| Library / Tipiṭaka / ཏིཔིཊཀ • Tipiṭaka / པརིཝཱརཔཱལི༹ • Parivārapāḷi |
༣. ཨོཝཱདཝགྒོ
3. Ovādavaggo
༧༤. ཨསམྨཏེན བྷིཀྑུནིཡོ ཨོཝདནྟསྶ པཱཙིཏྟིཡཾ ཀཏྠ པཉྙཏྟནྟི? སཱཝཏྠིཡཾ པཉྙཏྟཾ། ཀཾ ཨཱརབྦྷཱཏི? ཚབྦགྒིཡེ བྷིཀྑཱུ ཨཱརབྦྷ། ཀིསྨིཾ ཝཏྠུསྨིནྟི? ཚབྦགྒིཡཱ བྷིཀྑཱུ ཨསམྨཏཱ བྷིཀྑུནིཡོ ཨོཝདིཾསུ, ཏསྨིཾ ཝཏྠུསྨིཾ། ཨཏྠི ཏཏྠ པཉྙཏྟི, ཨནུཔཉྙཏྟི, ཨནུཔྤནྣཔཉྙཏྟཱིཏི? ཨེཀཱ པཉྙཏྟི, ཨེཀཱ ཨནུཔཉྙཏྟི། ཨནུཔྤནྣཔཉྙཏྟི ཏསྨིཾ ནཏྠི། ཚནྣཾ ཨཱཔཏྟིསམུཊྛཱནཱནཾ དྭཱིཧི སམུཊྛཱནེཧི སམུཊྛཱཏི – སིཡཱ ཝཱཙཏོ སམུཊྛཱཏི, ན ཀཱཡཏོ ན ཙིཏྟཏོ; སིཡཱ ཝཱཙཏོ ཙ ཙིཏྟཏོ ཙ སམུཊྛཱཏི, ན ཀཱཡཏོ…པེ॰…།
74. Asammatena bhikkhuniyo ovadantassa pācittiyaṃ kattha paññattanti? Sāvatthiyaṃ paññattaṃ. Kaṃ ārabbhāti? Chabbaggiye bhikkhū ārabbha. Kismiṃ vatthusminti? Chabbaggiyā bhikkhū asammatā bhikkhuniyo ovadiṃsu, tasmiṃ vatthusmiṃ. Atthi tattha paññatti, anupaññatti, anuppannapaññattīti? Ekā paññatti, ekā anupaññatti. Anuppannapaññatti tasmiṃ natthi. Channaṃ āpattisamuṭṭhānānaṃ dvīhi samuṭṭhānehi samuṭṭhāti – siyā vācato samuṭṭhāti, na kāyato na cittato; siyā vācato ca cittato ca samuṭṭhāti, na kāyato…pe….
༧༥. ཨཏྠངྒཏེ སཱུརིཡེ བྷིཀྑུནིཡོ ཨོཝདནྟསྶ པཱཙིཏྟིཡཾ ཀཏྠ པཉྙཏྟནྟི? སཱཝཏྠིཡཾ པཉྙཏྟཾ། ཀཾ ཨཱརབྦྷཱཏི? ཨཱཡསྨནྟཾ ཙཱུལ༹པནྠཀཾ ཨཱརབྦྷ། ཀིསྨིཾ ཝཏྠུསྨིནྟི? ཨཱཡསྨཱ ཙཱུལ༹པནྠཀོ ཨཏྠངྒཏེ སཱུརིཡེ བྷིཀྑུནིཡོ ཨོཝདི, ཏསྨིཾ ཝཏྠུསྨིཾ། ཨེཀཱ པཉྙཏྟི། ཚནྣཾ ཨཱཔཏྟིསམུཊྛཱནཱནཾ དྭཱིཧི སམུཊྛཱནེཧི སམུཊྛཱཏི པདསོདྷམྨེ…པེ॰…།
75. Atthaṅgate sūriye bhikkhuniyo ovadantassa pācittiyaṃ kattha paññattanti? Sāvatthiyaṃ paññattaṃ. Kaṃ ārabbhāti? Āyasmantaṃ cūḷapanthakaṃ ārabbha. Kismiṃ vatthusminti? Āyasmā cūḷapanthako atthaṅgate sūriye bhikkhuniyo ovadi, tasmiṃ vatthusmiṃ. Ekā paññatti. Channaṃ āpattisamuṭṭhānānaṃ dvīhi samuṭṭhānehi samuṭṭhāti padasodhamme…pe….
༧༦. བྷིཀྑུནུཔསྶཡཾ ཨུཔསངྐམིཏྭཱ བྷིཀྑུནིཡོ ཨོཝདནྟསྶ པཱཙིཏྟིཡཾ ཀཏྠ པཉྙཏྟནྟི? སཀྐེསུ པཉྙཏྟཾ། ཀཾ ཨཱརབྦྷཱཏི? ཚབྦགྒིཡེ བྷིཀྑཱུ ཨཱརབྦྷ། ཀིསྨིཾ ཝཏྠུསྨིནྟི? ཚབྦགྒིཡཱ བྷིཀྑཱུ བྷིཀྑུནུཔསྶཡཾ ཨུཔསངྐམིཏྭཱ བྷིཀྑུནིཡོ ཨོཝདིཾསུ, ཏསྨིཾ ཝཏྠུསྨིཾ། ཨེཀཱ པཉྙཏྟི, ཨེཀཱ ཨནུཔཉྙཏྟི། ཚནྣཾ ཨཱཔཏྟིསམུཊྛཱནཱནཾ དྭཱིཧི སམུཊྛཱནེཧི སམུཊྛཱཏི ཀཐིནཀེ…པེ॰…།
76. Bhikkhunupassayaṃ upasaṅkamitvā bhikkhuniyo ovadantassa pācittiyaṃ kattha paññattanti? Sakkesu paññattaṃ. Kaṃ ārabbhāti? Chabbaggiye bhikkhū ārabbha. Kismiṃ vatthusminti? Chabbaggiyā bhikkhū bhikkhunupassayaṃ upasaṅkamitvā bhikkhuniyo ovadiṃsu, tasmiṃ vatthusmiṃ. Ekā paññatti, ekā anupaññatti. Channaṃ āpattisamuṭṭhānānaṃ dvīhi samuṭṭhānehi samuṭṭhāti kathinake…pe….
༧༧. ‘‘ཨཱམིསཧེཏུ བྷིཀྑཱུ བྷིཀྑུནིཡོ ཨོཝདནྟཱི’’ཏི བྷཎནྟསྶ པཱཙིཏྟིཡཾ ཀཏྠ པཉྙཏྟནྟི? སཱཝཏྠིཡཾ པཉྙཏྟཾ། ཀཾ ཨཱརབྦྷཱཏི? ཚབྦགྒིཡེ བྷིཀྑཱུ ཨཱརབྦྷ། ཀིསྨིཾ ཝཏྠུསྨིནྟི? ཚབྦགྒིཡཱ བྷིཀྑཱུ ‘‘ཨཱམིསཧེཏུ བྷིཀྑཱུ བྷིཀྑུནིཡོ ཨོཝདནྟཱི’’ཏི བྷཎིཾསུ, ཏསྨིཾ ཝཏྠུསྨིཾ། ཨེཀཱ པཉྙཏྟི། ཚནྣཾ ཨཱཔཏྟིསམུཊྛཱནཱནཾ ཏཱིཧི སམུཊྛཱནེཧི སམུཊྛཱཏི…པེ॰…།
77. ‘‘Āmisahetu bhikkhū bhikkhuniyo ovadantī’’ti bhaṇantassa pācittiyaṃ kattha paññattanti? Sāvatthiyaṃ paññattaṃ. Kaṃ ārabbhāti? Chabbaggiye bhikkhū ārabbha. Kismiṃ vatthusminti? Chabbaggiyā bhikkhū ‘‘āmisahetu bhikkhū bhikkhuniyo ovadantī’’ti bhaṇiṃsu, tasmiṃ vatthusmiṃ. Ekā paññatti. Channaṃ āpattisamuṭṭhānānaṃ tīhi samuṭṭhānehi samuṭṭhāti…pe….
༧༨. ཨཉྙཱཏིཀཱཡ བྷིཀྑུནིཡཱ ཙཱིཝརཾ དེནྟསྶ པཱཙིཏྟིཡཾ ཀཏྠ པཉྙཏྟནྟི? སཱཝཏྠིཡཾ པཉྙཏྟཾ། ཀཾ ཨཱརབྦྷཱཏི? ཨཉྙཏརཾ བྷིཀྑུཾ ཨཱརབྦྷ། ཀིསྨིཾ ཝཏྠུསྨིནྟི? ཨཉྙཏརོ བྷིཀྑུ ཨཉྙཱཏིཀཱཡ བྷིཀྑུནིཡཱ ཙཱིཝརཾ ཨདཱསི, ཏསྨིཾ ཝཏྠུསྨིཾ། ཨེཀཱ པཉྙཏྟི, ཨེཀཱ ཨནུཔཉྙཏྟི། ཚནྣཾ ཨཱཔཏྟིསམུཊྛཱནཱནཾ ཚཧི སམུཊྛཱནེཧི སམུཊྛཱཏི…པེ॰…།
78. Aññātikāya bhikkhuniyā cīvaraṃ dentassa pācittiyaṃ kattha paññattanti? Sāvatthiyaṃ paññattaṃ. Kaṃ ārabbhāti? Aññataraṃ bhikkhuṃ ārabbha. Kismiṃ vatthusminti? Aññataro bhikkhu aññātikāya bhikkhuniyā cīvaraṃ adāsi, tasmiṃ vatthusmiṃ. Ekā paññatti, ekā anupaññatti. Channaṃ āpattisamuṭṭhānānaṃ chahi samuṭṭhānehi samuṭṭhāti…pe….
༧༩. ཨཉྙཱཏིཀཱཡ བྷིཀྑུནིཡཱ ཙཱིཝརཾ སིབྦེནྟསྶ པཱཙིཏྟིཡཾ ཀཏྠ པཉྙཏྟནྟི? སཱཝཏྠིཡཾ པཉྙཏྟཾ། ཀཾ ཨཱརབྦྷཱཏི? ཨཱཡསྨནྟཾ ཨུདཱཡིཾ ཨཱརབྦྷ། ཀིསྨིཾ ཝཏྠུསྨིནྟི? ཨཱཡསྨཱ ཨུདཱཡཱི ཨཉྙཱཏིཀཱཡ བྷིཀྑུནིཡཱ ཙཱིཝརཾ སིབྦེསི, ཏསྨིཾ ཝཏྠུསྨིཾ། ཨེཀཱ པཉྙཏྟི། ཚནྣཾ ཨཱཔཏྟིསམུཊྛཱནཱནཾ ཚཧི སམུཊྛཱནེཧི སམུཊྛཱཏི …པེ॰…།
79. Aññātikāya bhikkhuniyā cīvaraṃ sibbentassa pācittiyaṃ kattha paññattanti? Sāvatthiyaṃ paññattaṃ. Kaṃ ārabbhāti? Āyasmantaṃ udāyiṃ ārabbha. Kismiṃ vatthusminti? Āyasmā udāyī aññātikāya bhikkhuniyā cīvaraṃ sibbesi, tasmiṃ vatthusmiṃ. Ekā paññatti. Channaṃ āpattisamuṭṭhānānaṃ chahi samuṭṭhānehi samuṭṭhāti …pe….
༨༠. བྷིཀྑུནིཡཱ སདྡྷིཾ སཾཝིདྷཱཡ ཨེཀདྡྷཱནམགྒཾ པཊིཔཛྫནྟསྶ པཱཙིཏྟིཡཾ ཀཏྠ པཉྙཏྟནྟི? སཱཝཏྠིཡཾ པཉྙཏྟཾ། ཀཾ ཨཱརབྦྷཱཏི? ཚབྦགྒིཡེ བྷིཀྑཱུ ཨཱརབྦྷ། ཀིསྨིཾ ཝཏྠུསྨིནྟི? ཚབྦགྒིཡཱ བྷིཀྑཱུ བྷིཀྑུནཱིཧི སདྡྷིཾ སཾཝིདྷཱཡ ཨེཀདྡྷཱནམགྒཾ པཊིཔཛྫིཾསུ, ཏསྨིཾ ཝཏྠུསྨིཾ། ཨེཀཱ པཉྙཏྟི, ཨེཀཱ ཨནུཔཉྙཏྟི། ཚནྣཾ ཨཱཔཏྟིསམུཊྛཱནཱནཾ ཙཏཱུཧི སམུཊྛཱནེཧི སམུཊྛཱཏི – སིཡཱ ཀཱཡཏོ སམུཊྛཱཏི, ན ཝཱཙཏོ ན ཙིཏྟཏོ; སིཡཱ ཀཱཡཏོ ཙ ཝཱཙཏོ ཙ སམུཊྛཱཏི, ན ཙིཏྟཏོ; སིཡཱ ཀཱཡཏོ ཙ ཙིཏྟཏོ ཙ སམུཊྛཱཏི, ན ཝཱཙཏོ; སིཡཱ ཀཱཡཏོ ཙ ཝཱཙཏོ ཙ ཙིཏྟཏོ ཙ སམུཊྛཱཏི…པེ॰…།
80. Bhikkhuniyā saddhiṃ saṃvidhāya ekaddhānamaggaṃ paṭipajjantassa pācittiyaṃ kattha paññattanti? Sāvatthiyaṃ paññattaṃ. Kaṃ ārabbhāti? Chabbaggiye bhikkhū ārabbha. Kismiṃ vatthusminti? Chabbaggiyā bhikkhū bhikkhunīhi saddhiṃ saṃvidhāya ekaddhānamaggaṃ paṭipajjiṃsu, tasmiṃ vatthusmiṃ. Ekā paññatti, ekā anupaññatti. Channaṃ āpattisamuṭṭhānānaṃ catūhi samuṭṭhānehi samuṭṭhāti – siyā kāyato samuṭṭhāti, na vācato na cittato; siyā kāyato ca vācato ca samuṭṭhāti, na cittato; siyā kāyato ca cittato ca samuṭṭhāti, na vācato; siyā kāyato ca vācato ca cittato ca samuṭṭhāti…pe….
༨༡. བྷིཀྑུནིཡཱ སདྡྷིཾ སཾཝིདྷཱཡ ཨེཀཾ ནཱཝཾ ཨབྷིརུཧནྟསྶ པཱཙིཏྟིཡཾ ཀཏྠ པཉྙཏྟནྟི? སཱཝཏྠིཡཾ པཉྙཏྟཾ། ཀཾ ཨཱརབྦྷཱཏི? ཚབྦགྒིཡེ བྷིཀྑཱུ ཨཱརབྦྷ། ཀིསྨིཾ ཝཏྠུསྨིནྟི? ཚབྦགྒིཡཱ བྷིཀྑཱུ བྷིཀྑུནཱིཧི སདྡྷིཾ སཾཝིདྷཱཡ ཨེཀཾ ནཱཝཾ ཨབྷིརུཧིཾསུ, ཏསྨིཾ ཝཏྠུསྨིཾ། ཨེཀཱ པཉྙཏྟི, ཨེཀཱ ཨནུཔཉྙཏྟི། ཚནྣཾ ཨཱཔཏྟིསམུཊྛཱནཱནཾ ཙཏཱུཧི སམུཊྛཱནེཧི སམུཊྛཱཏི…པེ॰…།
81. Bhikkhuniyā saddhiṃ saṃvidhāya ekaṃ nāvaṃ abhiruhantassa pācittiyaṃ kattha paññattanti? Sāvatthiyaṃ paññattaṃ. Kaṃ ārabbhāti? Chabbaggiye bhikkhū ārabbha. Kismiṃ vatthusminti? Chabbaggiyā bhikkhū bhikkhunīhi saddhiṃ saṃvidhāya ekaṃ nāvaṃ abhiruhiṃsu, tasmiṃ vatthusmiṃ. Ekā paññatti, ekā anupaññatti. Channaṃ āpattisamuṭṭhānānaṃ catūhi samuṭṭhānehi samuṭṭhāti…pe….
༨༢. ཛཱནཾ བྷིཀྑུནིཔརིཔཱཙིཏཾ པིཎྜཔཱཏཾ བྷུཉྫནྟསྶ པཱཙིཏྟིཡཾ ཀཏྠ པཉྙཏྟནྟི? རཱཛགཧེ པཉྙཏྟཾ། ཀཾ ཨཱརབྦྷཱཏི? དེཝདཏྟཾ ཨཱརབྦྷ། ཀིསྨིཾ ཝཏྠུསྨིནྟི? དེཝདཏྟོ ཛཱནཾ བྷིཀྑུནིཔརིཔཱཙིཏཾ པིཎྜཔཱཏཾ བྷུཉྫི, ཏསྨིཾ ཝཏྠུསྨིཾ། ཨེཀཱ པཉྙཏྟི, ཨེཀཱ ཨནུཔཉྙཏྟི། ཚནྣཾ ཨཱཔཏྟིསམུཊྛཱནཱནཾ ཨེཀེན སམུཊྛཱནེན སམུཊྛཱཏི – ཀཱཡཏོ ཙ ཙིཏྟཏོ ཙ སམུཊྛཱཏི, ན ཝཱཙཏོ…པེ॰…།
82. Jānaṃ bhikkhuniparipācitaṃ piṇḍapātaṃ bhuñjantassa pācittiyaṃ kattha paññattanti? Rājagahe paññattaṃ. Kaṃ ārabbhāti? Devadattaṃ ārabbha. Kismiṃ vatthusminti? Devadatto jānaṃ bhikkhuniparipācitaṃ piṇḍapātaṃ bhuñji, tasmiṃ vatthusmiṃ. Ekā paññatti, ekā anupaññatti. Channaṃ āpattisamuṭṭhānānaṃ ekena samuṭṭhānena samuṭṭhāti – kāyato ca cittato ca samuṭṭhāti, na vācato…pe….
༨༣. བྷིཀྑུནིཡཱ སདྡྷིཾ ཨེཀོ ཨེཀཱཡ རཧོ ནིསཛྫཾ ཀཔྤེནྟསྶ པཱཙིཏྟིཡཾ ཀཏྠ པཉྙཏྟནྟི? སཱཝཏྠིཡཾ པཉྙཏྟཾ། ཀཾ ཨཱརབྦྷཱཏི? ཨཱཡསྨནྟཾ ཨུདཱཡིཾ ཨཱརབྦྷ། ཀིསྨིཾ ཝཏྠུསྨིནྟི? ཨཱཡསྨཱ ཨུདཱཡཱི བྷིཀྑུནིཡཱ སདྡྷིཾ ཨེཀོ ཨེཀཱཡ རཧོ ནིསཛྫཾ ཀཔྤེསི, ཏསྨིཾ ཝཏྠུསྨིཾ། ཨེཀཱ པཉྙཏྟི། ཚནྣཾ ཨཱཔཏྟིསམུཊྛཱནཱནཾ ཨེཀེན སམུཊྛཱནེན སམུཊྛཱཏི – ཀཱཡཏོ ཙ ཙིཏྟཏོ ཙ སམུཊྛཱཏི, ན ཝཱཙཏོ…པེ॰…།
83. Bhikkhuniyā saddhiṃ eko ekāya raho nisajjaṃ kappentassa pācittiyaṃ kattha paññattanti? Sāvatthiyaṃ paññattaṃ. Kaṃ ārabbhāti? Āyasmantaṃ udāyiṃ ārabbha. Kismiṃ vatthusminti? Āyasmā udāyī bhikkhuniyā saddhiṃ eko ekāya raho nisajjaṃ kappesi, tasmiṃ vatthusmiṃ. Ekā paññatti. Channaṃ āpattisamuṭṭhānānaṃ ekena samuṭṭhānena samuṭṭhāti – kāyato ca cittato ca samuṭṭhāti, na vācato…pe….
ཨོཝཱདཝགྒོ ཏཏིཡོ།
Ovādavaggo tatiyo.
