| Library / Tipiṭaka / திபிடக • Tipiṭaka / அங்கு³த்தரனிகாய (அட்ட²கதா²) • Aṅguttaranikāya (aṭṭhakathā) |
8. பப்³ப³ஜிதஅபி⁴ண்ஹஸுத்தவண்ணனா
8. Pabbajitaabhiṇhasuttavaṇṇanā
48. அட்ட²மே பப்³ப³ஜிதேனாதி க⁴ராவாஸங் பஹாய ஸாஸனே பப்³ப³ஜ்ஜங் உபக³தேன. அபி⁴ண்ஹந்தி அபி⁴க்க²ணங் புனப்புனங், பச்சவெக்கி²தப்³பா³ ஓலோகேதப்³பா³ ஸல்லக்கே²தப்³பா³. வேவண்ணியந்தி விவண்ணபா⁴வங். தங் பனேதங் வேவண்ணியங் து³வித⁴ங் ஹோதி ஸரீரவேவண்ணியங் பரிக்கா²ரவேவண்ணியஞ்ச. தத்த² கேஸமஸ்ஸுஓரோபனேன ஸரீரவேவண்ணியங் வேதி³தப்³ப³ங். புப்³பே³ பன நானாவிராகா³னி ஸுகு²மவத்தா²னி நிவாஸெத்வாபி நானக்³க³ரஸபோ⁴ஜனங் ஸுவண்ணரஜதபா⁴ஜனேஸு பு⁴ஞ்ஜித்வாபி ஸிரிக³ப்³பே⁴ வரஸயனாஸனேஸு நிபஜ்ஜித்வாபி நிஸீதி³த்வாபி ஸப்பினவனீதாதீ³ஹி பே⁴ஸஜ்ஜங் கத்வாபி பப்³ப³ஜிதகாலதோ பட்டா²ய சி²ன்னஸங்க⁴டிதகஸாவரஸபீதானி வத்தா²னி நிவாஸேதப்³பா³னி, அயபத்தே வா மத்திகபத்தே வா மிஸ்ஸகோத³னோ பு⁴ஞ்ஜிதப்³போ³, ருக்க²மூலாதி³ஸேனாஸனே முஞ்ஜதிணஸந்த²ரணாதீ³ஸு நிபஜ்ஜிதப்³ப³ங் , சம்மக²ண்ட³தட்டிகாதீ³ஸு நிஸீதி³தப்³ப³ங், பூதிமுத்தாதீ³ஹி பே⁴ஸஜ்ஜங் கத்தப்³ப³ங் ஹோதி. ஏவமெத்த² பரிக்கா²ரவேவண்ணியங் வேதி³தப்³ப³ங். ஏவங் பச்சவெக்க²தோ கோபோ ச மானோ ச பஹீயதி.
48. Aṭṭhame pabbajitenāti gharāvāsaṃ pahāya sāsane pabbajjaṃ upagatena. Abhiṇhanti abhikkhaṇaṃ punappunaṃ, paccavekkhitabbā oloketabbā sallakkhetabbā. Vevaṇṇiyanti vivaṇṇabhāvaṃ. Taṃ panetaṃ vevaṇṇiyaṃ duvidhaṃ hoti sarīravevaṇṇiyaṃ parikkhāravevaṇṇiyañca. Tattha kesamassuoropanena sarīravevaṇṇiyaṃ veditabbaṃ. Pubbe pana nānāvirāgāni sukhumavatthāni nivāsetvāpi nānaggarasabhojanaṃ suvaṇṇarajatabhājanesu bhuñjitvāpi sirigabbhe varasayanāsanesu nipajjitvāpi nisīditvāpi sappinavanītādīhi bhesajjaṃ katvāpi pabbajitakālato paṭṭhāya chinnasaṅghaṭitakasāvarasapītāni vatthāni nivāsetabbāni, ayapatte vā mattikapatte vā missakodano bhuñjitabbo, rukkhamūlādisenāsane muñjatiṇasantharaṇādīsu nipajjitabbaṃ , cammakhaṇḍataṭṭikādīsu nisīditabbaṃ, pūtimuttādīhi bhesajjaṃ kattabbaṃ hoti. Evamettha parikkhāravevaṇṇiyaṃ veditabbaṃ. Evaṃ paccavekkhato kopo ca māno ca pahīyati.
பரபடிப³த்³தா⁴ மே ஜீவிகாதி மய்ஹங் பரேஸு படிப³த்³தா⁴ பராயத்தா சதுபச்சயஜீவிகாதி. ஏவங் பச்சவெக்க²தோ ஹி ஆஜீவோ பரிஸுஜ்ஜ²தி, பிண்ட³பாதோ ச அபசிதோ ஹோதி, சதூஸு பச்சயேஸு அபச்சவெக்கி²தபரிபோ⁴கோ³ நாம ந ஹோதி. அஞ்ஞோ மே ஆகப்போ கரணீயோதி யோ கி³ஹீனங் உரங் அபி⁴னீஹரித்வா கீ³வங் பக்³க³ஹெத்வா லலிதேனாகாரேன அனியதபத³வீதிஹாரேன க³மனாகப்போ ஹோதி, ததோ அஞ்ஞோவ ஆகப்போ மயா கரணீயோ, ஸந்திந்த்³ரியேன ஸந்தமானஸேன யுக³மத்தத³ஸ்ஸினா விஸமட்டா²னே உத³கஸகடேனேவ மந்த³மிதபத³வீதிஹாரேன ஹுத்வா க³ந்தப்³ப³ந்தி பச்சவெக்கி²தப்³ப³ங். ஏவங் பச்சவெக்க²தோ ஹி இரியாபதோ² ஸாருப்போ ஹோதி, திஸ்ஸோ ஸிக்கா² பரிபூரெந்தி. கச்சினுகோ²தி ஸலக்க²ணே நிபாதஸமுதா³யோ. அத்தாதி சித்தங். ஸீலதோ ந உபவத³தீதி அபரிஸுத்³த⁴ங் தே ஸீலந்தி ஸீலபச்சயோ ந உபவத³தி. ஏவங் பச்சவெக்க²தோ ஹி அஜ்ஜ²த்தங் ஹிரீ ஸமுட்டா²தி, ஸா தீஸு த்³வாரேஸு ஸங்வரங் ஸாதே⁴தி, தீஸு த்³வாரேஸு ஸங்வரோ சதுபாரிஸுத்³தி⁴ஸீலங் ஹோதி, சதுபாரிஸுத்³தி⁴ஸீலே டி²தோ விபஸ்ஸனங் வட்³டெ⁴த்வா அரஹத்தங் க³ண்ஹாதி. அனுவிச்ச விஞ்ஞூ ஸப்³ரஹ்மசாரீதி பண்டி³தா ஸப்³ரஹ்மசாரினோ அனுவிசாரெத்வா. ஏவங் பச்சவெக்க²தோ ஹி ப³ஹித்³தா⁴ ஒத்தப்பங் ஸண்டா²தி, தங் தீஸு த்³வாரேஸு ஸங்வரங் ஸாதே⁴தீதி அனந்தரனயேனேவ வேதி³தப்³ப³ங்.
Parapaṭibaddhā me jīvikāti mayhaṃ paresu paṭibaddhā parāyattā catupaccayajīvikāti. Evaṃ paccavekkhato hi ājīvo parisujjhati, piṇḍapāto ca apacito hoti, catūsu paccayesu apaccavekkhitaparibhogo nāma na hoti. Añño me ākappo karaṇīyoti yo gihīnaṃ uraṃ abhinīharitvā gīvaṃ paggahetvā lalitenākārena aniyatapadavītihārena gamanākappo hoti, tato aññova ākappo mayā karaṇīyo, santindriyena santamānasena yugamattadassinā visamaṭṭhāne udakasakaṭeneva mandamitapadavītihārena hutvā gantabbanti paccavekkhitabbaṃ. Evaṃ paccavekkhato hi iriyāpatho sāruppo hoti, tisso sikkhā paripūrenti. Kaccinukhoti salakkhaṇe nipātasamudāyo. Attāti cittaṃ. Sīlato na upavadatīti aparisuddhaṃ te sīlanti sīlapaccayo na upavadati. Evaṃ paccavekkhato hi ajjhattaṃ hirī samuṭṭhāti, sā tīsu dvāresu saṃvaraṃ sādheti, tīsu dvāresu saṃvaro catupārisuddhisīlaṃ hoti, catupārisuddhisīle ṭhito vipassanaṃ vaḍḍhetvā arahattaṃ gaṇhāti. Anuvicca viññū sabrahmacārīti paṇḍitā sabrahmacārino anuvicāretvā. Evaṃ paccavekkhato hi bahiddhā ottappaṃ saṇṭhāti, taṃ tīsu dvāresu saṃvaraṃ sādhetīti anantaranayeneva veditabbaṃ.
நானாபா⁴வோ வினாபா⁴வோதி ஜாதியா நானாபா⁴வோ, மரணேன வினாபா⁴வோ. ஏவங் பச்சவெக்க²தோ ஹி தீஸு த்³வாரேஸு அஸங்வுதாகாரோ நாம ந ஹோதி, மரணஸ்ஸதி ஸூபட்டி²தா ஹோதி. கம்மஸ்ஸகொம்ஹீதிஆதீ³ஸு கம்மங் மய்ஹங் ஸகங் அத்தனோ ஸந்தகந்தி கம்மஸ்ஸகா. கம்மேன தா³தப்³ப³ங் ப²லங் தா³யங், கம்மஸ்ஸ தா³யங் கம்மதா³யங், தங் ஆதீ³யாமீதி கம்மதா³யாதோ³. கம்மங் மய்ஹங் யோனி காரணந்தி கம்மயோனி. கம்மங் மய்ஹங் ப³ந்து⁴ ஞாதகோதி கம்மப³ந்து⁴. கம்மங் மய்ஹங் படிஸரணங் பதிட்டா²தி கம்மபடிஸரணோ. தஸ்ஸ தா³யாதோ³ ப⁴விஸ்ஸாமீதி தஸ்ஸ கம்மஸ்ஸ தா³யாதோ³ தேன தி³ன்னப²லங் படிக்³கா³ஹகோ ப⁴விஸ்ஸாமி. ஏவங் கம்மஸ்ஸகதங் பன பச்சவெக்க²தோ பாபகரணங் நாம ந ஹோதி. கத²ங்பூ⁴தஸ்ஸ மே ரத்திந்தி³வா வீதிவத்தந்தீதி கின்னு கோ² மே வத்தப்படிபத்திங் கரொந்தஸ்ஸ, உதா³ஹு அகரொந்தஸ்ஸ, பு³த்³த⁴வசனங் ஸஜ்ஜா²யந்தஸ்ஸ, உதா³ஹு அஸஜ்ஜா²யந்தஸ்ஸ, யோனிஸோமனஸிகாரே கம்மங் கரொந்தஸ்ஸ, உதா³ஹு அகரொந்தஸ்ஸாதி கத²ங்பூ⁴தஸ்ஸ மே ரத்திந்தி³வா வீதிவத்தந்தி, பரிவத்தந்தீதி அத்தோ². ஏவங் பச்சவெக்க²தோ ஹி அப்பமாதோ³ பரிபூரதி.
Nānābhāvo vinābhāvoti jātiyā nānābhāvo, maraṇena vinābhāvo. Evaṃ paccavekkhato hi tīsu dvāresu asaṃvutākāro nāma na hoti, maraṇassati sūpaṭṭhitā hoti. Kammassakomhītiādīsu kammaṃ mayhaṃ sakaṃ attano santakanti kammassakā. Kammena dātabbaṃ phalaṃ dāyaṃ, kammassa dāyaṃ kammadāyaṃ, taṃ ādīyāmīti kammadāyādo. Kammaṃ mayhaṃ yoni kāraṇanti kammayoni. Kammaṃ mayhaṃ bandhu ñātakoti kammabandhu. Kammaṃ mayhaṃ paṭisaraṇaṃ patiṭṭhāti kammapaṭisaraṇo. Tassa dāyādo bhavissāmīti tassa kammassa dāyādo tena dinnaphalaṃ paṭiggāhako bhavissāmi. Evaṃ kammassakataṃ pana paccavekkhato pāpakaraṇaṃ nāma na hoti. Kathaṃbhūtassa me rattindivā vītivattantīti kinnu kho me vattappaṭipattiṃ karontassa, udāhu akarontassa, buddhavacanaṃ sajjhāyantassa, udāhu asajjhāyantassa, yonisomanasikāre kammaṃ karontassa, udāhu akarontassāti kathaṃbhūtassa me rattindivā vītivattanti, parivattantīti attho. Evaṃ paccavekkhato hi appamādo paripūrati.
ஸுஞ்ஞாகா³ரே அபி⁴ரமாமீதி விவித்தோகாஸே ஸப்³பி³ரியாபதே²ஸு ஏககோவ ஹுத்வா கச்சி நு கோ² அபி⁴ரமாமீதி அத்தோ². ஏவங் பச்சவெக்க²தோ காயவிவேகோ பரிபூரதி. உத்தரிமனுஸ்ஸத⁴ம்மோதி உத்தரிமனுஸ்ஸானங் உக்கட்ட²மனுஸ்ஸபூ⁴தானங் ஜா²யீனஞ்சேவ அரியானஞ்ச ஜா²னாதி³த⁴ம்மோ, த³ஸகுஸலகம்மபத²ஸங்கா²தமனுஸ்ஸத⁴ம்மதோ வா உத்தரிதரோ விஸிட்ட²தரோ த⁴ம்மோ மே மம ஸந்தானே அத்தி² நு கோ², ஸந்தி நு கோ²தி அத்தோ². அலமரியஞாணத³ஸ்ஸனவிஸேஸோதி மஹக்³க³தலோகுத்தரபஞ்ஞா பஜானநட்டே²ன ஞாணங், சக்கு²னா தி³ட்ட²மிவ த⁴ம்மங் பச்சக்க²கரணதோ த³ஸ்ஸனட்டே²ன த³ஸ்ஸனந்தி ஞாணத³ஸ்ஸனங், அரியங் விஸுத்³த⁴ங் உத்தமங் ஞாணத³ஸ்ஸனந்தி அரியஞாணத³ஸ்ஸனங், அலங் பரியத்தகங் கிலேஸவித்³த⁴ங்ஸனஸமத்த²ங் அரியஞாணத³ஸ்ஸனமெத்த², அஸ்ஸ வாதி அலமரியஞாணத³ஸ்ஸனோ, ஜா²னாதி³பே⁴தோ³ உத்தரிமனுஸ்ஸத⁴ம்மோ அலமரியஞாணத³ஸ்ஸனோ ச ஸோ விஸேஸோ சாதி அலமரியஞாணத³ஸ்ஸனவிஸேஸோ. அத² வா தமேவ கிலேஸவித்³த⁴ங்ஸனஸமத்த²ங் விஸுத்³த⁴ங் ஞாணத³ஸ்ஸனமேவ விஸேஸோதி அலமரியஞாணத³ஸ்ஸனவிஸேஸோ வா. அதி⁴க³தோதி படிலத்³தோ⁴ மே அத்தி² நு கோ². ஸோஹந்தி படிலத்³த⁴விஸேஸோ ஸோ அஹங். பச்சி²மே காலேதி மரணமஞ்சே நிபன்னகாலே. புட்டோ²தி ஸப்³ரஹ்மசாரீஹி அதி⁴க³தகு³ணவிஸேஸங் புச்சி²தோ. ந மங்கு ப⁴விஸ்ஸாமீதி பதிதக்க²ந்தோ⁴ நித்தேஜோ ந ஹெஸ்ஸாமீதி. ஏவங் பச்சவெக்க²ந்தஸ்ஸ ஹி மோக⁴காலகிரியா நாம ந ஹோதி.
Suññāgāre abhiramāmīti vivittokāse sabbiriyāpathesu ekakova hutvā kacci nu kho abhiramāmīti attho. Evaṃ paccavekkhato kāyaviveko paripūrati. Uttarimanussadhammoti uttarimanussānaṃ ukkaṭṭhamanussabhūtānaṃ jhāyīnañceva ariyānañca jhānādidhammo, dasakusalakammapathasaṅkhātamanussadhammato vā uttaritaro visiṭṭhataro dhammo me mama santāne atthi nu kho, santi nu khoti attho. Alamariyañāṇadassanavisesoti mahaggatalokuttarapaññā pajānanaṭṭhena ñāṇaṃ, cakkhunā diṭṭhamiva dhammaṃ paccakkhakaraṇato dassanaṭṭhena dassananti ñāṇadassanaṃ, ariyaṃ visuddhaṃ uttamaṃ ñāṇadassananti ariyañāṇadassanaṃ, alaṃ pariyattakaṃ kilesaviddhaṃsanasamatthaṃ ariyañāṇadassanamettha, assa vāti alamariyañāṇadassano, jhānādibhedo uttarimanussadhammo alamariyañāṇadassano ca so viseso cāti alamariyañāṇadassanaviseso. Atha vā tameva kilesaviddhaṃsanasamatthaṃ visuddhaṃ ñāṇadassanameva visesoti alamariyañāṇadassanaviseso vā. Adhigatoti paṭiladdho me atthi nu kho. Sohanti paṭiladdhaviseso so ahaṃ. Pacchime kāleti maraṇamañce nipannakāle. Puṭṭhoti sabrahmacārīhi adhigataguṇavisesaṃ pucchito. Na maṅku bhavissāmīti patitakkhandho nittejo na hessāmīti. Evaṃ paccavekkhantassa hi moghakālakiriyā nāma na hoti.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / அங்கு³த்தரனிகாய • Aṅguttaranikāya / 8. பப்³ப³ஜிதஅபி⁴ண்ஹஸுத்தங் • 8. Pabbajitaabhiṇhasuttaṃ
டீகா • Tīkā / ஸுத்தபிடக (டீகா) • Suttapiṭaka (ṭīkā) / அங்கு³த்தரனிகாய (டீகா) • Aṅguttaranikāya (ṭīkā) / 1-8. விவாத³ஸுத்தாதி³வண்ணனா • 1-8. Vivādasuttādivaṇṇanā
