| Library / Tipiṭaka / တိပိဋက • Tipiṭaka / အင္ဂုတ္တရနိကာယ • Aṅguttaranikāya |
၉. ပဗ္ဗဇ္ဇာသုတ္တံ
9. Pabbajjāsuttaṃ
၅၉. ‘‘တသ္မာတိဟ, ဘိက္ခဝေ, ဧဝံ သိက္ခိတဗ္ဗံ – ‘ယထာပဗ္ဗဇ္ဇာပရိစိတဉ္စ နော စိတ္တံ ဘဝိသ္သတိ, န စုပ္ပန္နာ ပာပကာ အကုသလာ ဓမ္မာ စိတ္တံ ပရိယာဒာယ ဌသ္သန္တိ; အနိစ္စသညာပရိစိတဉ္စ နော စိတ္တံ ဘဝိသ္သတိ, အနတ္တသညာပရိစိတဉ္စ နော စိတ္တံ ဘဝိသ္သတိ, အသုဘသညာပရိစိတဉ္စ နော စိတ္တံ ဘဝိသ္သတိ, အာဒီနဝသညာပရိစိတဉ္စ နော စိတ္တံ ဘဝိသ္သတိ, လောကသ္သ သမဉ္စ ဝိသမဉ္စ ဉတ္ဝာ တံသညာပရိစိတဉ္စ နော စိတ္တံ ဘဝိသ္သတိ, လောကသ္သ ဘဝဉ္စ 1 ဝိဘဝဉ္စ ဉတ္ဝာ တံသညာပရိစိတဉ္စ နော စိတ္တံ ဘဝိသ္သတိ, လောကသ္သ သမုဒယဉ္စ အတ္ထင္ဂမဉ္စ ဉတ္ဝာ တံသညာပရိစိတဉ္စ နော စိတ္တံ ဘဝိသ္သတိ, ပဟာနသညာပရိစိတဉ္စ နော စိတ္တံ ဘဝိသ္သတိ, ဝိရာဂသညာပရိစိတဉ္စ နော စိတ္တံ ဘဝိသ္သတိ, နိရောဓသညာပရိစိတဉ္စ နော စိတ္တံ ဘဝိသ္သတီ’တိ – ဧဝဉ္ဟိ ဝော, ဘိက္ခဝေ, သိက္ခိတဗ္ဗံ။
59. ‘‘Tasmātiha, bhikkhave, evaṃ sikkhitabbaṃ – ‘yathāpabbajjāparicitañca no cittaṃ bhavissati, na cuppannā pāpakā akusalā dhammā cittaṃ pariyādāya ṭhassanti; aniccasaññāparicitañca no cittaṃ bhavissati, anattasaññāparicitañca no cittaṃ bhavissati, asubhasaññāparicitañca no cittaṃ bhavissati, ādīnavasaññāparicitañca no cittaṃ bhavissati, lokassa samañca visamañca ñatvā taṃsaññāparicitañca no cittaṃ bhavissati, lokassa bhavañca 2 vibhavañca ñatvā taṃsaññāparicitañca no cittaṃ bhavissati, lokassa samudayañca atthaṅgamañca ñatvā taṃsaññāparicitañca no cittaṃ bhavissati, pahānasaññāparicitañca no cittaṃ bhavissati, virāgasaññāparicitañca no cittaṃ bhavissati, nirodhasaññāparicitañca no cittaṃ bhavissatī’ti – evañhi vo, bhikkhave, sikkhitabbaṃ.
‘‘ယတော ခော, ဘိက္ခဝေ, ဘိက္ခုနော ယထာပဗ္ဗဇ္ဇာပရိစိတဉ္စ စိတ္တံ ဟောတိ န စုပ္ပန္နာ ပာပကာ အကုသလာ ဓမ္မာ စိတ္တံ ပရိယာဒာယ တိဋ္ဌန္တိ, အနိစ္စသညာပရိစိတဉ္စ စိတ္တံ ဟောတိ, အနတ္တသညာပရိစိတဉ္စ စိတ္တံ ဟောတိ, အသုဘသညာပရိစိတဉ္စ စိတ္တံ ဟောတိ, အာဒီနဝသညာပရိစိတဉ္စ စိတ္တံ ဟောတိ, လောကသ္သ သမဉ္စ ဝိသမဉ္စ ဉတ္ဝာ တံသညာပရိစိတဉ္စ စိတ္တံ ဟောတိ, လောကသ္သ ဘဝဉ္စ ဝိဘဝဉ္စ ဉတ္ဝာ တံသညာပရိစိတဉ္စ စိတ္တံ ဟောတိ, လောကသ္သ သမုဒယဉ္စ အတ္ထင္ဂမဉ္စ ဉတ္ဝာ တံသညာပရိစိတဉ္စ စိတ္တံ ဟောတိ, ပဟာနသညာပရိစိတဉ္စ စိတ္တံ ဟောတိ, ဝိရာဂသညာပရိစိတဉ္စ စိတ္တံ ဟောတိ, နိရောဓသညာပရိစိတဉ္စ စိတ္တံ ဟောတိ, တသ္သ ဒ္ဝိန္နံ ဖလာနံ အညတရံ ဖလံ ပာဋိကင္ခံ – ဒိဋ္ဌေဝ ဓမ္မေ အညာ, သတိ ဝာ ဥပာဒိသေသေ အနာဂာမိတာ’’တိ။ နဝမံ။
‘‘Yato kho, bhikkhave, bhikkhuno yathāpabbajjāparicitañca cittaṃ hoti na cuppannā pāpakā akusalā dhammā cittaṃ pariyādāya tiṭṭhanti, aniccasaññāparicitañca cittaṃ hoti, anattasaññāparicitañca cittaṃ hoti, asubhasaññāparicitañca cittaṃ hoti, ādīnavasaññāparicitañca cittaṃ hoti, lokassa samañca visamañca ñatvā taṃsaññāparicitañca cittaṃ hoti, lokassa bhavañca vibhavañca ñatvā taṃsaññāparicitañca cittaṃ hoti, lokassa samudayañca atthaṅgamañca ñatvā taṃsaññāparicitañca cittaṃ hoti, pahānasaññāparicitañca cittaṃ hoti, virāgasaññāparicitañca cittaṃ hoti, nirodhasaññāparicitañca cittaṃ hoti, tassa dvinnaṃ phalānaṃ aññataraṃ phalaṃ pāṭikaṅkhaṃ – diṭṭheva dhamme aññā, sati vā upādisese anāgāmitā’’ti. Navamaṃ.
Footnotes:
Related texts:
အဋ္ဌကထာ • Aṭṭhakathā / သုတ္တပိဋက (အဋ္ဌကထာ) • Suttapiṭaka (aṭṭhakathā) / အင္ဂုတ္တရနိကာယ (အဋ္ဌကထာ) • Aṅguttaranikāya (aṭṭhakathā) / ၉. ပဗ္ဗဇ္ဇာသုတ္တဝဏ္ဏနာ • 9. Pabbajjāsuttavaṇṇanā
ဋီကာ • Tīkā / သုတ္တပိဋက (ဋီကာ) • Suttapiṭaka (ṭīkā) / အင္ဂုတ္တရနိကာယ (ဋီကာ) • Aṅguttaranikāya (ṭīkā) / ၁-၁၀. သစိတ္တသုတ္တာဒိဝဏ္ဏနာ • 1-10. Sacittasuttādivaṇṇanā
