| Library / Tipiṭaka / তিপিটক • Tipiṭaka / ৰজিরবুদ্ধি-টীকা • Vajirabuddhi-ṭīkā |
পব্বজ্জাকথাৰণ্ণনা
Pabbajjākathāvaṇṇanā
২৫. যেন সমযেন ভগৰা পঞ্চৰগ্গিযে পঞ্চমিযং অরহত্তে পতিট্ঠাপেত্ৰা সত্তমিযং নাল়কত্থেরস্স নাল়কপটিপদং আচিক্খিত্ৰা ভদ্দপদপুণ্ণমাযং যসস্স ইন্দ্রিযানং পরিপক্কভাৰং ঞত্ৰা তং উদিক্খন্তো বারাণসিযং ৰিহাসি, তেন সমযেন যসো নামাতি সম্বন্ধো। তস্স কির উপ্পত্তিতো পট্ঠায তস্স কুলস্স কিত্তিসদ্দসঙ্খাতো, পরিজনসঙ্খাতো ৰা যসো ৰিসেসতো পৰড্ঢতি। তেন তস্স মাতাপিতরো এৰং নামমকংসু। ‘‘সুখুমালো’’তিআদি কিমত্থং আযস্মতা উপালিত্থেরেন ৰুত্তন্তি? পচ্ছিমজনস্স নেক্খম্মে সমুস্সাহনজননত্থং। এৰং উত্তমভোগসমপ্পিতানম্পি উত্তমেসু ভোগেসু অপ্পমত্তকেনাপি অসুভনিমিত্তেন ৰিতজ্জেত্ৰা কালাকালং অগণেত্ৰা ৰিৰেকাভিরতিযা মহন্তং ভোগক্খন্ধং তিণং ৰিয পহায গেহতো নিক্খমনা অহোসি, কস্স পনঞ্ঞস্স ন সিযাতি অধিপ্পাযো। সমঙ্গীভূতস্সাতি তেহি একত্তং উপগতস্স, অৰিৰিত্তস্সাতি অত্থো। নিদ্দা ওক্কমীতি মনাপেসুপি ৰিসযেসু পৰত্তিং নিৰারেত্ৰা তস্স চিত্তং অতিক্কমিত্ৰা অভিভৰিত্ৰা অত্তনো ৰসং উপনেসীতি অত্থো। সব্বরত্তিযো চাতি তযোপি যামে। তেন পরিজনস্স ৰিকারদস্সনে কারণং দস্সেতি। রত্তি-সদ্দো পনেত্থ কালে সূরিযাভাৰে, যামে চ পৰত্ততীতি ৰিঞ্ঞেয্যো। যামেৰিধ ৰিঞ্ঞেয্যো তিচীৰরৰিপ্পৰাসে চ। কচ্ছেতি কচ্ছপস্সে। কণ্ঠেতি কণ্ঠস্স হেট্ঠা। মুদিঙ্গস্স হি উপরি কণ্ঠং ঠপেত্ৰা সযন্তিযা কণ্ঠে মুদিঙ্গং অদ্দসাতি অত্থো। আল়ম্বরন্তি পণৰং। উভতোমুখস্স তনুকা দীঘা। ৰিত্থিন্নসমতলস্স ৰাদিতস্স এতং অধিৰচনং। ৰিপ্পলপন্তিযোতি সুপিনদস্সনাদিৰসেন অসম্বন্ধপলাপং ৰিপ্পলপন্তিযো। সুসানং মঞ্ঞেতি সুসানং ৰিয অদ্দস সকং পরিজনন্তি সম্বন্ধো। আদীনৰোতি অসুভভাৰো। নিব্বিদায চিত্তং সণ্ঠাতীতি ৰিমুচ্চিতুকামতাসঙ্খাতায উক্কণ্ঠায চিত্তং নমীতি অত্থো। উদানং উদানেসীতি ‘‘ইতো পট্ঠায ইমাহি ইত্থীহি সহ নাহং ভৰিস্সামী’’তি অত্তমনৰাচং নিচ্ছারেসি। দ্ৰে কির আকারা তস্স পমাদসুত্তপরিজনদস্সনে পাকটা জাতা কিলেসানং বলৰভাৰো, অসুভাকারস্স অতিওল়ারিকভাৰো চ। এৰং সতি ওল়ারিকতরে চ অসুভাকারে কিলেসৰসেনাযং সব্বোপি লোকো এত্থ পীল়িতো মুচ্ছিতো। অহো কিলেসা বলৰতরাতি হি পস্সতো পস্সতো তস্স দ্ৰেপি তে আকারা পাকটা জাতা, যেনেৰমৰোচাতি।
25. Yena samayena bhagavā pañcavaggiye pañcamiyaṃ arahatte patiṭṭhāpetvā sattamiyaṃ nāḷakattherassa nāḷakapaṭipadaṃ ācikkhitvā bhaddapadapuṇṇamāyaṃ yasassa indriyānaṃ paripakkabhāvaṃ ñatvā taṃ udikkhanto bārāṇasiyaṃ vihāsi, tena samayena yaso nāmāti sambandho. Tassa kira uppattito paṭṭhāya tassa kulassa kittisaddasaṅkhāto, parijanasaṅkhāto vā yaso visesato pavaḍḍhati. Tena tassa mātāpitaro evaṃ nāmamakaṃsu. ‘‘Sukhumālo’’tiādi kimatthaṃ āyasmatā upālittherena vuttanti? Pacchimajanassa nekkhamme samussāhanajananatthaṃ. Evaṃ uttamabhogasamappitānampi uttamesu bhogesu appamattakenāpi asubhanimittena vitajjetvā kālākālaṃ agaṇetvā vivekābhiratiyā mahantaṃ bhogakkhandhaṃ tiṇaṃ viya pahāya gehato nikkhamanā ahosi, kassa panaññassa na siyāti adhippāyo. Samaṅgībhūtassāti tehi ekattaṃ upagatassa, avivittassāti attho. Niddā okkamīti manāpesupi visayesu pavattiṃ nivāretvā tassa cittaṃ atikkamitvā abhibhavitvā attano vasaṃ upanesīti attho. Sabbarattiyo cāti tayopi yāme. Tena parijanassa vikāradassane kāraṇaṃ dasseti. Ratti-saddo panettha kāle sūriyābhāve, yāme ca pavattatīti viññeyyo. Yāmevidha viññeyyo ticīvaravippavāse ca. Kaccheti kacchapasse. Kaṇṭheti kaṇṭhassa heṭṭhā. Mudiṅgassa hi upari kaṇṭhaṃ ṭhapetvā sayantiyā kaṇṭhe mudiṅgaṃ addasāti attho. Āḷambaranti paṇavaṃ. Ubhatomukhassa tanukā dīghā. Vitthinnasamatalassa vāditassa etaṃ adhivacanaṃ. Vippalapantiyoti supinadassanādivasena asambandhapalāpaṃ vippalapantiyo. Susānaṃ maññeti susānaṃ viya addasa sakaṃ parijananti sambandho. Ādīnavoti asubhabhāvo. Nibbidāya cittaṃ saṇṭhātīti vimuccitukāmatāsaṅkhātāya ukkaṇṭhāya cittaṃ namīti attho. Udānaṃ udānesīti ‘‘ito paṭṭhāya imāhi itthīhi saha nāhaṃ bhavissāmī’’ti attamanavācaṃ nicchāresi. Dve kira ākārā tassa pamādasuttaparijanadassane pākaṭā jātā kilesānaṃ balavabhāvo, asubhākārassa atioḷārikabhāvo ca. Evaṃ sati oḷārikatare ca asubhākāre kilesavasenāyaṃ sabbopi loko ettha pīḷito mucchito. Aho kilesā balavatarāti hi passato passato tassa dvepi te ākārā pākaṭā jātā, yenevamavocāti.
‘‘সুৰণ্ণপাদুকাযো আরোহিত্ৰা’’তি এতেনস্স নিস্সঙ্গতায ৰিস্সট্ঠগমনং দীপেতি। সো হি বলৰসংৰেগাভিতুন্নহদযত্তা পরিজনস্স পবোধে সতিপি অত্তনো গমননিৰারণসমত্থভাৰং অসহমানো অত্তানং তক্কেন্তো ৰিস্সট্ঠো অগমাসি। অমনুস্সাতি দেৰতা। তা হি মনুস্সেহি সুগতিপটিৰেধঞাণসণ্ঠানাদিগুণসামঞ্ঞেন ‘‘অমনুস্সা’’তি ৰুচ্চন্তি। ন হি অসমানজাতিকা তিরচ্ছানাদযো ‘‘অব্রাহ্মণা’’তি ৰা ‘‘অৰসলা’’তি ৰা ৰুচ্চন্তি, কিন্তু জাতিসভাগতায এৰ ৰসলাদযো ‘‘অব্রাহ্মণা’’তি ৰুচ্চন্তি, এৰং মনুস্সেহি কেনচি আকারেন সভাগতায দেৰতা ‘‘অমনুস্সা’’তি ৰুত্তা। অঞ্ঞথা মনুস্সা ন হোন্তীতি তিরচ্ছানগতাপি ‘‘অমনুস্সা’’তি ৰত্তব্বা ভৰেয্যুং।
‘‘Suvaṇṇapādukāyo ārohitvā’’ti etenassa nissaṅgatāya vissaṭṭhagamanaṃ dīpeti. So hi balavasaṃvegābhitunnahadayattā parijanassa pabodhe satipi attano gamananivāraṇasamatthabhāvaṃ asahamāno attānaṃ takkento vissaṭṭho agamāsi. Amanussāti devatā. Tā hi manussehi sugatipaṭivedhañāṇasaṇṭhānādiguṇasāmaññena ‘‘amanussā’’ti vuccanti. Na hi asamānajātikā tiracchānādayo ‘‘abrāhmaṇā’’ti vā ‘‘avasalā’’ti vā vuccanti, kintu jātisabhāgatāya eva vasalādayo ‘‘abrāhmaṇā’’ti vuccanti, evaṃ manussehi kenaci ākārena sabhāgatāya devatā ‘‘amanussā’’ti vuttā. Aññathā manussā na hontīti tiracchānagatāpi ‘‘amanussā’’ti vattabbā bhaveyyuṃ.
২৬. ৰনগহনং দিস্ৰা ‘‘সুমুত্তোহং নগরতো’’তি পমুদিতত্তা ভগৰতো অৰিদূরে উদানেসি। ইদং খো যসাতি ভগৰা নিব্বানং সন্ধাযাহ। তঞ্হি তণ্হাদিকিলেসেহি অনুপদ্দুতং, অনুপসট্ঠতঞ্চ দস্সনমত্তেনাপি অস্সাদজননতো। ধম্মং দেসেস্সামীতি যেন তং নিব্বানং ইধ নিসিন্নমত্তোৰ ত্ৰং অধিগমিস্সসীতি অধিপ্পাযো। কিরাতি অস্সদ্ধেয্যঅব্যত্তিপরিহাসেসু নিপাতো, ইধ অব্যত্তিযং। সুৰণ্ণপাদুকাযো ওরোহিত্ৰাতি চ সুৰণ্ণপাদুকাহি ওতরিত্ৰা। নিস্সক্কত্থে হি ইদং পচ্চত্তৰচনং। তস্স নিসিন্নমত্তস্সেৰ অঞ্ঞং সম্মোদনীযং কথং অকত্ৰা অনামন্তেত্ৰা অনুপুব্বিং কথং কথেসি। সুপরিপক্কিন্দ্রিযত্তা, পটিৰেধক্খণানতিক্কমনত্থং অনুপদ্দুতানুপসট্ঠতানং পাপকধম্মদেসনাভিমুখচিত্তত্তা, সেট্ঠিস্স গহপতিনো অচিরাগমনদস্সনতো চ। কিমত্থং ভগৰা তস্স সুট্ঠুতরং সংৰিগ্গহদযস্স ভৰতো মুচ্চিতুকামস্স ভৰাভৰূপাযানিসংসকথং পঠমমেৰ কথেসীতি? সব্বভৰাদীনৰদস্সনত্থং। সো হি মনুস্সলোকস্সেৰ উপদ্দুতউপসট্ঠভাৰং অদ্দস, ন সগ্গানন্তি কদাচি সগ্গলোকং সুখতো মঞ্ঞেয্য। তত্থ সুখসঞ্ঞেন নিব্বানাভিমুখং চিত্তং পেসেয্যাতি সগ্গানম্পি আদীনৰং দস্সেতুকামতায অনুপুব্বিং কথং আরভি। এত্থ দানং, দানানিসংসং, সীলানিসংসঞ্চ কথেন্তো দানসীলকথং কথেতি নাম। সগ্গৰণ্ণং কথেন্তো সগ্গকথং কথেতি নাম। তত্থ ৰত্থুকামকিলেসকামানং অনিচ্চতং, অপসাদতং, মহাদীনৰতঞ্চ কথেন্তো কামানং আদীনৰং, ওকারং, সংকিলেসঞ্চ পকাসেতি। নেক্খম্মে তদভাৰতো চ তংনিস্সরণতো চ তব্বিপরীতং আনিসংসং কথেন্তো নেক্খম্মে আনিসংসং পকাসেতি নাম। তত্থ ওকারন্তি অৰকারং লামকভাৰং। সংকিলেসন্তি সংকিলিস্সনং বাধনং উপতাপনং ৰাতি অত্থো। কল্লচিত্তং পঞ্ঞিন্দ্রিযস্স আনুভাৰেন, দিট্ঠিযোগৰিচিকিচ্ছাযোগানং পঞ্ঞিন্দ্রিযেন ৰিহতত্তা। মুদুচিত্তং সতিন্দ্রিযসমাযোগেন, ৰিহিংসাসারম্ভাদিকিলেসপৰেসং নিৰারেত্ৰা চিত্তমুদুতাদিকুসলধম্মপ্পৰেসনং করোন্তং সহজাতং চিত্তং মুদুং করোতি। সমাধিন্দ্রিযস্স আনুভাৰেন ৰিনীৰরণচিত্তং। তঞ্হি ৰিসেসতো নীৰরণৰিপক্খভূতন্তি। ৰীরিযিন্দ্রিযৰসেন উদগ্গচিত্তং। তঞ্হি থিনমিদ্ধসঙ্খাতলীনভাৰৰিপক্খন্তি। সদ্ধিন্দ্রিযস্স আনুভাৰেন পসন্নচিত্তং তস্স পসাদলক্খণত্তা। সামুক্কংসিকাতি এতং ৰিসযৰসেন দেসনং উপালিত্থেরো পকাসেতি। সচ্চানি হি সামুক্কংসিকদেসনায ৰিসযানি। অঞ্ঞথা দুক্খাদীনি সামুক্কংসিকা ধম্মদেসনাতি আপজ্জতি তস্স ৰিভাৰনে সচ্চানং নিদ্দিট্ঠত্তা।
26. Vanagahanaṃ disvā ‘‘sumuttohaṃ nagarato’’ti pamuditattā bhagavato avidūre udānesi. Idaṃ kho yasāti bhagavā nibbānaṃ sandhāyāha. Tañhi taṇhādikilesehi anupaddutaṃ, anupasaṭṭhatañca dassanamattenāpi assādajananato. Dhammaṃ desessāmīti yena taṃ nibbānaṃ idha nisinnamattova tvaṃ adhigamissasīti adhippāyo. Kirāti assaddheyyaabyattiparihāsesu nipāto, idha abyattiyaṃ. Suvaṇṇapādukāyo orohitvāti ca suvaṇṇapādukāhi otaritvā. Nissakkatthe hi idaṃ paccattavacanaṃ. Tassa nisinnamattasseva aññaṃ sammodanīyaṃ kathaṃ akatvā anāmantetvā anupubbiṃ kathaṃ kathesi. Suparipakkindriyattā, paṭivedhakkhaṇānatikkamanatthaṃ anupaddutānupasaṭṭhatānaṃ pāpakadhammadesanābhimukhacittattā, seṭṭhissa gahapatino acirāgamanadassanato ca. Kimatthaṃ bhagavā tassa suṭṭhutaraṃ saṃviggahadayassa bhavato muccitukāmassa bhavābhavūpāyānisaṃsakathaṃ paṭhamameva kathesīti? Sabbabhavādīnavadassanatthaṃ. So hi manussalokasseva upaddutaupasaṭṭhabhāvaṃ addasa, na saggānanti kadāci saggalokaṃ sukhato maññeyya. Tattha sukhasaññena nibbānābhimukhaṃ cittaṃ peseyyāti saggānampi ādīnavaṃ dassetukāmatāya anupubbiṃ kathaṃ ārabhi. Ettha dānaṃ, dānānisaṃsaṃ, sīlānisaṃsañca kathento dānasīlakathaṃ katheti nāma. Saggavaṇṇaṃ kathento saggakathaṃ katheti nāma. Tattha vatthukāmakilesakāmānaṃ aniccataṃ, apasādataṃ, mahādīnavatañca kathento kāmānaṃ ādīnavaṃ, okāraṃ, saṃkilesañca pakāseti. Nekkhamme tadabhāvato ca taṃnissaraṇato ca tabbiparītaṃ ānisaṃsaṃ kathento nekkhamme ānisaṃsaṃ pakāseti nāma. Tattha okāranti avakāraṃ lāmakabhāvaṃ. Saṃkilesanti saṃkilissanaṃ bādhanaṃ upatāpanaṃ vāti attho. Kallacittaṃ paññindriyassa ānubhāvena, diṭṭhiyogavicikicchāyogānaṃ paññindriyena vihatattā. Muducittaṃ satindriyasamāyogena, vihiṃsāsārambhādikilesapavesaṃ nivāretvā cittamudutādikusaladhammappavesanaṃ karontaṃ sahajātaṃ cittaṃ muduṃ karoti. Samādhindriyassa ānubhāvena vinīvaraṇacittaṃ. Tañhi visesato nīvaraṇavipakkhabhūtanti. Vīriyindriyavasena udaggacittaṃ. Tañhi thinamiddhasaṅkhātalīnabhāvavipakkhanti. Saddhindriyassa ānubhāvena pasannacittaṃ tassa pasādalakkhaṇattā. Sāmukkaṃsikāti etaṃ visayavasena desanaṃ upālitthero pakāseti. Saccāni hi sāmukkaṃsikadesanāya visayāni. Aññathā dukkhādīni sāmukkaṃsikā dhammadesanāti āpajjati tassa vibhāvane saccānaṃ niddiṭṭhattā.
২৭. চতুদ্দিসাতি চতূসু দিসাসু। অভিসঙ্খরেসীতি অভিসঙ্খরি। কিমত্থন্তি চে? উভিন্নং পটিলভিতব্বৰিসেসন্তরাযনিসেধনত্থং। যদি সো পুত্তং পস্সেয্য, পুত্তস্সপি ধম্মচক্খুপটিলাভো অরহত্তুপ্পত্তি, সেট্ঠিস্সপি ধম্মচক্খুপটিলাভো ন সিযা। দিট্ঠসচ্চোপি ‘‘দেহি তে মাতুযা জীৰিত’’ন্তি ৰদন্তো কিমঞ্ঞং ন করেয্য। যসোপি তং ৰচনং সুত্ৰা অরহাপি সমানো সযং অপ্পটিক্খিপিত্ৰা ভগৰন্তং উল্লোকেন্তো কিমঞ্ঞায সণ্ঠহেয্য।
27.Catuddisāti catūsu disāsu. Abhisaṅkharesīti abhisaṅkhari. Kimatthanti ce? Ubhinnaṃ paṭilabhitabbavisesantarāyanisedhanatthaṃ. Yadi so puttaṃ passeyya, puttassapi dhammacakkhupaṭilābho arahattuppatti, seṭṭhissapi dhammacakkhupaṭilābho na siyā. Diṭṭhasaccopi ‘‘dehi te mātuyā jīvita’’nti vadanto kimaññaṃ na kareyya. Yasopi taṃ vacanaṃ sutvā arahāpi samāno sayaṃ appaṭikkhipitvā bhagavantaṃ ullokento kimaññāya saṇṭhaheyya.
২৮. উভোহিপি পত্তব্বৰিসেসকোটিযা পত্তত্তা ভগৰা পুন তং পটিপ্পস্সম্ভেসি। পুব্বে অগারিকভূতোতি তস্স সোতাপন্নকালং সন্ধাযাহ। সোতাপন্নো হি অগারমজ্ঝে ৰসনারহত্তা অগারিযভূতো নাম হোতি অপব্বজিতো। সম্পতি পব্বজিতো সমানো অগারমজ্ঝৰসনস্স অভব্বত্তা ‘‘অগারিকো’’তি ন ৰুচ্চতি, তস্মা এৰমাহ। যস্স দিট্ঠোতি সম্বন্ধো, যেন দিট্ঠোতি ৰুত্তং হোতি। ‘‘সেয্যথাপি পুব্বে অগারিকভূতো’’তি ৰচনেন লদ্ধনযত্তা পচ্ছা গহপতি গিহিৰেসধারিমেৰ যসং সন্ধাযাহ ‘‘যসেন কুলপুত্তেন পচ্ছাসমণেনা’’তি। তত্থ চর ব্রহ্মচরিযন্তি আভিসমাচারিকসীলং ব্রহ্মচরিযং চর পরিপূরেহি তাৰ, যাৰ সম্মাদুক্খস্সন্তকিরিযা, যাৰ চুতিচিত্তাতি অধিপ্পাযো। লিঙ্গব্রহ্মচরিযং সন্ধাযাতি পোরাণা, তঞ্চ যুত্তং। লিঙ্গমত্তঞ্হি সন্ধায সো আযস্মা ‘‘লভেয্যাহং, ভন্তে, পব্বজ্জং উপসম্পদ’’ন্তি আহ।
28. Ubhohipi pattabbavisesakoṭiyā pattattā bhagavā puna taṃ paṭippassambhesi. Pubbe agārikabhūtoti tassa sotāpannakālaṃ sandhāyāha. Sotāpanno hi agāramajjhe vasanārahattā agāriyabhūto nāma hoti apabbajito. Sampati pabbajito samāno agāramajjhavasanassa abhabbattā ‘‘agāriko’’ti na vuccati, tasmā evamāha. Yassa diṭṭhoti sambandho, yena diṭṭhoti vuttaṃ hoti. ‘‘Seyyathāpi pubbe agārikabhūto’’ti vacanena laddhanayattā pacchā gahapati gihivesadhārimeva yasaṃ sandhāyāha ‘‘yasena kulaputtena pacchāsamaṇenā’’ti. Tattha cara brahmacariyanti ābhisamācārikasīlaṃ brahmacariyaṃ cara paripūrehi tāva, yāva sammādukkhassantakiriyā, yāva cuticittāti adhippāyo. Liṅgabrahmacariyaṃ sandhāyāti porāṇā, tañca yuttaṃ. Liṅgamattañhi sandhāya so āyasmā ‘‘labheyyāhaṃ, bhante, pabbajjaṃ upasampada’’nti āha.
কিমত্থং ভগৰা যসস্স মাতু, পজাপতিযা চ ভত্তকিচ্চং অকত্ৰাৰ ধম্মং দেসেসীতি? যসস্স পব্বজ্জায সোকসল্লসমপ্পিতত্তা দানঞ্চ সোমনস্সিকচিত্তেন ন দদেয্যুং, সত্থরি চ দোমনস্সপ্পত্তা হুত্ৰা মগ্গপটিৰেধম্পি ন লভেয্যুন্তি ভগৰা পঠমং তাৰ তা ৰিগতসোকসল্লহদযাযো কত্ৰা পুন ভত্তকিচ্চং অকাসি।
Kimatthaṃ bhagavā yasassa mātu, pajāpatiyā ca bhattakiccaṃ akatvāva dhammaṃ desesīti? Yasassa pabbajjāya sokasallasamappitattā dānañca somanassikacittena na dadeyyuṃ, satthari ca domanassappattā hutvā maggapaṭivedhampi na labheyyunti bhagavā paṭhamaṃ tāva tā vigatasokasallahadayāyo katvā puna bhattakiccaṃ akāsi.
৩০. সেট্ঠানুসেট্ঠীনন্তি অনুক্কমসেট্ঠীনন্তি পোরাণা। ‘‘সেট্ঠিনো চানুসেট্ঠিনো চ যানি কুলানি, তানি সেট্ঠানুসেট্ঠানি কুলানি, তেসং সেট্ঠানুসেট্ঠীনং কুলান’’ন্তি লিখিতং। ধম্মৰিনযোতি সাসনব্রহ্মচরিযং পাৰচনন্তি ইধ অত্থতো একং। অথ ৰা ধম্মেন ৰিনযো, ন দণ্ডসত্থেহীতি ধম্মৰিনযো, ধম্মায ৰিনযো, ন হিংসত্থন্তি ৰা ধম্মতো ৰিনযো, নাধম্মতোতি ৰা ধম্মো ৰিনযো, নাধম্মোতি ৰা ধম্মানং ৰিনযো, ন অঞ্ঞেসন্তি ৰা ধম্মকাযত্তা, ধম্মসামিত্তা ৰা ধম্মো ভগৰা, তস্স ধম্মস্স ৰিনযো, ন তক্কিকানন্তি ৰা ধম্মৰিনযো। সমানাধিকরণৰসেন ৰা ধম্মৰিনযো নীলুপ্পলং ৰিয, ধম্মো চ ৰিনযো চাতি ধম্মৰিনযো ফলাফলং ৰিয নপুংসকমিতি পুল্লিঙ্গাপদেসতো অস্স লিঙ্গভাৰো সিদ্ধো, যস্স ৰা ধম্মো ৰিনযো, সো ধম্মৰিনযো সেতপটো পুরিসো ৰিয, ধম্মেন যুত্তো ৰা ৰিনযো ধম্মৰিনযো অস্সরথো ৰিযাতি এৰমাদিনা নযেন যোজনা ৰেদিতব্বা।
30.Seṭṭhānuseṭṭhīnanti anukkamaseṭṭhīnanti porāṇā. ‘‘Seṭṭhino cānuseṭṭhino ca yāni kulāni, tāni seṭṭhānuseṭṭhāni kulāni, tesaṃ seṭṭhānuseṭṭhīnaṃ kulāna’’nti likhitaṃ. Dhammavinayoti sāsanabrahmacariyaṃ pāvacananti idha atthato ekaṃ. Atha vā dhammena vinayo, na daṇḍasatthehīti dhammavinayo, dhammāya vinayo, na hiṃsatthanti vā dhammato vinayo, nādhammatoti vā dhammo vinayo, nādhammoti vā dhammānaṃ vinayo, na aññesanti vā dhammakāyattā, dhammasāmittā vā dhammo bhagavā, tassa dhammassa vinayo, na takkikānanti vā dhammavinayo. Samānādhikaraṇavasena vā dhammavinayo nīluppalaṃ viya, dhammo ca vinayo cāti dhammavinayo phalāphalaṃ viya napuṃsakamiti pulliṅgāpadesato assa liṅgabhāvo siddho, yassa vā dhammo vinayo, so dhammavinayo setapaṭo puriso viya, dhammena yutto vā vinayo dhammavinayo assaratho viyāti evamādinā nayena yojanā veditabbā.
৩৪. ‘‘খণ্ডসীমং নেত্ৰা’’তি ভণ্ডুকম্মারোচনপটিহরণত্থং ৰুত্তং। তেন ‘‘সভিক্খুকে ৰিহারে অঞ্ঞম্পি এতস্স কেসে ছিন্দা’’তি ৰত্তুং ন ৰট্টতীতি। পব্বাজেত্ৰাতি ইমস্স অধিপ্পাযপকাসনত্থং ‘‘কাসাযানি অচ্ছাদেত্ৰা এহী’’তি ৰুত্তং। উপজ্ঝাযো চে কেসমস্সুওরোপনাদীনি অকত্ৰা পব্বজত্থং সরণানি দেতি, ন রুহতি পব্বজ্জা। কম্মৰাচং সাৰেত্ৰা উপসম্পাদেতি, রুহতি উপসম্পদা। অপ্পত্তচীৰরানং উপসম্পদাসিদ্ধিদস্সনতো, কম্মৰিপত্তিযা অভাৰতো চেতং যুজ্জতেৰাতি একে। হোতি চেত্থ –
34.‘‘Khaṇḍasīmaṃ netvā’’ti bhaṇḍukammārocanapaṭiharaṇatthaṃ vuttaṃ. Tena ‘‘sabhikkhuke vihāre aññampi etassa kese chindā’’ti vattuṃ na vaṭṭatīti. Pabbājetvāti imassa adhippāyapakāsanatthaṃ ‘‘kāsāyāni acchādetvā ehī’’ti vuttaṃ. Upajjhāyo ce kesamassuoropanādīni akatvā pabbajatthaṃ saraṇāni deti, na ruhati pabbajjā. Kammavācaṃ sāvetvā upasampādeti, ruhati upasampadā. Appattacīvarānaṃ upasampadāsiddhidassanato, kammavipattiyā abhāvato cetaṃ yujjatevāti eke. Hoti cettha –
‘‘সলিঙ্গস্সেৰ পব্বজ্জা, ৰিলিঙ্গস্সাপি চেতরা।
‘‘Saliṅgasseva pabbajjā, viliṅgassāpi cetarā;
অপেতপুব্বৰেসস্স, তং দ্ৰযং ইতি চাপরে’’তি॥
Apetapubbavesassa, taṃ dvayaṃ iti cāpare’’ti.
ভিক্খুনা হি সহত্থেন ৰা আণত্তিযা ৰা দিন্নমেৰ কাসাৰং ৰট্টতি, অদিন্নং ন ৰট্টতীতি পন সন্তেস্ৰেৰ কাসাৰেসু, নাসন্তেসু অসম্ভৰতোতি তেসং অধিপ্পাযো। এৰঞ্চ পন, ভিক্খৰে, পব্বাজেতব্বো উপসম্পাদেতব্বো। পঠমং…পে॰…অনুজানামি, ভিক্খৰে, ইমেহি তীহি সরণগমনেহি পব্বজ্জং উপসম্পদন্তি এত্থ ইমিনা অনুক্কমেন দিন্নেহি তীহি সরণগমনেহি পব্বজ্জং উপসম্পদং অনুজানামি কেৰলেহীতি অধিপ্পাযদস্সনতো –
Bhikkhunā hi sahatthena vā āṇattiyā vā dinnameva kāsāvaṃ vaṭṭati, adinnaṃ na vaṭṭatīti pana santesveva kāsāvesu, nāsantesu asambhavatoti tesaṃ adhippāyo. Evañca pana, bhikkhave, pabbājetabbo upasampādetabbo. Paṭhamaṃ…pe…anujānāmi, bhikkhave, imehi tīhi saraṇagamanehi pabbajjaṃ upasampadanti ettha iminā anukkamena dinnehi tīhi saraṇagamanehi pabbajjaṃ upasampadaṃ anujānāmi kevalehīti adhippāyadassanato –
আদিন্নপুব্বলিঙ্গস্স, নগ্গস্সাপি দ্ৰযং ভৰে।
Ādinnapubbaliṅgassa, naggassāpi dvayaṃ bhave;
নেতরস্সাতি নো খন্তি, সব্বপাঠানুলোমতোতি॥ –
Netarassāti no khanti, sabbapāṭhānulomatoti. –
আচরিযো । আচরিযেন অদিন্নং ন ৰট্টতীতি এত্থ ‘‘পব্বজ্জা ন রুহতীতি ৰদন্তী’’তি লিখিতং। পোরাণগণ্ঠিপদেপি তথেৰ লিখিতং। উরাদীনি ঠানানি নাম। সংৰুতাদীনি করণানি নাম। ‘‘অনুনাসিকন্তং কত্ৰা একসম্বন্ধং কত্ৰা দানকালে অন্তরা অট্ঠত্ৰা ৰত্তব্বং। ৰিচ্ছিন্দিত্ৰা দানেপি যথাৰুত্তট্ঠানে এৰ ৰিচ্ছেদো, অঞ্ঞত্র ন ৰট্টতী’’তি লিখিতং। অনুনাসিকন্তে দিয্যমানে খলিত্ৰা ‘‘বুদ্ধং সরণং গচ্ছামী’’তি মকারেন মিস্সীভূতে খেত্তে ওতিণ্ণত্তা ৰট্টতীতি উপতিস্সত্থেরো। মিস্সং কত্ৰা ৰত্তুং ৰট্টতি, ৰচনকালে পন অনুনাসিকট্ঠানে ৰিচ্ছেদং অকত্ৰা ৰত্তব্বন্তি ধম্মসিরিত্থেরো। ‘‘এৰং কম্মৰাচাযম্পী’’তি ৰুত্তং। উভতোসুদ্ধিযাৰ ৰট্টতীতি এত্থ মহাথেরো পতিতদন্তাদিকারণতায অচতুরস্সং কত্ৰা ৰদতি, ব্যত্তসামণেরো সমীপে ঠিতো পব্বজ্জাপেক্খং ব্যত্তং ৰদাপেতি। মহাথেরেন অৰুত্তং ৰদাপেতীতি ন ৰট্টতি। কম্মৰাচায ইতরো ভিক্খু চে ৰদতি, ৰট্টতীতি। সঙ্ঘো হি কম্মং করোতি, ন পুগ্গলোতি। ন নানাসীমপৰত্তকম্মৰাচাসামঞ্ঞনযেন পটিক্খিপিতব্বত্তা। অথ থেরেন চতুরস্সং ৰুত্তং পব্বজ্জাপেক্খং ৰত্তুং অসক্কোন্তং সামণেরো সযং ৰত্ৰা ৰদাপেতি, উভতোসুদ্ধি এৰ হোতি থেরেন ৰুত্তস্সেৰ ৰুত্তত্তা। বুদ্ধং সরণং গচ্ছন্তো অসাধারণে বুদ্ধগুণে, ধম্মং সরণং গচ্ছন্তো নিব্বানং, সঙ্ঘং সরণং গচ্ছন্তো সেক্খধম্মং, অসেক্খধম্মঞ্চ সরণং গচ্ছতীতি অগ্গহিতগ্গহণৰসেন যোজনা কাতব্বা। অঞ্ঞথা সরণত্তযসঙ্করদোসো। সব্বমস্স কপ্পিযাকপ্পিযন্তি দসসিক্খাপদৰিনিমুত্তং পরামাসাপরামাসাদি। ‘‘আভিসমাচারিকেসু ৰিনেতব্বো’’তি ৰচনতো সেখিযউপজ্ঝাযৰত্তাদিআভিসমাচারিকসীলমনেন পূরেতব্বং। তত্থ চারিত্তস্স অকরণে ৰারিত্তস্স করণে দণ্ডকম্মারহো হোতীতি দীপেতি।
Ācariyo . Ācariyena adinnaṃ na vaṭṭatīti ettha ‘‘pabbajjā na ruhatīti vadantī’’ti likhitaṃ. Porāṇagaṇṭhipadepi tatheva likhitaṃ. Urādīni ṭhānāni nāma. Saṃvutādīni karaṇāni nāma. ‘‘Anunāsikantaṃ katvā ekasambandhaṃ katvā dānakāle antarā aṭṭhatvā vattabbaṃ. Vicchinditvā dānepi yathāvuttaṭṭhāne eva vicchedo, aññatra na vaṭṭatī’’ti likhitaṃ. Anunāsikante diyyamāne khalitvā ‘‘buddhaṃ saraṇaṃ gacchāmī’’ti makārena missībhūte khette otiṇṇattā vaṭṭatīti upatissatthero. Missaṃ katvā vattuṃ vaṭṭati, vacanakāle pana anunāsikaṭṭhāne vicchedaṃ akatvā vattabbanti dhammasiritthero. ‘‘Evaṃ kammavācāyampī’’ti vuttaṃ. Ubhatosuddhiyāva vaṭṭatīti ettha mahāthero patitadantādikāraṇatāya acaturassaṃ katvā vadati, byattasāmaṇero samīpe ṭhito pabbajjāpekkhaṃ byattaṃ vadāpeti. Mahātherena avuttaṃ vadāpetīti na vaṭṭati. Kammavācāya itaro bhikkhu ce vadati, vaṭṭatīti. Saṅgho hi kammaṃ karoti, na puggaloti. Na nānāsīmapavattakammavācāsāmaññanayena paṭikkhipitabbattā. Atha therena caturassaṃ vuttaṃ pabbajjāpekkhaṃ vattuṃ asakkontaṃ sāmaṇero sayaṃ vatvā vadāpeti, ubhatosuddhi eva hoti therena vuttasseva vuttattā. Buddhaṃ saraṇaṃ gacchanto asādhāraṇe buddhaguṇe, dhammaṃ saraṇaṃ gacchanto nibbānaṃ, saṅghaṃ saraṇaṃ gacchanto sekkhadhammaṃ, asekkhadhammañca saraṇaṃ gacchatīti aggahitaggahaṇavasena yojanā kātabbā. Aññathā saraṇattayasaṅkaradoso. Sabbamassa kappiyākappiyanti dasasikkhāpadavinimuttaṃ parāmāsāparāmāsādi. ‘‘Ābhisamācārikesu vinetabbo’’ti vacanato sekhiyaupajjhāyavattādiābhisamācārikasīlamanena pūretabbaṃ. Tattha cārittassa akaraṇe vārittassa karaṇe daṇḍakammāraho hotīti dīpeti.
পব্বজ্জাকথাৰণ্ণনা নিট্ঠিতা।
Pabbajjākathāvaṇṇanā niṭṭhitā.
Related texts:
তিপিটক (মূল) • Tipiṭaka (Mūla) / ৰিনযপিটক • Vinayapiṭaka / মহাৰগ্গপাল়ি • Mahāvaggapāḷi
৭. পব্বজ্জাকথা • 7. Pabbajjākathā
৯. পব্বজ্জূপসম্পদাকথা • 9. Pabbajjūpasampadākathā
অট্ঠকথা • Aṭṭhakathā / ৰিনযপিটক (অট্ঠকথা) • Vinayapiṭaka (aṭṭhakathā) / মহাৰগ্গ-অট্ঠকথা • Mahāvagga-aṭṭhakathā / পব্বজ্জাকথা • Pabbajjākathā
টীকা • Tīkā / ৰিনযপিটক (টীকা) • Vinayapiṭaka (ṭīkā) / সারত্থদীপনী-টীকা • Sāratthadīpanī-ṭīkā
যসস্স পব্বজ্জাকথাৰণ্ণনা • Yasassa pabbajjākathāvaṇṇanā
চতুগিহিসহাযপব্বজ্জাকথাৰণ্ণনা • Catugihisahāyapabbajjākathāvaṇṇanā
পব্বজ্জূপসম্পদাকথাৰণ্ণনা • Pabbajjūpasampadākathāvaṇṇanā
টীকা • Tīkā / ৰিনযপিটক (টীকা) • Vinayapiṭaka (ṭīkā) / ৰিমতিৰিনোদনী-টীকা • Vimativinodanī-ṭīkā / পব্বজ্জাকথাৰণ্ণনা • Pabbajjākathāvaṇṇanā
টীকা • Tīkā / ৰিনযপিটক (টীকা) • Vinayapiṭaka (ṭīkā) / পাচিত্যাদিযোজনাপাল়ি • Pācityādiyojanāpāḷi / ৭. পব্বজ্জাকথা • 7. Pabbajjākathā
