| Library / Tipiṭaka / திபிடக • Tipiṭaka / விமதிவினோத³னீ-டீகா • Vimativinodanī-ṭīkā |
பப்³ப³ஜ்ஜாகதா²வண்ணனா
Pabbajjākathāvaṇṇanā
25. ஆளம்ப³ரந்தி பணவங். விகேஸிகந்தி விப்பகிண்ணகேஸங். விக்கே²ளிகந்தி விஸ்ஸந்த³மானலாலங் . ஸுஸானங் மஞ்ஞேதி ஸுஸானங் விய அத்³த³ஸ ஸகங் பரிஜனந்தி ஸம்ப³ந்தோ⁴. உதா³னங் உதா³னேஸீதி ஸங்வேக³வஸப்பவத்தங் வசனங் நிச்சா²ரேஸி. உபஸ்ஸட்ட²ந்தி து³க்கே²ன ஸம்மிஸ்ஸங், து³க்கோ²திண்ணங் ஸப்³ப³ஸத்தகாயஜாதந்தி அத்தோ².
25.Āḷambaranti paṇavaṃ. Vikesikanti vippakiṇṇakesaṃ. Vikkheḷikanti vissandamānalālaṃ . Susānaṃ maññeti susānaṃ viya addasa sakaṃ parijananti sambandho. Udānaṃ udānesīti saṃvegavasappavattaṃ vacanaṃ nicchāresi. Upassaṭṭhanti dukkhena sammissaṃ, dukkhotiṇṇaṃ sabbasattakāyajātanti attho.
26. இத³ங் கோ² யஸாதி ப⁴க³வா நிப்³பா³னங் ஸந்தா⁴யாஹ. அனுபுப்³பி³ங் கத²ந்தி அனுபடிபாடிகத²ங். ஆதீ³னவந்தி தோ³ஸங். ஓகாரந்தி நிஹீனதா நிஹீனஜனஸேவிதத்தா. ஸங்கிலேஸந்தி தேஹி ஸத்தானங் ஸங்கிலேஸனங், ஸங்கிலேஸவிஸயந்தி வா அத்தோ². கல்லசித்தந்தி அரோக³சித்தங். ஸாமங் அத்தனாவ உக்கங்ஸோ உக்கி²பனங் ஏதிஸ்ஸந்தி ஸாமுக்கங்ஸிகா, ஸச்சதே³ஸனா. தஸ்ஸா ஸரூபத³ஸ்ஸனங் ‘‘து³க்க²’’ந்திஆதி³.
26.Idaṃ kho yasāti bhagavā nibbānaṃ sandhāyāha. Anupubbiṃ kathanti anupaṭipāṭikathaṃ. Ādīnavanti dosaṃ. Okāranti nihīnatā nihīnajanasevitattā. Saṃkilesanti tehi sattānaṃ saṃkilesanaṃ, saṃkilesavisayanti vā attho. Kallacittanti arogacittaṃ. Sāmaṃ attanāva ukkaṃso ukkhipanaṃ etissanti sāmukkaṃsikā, saccadesanā. Tassā sarūpadassanaṃ ‘‘dukkha’’ntiādi.
27. அஸ்ஸதூ³தேதி அஸ்ஸஆருள்ஹே தூ³தே. இத்³தா⁴பி⁴ஸங்கா²ரந்தி இத்³தி⁴கிரியங். அபி⁴ஸங்க²ரேஸி அகாஸி.
27.Assadūteti assaāruḷhe dūte. Iddhābhisaṅkhāranti iddhikiriyaṃ. Abhisaṅkharesi akāsi.
28. யதா²தி³ட்ட²ந்தி பட²மமக்³கே³ன தி³ட்ட²ங் சதுஸ்ஸச்சபூ⁴மிங் ஸேஸமக்³க³த்தயேன பச்சவெக்க²ந்தஸ்ஸ, பஸ்ஸந்தஸ்ஸாதி அத்தோ². மாது நோ ஜீவிதந்தி எத்த² நோதி நிபாதமத்தங், மாது ஜீவிதந்தி அத்தோ². யஸஸ்ஸ கீ²ணாஸவத்தா ‘‘ஏஹி பி⁴க்கு², ஸ்வாக்கா²தோ த⁴ம்மோ, சர ப்³ரஹ்மசரிய’’ந்தி எத்தகேனேவ ப⁴க³வா உபஸம்பத³ங் அதா³ஸி. கீ²ணாஸவானஞ்ஹி எத்தகேனேவ உபஸம்பதா³ அனுஞ்ஞாதா புப்³பே³வ து³க்க²ஸ்ஸ பரிக்கீ²ணத்தா. சர ப்³ரஹ்மசரியந்தி ஸாஸனப்³ரஹ்மசரியஸங்கா²தங் ஸிக்கா²பத³பூரணங் ஸந்தா⁴ய வுத்தங், ந மக்³க³ப்³ரஹ்மசரியங்.
28.Yathādiṭṭhanti paṭhamamaggena diṭṭhaṃ catussaccabhūmiṃ sesamaggattayena paccavekkhantassa, passantassāti attho. Mātu no jīvitanti ettha noti nipātamattaṃ, mātu jīvitanti attho. Yasassa khīṇāsavattā ‘‘ehi bhikkhu, svākkhāto dhammo, cara brahmacariya’’nti ettakeneva bhagavā upasampadaṃ adāsi. Khīṇāsavānañhi ettakeneva upasampadā anuññātā pubbeva dukkhassa parikkhīṇattā. Cara brahmacariyanti sāsanabrahmacariyasaṅkhātaṃ sikkhāpadapūraṇaṃ sandhāya vuttaṃ, na maggabrahmacariyaṃ.
30. ஸெட்டா²னுஸெட்டீ²னந்தி ஸெட்டி²னோ ச அனுஸெட்டி²னோ ச பவேணீவஸேன ஆக³தா யேஸங் குலானங் ஸந்தி, தேஸங் ஸெட்டா²னுஸெட்டீ²னங் குலானங். ஓரகோதி லாமகோ.
30.Seṭṭhānuseṭṭhīnanti seṭṭhino ca anuseṭṭhino ca paveṇīvasena āgatā yesaṃ kulānaṃ santi, tesaṃ seṭṭhānuseṭṭhīnaṃ kulānaṃ. Orakoti lāmako.
32-33. மா ஏகேன த்³வேதி ஏகேன மக்³கே³ன த்³வே பி⁴க்கூ² மா அக³மித்த². விஸுத்³தே⁴ ஸத்தே, கு³ணே வா மாரேதீதி மாரோ. பாபே நியுத்தோ பாபிமா.
32-33.Mā ekena dveti ekena maggena dve bhikkhū mā agamittha. Visuddhe satte, guṇe vā māretīti māro. Pāpe niyutto pāpimā.
ஸப்³ப³பாஸேஹீதி ஸப்³ப³கிலேஸபாஸேஹி. யே தி³ப்³பா³ யே ச மானுஸாதி யே தி³ப்³ப³காமகு³ணனிஸ்ஸிதா, மானுஸககாமகு³ணனிஸ்ஸிதா ச கிலேஸபாஸா நாம அத்தி², ஸப்³பே³ஹி தேஹி. ‘‘த்வங் பு³த்³தோ⁴’’தி தே³வமனுஸ்ஸேஹி கரியமானஸக்காரஸம்படிச்ச²னங் ஸந்தா⁴ய வத³தி.
Sabbapāsehīti sabbakilesapāsehi. Ye dibbā ye ca mānusāti ye dibbakāmaguṇanissitā, mānusakakāmaguṇanissitā ca kilesapāsā nāma atthi, sabbehi tehi. ‘‘Tvaṃ buddho’’ti devamanussehi kariyamānasakkārasampaṭicchanaṃ sandhāya vadati.
அந்தலிக்கே² சரந்தே பஞ்சாபி⁴ஞ்ஞேபி ப³ந்த⁴தீதி அந்தலிக்க²சரோ, ராக³பாஸோ. மாரோ பன பாஸம்பி அந்தலிக்க²சரங் மஞ்ஞதி. மானஸோதி மனோஸம்பயுத்தோ.
Antalikkhe carante pañcābhiññepi bandhatīti antalikkhacaro, rāgapāso. Māro pana pāsampi antalikkhacaraṃ maññati. Mānasoti manosampayutto.
ஜானாதி மந்தி ஸோ கிர ‘‘மஹானுபா⁴வோ அஞ்ஞோ தே³வபுத்தோ நிவாரேதீதி பீ⁴தோ நிவத்திஸ்ஸதி நு கோ²’’திஸஞ்ஞாய வத்வா ‘‘நிஹதோ த்வமஸி அந்தகா’’தி வுத்தே ‘‘ஜானாதி ம’’ந்தி து³ம்மனோ பலாயி.
Jānāti manti so kira ‘‘mahānubhāvo añño devaputto nivāretīti bhīto nivattissati nu kho’’tisaññāya vatvā ‘‘nihato tvamasi antakā’’ti vutte ‘‘jānāti ma’’nti dummano palāyi.
34. பரிவிதக்கோ உத³பாதீ³தி யஸ்மா ஏஹிபி⁴க்கு²பா⁴வாய உபனிஸ்ஸயரஹிதானம்பி பப்³ப³ஜிதுகாமதா உப்பஜ்ஜிஸ்ஸதி, பு³த்³தா⁴ ச தே ந பப்³பா³ஜெந்தி, தஸ்மா தேஸம்பி பப்³ப³ஜ்ஜாவிதி⁴ங் த³ஸ்ஸெந்தோ ஏவங் பரிவிதக்கேஸீதி த³ட்ட²ப்³ப³ங். உபனிஸ்ஸயஸம்பன்னா பன ப⁴க³வந்தங் உபஸங்கமித்வா ஏஹிபி⁴க்கு²பா⁴வேனேவ பப்³ப³ஜந்தி. யே படிக்கி²த்தபுக்³க³லாதி ஸம்ப³ந்தோ⁴. ஸயங் பப்³பா³ஜேதப்³போ³தி எத்த² ‘‘கேஸமஸ்ஸுங் ஓஹாரெத்வா’’திஆதி³வசனதோ கேஸச்சே²த³னகாஸாயச்சா²த³னஸரணதா³னானி பப்³ப³ஜ்ஜா நாம, தேஸு பச்சி²மத்³வயங் பி⁴க்கூ²ஹி ஏவ காதப்³ப³ங், காரேதப்³ப³ங் வா. ‘‘பப்³பா³ஜேஹீ’’தி இத³ங் திவித⁴ம்பி ஸந்தா⁴ய வுத்தங். க²ண்ட³ஸீமங் நெத்வாதி ப⁴ண்டு³கம்மாரோசனபரிஹரணத்த²ங். பி⁴க்கூ²னஞ்ஹி அனாரோசெத்வா ஏகஸீமாய ‘‘ஏதஸ்ஸ கேஸே சி²ந்தா³’’தி அஞ்ஞங் ஆணாபேதும்பி ந வட்டதி. பப்³பா³ஜெத்வாதி கேஸாதி³ச்சே²த³னமேவ ஸந்தா⁴ய வுத்தங் ‘‘காஸாயானி அச்சா²தெ³த்வா’’தி விஸுங் வுத்தத்தா. பப்³பா³ஜேதுங் ந லப⁴தீதி ஸரணதா³னங் ஸந்தா⁴ய வுத்தங், அனுபஸம்பன்னேன பி⁴க்கு²ஆணத்தியா தி³ன்னம்பி ஸரணங் ந ருஹதி.
34.Parivitakko udapādīti yasmā ehibhikkhubhāvāya upanissayarahitānampi pabbajitukāmatā uppajjissati, buddhā ca te na pabbājenti, tasmā tesampi pabbajjāvidhiṃ dassento evaṃ parivitakkesīti daṭṭhabbaṃ. Upanissayasampannā pana bhagavantaṃ upasaṅkamitvā ehibhikkhubhāveneva pabbajanti. Ye paṭikkhittapuggalāti sambandho. Sayaṃ pabbājetabboti ettha ‘‘kesamassuṃ ohāretvā’’tiādivacanato kesacchedanakāsāyacchādanasaraṇadānāni pabbajjā nāma, tesu pacchimadvayaṃ bhikkhūhi eva kātabbaṃ, kāretabbaṃ vā. ‘‘Pabbājehī’’ti idaṃ tividhampi sandhāya vuttaṃ. Khaṇḍasīmaṃ netvāti bhaṇḍukammārocanapariharaṇatthaṃ. Bhikkhūnañhi anārocetvā ekasīmāya ‘‘etassa kese chindā’’ti aññaṃ āṇāpetumpi na vaṭṭati. Pabbājetvāti kesādicchedanameva sandhāya vuttaṃ ‘‘kāsāyāni acchādetvā’’ti visuṃ vuttattā. Pabbājetuṃ na labhatīti saraṇadānaṃ sandhāya vuttaṃ, anupasampannena bhikkhuāṇattiyā dinnampi saraṇaṃ na ruhati.
யஸஸ்ஸீதி பரிவாரஸம்பன்னோ. நிஜ்ஜீவனிஸ்ஸத்தபா⁴வந்தி ‘‘கேஸா நாம இமஸ்மிங் ஸரீரே பாடியேக்கோ கொட்டா²ஸோ அசேதனோ அப்³யாகதோ ஸுஞ்ஞோ நிஸ்ஸத்தோ த²த்³தோ⁴ பத²வீதா⁴தூ’’திஆதி³னயங் ஸங்க³ண்ஹாதி, ஸப்³ப³ங் விஸுத்³தி⁴மக்³கே³ (விஸுத்³தி⁴॰ 1.311) ஆக³தனயேன க³ஹேதப்³ப³ங். புப்³பே³தி புப்³ப³பு³த்³து⁴ப்பாதே³ஸு. மத்³தி³தஸங்கா²ரோதி விபஸ்ஸனாவஸேன வுத்தங். பா⁴விதபா⁴வனோதி ஸமத²வஸேனாபி.
Yasassīti parivārasampanno. Nijjīvanissattabhāvanti ‘‘kesā nāma imasmiṃ sarīre pāṭiyekko koṭṭhāso acetano abyākato suñño nissatto thaddho pathavīdhātū’’tiādinayaṃ saṅgaṇhāti, sabbaṃ visuddhimagge (visuddhi. 1.311) āgatanayena gahetabbaṃ. Pubbeti pubbabuddhuppādesu. Madditasaṅkhāroti vipassanāvasena vuttaṃ. Bhāvitabhāvanoti samathavasenāpi.
காஸாயானி திக்க²த்துங் வா…பே॰… படிக்³கா³ஹாபேதப்³போ³தி எத்த² ‘‘ஸப்³ப³து³க்க²னிஸ்ஸரணத்தா²ய இமங் காஸாவங் க³ஹெத்வா’’தி வா ‘‘தங் காஸாவங் த³த்வா’’தி வா வத்வா ‘‘பப்³பா³ஜேத² மங், ப⁴ந்தே, அனுகம்பங் உபாதா³யா’’தி ஏவங் யாசனபுப்³ப³கங் சீவரங் படிச்சா²பேதி. அதா²பீதிஆதி³ திக்க²த்துங் படிக்³கா³ஹாபனதோ பரங் கத்தப்³ப³விதி⁴த³ஸ்ஸனங். அதா²பீதி ததோ பரம்பீதி அத்தோ². கேசி பன ‘‘சீவரங் அப்படிக்³கா³ஹாபெத்வா பப்³ப³ஜனப்பகாரபே⁴த³த³ஸ்ஸனத்த²ங் ‘‘அதா²பீ’’தி வுத்தங், அதா²பீதி ச அத² வாதி அத்தோ²’’தி வத³ந்தி. ‘‘அதி³ன்னங் ந வட்டதீ’’தி இமினா பப்³ப³ஜ்ஜா ந ருஹதீதி த³ஸ்ஸேதி.
Kāsāyāni tikkhattuṃ vā…pe… paṭiggāhāpetabboti ettha ‘‘sabbadukkhanissaraṇatthāya imaṃ kāsāvaṃ gahetvā’’ti vā ‘‘taṃ kāsāvaṃ datvā’’ti vā vatvā ‘‘pabbājetha maṃ, bhante, anukampaṃ upādāyā’’ti evaṃ yācanapubbakaṃ cīvaraṃ paṭicchāpeti. Athāpītiādi tikkhattuṃ paṭiggāhāpanato paraṃ kattabbavidhidassanaṃ. Athāpīti tato parampīti attho. Keci pana ‘‘cīvaraṃ appaṭiggāhāpetvā pabbajanappakārabhedadassanatthaṃ ‘‘athāpī’’ti vuttaṃ, athāpīti ca atha vāti attho’’ti vadanti. ‘‘Adinnaṃ na vaṭṭatī’’ti iminā pabbajjā na ruhatīti dasseti.
பாதே³ வந்தா³பெத்வாதி பாதா³பி⁴முக²ங் நமாபெத்வா. தூ³ரே வந்த³ந்தோபி ஹி பாதே³ வந்த³தீதி வுச்சதி. உபஜ்ஜா²யேன வாதி எத்த² யஸ்ஸ ஸந்திகே உபஜ்ஜ²ங் க³ண்ஹாதி, அயங் உபஜ்ஜா²யோ. ஆபி⁴ஸமாசாரிகேஸு வினயனத்த²ங் யங் ஆசரியங் கத்வா நிய்யாதெந்தி, அயங் ஆசரியோ. ஸசே பன உபஜ்ஜா²யோ ஸயமேவ ஸப்³ப³ங் ஸிக்கா²பேதி, அஞ்ஞஸ்மிங் ந நிய்யாதேதி, உபஜ்ஜா²யோவஸ்ஸ ஆசரியோபி ஹோதி, யதா² உபஸம்பதா³காலே ஸயமேவ கம்மவாசங் வாசெந்தோ உபஜ்ஜா²யோவ கம்மவாசாசரியோபி ஹோதி.
Pādevandāpetvāti pādābhimukhaṃ namāpetvā. Dūre vandantopi hi pāde vandatīti vuccati. Upajjhāyena vāti ettha yassa santike upajjhaṃ gaṇhāti, ayaṃ upajjhāyo. Ābhisamācārikesu vinayanatthaṃ yaṃ ācariyaṃ katvā niyyātenti, ayaṃ ācariyo. Sace pana upajjhāyo sayameva sabbaṃ sikkhāpeti, aññasmiṃ na niyyāteti, upajjhāyovassa ācariyopi hoti, yathā upasampadākāle sayameva kammavācaṃ vācento upajjhāyova kammavācācariyopi hoti.
அனுனாஸிகந்தங் கத்வா தா³னகாலே அந்தரா விச்சே²தோ³ ந காதப்³போ³தி ஆஹ ‘‘ஏகஸம்ப³ந்தா⁴னீ’’தி.
Anunāsikantaṃ katvā dānakāle antarā vicchedo na kātabboti āha ‘‘ekasambandhānī’’ti.
‘‘ஆபி⁴ஸமாசாரிகேஸு வினேதப்³போ³’’தி இமினா ஸேகி²யவத்தக²ந்த⁴கவத்தேஸு, அஞ்ஞேஸு
‘‘Ābhisamācārikesu vinetabbo’’ti iminā sekhiyavattakhandhakavattesu, aññesu
ச ஸுக்கவிஸ்ஸட்டி²ஆதி³லோகவஜ்ஜஸிக்கா²பதே³ஸு ஸாமணேரேஹி வத்திதப்³ப³ங், தத்த² அவத்தமானோ அலஜ்ஜீ, த³ண்ட³கம்மாரஹோ ச ஹோதீதி த³ஸ்ஸேதி.
Ca sukkavissaṭṭhiādilokavajjasikkhāpadesu sāmaṇerehi vattitabbaṃ, tattha avattamāno alajjī, daṇḍakammāraho ca hotīti dasseti.
பப்³ப³ஜ்ஜாகதா²வண்ணனா நிட்டி²தா.
Pabbajjākathāvaṇṇanā niṭṭhitā.
Related texts:
திபிடக (மூல) • Tipiṭaka (Mūla) / வினயபிடக • Vinayapiṭaka / மஹாவக்³க³பாளி • Mahāvaggapāḷi
7. பப்³ப³ஜ்ஜாகதா² • 7. Pabbajjākathā
8. மாரகதா² • 8. Mārakathā
9. பப்³ப³ஜ்ஜூபஸம்பதா³கதா² • 9. Pabbajjūpasampadākathā
அட்ட²கதா² • Aṭṭhakathā / வினயபிடக (அட்ட²கதா²) • Vinayapiṭaka (aṭṭhakathā) / மஹாவக்³க³-அட்ட²கதா² • Mahāvagga-aṭṭhakathā / பப்³ப³ஜ்ஜாகதா² • Pabbajjākathā
டீகா • Tīkā / வினயபிடக (டீகா) • Vinayapiṭaka (ṭīkā) / ஸாரத்த²தீ³பனீ-டீகா • Sāratthadīpanī-ṭīkā
யஸஸ்ஸ பப்³ப³ஜ்ஜாகதா²வண்ணனா • Yasassa pabbajjākathāvaṇṇanā
சதுகி³ஹிஸஹாயபப்³ப³ஜ்ஜாகதா²வண்ணனா • Catugihisahāyapabbajjākathāvaṇṇanā
மாரகதா²வண்ணனா • Mārakathāvaṇṇanā
பப்³ப³ஜ்ஜூபஸம்பதா³கதா²வண்ணனா • Pabbajjūpasampadākathāvaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / வஜிரபு³த்³தி⁴-டீகா • Vajirabuddhi-ṭīkā / பப்³ப³ஜ்ஜாகதா²வண்ணனா • Pabbajjākathāvaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / பாசித்யாதி³யோஜனாபாளி • Pācityādiyojanāpāḷi / 7. பப்³ப³ஜ்ஜாகதா² • 7. Pabbajjākathā
