| Library / Tipiṭaka / ཏིཔིཊཀ • Tipiṭaka / ཝིམཏིཝིནོདནཱི-ཊཱིཀཱ • Vimativinodanī-ṭīkā |
པབྦཛྫཱཀཐཱཝཎྞནཱ
Pabbajjākathāvaṇṇanā
༢༥. ཨཱལ༹མྦརནྟི པཎཝཾ། ཝིཀེསིཀནྟི ཝིཔྤཀིཎྞཀེསཾ། ཝིཀྑེལི༹ཀནྟི ཝིསྶནྡམཱནལཱལཾ ། སུསཱནཾ མཉྙེཏི སུསཱནཾ ཝིཡ ཨདྡས སཀཾ པརིཛནནྟི སམྦནྡྷོ། ཨུདཱནཾ ཨུདཱནེསཱིཏི སཾཝེགཝསཔྤཝཏྟཾ ཝཙནཾ ནིཙྪཱརེསི། ཨུཔསྶཊྛནྟི དུཀྑེན སམྨིསྶཾ, དུཀྑོཏིཎྞཾ སབྦསཏྟཀཱཡཛཱཏནྟི ཨཏྠོ།
25.Āḷambaranti paṇavaṃ. Vikesikanti vippakiṇṇakesaṃ. Vikkheḷikanti vissandamānalālaṃ . Susānaṃ maññeti susānaṃ viya addasa sakaṃ parijananti sambandho. Udānaṃ udānesīti saṃvegavasappavattaṃ vacanaṃ nicchāresi. Upassaṭṭhanti dukkhena sammissaṃ, dukkhotiṇṇaṃ sabbasattakāyajātanti attho.
༢༦. ཨིདཾ ཁོ ཡསཱཏི བྷགཝཱ ནིབྦཱནཾ སནྡྷཱཡཱཧ། ཨནུཔུབྦིཾ ཀཐནྟི ཨནུཔཊིཔཱཊིཀཐཾ། ཨཱདཱིནཝནྟི དོསཾ། ཨོཀཱརནྟི ནིཧཱིནཏཱ ནིཧཱིནཛནསེཝིཏཏྟཱ། སཾཀིལེསནྟི ཏེཧི སཏྟཱནཾ སཾཀིལེསནཾ, སཾཀིལེསཝིསཡནྟི ཝཱ ཨཏྠོ། ཀལླཙིཏྟནྟི ཨརོགཙིཏྟཾ། སཱམཾ ཨཏྟནཱཝ ཨུཀྐཾསོ ཨུཀྑིཔནཾ ཨེཏིསྶནྟི སཱམུཀྐཾསིཀཱ, སཙྩདེསནཱ། ཏསྶཱ སརཱུཔདསྶནཾ ‘‘དུཀྑ’’ནྟིཨཱདི།
26.Idaṃ kho yasāti bhagavā nibbānaṃ sandhāyāha. Anupubbiṃ kathanti anupaṭipāṭikathaṃ. Ādīnavanti dosaṃ. Okāranti nihīnatā nihīnajanasevitattā. Saṃkilesanti tehi sattānaṃ saṃkilesanaṃ, saṃkilesavisayanti vā attho. Kallacittanti arogacittaṃ. Sāmaṃ attanāva ukkaṃso ukkhipanaṃ etissanti sāmukkaṃsikā, saccadesanā. Tassā sarūpadassanaṃ ‘‘dukkha’’ntiādi.
༢༧. ཨསྶདཱུཏེཏི ཨསྶཨཱརུལ༹ྷེ དཱུཏེ། ཨིདྡྷཱབྷིསངྑཱརནྟི ཨིདྡྷིཀིརིཡཾ། ཨབྷིསངྑརེསི ཨཀཱསི།
27.Assadūteti assaāruḷhe dūte. Iddhābhisaṅkhāranti iddhikiriyaṃ. Abhisaṅkharesi akāsi.
༢༨. ཡཐཱདིཊྛནྟི པཋམམགྒེན དིཊྛཾ ཙཏུསྶཙྩབྷཱུམིཾ སེསམགྒཏྟཡེན པཙྩཝེཀྑནྟསྶ, པསྶནྟསྶཱཏི ཨཏྠོ། མཱཏུ ནོ ཛཱིཝིཏནྟི ཨེཏྠ ནོཏི ནིཔཱཏམཏྟཾ, མཱཏུ ཛཱིཝིཏནྟི ཨཏྠོ། ཡསསྶ ཁཱིཎཱསཝཏྟཱ ‘‘ཨེཧི བྷིཀྑུ, སྭཱཀྑཱཏོ དྷམྨོ, ཙར བྲཧྨཙརིཡ’’ནྟི ཨེཏྟཀེནེཝ བྷགཝཱ ཨུཔསམྤདཾ ཨདཱསི། ཁཱིཎཱསཝཱནཉྷི ཨེཏྟཀེནེཝ ཨུཔསམྤདཱ ཨནུཉྙཱཏཱ པུབྦེཝ དུཀྑསྶ པརིཀྑཱིཎཏྟཱ། ཙར བྲཧྨཙརིཡནྟི སཱསནབྲཧྨཙརིཡསངྑཱཏཾ སིཀྑཱཔདཔཱུརཎཾ སནྡྷཱཡ ཝུཏྟཾ, ན མགྒབྲཧྨཙརིཡཾ།
28.Yathādiṭṭhanti paṭhamamaggena diṭṭhaṃ catussaccabhūmiṃ sesamaggattayena paccavekkhantassa, passantassāti attho. Mātu no jīvitanti ettha noti nipātamattaṃ, mātu jīvitanti attho. Yasassa khīṇāsavattā ‘‘ehi bhikkhu, svākkhāto dhammo, cara brahmacariya’’nti ettakeneva bhagavā upasampadaṃ adāsi. Khīṇāsavānañhi ettakeneva upasampadā anuññātā pubbeva dukkhassa parikkhīṇattā. Cara brahmacariyanti sāsanabrahmacariyasaṅkhātaṃ sikkhāpadapūraṇaṃ sandhāya vuttaṃ, na maggabrahmacariyaṃ.
༣༠. སེཊྛཱནུསེཊྛཱིནནྟི སེཊྛིནོ ཙ ཨནུསེཊྛིནོ ཙ པཝེཎཱིཝསེན ཨཱགཏཱ ཡེསཾ ཀུལཱནཾ སནྟི, ཏེསཾ སེཊྛཱནུསེཊྛཱིནཾ ཀུལཱནཾ། ཨོརཀོཏི ལཱམཀོ།
30.Seṭṭhānuseṭṭhīnanti seṭṭhino ca anuseṭṭhino ca paveṇīvasena āgatā yesaṃ kulānaṃ santi, tesaṃ seṭṭhānuseṭṭhīnaṃ kulānaṃ. Orakoti lāmako.
༣༢-༣༣. མཱ ཨེཀེན དྭེཏི ཨེཀེན མགྒེན དྭེ བྷིཀྑཱུ མཱ ཨགམིཏྠ། ཝིསུདྡྷེ སཏྟེ, གུཎེ ཝཱ མཱརེཏཱིཏི མཱརོ། པཱཔེ ནིཡུཏྟོ པཱཔིམཱ།
32-33.Mā ekena dveti ekena maggena dve bhikkhū mā agamittha. Visuddhe satte, guṇe vā māretīti māro. Pāpe niyutto pāpimā.
སབྦཔཱསེཧཱིཏི སབྦཀིལེསཔཱསེཧི། ཡེ དིབྦཱ ཡེ ཙ མཱནུསཱཏི ཡེ དིབྦཀཱམགུཎནིསྶིཏཱ, མཱནུསཀཀཱམགུཎནིསྶིཏཱ ཙ ཀིལེསཔཱསཱ ནཱམ ཨཏྠི, སབྦེཧི ཏེཧི། ‘‘ཏྭཾ བུདྡྷོ’’ཏི དེཝམནུསྶེཧི ཀརིཡམཱནསཀྐཱརསམྤཊིཙྪནཾ སནྡྷཱཡ ཝདཏི།
Sabbapāsehīti sabbakilesapāsehi. Ye dibbā ye ca mānusāti ye dibbakāmaguṇanissitā, mānusakakāmaguṇanissitā ca kilesapāsā nāma atthi, sabbehi tehi. ‘‘Tvaṃ buddho’’ti devamanussehi kariyamānasakkārasampaṭicchanaṃ sandhāya vadati.
ཨནྟལིཀྑེ ཙརནྟེ པཉྩཱབྷིཉྙེཔི བནྡྷཏཱིཏི ཨནྟལིཀྑཙརོ, རཱགཔཱསོ། མཱརོ པན པཱསམྤི ཨནྟལིཀྑཙརཾ མཉྙཏི། མཱནསོཏི མནོསམྤཡུཏྟོ།
Antalikkhe carante pañcābhiññepi bandhatīti antalikkhacaro, rāgapāso. Māro pana pāsampi antalikkhacaraṃ maññati. Mānasoti manosampayutto.
ཛཱནཱཏི མནྟི སོ ཀིར ‘‘མཧཱནུབྷཱཝོ ཨཉྙོ དེཝཔུཏྟོ ནིཝཱརེཏཱིཏི བྷཱིཏོ ནིཝཏྟིསྶཏི ནུ ཁོ’’ཏིསཉྙཱཡ ཝཏྭཱ ‘‘ནིཧཏོ ཏྭམསི ཨནྟཀཱ’’ཏི ཝུཏྟེ ‘‘ཛཱནཱཏི མ’’ནྟི དུམྨནོ པལཱཡི།
Jānāti manti so kira ‘‘mahānubhāvo añño devaputto nivāretīti bhīto nivattissati nu kho’’tisaññāya vatvā ‘‘nihato tvamasi antakā’’ti vutte ‘‘jānāti ma’’nti dummano palāyi.
༣༤. པརིཝིཏཀྐོ ཨུདཔཱདཱིཏི ཡསྨཱ ཨེཧིབྷིཀྑུབྷཱཝཱཡ ཨུཔནིསྶཡརཧིཏཱནམྤི པབྦཛིཏུཀཱམཏཱ ཨུཔྤཛྫིསྶཏི, བུདྡྷཱ ཙ ཏེ ན པབྦཱཛེནྟི, ཏསྨཱ ཏེསམྤི པབྦཛྫཱཝིདྷིཾ དསྶེནྟོ ཨེཝཾ པརིཝིཏཀྐེསཱིཏི དཊྛབྦཾ། ཨུཔནིསྶཡསམྤནྣཱ པན བྷགཝནྟཾ ཨུཔསངྐམིཏྭཱ ཨེཧིབྷིཀྑུབྷཱཝེནེཝ པབྦཛནྟི། ཡེ པཊིཀྑིཏྟཔུགྒལཱཏི སམྦནྡྷོ། སཡཾ པབྦཱཛེཏབྦོཏི ཨེཏྠ ‘‘ཀེསམསྶུཾ ཨོཧཱརེཏྭཱ’’ཏིཨཱདིཝཙནཏོ ཀེསཙྪེདནཀཱསཱཡཙྪཱདནསརཎདཱནཱནི པབྦཛྫཱ ནཱམ, ཏེསུ པཙྪིམདྭཡཾ བྷིཀྑཱུཧི ཨེཝ ཀཱཏབྦཾ, ཀཱརེཏབྦཾ ཝཱ། ‘‘པབྦཱཛེཧཱི’’ཏི ཨིདཾ ཏིཝིདྷམྤི སནྡྷཱཡ ཝུཏྟཾ། ཁཎྜསཱིམཾ ནེཏྭཱཏི བྷཎྜུཀམྨཱརོཙནཔརིཧརཎཏྠཾ། བྷིཀྑཱུནཉྷི ཨནཱརོཙེཏྭཱ ཨེཀསཱིམཱཡ ‘‘ཨེཏསྶ ཀེསེ ཚིནྡཱ’’ཏི ཨཉྙཾ ཨཱཎཱཔེཏུམྤི ན ཝཊྚཏི། པབྦཱཛེཏྭཱཏི ཀེསཱདིཙྪེདནམེཝ སནྡྷཱཡ ཝུཏྟཾ ‘‘ཀཱསཱཡཱནི ཨཙྪཱདེཏྭཱ’’ཏི ཝིསུཾ ཝུཏྟཏྟཱ། པབྦཱཛེཏུཾ ན ལབྷཏཱིཏི སརཎདཱནཾ སནྡྷཱཡ ཝུཏྟཾ, ཨནུཔསམྤནྣེན བྷིཀྑུཨཱཎཏྟིཡཱ དིནྣམྤི སརཎཾ ན རུཧཏི།
34.Parivitakko udapādīti yasmā ehibhikkhubhāvāya upanissayarahitānampi pabbajitukāmatā uppajjissati, buddhā ca te na pabbājenti, tasmā tesampi pabbajjāvidhiṃ dassento evaṃ parivitakkesīti daṭṭhabbaṃ. Upanissayasampannā pana bhagavantaṃ upasaṅkamitvā ehibhikkhubhāveneva pabbajanti. Ye paṭikkhittapuggalāti sambandho. Sayaṃ pabbājetabboti ettha ‘‘kesamassuṃ ohāretvā’’tiādivacanato kesacchedanakāsāyacchādanasaraṇadānāni pabbajjā nāma, tesu pacchimadvayaṃ bhikkhūhi eva kātabbaṃ, kāretabbaṃ vā. ‘‘Pabbājehī’’ti idaṃ tividhampi sandhāya vuttaṃ. Khaṇḍasīmaṃ netvāti bhaṇḍukammārocanapariharaṇatthaṃ. Bhikkhūnañhi anārocetvā ekasīmāya ‘‘etassa kese chindā’’ti aññaṃ āṇāpetumpi na vaṭṭati. Pabbājetvāti kesādicchedanameva sandhāya vuttaṃ ‘‘kāsāyāni acchādetvā’’ti visuṃ vuttattā. Pabbājetuṃ na labhatīti saraṇadānaṃ sandhāya vuttaṃ, anupasampannena bhikkhuāṇattiyā dinnampi saraṇaṃ na ruhati.
ཡསསྶཱིཏི པརིཝཱརསམྤནྣོ། ནིཛྫཱིཝནིསྶཏྟབྷཱཝནྟི ‘‘ཀེསཱ ནཱམ ཨིམསྨིཾ སརཱིརེ པཱཊིཡེཀྐོ ཀོཊྛཱསོ ཨཙེཏནོ ཨབྱཱཀཏོ སུཉྙོ ནིསྶཏྟོ ཐདྡྷོ པཐཝཱིདྷཱཏཱུ’’ཏིཨཱདིནཡཾ སངྒཎྷཱཏི, སབྦཾ ཝིསུདྡྷིམགྒེ (ཝིསུདྡྷི॰ ༡.༣༡༡) ཨཱགཏནཡེན གཧེཏབྦཾ། པུབྦེཏི པུབྦབུདྡྷུཔྤཱདེསུ། མདྡིཏསངྑཱརོཏི ཝིཔསྶནཱཝསེན ཝུཏྟཾ། བྷཱཝིཏབྷཱཝནོཏི སམཐཝསེནཱཔི།
Yasassīti parivārasampanno. Nijjīvanissattabhāvanti ‘‘kesā nāma imasmiṃ sarīre pāṭiyekko koṭṭhāso acetano abyākato suñño nissatto thaddho pathavīdhātū’’tiādinayaṃ saṅgaṇhāti, sabbaṃ visuddhimagge (visuddhi. 1.311) āgatanayena gahetabbaṃ. Pubbeti pubbabuddhuppādesu. Madditasaṅkhāroti vipassanāvasena vuttaṃ. Bhāvitabhāvanoti samathavasenāpi.
ཀཱསཱཡཱནི ཏིཀྑཏྟུཾ ཝཱ…པེ॰… པཊིགྒཱཧཱཔེཏབྦོཏི ཨེཏྠ ‘‘སབྦདུཀྑནིསྶརཎཏྠཱཡ ཨིམཾ ཀཱསཱཝཾ གཧེཏྭཱ’’ཏི ཝཱ ‘‘ཏཾ ཀཱསཱཝཾ དཏྭཱ’’ཏི ཝཱ ཝཏྭཱ ‘‘པབྦཱཛེཐ མཾ, བྷནྟེ, ཨནུཀམྤཾ ཨུཔཱདཱཡཱ’’ཏི ཨེཝཾ ཡཱཙནཔུབྦཀཾ ཙཱིཝརཾ པཊིཙྪཱཔེཏི། ཨཐཱཔཱིཏིཨཱདི ཏིཀྑཏྟུཾ པཊིགྒཱཧཱཔནཏོ པརཾ ཀཏྟབྦཝིདྷིདསྶནཾ། ཨཐཱཔཱིཏི ཏཏོ པརམྤཱིཏི ཨཏྠོ། ཀེཙི པན ‘‘ཙཱིཝརཾ ཨཔྤཊིགྒཱཧཱཔེཏྭཱ པབྦཛནཔྤཀཱརབྷེདདསྶནཏྠཾ ‘‘ཨཐཱཔཱི’’ཏི ཝུཏྟཾ, ཨཐཱཔཱིཏི ཙ ཨཐ ཝཱཏི ཨཏྠོ’’ཏི ཝདནྟི། ‘‘ཨདིནྣཾ ན ཝཊྚཏཱི’’ཏི ཨིམིནཱ པབྦཛྫཱ ན རུཧཏཱིཏི དསྶེཏི།
Kāsāyāni tikkhattuṃ vā…pe… paṭiggāhāpetabboti ettha ‘‘sabbadukkhanissaraṇatthāya imaṃ kāsāvaṃ gahetvā’’ti vā ‘‘taṃ kāsāvaṃ datvā’’ti vā vatvā ‘‘pabbājetha maṃ, bhante, anukampaṃ upādāyā’’ti evaṃ yācanapubbakaṃ cīvaraṃ paṭicchāpeti. Athāpītiādi tikkhattuṃ paṭiggāhāpanato paraṃ kattabbavidhidassanaṃ. Athāpīti tato parampīti attho. Keci pana ‘‘cīvaraṃ appaṭiggāhāpetvā pabbajanappakārabhedadassanatthaṃ ‘‘athāpī’’ti vuttaṃ, athāpīti ca atha vāti attho’’ti vadanti. ‘‘Adinnaṃ na vaṭṭatī’’ti iminā pabbajjā na ruhatīti dasseti.
པཱདེ ཝནྡཱཔེཏྭཱཏི པཱདཱབྷིམུཁཾ ནམཱཔེཏྭཱ། དཱུརེ ཝནྡནྟོཔི ཧི པཱདེ ཝནྡཏཱིཏི ཝུཙྩཏི། ཨུཔཛ྄ཛྷཱཡེན ཝཱཏི ཨེཏྠ ཡསྶ སནྟིཀེ ཨུཔཛ྄ཛྷཾ གཎྷཱཏི, ཨཡཾ ཨུཔཛ྄ཛྷཱཡོ། ཨཱབྷིསམཱཙཱརིཀེསུ ཝིནཡནཏྠཾ ཡཾ ཨཱཙརིཡཾ ཀཏྭཱ ནིཡྻཱཏེནྟི, ཨཡཾ ཨཱཙརིཡོ། སཙེ པན ཨུཔཛ྄ཛྷཱཡོ སཡམེཝ སབྦཾ སིཀྑཱཔེཏི, ཨཉྙསྨིཾ ན ནིཡྻཱཏེཏི, ཨུཔཛ྄ཛྷཱཡོཝསྶ ཨཱཙརིཡོཔི ཧོཏི, ཡཐཱ ཨུཔསམྤདཱཀཱལེ སཡམེཝ ཀམྨཝཱཙཾ ཝཱཙེནྟོ ཨུཔཛ྄ཛྷཱཡོཝ ཀམྨཝཱཙཱཙརིཡོཔི ཧོཏི།
Pādevandāpetvāti pādābhimukhaṃ namāpetvā. Dūre vandantopi hi pāde vandatīti vuccati. Upajjhāyena vāti ettha yassa santike upajjhaṃ gaṇhāti, ayaṃ upajjhāyo. Ābhisamācārikesu vinayanatthaṃ yaṃ ācariyaṃ katvā niyyātenti, ayaṃ ācariyo. Sace pana upajjhāyo sayameva sabbaṃ sikkhāpeti, aññasmiṃ na niyyāteti, upajjhāyovassa ācariyopi hoti, yathā upasampadākāle sayameva kammavācaṃ vācento upajjhāyova kammavācācariyopi hoti.
ཨནུནཱསིཀནྟཾ ཀཏྭཱ དཱནཀཱལེ ཨནྟརཱ ཝིཙྪེདོ ན ཀཱཏབྦོཏི ཨཱཧ ‘‘ཨེཀསམྦནྡྷཱནཱི’’ཏི།
Anunāsikantaṃ katvā dānakāle antarā vicchedo na kātabboti āha ‘‘ekasambandhānī’’ti.
‘‘ཨཱབྷིསམཱཙཱརིཀེསུ ཝིནེཏབྦོ’’ཏི ཨིམིནཱ སེཁིཡཝཏྟཁནྡྷཀཝཏྟེསུ, ཨཉྙེསུ
‘‘Ābhisamācārikesu vinetabbo’’ti iminā sekhiyavattakhandhakavattesu, aññesu
ཙ སུཀྐཝིསྶཊྛིཨཱདིལོཀཝཛྫསིཀྑཱཔདེསུ སཱམཎེརེཧི ཝཏྟིཏབྦཾ, ཏཏྠ ཨཝཏྟམཱནོ ཨལཛྫཱི, དཎྜཀམྨཱརཧོ ཙ ཧོཏཱིཏི དསྶེཏི།
Ca sukkavissaṭṭhiādilokavajjasikkhāpadesu sāmaṇerehi vattitabbaṃ, tattha avattamāno alajjī, daṇḍakammāraho ca hotīti dasseti.
པབྦཛྫཱཀཐཱཝཎྞནཱ ནིཊྛིཏཱ།
Pabbajjākathāvaṇṇanā niṭṭhitā.
Related texts:
ཏིཔིཊཀ (མཱུལ) • Tipiṭaka (Mūla) / ཝིནཡཔིཊཀ • Vinayapiṭaka / མཧཱཝགྒཔཱལི༹ • Mahāvaggapāḷi
༧. པབྦཛྫཱཀཐཱ • 7. Pabbajjākathā
༨. མཱརཀཐཱ • 8. Mārakathā
༩. པབྦཛྫཱུཔསམྤདཱཀཐཱ • 9. Pabbajjūpasampadākathā
ཨཊྛཀཐཱ • Aṭṭhakathā / ཝིནཡཔིཊཀ (ཨཊྛཀཐཱ) • Vinayapiṭaka (aṭṭhakathā) / མཧཱཝགྒ-ཨཊྛཀཐཱ • Mahāvagga-aṭṭhakathā / པབྦཛྫཱཀཐཱ • Pabbajjākathā
ཊཱིཀཱ • Tīkā / ཝིནཡཔིཊཀ (ཊཱིཀཱ) • Vinayapiṭaka (ṭīkā) / སཱརཏྠདཱིཔནཱི-ཊཱིཀཱ • Sāratthadīpanī-ṭīkā
ཡསསྶ པབྦཛྫཱཀཐཱཝཎྞནཱ • Yasassa pabbajjākathāvaṇṇanā
ཙཏུགིཧིསཧཱཡཔབྦཛྫཱཀཐཱཝཎྞནཱ • Catugihisahāyapabbajjākathāvaṇṇanā
མཱརཀཐཱཝཎྞནཱ • Mārakathāvaṇṇanā
པབྦཛྫཱུཔསམྤདཱཀཐཱཝཎྞནཱ • Pabbajjūpasampadākathāvaṇṇanā
ཊཱིཀཱ • Tīkā / ཝིནཡཔིཊཀ (ཊཱིཀཱ) • Vinayapiṭaka (ṭīkā) / ཝཛིརབུདྡྷི-ཊཱིཀཱ • Vajirabuddhi-ṭīkā / པབྦཛྫཱཀཐཱཝཎྞནཱ • Pabbajjākathāvaṇṇanā
ཊཱིཀཱ • Tīkā / ཝིནཡཔིཊཀ (ཊཱིཀཱ) • Vinayapiṭaka (ṭīkā) / པཱཙིཏྱཱདིཡོཛནཱཔཱལི༹ • Pācityādiyojanāpāḷi / ༧. པབྦཛྫཱཀཐཱ • 7. Pabbajjākathā
