| Library / Tipiṭaka / திபிடக • Tipiṭaka / மிலிந்த³பஞ்ஹபாளி • Milindapañhapāḷi |
5. பப்³ப³ஜ்ஜபஞ்ஹோ
5. Pabbajjapañho
5. அத² கோ² ஆயஸ்மா நாக³ஸேனோ யேன மிலிந்த³ஸ்ஸ ரஞ்ஞோ நிவேஸனங் தேனுபஸங்கமி, உபஸங்கமித்வா பஞ்ஞத்தே ஆஸனே நிஸீதி³. அத² கோ² மிலிந்தோ³ ராஜா ஆயஸ்மந்தங் நாக³ஸேனங் ஸபரிஸங் பணீதேன கா²த³னீயேன போ⁴ஜனீயேன ஸஹத்தா² ஸந்தப்பெத்வா ஸம்பவாரெத்வா ஏகமேகங் பி⁴க்கு²ங் ஏகமேகேன து³ஸ்ஸயுகே³ன அச்சா²தெ³த்வா ஆயஸ்மந்தங் நாக³ஸேனங் திசீவரேன அச்சா²தெ³த்வா ஆயஸ்மந்தங் நாக³ஸேனங் ஏதத³வோச ‘‘ப⁴ந்தே நாக³ஸேன த³ஸஹி, பி⁴க்கூ²ஹி ஸத்³தி⁴ங் இத⁴ நிஸீத³த², அவஸேஸா க³ச்ச²ந்தூ’’தி.
5. Atha kho āyasmā nāgaseno yena milindassa rañño nivesanaṃ tenupasaṅkami, upasaṅkamitvā paññatte āsane nisīdi. Atha kho milindo rājā āyasmantaṃ nāgasenaṃ saparisaṃ paṇītena khādanīyena bhojanīyena sahatthā santappetvā sampavāretvā ekamekaṃ bhikkhuṃ ekamekena dussayugena acchādetvā āyasmantaṃ nāgasenaṃ ticīvarena acchādetvā āyasmantaṃ nāgasenaṃ etadavoca ‘‘bhante nāgasena dasahi, bhikkhūhi saddhiṃ idha nisīdatha, avasesā gacchantū’’ti.
அத² கோ² மிலிந்தோ³ ராஜா ஆயஸ்மந்தங் நாக³ஸேனங் பு⁴த்தாவிங் ஓனீதபத்தபாணிங் விதி³த்வா அஞ்ஞதரங் நீசங் ஆஸனங் க³ஹெத்வா ஏகமந்தங் நிஸீதி³, ஏகமந்தங் நிஸின்னோ கோ² மிலிந்தோ³ ராஜா ஆயஸ்மந்தங் நாக³ஸேனங் ஏதத³வோச ‘‘ப⁴ந்தே நாக³ஸேன, கிம்ஹி ஹோதி கதா²ஸல்லாபோ’’தி? ‘‘அத்தே²ன மயங், மஹாராஜ, அத்தி²கா, அத்தே² ஹோது கதா²ஸல்லாபோ’’தி.
Atha kho milindo rājā āyasmantaṃ nāgasenaṃ bhuttāviṃ onītapattapāṇiṃ viditvā aññataraṃ nīcaṃ āsanaṃ gahetvā ekamantaṃ nisīdi, ekamantaṃ nisinno kho milindo rājā āyasmantaṃ nāgasenaṃ etadavoca ‘‘bhante nāgasena, kimhi hoti kathāsallāpo’’ti? ‘‘Atthena mayaṃ, mahārāja, atthikā, atthe hotu kathāsallāpo’’ti.
ராஜா ஆஹ ‘‘கிமத்தி²யா, ப⁴ந்தே நாக³ஸேன, தும்ஹாகங் பப்³ப³ஜ்ஜா, கோ ச தும்ஹாகங் பரமத்தோ²’’தி. தே²ரோ ஆஹ ‘‘கிந்தி, மஹாராஜ, இத³ங் து³க்க²ங் நிருஜ்ஜெ²ய்ய, அஞ்ஞஞ்ச து³க்க²ங் ந உப்பஜ்ஜெய்யாதி. ஏதத³த்தா², மஹாராஜ, அம்ஹாகங் பப்³ப³ஜ்ஜா, அனுபாதா³ பரினிப்³பா³னங் கோ² பன அம்ஹாகங் பரமத்தோ²’’தி.
Rājā āha ‘‘kimatthiyā, bhante nāgasena, tumhākaṃ pabbajjā, ko ca tumhākaṃ paramattho’’ti. Thero āha ‘‘kinti, mahārāja, idaṃ dukkhaṃ nirujjheyya, aññañca dukkhaṃ na uppajjeyyāti. Etadatthā, mahārāja, amhākaṃ pabbajjā, anupādā parinibbānaṃ kho pana amhākaṃ paramattho’’ti.
‘‘த்வங் பன, ப⁴ந்தே, ஏதத³த்தா²ய பப்³ப³ஜிதோஸீ’’தி? ‘‘அஹங் கோ², மஹாராஜ, த³ஹரகோ ஸந்தோ பப்³ப³ஜிதோ, ந ஜானாமி இமஸ்ஸ நாமத்தா²ய பப்³ப³ஜாமீதி, அபி ச கோ² மே ஏவங் அஹோஸி ‘பண்டி³தா இமே ஸமணா ஸக்யபுத்தியா, தே மங் ஸிக்கா²பெஸ்ஸந்தீ’தி, ஸ்வாஹங் தேஹி ஸிக்கா²பிதோ ஜானாமி ச பஸ்ஸாமி ச ‘இமஸ்ஸ நாமத்தா²ய பப்³ப³ஜ்ஜா’’’தி.
‘‘Tvaṃ pana, bhante, etadatthāya pabbajitosī’’ti? ‘‘Ahaṃ kho, mahārāja, daharako santo pabbajito, na jānāmi imassa nāmatthāya pabbajāmīti, api ca kho me evaṃ ahosi ‘paṇḍitā ime samaṇā sakyaputtiyā, te maṃ sikkhāpessantī’ti, svāhaṃ tehi sikkhāpito jānāmi ca passāmi ca ‘imassa nāmatthāya pabbajjā’’’ti.
‘‘கல்லோஸி , ப⁴ந்தே நாக³ஸேனா’’தி.
‘‘Kallosi , bhante nāgasenā’’ti.
பப்³ப³ஜ்ஜபஞ்ஹோ பஞ்சமோ.
Pabbajjapañho pañcamo.
Footnotes:
