| Library / Tipiṭaka / တိပိဋက • Tipiṭaka / အင္ဂုတ္တရနိကာယ • Aṅguttaranikāya |
၈. ပဗ္ဗဇိတအဘိဏ္ဟသုတ္တံ
8. Pabbajitaabhiṇhasuttaṃ
၄၈. ‘‘ဒသယိမေ, ဘိက္ခဝေ, ဓမ္မာ ပဗ္ဗဇိတေန အဘိဏ္ဟံ ပစ္စဝေက္ခိတဗ္ဗာ ။ ကတမေ ဒသ? ‘ဝေဝဏ္ဏိယမ္ဟိ အဇ္ဈုပဂတော’တိ ပဗ္ဗဇိတေန အဘိဏ္ဟံ ပစ္စဝေက္ခိတဗ္ဗံ; ‘ပရပဋိဗဒ္ဓာ မေ ဇီဝိကာ’တိ ပဗ္ဗဇိတေန အဘိဏ္ဟံ ပစ္စဝေက္ခိတဗ္ဗံ; ‘အညော မေ အာကပ္ပော ကရဏီယော’တိ ပဗ္ဗဇိတေန အဘိဏ္ဟံ ပစ္စဝေက္ခိတဗ္ဗံ; ‘ကစ္စိ နု ခော မေ အတ္တာ သီလတော န ဥပဝဒတီ’တိ ပဗ္ဗဇိတေန အဘိဏ္ဟံ ပစ္စဝေက္ခိတဗ္ဗံ; ‘ကစ္စိ နု ခော မံ အနုဝိစ္စ ဝိညူ သဗ္ရဟ္မစာရီ သီလတော န ဥပဝဒန္တီ’တိ ပဗ္ဗဇိတေန အဘိဏ္ဟံ ပစ္စဝေက္ခိတဗ္ဗံ; ‘သဗ္ဗေဟိ မေ ပိယေဟိ မနာပေဟိ နာနာဘာဝော ဝိနာဘာဝော’တိ ပဗ္ဗဇိတေန အဘိဏ္ဟံ ပစ္စဝေက္ခိတဗ္ဗံ; ‘ကမ္မသ္သကောမ္ဟိ ကမ္မဒာယာဒော ကမ္မယောနိ ကမ္မဗန္ဓု ကမ္မပဋိသရဏော, ယံ ကမ္မံ ကရိသ္သာမိ ကလ္ယာဏံ ဝာ ပာပကံ ဝာ တသ္သ ဒာယာဒော ဘဝိသ္သာမီ’တိ ပဗ္ဗဇိတေန အဘိဏ္ဟံ ပစ္စဝေက္ခိတဗ္ဗံ; ‘ကထံဘူတသ္သ မေ ရတ္တိန္ဒိဝာ ဝီတိဝတ္တန္တီ’တိ ပဗ္ဗဇိတေန အဘိဏ္ဟံ ပစ္စဝေက္ခိတဗ္ဗံ; ‘ကစ္စိ နု ခော အဟံ သုညာဂာရေ အဘိရမာမီ’တိ ပဗ္ဗဇိတေန အဘိဏ္ဟံ ပစ္စဝေက္ခိတဗ္ဗံ; ‘အတ္ထိ နု ခော မေ ဥတ္တရိ မနုသ္သဓမ္မော အလမရိယဉာဏဒသ္သနဝိသေသော အဓိဂတော, ယေနာဟံ 1 ပစ္ဆိမေ ကာလေ သဗ္ရဟ္မစာရီဟိ ပုဋ္ဌော န မင္ကု ဘဝိသ္သာမီ’တိ ပဗ္ဗဇိတေန အဘိဏ္ဟံ ပစ္စဝေက္ခိတဗ္ဗံ။ ဣမေ ခော, ဘိက္ခဝေ, ဒသ ဓမ္မာ ပဗ္ဗဇိတေန အဘိဏ္ဟံ ပစ္စဝေက္ခိတဗ္ဗာ’’တိ။ အဋ္ဌမံ။
48. ‘‘Dasayime, bhikkhave, dhammā pabbajitena abhiṇhaṃ paccavekkhitabbā . Katame dasa? ‘Vevaṇṇiyamhi ajjhupagato’ti pabbajitena abhiṇhaṃ paccavekkhitabbaṃ; ‘parapaṭibaddhā me jīvikā’ti pabbajitena abhiṇhaṃ paccavekkhitabbaṃ; ‘añño me ākappo karaṇīyo’ti pabbajitena abhiṇhaṃ paccavekkhitabbaṃ; ‘kacci nu kho me attā sīlato na upavadatī’ti pabbajitena abhiṇhaṃ paccavekkhitabbaṃ; ‘kacci nu kho maṃ anuvicca viññū sabrahmacārī sīlato na upavadantī’ti pabbajitena abhiṇhaṃ paccavekkhitabbaṃ; ‘sabbehi me piyehi manāpehi nānābhāvo vinābhāvo’ti pabbajitena abhiṇhaṃ paccavekkhitabbaṃ; ‘kammassakomhi kammadāyādo kammayoni kammabandhu kammapaṭisaraṇo, yaṃ kammaṃ karissāmi kalyāṇaṃ vā pāpakaṃ vā tassa dāyādo bhavissāmī’ti pabbajitena abhiṇhaṃ paccavekkhitabbaṃ; ‘kathaṃbhūtassa me rattindivā vītivattantī’ti pabbajitena abhiṇhaṃ paccavekkhitabbaṃ; ‘kacci nu kho ahaṃ suññāgāre abhiramāmī’ti pabbajitena abhiṇhaṃ paccavekkhitabbaṃ; ‘atthi nu kho me uttari manussadhammo alamariyañāṇadassanaviseso adhigato, yenāhaṃ 2 pacchime kāle sabrahmacārīhi puṭṭho na maṅku bhavissāmī’ti pabbajitena abhiṇhaṃ paccavekkhitabbaṃ. Ime kho, bhikkhave, dasa dhammā pabbajitena abhiṇhaṃ paccavekkhitabbā’’ti. Aṭṭhamaṃ.
Footnotes:
Related texts:
အဋ္ဌကထာ • Aṭṭhakathā / သုတ္တပိဋက (အဋ္ဌကထာ) • Suttapiṭaka (aṭṭhakathā) / အင္ဂုတ္တရနိကာယ (အဋ္ဌကထာ) • Aṅguttaranikāya (aṭṭhakathā) / ၈. ပဗ္ဗဇိတအဘိဏ္ဟသုတ္တဝဏ္ဏနာ • 8. Pabbajitaabhiṇhasuttavaṇṇanā
ဋီကာ • Tīkā / သုတ္တပိဋက (ဋီကာ) • Suttapiṭaka (ṭīkā) / အင္ဂုတ္တရနိကာယ (ဋီကာ) • Aṅguttaranikāya (ṭīkā) / ၁-၈. ဝိဝာဒသုတ္တာဒိဝဏ္ဏနာ • 1-8. Vivādasuttādivaṇṇanā
