| Library / Tipiṭaka / ਤਿਪਿਟਕ • Tipiṭaka / વਿਮਤਿવਿਨੋਦਨੀ-ਟੀਕਾ • Vimativinodanī-ṭīkā |
ਪਬ੍ਬਜ੍ਜਾਕਥਾવਣ੍ਣਨਾ
Pabbajjākathāvaṇṇanā
੨੫. ਆਲ਼ਮ੍ਬਰਨ੍ਤਿ ਪਣવਂ। વਿਕੇਸਿਕਨ੍ਤਿ વਿਪ੍ਪਕਿਣ੍ਣਕੇਸਂ। વਿਕ੍ਖੇਲ਼ਿਕਨ੍ਤਿ વਿਸ੍ਸਨ੍ਦਮਾਨਲਾਲਂ । ਸੁਸਾਨਂ ਮਞ੍ਞੇਤਿ ਸੁਸਾਨਂ વਿਯ ਅਦ੍ਦਸ ਸਕਂ ਪਰਿਜਨਨ੍ਤਿ ਸਮ੍ਬਨ੍ਧੋ। ਉਦਾਨਂ ਉਦਾਨੇਸੀਤਿ ਸਂવੇਗવਸਪ੍ਪવਤ੍ਤਂ વਚਨਂ ਨਿਚ੍ਛਾਰੇਸਿ। ਉਪਸ੍ਸਟ੍ਠਨ੍ਤਿ ਦੁਕ੍ਖੇਨ ਸਮ੍ਮਿਸ੍ਸਂ, ਦੁਕ੍ਖੋਤਿਣ੍ਣਂ ਸਬ੍ਬਸਤ੍ਤਕਾਯਜਾਤਨ੍ਤਿ ਅਤ੍ਥੋ।
25.Āḷambaranti paṇavaṃ. Vikesikanti vippakiṇṇakesaṃ. Vikkheḷikanti vissandamānalālaṃ . Susānaṃ maññeti susānaṃ viya addasa sakaṃ parijananti sambandho. Udānaṃ udānesīti saṃvegavasappavattaṃ vacanaṃ nicchāresi. Upassaṭṭhanti dukkhena sammissaṃ, dukkhotiṇṇaṃ sabbasattakāyajātanti attho.
੨੬. ਇਦਂ ਖੋ ਯਸਾਤਿ ਭਗવਾ ਨਿਬ੍ਬਾਨਂ ਸਨ੍ਧਾਯਾਹ। ਅਨੁਪੁਬ੍ਬਿਂ ਕਥਨ੍ਤਿ ਅਨੁਪਟਿਪਾਟਿਕਥਂ। ਆਦੀਨવਨ੍ਤਿ ਦੋਸਂ। ਓਕਾਰਨ੍ਤਿ ਨਿਹੀਨਤਾ ਨਿਹੀਨਜਨਸੇવਿਤਤ੍ਤਾ। ਸਂਕਿਲੇਸਨ੍ਤਿ ਤੇਹਿ ਸਤ੍ਤਾਨਂ ਸਂਕਿਲੇਸਨਂ, ਸਂਕਿਲੇਸવਿਸਯਨ੍ਤਿ વਾ ਅਤ੍ਥੋ। ਕਲ੍ਲਚਿਤ੍ਤਨ੍ਤਿ ਅਰੋਗਚਿਤ੍ਤਂ। ਸਾਮਂ ਅਤ੍ਤਨਾવ ਉਕ੍ਕਂਸੋ ਉਕ੍ਖਿਪਨਂ ਏਤਿਸ੍ਸਨ੍ਤਿ ਸਾਮੁਕ੍ਕਂਸਿਕਾ, ਸਚ੍ਚਦੇਸਨਾ। ਤਸ੍ਸਾ ਸਰੂਪਦਸ੍ਸਨਂ ‘‘ਦੁਕ੍ਖ’’ਨ੍ਤਿਆਦਿ।
26.Idaṃ kho yasāti bhagavā nibbānaṃ sandhāyāha. Anupubbiṃ kathanti anupaṭipāṭikathaṃ. Ādīnavanti dosaṃ. Okāranti nihīnatā nihīnajanasevitattā. Saṃkilesanti tehi sattānaṃ saṃkilesanaṃ, saṃkilesavisayanti vā attho. Kallacittanti arogacittaṃ. Sāmaṃ attanāva ukkaṃso ukkhipanaṃ etissanti sāmukkaṃsikā, saccadesanā. Tassā sarūpadassanaṃ ‘‘dukkha’’ntiādi.
੨੭. ਅਸ੍ਸਦੂਤੇਤਿ ਅਸ੍ਸਆਰੁਲ਼੍ਹੇ ਦੂਤੇ। ਇਦ੍ਧਾਭਿਸਙ੍ਖਾਰਨ੍ਤਿ ਇਦ੍ਧਿਕਿਰਿਯਂ। ਅਭਿਸਙ੍ਖਰੇਸਿ ਅਕਾਸਿ।
27.Assadūteti assaāruḷhe dūte. Iddhābhisaṅkhāranti iddhikiriyaṃ. Abhisaṅkharesi akāsi.
੨੮. ਯਥਾਦਿਟ੍ਠਨ੍ਤਿ ਪਠਮਮਗ੍ਗੇਨ ਦਿਟ੍ਠਂ ਚਤੁਸ੍ਸਚ੍ਚਭੂਮਿਂ ਸੇਸਮਗ੍ਗਤ੍ਤਯੇਨ ਪਚ੍ਚવੇਕ੍ਖਨ੍ਤਸ੍ਸ, ਪਸ੍ਸਨ੍ਤਸ੍ਸਾਤਿ ਅਤ੍ਥੋ। ਮਾਤੁ ਨੋ ਜੀવਿਤਨ੍ਤਿ ਏਤ੍ਥ ਨੋਤਿ ਨਿਪਾਤਮਤ੍ਤਂ, ਮਾਤੁ ਜੀવਿਤਨ੍ਤਿ ਅਤ੍ਥੋ। ਯਸਸ੍ਸ ਖੀਣਾਸવਤ੍ਤਾ ‘‘ਏਹਿ ਭਿਕ੍ਖੁ, ਸ੍વਾਕ੍ਖਾਤੋ ਧਮ੍ਮੋ, ਚਰ ਬ੍ਰਹ੍ਮਚਰਿਯ’’ਨ੍ਤਿ ਏਤ੍ਤਕੇਨੇવ ਭਗવਾ ਉਪਸਮ੍ਪਦਂ ਅਦਾਸਿ। ਖੀਣਾਸવਾਨਞ੍ਹਿ ਏਤ੍ਤਕੇਨੇવ ਉਪਸਮ੍ਪਦਾ ਅਨੁਞ੍ਞਾਤਾ ਪੁਬ੍ਬੇવ ਦੁਕ੍ਖਸ੍ਸ ਪਰਿਕ੍ਖੀਣਤ੍ਤਾ। ਚਰ ਬ੍ਰਹ੍ਮਚਰਿਯਨ੍ਤਿ ਸਾਸਨਬ੍ਰਹ੍ਮਚਰਿਯਸਙ੍ਖਾਤਂ ਸਿਕ੍ਖਾਪਦਪੂਰਣਂ ਸਨ੍ਧਾਯ વੁਤ੍ਤਂ, ਨ ਮਗ੍ਗਬ੍ਰਹ੍ਮਚਰਿਯਂ।
28.Yathādiṭṭhanti paṭhamamaggena diṭṭhaṃ catussaccabhūmiṃ sesamaggattayena paccavekkhantassa, passantassāti attho. Mātu no jīvitanti ettha noti nipātamattaṃ, mātu jīvitanti attho. Yasassa khīṇāsavattā ‘‘ehi bhikkhu, svākkhāto dhammo, cara brahmacariya’’nti ettakeneva bhagavā upasampadaṃ adāsi. Khīṇāsavānañhi ettakeneva upasampadā anuññātā pubbeva dukkhassa parikkhīṇattā. Cara brahmacariyanti sāsanabrahmacariyasaṅkhātaṃ sikkhāpadapūraṇaṃ sandhāya vuttaṃ, na maggabrahmacariyaṃ.
੩੦. ਸੇਟ੍ਠਾਨੁਸੇਟ੍ਠੀਨਨ੍ਤਿ ਸੇਟ੍ਠਿਨੋ ਚ ਅਨੁਸੇਟ੍ਠਿਨੋ ਚ ਪવੇਣੀવਸੇਨ ਆਗਤਾ ਯੇਸਂ ਕੁਲਾਨਂ ਸਨ੍ਤਿ, ਤੇਸਂ ਸੇਟ੍ਠਾਨੁਸੇਟ੍ਠੀਨਂ ਕੁਲਾਨਂ। ਓਰਕੋਤਿ ਲਾਮਕੋ।
30.Seṭṭhānuseṭṭhīnanti seṭṭhino ca anuseṭṭhino ca paveṇīvasena āgatā yesaṃ kulānaṃ santi, tesaṃ seṭṭhānuseṭṭhīnaṃ kulānaṃ. Orakoti lāmako.
੩੨-੩੩. ਮਾ ਏਕੇਨ ਦ੍વੇਤਿ ਏਕੇਨ ਮਗ੍ਗੇਨ ਦ੍વੇ ਭਿਕ੍ਖੂ ਮਾ ਅਗਮਿਤ੍ਥ। વਿਸੁਦ੍ਧੇ ਸਤ੍ਤੇ, ਗੁਣੇ વਾ ਮਾਰੇਤੀਤਿ ਮਾਰੋ। ਪਾਪੇ ਨਿਯੁਤ੍ਤੋ ਪਾਪਿਮਾ।
32-33.Mā ekena dveti ekena maggena dve bhikkhū mā agamittha. Visuddhe satte, guṇe vā māretīti māro. Pāpe niyutto pāpimā.
ਸਬ੍ਬਪਾਸੇਹੀਤਿ ਸਬ੍ਬਕਿਲੇਸਪਾਸੇਹਿ। ਯੇ ਦਿਬ੍ਬਾ ਯੇ ਚ ਮਾਨੁਸਾਤਿ ਯੇ ਦਿਬ੍ਬਕਾਮਗੁਣਨਿਸ੍ਸਿਤਾ, ਮਾਨੁਸਕਕਾਮਗੁਣਨਿਸ੍ਸਿਤਾ ਚ ਕਿਲੇਸਪਾਸਾ ਨਾਮ ਅਤ੍ਥਿ, ਸਬ੍ਬੇਹਿ ਤੇਹਿ। ‘‘ਤ੍વਂ ਬੁਦ੍ਧੋ’’ਤਿ ਦੇવਮਨੁਸ੍ਸੇਹਿ ਕਰਿਯਮਾਨਸਕ੍ਕਾਰਸਮ੍ਪਟਿਚ੍ਛਨਂ ਸਨ੍ਧਾਯ વਦਤਿ।
Sabbapāsehīti sabbakilesapāsehi. Ye dibbā ye ca mānusāti ye dibbakāmaguṇanissitā, mānusakakāmaguṇanissitā ca kilesapāsā nāma atthi, sabbehi tehi. ‘‘Tvaṃ buddho’’ti devamanussehi kariyamānasakkārasampaṭicchanaṃ sandhāya vadati.
ਅਨ੍ਤਲਿਕ੍ਖੇ ਚਰਨ੍ਤੇ ਪਞ੍ਚਾਭਿਞ੍ਞੇਪਿ ਬਨ੍ਧਤੀਤਿ ਅਨ੍ਤਲਿਕ੍ਖਚਰੋ, ਰਾਗਪਾਸੋ। ਮਾਰੋ ਪਨ ਪਾਸਮ੍ਪਿ ਅਨ੍ਤਲਿਕ੍ਖਚਰਂ ਮਞ੍ਞਤਿ। ਮਾਨਸੋਤਿ ਮਨੋਸਮ੍ਪਯੁਤ੍ਤੋ।
Antalikkhe carante pañcābhiññepi bandhatīti antalikkhacaro, rāgapāso. Māro pana pāsampi antalikkhacaraṃ maññati. Mānasoti manosampayutto.
ਜਾਨਾਤਿ ਮਨ੍ਤਿ ਸੋ ਕਿਰ ‘‘ਮਹਾਨੁਭਾવੋ ਅਞ੍ਞੋ ਦੇવਪੁਤ੍ਤੋ ਨਿવਾਰੇਤੀਤਿ ਭੀਤੋ ਨਿવਤ੍ਤਿਸ੍ਸਤਿ ਨੁ ਖੋ’’ਤਿਸਞ੍ਞਾਯ વਤ੍વਾ ‘‘ਨਿਹਤੋ ਤ੍વਮਸਿ ਅਨ੍ਤਕਾ’’ਤਿ વੁਤ੍ਤੇ ‘‘ਜਾਨਾਤਿ ਮ’’ਨ੍ਤਿ ਦੁਮ੍ਮਨੋ ਪਲਾਯਿ।
Jānāti manti so kira ‘‘mahānubhāvo añño devaputto nivāretīti bhīto nivattissati nu kho’’tisaññāya vatvā ‘‘nihato tvamasi antakā’’ti vutte ‘‘jānāti ma’’nti dummano palāyi.
੩੪. ਪਰਿવਿਤਕ੍ਕੋ ਉਦਪਾਦੀਤਿ ਯਸ੍ਮਾ ਏਹਿਭਿਕ੍ਖੁਭਾવਾਯ ਉਪਨਿਸ੍ਸਯਰਹਿਤਾਨਮ੍ਪਿ ਪਬ੍ਬਜਿਤੁਕਾਮਤਾ ਉਪ੍ਪਜ੍ਜਿਸ੍ਸਤਿ, ਬੁਦ੍ਧਾ ਚ ਤੇ ਨ ਪਬ੍ਬਾਜੇਨ੍ਤਿ, ਤਸ੍ਮਾ ਤੇਸਮ੍ਪਿ ਪਬ੍ਬਜ੍ਜਾવਿਧਿਂ ਦਸ੍ਸੇਨ੍ਤੋ ਏવਂ ਪਰਿવਿਤਕ੍ਕੇਸੀਤਿ ਦਟ੍ਠਬ੍ਬਂ। ਉਪਨਿਸ੍ਸਯਸਮ੍ਪਨ੍ਨਾ ਪਨ ਭਗવਨ੍ਤਂ ਉਪਸਙ੍ਕਮਿਤ੍વਾ ਏਹਿਭਿਕ੍ਖੁਭਾવੇਨੇવ ਪਬ੍ਬਜਨ੍ਤਿ। ਯੇ ਪਟਿਕ੍ਖਿਤ੍ਤਪੁਗ੍ਗਲਾਤਿ ਸਮ੍ਬਨ੍ਧੋ। ਸਯਂ ਪਬ੍ਬਾਜੇਤਬ੍ਬੋਤਿ ਏਤ੍ਥ ‘‘ਕੇਸਮਸ੍ਸੁਂ ਓਹਾਰੇਤ੍વਾ’’ਤਿਆਦਿવਚਨਤੋ ਕੇਸਚ੍ਛੇਦਨਕਾਸਾਯਚ੍ਛਾਦਨਸਰਣਦਾਨਾਨਿ ਪਬ੍ਬਜ੍ਜਾ ਨਾਮ, ਤੇਸੁ ਪਚ੍ਛਿਮਦ੍વਯਂ ਭਿਕ੍ਖੂਹਿ ਏવ ਕਾਤਬ੍ਬਂ, ਕਾਰੇਤਬ੍ਬਂ વਾ। ‘‘ਪਬ੍ਬਾਜੇਹੀ’’ਤਿ ਇਦਂ ਤਿવਿਧਮ੍ਪਿ ਸਨ੍ਧਾਯ વੁਤ੍ਤਂ। ਖਣ੍ਡਸੀਮਂ ਨੇਤ੍વਾਤਿ ਭਣ੍ਡੁਕਮ੍ਮਾਰੋਚਨਪਰਿਹਰਣਤ੍ਥਂ। ਭਿਕ੍ਖੂਨਞ੍ਹਿ ਅਨਾਰੋਚੇਤ੍વਾ ਏਕਸੀਮਾਯ ‘‘ਏਤਸ੍ਸ ਕੇਸੇ ਛਿਨ੍ਦਾ’’ਤਿ ਅਞ੍ਞਂ ਆਣਾਪੇਤੁਮ੍ਪਿ ਨ વਟ੍ਟਤਿ। ਪਬ੍ਬਾਜੇਤ੍વਾਤਿ ਕੇਸਾਦਿਚ੍ਛੇਦਨਮੇવ ਸਨ੍ਧਾਯ વੁਤ੍ਤਂ ‘‘ਕਾਸਾਯਾਨਿ ਅਚ੍ਛਾਦੇਤ੍વਾ’’ਤਿ વਿਸੁਂ વੁਤ੍ਤਤ੍ਤਾ। ਪਬ੍ਬਾਜੇਤੁਂ ਨ ਲਭਤੀਤਿ ਸਰਣਦਾਨਂ ਸਨ੍ਧਾਯ વੁਤ੍ਤਂ, ਅਨੁਪਸਮ੍ਪਨ੍ਨੇਨ ਭਿਕ੍ਖੁਆਣਤ੍ਤਿਯਾ ਦਿਨ੍ਨਮ੍ਪਿ ਸਰਣਂ ਨ ਰੁਹਤਿ।
34.Parivitakko udapādīti yasmā ehibhikkhubhāvāya upanissayarahitānampi pabbajitukāmatā uppajjissati, buddhā ca te na pabbājenti, tasmā tesampi pabbajjāvidhiṃ dassento evaṃ parivitakkesīti daṭṭhabbaṃ. Upanissayasampannā pana bhagavantaṃ upasaṅkamitvā ehibhikkhubhāveneva pabbajanti. Ye paṭikkhittapuggalāti sambandho. Sayaṃ pabbājetabboti ettha ‘‘kesamassuṃ ohāretvā’’tiādivacanato kesacchedanakāsāyacchādanasaraṇadānāni pabbajjā nāma, tesu pacchimadvayaṃ bhikkhūhi eva kātabbaṃ, kāretabbaṃ vā. ‘‘Pabbājehī’’ti idaṃ tividhampi sandhāya vuttaṃ. Khaṇḍasīmaṃ netvāti bhaṇḍukammārocanapariharaṇatthaṃ. Bhikkhūnañhi anārocetvā ekasīmāya ‘‘etassa kese chindā’’ti aññaṃ āṇāpetumpi na vaṭṭati. Pabbājetvāti kesādicchedanameva sandhāya vuttaṃ ‘‘kāsāyāni acchādetvā’’ti visuṃ vuttattā. Pabbājetuṃ na labhatīti saraṇadānaṃ sandhāya vuttaṃ, anupasampannena bhikkhuāṇattiyā dinnampi saraṇaṃ na ruhati.
ਯਸਸ੍ਸੀਤਿ ਪਰਿવਾਰਸਮ੍ਪਨ੍ਨੋ। ਨਿਜ੍ਜੀવਨਿਸ੍ਸਤ੍ਤਭਾવਨ੍ਤਿ ‘‘ਕੇਸਾ ਨਾਮ ਇਮਸ੍ਮਿਂ ਸਰੀਰੇ ਪਾਟਿਯੇਕ੍ਕੋ ਕੋਟ੍ਠਾਸੋ ਅਚੇਤਨੋ ਅਬ੍ਯਾਕਤੋ ਸੁਞ੍ਞੋ ਨਿਸ੍ਸਤ੍ਤੋ ਥਦ੍ਧੋ ਪਥવੀਧਾਤੂ’’ਤਿਆਦਿਨਯਂ ਸਙ੍ਗਣ੍ਹਾਤਿ, ਸਬ੍ਬਂ વਿਸੁਦ੍ਧਿਮਗ੍ਗੇ (વਿਸੁਦ੍ਧਿ॰ ੧.੩੧੧) ਆਗਤਨਯੇਨ ਗਹੇਤਬ੍ਬਂ। ਪੁਬ੍ਬੇਤਿ ਪੁਬ੍ਬਬੁਦ੍ਧੁਪ੍ਪਾਦੇਸੁ। ਮਦ੍ਦਿਤਸਙ੍ਖਾਰੋਤਿ વਿਪਸ੍ਸਨਾવਸੇਨ વੁਤ੍ਤਂ। ਭਾવਿਤਭਾવਨੋਤਿ ਸਮਥવਸੇਨਾਪਿ।
Yasassīti parivārasampanno. Nijjīvanissattabhāvanti ‘‘kesā nāma imasmiṃ sarīre pāṭiyekko koṭṭhāso acetano abyākato suñño nissatto thaddho pathavīdhātū’’tiādinayaṃ saṅgaṇhāti, sabbaṃ visuddhimagge (visuddhi. 1.311) āgatanayena gahetabbaṃ. Pubbeti pubbabuddhuppādesu. Madditasaṅkhāroti vipassanāvasena vuttaṃ. Bhāvitabhāvanoti samathavasenāpi.
ਕਾਸਾਯਾਨਿ ਤਿਕ੍ਖਤ੍ਤੁਂ વਾ…ਪੇ॰… ਪਟਿਗ੍ਗਾਹਾਪੇਤਬ੍ਬੋਤਿ ਏਤ੍ਥ ‘‘ਸਬ੍ਬਦੁਕ੍ਖਨਿਸ੍ਸਰਣਤ੍ਥਾਯ ਇਮਂ ਕਾਸਾવਂ ਗਹੇਤ੍વਾ’’ਤਿ વਾ ‘‘ਤਂ ਕਾਸਾવਂ ਦਤ੍વਾ’’ਤਿ વਾ વਤ੍વਾ ‘‘ਪਬ੍ਬਾਜੇਥ ਮਂ, ਭਨ੍ਤੇ, ਅਨੁਕਮ੍ਪਂ ਉਪਾਦਾਯਾ’’ਤਿ ਏવਂ ਯਾਚਨਪੁਬ੍ਬਕਂ ਚੀવਰਂ ਪਟਿਚ੍ਛਾਪੇਤਿ। ਅਥਾਪੀਤਿਆਦਿ ਤਿਕ੍ਖਤ੍ਤੁਂ ਪਟਿਗ੍ਗਾਹਾਪਨਤੋ ਪਰਂ ਕਤ੍ਤਬ੍ਬવਿਧਿਦਸ੍ਸਨਂ। ਅਥਾਪੀਤਿ ਤਤੋ ਪਰਮ੍ਪੀਤਿ ਅਤ੍ਥੋ। ਕੇਚਿ ਪਨ ‘‘ਚੀવਰਂ ਅਪ੍ਪਟਿਗ੍ਗਾਹਾਪੇਤ੍વਾ ਪਬ੍ਬਜਨਪ੍ਪਕਾਰਭੇਦਦਸ੍ਸਨਤ੍ਥਂ ‘‘ਅਥਾਪੀ’’ਤਿ વੁਤ੍ਤਂ, ਅਥਾਪੀਤਿ ਚ ਅਥ વਾਤਿ ਅਤ੍ਥੋ’’ਤਿ વਦਨ੍ਤਿ। ‘‘ਅਦਿਨ੍ਨਂ ਨ વਟ੍ਟਤੀ’’ਤਿ ਇਮਿਨਾ ਪਬ੍ਬਜ੍ਜਾ ਨ ਰੁਹਤੀਤਿ ਦਸ੍ਸੇਤਿ।
Kāsāyāni tikkhattuṃ vā…pe… paṭiggāhāpetabboti ettha ‘‘sabbadukkhanissaraṇatthāya imaṃ kāsāvaṃ gahetvā’’ti vā ‘‘taṃ kāsāvaṃ datvā’’ti vā vatvā ‘‘pabbājetha maṃ, bhante, anukampaṃ upādāyā’’ti evaṃ yācanapubbakaṃ cīvaraṃ paṭicchāpeti. Athāpītiādi tikkhattuṃ paṭiggāhāpanato paraṃ kattabbavidhidassanaṃ. Athāpīti tato parampīti attho. Keci pana ‘‘cīvaraṃ appaṭiggāhāpetvā pabbajanappakārabhedadassanatthaṃ ‘‘athāpī’’ti vuttaṃ, athāpīti ca atha vāti attho’’ti vadanti. ‘‘Adinnaṃ na vaṭṭatī’’ti iminā pabbajjā na ruhatīti dasseti.
ਪਾਦੇ વਨ੍ਦਾਪੇਤ੍વਾਤਿ ਪਾਦਾਭਿਮੁਖਂ ਨਮਾਪੇਤ੍વਾ। ਦੂਰੇ વਨ੍ਦਨ੍ਤੋਪਿ ਹਿ ਪਾਦੇ વਨ੍ਦਤੀਤਿ વੁਚ੍ਚਤਿ। ਉਪਜ੍ਝਾਯੇਨ વਾਤਿ ਏਤ੍ਥ ਯਸ੍ਸ ਸਨ੍ਤਿਕੇ ਉਪਜ੍ਝਂ ਗਣ੍ਹਾਤਿ, ਅਯਂ ਉਪਜ੍ਝਾਯੋ। ਆਭਿਸਮਾਚਾਰਿਕੇਸੁ વਿਨਯਨਤ੍ਥਂ ਯਂ ਆਚਰਿਯਂ ਕਤ੍વਾ ਨਿਯ੍ਯਾਤੇਨ੍ਤਿ, ਅਯਂ ਆਚਰਿਯੋ। ਸਚੇ ਪਨ ਉਪਜ੍ਝਾਯੋ ਸਯਮੇવ ਸਬ੍ਬਂ ਸਿਕ੍ਖਾਪੇਤਿ, ਅਞ੍ਞਸ੍ਮਿਂ ਨ ਨਿਯ੍ਯਾਤੇਤਿ, ਉਪਜ੍ਝਾਯੋવਸ੍ਸ ਆਚਰਿਯੋਪਿ ਹੋਤਿ, ਯਥਾ ਉਪਸਮ੍ਪਦਾਕਾਲੇ ਸਯਮੇવ ਕਮ੍ਮવਾਚਂ વਾਚੇਨ੍ਤੋ ਉਪਜ੍ਝਾਯੋવ ਕਮ੍ਮવਾਚਾਚਰਿਯੋਪਿ ਹੋਤਿ।
Pādevandāpetvāti pādābhimukhaṃ namāpetvā. Dūre vandantopi hi pāde vandatīti vuccati. Upajjhāyena vāti ettha yassa santike upajjhaṃ gaṇhāti, ayaṃ upajjhāyo. Ābhisamācārikesu vinayanatthaṃ yaṃ ācariyaṃ katvā niyyātenti, ayaṃ ācariyo. Sace pana upajjhāyo sayameva sabbaṃ sikkhāpeti, aññasmiṃ na niyyāteti, upajjhāyovassa ācariyopi hoti, yathā upasampadākāle sayameva kammavācaṃ vācento upajjhāyova kammavācācariyopi hoti.
ਅਨੁਨਾਸਿਕਨ੍ਤਂ ਕਤ੍વਾ ਦਾਨਕਾਲੇ ਅਨ੍ਤਰਾ વਿਚ੍ਛੇਦੋ ਨ ਕਾਤਬ੍ਬੋਤਿ ਆਹ ‘‘ਏਕਸਮ੍ਬਨ੍ਧਾਨੀ’’ਤਿ।
Anunāsikantaṃ katvā dānakāle antarā vicchedo na kātabboti āha ‘‘ekasambandhānī’’ti.
‘‘ਆਭਿਸਮਾਚਾਰਿਕੇਸੁ વਿਨੇਤਬ੍ਬੋ’’ਤਿ ਇਮਿਨਾ ਸੇਖਿਯવਤ੍ਤਖਨ੍ਧਕવਤ੍ਤੇਸੁ, ਅਞ੍ਞੇਸੁ
‘‘Ābhisamācārikesu vinetabbo’’ti iminā sekhiyavattakhandhakavattesu, aññesu
ਚ ਸੁਕ੍ਕવਿਸ੍ਸਟ੍ਠਿਆਦਿਲੋਕવਜ੍ਜਸਿਕ੍ਖਾਪਦੇਸੁ ਸਾਮਣੇਰੇਹਿ વਤ੍ਤਿਤਬ੍ਬਂ, ਤਤ੍ਥ ਅવਤ੍ਤਮਾਨੋ ਅਲਜ੍ਜੀ, ਦਣ੍ਡਕਮ੍ਮਾਰਹੋ ਚ ਹੋਤੀਤਿ ਦਸ੍ਸੇਤਿ।
Ca sukkavissaṭṭhiādilokavajjasikkhāpadesu sāmaṇerehi vattitabbaṃ, tattha avattamāno alajjī, daṇḍakammāraho ca hotīti dasseti.
ਪਬ੍ਬਜ੍ਜਾਕਥਾવਣ੍ਣਨਾ ਨਿਟ੍ਠਿਤਾ।
Pabbajjākathāvaṇṇanā niṭṭhitā.
Related texts:
ਤਿਪਿਟਕ (ਮੂਲ) • Tipiṭaka (Mūla) / વਿਨਯਪਿਟਕ • Vinayapiṭaka / ਮਹਾવਗ੍ਗਪਾਲ਼ਿ • Mahāvaggapāḷi
੭. ਪਬ੍ਬਜ੍ਜਾਕਥਾ • 7. Pabbajjākathā
੮. ਮਾਰਕਥਾ • 8. Mārakathā
੯. ਪਬ੍ਬਜ੍ਜੂਪਸਮ੍ਪਦਾਕਥਾ • 9. Pabbajjūpasampadākathā
ਅਟ੍ਠਕਥਾ • Aṭṭhakathā / વਿਨਯਪਿਟਕ (ਅਟ੍ਠਕਥਾ) • Vinayapiṭaka (aṭṭhakathā) / ਮਹਾવਗ੍ਗ-ਅਟ੍ਠਕਥਾ • Mahāvagga-aṭṭhakathā / ਪਬ੍ਬਜ੍ਜਾਕਥਾ • Pabbajjākathā
ਟੀਕਾ • Tīkā / વਿਨਯਪਿਟਕ (ਟੀਕਾ) • Vinayapiṭaka (ṭīkā) / ਸਾਰਤ੍ਥਦੀਪਨੀ-ਟੀਕਾ • Sāratthadīpanī-ṭīkā
ਯਸਸ੍ਸ ਪਬ੍ਬਜ੍ਜਾਕਥਾવਣ੍ਣਨਾ • Yasassa pabbajjākathāvaṇṇanā
ਚਤੁਗਿਹਿਸਹਾਯਪਬ੍ਬਜ੍ਜਾਕਥਾવਣ੍ਣਨਾ • Catugihisahāyapabbajjākathāvaṇṇanā
ਮਾਰਕਥਾવਣ੍ਣਨਾ • Mārakathāvaṇṇanā
ਪਬ੍ਬਜ੍ਜੂਪਸਮ੍ਪਦਾਕਥਾવਣ੍ਣਨਾ • Pabbajjūpasampadākathāvaṇṇanā
ਟੀਕਾ • Tīkā / વਿਨਯਪਿਟਕ (ਟੀਕਾ) • Vinayapiṭaka (ṭīkā) / વਜਿਰਬੁਦ੍ਧਿ-ਟੀਕਾ • Vajirabuddhi-ṭīkā / ਪਬ੍ਬਜ੍ਜਾਕਥਾવਣ੍ਣਨਾ • Pabbajjākathāvaṇṇanā
ਟੀਕਾ • Tīkā / વਿਨਯਪਿਟਕ (ਟੀਕਾ) • Vinayapiṭaka (ṭīkā) / ਪਾਚਿਤ੍ਯਾਦਿਯੋਜਨਾਪਾਲ਼ਿ • Pācityādiyojanāpāḷi / ੭. ਪਬ੍ਬਜ੍ਜਾਕਥਾ • 7. Pabbajjākathā
