| Library / Tipiṭaka / д̇ибидага • Tipiṭaka / суд̇д̇анибаад̇а-адтагат̇аа • Suttanipāta-aṭṭhakathā |
3. махааваг̇г̇о
3. Mahāvaggo
1. баб̣б̣аж̇ж̇аасуд̇д̇аван̣н̣анаа
1. Pabbajjāsuttavaṇṇanā
408. баб̣б̣аж̇ж̇ам̣ гид̇д̇аяиссаамийд̇и баб̣б̣аж̇ж̇аасуд̇д̇ам̣. гаа уббад̇д̇и? бхаг̇авад̇и гира саавад̇т̇ияам̣ вихаранд̇з ааяасмад̇о аананд̣̇асса баривид̇агго уд̣̇абаад̣̇и – ‘‘саарибуд̇д̇аад̣̇ийнам̣ махаасаавагаанам̣ баб̣б̣аж̇ж̇аа гид̇д̇ид̇аа, д̇ам̣ бхигкуу жа убаасагаа жа ж̇аананд̇и. бхаг̇авад̇о бана агид̇д̇ид̇аа, яам̣нуунаахам̣ гид̇д̇зяяа’’нд̇и. со ж̇зд̇аванавихаарз аасанз нисийд̣̇ид̇ваа жид̇д̇аб̣ийж̇аним̣ г̇ахзд̇ваа бхигкуунам̣ бхаг̇авад̇о баб̣б̣аж̇ж̇ам̣ гид̇д̇знд̇о имам̣ суд̇д̇амабхааси.
408.Pabbajjaṃkittayissāmīti pabbajjāsuttaṃ. Kā uppatti? Bhagavati kira sāvatthiyaṃ viharante āyasmato ānandassa parivitakko udapādi – ‘‘sāriputtādīnaṃ mahāsāvakānaṃ pabbajjā kittitā, taṃ bhikkhū ca upāsakā ca jānanti. Bhagavato pana akittitā, yaṃnūnāhaṃ kitteyya’’nti. So jetavanavihāre āsane nisīditvā cittabījaniṃ gahetvā bhikkhūnaṃ bhagavato pabbajjaṃ kittento imaṃ suttamabhāsi.
д̇ад̇т̇а яасмаа баб̣б̣аж̇ж̇ам̣ гид̇д̇знд̇зна яат̇аа баб̣б̣аж̇и, д̇ам̣ гид̇д̇зд̇аб̣б̣ам̣. яат̇аа жа баб̣б̣аж̇и, д̇ам̣ гид̇д̇знд̇зна яат̇аа виймам̣самаано баб̣б̣аж̇ж̇ам̣ рожзси, д̇ам̣ гид̇д̇зд̇аб̣б̣ам̣. д̇асмаа ‘‘баб̣б̣аж̇ж̇ам̣ гид̇д̇аяиссаамий’’д̇и вад̇ваа ‘‘яат̇аа баб̣б̣аж̇ий’’д̇иаад̣̇имааха. жагкумаад̇и бан̃жахи жагкуухи жагкумаа жагкусамбаннод̇и ад̇т̇о. сзсамаад̣̇иг̇аат̇ааяа уд̇д̇аанамзва.
Tattha yasmā pabbajjaṃ kittentena yathā pabbaji, taṃ kittetabbaṃ. Yathā ca pabbaji, taṃ kittentena yathā vīmaṃsamāno pabbajjaṃ rocesi, taṃ kittetabbaṃ. Tasmā ‘‘pabbajjaṃ kittayissāmī’’ti vatvā ‘‘yathā pabbajī’’tiādimāha. Cakkhumāti pañcahi cakkhūhi cakkhumā cakkhusampannoti attho. Sesamādigāthāya uttānameva.
409. ид̣̇аани ‘‘яат̇аа виймам̣самаано’’д̇и д̇амад̇т̇ам̣ багаасзнд̇о ааха ‘‘самб̣аад̇хояа’’нд̇и. д̇ад̇т̇а самб̣аад̇ход̇и буд̇д̇ад̣̇аараад̣̇исамбийл̣анзна гилзсасамбийл̣анзна жа гусалагирияааяа огаасарахид̇о. раж̇ассааяад̇ананд̇и гамб̣ож̇аад̣̇аяо вияа ассаад̣̇ийнам̣, рааг̇аад̣̇ираж̇асса уббад̇д̇ид̣̇зсо. аб̣бхогаасод̇и вуд̇д̇асамб̣аад̇хабадибагкабхаавзна аагаасо вияа вивадаа. ид̇и д̣̇исваана баб̣б̣аж̇ийд̇и ид̇и гхарааваасабаб̣б̣аж̇ж̇аасу б̣яаад̇хиж̇араамаран̣зхи судтуд̇арам̣ жод̣̇ияамаанахад̣̇аяо аад̣̇ийнавамаанисам̣сан̃жа виймам̣сид̇ваа, махаабхинигкаманам̣ нигкамид̇ваа , аномаанад̣̇ийд̇ийрз каг̇г̇зна гзсз чинд̣̇ид̇ваа, д̇аавад̣̇зва жа д̣̇ван̇г̇уламад̇д̇асан̣тид̇асаман̣асааруббагзсамассу худ̇ваа гхадигаарзна б̣рахмунаа убанийд̇з адта баригкаарз г̇ахзд̇ваа ‘‘звам̣ ниваасзд̇аб̣б̣ам̣ баарубид̇аб̣б̣а’’нд̇и гзнажи ананусидто анзгаж̇аад̇исахассабавад̇д̇ид̇зна ад̇д̇ано баб̣б̣аж̇ж̇аажин̣н̣знзва сигкаабияамаано баб̣б̣аж̇и. згам̣ гаасаавам̣ ниваасзд̇ваа згам̣ уд̇д̇араасан̇г̇ам̣ гарид̇ваа згам̣ жийварам̣ канд̇хз гарид̇ваа мад̇д̇игаабад̇д̇ам̣ ам̣сз аалаг̇г̇зд̇ваа баб̣б̣аж̇ид̇авзсам̣ ад̇хидтаасийд̇и вуд̇д̇ам̣ ход̇и. сзсамзд̇т̇а уд̇д̇аанамзва.
409. Idāni ‘‘yathā vīmaṃsamāno’’ti tamatthaṃ pakāsento āha ‘‘sambādhoya’’nti. Tattha sambādhoti puttadārādisampīḷanena kilesasampīḷanena ca kusalakiriyāya okāsarahito. Rajassāyatananti kambojādayo viya assādīnaṃ, rāgādirajassa uppattideso. Abbhokāsoti vuttasambādhapaṭipakkhabhāvena ākāso viya vivaṭā. Iti disvāna pabbajīti iti gharāvāsapabbajjāsu byādhijarāmaraṇehi suṭṭhutaraṃ codiyamānahadayo ādīnavamānisaṃsañca vīmaṃsitvā, mahābhinikkhamanaṃ nikkhamitvā , anomānadītīre khaggena kese chinditvā, tāvadeva ca dvaṅgulamattasaṇṭhitasamaṇasāruppakesamassu hutvā ghaṭikārena brahmunā upanīte aṭṭha parikkhāre gahetvā ‘‘evaṃ nivāsetabbaṃ pārupitabba’’nti kenaci ananusiṭṭho anekajātisahassapavattitena attano pabbajjāciṇṇeneva sikkhāpiyamāno pabbaji. Ekaṃ kāsāvaṃ nivāsetvā ekaṃ uttarāsaṅgaṃ karitvā ekaṃ cīvaraṃ khandhe karitvā mattikāpattaṃ aṃse ālaggetvā pabbajitavesaṃ adhiṭṭhāsīti vuttaṃ hoti. Sesamettha uttānameva.
410. звам̣ бхаг̇авад̇о баб̣б̣аж̇ж̇ам̣ гид̇д̇зд̇ваа д̇ад̇о барам̣ баб̣б̣аж̇ид̇абадибад̇д̇им̣ аномаанад̣̇ийд̇ийрам̣ хид̇ваа бад̇хаанааяа г̇аманан̃жа багаасзд̇ум̣ ‘‘баб̣б̣аж̇ид̇ваана гааязнаа’’д̇иаад̣̇им̣ саб̣б̣амабхааси. д̇ад̇т̇а гааязна баабагаммам̣ виваж̇ж̇аяийд̇и д̇ивид̇хам̣ гааяад̣̇ужжарид̇ам̣ важ̇ж̇зси. важийд̣̇ужжарид̇анд̇и жад̇уб̣б̣ид̇хам̣ важийд̣̇ужжарид̇ам̣. ааж̇ийвам̣ барисод̇хаяийд̇и мижчааж̇ийвам̣ хид̇ваа саммааж̇ийвамзва бавад̇д̇аяи.
410. Evaṃ bhagavato pabbajjaṃ kittetvā tato paraṃ pabbajitapaṭipattiṃ anomānadītīraṃ hitvā padhānāya gamanañca pakāsetuṃ ‘‘pabbajitvāna kāyenā’’tiādiṃ sabbamabhāsi. Tattha kāyena pāpakammaṃ vivajjayīti tividhaṃ kāyaduccaritaṃ vajjesi. Vacīduccaritanti catubbidhaṃ vacīduccaritaṃ. Ājīvaṃ parisodhayīti micchājīvaṃ hitvā sammājīvameva pavattayi.
411. звам̣ ааж̇ийвадтамагасийлам̣ сод̇хзд̇ваа аномаанад̣̇ийд̇ийрад̇о д̇им̣саяож̇анаббамаан̣ам̣ сад̇д̇аахзна аг̇амаа рааж̇аг̇ахам̣ б̣уд̣̇д̇хо. д̇ад̇т̇а гин̃жааби яад̣̇аа рааж̇аг̇ахам̣ аг̇амааси, д̇ад̣̇аа б̣уд̣̇д̇хо на ход̇и, д̇ат̇ааби б̣уд̣̇д̇хасса буб̣б̣ажарияаад̇и гад̇ваа звам̣ вад̇д̇ум̣ лаб̣бхад̇и – ‘‘ид̇ха рааж̇аа ж̇аад̇о, ид̇ха раж̇ж̇ам̣ аг̇г̇ахзсий’’д̇иаад̣̇и логияавохаараважанам̣ вияа. маг̇ад̇хаананд̇и маг̇ад̇хаанам̣ ж̇анабад̣̇асса наг̇аранд̇и вуд̇д̇ам̣ ход̇и. г̇ириб̣б̣аж̇анд̇и ид̣̇амби д̇асса наамам̣. д̇ан̃хи бан̣д̣аваг̇иж̇жхагуудавзбхаараисиг̇иливзбулланаамагаанам̣ бан̃жаннам̣ г̇ирийнам̣ маж̇жхз важ̇о вияа тид̇ам̣, д̇асмаа ‘‘г̇ириб̣б̣аж̇а’’нд̇и вужжад̇и. бин̣д̣ааяа абхихаарзсийд̇и бхигкад̇т̇ааяа д̇асмим̣ наг̇арз жари. со гира наг̇арад̣̇ваарз тад̇ваа жинд̇зси – ‘‘сажаахам̣ ран̃н̃о б̣имб̣исаарасса ад̇д̇ано ааг̇аманам̣ нивзд̣̇зяяам̣, ‘суд̣̇д̇ход̣̇анасса буд̇д̇о сид̣̇д̇хад̇т̇о наама гумааро ааг̇ад̇о’д̇и б̣ахумби мз бажжаяам̣ абхихарзяяа. на ко бана мз д̇ам̣ бад̇ируубам̣ баб̣б̣аж̇ид̇асса аарожзд̇ваа бажжаяаг̇ахан̣ам̣, ханд̣̇аахам̣ бин̣д̣ааяа жараамий’’д̇и д̣̇звад̣̇ад̇д̇ияам̣ бам̣сугуулажийварам̣ баарубид̇ваа мад̇д̇игаабад̇д̇ам̣ г̇ахзд̇ваа баажийнад̣̇ваарзна наг̇арам̣ бависид̇ваа анугхарам̣ бин̣д̣ааяа ажари. д̇знааха ааяасмаа аананд̣̇о – ‘‘бин̣д̣ааяа абхихаарзсий’’д̇и. аагин̣н̣аваралагкан̣од̇и сарийрз аагирид̇ваа вияа табид̇аваралагкан̣о вибулаваралагкан̣о ваа. вибуламби хи ‘‘аагин̣н̣а’’нд̇и вужжад̇и. яат̇ааха – ‘‘аагин̣н̣алуд̣̇д̣̇о бурисо, д̇хаад̇ижзлам̣ва магкид̇о’’д̇и (ж̇аа. 1.6.118; 1.9.106). вибулалуд̣̇д̣̇од̇и ад̇т̇о.
411. Evaṃ ājīvaṭṭhamakasīlaṃ sodhetvā anomānadītīrato tiṃsayojanappamāṇaṃ sattāhena agamā rājagahaṃ buddho. Tattha kiñcāpi yadā rājagahaṃ agamāsi, tadā buddho na hoti, tathāpi buddhassa pubbacariyāti katvā evaṃ vattuṃ labbhati – ‘‘idha rājā jāto, idha rajjaṃ aggahesī’’tiādi lokiyavohāravacanaṃ viya. Magadhānanti magadhānaṃ janapadassa nagaranti vuttaṃ hoti. Giribbajanti idampi tassa nāmaṃ. Tañhi paṇḍavagijjhakūṭavebhāraisigilivepullanāmakānaṃ pañcannaṃ girīnaṃ majjhe vajo viya ṭhitaṃ, tasmā ‘‘giribbaja’’nti vuccati. Piṇḍāya abhihāresīti bhikkhatthāya tasmiṃ nagare cari. So kira nagaradvāre ṭhatvā cintesi – ‘‘sacāhaṃ rañño bimbisārassa attano āgamanaṃ nivedeyyaṃ, ‘suddhodanassa putto siddhattho nāma kumāro āgato’ti bahumpi me paccayaṃ abhihareyya. Na kho pana me taṃ patirūpaṃ pabbajitassa ārocetvā paccayagahaṇaṃ, handāhaṃ piṇḍāya carāmī’’ti devadattiyaṃ paṃsukūlacīvaraṃ pārupitvā mattikāpattaṃ gahetvā pācīnadvārena nagaraṃ pavisitvā anugharaṃ piṇḍāya acari. Tenāha āyasmā ānando – ‘‘piṇḍāya abhihāresī’’ti. Ākiṇṇavaralakkhaṇoti sarīre ākiritvā viya ṭhapitavaralakkhaṇo vipulavaralakkhaṇo vā. Vipulampi hi ‘‘ākiṇṇa’’nti vuccati. Yathāha – ‘‘ākiṇṇaluddo puriso, dhāticelaṃva makkhito’’ti (jā. 1.6.118; 1.9.106). Vipulaluddoti attho.
412. д̇амад̣̇д̣̇асаад̇и д̇ад̇о гира буримаани сад̇д̇а д̣̇ивасаани наг̇арз нагкад̇д̇ам̣ гхосид̇ам̣ ахоси. д̇ам̣ д̣̇ивасам̣ бана ‘‘нагкад̇д̇ам̣ вийд̇ивад̇д̇ам̣, гамманд̇аа баяож̇зд̇аб̣б̣аа’’д̇и бхзри жари. ат̇а махааж̇ано рааж̇ан̇г̇ан̣з саннибад̇и. рааж̇ааби ‘‘гамманд̇ам̣ сам̣вид̣̇ахиссаамий’’д̇и сийхабан̃ж̇арам̣ виварид̇ваа б̣алагааяам̣ бассанд̇о д̇ам̣ бин̣д̣ааяа абхихаарзнд̇ам̣ махаасад̇д̇ам̣ ад̣̇д̣̇аса. д̇знааха ааяасмаа аананд̣̇о – ‘‘д̇амад̣̇д̣̇асаа б̣имб̣исааро, баасаад̣̇асмим̣ бад̇идтид̇о’’д̇и. имамад̇т̇ам̣ абхаасат̇аад̇и имам̣ ад̇т̇ам̣ амажжаанам̣ абхааси.
412.Tamaddasāti tato kira purimāni satta divasāni nagare nakkhattaṃ ghositaṃ ahosi. Taṃ divasaṃ pana ‘‘nakkhattaṃ vītivattaṃ, kammantā payojetabbā’’ti bheri cari. Atha mahājano rājaṅgaṇe sannipati. Rājāpi ‘‘kammantaṃ saṃvidahissāmī’’ti sīhapañjaraṃ vivaritvā balakāyaṃ passanto taṃ piṇḍāya abhihārentaṃ mahāsattaṃ addasa. Tenāha āyasmā ānando – ‘‘tamaddasā bimbisāro, pāsādasmiṃ patiṭṭhito’’ti. Imamatthaṃ abhāsathāti imaṃ atthaṃ amaccānaṃ abhāsi.
413. ид̣̇аани д̇ам̣ д̇зсам̣ амажжаанам̣ бхаасид̇амад̇т̇ам̣ д̣̇ассзнд̇о ааха – ‘‘имам̣ бхонд̇о’’д̇и. д̇ад̇т̇а иманд̇и со рааж̇аа б̣од̇хисад̇д̇ам̣ д̣̇ассзд̇и, бхонд̇од̇и амажжз аалабад̇и. нисаамзт̇аад̇и бассат̇а. абхируубод̇и д̣̇ассанийяан̇г̇абажжан̇г̇о. б̣рахмаад̇и аарохабарин̣аахасамбанно. сужийд̇и барисуд̣̇д̇хачавиван̣н̣о. жаран̣знаад̇и г̇аманзна.
413. Idāni taṃ tesaṃ amaccānaṃ bhāsitamatthaṃ dassento āha – ‘‘imaṃ bhonto’’ti. Tattha imanti so rājā bodhisattaṃ dasseti, bhontoti amacce ālapati. Nisāmethāti passatha. Abhirūpoti dassanīyaṅgapaccaṅgo. Brahmāti ārohapariṇāhasampanno. Sucīti parisuddhachavivaṇṇo. Caraṇenāti gamanena.
414-5. нийжагулаамиваад̇и нийжагулаа ива баб̣б̣аж̇ид̇о на ход̇ийд̇и ад̇т̇о. магааро бад̣̇асанд̇хигаро. гухим̣ бхигку г̇амиссад̇ийд̇и аяам̣ бхигку гухим̣ г̇амиссад̇и, аж̇ж̇а гад̇т̇а васиссад̇ийд̇и ж̇аанид̇ум̣ рааж̇ад̣̇ууд̇аа сийгхам̣ г̇ажчанд̇у. д̣̇ассанагаамаа хи маяам̣ ассаад̇и иминаа ад̇хиббааязна ааха. г̇уд̇д̇ад̣̇вааро огкид̇д̇ажагкуд̇ааяа, сусам̣вуд̇о сад̇ияаа. г̇уд̇д̇ад̣̇вааро ваа сад̇ияаа, сусам̣вуд̇о баасаад̣̇игзна сан̇гхаадижийварад̇хааран̣зна.
414-5.Nīcakulāmivāti nīcakulā iva pabbajito na hotīti attho. Makāro padasandhikaro. Kuhiṃ bhikkhu gamissatīti ayaṃ bhikkhu kuhiṃ gamissati, ajja kattha vasissatīti jānituṃ rājadūtā sīghaṃ gacchantu. Dassanakāmā hi mayaṃ assāti iminā adhippāyena āha. Guttadvāro okkhittacakkhutāya, susaṃvuto satiyā. Guttadvāro vā satiyā, susaṃvuto pāsādikena saṅghāṭicīvaradhāraṇena.
416. киббам̣ бад̇д̇ам̣ абуурзсийд̇и самбаж̇аанад̇д̇аа бад̇иссад̇ад̇д̇аа жа ад̇хигам̣ аг̇ан̣ханд̇о ‘‘алам̣ зд̇д̇аавад̇аа’’д̇и аж̇жхаасаяабууран̣зна киббам̣ бад̇д̇ам̣ абуурзси. мунийд̇и монад̇т̇ааяа бадибаннад̇д̇аа аббад̇д̇амунибхаавоби муниижжзва вуд̇д̇о, логавохаарзна ваа. логияаа хи амонасамбад̇д̇амби баб̣б̣аж̇ид̇ам̣ ‘‘муний’’д̇и бхан̣анд̇и. бан̣д̣авам̣ абхихаарзсийд̇и д̇ам̣ баб̣б̣ад̇ам̣ абхирухи. со гира мануссз бужчи ‘‘имасмим̣ наг̇арз баб̣б̣аж̇ид̇аа гад̇т̇а васанд̇ий’’д̇и. ат̇асса д̇з ‘‘бан̣д̣авасса убари бурад̇т̇аабхимукабаб̣бхаарз’’д̇и аарожзсум̣. д̇асмаа д̇амзва бан̣д̣авам̣ абхихаарзси ‘‘зд̇т̇а ваасо бхависсад̇ий’’д̇и звам̣ жинд̇зд̇ваа.
416.Khippaṃ pattaṃ apūresīti sampajānattā patissatattā ca adhikaṃ agaṇhanto ‘‘alaṃ ettāvatā’’ti ajjhāsayapūraṇena khippaṃ pattaṃ apūresi. Munīti monatthāya paṭipannattā appattamunibhāvopi muniicceva vutto, lokavohārena vā. Lokiyā hi amonasampattampi pabbajitaṃ ‘‘munī’’ti bhaṇanti. Paṇḍavaṃ abhihāresīti taṃ pabbataṃ abhiruhi. So kira manusse pucchi ‘‘imasmiṃ nagare pabbajitā kattha vasantī’’ti. Athassa te ‘‘paṇḍavassa upari puratthābhimukhapabbhāre’’ti ārocesuṃ. Tasmā tameva paṇḍavaṃ abhihāresi ‘‘ettha vāso bhavissatī’’ti evaṃ cintetvā.
419-23. б̣яаг̇гхусабхова сийхова г̇ириг̇аб̣бхарзд̇и г̇ириг̇ухааяам̣ б̣яаг̇гхо вияа усабхо вияа сийхо вияа жа нисиннод̇и ад̇т̇о. зд̇з хи д̇аяо сздтаа виг̇ад̇абхаяабхзраваа г̇ириг̇аб̣бхарз нисийд̣̇анд̇и, д̇асмаа звам̣ убамам̣ агааси. бхад̣̇д̣̇аяаанзнаад̇и хад̇т̇иассарат̇асивигаад̣̇инаа уд̇д̇амаяаанзна. саяаанабхуумим̣ яааяид̇ваад̇и яаавад̇игаа бхууми хад̇т̇иассаад̣̇инаа яаанзна саггаа г̇анд̇ум̣, д̇ам̣ г̇анд̇ваа. аасаж̇ж̇аад̇и бад̇ваа, самийбамасса г̇анд̇ваад̇и ад̇т̇о. убаависийд̇и нисийд̣̇и. яуваад̇и яоб̣б̣анасамбанно. д̣̇ахарод̇и ж̇аад̇ияаа д̇арун̣о. батамуббад̇д̇иго сусууд̇и д̇ад̣̇убхаяависзсанамзва. яуваа сусууд̇и ад̇ияоб̣б̣ано. батамуббад̇д̇игод̇и батамзнзва яоб̣б̣анавзсзна удтид̇о. д̣̇ахаро жаасийд̇и сад̇и жа д̣̇ахарад̇д̇з сусу б̣аалаго вияа кааяасийд̇и.
419-23.Byagghusabhova sīhova girigabbhareti giriguhāyaṃ byaggho viya usabho viya sīho viya ca nisinnoti attho. Ete hi tayo seṭṭhā vigatabhayabheravā girigabbhare nisīdanti, tasmā evaṃ upamaṃ akāsi. Bhaddayānenāti hatthiassarathasivikādinā uttamayānena. Sayānabhūmiṃ yāyitvāti yāvatikā bhūmi hatthiassādinā yānena sakkā gantuṃ, taṃ gantvā. Āsajjāti patvā, samīpamassa gantvāti attho. Upāvisīti nisīdi. Yuvāti yobbanasampanno. Daharoti jātiyā taruṇo. Paṭhamuppattiko susūti tadubhayavisesanameva. Yuvā susūti atiyobbano. Paṭhamuppattikoti paṭhameneva yobbanavesena uṭṭhito. Daharo cāsīti sati ca daharatte susu bālako viya khāyasīti.
424-5. анийгаг̇г̇анд̇и б̣алагааяам̣ сзнаамукам̣. д̣̇ад̣̇аами бхог̇з бхун̃ж̇ассууд̇и зд̇т̇а ‘‘ахам̣ д̇з ан̇г̇амаг̇ад̇хзсу яаавижчаси, д̇аава д̣̇ад̣̇аами бхог̇з. д̇ам̣ д̇вам̣ собхаяанд̇о анийгаг̇г̇ам̣ нааг̇асан̇гхабурагкад̇о бхун̃ж̇ассуу’’д̇и звам̣ самб̣анд̇хо взд̣̇ид̇аб̣б̣о. уж̇ум̣ ж̇анабад̣̇о рааж̇аад̇и ‘‘д̣̇ад̣̇аами бхог̇з бхун̃ж̇ассу, ж̇аад̇им̣ агкаахи бужчид̇о’’д̇и звам̣ гира вуд̇д̇о махаабурисо жинд̇зси – ‘‘сажз ахам̣ раж̇ж̇зна ад̇т̇иго ассам̣, жаад̇умахаарааж̇игаад̣̇аяоби мам̣ ад̇д̇ано ад̇д̇ано раж̇ж̇зна ниманд̇зяяум̣, г̇зхз тид̇о зва ваа жаггавад̇д̇ираж̇ж̇ам̣ гаарзяяам̣. аяам̣ бана рааж̇аа аж̇аананд̇о звамааха – ‘ханд̣̇аахам̣, д̇ам̣ ж̇аанаабзмий’’’д̇и б̣аахам̣ ужжаарзд̇ваа ад̇д̇ано ааг̇ад̇ад̣̇исаабхааг̇ам̣ нид̣̇д̣̇исанд̇о ‘‘уж̇ум̣ ж̇анабад̣̇о рааж̇аа’’д̇иаад̣̇имааха. д̇ад̇т̇а химаванд̇асса бассад̇од̇и бхан̣анд̇о сассасамбад̇д̇ивзгаллаабхаавам̣ д̣̇ассзд̇и. химаванд̇ан̃хи ниссааяа баасаан̣авиварасамбхаваа махаасаалааби бан̃жахи вуд̣̇д̇хийхи вад̣дханд̇и, гиман̇г̇ам̣ бана кзд̇д̇з вуд̇д̇аани сассаани. д̇ханавийриязна самбаннод̇и бхан̣анд̇о сад̇д̇ахи рад̇анзхи авзгаллад̇д̇ам̣, барарааж̇уухи ад̇агганийяам̣ вийрабурисаад̇хидтид̇абхааван̃жасса д̣̇ассзд̇и. госалзсу нигзд̇инод̇и бхан̣анд̇о навагарааж̇абхаавам̣ бадигкибад̇и. навагарааж̇аа хи нигзд̇ийд̇и на вужжад̇и. яасса бана аад̣̇игаалад̇о бабхуд̇и анваяавасзна со зва ж̇анабад̣̇о ниваасо, со нигзд̇ийд̇и вужжад̇и. д̇ат̇ааруубо жа рааж̇аа суд̣̇д̇ход̣̇ано, яам̣ санд̇хааяааха ‘‘госалзсу нигзд̇ино’’д̇и. д̇зна анваяааг̇ад̇амби бхог̇асамбад̇д̇им̣ д̣̇ийбзд̇и.
424-5.Anīkagganti balakāyaṃ senāmukhaṃ. Dadāmi bhoge bhuñjassūti ettha ‘‘ahaṃ te aṅgamagadhesu yāvicchasi, tāva dadāmi bhoge. Taṃ tvaṃ sobhayanto anīkaggaṃ nāgasaṅghapurakkhato bhuñjassū’’ti evaṃ sambandho veditabbo. Ujuṃ janapado rājāti ‘‘dadāmi bhoge bhuñjassu, jātiṃ akkhāhi pucchito’’ti evaṃ kira vutto mahāpuriso cintesi – ‘‘sace ahaṃ rajjena atthiko assaṃ, cātumahārājikādayopi maṃ attano attano rajjena nimanteyyuṃ, gehe ṭhito eva vā cakkavattirajjaṃ kāreyyaṃ. Ayaṃ pana rājā ajānanto evamāha – ‘handāhaṃ, taṃ jānāpemī’’’ti bāhaṃ uccāretvā attano āgatadisābhāgaṃ niddisanto ‘‘ujuṃ janapado rājā’’tiādimāha. Tattha himavantassapassatoti bhaṇanto sassasampattivekallābhāvaṃ dasseti. Himavantañhi nissāya pāsāṇavivarasambhavā mahāsālāpi pañcahi vuddhīhi vaḍḍhanti, kimaṅgaṃ pana khette vuttāni sassāni. Dhanavīriyena sampannoti bhaṇanto sattahi ratanehi avekallattaṃ, pararājūhi atakkanīyaṃ vīrapurisādhiṭṭhitabhāvañcassa dasseti. Kosalesu niketinoti bhaṇanto navakarājabhāvaṃ paṭikkhipati. Navakarājā hi niketīti na vuccati. Yassa pana ādikālato pabhuti anvayavasena so eva janapado nivāso, so niketīti vuccati. Tathārūpo ca rājā suddhodano, yaṃ sandhāyāha ‘‘kosalesu niketino’’ti. Tena anvayāgatampi bhogasampattiṃ dīpeti.
426. зд̇д̇аавад̇аа ад̇д̇ано бхог̇асамбад̇д̇им̣ д̣̇ийбзд̇ваа ‘‘аад̣̇ижжаа наама г̇од̇д̇зна, саагияаа наама ж̇аад̇ияаа’’д̇и иминаа ж̇аад̇исамбад̇д̇ин̃жа аажигкид̇ваа яам̣ вуд̇д̇ам̣ ран̃н̃аа ‘‘д̣̇ад̣̇аами бхог̇з бхун̃ж̇ассуу’’д̇и, д̇ам̣ бадигкибанд̇о ааха – ‘‘д̇амхаа гулаа баб̣б̣аж̇ид̇омхи, на гаамз абхибад̇т̇аяа’’нд̇и. яад̣̇и хи ахам̣ гаамз абхибад̇т̇аязяяам̣, на ийд̣̇исам̣ д̇ханавийрияасамбаннам̣ д̣̇ваасийд̇исахассавийрабурисасамаагулам̣ гулам̣ чад̣д̣зд̇ваа баб̣б̣аж̇зяяанд̇и аяам̣ гирзд̇т̇а ад̇хиббааяо.
426. Ettāvatā attano bhogasampattiṃ dīpetvā ‘‘ādiccā nāma gottena, sākiyā nāma jātiyā’’ti iminā jātisampattiñca ācikkhitvā yaṃ vuttaṃ raññā ‘‘dadāmi bhoge bhuñjassū’’ti, taṃ paṭikkhipanto āha – ‘‘tamhā kulā pabbajitomhi, na kāme abhipatthaya’’nti. Yadi hi ahaṃ kāme abhipatthayeyyaṃ, na īdisaṃ dhanavīriyasampannaṃ dvāsītisahassavīrapurisasamākulaṃ kulaṃ chaḍḍetvā pabbajeyyanti ayaṃ kirettha adhippāyo.
427. звам̣ ран̃н̃о важанам̣ бадигкибид̇ваа д̇ад̇о барам̣ ад̇д̇ано баб̣б̣аж̇ж̇аахзд̇ум̣ д̣̇ассзнд̇о ааха – ‘‘гаамзсваад̣̇ийнавам̣ д̣̇исваа, нзгкаммам̣ д̣̇адту кзмад̇о’’д̇и. зд̇ам̣ ‘‘баб̣б̣аж̇ид̇омхий’’д̇и иминаа самб̣анд̇хид̇аб̣б̣ам̣. д̇ад̇т̇а д̣̇адтууд̇и д̣̇исваа . сзсамзд̇т̇а ид̇о буримаг̇аат̇аасу жа яам̣ яам̣ на вижаарид̇ам̣, д̇ам̣ д̇ам̣ саб̣б̣ам̣ уд̇д̇аанад̇т̇ад̇д̇аа зва на вижаарид̇анд̇и взд̣̇ид̇аб̣б̣ам̣. звам̣ ад̇д̇ано баб̣б̣аж̇ж̇аахзд̇ум̣ вад̇ваа бад̇хаанад̇т̇ааяа г̇анд̇угаамо рааж̇аанам̣ ааманд̇знд̇о ааха – ‘‘бад̇хаанааяа г̇амиссаами, зд̇т̇а мз ран̃ж̇ад̇ий мано’’д̇и. д̇ассад̇т̇о – яасмаахам̣, махаарааж̇а, нзгкаммам̣ д̣̇адту кзмад̇о баб̣б̣аж̇ид̇о, д̇асмаа д̇ам̣ барамад̇т̇анзгкаммам̣ ниб̣б̣аанаамад̇ам̣ саб̣б̣ад̇хаммаанам̣ аг̇г̇адтзна бад̇хаанам̣ бад̇т̇знд̇о бад̇хаанад̇т̇ааяа г̇амиссаами, зд̇т̇а мз бад̇хаанз ран̃ж̇ад̇и мано, на гаамзсууд̇и. звам̣ вуд̇д̇з гира рааж̇аа б̣од̇хисад̇д̇ам̣ ааха – ‘‘буб̣б̣зва мзд̇ам̣, бханд̇з, суд̇ам̣ ‘суд̣̇д̇ход̣̇анаран̃н̃о гира буд̇д̇о сид̣̇д̇хад̇т̇агумааро жад̇д̇аари буб̣б̣анимид̇д̇аани д̣̇исваа баб̣б̣аж̇ид̇ваа б̣уд̣̇д̇хо бхависсад̇ий’д̇и, сохам̣, бханд̇з, д̇умхаагам̣ ад̇химуд̇д̇им̣ д̣̇исваа звам̣басанно ‘ад̣̇д̇хаа б̣уд̣̇д̇хад̇д̇ам̣ баабун̣иссат̇аа’д̇и. саад̇ху, бханд̇з, б̣уд̣̇д̇хад̇д̇ам̣ бад̇ваа батамам̣ мама виж̇ид̇ам̣ оггамзяяаат̇аа’’д̇и.
427. Evaṃ rañño vacanaṃ paṭikkhipitvā tato paraṃ attano pabbajjāhetuṃ dassento āha – ‘‘kāmesvādīnavaṃ disvā, nekkhammaṃ daṭṭhu khemato’’ti. Etaṃ ‘‘pabbajitomhī’’ti iminā sambandhitabbaṃ. Tattha daṭṭhūti disvā . Sesamettha ito purimagāthāsu ca yaṃ yaṃ na vicāritaṃ, taṃ taṃ sabbaṃ uttānatthattā eva na vicāritanti veditabbaṃ. Evaṃ attano pabbajjāhetuṃ vatvā padhānatthāya gantukāmo rājānaṃ āmantento āha – ‘‘padhānāya gamissāmi, ettha me rañjatī mano’’ti. Tassattho – yasmāhaṃ, mahārāja, nekkhammaṃ daṭṭhu khemato pabbajito, tasmā taṃ paramatthanekkhammaṃ nibbānāmataṃ sabbadhammānaṃ aggaṭṭhena padhānaṃ patthento padhānatthāya gamissāmi, ettha me padhāne rañjati mano, na kāmesūti. Evaṃ vutte kira rājā bodhisattaṃ āha – ‘‘pubbeva metaṃ, bhante, sutaṃ ‘suddhodanarañño kira putto siddhatthakumāro cattāri pubbanimittāni disvā pabbajitvā buddho bhavissatī’ti, sohaṃ, bhante, tumhākaṃ adhimuttiṃ disvā evaṃpasanno ‘addhā buddhattaṃ pāpuṇissathā’ti. Sādhu, bhante, buddhattaṃ patvā paṭhamaṃ mama vijitaṃ okkameyyāthā’’ti.
барамад̇т̇аж̇од̇игааяа куд̣̇д̣̇ага-адтагат̇ааяа
Paramatthajotikāya khuddaka-aṭṭhakathāya
суд̇д̇анибаад̇а-адтагат̇ааяа баб̣б̣аж̇ж̇аасуд̇д̇аван̣н̣анаа нидтид̇аа.
Suttanipāta-aṭṭhakathāya pabbajjāsuttavaṇṇanā niṭṭhitā.
Related texts:
д̇ибидага (муула) • Tipiṭaka (Mūla) / суд̇д̇абидага • Suttapiṭaka / куд̣̇д̣̇аганигааяа • Khuddakanikāya / суд̇д̇анибаад̇абаал̣и • Suttanipātapāḷi / 1. баб̣б̣аж̇ж̇аасуд̇д̇ам̣ • 1. Pabbajjāsuttaṃ
