| Library / Tipiṭaka / තිපිටක • Tipiṭaka / මහාවග්‌ගපාළි • Mahāvaggapāḷi |
251. පබ්‌බාජනීයකම්‌මපටිප්‌පස්‌සද්‌ධිකථා
251. Pabbājanīyakammapaṭippassaddhikathā
424. ඉධ පන, භික්‌ඛවෙ, භික්‌ඛු සඞ්‌ඝෙන පබ්‌බාජනීයකම්‌මකතො සම්‌මා වත්‌තති, ලොමං පාතෙති , නෙත්‌ථාරං වත්‌තති, පබ්‌බාජනීයස්‌ස කම්‌මස්‌ස පටිප්‌පස්‌සද්‌ධිං යාචති. තත්‍ර චෙ භික්‌ඛූනං එවං හොති – ‘‘අයං ඛො, ආවුසො, භික්‌ඛු සඞ්‌ඝෙන පබ්‌බාජනීයකම්‌මකතො සම්‌මා වත්‌තති, ලොමං පාතෙති, නෙත්‌ථාරං වත්‌තති, පබ්‌බාජනීයස්‌ස කම්‌මස්‌ස පටිප්‌පස්‌සද්‌ධිං යාචති. හන්‌දස්‌ස මයං පබ්‌බාජනීයකම්‌මං පටිප්‌පස්‌සම්‌භෙමා’’ති. තෙ තස්‌ස පබ්‌බාජනීයකම්‌මං පටිප්‌පස්‌සම්‌භෙන්‌ති – අධම්‌මෙන වග්‌ගා. සො තම්‌හා ආවාසා අඤ්‌ඤං ආවාසං ගච්‌ඡති. තත්‌ථපි භික්‌ඛූනං එවං හොති – ‘‘ඉමස්‌ස ඛො, ආවුසො, භික්‌ඛුනො සඞ්‌ඝෙන පබ්‌බාජනීයකම්‌මං පටිප්‌පස්‌සද්‌ධං අධම්‌මෙන වග්‌ගෙහි. හන්‌දස්‌ස මයං පබ්‌බාජනීයකම්‌මං පටිප්‌පස්‌සම්‌භෙමා’’ති. තෙ තස්‌ස පබ්‌බාජනීයකම්‌මං පටිප්‌පස්‌සම්‌භෙන්‌ති – අධම්‌මෙන සමග්‌ගා…පෙ.… ධම්‌මෙන වග්‌ගා… ධම්‌මපතිරූපකෙන වග්‌ගා… ධම්‌මපතිරූපකෙන සමග්‌ගා…පෙ.….
424. Idha pana, bhikkhave, bhikkhu saṅghena pabbājanīyakammakato sammā vattati, lomaṃ pāteti , netthāraṃ vattati, pabbājanīyassa kammassa paṭippassaddhiṃ yācati. Tatra ce bhikkhūnaṃ evaṃ hoti – ‘‘ayaṃ kho, āvuso, bhikkhu saṅghena pabbājanīyakammakato sammā vattati, lomaṃ pāteti, netthāraṃ vattati, pabbājanīyassa kammassa paṭippassaddhiṃ yācati. Handassa mayaṃ pabbājanīyakammaṃ paṭippassambhemā’’ti. Te tassa pabbājanīyakammaṃ paṭippassambhenti – adhammena vaggā. So tamhā āvāsā aññaṃ āvāsaṃ gacchati. Tatthapi bhikkhūnaṃ evaṃ hoti – ‘‘imassa kho, āvuso, bhikkhuno saṅghena pabbājanīyakammaṃ paṭippassaddhaṃ adhammena vaggehi. Handassa mayaṃ pabbājanīyakammaṃ paṭippassambhemā’’ti. Te tassa pabbājanīyakammaṃ paṭippassambhenti – adhammena samaggā…pe… dhammena vaggā… dhammapatirūpakena vaggā… dhammapatirūpakena samaggā…pe….
චක්‌කං කාතබ්‌බං.
Cakkaṃ kātabbaṃ.
පබ්‌බාජනීයකම්‌මපටිප්‌පස්‌සද්‌ධිකථා නිට්‌ඨිතා.
Pabbājanīyakammapaṭippassaddhikathā niṭṭhitā.
