññatti, ekā anupaññatti. Channaṃ āpattisamuṭṭhānānaṃ catūhi samuṭṭhānehi samuṭṭhāti…pe….
82. ජානං භික්‌ඛුනිපරිපාචිතං පිණ්‌ඩපාතං භුඤ්‌ජන්‌තස්‌ස පාචිත්‌තියං කත්‌ථ පඤ්‌ඤත්‌තන්‌ති? රාජගහෙ පඤ්‌ඤත්‌තං. කං ආරබ්‌භාති? දෙවදත්‌තං ආරබ්‌භ. කිස්‌මිං වත්‌ථුස්‌මින්‌ති? දෙවදත්‌තො ජානං භික්‌ඛුනිපරිපාචිතං පිණ්‌ඩපාතං භුඤ්‌ජි, තස්‌මිං වත්‌ථුස්‌මිං. එකා පඤ්‌ඤත්‌ති, එකා අනුපඤ්‌ඤත්‌ති. ඡන්‌නං ආපත්‌තිසමුට්‌ඨානානං එකෙන සමුට්‌ඨානෙන සමුට්‌ඨාති – කායතො ච චිත්‌තතො ච සමුට්‌ඨාති, න වාචතො…පෙ.….
82. Jānaṃ bhikkhuniparipācitaṃ piṇḍapātaṃ bhuñjantassa pācittiyaṃ kattha paññattanti? Rājagahe paññattaṃ. Kaṃ ārabbhāti? Devadattaṃ ārabbha. Kismiṃ vatthusminti? Devadatto jānaṃ bhikkhuniparipācitaṃ piṇḍapātaṃ bhuñji, tasmiṃ vatthusmiṃ. Ekā paññatti, ekā anupaññatti. Channaṃ āpattisamuṭṭhānānaṃ ekena samuṭṭhānena samuṭṭhāti – kāyato ca cittato ca samuṭṭhāti, na vācato…pe….
83. භික්‌ඛුනියා සද්‌ධිං එකො එකාය රහො නිසජ්‌ජං කප්‌පෙන්‌තස්‌ස පාචිත්‌තියං කත්‌ථ පඤ්‌ඤත්‌තන්‌ති? සාවත්‌ථියං පඤ්‌ඤත්‌තං. කං ආරබ්‌භාති? ආයස්‌මන්‌තං උදායිං ආරබ්‌භ. කිස්‌මිං වත්‌ථුස්‌මින්‌ති? ආයස්‌මා උදායී භික්‌ඛුනියා සද්‌ධිං එකො එකාය රහො නිසජ්‌ජං කප්‌පෙසි, තස්‌මිං වත්‌ථුස්‌මිං. එකා පඤ්‌ඤත්‌ති. ඡන්‌නං ආපත්‌තිසමුට්‌ඨානානං එකෙන සමුට්‌ඨානෙන සමුට්‌ඨාති – කායතො ච චිත්‌තතො ච සමුට්‌ඨාති, න වාචතො…පෙ.….
83. Bhikkhuniyā saddhiṃ eko ekāya raho nisajjaṃ kappentassa pācittiyaṃ kattha paññattanti? Sāvatthiyaṃ paññattaṃ. Kaṃ ārabbhāti? Āyasmantaṃ udāyiṃ ārabbha. Kismiṃ vatthusminti? Āyasmā udāyī bhikkhuniyā saddhiṃ eko ekāya raho nisajjaṃ kappesi, tasmiṃ vatthusmiṃ. Ekā paññatti. Channaṃ āpattisamuṭṭhānānaṃ ekena samuṭṭhānena samuṭṭhāti – kāyato ca cittato ca samuṭṭhāti, na vācato…pe….
ඔවාදවග්‌ගො තතියො.
Ovādavaggo tatiyo.
