Library / Tipiṭaka / ཏིཔིཊཀ • Tipiṭaka / མིལིནྡཔཉྷཔཱལི༹ • Milindapañhapāḷi

    ༥. པབྦཛྫཔཉྷོ

    5. Pabbajjapañho

    ༥. ཨཐ ཁོ ཨཱཡསྨཱ ནཱགསེནོ ཡེན མིལིནྡསྶ རཉྙོ ནིཝེསནཾ ཏེནུཔསངྐམི, ཨུཔསངྐམིཏྭཱ པཉྙཏྟེ ཨཱསནེ ནིསཱིདི། ཨཐ ཁོ མིལིནྡོ རཱཛཱ ཨཱཡསྨནྟཾ ནཱགསེནཾ སཔརིསཾ པཎཱིཏེན ཁཱདནཱིཡེན བྷོཛནཱིཡེན སཧཏྠཱ སནྟཔྤེཏྭཱ སམྤཝཱརེཏྭཱ ཨེཀམེཀཾ བྷིཀྑུཾ ཨེཀམེཀེན དུསྶཡུགེན ཨཙྪཱདེཏྭཱ ཨཱཡསྨནྟཾ ནཱགསེནཾ ཏིཙཱིཝརེན ཨཙྪཱདེཏྭཱ ཨཱཡསྨནྟཾ ནཱགསེནཾ ཨེཏདཝོཙ ‘‘བྷནྟེ ནཱགསེན དསཧི, བྷིཀྑཱུཧི སདྡྷིཾ ཨིདྷ ནིསཱིདཐ, ཨཝསེསཱ གཙྪནྟཱུ’’ཏི།

    5. Atha kho āyasmā nāgaseno yena milindassa rañño nivesanaṃ tenupasaṅkami, upasaṅkamitvā paññatte āsane nisīdi. Atha kho milindo rājā āyasmantaṃ nāgasenaṃ saparisaṃ paṇītena khādanīyena bhojanīyena sahatthā santappetvā sampavāretvā ekamekaṃ bhikkhuṃ ekamekena dussayugena acchādetvā āyasmantaṃ nāgasenaṃ ticīvarena acchādetvā āyasmantaṃ nāgasenaṃ etadavoca ‘‘bhante nāgasena dasahi, bhikkhūhi saddhiṃ idha nisīdatha, avasesā gacchantū’’ti.

    ཨཐ ཁོ མིལིནྡོ རཱཛཱ ཨཱཡསྨནྟཾ ནཱགསེནཾ བྷུཏྟཱཝིཾ ཨོནཱིཏཔཏྟཔཱཎིཾ ཝིདིཏྭཱ ཨཉྙཏརཾ ནཱིཙཾ ཨཱསནཾ གཧེཏྭཱ ཨེཀམནྟཾ ནིསཱིདི, ཨེཀམནྟཾ ནིསིནྣོ ཁོ མིལིནྡོ རཱཛཱ ཨཱཡསྨནྟཾ ནཱགསེནཾ ཨེཏདཝོཙ ‘‘བྷནྟེ ནཱགསེན, ཀིམྷི ཧོཏི ཀཐཱསལླཱཔོ’’ཏི? ‘‘ཨཏྠེན མཡཾ, མཧཱརཱཛ, ཨཏྠིཀཱ, ཨཏྠེ ཧོཏུ ཀཐཱསལླཱཔོ’’ཏི།

    Atha kho milindo rājā āyasmantaṃ nāgasenaṃ bhuttāviṃ onītapattapāṇiṃ viditvā aññataraṃ nīcaṃ āsanaṃ gahetvā ekamantaṃ nisīdi, ekamantaṃ nisinno kho milindo rājā āyasmantaṃ nāgasenaṃ etadavoca ‘‘bhante nāgasena, kimhi hoti kathāsallāpo’’ti? ‘‘Atthena mayaṃ, mahārāja, atthikā, atthe hotu kathāsallāpo’’ti.

    རཱཛཱ ཨཱཧ ‘‘ཀིམཏྠིཡཱ, བྷནྟེ ནཱགསེན, ཏུམྷཱཀཾ པབྦཛྫཱ, ཀོ ཙ ཏུམྷཱཀཾ པརམཏྠོ’’ཏི། ཐེརོ ཨཱཧ ‘‘ཀིནྟི, མཧཱརཱཛ, ཨིདཾ དུཀྑཾ ནིརུཛ྄ཛྷེཡྻ, ཨཉྙཉྩ དུཀྑཾ ན ཨུཔྤཛྫེཡྻཱཏི། ཨེཏདཏྠཱ, མཧཱརཱཛ, ཨམྷཱཀཾ པབྦཛྫཱ, ཨནུཔཱདཱ པརིནིབྦཱནཾ ཁོ པན ཨམྷཱཀཾ པརམཏྠོ’’ཏི།

    Rājā āha ‘‘kimatthiyā, bhante nāgasena, tumhākaṃ pabbajjā, ko ca tumhākaṃ paramattho’’ti. Thero āha ‘‘kinti, mahārāja, idaṃ dukkhaṃ nirujjheyya, aññañca dukkhaṃ na uppajjeyyāti. Etadatthā, mahārāja, amhākaṃ pabbajjā, anupādā parinibbānaṃ kho pana amhākaṃ paramattho’’ti.

    ‘‘ཀིཾ པན, བྷནྟེ ནཱགསེན, སབྦེ ཨེཏདཏྠཱཡ པབྦཛནྟཱི’’ཏི? ‘‘ན ཧི, མཧཱརཱཛ, ཀེཙི ཨེཏདཏྠཱཡ པབྦཛནྟི, ཀེཙི རཱཛཱབྷིནཱིཏཱ 1 པབྦཛནྟི, ཀེཙི ཙོརཱབྷིནཱིཏཱ 2 པབྦཛནྟི, ཀེཙི ཨིཎཊྚཱ པབྦཛནྟི, ཀེཙི ཨཱཛཱིཝིཀཏྠཱཡ པབྦཛནྟི, ཡེ པན སམྨཱ པབྦཛནྟི, ཏེ ཨེཏདཏྠཱཡ པབྦཛནྟཱི’’ཏི།

    ‘‘Kiṃ pana, bhante nāgasena, sabbe etadatthāya pabbajantī’’ti? ‘‘Na hi, mahārāja, keci etadatthāya pabbajanti, keci rājābhinītā 3 pabbajanti, keci corābhinītā 4 pabbajanti, keci iṇaṭṭā pabbajanti, keci ājīvikatthāya pabbajanti, ye pana sammā pabbajanti, te etadatthāya pabbajantī’’ti.

    ‘‘ཏྭཾ པན, བྷནྟེ, ཨེཏདཏྠཱཡ པབྦཛིཏོསཱི’’ཏི? ‘‘ཨཧཾ ཁོ, མཧཱརཱཛ, དཧརཀོ སནྟོ པབྦཛིཏོ, ན ཛཱནཱམི ཨིམསྶ ནཱམཏྠཱཡ པབྦཛཱམཱིཏི, ཨཔི ཙ ཁོ མེ ཨེཝཾ ཨཧོསི ‘པཎྜིཏཱ ཨིམེ སམཎཱ སཀྱཔུཏྟིཡཱ, ཏེ མཾ སིཀྑཱཔེསྶནྟཱི’ཏི, སྭཱཧཾ ཏེཧི སིཀྑཱཔིཏོ ཛཱནཱམི ཙ པསྶཱམི ཙ ‘ཨིམསྶ ནཱམཏྠཱཡ པབྦཛྫཱ’’’ཏི།

    ‘‘Tvaṃ pana, bhante, etadatthāya pabbajitosī’’ti? ‘‘Ahaṃ kho, mahārāja, daharako santo pabbajito, na jānāmi imassa nāmatthāya pabbajāmīti, api ca kho me evaṃ ahosi ‘paṇḍitā ime samaṇā sakyaputtiyā, te maṃ sikkhāpessantī’ti, svāhaṃ tehi sikkhāpito jānāmi ca passāmi ca ‘imassa nāmatthāya pabbajjā’’’ti.

    ‘‘ཀལློསི , བྷནྟེ ནཱགསེནཱ’’ཏི།

    ‘‘Kallosi , bhante nāgasenā’’ti.

    པབྦཛྫཔཉྷོ པཉྩམོ།

    Pabbajjapañho pañcamo.




    Next: ༦. པཊིསནྡྷིཔཉྷོ • 6. Paṭisandhipañho




    Footnotes:
    1. རཱཛབྷཱིཏིཏཱ (སཱི॰)
    2. ཙོརབྷཱིཏིཏཱ (སཱི॰)
    3. rājabhītitā (sī.)
    4. corabhītitā (sī.)

    © 1991-2023 The Titi Tudorancea Bulletin | Titi Tudorancea® is a Registered Trademark | Terms of use and privacy policy
    Contact