| Library / Tipiṭaka / ਤਿਪਿਟਕ • Tipiṭaka / ਦ੍વੇਮਾਤਿਕਾਪਾਲ਼ਿ • Dvemātikāpāḷi |
੩. ਓવਾਦવਗ੍ਗੋ
3. Ovādavaggo
੧. ਓવਾਦਸਿਕ੍ਖਾਪਦવਣ੍ਣਨਾ
1. Ovādasikkhāpadavaṇṇanā
ਓવਾਦવਗ੍ਗਸ੍ਸ ਪਠਮੇ ਅਸਮ੍ਮਤੋਤਿ ਯਾ ਅਟ੍ਠਙ੍ਗਸਮਨ੍ਨਾਗਤਸ੍ਸ ਭਿਕ੍ਖੁਨੋ ਭਗવਤਾ ਞਤ੍ਤਿਚਤੁਤ੍ਥੇਨ ਕਮ੍ਮੇਨ (ਪਾਚਿ॰ ੧੪੬) ਭਿਕ੍ਖੁਨੋવਾਦਕਸਮ੍ਮੁਤਿ ਅਨੁਞ੍ਞਾਤਾ, ਤਾਯ ਅਸਮ੍ਮਤੋ। ਓવਦੇਯ੍ਯਾਤਿ ਭਿਕ੍ਖੁਨਿਸਙ੍ਘਂ વਾ ਸਮ੍ਬਹੁਲਾ વਾ ਏਕਂ ਭਿਕ੍ਖੁਨਿਂ વਾ ‘‘વਸ੍ਸਸਤੂਪਸਮ੍ਪਨ੍ਨਾਯ ਭਿਕ੍ਖੁਨਿਯਾ ਤਦਹੁਪਸਮ੍ਪਨ੍ਨਸ੍ਸ ਭਿਕ੍ਖੁਨੋ ਅਭਿવਾਦਨਂ ਪਚ੍ਚੁਟ੍ਠਾਨਂ ਅਞ੍ਜਲਿਕਮ੍ਮਂ ਸਾਮੀਚਿਕਮ੍ਮਂ ਕਾਤਬ੍ਬ’’ਨ੍ਤਿ ਆਦਿਕੇ (ਚੂਲ਼વ॰ ੪੦੩) ਅਟ੍ਠ ਗਰੁਧਮ੍ਮੇ ਓવਾਦવਸੇਨ ਓਸਾਰੇਨ੍ਤੋ ਓવਦੇਯ੍ਯ। ਪਾਚਿਤ੍ਤਿਯਨ੍ਤਿ ਓવਾਦਪਰਿਯੋਸਾਨੇ ਪਾਚਿਤ੍ਤਿਯਂ।
Ovādavaggassa paṭhame asammatoti yā aṭṭhaṅgasamannāgatassa bhikkhuno bhagavatā ñatticatutthena kammena (pāci. 146) bhikkhunovādakasammuti anuññātā, tāya asammato. Ovadeyyāti bhikkhunisaṅghaṃ vā sambahulā vā ekaṃ bhikkhuniṃ vā ‘‘vassasatūpasampannāya bhikkhuniyā tadahupasampannassa bhikkhuno abhivādanaṃ paccuṭṭhānaṃ añjalikammaṃ sāmīcikammaṃ kātabba’’nti ādike (cūḷava. 403) aṭṭha garudhamme ovādavasena osārento ovadeyya. Pācittiyanti ovādapariyosāne pācittiyaṃ.
ਸਾવਤ੍ਥਿਯਂ ਛਬ੍ਬਗ੍ਗਿਯੇ ਭਿਕ੍ਖੂ ਆਰਬ੍ਭ ਓવਦਨવਤ੍ਥੁਸ੍ਮਿਂ ਪਞ੍ਞਤ੍ਤਂ, ਅਸਾਧਾਰਣਪਞ੍ਞਤ੍ਤਿ, ਅਨਾਣਤ੍ਤਿਕਂ, ਅਞ੍ਞੇਨ વਾ ਧਮ੍ਮੇਨ ਭਿਕ੍ਖੁਨੀਸੁ ਉਪਸਮ੍ਪਨ੍ਨਮਤ੍ਤਂ વਾ ਓવਦਤੋ ਦੁਕ੍ਕਟਂ। ਸਮ੍ਮਤਸ੍ਸਾਪਿ ਤਞ੍ਚੇ ਸਮ੍ਮੁਤਿਕਮ੍ਮਂ ਅਧਮ੍ਮਕਮ੍ਮਂ ਹੋਤਿ, ਤਸ੍ਮਿਂ ਅਧਮ੍ਮਕਮ੍ਮੇ ਅਧਮ੍ਮਕਮ੍ਮਸਞ੍ਞਿਨੋ વਗ੍ਗੇ ਭਿਕ੍ਖੁਨਿਸਙ੍ਘੇ ਓવਦਤੋ ਤਿਕਪਾਚਿਤ੍ਤਿਯਂ, ਤਥਾ વੇਮਤਿਕਸ੍ਸ ਧਮ੍ਮਕਮ੍ਮਸਞ੍ਞਿਨੋ ਚਾਤਿ ਨવ ਪਾਚਿਤ੍ਤਿਯਾਨਿ, ਸਮਗ੍ਗੇਪਿ ਭਿਕ੍ਖੁਨਿਸਙ੍ਘੇਨ વਾਤਿ ਅਧਮ੍ਮਕਮ੍ਮવਸੇਨ ਅਟ੍ਠਾਰਸ। ਸਚੇ ਪਨ ਤਂ ਧਮ੍ਮਕਮ੍ਮਂ ਹੋਤਿ, ‘‘ਧਮ੍ਮਕਮ੍ਮੇ ਧਮ੍ਮਕਮ੍ਮਸਞ੍ਞੀ ਸਮਗ੍ਗਂ ਭਿਕ੍ਖੁਨਿਸਙ੍ਘਂ ਸਮਗ੍ਗਸਞ੍ਞੀ ਓવਦਤੀ’’ਤਿ (ਪਾਚਿ॰ ੧੫੧) ਇਦਂ ਅવਸਾਨਪਦਂ ਠਪੇਤ੍વਾ ਤੇਨੇવ ਨਯੇਨ ਸਤ੍ਤਰਸ ਦੁਕ੍ਕਟਾਨਿ, ‘‘ਸਮਗ੍ਗਮ੍ਹਾਯ੍ਯਾ’’ਤਿ ਚ વੁਤ੍ਤੇ ਅਞ੍ਞਂ ਧਮ੍ਮਂ, ‘‘વਗ੍ਗਮ੍ਹਾਯ੍ਯਾ’’ਤਿ ਚ વੁਤ੍ਤੇ ਅਟ੍ਠ ਗਰੁਧਮ੍ਮੇ ਭਣਨ੍ਤਸ੍ਸ, ਓવਾਦਞ੍ਚ ਅਨਿਯ੍ਯਾਤੇਤ੍વਾ ਅਞ੍ਞਂ ਧਮ੍ਮਂ ਭਣਨ੍ਤਸ੍ਸ ਦੁਕ੍ਕਟਮੇવ। ਯੋ ਪਨ ਧਮ੍ਮਕਮ੍ਮੇ ਧਮ੍ਮਕਮ੍ਮਸਞ੍ਞੀ ਸਮਗ੍ਗਂ ਭਿਕ੍ਖੁਨਿਸਙ੍ਘਂ ਸਮਗ੍ਗਸਞ੍ਞੀ ਓવਦਤਿ, ਗਰੁਧਮ੍ਮਪਾਲ਼ਿਂ ਉਦ੍ਦੇਸਂ ਦੇਤਿ, ਪਰਿਪੁਚ੍ਛਂ ਦੇਤਿ, ‘‘ਓਸਾਰੇਹਿ ਅਯ੍ਯਾ’’ਤਿ વੁਚ੍ਚਮਾਨੋ ਓਸਾਰੇਤਿ, ਪਞ੍ਹਂ ਪੁਟ੍ਠੋ ਕਥੇਤਿ, ਭਿਕ੍ਖੁਨੀਨਂ ਸੁਣਮਾਨਾਨਂ ਅਞ੍ਞਸ੍ਸਤ੍ਥਾਯ ਭਣਤਿ, ਸਿਕ੍ਖਮਾਨਾਯ વਾ ਸਾਮਣੇਰਿਯਾ વਾ ਭਣਤਿ, ਤਸ੍ਸ, ਉਮ੍ਮਤ੍ਤਕਾਦੀਨਞ੍ਚ ਅਨਾਪਤ੍ਤਿ। ਅਸਮ੍ਮਤਤਾ, ਭਿਕ੍ਖੁਨਿਯਾ ਪਰਿਪੁਣ੍ਣੂਪਸਮ੍ਪਨ੍ਨਤਾ, ਓવਾਦવਸੇਨ ਅਟ੍ਠਗਰੁਧਮ੍ਮਭਣਨਨ੍ਤਿ ਇਮਾਨੇਤ੍ਥ ਤੀਣਿ ਅਙ੍ਗਾਨਿ। ਸਮੁਟ੍ਠਾਨਾਦੀਨਿ ਪਦਸੋਧਮ੍ਮਸਦਿਸਾਨੇવਾਤਿ।
Sāvatthiyaṃ chabbaggiye bhikkhū ārabbha ovadanavatthusmiṃ paññattaṃ, asādhāraṇapaññatti, anāṇattikaṃ, aññena vā dhammena bhikkhunīsu upasampannamattaṃ vā ovadato dukkaṭaṃ. Sammatassāpi tañce sammutikammaṃ adhammakammaṃ hoti, tasmiṃ adhammakamme adhammakammasaññino vagge bhikkhunisaṅghe ovadato tikapācittiyaṃ, tathā vematikassa dhammakammasaññino cāti nava pācittiyāni, samaggepi bhikkhunisaṅghena vāti adhammakammavasena aṭṭhārasa. Sace pana taṃ dhammakammaṃ hoti, ‘‘dhammakamme dhammakammasaññī samaggaṃ bhikkhunisaṅghaṃ samaggasaññī ovadatī’’ti (pāci. 151) idaṃ avasānapadaṃ ṭhapetvā teneva nayena sattarasa dukkaṭāni, ‘‘samaggamhāyyā’’ti ca vutte aññaṃ dhammaṃ, ‘‘vaggamhāyyā’’ti ca vutte aṭṭha garudhamme bhaṇantassa, ovādañca aniyyātetvā aññaṃ dhammaṃ bhaṇantassa dukkaṭameva. Yo pana dhammakamme dhammakammasaññī samaggaṃ bhikkhunisaṅghaṃ samaggasaññī ovadati, garudhammapāḷiṃ uddesaṃ deti, paripucchaṃ deti, ‘‘osārehi ayyā’’ti vuccamāno osāreti, pañhaṃ puṭṭho katheti, bhikkhunīnaṃ suṇamānānaṃ aññassatthāya bhaṇati, sikkhamānāya vā sāmaṇeriyā vā bhaṇati, tassa, ummattakādīnañca anāpatti. Asammatatā, bhikkhuniyā paripuṇṇūpasampannatā, ovādavasena aṭṭhagarudhammabhaṇananti imānettha tīṇi aṅgāni. Samuṭṭhānādīni padasodhammasadisānevāti.
ਓવਾਦਸਿਕ੍ਖਾਪਦવਣ੍ਣਨਾ ਨਿਟ੍ਠਿਤਾ।
Ovādasikkhāpadavaṇṇanā niṭṭhitā.
੨. ਅਤ੍ਥਙ੍ਗਤਸਿਕ੍ਖਾਪਦવਣ੍ਣਨਾ
2. Atthaṅgatasikkhāpadavaṇṇanā
ਦੁਤਿਯੇ ਓવਦੇਯ੍ਯਾਤਿ ਅਟ੍ਠਗਰੁਧਮ੍ਮੇਹਿ વਾ ਅਞ੍ਞੇਨ વਾ ਧਮ੍ਮੇਨ ਓવਦਨ੍ਤਸ੍ਸ ਸਮ੍ਮਤਸ੍ਸਾਪਿ ਪਾਚਿਤ੍ਤਿਯਮੇવ।
Dutiye ovadeyyāti aṭṭhagarudhammehi vā aññena vā dhammena ovadantassa sammatassāpi pācittiyameva.
ਸਾવਤ੍ਥਿਯਂ ਆਯਸ੍ਮਨ੍ਤਂ ਚੂਲ਼ਪਨ੍ਥਕਂ ਆਰਬ੍ਭ ਅਤ੍ਥਙ੍ਗਤੇ ਸੂਰਿਯੇ ਓવਦਨવਤ੍ਥੁਸ੍ਮਿਂ ਪਞ੍ਞਤ੍ਤਂ, ਅਸਾਧਾਰਣਪਞ੍ਞਤ੍ਤਿ, ਅਨਾਣਤ੍ਤਿਕਂ, ਤਿਕਪਾਚਿਤ੍ਤਿਯਂ, ਸੂਰਿਯੇ ਅਤ੍ਥਙ੍ਗਤੇ ਅਤ੍ਥਙ੍ਗਤਸਞ੍ਞਿਨੋ વੇਮਤਿਕਸ੍ਸ વਾ, ਏਕਤੋਉਪਸਮ੍ਪਨ੍ਨਂ ਓવਦਨ੍ਤਸ੍ਸ ਚ ਦੁਕ੍ਕਟਂ। ਪੁਰਿਮਸਿਕ੍ਖਾਪਦੇ વਿਯ ਉਦ੍ਦੇਸਾਦਿਨਯੇਨ ਅਨਾਪਤ੍ਤਿ। ਅਤ੍ਥਙ੍ਗਤਸੂਰਿਯਤਾ, ਪਰਿਪੁਣ੍ਣੂਪਸਮ੍ਪਨ੍ਨਤਾ, ਓવਦਨਨ੍ਤਿ ਇਮਾਨੇਤ੍ਥ ਤੀਣਿ ਅਙ੍ਗਾਨਿ। ਸਮੁਟ੍ਠਾਨਾਦੀਨਿ ਪਦਸੋਧਮ੍ਮਸਦਿਸਾਨੇવਾਤਿ।
Sāvatthiyaṃ āyasmantaṃ cūḷapanthakaṃ ārabbha atthaṅgate sūriye ovadanavatthusmiṃ paññattaṃ, asādhāraṇapaññatti, anāṇattikaṃ, tikapācittiyaṃ, sūriye atthaṅgate atthaṅgatasaññino vematikassa vā, ekatoupasampannaṃ ovadantassa ca dukkaṭaṃ. Purimasikkhāpade viya uddesādinayena anāpatti. Atthaṅgatasūriyatā, paripuṇṇūpasampannatā, ovadananti imānettha tīṇi aṅgāni. Samuṭṭhānādīni padasodhammasadisānevāti.
ਅਤ੍ਥਙ੍ਗਤਸਿਕ੍ਖਾਪਦવਣ੍ਣਨਾ ਨਿਟ੍ਠਿਤਾ।
Atthaṅgatasikkhāpadavaṇṇanā niṭṭhitā.
੩. ਭਿਕ੍ਖੁਨੁਪਸ੍ਸਯਸਿਕ੍ਖਾਪਦવਣ੍ਣਨਾ
3. Bhikkhunupassayasikkhāpadavaṇṇanā
ਤਤਿਯੇ ਭਿਕ੍ਖੁਨੁਪਸ੍ਸਯਨ੍ਤਿ ਭਿਕ੍ਖੁਨਿਯਾ ਏਕਰਤ੍ਤਂ વਸਨਟ੍ਠਾਨਮ੍ਪਿ। ਓવਦੇਯ੍ਯਾਤਿ ਇਧ ਗਰੁਧਮ੍ਮੇਹਿ ਓવਦਨ੍ਤਸ੍ਸੇવ ਪਾਚਿਤ੍ਤਿਯਂ। ਸਚੇ ਪਨ ਅਸਮ੍ਮਤੋ ਹੋਤਿ, ਦ੍વੇ ਪਾਚਿਤ੍ਤਿਯਾਨਿ। ਸਚੇ ਪਨ ਸੂਰਿਯੇਪਿ ਅਤ੍ਥਙ੍ਗਤੇ ਓવਦਤਿ, ਤੀਣਿ ਹੋਨ੍ਤਿ। ਸਮ੍ਮਤਸ੍ਸ ਪਨ ਰਤ੍ਤਿਂ ਓવਦਨ੍ਤਸ੍ਸਪਿ ਦ੍વੇ ਏવ ਹੋਨ੍ਤਿ। ਸਮ੍ਮਤਤ੍ਤਾ ਹਿ ਭਿਕ੍ਖੁਸ੍ਸ ਗਰੁਧਮ੍ਮੋવਾਦਮੂਲਕਂ ਪਾਚਿਤ੍ਤਿਯਂ ਨਤ੍ਥਿ। ਗਿਲਾਨਾਤਿ ਨ ਸਕ੍ਕੋਤਿ ਓવਾਦਾਯ વਾ ਸਂવਾਸਾਯ વਾ ਗਨ੍ਤੁਂ।
Tatiye bhikkhunupassayanti bhikkhuniyā ekarattaṃ vasanaṭṭhānampi. Ovadeyyāti idha garudhammehi ovadantasseva pācittiyaṃ. Sace pana asammato hoti, dve pācittiyāni. Sace pana sūriyepi atthaṅgate ovadati, tīṇi honti. Sammatassa pana rattiṃ ovadantassapi dve eva honti. Sammatattā hi bhikkhussa garudhammovādamūlakaṃ pācittiyaṃ natthi. Gilānāti na sakkoti ovādāya vā saṃvāsāya vā gantuṃ.
ਸਕ੍ਕੇਸੁ ਛਬ੍ਬਗ੍ਗਿਯੇ ਭਿਕ੍ਖੂ ਆਰਬ੍ਭ ਭਿਕ੍ਖੁਨੁਪਸ੍ਸਯਂ ਉਪਸਙ੍ਕਮਿਤ੍વਾ ਓવਦਨવਤ੍ਥੁਸ੍ਮਿਂ ਪਞ੍ਞਤ੍ਤਂ, ‘‘ਅਞ੍ਞਤ੍ਰ ਸਮਯਾ’’ਤਿ ਅਯਮੇਤ੍ਥ ਅਨੁਪਞ੍ਞਤ੍ਤਿ, ਅਸਾਧਾਰਣਪਞ੍ਞਤ੍ਤਿ, ਅਨਾਣਤ੍ਤਿਕਂ, ਤਿਕਪਾਚਿਤ੍ਤਿਯਂ, ਅਨੁਪਸਮ੍ਪਨ੍ਨਾਯ ਉਪਸਮ੍ਪਨ੍ਨਸਞ੍ਞਿਨੋ વੇਮਤਿਕਸ੍ਸ વਾ, ਏਕਤੋਉਪਸਮ੍ਪਨ੍ਨਂ ਯੇਨ ਕੇਨਚਿ, ਇਤਰਂ ਅਞ੍ਞੇਨ ਧਮ੍ਮੇਨ ਓવਦਨ੍ਤਸ੍ਸ ਚ ਦੁਕ੍ਕਟਂ। ਸਮਯੇ, ਅਨੁਪਸਮ੍ਪਨ੍ਨਾਯ, ਪੁਰਿਮਸਿਕ੍ਖਾਪਦੇ વਿਯ ਉਦ੍ਦੇਸਾਦਿਨਯੇਨ ਚ ਅਨਾਪਤ੍ਤਿ। ਉਪਸ੍ਸਯੂਪਗਮਨਂ, ਪਰਿਪੁਣ੍ਣੂਪਸਮ੍ਪਨ੍ਨਤਾ, ਸਮਯਾਭਾવੋ, ਗਰੁਧਮ੍ਮੇਹਿ ਓવਦਨਨ੍ਤਿ ਇਮਾਨੇਤ੍ਥ ਚਤ੍ਤਾਰਿ ਅਙ੍ਗਾਨਿ। ਸਮੁਟ੍ਠਾਨਾਦੀਨਿ ਪਠਮਕਥਿਨਸਦਿਸਾਨਿ, ਇਦਂ ਪਨ ਕਿਰਿਯਂ ਹੋਤੀਤਿ।
Sakkesu chabbaggiye bhikkhū ārabbha bhikkhunupassayaṃ upasaṅkamitvā ovadanavatthusmiṃ paññattaṃ, ‘‘aññatra samayā’’ti ayamettha anupaññatti, asādhāraṇapaññatti, anāṇattikaṃ, tikapācittiyaṃ, anupasampannāya upasampannasaññino vematikassa vā, ekatoupasampannaṃ yena kenaci, itaraṃ aññena dhammena ovadantassa ca dukkaṭaṃ. Samaye, anupasampannāya, purimasikkhāpade viya uddesādinayena ca anāpatti. Upassayūpagamanaṃ, paripuṇṇūpasampannatā, samayābhāvo, garudhammehi ovadananti imānettha cattāri aṅgāni. Samuṭṭhānādīni paṭhamakathinasadisāni, idaṃ pana kiriyaṃ hotīti.
ਭਿਕ੍ਖੁਨੁਪਸ੍ਸਯਸਿਕ੍ਖਾਪਦવਣ੍ਣਨਾ ਨਿਟ੍ਠਿਤਾ।
Bhikkhunupassayasikkhāpadavaṇṇanā niṭṭhitā.
੪. ਆਮਿਸਸਿਕ੍ਖਾਪਦવਣ੍ਣਨਾ
4. Āmisasikkhāpadavaṇṇanā
ਚਤੁਤ੍ਥੇ ਆਮਿਸਹੇਤੂਤਿ ਚੀવਰਾਦੀਨਂ ਅਞ੍ਞਤਰਹੇਤੁ। ਭਿਕ੍ਖੂਤਿ ਸਮ੍ਮਤਾ ਭਿਕ੍ਖੂ ਇਧਾਧਿਪ੍ਪੇਤਾ। ਪਾਚਿਤ੍ਤਿਯਨ੍ਤਿ ਏવਰੂਪੇ ਭਿਕ੍ਖੂ ਅવਣ੍ਣਕਾਮਤਾਯ ਏવਂ ਭਣਨ੍ਤਸ੍ਸ ਪਾਚਿਤ੍ਤਿਯਂ।
Catutthe āmisahetūti cīvarādīnaṃ aññatarahetu. Bhikkhūti sammatā bhikkhū idhādhippetā. Pācittiyanti evarūpe bhikkhū avaṇṇakāmatāya evaṃ bhaṇantassa pācittiyaṃ.
ਸਾવਤ੍ਥਿਯਂ ਛਬ੍ਬਗ੍ਗਿਯੇ ਭਿਕ੍ਖੂ ਆਰਬ੍ਭ ‘‘ਆਮਿਸਹੇਤੁ ਓવਦਨ੍ਤੀ’’ਤਿ ਭਣਨવਤ੍ਥੁਸ੍ਮਿਂ ਪਞ੍ਞਤ੍ਤਂ, ਅਸਾਧਾਰਣਪਞ੍ਞਤ੍ਤਿ, ਅਨਾਣਤ੍ਤਿਕਂ, ਧਮ੍ਮਕਮ੍ਮੇ ਤਿਕਪਾਚਿਤ੍ਤਿਯਂ, ਅਧਮ੍ਮਕਮ੍ਮੇ ਤਿਕਦੁਕ੍ਕਟਂ, ਅਸਮ੍ਮਤਂ ਉਪਸਮ੍ਪਨ੍ਨਞ੍ਚ, ਅਨੁਪਸਮ੍ਪਨ੍ਨਞ੍ਚ ਸਮ੍ਮਤਂ વਾ ਅਸਮ੍ਮਤਂ વਾ ਏવਂ ਭਣਨ੍ਤਸ੍ਸ ਦੁਕ੍ਕਟਮੇવ। ਤਤ੍ਥ ਯੋ ਭਿਕ੍ਖੁ ਕਾਲੇ ਸਮ੍ਮੁਤਿਂ ਲਭਿਤ੍વਾ ਸਾਮਣੇਰਭੂਮਿਯਂ ਸਣ੍ਠਿਤੋ, ਅਯਂ ਸਮ੍ਮਤੋ ਨਾਮ ਅਨੁਪਸਮ੍ਪਨ੍ਨੋ। ਪਕਤਿਯਾ ਚੀવਰਾਦਿਹੇਤੁ ਓવਦਨ੍ਤਂ ਪਨ ਏવਂ ਭਣਨ੍ਤਸ੍ਸ , ਉਮ੍ਮਤ੍ਤਕਾਦੀਨਞ੍ਚ ਅਨਾਪਤ੍ਤਿ। ਉਪਸਮ੍ਪਨ੍ਨਤਾ, ਧਮ੍ਮੇਨ ਲਦ੍ਧਸਮ੍ਮੁਤਿਤਾ, ਅਨਾਮਿਸਨ੍ਤਰਤਾ, ਅવਣ੍ਣਕਾਮਤਾਯ ਏવਂ ਭਣਨਨ੍ਤਿ ਇਮਾਨੇਤ੍ਥ ਚਤ੍ਤਾਰਿ ਅਙ੍ਗਾਨਿ। ਸਮੁਟ੍ਠਾਨਾਦੀਨਿ ਅਦਿਨ੍ਨਾਦਾਨਸਦਿਸਾਨਿ, ਇਦਂ ਪਨ ਦੁਕ੍ਖવੇਦਨਮੇવਾਤਿ।
Sāvatthiyaṃ chabbaggiye bhikkhū ārabbha ‘‘āmisahetu ovadantī’’ti bhaṇanavatthusmiṃ paññattaṃ, asādhāraṇapaññatti, anāṇattikaṃ, dhammakamme tikapācittiyaṃ, adhammakamme tikadukkaṭaṃ, asammataṃ upasampannañca, anupasampannañca sammataṃ vā asammataṃ vā evaṃ bhaṇantassa dukkaṭameva. Tattha yo bhikkhu kāle sammutiṃ labhitvā sāmaṇerabhūmiyaṃ saṇṭhito, ayaṃ sammato nāma anupasampanno. Pakatiyā cīvarādihetu ovadantaṃ pana evaṃ bhaṇantassa , ummattakādīnañca anāpatti. Upasampannatā, dhammena laddhasammutitā, anāmisantaratā, avaṇṇakāmatāya evaṃ bhaṇananti imānettha cattāri aṅgāni. Samuṭṭhānādīni adinnādānasadisāni, idaṃ pana dukkhavedanamevāti.
ਆਮਿਸਸਿਕ੍ਖਾਪਦવਣ੍ਣਨਾ ਨਿਟ੍ਠਿਤਾ।
Āmisasikkhāpadavaṇṇanā niṭṭhitā.
੫. ਚੀવਰਦਾਨਸਿਕ੍ਖਾਪਦવਣ੍ਣਨਾ
5. Cīvaradānasikkhāpadavaṇṇanā
ਪਞ੍ਚਮੇ ਸਾવਤ੍ਥਿਯਂ ਅਞ੍ਞਤਰਂ ਭਿਕ੍ਖੁਂ ਆਰਬ੍ਭ ਚੀવਰਦਾਨવਤ੍ਥੁਸ੍ਮਿਂ ਪਞ੍ਞਤ੍ਤਂ, ਸੇਸਕਥਾਮਗ੍ਗੋ ਪਨੇਤ੍ਥ ਚੀવਰਪ੍ਪਟਿਗ੍ਗਹਣਸਿਕ੍ਖਾਪਦੇ વੁਤ੍ਤਨਯੇਨੇવ વੇਦਿਤਬ੍ਬੋ। ਤਤ੍ਰ ਹਿ ਭਿਕ੍ਖੁ ਪਟਿਗ੍ਗਾਹਕੋ, ਇਧ ਭਿਕ੍ਖੁਨੀ, ਅਯਂ વਿਸੇਸੋ, ਸੇਸਂ ਤਾਦਿਸਮੇવਾਤਿ।
Pañcame sāvatthiyaṃ aññataraṃ bhikkhuṃ ārabbha cīvaradānavatthusmiṃ paññattaṃ, sesakathāmaggo panettha cīvarappaṭiggahaṇasikkhāpade vuttanayeneva veditabbo. Tatra hi bhikkhu paṭiggāhako, idha bhikkhunī, ayaṃ viseso, sesaṃ tādisamevāti.
ਚੀવਰਦਾਨਸਿਕ੍ਖਾਪਦવਣ੍ਣਨਾ ਨਿਟ੍ਠਿਤਾ।
Cīvaradānasikkhāpadavaṇṇanā niṭṭhitā.
੬. ਚੀવਰਸਿਬ੍ਬਨਸਿਕ੍ਖਾਪਦવਣ੍ਣਨਾ
6. Cīvarasibbanasikkhāpadavaṇṇanā
ਛਟ੍ਠੇ ਚੀવਰਨ੍ਤਿ ਨਿવਾਸਨਪਾਰੁਪਨੁਪਗਂ। ਸਿਬ੍ਬੇਯ੍ਯ વਾ ਸਿਬ੍ਬਾਪੇਯ੍ਯਾ વਾਤਿ ਏਤ੍ਥ ਸਯਂ ਸਿਬ੍ਬਨ੍ਤਸ੍ਸ ਸੂਚਿਂ ਪવੇਸੇਤ੍વਾ ਪવੇਸੇਤ੍વਾ ਨੀਹਰਣੇ ਪਾਚਿਤ੍ਤਿਯਂ, ਸਤਕ੍ਖਤ੍ਤੁਮ੍ਪਿ વਿਜ੍ਝਿਤ੍વਾ ਸਕਿਂ ਨੀਹਰਨ੍ਤਸ੍ਸ ਏਕਮੇવ ਪਾਚਿਤ੍ਤਿਯਂ। ‘ਸਿਬ੍ਬਾ’ਤਿ વੁਤ੍ਤੋ ਪਨ ਸਚੇਪਿ ਸਬ੍ਬਂ ਸੂਚਿਕਮ੍ਮਂ ਨਿਟ੍ਠਾਪੇਤਿ, ਆਣਾਪਕਸ੍ਸ ਏਕਮੇવ ਪਾਚਿਤ੍ਤਿਯਂ। ਅਥ ‘‘ਯਂ ਏਤ੍ਥ ਚੀવਰੇ ਕਤ੍ਤਬ੍ਬਂ, ਸਬ੍ਬਂ ਤਂ ਤવ ਭਾਰੋ’’ਤਿ વੁਤ੍ਤੋ ਨਿਟ੍ਠਾਪੇਤਿ, ਤਸ੍ਸ ਆਰਾਪਥੇ ਆਰਾਪਥੇ ਪਾਚਿਤ੍ਤਿਯਂ। ਆਣਾਪਕਸ੍ਸ ਏਕવਾਚਾਯ ਸਮ੍ਬਹੁਲਾਨਿਪਿ, ਪੁਨਪ੍ਪੁਨਂ ਆਣਤ੍ਤਿਯਂ ਪਨ વਤ੍ਤਬ੍ਬਮੇવ ਨਤ੍ਥਿ।
Chaṭṭhe cīvaranti nivāsanapārupanupagaṃ. Sibbeyya vā sibbāpeyyā vāti ettha sayaṃ sibbantassa sūciṃ pavesetvā pavesetvā nīharaṇe pācittiyaṃ, satakkhattumpi vijjhitvā sakiṃ nīharantassa ekameva pācittiyaṃ. ‘Sibbā’ti vutto pana sacepi sabbaṃ sūcikammaṃ niṭṭhāpeti, āṇāpakassa ekameva pācittiyaṃ. Atha ‘‘yaṃ ettha cīvare kattabbaṃ, sabbaṃ taṃ tava bhāro’’ti vutto niṭṭhāpeti, tassa ārāpathe ārāpathe pācittiyaṃ. Āṇāpakassa ekavācāya sambahulānipi, punappunaṃ āṇattiyaṃ pana vattabbameva natthi.
ਸਾવਤ੍ਥਿਯਂ ਉਦਾਯਿਤ੍ਥੇਰਂ ਆਰਬ੍ਭ ਚੀવਰਸਿਬ੍ਬਨવਤ੍ਥੁਸ੍ਮਿਂ ਪਞ੍ਞਤ੍ਤਂ, ਅਸਾਧਾਰਣਪਞ੍ਞਤ੍ਤਿ, ਸਾਣਤ੍ਤਿਕਂ, ਤਿਕਪਾਚਿਤ੍ਤਿਯਂ, ਞਾਤਿਕਾਯ ਅਞ੍ਞਾਤਿਕਸਞ੍ਞਿਨੋ વਾ વੇਮਤਿਕਸ੍ਸ વਾ, ਏਕਤੋਉਪਸਮ੍ਪਨ੍ਨਾਯ ਸਿਬ੍ਬਨ੍ਤਸ੍ਸ ਚ ਦੁਕ੍ਕਟਂ। ਅਞ੍ਞਂ ਥવਿਕਾਦਿਪਰਿਕ੍ਖਾਰਂ ਸਿਬ੍ਬਨ੍ਤਸ੍ਸ, ਞਾਤਿਕਾਯ, ਸਿਕ੍ਖਮਾਨਸਾਮਣੇਰੀਨਞ੍ਚ ਚੀવਰਮ੍ਪਿ ਸਿਬ੍ਬਨ੍ਤਸ੍ਸ, ਉਮ੍ਮਤ੍ਤਕਾਦੀਨਞ੍ਚ ਅਨਾਪਤ੍ਤਿ। ਅਞ੍ਞਾਤਿਕਾਯ ਭਿਕ੍ਖੁਨਿਯਾ ਸਨ੍ਤਕਤਾ , ਨਿવਾਸਨਪਾਰੁਪਨੁਪਗਤਾ, વੁਤ੍ਤਲਕ੍ਖਣਂ ਸਿਬ੍ਬਨਂ વਾ ਸਿਬ੍ਬਾਪਨਂ વਾਤਿ ਇਮਾਨੇਤ੍ਥ ਤੀਣਿ ਅਙ੍ਗਾਨਿ। ਸਮੁਟ੍ਠਾਨਾਦੀਨਿ ਸਞ੍ਚਰਿਤ੍ਤਸਦਿਸਾਨੇવਾਤਿ।
Sāvatthiyaṃ udāyittheraṃ ārabbha cīvarasibbanavatthusmiṃ paññattaṃ, asādhāraṇapaññatti, sāṇattikaṃ, tikapācittiyaṃ, ñātikāya aññātikasaññino vā vematikassa vā, ekatoupasampannāya sibbantassa ca dukkaṭaṃ. Aññaṃ thavikādiparikkhāraṃ sibbantassa, ñātikāya, sikkhamānasāmaṇerīnañca cīvarampi sibbantassa, ummattakādīnañca anāpatti. Aññātikāya bhikkhuniyā santakatā , nivāsanapārupanupagatā, vuttalakkhaṇaṃ sibbanaṃ vā sibbāpanaṃ vāti imānettha tīṇi aṅgāni. Samuṭṭhānādīni sañcarittasadisānevāti.
ਚੀવਰਸਿਬ੍ਬਨਸਿਕ੍ਖਾਪਦવਣ੍ਣਨਾ ਨਿਟ੍ਠਿਤਾ।
Cīvarasibbanasikkhāpadavaṇṇanā niṭṭhitā.
੭. ਸਂવਿਧਾਨਸਿਕ੍ਖਾਪਦવਣ੍ਣਨਾ
7. Saṃvidhānasikkhāpadavaṇṇanā
ਸਤ੍ਤਮੇ ਸਂવਿਧਾਯਾਤਿ ਸਂવਿਦਹਿਤ੍વਾ, ਗਮਨਕਾਲੇ ਸਙ੍ਕੇਤਂ ਕਤ੍વਾਤਿ ਅਤ੍ਥੋ। ਏਕਦ੍ਧਾਨਮਗ੍ਗਨ੍ਤਿ ਏਕਂ ਅਦ੍ਧਾਨਸਙ੍ਖਾਤਂ ਮਗ੍ਗਂ, ਏਕਤੋ વਾ ਅਦ੍ਧਾਨਮਗ੍ਗਂ। ਸਤ੍ਥਗਮਨੀਯੋਤਿ ਸਤ੍ਥੇਨ ਸਦ੍ਧਿਂ ਗਨ੍ਤਬ੍ਬੋ, ਸੇਸਂ ਉਤ੍ਤਾਨਪਦਤ੍ਥਮੇવ। ਅਯਂ ਪਨੇਤ੍ਥ વਿਨਿਚ੍ਛਯੋ – ਅਕਪ੍ਪਿਯਭੂਮਿਯਂ ਸਂવਿਦਹਨ੍ਤਸ੍ਸ ਸਂવਿਦਹਨਪਚ੍ਚਯਾ ਤਾવ ਦੁਕ੍ਕਟਂ। ਤਤ੍ਥ ਠਪੇਤ੍વਾ ਭਿਕ੍ਖੁਨੁਪਸ੍ਸਯਂ ਅਨ੍ਤਰਾਰਾਮਂ ਆਸਨਸਾਲਂ ਤਿਤ੍ਥਿਯਸੇਯ੍ਯਞ੍ਚ ਸੇਸਾ ਅਕਪ੍ਪਿਯਭੂਮਿ, ਤਤ੍ਥ ਠਤ੍વਾ ਸਂવਿਦਹਨ੍ਤਸ੍ਸਾਤਿ ਅਤ੍ਥੋ। ਸਂવਿਦਹਿਤ੍વਾ ਪਨ ‘‘ਅਜ੍ਜ વਾ ਸ੍વੇ વਾ’’ਤਿ ਨਿਯਮਿਤਂ ਕਾਲਂ વਿਸਙ੍ਕੇਤਂ ਅਕਤ੍વਾ, ਦ੍વਾਰવਿਸਙ੍ਕੇਤਂ ਪਨ ਮਗ੍ਗવਿਸਙ੍ਕੇਤਂ વਾ ਕਤ੍વਾਪਿ ਭਿਕ੍ਖੁਨਿਯਾ ਸਦ੍ਧਿਂ ਗਚ੍ਛਨ੍ਤਸ੍ਸ ਯਾવ ਆਸਨ੍ਨਸ੍ਸਾਪਿ ਅਞ੍ਞਸ੍ਸ ਗਾਮਸ੍ਸ ‘‘ਅਯਂ ਇਮਸ੍ਸ ਉਪਚਾਰੋ’’ਤਿ ਮਨੁਸ੍ਸੇਹਿ ਠਪਿਤਂ ਉਪਚਾਰਂ ਨ ਓਕ੍ਕਮਤਿ, ਤਾવ ਅਨਾਪਤ੍ਤਿ। ਤਂ ਓਕ੍ਕਮਨ੍ਤਸ੍ਸ ਪਨ ਪਠਮਪਾਦੇ ਦੁਕ੍ਕਟਂ, ਦੁਤਿਯਪਾਦੇ ਪਾਚਿਤ੍ਤਿਯਂ, ਇਤਿ ਗਾਮੂਪਚਾਰੋਕ੍ਕਮਨਗਣਨਾਯ ਪਾਚਿਤ੍ਤਿਯਾਨਿ। ਅਦ੍ਧਯੋਜਨਾਤਿਕ੍ਕਮੇ ਪਨ ਗਾਮੇ ਅਸਤਿ ਅਦ੍ਧਯੋਜਨਗਣਨਾਯ ਪਾਚਿਤ੍ਤਿਯਂ।
Sattame saṃvidhāyāti saṃvidahitvā, gamanakāle saṅketaṃ katvāti attho. Ekaddhānamagganti ekaṃ addhānasaṅkhātaṃ maggaṃ, ekato vā addhānamaggaṃ. Satthagamanīyoti satthena saddhiṃ gantabbo, sesaṃ uttānapadatthameva. Ayaṃ panettha vinicchayo – akappiyabhūmiyaṃ saṃvidahantassa saṃvidahanapaccayā tāva dukkaṭaṃ. Tattha ṭhapetvā bhikkhunupassayaṃ antarārāmaṃ āsanasālaṃ titthiyaseyyañca sesā akappiyabhūmi, tattha ṭhatvā saṃvidahantassāti attho. Saṃvidahitvā pana ‘‘ajja vā sve vā’’ti niyamitaṃ kālaṃ visaṅketaṃ akatvā, dvāravisaṅketaṃ pana maggavisaṅketaṃ vā katvāpi bhikkhuniyā saddhiṃ gacchantassa yāva āsannassāpi aññassa gāmassa ‘‘ayaṃ imassa upacāro’’ti manussehi ṭhapitaṃ upacāraṃ na okkamati, tāva anāpatti. Taṃ okkamantassa pana paṭhamapāde dukkaṭaṃ, dutiyapāde pācittiyaṃ, iti gāmūpacārokkamanagaṇanāya pācittiyāni. Addhayojanātikkame pana gāme asati addhayojanagaṇanāya pācittiyaṃ.
ਸਾવਤ੍ਥਿਯਂ ਛਬ੍ਬਗ੍ਗਿਯੇ ਭਿਕ੍ਖੂ ਆਰਬ੍ਭ ਏਕਦ੍ਧਾਨਮਗ੍ਗਪ੍ਪਟਿਪਜ੍ਜਨવਤ੍ਥੁਸ੍ਮਿਂ ਪਞ੍ਞਤ੍ਤਂ, ‘‘ਅਞ੍ਞਤ੍ਰ ਸਮਯਾ’’ਤਿ ਅਯਮੇਤ੍ਥ ਅਨੁਪਞ੍ਞਤ੍ਤਿ, ਅਸਾਧਾਰਣਪਞ੍ਞਤ੍ਤਿ, ਅਨਾਣਤ੍ਤਿਕਂ, ਤਿਕਪਾਚਿਤ੍ਤਿਯਂ, ਅਸਂવਿਦਹਿਤੇ ਸਂવਿਦਹਿਤਸਞ੍ਞਿਨੋ વੇਮਤਿਕਸ੍ਸ વਾ, ਯੋ ਚ ਭਿਕ੍ਖੁਨਿਯਾ ਅਸਂવਿਦਹਨ੍ਤਿਯਾ ਕੇવਲਂ ਅਤ੍ਤਨਾવ ਸਂવਿਦਹਤਿ, ਤਸ੍ਸ ਦੁਕ੍ਕਟਂ। ਸਮਯੇ ਸਂવਿਦਹਿਤ੍વਾਪਿ ਗਚ੍ਛਨ੍ਤਸ੍ਸ, ਅਤ੍ਤਨਾ ਅਸਂવਿਦਹਨ੍ਤਸ੍ਸ, વਿਸਙ੍ਕੇਤੇਨ વਾ, ਆਪਦਾਸੁ ਗਚ੍ਛਨ੍ਤਸ੍ਸ, ਉਮ੍ਮਤ੍ਤਕਾਦੀਨਞ੍ਚ ਅਨਾਪਤ੍ਤਿ। ਦ੍વਿਨ੍ਨਮ੍ਪਿ ਸਂવਿਦਹਿਤ੍વਾ ਮਗ੍ਗਪ੍ਪਟਿਪਤ੍ਤਿ, ਅવਿਸਙ੍ਕੇਤਤਾ, ਸਮਯਾਭਾવੋ, ਅਨਾਪਦਾ, ਗਾਮਨ੍ਤਰੋਕ੍ਕਮਨਂ વਾ ਅਦ੍ਧਯੋਜਨਾਤਿਕ੍ਕਮੋ વਾਤਿ ਇਮਾਨੇਤ੍ਥ ਪਞ੍ਚ ਅਙ੍ਗਾਨਿ। ਏਕਤੋਉਪਸਮ੍ਪਨ੍ਨਾਦੀਹਿ ਪਨ ਸਦ੍ਧਿਂ ਮਾਤੁਗਾਮਸਿਕ੍ਖਾਪਦੇਨ ਆਪਤ੍ਤਿ, ਅਦ੍ਧਾਨਸਮੁਟ੍ਠਾਨਂ, ਕਿਰਿਯਂ, ਨੋਸਞ੍ਞਾવਿਮੋਕ੍ਖਂ, ਅਚਿਤ੍ਤਕਂ, ਪਣ੍ਣਤ੍ਤਿવਜ੍ਜਂ, ਕਾਯਕਮ੍ਮਂ, વਚੀਕਮ੍ਮਂ, ਤਿਚਿਤ੍ਤਂ, ਤਿવੇਦਨਨ੍ਤਿ।
Sāvatthiyaṃ chabbaggiye bhikkhū ārabbha ekaddhānamaggappaṭipajjanavatthusmiṃ paññattaṃ, ‘‘aññatra samayā’’ti ayamettha anupaññatti, asādhāraṇapaññatti, anāṇattikaṃ, tikapācittiyaṃ, asaṃvidahite saṃvidahitasaññino vematikassa vā, yo ca bhikkhuniyā asaṃvidahantiyā kevalaṃ attanāva saṃvidahati, tassa dukkaṭaṃ. Samaye saṃvidahitvāpi gacchantassa, attanā asaṃvidahantassa, visaṅketena vā, āpadāsu gacchantassa, ummattakādīnañca anāpatti. Dvinnampi saṃvidahitvā maggappaṭipatti, avisaṅketatā, samayābhāvo, anāpadā, gāmantarokkamanaṃ vā addhayojanātikkamo vāti imānettha pañca aṅgāni. Ekatoupasampannādīhi pana saddhiṃ mātugāmasikkhāpadena āpatti, addhānasamuṭṭhānaṃ, kiriyaṃ, nosaññāvimokkhaṃ, acittakaṃ, paṇṇattivajjaṃ, kāyakammaṃ, vacīkammaṃ, ticittaṃ, tivedananti.
ਸਂવਿਧਾਨਸਿਕ੍ਖਾਪਦવਣ੍ਣਨਾ ਨਿਟ੍ਠਿਤਾ।
Saṃvidhānasikkhāpadavaṇṇanā niṭṭhitā.
੮. ਨਾવਾਭਿਰੁਹਨਸਿਕ੍ਖਾਪਦવਣ੍ਣਨਾ
8. Nāvābhiruhanasikkhāpadavaṇṇanā
ਅਟ੍ਠਮੇ ਸਂવਿਧਾਯਾਤਿ ਕੀਲ਼ਾਪੁਰੇਕ੍ਖਾਰੋ ਸਂવਿਦਹਿਤ੍વਾ, ਅਭਿਰੁਹਨਕਾਲੇ ਸਙ੍ਕੇਤਂ ਕਤ੍વਾਤਿ ਅਤ੍ਥੋ। ਉਦ੍ਧਂਗਾਮਿਨਿਨ੍ਤਿ ਕੀਲ਼ਾવਸੇਨ ਉਦ੍ਧਂ ਨਦਿਯਾ ਪਟਿਸੋਤਂ ਗਚ੍ਛਨ੍ਤਿਂ। ਅਧੋਗਾਮਿਨਿਨ੍ਤਿ ਤਥੇવ ਅਧੋ ਅਨੁਸੋਤਂ ਗਚ੍ਛਨ੍ਤਿਂ। ਯਂ ਪਨ ਤਿਤ੍ਥਪ੍ਪਟਿਪਾਦਨਤ੍ਥਂ ਉਦ੍ਧਂ વਾ ਅਧੋ વਾ ਹਰਨ੍ਤਿ, ਏਤ੍ਥ ਅਨਾਪਤ੍ਤਿ। ਅਞ੍ਞਤ੍ਰ ਤਿਰਿਯਂ ਤਰਣਾਯਾਤਿ ਉਪਯੋਗਤ੍ਥੇ ਨਿਸ੍ਸਕ੍ਕવਚਨਂ, ਯਾ ਤਿਰਿਯਂ ਤਰਣਾ, ਤਂ ਠਪੇਤ੍વਾਤਿ ਅਤ੍ਥੋ। ਪਾਚਿਤ੍ਤਿਯਨ੍ਤਿ ਸਗਾਮਕਤੀਰਪਸ੍ਸੇਨ ਗਮਨਕਾਲੇ ਗਾਮਨ੍ਤਰਗਣਨਾਯ, ਅਗਾਮਕਤੀਰਪਸ੍ਸੇਨ વਾ ਯੋਜਨવਿਤ੍ਥਤਾਯ ਨਦਿਯਾ ਮਜ੍ਝੇਨ વਾ ਗਮਨਕਾਲੇ ਅਦ੍ਧਯੋਜਨਗਣਨਾਯ ਪਾਚਿਤ੍ਤਿਯਂ, ਸਮੁਦ੍ਦੇ ਪਨ ਯਥਾਸੁਖਂ ਗਨ੍ਤੁਂ વਟ੍ਟਤਿ।
Aṭṭhame saṃvidhāyāti kīḷāpurekkhāro saṃvidahitvā, abhiruhanakāle saṅketaṃ katvāti attho. Uddhaṃgāmininti kīḷāvasena uddhaṃ nadiyā paṭisotaṃ gacchantiṃ. Adhogāmininti tatheva adho anusotaṃ gacchantiṃ. Yaṃ pana titthappaṭipādanatthaṃ uddhaṃ vā adho vā haranti, ettha anāpatti. Aññatra tiriyaṃ taraṇāyāti upayogatthe nissakkavacanaṃ, yā tiriyaṃ taraṇā, taṃ ṭhapetvāti attho. Pācittiyanti sagāmakatīrapassena gamanakāle gāmantaragaṇanāya, agāmakatīrapassena vā yojanavitthatāya nadiyā majjhena vā gamanakāle addhayojanagaṇanāya pācittiyaṃ, samudde pana yathāsukhaṃ gantuṃ vaṭṭati.
ਸਾવਤ੍ਥਿਯਂ ਛਬ੍ਬਗ੍ਗਿਯੇ ਭਿਕ੍ਖੂ ਆਰਬ੍ਭ ਨਾવਾਭਿਰੁਹਨવਤ੍ਥੁਸ੍ਮਿਂ ਪਞ੍ਞਤ੍ਤਂ, ‘‘ਅਞ੍ਞਤ੍ਰ ਤਿਰਿਯਂ ਤਰਣਾਯਾ’’ਤਿ ਅਯਮੇਤ੍ਥ ਅਨੁਪਞ੍ਞਤ੍ਤਿ, ਸੇਸਂ ਅਨਨ੍ਤਰਸਿਕ੍ਖਾਪਦੇ વੁਤ੍ਤਨਯੇਨੇવ વੇਦਿਤਬ੍ਬਨ੍ਤਿ।
Sāvatthiyaṃ chabbaggiye bhikkhū ārabbha nāvābhiruhanavatthusmiṃ paññattaṃ, ‘‘aññatra tiriyaṃ taraṇāyā’’ti ayamettha anupaññatti, sesaṃ anantarasikkhāpade vuttanayeneva veditabbanti.
ਨਾવਾਭਿਰੁਹਨਸਿਕ੍ਖਾਪਦવਣ੍ਣਨਾ ਨਿਟ੍ਠਿਤਾ।
Nāvābhiruhanasikkhāpadavaṇṇanā niṭṭhitā.
੯. ਪਰਿਪਾਚਿਤਸਿਕ੍ਖਾਪਦવਣ੍ਣਨਾ
9. Paripācitasikkhāpadavaṇṇanā
ਨવਮੇ ਭਿਕ੍ਖੁਨਿਪਰਿਪਾਚਿਤਨ੍ਤਿ ਭਿਕ੍ਖੁਨਿਯਾ ਪਰਿਪਾਚਿਤਂ, ਨੇવ ਤਸ੍ਸ ਨਾਤ੍ਤਨੋ ਞਾਤਕਪ੍ਪવਾਰਿਤਾਨਂ ਗਿਹੀਨਂ ਸਨ੍ਤਿਕੇ ਭਿਕ੍ਖੁਸ੍ਸ ਗੁਣਂ ਪਕਾਸੇਤ੍વਾ ‘‘ਦੇਥ ਅਯ੍ਯਸ੍ਸ, ਕਰੋਥ ਅਯ੍ਯਸ੍ਸਾ’’ਤਿ ਏવਂ ਨਿਪ੍ਫਾਦਿਤਂ ਲਦ੍ਧਬ੍ਬਂ ਕਤਨ੍ਤਿ ਅਤ੍ਥੋ। ਪੁਬ੍ਬੇ ਗਿਹਿਸਮਾਰਮ੍ਭਾਤਿ ਏਤ੍ਥ ਸਮਾਰਮ੍ਭੋਤਿ ਸਮਾਰਦ੍ਧਂ, ਪਟਿਯਾਦਿਤਸ੍ਸੇਤਂ ਨਾਮਂ। ਗਿਹੀਨਂ ਸਮਾਰਮ੍ਭੋ ਗਿਹਿਸਮਾਰਮ੍ਭੋ, ਭਿਕ੍ਖੁਨਿਯਾ ਪਰਿਪਾਚਨਤੋ ਪੁਬ੍ਬੇ ਪਠਮਤਰਂਯੇવ ਯਂ ਭਿਕ੍ਖੂਨਂ ਅਤ੍ਥਾਯ ਗਿਹੀਨਂ ਪਟਿਯਾਦਿਤਭਤ੍ਤਂ, ਞਾਤਕਪ੍ਪવਾਰਿਤਾਨਂ વਾ ਸਨ੍ਤਕਂ, ਤਂ ਠਪੇਤ੍વਾ ਅਞ੍ਞਂ ਜਾਨਂ ਭੁਞ੍ਜਨ੍ਤਸ੍ਸ ਪਾਚਿਤ੍ਤਿਯਨ੍ਤਿ ਅਤ੍ਥੋ। ਤਞ੍ਚ ਖੋ ਅਜ੍ਝੋਹਰਣਗਣਨਾਯ, ਪਟਿਗ੍ਗਹਣੇ ਪਨਸ੍ਸ ਦੁਕ੍ਕਟਂ।
Navame bhikkhuniparipācitanti bhikkhuniyā paripācitaṃ, neva tassa nāttano ñātakappavāritānaṃ gihīnaṃ santike bhikkhussa guṇaṃ pakāsetvā ‘‘detha ayyassa, karotha ayyassā’’ti evaṃ nipphāditaṃ laddhabbaṃ katanti attho. Pubbe gihisamārambhāti ettha samārambhoti samāraddhaṃ, paṭiyāditassetaṃ nāmaṃ. Gihīnaṃ samārambho gihisamārambho, bhikkhuniyā paripācanato pubbe paṭhamataraṃyeva yaṃ bhikkhūnaṃ atthāya gihīnaṃ paṭiyāditabhattaṃ, ñātakappavāritānaṃ vā santakaṃ, taṃ ṭhapetvā aññaṃ jānaṃ bhuñjantassa pācittiyanti attho. Tañca kho ajjhoharaṇagaṇanāya, paṭiggahaṇe panassa dukkaṭaṃ.
ਰਾਜਗਹੇ ਦੇવਦਤ੍ਤਂ ਆਰਬ੍ਭ ਭਿਕ੍ਖੁਨਿਪਰਿਪਾਚਿਤਪਿਣ੍ਡਪਾਤਭੁਞ੍ਜਨવਤ੍ਥੁਸ੍ਮਿਂ ਪਞ੍ਞਤ੍ਤਂ, ‘‘ਅਞ੍ਞਤ੍ਰ ਪੁਬ੍ਬੇ ਗਿਹਿਸਮਾਰਮ੍ਭਾ’’ਤਿ ਅਯਮੇਤ੍ਥ ਅਨੁਪਞ੍ਞਤ੍ਤਿ, ਅਸਾਧਾਰਣਪਞ੍ਞਤ੍ਤਿ, ਅਨਾਣਤ੍ਤਿਕਂ, ਏਕਤੋਉਪਸਮ੍ਪਨ੍ਨਾਯ ਪਰਿਪਾਚਿਤਂ ਭੁਞ੍ਜਨ੍ਤਸ੍ਸ , ਅਪਰਿਪਾਚਿਤੇ ਪਰਿਪਾਚਿਤਸਞ੍ਞਿਨੋ, ਉਭਯਤ੍ਥ વੇਮਤਿਕਸ੍ਸ ਚ ਦੁਕ੍ਕਟਂ। ਉਭਯਤ੍ਥ ਅਪਰਿਪਾਚਿਤਸਞ੍ਞਿਨੋ, ਗਿਹਿਸਮਾਰਮ੍ਭੇ, ਸਿਕ੍ਖਮਾਨਸਾਮਣੇਰਾਦੀਹਿ ਪਰਿਪਾਚਿਤੇ, ਪਞ੍ਚ ਭੋਜਨਾਨਿ ਠਪੇਤ੍વਾ ਅવਸੇਸੇ, ਉਮ੍ਮਤ੍ਤਕਾਦੀਨਞ੍ਚ ਅਨਾਪਤ੍ਤਿ। ਭਿਕ੍ਖੁਨਿਯਾ ਪਰਿਪਾਚਿਤਤਾ, ਪਰਿਪਾਚਿਤਭਾવਜਾਨਨਂ, ਗਿਹਿਸਮਾਰਮ੍ਭਾਭਾવੋ, ਓਦਨਾਦੀਨਂ ਅਞ੍ਞਤਰਤਾ, ਤਸ੍ਸ ਅਜ੍ਝੋਹਰਣਨ੍ਤਿ ਇਮਾਨੇਤ੍ਥ ਪਞ੍ਚ ਅਙ੍ਗਾਨਿ। ਸਮੁਟ੍ਠਾਨਾਦੀਨਿ ਪਠਮਪਾਰਾਜਿਕਸਅਸਾਨਿ, ਇਦਂ ਪਨ ਪਣ੍ਣਤ੍ਤਿવਜ੍ਜਂ, ਤਿਚਿਤ੍ਤਂ, ਤਿવੇਦਨਨ੍ਤਿ।
Rājagahe devadattaṃ ārabbha bhikkhuniparipācitapiṇḍapātabhuñjanavatthusmiṃ paññattaṃ, ‘‘aññatra pubbe gihisamārambhā’’ti ayamettha anupaññatti, asādhāraṇapaññatti, anāṇattikaṃ, ekatoupasampannāya paripācitaṃ bhuñjantassa , aparipācite paripācitasaññino, ubhayattha vematikassa ca dukkaṭaṃ. Ubhayattha aparipācitasaññino, gihisamārambhe, sikkhamānasāmaṇerādīhi paripācite, pañca bhojanāni ṭhapetvā avasese, ummattakādīnañca anāpatti. Bhikkhuniyā paripācitatā, paripācitabhāvajānanaṃ, gihisamārambhābhāvo, odanādīnaṃ aññataratā, tassa ajjhoharaṇanti imānettha pañca aṅgāni. Samuṭṭhānādīni paṭhamapārājikasaasāni, idaṃ pana paṇṇattivajjaṃ, ticittaṃ, tivedananti.
ਪਰਿਪਾਚਿਤਸਿਕ੍ਖਾਪਦવਣ੍ਣਨਾ ਨਿਟ੍ਠਿਤਾ।
Paripācitasikkhāpadavaṇṇanā niṭṭhitā.
੧੦. ਰਹੋਨਿਸਜ੍ਜਸਿਕ੍ਖਾਪਦવਣ੍ਣਨਾ
10. Rahonisajjasikkhāpadavaṇṇanā
ਦਸਮੇ ਸਬ੍ਬੋਪਿ ਕਥਾਮਗ੍ਗੋ ਦੁਤਿਯਅਨਿਯਤੇ વੁਤ੍ਤਨਯੇਨੇવ વੇਦਿਤਬ੍ਬੋ। ਇਦਞ੍ਹਿ ਸਿਕ੍ਖਾਪਦਂ ਦੁਤਿਯਅਨਿਯਤੇਨ ਚ ਉਪਰਿ ਉਪਨਨ੍ਦਸ੍ਸ ਚਤੁਤ੍ਥਸਿਕ੍ਖਾਪਦੇਨ ਚ ਏਕਪਰਿਚ੍ਛੇਦਂ, ਅਟ੍ਠੁਪ੍ਪਤ੍ਤਿવਸੇਨ ਪਨ વਿਸੁਂ ਪਞ੍ਞਤ੍ਤਨ੍ਤਿ।
Dasame sabbopi kathāmaggo dutiyaaniyate vuttanayeneva veditabbo. Idañhi sikkhāpadaṃ dutiyaaniyatena ca upari upanandassa catutthasikkhāpadena ca ekaparicchedaṃ, aṭṭhuppattivasena pana visuṃ paññattanti.
ਰਹੋਨਿਸਜ੍ਜਸਿਕ੍ਖਾਪਦવਣ੍ਣਨਾ ਨਿਟ੍ਠਿਤਾ।
Rahonisajjasikkhāpadavaṇṇanā niṭṭhitā.
ਓવਾਦવਗ੍ਗੋ ਤਤਿਯੋ।
Ovādavaggo tatiyo.
