Library / Tipiṭaka / திபிடக • Tipiṭaka / வினயாலங்கார-டீகா • Vinayālaṅkāra-ṭīkā

    22. பப்³ப³ஜ்ஜாவினிச்ச²யகதா²

    22. Pabbajjāvinicchayakathā

    123. ஏவங் படிக்கே²பபவாரணாவினிச்ச²யங் கதெ²த்வா இதா³னி பப்³ப³ஜ்ஜாவினிச்ச²யங் கதே²துங் ‘‘பப்³ப³ஜ்ஜாதி எத்த² பனா’’த்யாதி³மாஹ. தத்த² பட²மங் வஜிதப்³பா³தி பப்³ப³ஜ்ஜா, உபஸம்பதா³தோ பட²மங் உபக³ச்சி²தப்³பா³தி அத்தோ². ப-புப்³ப³ வஜ க³திம்ஹீதி தா⁴து. குலபுத்தந்தி ஆசாரகுலபுத்தங் ஸந்தா⁴ய வத³தி. யே புக்³க³லா படிக்கி²த்தா, தே வஜ்ஜெத்வாதி ஸம்ப³ந்தோ⁴. பப்³ப³ஜ்ஜாதோ³ஸவிரஹிதோதி பப்³ப³ஜ்ஜாய அந்தராயகரேஹி பஞ்சாபா³தா⁴தி³தோ³ஸேஹி விரஹிதோ. நக²பிட்டி²ப்பமாணந்தி எத்த² கனிட்ட²ங்கு³லினக²பிட்டி² அதி⁴ப்பேதா. ‘‘தஞ்சே நக²பிட்டி²ப்பமாணம்பி வட்³ட⁴னபக்கே² டி²தங் ஹோதி, ந பப்³பா³ஜேதப்³போ³தி இமினா ஸாமஞ்ஞலக்க²ணங் த³ஸ்ஸிதங், தஸ்மா யத்த² கத்த²சி ஸரீராவயவேஸு நக²பிட்டி²ப்பமாணங் வட்³ட⁴னகபக்கே² டி²தங் சே, ந வட்டதீதி ஸித்³த⁴ங். ஏவஞ்ச ஸதி நக²பிட்டி²ப்பமாணம்பி அவட்³ட⁴னகபக்கே² டி²தங் சே, ஸப்³ப³த்த² வட்டதீதி ஆபன்னங், தஞ்ச ந ஸாமஞ்ஞதோ அதி⁴ப்பேதந்தி பதே³ஸவிஸேஸேயேவ நியமெத்வா த³ஸ்ஸெந்தோ ‘ஸசே பனா’திஆதி³மாஹ. ஸசே ஹி அவிஸேஸேன நக²பிட்டி²ப்பமாணங் அவட்³ட⁴னகபக்கே² டி²தங் வட்டெய்ய, ‘நிவாஸனபாருபனேஹி பகதிபடிச்ச²ன்னட்டா²னே’தி பதே³ஸனியமங் ந கரெய்ய, தஸ்மா நிவாஸனபாருபனேஹி பகதிபடிச்ச²ன்னட்டா²னதோ அஞ்ஞத்த² நக²பிட்டி²ப்பமாணங் அவட்³ட⁴னகபக்கே² டி²தம்பி ந வட்டதீதி ஸித்³த⁴ங். நக²பிட்டி²ப்பமாணதோ கு²த்³த³கதரங் பன அவட்³ட⁴னகபக்கே² வா வட்³ட⁴னகபக்கே² வா டி²தங் ஹோது, வட்டதி நக²பிட்டி²ப்பமாணதோ கு²த்³த³கதரஸ்ஸ வட்³ட⁴னகபக்கே² அவட்³ட⁴னகபக்கே² வா டி²தஸ்ஸ முகா²தீ³ஸுயேவ படிக்கி²த்தத்தா’’தி ஸாரத்த²தீ³பனியங் (ஸாரத்த²॰ டீ॰ மஹாவக்³க³ 3.88) வுத்தங்.

    123. Evaṃ paṭikkhepapavāraṇāvinicchayaṃ kathetvā idāni pabbajjāvinicchayaṃ kathetuṃ ‘‘pabbajjāti ettha panā’’tyādimāha. Tattha paṭhamaṃ vajitabbāti pabbajjā, upasampadāto paṭhamaṃ upagacchitabbāti attho. Pa-pubba vaja gatimhīti dhātu. Kulaputtanti ācārakulaputtaṃ sandhāya vadati. Ye puggalā paṭikkhittā, te vajjetvāti sambandho. Pabbajjādosavirahitoti pabbajjāya antarāyakarehi pañcābādhādidosehi virahito. Nakhapiṭṭhippamāṇanti ettha kaniṭṭhaṅgulinakhapiṭṭhi adhippetā. ‘‘Tañce nakhapiṭṭhippamāṇampi vaḍḍhanapakkhe ṭhitaṃ hoti, na pabbājetabboti iminā sāmaññalakkhaṇaṃ dassitaṃ, tasmā yattha katthaci sarīrāvayavesu nakhapiṭṭhippamāṇaṃ vaḍḍhanakapakkhe ṭhitaṃ ce, na vaṭṭatīti siddhaṃ. Evañca sati nakhapiṭṭhippamāṇampi avaḍḍhanakapakkhe ṭhitaṃ ce, sabbattha vaṭṭatīti āpannaṃ, tañca na sāmaññato adhippetanti padesaviseseyeva niyametvā dassento ‘sace panā’tiādimāha. Sace hi avisesena nakhapiṭṭhippamāṇaṃ avaḍḍhanakapakkhe ṭhitaṃ vaṭṭeyya, ‘nivāsanapārupanehi pakatipaṭicchannaṭṭhāne’ti padesaniyamaṃ na kareyya, tasmā nivāsanapārupanehi pakatipaṭicchannaṭṭhānato aññattha nakhapiṭṭhippamāṇaṃ avaḍḍhanakapakkhe ṭhitampi na vaṭṭatīti siddhaṃ. Nakhapiṭṭhippamāṇato khuddakataraṃ pana avaḍḍhanakapakkhe vā vaḍḍhanakapakkhe vā ṭhitaṃ hotu, vaṭṭati nakhapiṭṭhippamāṇato khuddakatarassa vaḍḍhanakapakkhe avaḍḍhanakapakkhe vā ṭhitassa mukhādīsuyeva paṭikkhittattā’’ti sāratthadīpaniyaṃ (sārattha. ṭī. mahāvagga 3.88) vuttaṃ.

    விமதிவினோத³னியங் (வி॰ வி॰ டீ॰ மஹாவக்³க³ 88-89) பன ‘‘படிச்ச²ன்னட்டா²னே நக²பிட்டி²ப்பமாணங் அவட்³ட⁴னகபக்கே² டி²தங் ஹோதி, வட்டதீதி வுத்தத்தா அப்படிச்ச²ன்னட்டா²னே தாதி³ஸம்பி ந வட்டதி, படிச்ச²ன்னட்டா²னேபி ச வட்³ட⁴னகபக்கே² டி²தங் ந வட்டதீதி ஸித்³த⁴மேவ ஹோதி. பாகடட்டா²னேபி பன நக²பிட்டி²ப்பமாணதோ ஊனதரங் அவட்³ட⁴னகங் வட்டதீதி யே க³ண்ஹெய்யுங், தேஸங் தங் க³ஹணங் படிஸேதே⁴துங் ‘முகே² பனா’திஆதி³ வுத்த’’ந்தி வுத்தங். கோ³தா⁴…பே॰… ந வட்டதீதி இமினா தாதி³ஸோபி ரோகோ³ குட்டே²யேவ அந்தோக³தோ⁴தி த³ஸ்ஸேதி. க³ண்டே³பி இமினா நயேன வினிச்ச²யோ வேதி³தப்³போ³. தத்த² பன முகா²தீ³ஸு கோலட்டி²மத்ததோ கு²த்³த³கதரோபி க³ண்டோ³ ந வட்டதீதி விஸுங் ந த³ஸ்ஸிதோ. ‘‘அப்படிச்ச²ன்னட்டா²னே அவட்³ட⁴னகபக்கே² டி²தேபி ந வட்டதீ’’தி எத்தகமேவ ஹி தத்த² வுத்தங், ததா²பி குட்டே² வுத்தனயேன முகா²தீ³ஸு கோலட்டி²ப்பமாணதோ கு²த்³த³கதரோபி க³ண்டோ³ ந வட்டதீதி விஞ்ஞாயதி, தஸ்மா அவட்³ட⁴னகபக்கே² டி²தேபீதி எத்த² பி-ஸத்³தோ³ அவுத்தஸம்பிண்ட³னத்தோ², தேன கோலட்டி²மத்ததோ கு²த்³த³கதரோபி ந வட்டதீதி அயமத்தோ² த³ஸ்ஸிதோயேவாதி அம்ஹாகங் க²ந்தி. பகதிவண்ணே ஜாதேதி ரோக³ஹேதுகஸ்ஸ விகாரவண்ணஸ்ஸ அபா⁴வங் ஸந்தா⁴ய வுத்தங்.

    Vimativinodaniyaṃ (vi. vi. ṭī. mahāvagga 88-89) pana ‘‘paṭicchannaṭṭhāne nakhapiṭṭhippamāṇaṃ avaḍḍhanakapakkhe ṭhitaṃ hoti, vaṭṭatīti vuttattā appaṭicchannaṭṭhāne tādisampi na vaṭṭati, paṭicchannaṭṭhānepi ca vaḍḍhanakapakkhe ṭhitaṃ na vaṭṭatīti siddhameva hoti. Pākaṭaṭṭhānepi pana nakhapiṭṭhippamāṇato ūnataraṃ avaḍḍhanakaṃ vaṭṭatīti ye gaṇheyyuṃ, tesaṃ taṃ gahaṇaṃ paṭisedhetuṃ ‘mukhe panā’tiādi vutta’’nti vuttaṃ. Godhā…pe… na vaṭṭatīti iminā tādisopi rogo kuṭṭheyeva antogadhoti dasseti. Gaṇḍepi iminā nayena vinicchayo veditabbo. Tattha pana mukhādīsu kolaṭṭhimattato khuddakataropi gaṇḍo na vaṭṭatīti visuṃ na dassito. ‘‘Appaṭicchannaṭṭhāne avaḍḍhanakapakkhe ṭhitepi na vaṭṭatī’’ti ettakameva hi tattha vuttaṃ, tathāpi kuṭṭhe vuttanayena mukhādīsu kolaṭṭhippamāṇato khuddakataropi gaṇḍo na vaṭṭatīti viññāyati, tasmā avaḍḍhanakapakkhe ṭhitepīti ettha pi-saddo avuttasampiṇḍanattho, tena kolaṭṭhimattato khuddakataropi na vaṭṭatīti ayamattho dassitoyevāti amhākaṃ khanti. Pakativaṇṇe jāteti rogahetukassa vikāravaṇṇassa abhāvaṃ sandhāya vuttaṃ.

    கோலட்டி²மத்தகோதி ப³த³ரட்டி²ப்பமாணோ. ‘‘ஸஞ்ஜாதச²விங் காரெத்வா’’தி பாடோ², விஜ்ஜமானச²விங் காரெத்வாதி அத்தோ². விமதிவினோத³னியங் (வி॰ வி॰ டீ॰ மஹாவக்³க³ 2.88-89) பன ‘‘ஸச்ச²விங் காரெத்வாதி விஜ்ஜமானச²விங் காரெத்வாதி அத்தோ², ஸஞ்ச²விந்தி வா பாடோ², ஸஞ்ஜாதச²அந்தி அத்தோ². க³ண்டா³தீ³ஸு வூபஸந்தேஸுபி தங் டா²னங் விவண்ணம்பி ஹோதி, தங் வட்டதீ’’தி வுத்தங்.

    Kolaṭṭhimattakoti badaraṭṭhippamāṇo. ‘‘Sañjātachaviṃ kāretvā’’ti pāṭho, vijjamānachaviṃ kāretvāti attho. Vimativinodaniyaṃ (vi. vi. ṭī. mahāvagga 2.88-89) pana ‘‘sacchaviṃ kāretvāti vijjamānachaviṃ kāretvāti attho, sañchavinti vā pāṭho, sañjātachaanti attho. Gaṇḍādīsu vūpasantesupi taṃ ṭhānaṃ vivaṇṇampi hoti, taṃ vaṭṭatī’’ti vuttaṃ.

    பது³மபுண்ட³ரீகபத்தவண்ணந்தி ரத்தபது³மஸேதபது³மபுப்ப²த³லவண்ணங். குட்டே² வுத்தனயேனேவாதி ‘‘படிச்ச²ன்னட்டா²னே அவட்³ட⁴னகங் வட்டதி, அஞ்ஞத்த² ந கிஞ்சி வட்டதீ’’தி வுத்தனயங் த³ஸ்ஸேதி. ஸோஸப்³யாதீ⁴தி க²யரோகோ³. யக்கு²ம்மாதோ³தி கதா³சி ஆக³ந்த்வா பூ⁴மியங் பாதெத்வா ஹத்த²முகா²தி³கங் அவயவங் பூ⁴மியங் க⁴ங்ஸனகோ யக்கோ²வ ரோகோ³.

    Padumapuṇḍarīkapattavaṇṇanti rattapadumasetapadumapupphadalavaṇṇaṃ. Kuṭṭhe vuttanayenevāti ‘‘paṭicchannaṭṭhāne avaḍḍhanakaṃ vaṭṭati, aññattha na kiñci vaṭṭatī’’ti vuttanayaṃ dasseti. Sosabyādhīti khayarogo. Yakkhummādoti kadāci āgantvā bhūmiyaṃ pātetvā hatthamukhādikaṃ avayavaṃ bhūmiyaṃ ghaṃsanako yakkhova rogo.

    124. மஹாமத்தோதி மஹதியா இஸ்ஸரியமத்தாய ஸமன்னாக³தோ. ‘‘ந தா³னாஹங் தே³வஸ்ஸ ப⁴டோ’’தி ஆபுச்ச²தீதி ரஞ்ஞா ஏவ தி³ன்னங் டா²னந்தரங் ஸந்தா⁴ய வுத்தங். யோ பன ராஜகம்மிகேஹி அமச்சாதீ³ஹி ட²பிதோ, அமச்சாதீ³னங் ஏவ வா ப⁴டோ ஹோதி, தேன தங் தங் அமச்சாதி³ம்பி ஆபுச்சி²துங் வட்டதீதி.

    124.Mahāmattoti mahatiyā issariyamattāya samannāgato. ‘‘Na dānāhaṃ devassa bhaṭo’’ti āpucchatīti raññā eva dinnaṃ ṭhānantaraṃ sandhāya vuttaṃ. Yo pana rājakammikehi amaccādīhi ṭhapito, amaccādīnaṃ eva vā bhaṭo hoti, tena taṃ taṃ amaccādimpi āpucchituṃ vaṭṭatīti.

    125. ‘‘த⁴ஜப³ந்தோ⁴’’தி வுத்தத்தா அபாகடசோரோ பப்³பா³ஜேதப்³போ³தி விஞ்ஞாயதி. தேன வக்க²தி ‘‘யே பன அம்ப³லபு³ஜாதி³சோரகா’’திஆதி³. ஏவங் ஜானந்தீதி ‘‘ஸீலவா ஜாதோ’’தி ஜானந்தி.

    125.‘‘Dhajabandho’’ti vuttattā apākaṭacoro pabbājetabboti viññāyati. Tena vakkhati ‘‘ye pana ambalabujādicorakā’’tiādi. Evaṃ jānantīti ‘‘sīlavā jāto’’ti jānanti.

    126. பி⁴ந்தி³த்வாதி அந்து³ப³ந்த⁴னங் பி⁴ந்தி³த்வா. சி²ந்தி³த்வாதி ஸங்க²லிகப³ந்த⁴னங் சி²ந்தி³த்வா. முஞ்சித்வாதி ரஜ்ஜுப³ந்த⁴னங் முஞ்சித்வா. விவரித்வாதி கா³மப³ந்த⁴னாதீ³ஸு கா³மத்³வாராதீ³னி விவரித்வா. அபஸ்ஸமானானங் வா பலாயதீதி புரிஸகு³த்தியங் புரிஸானங் கோ³பகானங் அபஸ்ஸமானானங் பலாயதி.

    126.Bhinditvāti andubandhanaṃ bhinditvā. Chinditvāti saṅkhalikabandhanaṃ chinditvā. Muñcitvāti rajjubandhanaṃ muñcitvā. Vivaritvāti gāmabandhanādīsu gāmadvārādīni vivaritvā. Apassamānānaṃ vā palāyatīti purisaguttiyaṃ purisānaṃ gopakānaṃ apassamānānaṃ palāyati.

    129. புரிமனயேனேவாதி ‘‘கஸாஹதோ கதத³ண்ட³கம்மோ’’தி எத்த² வுத்தனயேனேவ.

    129.Purimanayenevāti ‘‘kasāhato katadaṇḍakammo’’ti ettha vuttanayeneva.

    130. பலாதோபீதி இணஸ்ஸாமிகானங் ஆக³மனங் ஞத்வா ப⁴யேன பலாதோபி இணாயிகோ. கீ³வா ஹோதி இணாயிகபா⁴வங் ஞத்வா அனாத³ரேன இணமுத்தகே பி⁴க்கு²பா⁴வே பவேஸிதத்தா.

    130.Palātopīti iṇassāmikānaṃ āgamanaṃ ñatvā bhayena palātopi iṇāyiko. Gīvā hoti iṇāyikabhāvaṃ ñatvā anādarena iṇamuttake bhikkhubhāve pavesitattā.

    உபட்³டு⁴பட்³ட⁴ந்தி தோ²கங் தோ²கங். தா³தப்³ப³மேவாதி இணாயிகேன த⁴னங் ஸம்பஜ்ஜது வா, மா வா, தா³னே ஸஉஸ்ஸாஹேனேவ ப⁴விதப்³ப³ங், அஞ்ஞேஹி ச பி⁴க்கூ²ஹி ‘‘மா து⁴ரங் நிக்கி²பாஹீ’’தி வத்வா ஸஹாயகேஹி ப⁴விதப்³ப³ந்தி த³ஸ்ஸேதி. து⁴ரனிக்கே²பேன ஹிஸ்ஸ ப⁴ண்ட³க்³கே⁴ன காரேதப்³ப³தா ஸியாதி.

    Upaḍḍhupaḍḍhanti thokaṃ thokaṃ. Dātabbamevāti iṇāyikena dhanaṃ sampajjatu vā, mā vā, dāne saussāheneva bhavitabbaṃ, aññehi ca bhikkhūhi ‘‘mā dhuraṃ nikkhipāhī’’ti vatvā sahāyakehi bhavitabbanti dasseti. Dhuranikkhepena hissa bhaṇḍagghena kāretabbatā siyāti.

    131. தா³ஸசாரித்தங் ஆரோபெத்வா கீதோதி இமினா தா³ஸபா⁴வபரிமோசனத்தா²ய கீதங் நிவத்தேதி. தாதி³ஸோ ஹி த⁴னக்கீதோபி அதா³ஸோ ஏவ. வஜிரபு³த்³தி⁴டீகாயங் (வஜிர॰ டீ॰ மஹாவக்³க³ 97) பன ‘‘தே³ஸசாரித்தந்தி ஸாவனபண்ணாரோபனாதி³கங் தங் தங் தே³ஸசாரித்த’’ந்தி வுத்தங். தத்த² தத்த² சாரித்தவஸேனாதி தஸ்மிங் தஸ்மிங் ஜனபதே³ தா³ஸபண்ணஜ்ஜா²பனாதி³னா அதா³ஸகரணனியாமேன. அபி⁴ஸேகாதீ³ஸு ஸப்³ப³ப³ந்த⁴னானி மோசாபெந்தி, தங் ஸந்தா⁴ய ‘‘ஸப்³ப³ஸாதா⁴ரணேனா’’தி வுத்தங்.

    131.Dāsacārittaṃ āropetvā kītoti iminā dāsabhāvaparimocanatthāya kītaṃ nivatteti. Tādiso hi dhanakkītopi adāso eva. Vajirabuddhiṭīkāyaṃ (vajira. ṭī. mahāvagga 97) pana ‘‘desacārittanti sāvanapaṇṇāropanādikaṃ taṃ taṃ desacāritta’’nti vuttaṃ. Tattha tattha cārittavasenāti tasmiṃ tasmiṃ janapade dāsapaṇṇajjhāpanādinā adāsakaraṇaniyāmena. Abhisekādīsu sabbabandhanāni mocāpenti, taṃ sandhāya ‘‘sabbasādhāraṇenā’’ti vuttaṃ.

    ஸசே ஸயமேவ பண்ணங் ஆரோபெந்தி, ந வட்டதீதி தா பு⁴ஜிஸ்ஸித்தி²யோ ‘‘மயம்பி வண்ணதா³ஸியோ ஹோமா’’தி அத்தனோ ரக்க²ணத்தா²ய ஸயமேவ ராஜூனங் தா³ஸிபண்ணே அத்தனோ நாமங் லிகா²பெந்தி, தாஸங் புத்தாபி ராஜதா³ஸாவ ஹொந்தி, தஸ்மா தே பப்³பா³ஜேதுங் ந வட்டதி. தேஹி அதி³ன்னா ந பப்³பா³ஜேதப்³பா³தி யத்தகா தேஸங் ஸாமினோ, தேஸு ஏகேன அதி³ன்னேபி ந பப்³பா³ஜேதப்³பா³. பு⁴ஜிஸ்ஸே கத்வா பன பப்³பா³ஜேதுங் வட்டதீதி யஸ்ஸ விஹாரஸ்ஸ தே ஆராமிகா தி³ன்னா, தஸ்மிங் விஹாரே ஸங்க⁴ங் ஞாபெத்வா பா²திகம்மேன த⁴னாதி³ங் கத்வா பு⁴ஜிஸ்ஸே கத்வா பப்³பா³ஜேதுங் வட்டதி. வஜிரபு³த்³தி⁴டீகாயங் (வஜிர॰ டீ॰ மஹாவக்³க³ 97) பன ‘‘தே³வதா³ஸிபுத்தே வட்டதீதி லிகி²தங். ‘ஆராமிகஞ்சே பப்³பா³ஜேதுகாமோ, அஞ்ஞமேகங் த³த்வா பப்³பா³ஜேதப்³ப³’ந்தி வுத்தங். மஹாபச்சரிவாத³ஸ்ஸ அயமித⁴ அதி⁴ப்பாயோ, ‘பி⁴க்கு²ஸங்க⁴ஸ்ஸ ஆராமிகே தே³மா’தி தி³ன்னத்தா ந தே தேஸங் தா³ஸா, ‘ஆராமிகோ ச நேவ தா³ஸோ ந பு⁴ஜிஸ்ஸோ’தி வத்தப்³ப³தோ ந தா³ஸோதி லிகி²தங். தக்காஸிஞ்சனங் ஸீஹளதீ³பே சாரித்தங், தே ச பப்³பா³ஜேதப்³பா³ ஸங்க⁴ஸ்ஸாராமிகத்தா. நிஸ்ஸாமிகங் தா³ஸங் அத்தனாபி பு⁴ஜிஸ்ஸங் காதுங் லப⁴தீ’’தி வுத்தங்.

    Sace sayameva paṇṇaṃ āropenti, na vaṭṭatīti tā bhujissitthiyo ‘‘mayampi vaṇṇadāsiyo homā’’ti attano rakkhaṇatthāya sayameva rājūnaṃ dāsipaṇṇe attano nāmaṃ likhāpenti, tāsaṃ puttāpi rājadāsāva honti, tasmā te pabbājetuṃ na vaṭṭati. Tehi adinnā na pabbājetabbāti yattakā tesaṃ sāmino, tesu ekena adinnepi na pabbājetabbā. Bhujisse katvā pana pabbājetuṃ vaṭṭatīti yassa vihārassa te ārāmikā dinnā, tasmiṃ vihāre saṅghaṃ ñāpetvā phātikammena dhanādiṃ katvā bhujisse katvā pabbājetuṃ vaṭṭati. Vajirabuddhiṭīkāyaṃ (vajira. ṭī. mahāvagga 97) pana ‘‘devadāsiputte vaṭṭatīti likhitaṃ. ‘Ārāmikañce pabbājetukāmo, aññamekaṃ datvā pabbājetabba’nti vuttaṃ. Mahāpaccarivādassa ayamidha adhippāyo, ‘bhikkhusaṅghassa ārāmike demā’ti dinnattā na te tesaṃ dāsā, ‘ārāmiko ca neva dāso na bhujisso’ti vattabbato na dāsoti likhitaṃ. Takkāsiñcanaṃ sīhaḷadīpe cārittaṃ, te ca pabbājetabbā saṅghassārāmikattā. Nissāmikaṃ dāsaṃ attanāpi bhujissaṃ kātuṃ labhatī’’ti vuttaṃ.

    ஸாரத்த²தீ³பனியங் (ஸாரத்த²॰ டீ॰ மஹாவக்³க³ 3.97) பன ‘‘தக்கங் ஸீஸே ஆஸித்தகஸதி³ஸாவ ஹொந்தீதி யதா² அதா³ஸே கரொந்தா தக்கேன ஸீஸங் தோ⁴வித்வா அதா³ஸங் கரொந்தி, ஏவங் ஆராமிகவசனேன தி³ன்னத்தா அதா³ஸாவ தேதி அதி⁴ப்பாயோ. ‘தக்காஸிஞ்சனங் பன ஸீஹளதீ³பே சாரித்த’ந்தி வத³ந்தி. நேவ பப்³பா³ஜேதப்³போ³தி வுத்தந்தி கப்பியவசனேன தி³ன்னேபி ஸங்க⁴ஸ்ஸ ஆராமிகதா³ஸத்தா ஏவங் வுத்த’’ந்தி வுத்தங். விமதிவினோத³னியம்பி (வி॰ வி॰ டீ॰ மஹாவக்³க³ 2.97) ‘‘தக்கங் ஸீஸே ஆஸித்தகஸதி³ஸாவ ஹொந்தீதி கேஸுசி ஜனபதே³ஸு அதா³ஸே கரொந்தா தக்கங் ஸீஸே ஆஸிஞ்சந்தி, தேன கிர தே அதா³ஸா ஹொந்தி, ஏவமித³ம்பி ஆராமிகவசனேன தி³ன்னம்பீதி அதி⁴ப்பாயோ. ததா² தி³ன்னேபி ஸங்க⁴ஸ்ஸ ஆராமிகதா³ஸோ ஏவாதி ‘நேவ பப்³பா³ஜேதப்³போ³’தி வுத்தங். ‘தாவகாலிகோ நாம’தி வுத்தத்தா காலபரிச்சே²த³ங் கத்வா வா பச்சா²பி க³ஹேதுகாமதாய வா தி³ன்னங் ஸப்³ப³ங் தாவகாலிகமேவாதி க³ஹேதப்³ப³ங். நிஸ்ஸாமிகதா³ஸோ நாம யஸ்ஸ ஸாமிகுலங் அஞ்ஞாதிகங் மரணேன பரிக்கீ²ணங், ந கோசி தஸ்ஸ தா³யாதோ³, ஸோ பன ஸமானஜாதிகேஹி வா நிவாஸகா³மவாஸீஹி வா இஸ்ஸரேஹி வா பு⁴ஜிஸ்ஸோ கதோவ பப்³பா³ஜேதப்³போ³. தே³வதா³ஸாபி தா³ஸா ஏவ. தே ஹி கத்த²சி தே³ஸே ராஜதா³ஸா ஹொந்தி, கத்த²சி விஹாரதா³ஸா வா, தஸ்மா பப்³பா³ஜேதுங் ந வட்டதீ’’தி வுத்தங்.

    Sāratthadīpaniyaṃ (sārattha. ṭī. mahāvagga 3.97) pana ‘‘takkaṃ sīse āsittakasadisāva hontīti yathā adāse karontā takkena sīsaṃ dhovitvā adāsaṃ karonti, evaṃ ārāmikavacanena dinnattā adāsāva teti adhippāyo. ‘Takkāsiñcanaṃ pana sīhaḷadīpe cāritta’nti vadanti. Neva pabbājetabboti vuttanti kappiyavacanena dinnepi saṅghassa ārāmikadāsattā evaṃ vutta’’nti vuttaṃ. Vimativinodaniyampi (vi. vi. ṭī. mahāvagga 2.97) ‘‘takkaṃ sīse āsittakasadisāva hontīti kesuci janapadesu adāse karontā takkaṃ sīse āsiñcanti, tena kira te adāsā honti, evamidampi ārāmikavacanena dinnampīti adhippāyo. Tathā dinnepi saṅghassa ārāmikadāso evāti ‘neva pabbājetabbo’ti vuttaṃ. ‘Tāvakāliko nāma’ti vuttattā kālaparicchedaṃ katvā vā pacchāpi gahetukāmatāya vā dinnaṃ sabbaṃ tāvakālikamevāti gahetabbaṃ. Nissāmikadāso nāma yassa sāmikulaṃ aññātikaṃ maraṇena parikkhīṇaṃ, na koci tassa dāyādo, so pana samānajātikehi vā nivāsagāmavāsīhi vā issarehi vā bhujisso katova pabbājetabbo. Devadāsāpi dāsā eva. Te hi katthaci dese rājadāsā honti, katthaci vihāradāsā vā, tasmā pabbājetuṃ na vaṭṭatī’’ti vuttaṃ.

    ஸாரத்த²தீ³பனியங் (ஸாரத்த²॰ டீ॰ மஹாவக்³க³ 3.97) பன ‘‘நிஸ்ஸாமிகதா³ஸோ நாம யஸ்ஸ ஸாமிகா ஸபுத்ததா³ரா மதா ஹொந்தி, ந கோசி தஸ்ஸ பரிக்³கா³ஹகோ, ஸோபி பப்³பா³ஜேதுங் ந வட்டதி, தங் பன அத்தனாபி பு⁴ஜிஸ்ஸங் காதுங் வட்டதி. யே வா பன தஸ்மிங் ரட்டே² ஸாமினோ, தேஹிபி காராபேதுங் வட்டதி, ‘தே³வதா³ஸிபுத்தங் பப்³பா³ஜேதுங் வட்டதீ’தி தீஸுபி க³ண்டி²பதே³ஸு வுத்தங். ‘தா³ஸஸ்ஸ பப்³ப³ஜித்வா அத்தனோ ஸாமிகே தி³ஸ்வா பலாயந்தஸ்ஸ ஆபத்தி நத்தீ²’தி வத³ந்தீ’’தி வுத்தங். விமதிவினோத³னியங் பன ‘‘தா³ஸம்பி பப்³பா³ஜெத்வா ஸாமிகே தி³ஸ்வா படிச்சா²த³னத்த²ங் அபனெந்தோ பத³வாரேன அதி³ன்னாதா³னாபத்தியா காரேதப்³போ³, தா³ஸஸ்ஸ பன பலாயதோ அனாபத்தீ’’தி வுத்தங்.

    Sāratthadīpaniyaṃ (sārattha. ṭī. mahāvagga 3.97) pana ‘‘nissāmikadāso nāma yassa sāmikā saputtadārā matā honti, na koci tassa pariggāhako, sopi pabbājetuṃ na vaṭṭati, taṃ pana attanāpi bhujissaṃ kātuṃ vaṭṭati. Ye vā pana tasmiṃ raṭṭhe sāmino, tehipi kārāpetuṃ vaṭṭati, ‘devadāsiputtaṃ pabbājetuṃ vaṭṭatī’ti tīsupi gaṇṭhipadesu vuttaṃ. ‘Dāsassa pabbajitvā attano sāmike disvā palāyantassa āpatti natthī’ti vadantī’’ti vuttaṃ. Vimativinodaniyaṃ pana ‘‘dāsampi pabbājetvā sāmike disvā paṭicchādanatthaṃ apanento padavārena adinnādānāpattiyā kāretabbo, dāsassa pana palāyato anāpattī’’ti vuttaṃ.

    132. ஹத்த²ச்சி²ன்னகாதி³வத்தூ²ஸு கண்ணமூலேதி ஸகலஸ்ஸ கண்ணஸ்ஸ சே²த³ங் ஸந்தா⁴யாஹ. கண்ணஸக்க²லிகாயாதி கண்ணசூளிகாய . யஸ்ஸ பன கண்ணாவட்டேதி ஹெட்டா² குண்ட³லாதி³ட²பனசி²த்³த³ங் ஸந்தா⁴ய வுத்தங். ‘‘தஞ்ஹி ஸங்க⁴ட்டனக்க²மங். அஜபத³கேதி அஜபத³னாஸிகட்டி²கோடியங். ததோ ஹி உத்³த⁴ங் ந விச்சி²ந்தி³துங் ஸக்கா ஹோதி. ஸந்தே⁴துந்தி அவிரூபஸண்டா²னங் ஸந்தா⁴ய வுத்தங், விரூபங் பன பரிஸதூ³ஸகங் ஆபாதே³தி.

    132. Hatthacchinnakādivatthūsu kaṇṇamūleti sakalassa kaṇṇassa chedaṃ sandhāyāha. Kaṇṇasakkhalikāyāti kaṇṇacūḷikāya . Yassa pana kaṇṇāvaṭṭeti heṭṭhā kuṇḍalādiṭhapanachiddaṃ sandhāya vuttaṃ. ‘‘Tañhi saṅghaṭṭanakkhamaṃ. Ajapadaketi ajapadanāsikaṭṭhikoṭiyaṃ. Tato hi uddhaṃ na vicchindituṃ sakkā hoti. Sandhetunti avirūpasaṇṭhānaṃ sandhāya vuttaṃ, virūpaṃ pana parisadūsakaṃ āpādeti.

    கு²ஜ்ஜஸரீரோதி வங்கஸரீரோ. ப்³ரஹ்முனோ விய உஜுகங் க³த்தங் ஸரீரங் யஸ்ஸ ஸோ ப்³ரஹ்முஜுக³த்தோ, ப⁴க³வா. அவஸேஸோ ஸத்தோதி இமினா லக்க²ணேன ரஹிதஸத்தோ. ஏதேன ட²பெத்வா மஹாபுரிஸங் சக்கவத்திஞ்ச இதரே ஸத்தா கு²ஜ்ஜபக்கி²காதி த³ஸ்ஸேதி. யேபு⁴ய்யேன ஹி ஸத்தா க²ந்தே⁴ கடியங் ஜாணூஸூதி தீஸு டா²னேஸு நமந்தி, தே கடியங் நமந்தா பச்ச²தோ நமந்தி, த்³வீஸு டா²னேஸு நமந்தா புரதோ நமந்தி, தீ³க⁴ஸரீரா பன ஏகேன பஸ்ஸேன வங்கா ஹொந்தி, ஏகே முக²ங் உன்னாமெத்வா நக்க²த்தானி க³ணயந்தா விய சரந்தி, ஏகே அப்பமங்ஸலோஹிதா ஸூலஸதி³ஸா ஹொந்தி, ஏகே புரதோ பப்³பா⁴ரா ஹொந்தி, பவேத⁴மானா க³ச்ச²ந்தி. பரிவடுமோதி ஸமந்ததோ வட்டகாயோ. ஏதேன ஏவரூபா ஏவ வாமனகா ந வட்டந்தீதி த³ஸ்ஸேதி.

    Khujjasarīroti vaṅkasarīro. Brahmuno viya ujukaṃ gattaṃ sarīraṃ yassa so brahmujugatto, bhagavā. Avaseso sattoti iminā lakkhaṇena rahitasatto. Etena ṭhapetvā mahāpurisaṃ cakkavattiñca itare sattā khujjapakkhikāti dasseti. Yebhuyyena hi sattā khandhe kaṭiyaṃ jāṇūsūti tīsu ṭhānesu namanti, te kaṭiyaṃ namantā pacchato namanti, dvīsu ṭhānesu namantā purato namanti, dīghasarīrā pana ekena passena vaṅkā honti, eke mukhaṃ unnāmetvā nakkhattāni gaṇayantā viya caranti, eke appamaṃsalohitā sūlasadisā honti, eke purato pabbhārā honti, pavedhamānā gacchanti. Parivaṭumoti samantato vaṭṭakāyo. Etena evarūpā eva vāmanakā na vaṭṭantīti dasseti.

    133. அட்டி²ஸிராசம்மஸரீரோதி அட்டி²ஸிராசம்மமத்தஸரீரோ. கூடகூடஸீஸோதி அனேகேஸு டா²னேஸு பிண்டி³தமங்ஸதங் த³ஸ்ஸேதுங் ஆமேடி³தங் கதங். தேனாஹ ‘‘தாலப²லபிண்டி³ஸதி³ஸேனா’’தி. தாலப²லானங் மஞ்ஜரீ பிண்டி³ நாம. அனுபுப்³ப³தனுகேன ஸீஸேனாதி சேதியதூ²பிகா விய கமேன கிஸேன ஸீஸேன. மஹாவேளுபப்³ப³ங் விய ஆதி³தோ பட்டா²ய யாவ பரியோஸானா அவிஸமதூ²லேன ஸீஸேன ஸமன்னாக³தோ நாளிஸீஸோ நாம. கப்பஸீஸோதி க³ஜமத்த²கங் விய த்³விதா⁴ பி⁴ன்னஸீஸோ. ‘‘கண்ணிககேஸோ வா’’தி இமஸ்ஸ விவரணங் ‘‘பாணகேஹீ’’திஆதி³. மக்கடஸ்ஸேவ நலாடேபி கேஸானங் உட்டி²தபா⁴வங் ஸந்தா⁴யாஹ ‘‘ஸீஸலோமேஹீ’’திஆதி³.

    133.Aṭṭhisirācammasarīroti aṭṭhisirācammamattasarīro. Kūṭakūṭasīsoti anekesu ṭhānesu piṇḍitamaṃsataṃ dassetuṃ āmeḍitaṃ kataṃ. Tenāha ‘‘tālaphalapiṇḍisadisenā’’ti. Tālaphalānaṃ mañjarī piṇḍi nāma. Anupubbatanukena sīsenāti cetiyathūpikā viya kamena kisena sīsena. Mahāveḷupabbaṃ viya ādito paṭṭhāya yāva pariyosānā avisamathūlena sīsena samannāgato nāḷisīso nāma. Kappasīsoti gajamatthakaṃ viya dvidhā bhinnasīso. ‘‘Kaṇṇikakeso vā’’ti imassa vivaraṇaṃ ‘‘pāṇakehī’’tiādi. Makkaṭasseva nalāṭepi kesānaṃ uṭṭhitabhāvaṃ sandhāyāha ‘‘sīsalomehī’’tiādi.

    மக்கடப⁴முகோதி நலாடலோமேஹி அவிப⁴த்தலோமப⁴முகோ. அக்கி²சக்கேஹீதி அக்கி²மண்ட³லேஹி. கேகரோதி திரியங் பஸ்ஸனகோ. உத³கதாரகாதி ஓலோகெந்தானங் உத³கே படிபி³ம்பி³கச்சா²யா. உத³கபு³ப்³பு³ளந்தி கேசி. அக்கி²தாரகாதி அபி⁴முகே² டி²தானங் சா²யா. அக்கி²ப⁴ண்ட³காதிபி வத³ந்தி. அதிபிங்க³லக்கி² மஜ்ஜாரக்கி². மது⁴பிங்க³லந்தி மது⁴வண்ணபிங்க³லங். நிப்பகு²மக்கீ²தி எத்த² பகு²ம-ஸத்³தோ³ அக்கி²த³லலோமேஸு நிருள்ஹோ, தத³பா⁴வா நிப்பகு²மக்கி². அக்கி²பாகேனாதி அக்கி²த³லபரியந்தேஸு பூதிதாபஜ்ஜனரோகே³ன.

    Makkaṭabhamukoti nalāṭalomehi avibhattalomabhamuko. Akkhicakkehīti akkhimaṇḍalehi. Kekaroti tiriyaṃ passanako. Udakatārakāti olokentānaṃ udake paṭibimbikacchāyā. Udakabubbuḷanti keci. Akkhitārakāti abhimukhe ṭhitānaṃ chāyā. Akkhibhaṇḍakātipi vadanti. Atipiṅgalakkhi majjārakkhi. Madhupiṅgalanti madhuvaṇṇapiṅgalaṃ. Nippakhumakkhīti ettha pakhuma-saddo akkhidalalomesu niruḷho, tadabhāvā nippakhumakkhi. Akkhipākenāti akkhidalapariyantesu pūtitāpajjanarogena.

    சிபிடனாஸிகோதி அனுன்னதனாஸிகோ. படங்க³மண்டூ³கோ நாம மஹாமுக²மண்டூ³கோ. பி⁴ன்னமுகோ²தி உபக்கமுக²பரியோஸானோ, ஸப்³ப³தா³ விவடமுகோ² வா. வங்கமுகோ²தி ஏகபஸ்ஸே அபக்கம்ம டி²தஹெட்டி²மஹனுகட்டி²கோ. ஒட்ட²ச்சி²ன்னகோதி உபோ⁴ஸு ஒட்டே²ஸு யத்த² கத்த²சி ஜாதியா வா பச்சா² வா ஸத்தா²தி³னா அபனீதமங்ஸேன ஒட்டே²ன ஸமன்னாக³தோ. ஏளமுகோ²தி நிச்சபக்³க⁴ரிதலாலாமுகோ².

    Cipiṭanāsikoti anunnatanāsiko. Paṭaṅgamaṇḍūko nāma mahāmukhamaṇḍūko. Bhinnamukhoti upakkamukhapariyosāno, sabbadā vivaṭamukho vā. Vaṅkamukhoti ekapasse apakkamma ṭhitaheṭṭhimahanukaṭṭhiko. Oṭṭhacchinnakoti ubhosu oṭṭhesu yattha katthaci jātiyā vā pacchā vā satthādinā apanītamaṃsena oṭṭhena samannāgato. Eḷamukhoti niccapaggharitalālāmukho.

    பி⁴ன்னக³லோதி அவனதக³லோ. பி⁴ன்னஉரோதி அதினின்னஉரமஜ்ஜோ². ஏவங் பி⁴ன்னபிட்டீ²தி. ஸப்³ப³ஞ்சேதந்தி ‘‘கச்சு²க³த்தோ’’திஆதி³ங் ஸந்தா⁴ய வுத்தங். எத்த² ச வினிச்ச²யோ குட்டா²தீ³ஸு வுத்தோ ஏவாதி ஆஹ ‘‘வினிச்ச²யோ’’திஆதி³.

    Bhinnagaloti avanatagalo. Bhinnauroti atininnauramajjho. Evaṃ bhinnapiṭṭhīti. Sabbañcetanti ‘‘kacchugatto’’tiādiṃ sandhāya vuttaṃ. Ettha ca vinicchayo kuṭṭhādīsu vutto evāti āha ‘‘vinicchayo’’tiādi.

    வாதண்டி³கோதி அண்ட³கேஸு வுத்³தி⁴ரோகே³ன ஸமன்னாக³தோ, அண்ட³வாதரோகே³ன உத்³து⁴தபீ³ஜண்ட³கோஸேன ஸமன்னாக³தோ வா. யஸ்ஸ நிவாஸனேன படிச்ச²ன்னம்பி உண்ணதங் பகாஸதி, ஸோவ ந பப்³பா³ஜேதப்³போ³. விகடோதி திரியங் க³மனபாதே³ஹி ஸமன்னாக³தோ, யஸ்ஸ சங்கமதோ ஜாணுகா ப³ஹி நிக³ச்ச²ந்தி. ஸங்க⁴ட்டோதி க³ச்ச²தோ பரிவத்தனபாதே³ஹி ஸமன்னாக³தோ, யஸ்ஸ சங்கமதோ ஜாணுகா அந்தோ பவிஸந்தி. மஹாஜங்கோ⁴தி தூ²லஜங்கோ⁴. மஹாபாதோ³தி மஹந்தேன பாத³தலேன யுத்தோ. பாத³வேமஜ்ஜே²தி பிட்டி²பாத³வேமஜ்ஜே². ஏதேன அக்³க³பாதோ³ ச பண்ஹி ச ஸதி³ஸாவாதி த³ஸ்ஸேதி.

    Vātaṇḍikoti aṇḍakesu vuddhirogena samannāgato, aṇḍavātarogena uddhutabījaṇḍakosena samannāgato vā. Yassa nivāsanena paṭicchannampi uṇṇataṃ pakāsati, sova na pabbājetabbo. Vikaṭoti tiriyaṃ gamanapādehi samannāgato, yassa caṅkamato jāṇukā bahi nigacchanti. Saṅghaṭṭoti gacchato parivattanapādehi samannāgato, yassa caṅkamato jāṇukā anto pavisanti. Mahājaṅghoti thūlajaṅgho. Mahāpādoti mahantena pādatalena yutto. Pādavemajjheti piṭṭhipādavemajjhe. Etena aggapādo ca paṇhi ca sadisāvāti dasseti.

    134. மஜ்ஜே² ஸங்குடிதபாத³த்தாதி குண்ட²பாத³தாய காரணங் த³ஸ்ஸேதி, அக்³கே³ ஸங்குடிதபாத³த்தாதி குண்ட²பாத³தாய. குண்ட²பாத³ஸ்ஸேவ சங்கமனவிபா⁴வனங் ‘‘பிட்டி²பாத³க்³கே³ன சங்கமந்தோ’’தி. ‘‘பாத³ஸ்ஸ பா³ஹிரந்தேனா’’தி ச ‘‘அப்³ப⁴ந்தரந்தேனா’’தி ச இத³ங் பாத³தலஸ்ஸ உபோ⁴ஹி பரியந்தேஹி சங்கமனங் ஸந்தா⁴ய வுத்தங்.

    134.Majjhe saṃkuṭitapādattāti kuṇṭhapādatāya kāraṇaṃ dasseti, agge saṃkuṭitapādattāti kuṇṭhapādatāya. Kuṇṭhapādasseva caṅkamanavibhāvanaṃ ‘‘piṭṭhipādaggena caṅkamanto’’ti. ‘‘Pādassa bāhirantenā’’ti ca ‘‘abbhantarantenā’’ti ca idaṃ pādatalassa ubhohi pariyantehi caṅkamanaṃ sandhāya vuttaṃ.

    மம்மனந்தி க²லிதவசனங், யோ ஏகமேவக்க²ரங் சதுபஞ்சக்க²த்துங் வத³தி, தஸ்ஸேதங் அதி⁴வசனங், டா²னகரணவிஸுத்³தி⁴யா அபா⁴வேன அபு²ட்ட²க்க²ரவசனங். வசனானுகரணேன ஹி ஸோ ‘‘மம்மனோ’’தி வுத்தோ. யோ ச கரணஸம்பன்னோபி ஏகமேவக்க²ரங் ஹிக்காரப³ஹுஸோ வத³தி, ஸோபி இதே⁴வ ஸங்க³ய்ஹதி. யோ வா பன தங் நிக்³க³ஹெத்வாபி அனாமேடி³தக்க²ரமேவ ஸிதி²லங் ஸிலிட்ட²வசனங் வத்துங் ஸமத்தோ², ஸோ பப்³பா³ஜேதப்³போ³. ஆபத்திதோ ந முச்சந்தீதி ஞத்வா கரொந்தாவ ந முச்சந்தி. ஜீவிதந்தராயாதி³ஆபதா³ஸு அருசியா காயஸாமக்³கி³ங் தெ³ந்தஸ்ஸ அனாபத்தி.

    Mammananti khalitavacanaṃ, yo ekamevakkharaṃ catupañcakkhattuṃ vadati, tassetaṃ adhivacanaṃ, ṭhānakaraṇavisuddhiyā abhāvena aphuṭṭhakkharavacanaṃ. Vacanānukaraṇena hi so ‘‘mammano’’ti vutto. Yo ca karaṇasampannopi ekamevakkharaṃ hikkārabahuso vadati, sopi idheva saṅgayhati. Yo vā pana taṃ niggahetvāpi anāmeḍitakkharameva sithilaṃ siliṭṭhavacanaṃ vattuṃ samattho, so pabbājetabbo. Āpattito na muccantīti ñatvā karontāva na muccanti. Jīvitantarāyādiāpadāsu aruciyā kāyasāmaggiṃ dentassa anāpatti.

    135. அப⁴ப்³ப³புக்³க³லகதா²ஸு ‘‘யோ காளபக்கே² இத்தீ² ஹோதி, ஜுண்ஹபக்கே² புரிஸோ, அயங் பக்க²பண்ட³கோ’’தி கேசி வத³ந்தி. அட்ட²கதா²யங் பன ‘‘காளபக்கே² பண்ட³கோ ஹோதி, ஜுண்ஹபக்கே² பனஸ்ஸ பரிளாஹோ வூபஸம்மதீ’’தி அபண்ட³கபக்கே² பரிளாஹவூபஸமஸ்ஸேவ வுத்தத்தா பண்ட³கபக்கே² உஸ்ஸன்னபரிளாஹதா பண்ட³கபா⁴வாபத்தீதி விஞ்ஞாயதீதி வீமங்ஸித்வா யுத்ததரங் க³ஹேதப்³ப³ங். இத்தி²பா⁴வோ பும்பா⁴வோ வா நத்தி² ஏதஸ்ஸாதி அபா⁴வகோ. ‘‘தஸ்மிங்யேவஸ்ஸ பக்கே² பப்³ப³ஜ்ஜா வாரிதாதி எத்த² அபண்ட³கபக்கே² பப்³பா³ஜெத்வா பண்ட³கபக்கே² நாஸேதப்³போ³’’தி தீஸுபி க³ண்டி²பதே³ஸு வுத்தங். கேசி பன ‘‘அபண்ட³கபக்கே² பப்³ப³ஜிதோ ஸசே கிலேஸக்க²யங் பாபுணாதி, ந நாஸேதப்³போ³’’தி வத³ந்தி, தங் தேஸங் மதிமத்தங். பண்ட³கஸ்ஸ ஹி கிலேஸக்க²யாஸம்ப⁴வதோ, கீ²ணகிலேஸஸ்ஸ ச பண்ட³கபா⁴வானாபஅஆதோ. அஹேதுகபடிஸந்தி⁴கதா²யஞ்ஹி அவிஸேஸேன பண்ட³கஸ்ஸ அஹேதுகபடிஸந்தி⁴தா வுத்தா, ஆஸித்தஉஸூயபக்க²பண்ட³கானஞ்ச படிஸந்தி⁴தோ பட்டா²யேவ பண்ட³கபா⁴வோ, ந பவத்தியங்யேவாதி வத³ந்தி. தேனேவ அஹேதுகபடிஸந்தி⁴னித்³தே³ஸே ஜச்சந்த⁴ப³தி⁴ராத³யோ விய பண்ட³கோ ஜாதிஸத்³தே³ன விஸேஸெத்வா ந நித்³தி³ட்டோ². சதுத்த²பாராஜிகஸங்வண்ணனாயஞ்ச (பாரா॰ அட்ட²॰ 2.233) அப⁴ப்³ப³புக்³க³லே த³ஸ்ஸெந்தேன பண்ட³கதிரச்சா²னக³தஉப⁴தொப்³யஞ்ஜனகா தயோ வத்து²விபன்னா அஹேதுகபடிஸந்தி⁴கா, தேஸங் ஸக்³கோ³ அவாரிதோ, மக்³கோ³ பன வாரிதோதி அவிஸேஸதோ வுத்தந்தி ஸாரத்த²தீ³பனியங் (ஸாரத்த²॰ டீ॰ மஹாவக்³க³ 3.109) ஆக³தங்.

    135. Abhabbapuggalakathāsu ‘‘yo kāḷapakkhe itthī hoti, juṇhapakkhe puriso, ayaṃ pakkhapaṇḍako’’ti keci vadanti. Aṭṭhakathāyaṃ pana ‘‘kāḷapakkhe paṇḍako hoti, juṇhapakkhe panassa pariḷāho vūpasammatī’’ti apaṇḍakapakkhe pariḷāhavūpasamasseva vuttattā paṇḍakapakkhe ussannapariḷāhatā paṇḍakabhāvāpattīti viññāyatīti vīmaṃsitvā yuttataraṃ gahetabbaṃ. Itthibhāvo pumbhāvo vā natthi etassāti abhāvako. ‘‘Tasmiṃyevassa pakkhe pabbajjā vāritāti ettha apaṇḍakapakkhe pabbājetvā paṇḍakapakkhe nāsetabbo’’ti tīsupi gaṇṭhipadesu vuttaṃ. Keci pana ‘‘apaṇḍakapakkhe pabbajito sace kilesakkhayaṃ pāpuṇāti, na nāsetabbo’’ti vadanti, taṃ tesaṃ matimattaṃ. Paṇḍakassa hi kilesakkhayāsambhavato, khīṇakilesassa ca paṇḍakabhāvānāpaaāto. Ahetukapaṭisandhikathāyañhi avisesena paṇḍakassa ahetukapaṭisandhitā vuttā, āsittausūyapakkhapaṇḍakānañca paṭisandhito paṭṭhāyeva paṇḍakabhāvo, na pavattiyaṃyevāti vadanti. Teneva ahetukapaṭisandhiniddese jaccandhabadhirādayo viya paṇḍako jātisaddena visesetvā na niddiṭṭho. Catutthapārājikasaṃvaṇṇanāyañca (pārā. aṭṭha. 2.233) abhabbapuggale dassentena paṇḍakatiracchānagataubhatobyañjanakā tayo vatthuvipannā ahetukapaṭisandhikā, tesaṃ saggo avārito, maggo pana vāritoti avisesato vuttanti sāratthadīpaniyaṃ (sārattha. ṭī. mahāvagga 3.109) āgataṃ.

    விமதிவினோத³னியங் (வி॰ வி॰ டீ॰ மஹாவக்³க³ 2.109) பன பண்ட³கவத்து²ஸ்மிங் ஆஸித்தஉஸூயபக்க²பண்ட³கா தயோபி புரிஸபா⁴வலிங்கா³தி³யுத்தா அஹேதுகபடிஸந்தி⁴கா, தே ச கிலேஸபரியுட்டா²னஸ்ஸ ப³லவதாய நபுங்ஸகபண்ட³கஸதி³ஸத்தா ‘‘பண்ட³கா’’தி வுத்தா, தேஸு ஆஸித்தஉஸூயபண்ட³கானங் த்³வின்னங் கிலேஸபரியுட்டா²னங் யோனிஸோமனஸிகாராதீ³ஹி வீதிக்கமதோ நிவாரேதும்பி ஸக்கா, தேன தே பப்³பா³ஜேதப்³பா³தி வுத்தா. பக்க²பண்ட³கஸ்ஸ பன காளபக்கே² உம்மாதோ³ விய கிலேஸபரிளாஹோ அவத்த²ரந்தோ ஆக³ச்ச²தி, வீதிக்கமங் பத்வா ஏவ ச நிவத்ததி, தஸ்மா தஸ்மிங் பக்கே² ஸோ ந பப்³பா³ஜேதப்³போ³தி வுத்தோ, ததே³தங் விபா⁴க³ங் த³ஸ்ஸேதுங் ‘‘யஸ்ஸ பரேஸ’’ந்தி வுத்தங். தத்த² ஆஸித்தஸ்ஸாதி முகே² ஆஸித்தஸ்ஸ அத்தனோபி அஸுசிமுச்சனேன பரிளாஹோ வூபஸம்மதி. உஸூயாய உப்பன்னாயாதி உஸூயாய வஸேன அத்தனோ ஸேவேதுகாமதாராகே³ உப்பன்னே அஸுசிமுத்தியா பரிளாஹோ வூபஸம்மதி.

    Vimativinodaniyaṃ (vi. vi. ṭī. mahāvagga 2.109) pana paṇḍakavatthusmiṃ āsittausūyapakkhapaṇḍakā tayopi purisabhāvaliṅgādiyuttā ahetukapaṭisandhikā, te ca kilesapariyuṭṭhānassa balavatāya napuṃsakapaṇḍakasadisattā ‘‘paṇḍakā’’ti vuttā, tesu āsittausūyapaṇḍakānaṃ dvinnaṃ kilesapariyuṭṭhānaṃ yonisomanasikārādīhi vītikkamato nivāretumpi sakkā, tena te pabbājetabbāti vuttā. Pakkhapaṇḍakassa pana kāḷapakkhe ummādo viya kilesapariḷāho avattharanto āgacchati, vītikkamaṃ patvā eva ca nivattati, tasmā tasmiṃ pakkhe so na pabbājetabboti vutto, tadetaṃ vibhāgaṃ dassetuṃ ‘‘yassa paresa’’nti vuttaṃ. Tattha āsittassāti mukhe āsittassa attanopi asucimuccanena pariḷāho vūpasammati. Usūyāya uppannāyāti usūyāya vasena attano sevetukāmatārāge uppanne asucimuttiyā pariḷāho vūpasammati.

    ‘‘பீ³ஜானி அபனீதானீ’’தி வுத்தத்தா பீ³ஜேஸு டி²தேஸு நிமித்தமத்தே அபனீதே பண்ட³கோ ந ஹோதி. பி⁴க்கு²னோபி அனாபா³த⁴பச்சயா தத³பனயனே து²ல்லச்சயமேவ, ந பண்ட³கத்தங். பீ³ஜேஸு பன அபனீதேஸு அங்க³ஜாதம்பி ராகே³ன கம்மனியங் ந ஹோதி, புமபா⁴வோ விக³ச்ச²தி, மஸ்ஸுஆதி³புரிஸலிங்க³ம்பி உபஸம்பதா³பி விக³ச்ச²தி, கிலேஸபரிளாஹோபி து³ன்னிவாரவீதிக்கமோ ஹோதி நபுங்ஸகபண்ட³கஸ்ஸ விய, தஸ்மா ஈதி³ஸோ உபஸம்பன்னோபி நாஸேதப்³போ³தி வத³ந்தி. யதி³ ஏவங் கஸ்மா பீ³ஜுத்³த⁴ரணே பாராஜிகங் ந பஞ்ஞத்தந்தி? எத்த² தாவ கேசி வத³ந்தி ‘‘பஞ்ஞத்தமேவேதங் ப⁴க³வதா ‘பண்ட³கோ பி⁴க்க²வே அனுபஸம்பன்னோ ந உபஸம்பாதே³தப்³போ³, உபஸம்பன்னோ நாஸேதப்³போ³’தி வுத்தத்தா’’தி. கேசி பன ‘‘யஸ்மா பீ³ஜுத்³த⁴ரணக்க²ணே பண்ட³கோ ந ஹோதி, தஸ்மா தஸ்மிங் க²ணே பாராஜிகங் ந பஞ்ஞத்தங். யஸ்மா பன ஸோ உத்³த⁴டபீ³ஜோ பி⁴க்கு² அபரேன ஸமயேன வுத்தனயேன பண்ட³கத்தங் ஆபஜ்ஜதி, அபா⁴வகோ ஹோதி, உபஸம்பதா³ய அவத்து², ததோ ஏவ சஸ்ஸ உபஸம்பதா³ விக³ச்ச²தி, தஸ்மா ஏஸ பண்ட³கத்துபக³மனகாலதோ பட்டா²ய ஜாதியா நபுங்ஸகபண்ட³கேன ஸத்³தி⁴ங் யோஜெத்வா ‘உபஸம்பன்னோ நாஸேதப்³போ³’தி அப⁴ப்³போ³தி வுத்தோ, ந ததோ புப்³பே³. அயஞ்ச கிஞ்சாபி ஸஹேதுகோ, பா⁴வக்க²யேன பனஸ்ஸ அஹேதுகஸதி³ஸதாய மக்³கோ³பி ந உப்பஜ்ஜதீ’’தி வத³ந்தி. அபரே பன ‘‘பப்³ப³ஜ்ஜதோ புப்³பே³ உபக்கமேன பண்ட³கபா⁴வமாபன்னங் ஸந்தா⁴ய ‘உபஸம்பன்னோ நாஸேதப்³போ³’தி வுத்தங், உபஸம்பன்னஸ்ஸ பன பச்சா² உபக்கமேன உபஸம்பதா³பி ந விக³ச்ச²தீ’’தி, தங் ந யுத்தங். யத³க்³கே³ன ஹி பப்³ப³ஜ்ஜதோ புப்³பே³ உபக்கமேன அப⁴ப்³போ³ ஹோதி, தத³க்³கே³ன பச்சா²பி ஹோதீதி வீமங்ஸித்வா க³ஹேதப்³ப³ங்.

    ‘‘Bījāniapanītānī’’ti vuttattā bījesu ṭhitesu nimittamatte apanīte paṇḍako na hoti. Bhikkhunopi anābādhapaccayā tadapanayane thullaccayameva, na paṇḍakattaṃ. Bījesu pana apanītesu aṅgajātampi rāgena kammaniyaṃ na hoti, pumabhāvo vigacchati, massuādipurisaliṅgampi upasampadāpi vigacchati, kilesapariḷāhopi dunnivāravītikkamo hoti napuṃsakapaṇḍakassa viya, tasmā īdiso upasampannopi nāsetabboti vadanti. Yadi evaṃ kasmā bījuddharaṇe pārājikaṃ na paññattanti? Ettha tāva keci vadanti ‘‘paññattamevetaṃ bhagavatā ‘paṇḍako bhikkhave anupasampanno na upasampādetabbo, upasampanno nāsetabbo’ti vuttattā’’ti. Keci pana ‘‘yasmā bījuddharaṇakkhaṇe paṇḍako na hoti, tasmā tasmiṃ khaṇe pārājikaṃ na paññattaṃ. Yasmā pana so uddhaṭabījo bhikkhu aparena samayena vuttanayena paṇḍakattaṃ āpajjati, abhāvako hoti, upasampadāya avatthu, tato eva cassa upasampadā vigacchati, tasmā esa paṇḍakattupagamanakālato paṭṭhāya jātiyā napuṃsakapaṇḍakena saddhiṃ yojetvā ‘upasampanno nāsetabbo’ti abhabboti vutto, na tato pubbe. Ayañca kiñcāpi sahetuko, bhāvakkhayena panassa ahetukasadisatāya maggopi na uppajjatī’’ti vadanti. Apare pana ‘‘pabbajjato pubbe upakkamena paṇḍakabhāvamāpannaṃ sandhāya ‘upasampanno nāsetabbo’ti vuttaṃ, upasampannassa pana pacchā upakkamena upasampadāpi na vigacchatī’’ti, taṃ na yuttaṃ. Yadaggena hi pabbajjato pubbe upakkamena abhabbo hoti, tadaggena pacchāpi hotīti vīmaṃsitvā gahetabbaṃ.

    இத்த²த்தாதி³ பா⁴வோ நத்தி² ஏதஸ்ஸாதி அபா⁴வகோ. பப்³ப³ஜ்ஜா ந வாரிதாதி எத்த² பப்³ப³ஜ்ஜாக்³க³ஹணேனேவ உபஸம்பதா³பி க³ஹிதா. தேனாஹ ‘‘யஸ்ஸ செத்த² பப்³ப³ஜ்ஜா வாரிதா’’திஆதி³. தஸ்மிங் யேவஸ்ஸ பக்கே² பப்³ப³ஜ்ஜா வாரிதாதி எத்த² பன அபண்ட³கபக்கே²பி பப்³ப³ஜ்ஜாமத்தமேவ லப⁴தி, உபஸம்பதா³ பன ததா³பி ந வட்டதி, பண்ட³கபக்கே² பன ஆக³தோ லிங்க³னாஸனாய நாஸேதப்³போ³தி வேதி³தப்³ப³ந்தி வுத்தங்.

    Itthattādi bhāvo natthi etassāti abhāvako. Pabbajjā na vāritāti ettha pabbajjāggahaṇeneva upasampadāpi gahitā. Tenāha ‘‘yassa cettha pabbajjā vāritā’’tiādi. Tasmiṃ yevassa pakkhe pabbajjā vāritāti ettha pana apaṇḍakapakkhepi pabbajjāmattameva labhati, upasampadā pana tadāpi na vaṭṭati, paṇḍakapakkhe pana āgato liṅganāsanāya nāsetabboti veditabbanti vuttaṃ.

    136. உப⁴தொப்³யஞ்ஜனமஸ்ஸ அத்தீ²தி உப⁴தொப்³யஞ்ஜனகோதி இமினா அஸமானாதி⁴கரணவிஸயோ பா³ஹிரத்த²ஸமாஸோயங், புரிமபதே³ ச விப⁴த்திஅலோபோதி த³ஸ்ஸேதி. ப்³யஞ்ஜனந்தி செத்த² புரிஸனிமித்தங் இத்தி²னிமித்தஞ்ச அதி⁴ப்பேதங். அத² உப⁴தொப்³யஞ்ஜனகஸ்ஸ ஏகமேவ இந்த்³ரியங் ஹோதி, உதா³ஹு த்³வேதி? ஏகமேவ ஹோதி, ந த்³வே. கத²ங் விஞ்ஞாயதீதி சே? ‘‘யஸ்ஸ இத்தி²ந்த்³ரியங் உப்பஜ்ஜதி, தஸ்ஸ புரிஸிந்த்³ரியங் உப்பஜ்ஜதீதி, நோ. யஸ்ஸ வா பன புரிஸிந்த்³ரியங் உப்பஜ்ஜதி, தஸ்ஸ இத்தி²ந்த்³ரியங் உப்பஜ்ஜதீதி, நோ’’தி (யம॰ 3.இந்த்³ரியயமக.188) ஏகஸ்மிங் ஸந்தானே இந்த்³ரியபூ⁴தபா⁴வத்³வயஸ்ஸ உப்பத்தியா அபி⁴த⁴ம்மே படிஸேதி⁴தத்தா, தஞ்ச கோ² இத்தி²உப⁴தொப்³யஞ்ஜனகஸ்ஸ இத்தி²ந்த்³ரியங், புரிஸஉப⁴தொப்³யஞ்ஜனகஸ்ஸ புரிஸிந்த்³ரியந்தி. யதி³ ஏவங் து³தியப்³யஞ்ஜனஸ்ஸ அபா⁴வோ ஆபஜ்ஜதி இந்த்³ரியஞ்ஹி ப்³யஞ்ஜனஸ்ஸ காரணங் வுத்தங், தஞ்ச தஸ்ஸ நத்தீ²தி? வுச்சதே – ந தஸ்ஸ இந்த்³ரியங் து³தியப்³யஞ்ஜனகாரணங். கஸ்மா? ஸதா³ அபா⁴வதோ. இத்தி²உப⁴தொப்³யஞ்ஜனகஸ்ஸ ஹி யதா³ இத்தி²யா ராக³சித்தங் உப்பஜ்ஜதி, ததா³ புரிஸப்³யஞ்ஜனங் பாகடங் ஹோதி, இத்தி²ப்³யஞ்ஜனங் படிச்ச²ன்னங் கு³ள்ஹங் ஹோதி, ததா² இதரஸ்ஸ இதரங். யதி³ ச தேஸங் இந்த்³ரியங் து³தியப்³யஞ்ஜனகாரணங் ப⁴வெய்ய, ஸதா³பி ப்³யஞ்ஜனத்³வயங் திட்டெ²ய்ய, ந பன திட்ட²தி, தஸ்மா வேதி³தப்³ப³மேதங் ‘‘ந தஸ்ஸ தங் ப்³யஞ்ஜனகாரணங், கம்மஸஹாயங் பன ராக³சித்தமேவெத்த² காரண’’ந்தி. யஸ்மா சஸ்ஸ ஏகமேவ இந்த்³ரியங் ஹோதி, தஸ்மா இத்தி²உப⁴தொப்³யஞ்ஜனகோ ஸயம்பி க³ப்³ப⁴ங் க³ண்ஹாதி, பரம்பி க³ண்ஹாபேதி. புரிஸஉப⁴தொப்³யஞ்ஜனகோ பரங் க³ண்ஹாபேதி, ஸயங் பன ந க³ண்ஹாதீதி ஸாரத்த²தீ³பனியங் (ஸாரத்த²॰ டீ॰ மஹாவக்³க³ 3.116) ஆக³தங்.

    136.Ubhatobyañjanamassa atthīti ubhatobyañjanakoti iminā asamānādhikaraṇavisayo bāhiratthasamāsoyaṃ, purimapade ca vibhattialopoti dasseti. Byañjananti cettha purisanimittaṃ itthinimittañca adhippetaṃ. Atha ubhatobyañjanakassa ekameva indriyaṃ hoti, udāhu dveti? Ekameva hoti, na dve. Kathaṃ viññāyatīti ce? ‘‘Yassa itthindriyaṃ uppajjati, tassa purisindriyaṃ uppajjatīti, no. Yassa vā pana purisindriyaṃ uppajjati, tassa itthindriyaṃ uppajjatīti, no’’ti (yama. 3.indriyayamaka.188) ekasmiṃ santāne indriyabhūtabhāvadvayassa uppattiyā abhidhamme paṭisedhitattā, tañca kho itthiubhatobyañjanakassa itthindriyaṃ, purisaubhatobyañjanakassa purisindriyanti. Yadi evaṃ dutiyabyañjanassa abhāvo āpajjati indriyañhi byañjanassa kāraṇaṃ vuttaṃ, tañca tassa natthīti? Vuccate – na tassa indriyaṃ dutiyabyañjanakāraṇaṃ. Kasmā? Sadā abhāvato. Itthiubhatobyañjanakassa hi yadā itthiyā rāgacittaṃ uppajjati, tadā purisabyañjanaṃ pākaṭaṃ hoti, itthibyañjanaṃ paṭicchannaṃ guḷhaṃ hoti, tathā itarassa itaraṃ. Yadi ca tesaṃ indriyaṃ dutiyabyañjanakāraṇaṃ bhaveyya, sadāpi byañjanadvayaṃ tiṭṭheyya, na pana tiṭṭhati, tasmā veditabbametaṃ ‘‘na tassa taṃ byañjanakāraṇaṃ, kammasahāyaṃ pana rāgacittamevettha kāraṇa’’nti. Yasmā cassa ekameva indriyaṃ hoti, tasmā itthiubhatobyañjanako sayampi gabbhaṃ gaṇhāti, parampi gaṇhāpeti. Purisaubhatobyañjanako paraṃ gaṇhāpeti, sayaṃ pana na gaṇhātīti sāratthadīpaniyaṃ (sārattha. ṭī. mahāvagga 3.116) āgataṃ.

    விமதிவினோத³னியங் (வி॰ வி॰ டீ॰ மஹாவக்³க³ 2.116) பன – இத்தி²உப⁴தொப்³யஞ்ஜனகோதி இத்தி²ந்த்³ரியயுத்தோ, இதரோ பன புரிஸிந்த்³ரியயுத்தோ. ஏகஸ்ஸ ஹி பா⁴வத்³வயங் ஸஹ ந உப்பஜ்ஜதி யமகே (யம॰ 3.இந்த்³ரியயமக.188) படிக்கி²த்தத்தா. து³தியப்³யஞ்ஜனங் பன கம்மஸஹாயேன அகுஸலசித்தேனேவ பா⁴வரஹிதங் உப்பஜ்ஜதி. பகதித்தி²புரிஸானம்பி கம்மமேவ ப்³யஞ்ஜனலிங்கா³னங் காரணங், ந பா⁴வோ தஸ்ஸ கேனசி பச்சயேன பச்சயத்தஸ்ஸ பட்டா²னே அவுத்தத்தா. கேவலங் பா⁴வஸஹிதானங்யேவ ப்³யஞ்ஜனலிங்கா³னங் பவத்தத³ஸ்ஸனத்த²ங் அட்ட²கதா²ஸு (த⁴॰ ஸ॰ அட்ட²॰ 632-633) ‘‘இத்தி²ந்த்³ரியங் படிச்ச இத்தி²லிங்கா³தீ³னீ’’திஆதி³னா இந்த்³ரியஸ்ஸ ப்³யஞ்ஜனகாரணத்தேன வுத்தங். இத⁴ பன அகுஸலப³லேன இந்த்³ரியங் வினாபி ப்³யஞ்ஜனங் உப்பஜ்ஜதீதி வேதி³தப்³ப³ங். உபி⁴ன்னம்பி சே தேஸங் உப⁴தொப்³யஞ்ஜனகானங். யதா³ இத்தி²யா ராகோ³ உப்பஜ்ஜதி, ததா³ புரிஸப்³யஞ்ஜனங் பாகடங் ஹோதி, இதரங் படிச்ச²ன்னங். யதா³ புரிஸே ராகோ³ உப்பஜ்ஜதி, ததா³ இத்தி²ப்³யஞ்ஜனங் பாகடங் ஹோதி, இதரங் படிச்ச²ன்னந்தி ஆக³தங்.

    Vimativinodaniyaṃ (vi. vi. ṭī. mahāvagga 2.116) pana – itthiubhatobyañjanakoti itthindriyayutto, itaro pana purisindriyayutto. Ekassa hi bhāvadvayaṃ saha na uppajjati yamake (yama. 3.indriyayamaka.188) paṭikkhittattā. Dutiyabyañjanaṃ pana kammasahāyena akusalacitteneva bhāvarahitaṃ uppajjati. Pakatitthipurisānampi kammameva byañjanaliṅgānaṃ kāraṇaṃ, na bhāvo tassa kenaci paccayena paccayattassa paṭṭhāne avuttattā. Kevalaṃ bhāvasahitānaṃyeva byañjanaliṅgānaṃ pavattadassanatthaṃ aṭṭhakathāsu (dha. sa. aṭṭha. 632-633) ‘‘itthindriyaṃ paṭicca itthiliṅgādīnī’’tiādinā indriyassa byañjanakāraṇattena vuttaṃ. Idha pana akusalabalena indriyaṃ vināpi byañjanaṃ uppajjatīti veditabbaṃ. Ubhinnampi ce tesaṃ ubhatobyañjanakānaṃ. Yadā itthiyā rāgo uppajjati, tadā purisabyañjanaṃ pākaṭaṃ hoti, itaraṃ paṭicchannaṃ. Yadā purise rāgo uppajjati, tadā itthibyañjanaṃ pākaṭaṃ hoti, itaraṃ paṭicchannanti āgataṃ.

    137. தெ²ய்யாய ஸங்வாஸோ ஏதஸ்ஸாதி தெ²ய்யஸங்வாஸகோ. ஸோ ச ந ஸங்வாஸமத்தஸ்ஸேவ தே²னகோ இதா⁴தி⁴ப்பேதோ, அத² கோ² லிங்க³ஸ்ஸ தது³ப⁴யஸ்ஸ ச தே²னகோபீதி ஆஹ ‘‘தயோ தெ²ய்யஸங்வாஸகா’’திஆதி³. ந யதா²வுட்³ட⁴ங் வந்த³னங் ஸாதி³யதீதி யதா²வுட்³ட⁴ங் பி⁴க்கூ²னங் வா ஸாமணேரானங் வா வந்த³னங் ந ஸாதி³யதி. யதா²வுட்³ட⁴ங் வந்த³னங் ஸாதி³யதீதி அத்தனா முஸாவாத³ங் கத்வா த³ஸ்ஸிதவஸ்ஸானுரூபங் யதா²வுட்³ட⁴ங் வந்த³னங் ஸாதி³யதி. பி⁴க்கு²வஸ்ஸக³ணனாதி³கோதி இமினா ந ஏககம்மாதி³கோவ இத⁴ ஸங்வாஸோ நாமாதி த³ஸ்ஸேதி.

    137. Theyyāya saṃvāso etassāti theyyasaṃvāsako. So ca na saṃvāsamattasseva thenako idhādhippeto, atha kho liṅgassa tadubhayassa ca thenakopīti āha ‘‘tayo theyyasaṃvāsakā’’tiādi. Na yathāvuḍḍhaṃ vandanaṃ sādiyatīti yathāvuḍḍhaṃ bhikkhūnaṃ vā sāmaṇerānaṃ vā vandanaṃ na sādiyati. Yathāvuḍḍhaṃ vandanaṃ sādiyatīti attanā musāvādaṃ katvā dassitavassānurūpaṃ yathāvuḍḍhaṃ vandanaṃ sādiyati. Bhikkhuvassagaṇanādikoti iminā na ekakammādikova idha saṃvāso nāmāti dasseti.

    138. ராஜ…பே॰… ப⁴யேனாதி எத்த² ப⁴ய-ஸத்³தோ³ பச்சேகங் யோஜேதப்³போ³ ‘‘ராஜப⁴யேன து³ப்³பி⁴க்க²ப⁴யேனா’’திஆதி³னா. ஸங்வாஸங் நாதி⁴வாஸேதி, யாவ ஸோ ஸுத்³த⁴மானஸோதி ராஜப⁴யாதீ³ஹி க³ஹிதலிங்க³தாய ஸோ ஸுத்³த⁴மானஸோ யாவ ஸங்வாஸங் நாதி⁴வாஸேதீதி அத்தோ². யோ ஹி ராஜப⁴யாதி³ங் வினா கேவலங் பி⁴க்கூ² வஞ்செத்வா தேஹி ஸத்³தி⁴ங் ஸங்வஸிதுகாமதாய லிங்க³ங் க³ண்ஹாதி, ஸோ அஸுத்³த⁴சித்ததாய லிங்க³க்³க³ஹணேனேவ தெ²ய்யஸங்வாஸகோ நாம ஹோதி. அயங் பன தாதி³ஸேன அஸுத்³த⁴சித்தேன பி⁴க்கூ² வஞ்சேதுகாமதாய அபா⁴வதோ யாவ ஸங்வாஸங் நாதி⁴வாஸேதி, தாவ தெ²ய்யஸங்வாஸகோ நாம ந ஹோதி. தேனேவ ‘‘ராஜப⁴யாதீ³ஹி க³ஹிதலிங்கா³னங் ‘கி³ஹீ மங் ஸமணோதி ஜானந்தூ’தி வஞ்சனசித்தே ஸதிபி பி⁴க்கூ²னங் வஞ்சேதுகாமதாய அபா⁴வா தோ³ஸோ ந ஜாதோ’’தி தீஸுபி க³ண்டி²பதே³ஸு வுத்தங். கேசி பன ‘‘வூபஸந்தப⁴யதா இத⁴ ஸுத்³த⁴சித்ததா’’தி வத³ந்தி, ஏவஞ்ச ஸதி ஸோ வூபஸந்தப⁴யோ யாவ ஸங்வாஸங் நாதி⁴வாஸேதி, தாவ தெ²ய்யஸங்வாஸகோ ந ஹோதீதி அயமத்தோ² விஞ்ஞாயதி. இமஸ்மிஞ்ச அத்தே² விஞ்ஞாயமானே அவூபஸந்தப⁴யஸ்ஸ ஸங்வாஸஸாதி³யனேபி தெ²ய்யஸங்வாஸகோ ந ஹோதீதி ஆபஜ்ஜெய்ய, ந ச அட்ட²கதா²யங் அவூபஸந்தப⁴யஸ்ஸ ஸங்வாஸஸாதி³யனேபி அதெ²ய்யஸங்வாஸகதா த³ஸ்ஸிதா. ஸப்³ப³பாஸண்டி³யப⁴த்தானி பு⁴ஞ்ஜந்தோதி ச இமினா அவூபஸந்தப⁴யேனபி ஸங்வாஸங் அஸாதி³யந்தேனேவ ப⁴விதப்³ப³ந்தி தீ³பேதி. தேனேவ தீஸுபி க³ண்டி²பதே³ஸு வுத்தங் ‘‘யஸ்மா விஹாரங் ஆக³ந்த்வா ஸங்கி⁴கங் க³ண்ஹந்தஸ்ஸ ஸங்வாஸங் பரிஹரிதுங் து³க்கரங், தஸ்மா ‘ஸப்³ப³பாஸண்டி³யப⁴த்தானி பு⁴ஞ்ஜந்தோ’தி இத³ங் வுத்த’’ந்தி. தஸ்மா ராஜப⁴யாதீ³ஹி க³ஹிதலிங்க³தாயேவெத்த² ஸுத்³த⁴சித்ததாதி க³ஹேதப்³ப³ங்.

    138.Rāja…pe… bhayenāti ettha bhaya-saddo paccekaṃ yojetabbo ‘‘rājabhayena dubbhikkhabhayenā’’tiādinā. Saṃvāsaṃ nādhivāseti, yāva so suddhamānasoti rājabhayādīhi gahitaliṅgatāya so suddhamānaso yāva saṃvāsaṃ nādhivāsetīti attho. Yo hi rājabhayādiṃ vinā kevalaṃ bhikkhū vañcetvā tehi saddhiṃ saṃvasitukāmatāya liṅgaṃ gaṇhāti, so asuddhacittatāya liṅgaggahaṇeneva theyyasaṃvāsako nāma hoti. Ayaṃ pana tādisena asuddhacittena bhikkhū vañcetukāmatāya abhāvato yāva saṃvāsaṃ nādhivāseti, tāva theyyasaṃvāsako nāma na hoti. Teneva ‘‘rājabhayādīhi gahitaliṅgānaṃ ‘gihī maṃ samaṇoti jānantū’ti vañcanacitte satipi bhikkhūnaṃ vañcetukāmatāya abhāvā doso na jāto’’ti tīsupi gaṇṭhipadesu vuttaṃ. Keci pana ‘‘vūpasantabhayatā idha suddhacittatā’’ti vadanti, evañca sati so vūpasantabhayo yāva saṃvāsaṃ nādhivāseti, tāva theyyasaṃvāsako na hotīti ayamattho viññāyati. Imasmiñca atthe viññāyamāne avūpasantabhayassa saṃvāsasādiyanepi theyyasaṃvāsako na hotīti āpajjeyya, na ca aṭṭhakathāyaṃ avūpasantabhayassa saṃvāsasādiyanepi atheyyasaṃvāsakatā dassitā. Sabbapāsaṇḍiyabhattāni bhuñjantoti ca iminā avūpasantabhayenapi saṃvāsaṃ asādiyanteneva bhavitabbanti dīpeti. Teneva tīsupi gaṇṭhipadesu vuttaṃ ‘‘yasmā vihāraṃ āgantvā saṅghikaṃ gaṇhantassa saṃvāsaṃ pariharituṃ dukkaraṃ, tasmā ‘sabbapāsaṇḍiyabhattāni bhuñjanto’ti idaṃ vutta’’nti. Tasmā rājabhayādīhi gahitaliṅgatāyevettha suddhacittatāti gahetabbaṃ.

    ஸப்³ப³பாஸண்டி³யப⁴த்தானீதி ஸப்³ப³ஸாமயிகானங் ஸாதா⁴ரணங் கத்வா வீதி²சதுக்காதீ³ஸு ட²பெத்வா தா³தப்³ப³ப⁴த்தானி. காயபரிஹாரியானீதி காயேன பரிஹரிதப்³பா³னி. அப்³பு⁴க்³க³ச்ச²ந்தீதி அபி⁴முக²ங் க³ச்ச²ந்தி. கம்மந்தானுட்டா²னேனாதி கஸிகோ³ரக்கா²தி³கம்மாகரணேன. ததே³வ பத்தசீவரங் ஆதா³ய விஹாரங் க³ச்ச²தீதி சீவரானி நிவாஸனபாருபனவஸேன ஆதா³ய, பத்தஞ்ச அங்ஸகூடே லக்³கெ³த்வா விஹாரங் க³ச்ச²தி.

    Sabbapāsaṇḍiyabhattānīti sabbasāmayikānaṃ sādhāraṇaṃ katvā vīthicatukkādīsu ṭhapetvā dātabbabhattāni. Kāyaparihāriyānīti kāyena pariharitabbāni. Abbhuggacchantīti abhimukhaṃ gacchanti. Kammantānuṭṭhānenāti kasigorakkhādikammākaraṇena. Tadeva pattacīvaraṃ ādāya vihāraṃ gacchatīti cīvarāni nivāsanapārupanavasena ādāya, pattañca aṃsakūṭe laggetvā vihāraṃ gacchati.

    நாபி ஸயங் ஜானாதீதி ‘‘யோ ஏவங் பப்³ப³ஜதி, ஸோ தெ²ய்யஸங்வாஸகோ நாம ஹோதீ’’தி வா ‘‘ஏவங் காதுங் ந லப⁴தீ’’தி வா ‘‘ஏவங் பப்³ப³ஜிதோ ஸமணோ நாம ந ஹோதீ’’தி வா ந ஜானாதி. யோ ஏவங் பப்³ப³ஜதி, ஸோ தெ²ய்யஸங்வாஸகோ நாம ஹோதீதி இத³ங் பன நித³ஸ்ஸனமத்தங். அனுபஸம்பன்னகாலேயேவாதி இமினா உபஸம்பன்னகாலே ஸுத்வா ஸசேபி நாரோசேதி, தெ²ய்யஸங்வாஸகோ ந ஹோதீதி தீ³பேதி.

    Nāpi sayaṃ jānātīti ‘‘yo evaṃ pabbajati, so theyyasaṃvāsako nāma hotī’’ti vā ‘‘evaṃ kātuṃ na labhatī’’ti vā ‘‘evaṃ pabbajito samaṇo nāma na hotī’’ti vā na jānāti. Yo evaṃ pabbajati, so theyyasaṃvāsako nāma hotīti idaṃ pana nidassanamattaṃ. Anupasampannakāleyevāti iminā upasampannakāle sutvā sacepi nāroceti, theyyasaṃvāsako na hotīti dīpeti.

    ஸிக்க²ங் அப்பச்சக்கா²ய…பே॰… தெ²ய்யஸங்வாஸகோ ந ஹோதீதி இத³ங் பி⁴க்கூ²ஹி தி³ன்னலிங்க³ஸ்ஸ அபரிச்சத்தத்தா ந லிங்க³த்தே²னகோ ஹோதி, லிங்கா³னுரூபஸ்ஸ ஸங்வாஸஸ்ஸ ஸாதி³தத்தா நாபி ஸங்வாஸத்தே²னகோ ஹோதீதி வுத்தங். ஏகோ பி⁴க்கு² காஸாயே ஸஉஸ்ஸாஹோவ ஓதா³தங் நிவாஸெத்வாதி எத்தா²பி இத³மேவ காரணங் த³ட்ட²ப்³ப³ங். பரதோ ‘‘ஸாமணேரோ ஸலிங்கே³ டி²தோ’’திஆதி³னா ஸாமணேரஸ்ஸ வுத்தவிதா⁴னேஸுபி அதெ²ய்யஸங்வாஸபக்கே² அயமேவ நயோ. ‘‘பி⁴க்கு²னியாபி ஏஸேவ நயோ’’தி வுத்தமேவத்த²ங் ‘‘ஸாபி கி³ஹிபா⁴வங் பத்த²யமானா’’திஆதி³னா விபா⁴வேதி.

    Sikkhaṃappaccakkhāya…pe… theyyasaṃvāsako na hotīti idaṃ bhikkhūhi dinnaliṅgassa apariccattattā na liṅgatthenako hoti, liṅgānurūpassa saṃvāsassa sāditattā nāpi saṃvāsatthenako hotīti vuttaṃ. Eko bhikkhu kāsāye saussāhova odātaṃ nivāsetvāti etthāpi idameva kāraṇaṃ daṭṭhabbaṃ. Parato ‘‘sāmaṇero saliṅge ṭhito’’tiādinā sāmaṇerassa vuttavidhānesupi atheyyasaṃvāsapakkhe ayameva nayo. ‘‘Bhikkhuniyāpi eseva nayo’’ti vuttamevatthaṃ ‘‘sāpi gihibhāvaṃ patthayamānā’’tiādinā vibhāveti.

    ஸசே கோசி வுட்³ட⁴பப்³ப³ஜிதோதி ஸாமணேரங் ஸந்தா⁴ய வுத்தங். மஹாபேளாதீ³ஸூதி ஏதேன கி³ஹிஸந்தகங் த³ஸ்ஸிதங். ஸாமணேரபடிபாடியா…பே॰… தெ²ய்யஸங்வாஸகோ ந ஹோதீதி எத்த² கிஞ்சாபி தெ²ய்யஸங்வாஸகோ ந ஹோதி, பாராஜிகங் பன ஆபஜ்ஜதியேவ. ஸேஸமெத்த² உத்தானமேவாதி ஸாரத்த²தீ³பனியங் (ஸாரத்த²॰ டீ॰ மஹாவக்³க³ 3.110) வுத்தங்.

    Sace koci vuḍḍhapabbajitoti sāmaṇeraṃ sandhāya vuttaṃ. Mahāpeḷādīsūti etena gihisantakaṃ dassitaṃ. Sāmaṇerapaṭipāṭiyā…pe… theyyasaṃvāsako na hotīti ettha kiñcāpi theyyasaṃvāsako na hoti, pārājikaṃ pana āpajjatiyeva. Sesamettha uttānamevāti sāratthadīpaniyaṃ (sārattha. ṭī. mahāvagga 3.110) vuttaṃ.

    விமதிவினோத³னியங் (வி॰ வி॰ டீ॰ மஹாவக்³க³ 2.110) பன – தெ²ய்யாய லிங்க³க்³க³ஹணமத்தம்பி இத⁴ ஸங்வாஸோ ஏவாதி ஆஹ ‘‘தயோ தெ²ய்யஸங்வாஸகா’’தி. ந யதா²வுட்³ட⁴ங் வந்த³னந்தி பி⁴க்கூ²னங் ஸாமணேரானங் வா வந்த³னங் ந ஸாதி³யதி. யதா²வுட்³ட⁴ங் வந்த³னந்தி அத்தனா முஸாவாதே³ன த³ஸ்ஸிதவஸ்ஸக்கமேன பி⁴க்கூ²னங் வந்த³னங் ஸாதி³யதி. த³ஹரஸாமணேரோ பன வுட்³ட⁴ஸாமணேரானங், த³ஹரபி⁴க்கூ² ச வுட்³டா⁴னங் வந்த³னங் ஸாதி³யந்தோபி தெ²ய்யஸங்வாஸகோ ந ஹோதி. இமஸ்மிங் அத்தே²தி ஸங்வாஸத்தே²னகத்தே². பி⁴க்கு²வஸ்ஸானீதி இத³ங் ஸங்வாஸத்தே²னகே வுத்தபாட²வஸேன வுத்தங், ஸயமேவ பன பப்³ப³ஜித்வா ஸாமணேரவஸ்ஸானி க³ணெந்தோபி உப⁴யத்தே²னகோ ஏவ. ந கேவலஞ்ச புரிஸோவ, இத்தீ²பி பி⁴க்கூ²னீஸு ஏவங் படிபஜ்ஜதி, தெ²ய்யஸங்வாஸிகாவ. ஆதி³கம்மிகாபி செத்த² ந முச்சந்தி. உபஸம்பன்னேஸு ஏவ பஞ்ஞத்தாபத்திங் படிச்ச ஆதி³கம்மிகா வுத்தா, தேனேவெத்த² ஆதி³கம்மிகோபி ந முத்தோ.

    Vimativinodaniyaṃ (vi. vi. ṭī. mahāvagga 2.110) pana – theyyāya liṅgaggahaṇamattampi idha saṃvāso evāti āha ‘‘tayo theyyasaṃvāsakā’’ti. Nayathāvuḍḍhaṃ vandananti bhikkhūnaṃ sāmaṇerānaṃ vā vandanaṃ na sādiyati. Yathāvuḍḍhaṃ vandananti attanā musāvādena dassitavassakkamena bhikkhūnaṃ vandanaṃ sādiyati. Daharasāmaṇero pana vuḍḍhasāmaṇerānaṃ, daharabhikkhū ca vuḍḍhānaṃ vandanaṃ sādiyantopi theyyasaṃvāsako na hoti. Imasmiṃ attheti saṃvāsatthenakatthe. Bhikkhuvassānīti idaṃ saṃvāsatthenake vuttapāṭhavasena vuttaṃ, sayameva pana pabbajitvā sāmaṇeravassāni gaṇentopi ubhayatthenako eva. Na kevalañca purisova, itthīpi bhikkhūnīsu evaṃ paṭipajjati, theyyasaṃvāsikāva. Ādikammikāpi cettha na muccanti. Upasampannesu eva paññattāpattiṃ paṭicca ādikammikā vuttā, tenevettha ādikammikopi na mutto.

    ராஜ…பே॰… ப⁴யேனாதி எத்த² ப⁴ய-ஸத்³தோ³ பச்சேகங் யோஜேதப்³போ³. யாவ ஸோ ஸுத்³த⁴மானஸோதி ‘‘இமினா லிங்கே³ன பி⁴க்கூ² வஞ்செத்வா தேஹி ஸங்வஸிஸ்ஸாமீ’’தி அஸுத்³த⁴சித்தாபா⁴வேன ஸுத்³த⁴சித்தோ. தேன ஹி அஸுத்³த⁴சித்தேன லிங்கே³ க³ஹிதமத்தே பச்சா² பி⁴க்கூ²ஹி ஸஹ ஸங்வஸது வா மா வா, லிங்க³த்தே²னகோ ஹோதி. பச்சா² ஸங்வஸந்தோபி அப⁴ப்³போ³ ஹுத்வா ஸங்வஸதி, தஸ்மா உப⁴யத்தே²னகோபி லிங்க³த்தே²னகே ஏவ பவிஸதீதி வேதி³தப்³ப³ங். யோ பன ராஜாதி³ப⁴யேன ஸுத்³த⁴சித்தோவ லிங்க³ங் க³ஹெத்வா விசரந்தோ பச்சா² ‘‘பி⁴க்கு²வஸ்ஸானி க³ணெத்வா ஜீவஸ்ஸாமீ’’தி அஸுத்³த⁴சித்தங் உப்பாதே³தி, ஸோ சித்துப்பாத³மத்தேன தெ²ய்யஸங்வாஸகோ ந ஹோதி ஸுத்³த⁴சித்தேன க³ஹிதலிங்க³த்தா. ஸசே பன ஸோ பி⁴க்கூ²னங் ஸந்திகங் க³ந்த்வா ஸாமணேரவஸ்ஸக³ணனாதி³ங் கரோதி, ததா³ ஸங்வாஸத்தே²னகோ, உப⁴யத்தே²னகோ வா ஹோதீதி த³ட்ட²ப்³ப³ங். யங் பன பரதோ ‘‘ஸஹ து⁴ரனிக்கே²பேன அயம்பி தெ²ய்யஸங்வாஸகோவா’’தி வுத்தங், தங் பி⁴க்கூ²ஹி ஸங்க³ம்ம ஸங்வாஸாதி⁴வாஸனவஸேன து⁴ரனிக்கே²பங் ஸந்தா⁴ய வுத்தங். தேன வுத்தங் ‘‘ஸங்வாஸங் நாதி⁴வாஸேதி, யாவா’’தி , தஸ்ஸ தாவ தெ²ய்யஸங்வாஸகோ நாம ந வுச்சதீதி ஸம்ப³ந்தோ⁴ த³ட்ட²ப்³போ³. எத்த² ச சோராதி³ப⁴யங் வினாபி கீளாதி⁴ப்பாயேன லிங்க³ங் க³ஹெத்வா பி⁴க்கூ²னம்பி ஸந்திகே பப்³ப³ஜிதாலயங் த³ஸ்ஸெத்வா வந்த³னாதி³ங் அஸாதி³யந்தோபி ‘‘ஸோப⁴தி நு கோ² மே பப்³ப³ஜிதலிங்க³’’ந்திஆதி³னா ஸுத்³த⁴சித்தேன க³ண்ஹந்தோபி தெ²ய்யஸங்வாஸகோ ந ஹோதீதி த³ட்ட²ப்³ப³ங்.

    Rāja…pe… bhayenāti ettha bhaya-saddo paccekaṃ yojetabbo. Yāva so suddhamānasoti ‘‘iminā liṅgena bhikkhū vañcetvā tehi saṃvasissāmī’’ti asuddhacittābhāvena suddhacitto. Tena hi asuddhacittena liṅge gahitamatte pacchā bhikkhūhi saha saṃvasatu vā mā vā, liṅgatthenako hoti. Pacchā saṃvasantopi abhabbo hutvā saṃvasati, tasmā ubhayatthenakopi liṅgatthenake eva pavisatīti veditabbaṃ. Yo pana rājādibhayena suddhacittova liṅgaṃ gahetvā vicaranto pacchā ‘‘bhikkhuvassāni gaṇetvā jīvassāmī’’ti asuddhacittaṃ uppādeti, so cittuppādamattena theyyasaṃvāsako na hoti suddhacittena gahitaliṅgattā. Sace pana so bhikkhūnaṃ santikaṃ gantvā sāmaṇeravassagaṇanādiṃ karoti, tadā saṃvāsatthenako, ubhayatthenako vā hotīti daṭṭhabbaṃ. Yaṃ pana parato ‘‘saha dhuranikkhepena ayampi theyyasaṃvāsakovā’’ti vuttaṃ, taṃ bhikkhūhi saṅgamma saṃvāsādhivāsanavasena dhuranikkhepaṃ sandhāya vuttaṃ. Tena vuttaṃ ‘‘saṃvāsaṃ nādhivāseti, yāvā’’ti , tassa tāva theyyasaṃvāsako nāma na vuccatīti sambandho daṭṭhabbo. Ettha ca corādibhayaṃ vināpi kīḷādhippāyena liṅgaṃ gahetvā bhikkhūnampi santike pabbajitālayaṃ dassetvā vandanādiṃ asādiyantopi ‘‘sobhati nu kho me pabbajitaliṅga’’ntiādinā suddhacittena gaṇhantopi theyyasaṃvāsako na hotīti daṭṭhabbaṃ.

    ஸப்³ப³பாஸண்டி³யப⁴த்தானீதி ஸப்³ப³ஸாமயிகானங் ஸாதா⁴ரணங் கத்வா பஞ்ஞத்தானி ப⁴த்தானி. இத³ஞ்ச பி⁴க்கூ²னஞ்ஞேவ நியமிதப⁴த்தக்³க³ஹணே ஸங்வாஸோபி ஸம்ப⁴வெய்யாதி ஸப்³ப³ஸாதா⁴ரணப⁴த்தங் வுத்தங். ஸங்வாஸங் பன அஸாதி³யித்வா அபி⁴க்கு²கவிஹாராதீ³ஸு விஹாரப⁴த்தாதீ³னி பு⁴ஞ்ஜந்தோபி தெ²ய்யஸங்வாஸகோ ந ஹோதி ஏவ. கம்மந்தானுட்டா²னேனாதி கஸிஆதி³கம்மாகரணேன. பத்தசீவரங் ஆதா³யாதி பி⁴க்கு²லிங்க³வஸேன ஸரீரேன தா⁴ரெத்வா.

    Sabbapāsaṇḍiyabhattānīti sabbasāmayikānaṃ sādhāraṇaṃ katvā paññattāni bhattāni. Idañca bhikkhūnaññeva niyamitabhattaggahaṇe saṃvāsopi sambhaveyyāti sabbasādhāraṇabhattaṃ vuttaṃ. Saṃvāsaṃ pana asādiyitvā abhikkhukavihārādīsu vihārabhattādīni bhuñjantopi theyyasaṃvāsako na hoti eva. Kammantānuṭṭhānenāti kasiādikammākaraṇena. Pattacīvaraṃ ādāyāti bhikkhuliṅgavasena sarīrena dhāretvā.

    யோ ஏவங் பப்³ப³ஜதி, ஸோ தெ²ய்யஸங்வாஸகோ நாம ஹோதீதி இத³ங் நித³ஸ்ஸனமத்தங். ‘‘தெ²ய்யஸங்வாஸகோ’’தி பன நாமங் அஜானந்தோபி ‘‘ஏவங் காதுங் ந வட்டதீ’’தி வா ‘‘கரொந்தோ ஸமணோ நாம ந ஹோதீ’’தி வா ‘‘யதி³ ஆரோசெஸ்ஸாமி, ச²ட்³ட³யிஸ்ஸந்தி ம’’ந்தி வா ‘‘யேன கேனசி பப்³ப³ஜ்ஜா மே ந ருஹதீ’’தி ஜானாதி, தெ²ய்யஸங்வாஸகோ ஹோதி. யோ பன பட²மங் ‘‘பப்³ப³ஜ்ஜா ஏவங் மே க³ஹிதா’’தி ஸஞ்ஞீ கேவலங் அந்தரா அத்தனோ ஸேதவத்த²னிவாஸனாதி³விப்பகாரங் பகாஸேதுங் லஜ்ஜந்தோ ந கதே²தி, ஸோ தெ²ய்யஸங்வாஸகோ ந ஹோதி. அனுபஸம்பன்னகாலேயேவாதி எத்த² அவதா⁴ரணேன உபஸம்பன்னகாலே தெ²ய்யஸங்வாஸகலக்க²ணங் ஞத்வா வஞ்சனாயபி நாரோசேதி, தெ²ய்யஸங்வாஸகோ ந ஹோதீதி தீ³பேதி. ஸோ ஹி ஸுத்³த⁴சித்தேன க³ஹிதலிங்க³த்தா லிங்க³த்தே²னகோ ந ஹோதி, லத்³தூ⁴பஸம்பத³த்தா தத³னுகு³ணஸ்ஸேவ ஸங்வாஸஸ்ஸ ஸாதி³தத்தா ஸங்வாஸத்தே²னகோபி ந ஹோதி. அனுபஸம்பன்னோ பன லிங்க³த்தே²னகோ ஹோதி, ஸங்வாஸாரஹஸ்ஸ லிங்க³ஸ்ஸ க³ஹிதத்தா ஸங்வாஸஸாதி³யனமத்தேன ஸங்வாஸத்தே²னகோ ஹோதி.

    Yo evaṃ pabbajati, so theyyasaṃvāsako nāma hotīti idaṃ nidassanamattaṃ. ‘‘Theyyasaṃvāsako’’ti pana nāmaṃ ajānantopi ‘‘evaṃ kātuṃ na vaṭṭatī’’ti vā ‘‘karonto samaṇo nāma na hotī’’ti vā ‘‘yadi ārocessāmi, chaḍḍayissanti ma’’nti vā ‘‘yena kenaci pabbajjā me na ruhatī’’ti jānāti, theyyasaṃvāsako hoti. Yo pana paṭhamaṃ ‘‘pabbajjā evaṃ me gahitā’’ti saññī kevalaṃ antarā attano setavatthanivāsanādivippakāraṃ pakāsetuṃ lajjanto na katheti, so theyyasaṃvāsako na hoti. Anupasampannakāleyevāti ettha avadhāraṇena upasampannakāle theyyasaṃvāsakalakkhaṇaṃ ñatvā vañcanāyapi nāroceti, theyyasaṃvāsako na hotīti dīpeti. So hi suddhacittena gahitaliṅgattā liṅgatthenako na hoti, laddhūpasampadattā tadanuguṇasseva saṃvāsassa sāditattā saṃvāsatthenakopi na hoti. Anupasampanno pana liṅgatthenako hoti, saṃvāsārahassa liṅgassa gahitattā saṃvāsasādiyanamattena saṃvāsatthenako hoti.

    ஸலிங்கே³ டி²தோதி ஸலிங்க³பா⁴வே டி²தோ. தெ²ய்யஸங்வாஸகோ ந ஹோதீதி பி⁴க்கூ²ஹி தி³ன்னலிங்க³ஸ்ஸ அபரிச்சத்தத்தா லிங்க³த்தே²னகோ ந ஹோதி. பி⁴க்கு²படிஞ்ஞாய அபரிச்சத்தத்தா ஸங்வாஸத்தே²னகோ ந ஹோதி. யங் பன மாதிகாட்ட²கதா²யங் (கங்கா²॰ அட்ட²॰ பட²மபாராஜிகவண்ணனா) ‘‘லிங்கா³னுரூபஸ்ஸ ஸங்வாஸஸ்ஸ ஸாதி³தத்தா நாபி ஸங்வாஸத்தே²னகோ’’தி காரணங் வுத்தங், தம்பி இத³மேவ காரணங் ஸந்தா⁴ய வுத்தங். இதரதா² ஸாமணேரஸ்ஸாபி பி⁴க்கு²வஸ்ஸக³ணனாதீ³ஸு லிங்கா³னுரூபஸங்வாஸோ ஏவ ஸாதி³தோதி ஸங்வாஸத்தே²னகதா ந ஸியா பி⁴க்கூ²ஹி தி³ன்னலிங்க³ஸ்ஸ உபி⁴ன்னம்பி ஸாதா⁴ரணத்தா. யதா² செத்த² பி⁴க்கு², ஏவங் ஸாமணேரோபி பாராஜிகங் ஸமாபன்னோ ஸாமணேரபடிஞ்ஞாய அபரிச்சத்தத்தா ஸங்வாஸத்தே²னகோ ந ஹோதீதி வேதி³தப்³போ³. ஸோப⁴தீதி ஸம்படிச்சி²த்வாதி காஸாவதா⁴ரணே து⁴ரங் நிக்கி²பித்வா கி³ஹிபா⁴வங் ஸம்படிச்சி²த்வா.

    Saliṅgeṭhitoti saliṅgabhāve ṭhito. Theyyasaṃvāsako na hotīti bhikkhūhi dinnaliṅgassa apariccattattā liṅgatthenako na hoti. Bhikkhupaṭiññāya apariccattattā saṃvāsatthenako na hoti. Yaṃ pana mātikāṭṭhakathāyaṃ (kaṅkhā. aṭṭha. paṭhamapārājikavaṇṇanā) ‘‘liṅgānurūpassa saṃvāsassa sāditattā nāpi saṃvāsatthenako’’ti kāraṇaṃ vuttaṃ, tampi idameva kāraṇaṃ sandhāya vuttaṃ. Itarathā sāmaṇerassāpi bhikkhuvassagaṇanādīsu liṅgānurūpasaṃvāso eva sāditoti saṃvāsatthenakatā na siyā bhikkhūhi dinnaliṅgassa ubhinnampi sādhāraṇattā. Yathā cettha bhikkhu, evaṃ sāmaṇeropi pārājikaṃ samāpanno sāmaṇerapaṭiññāya apariccattattā saṃvāsatthenako na hotīti veditabbo. Sobhatīti sampaṭicchitvāti kāsāvadhāraṇe dhuraṃ nikkhipitvā gihibhāvaṃ sampaṭicchitvā.

    ஸசே கோசி வுட்³ட⁴பப்³ப³ஜிதோதி ஸாமணேரங் ஸந்தா⁴ய வுத்தங். மஹாபேளாதீ³ஸூதி விலீவாதி³மயேஸு க⁴ரத்³வாரேஸு ட²பிதேஸு ப⁴த்தபா⁴ஜனவிஸேஸேஸு. ஏதேன விஹாரே பி⁴க்கூ²ஹி ஸத்³தி⁴ங் வஸ்ஸக³ணனாதீ³னங் அகரணங் த³ஸ்ஸேதீதி வுத்தங்.

    Sace koci vuḍḍhapabbajitoti sāmaṇeraṃ sandhāya vuttaṃ. Mahāpeḷādīsūti vilīvādimayesu gharadvāresu ṭhapitesu bhattabhājanavisesesu. Etena vihāre bhikkhūhi saddhiṃ vassagaṇanādīnaṃ akaraṇaṃ dassetīti vuttaṃ.

    139. தித்தி²யபக்கந்தககதா²யங் தேஸங் லிங்கே³ ஆதி³ன்னமத்தே தித்தி²யபக்கந்தகோ ஹோதீதி ‘‘தித்தி²யோ ப⁴விஸ்ஸாமீ’’தி க³தஸ்ஸ லிங்க³க்³க³ஹணேனேவ தேஸங் லத்³தி⁴பி க³ஹிதாயேவ ஹோதீதி கத்வா வுத்தங். கேனசி பன ‘‘தேஸங் லிங்கே³ ஆதி³ன்னமத்தே லத்³தி⁴யா க³ஹிதாயபி அக்³க³ஹிதாயபி தித்தி²யபக்கந்தகோ ஹோதீ’’தி வுத்தங், தங் ந க³ஹேதப்³ப³ங். ந ஹி ‘‘தித்தி²யோ ப⁴விஸ்ஸாமீ’’தி க³தஸ்ஸ லிங்க³ஸம்படிச்ச²னதோ அஞ்ஞங் லத்³தி⁴க்³க³ஹணங் நாம அத்தி². லிங்க³ஸம்படிச்ச²னேனேவ ஹி ஸோ க³ஹிதலத்³தி⁴கோ ஹோதி. தேனேவ ‘‘வீமங்ஸனத்த²ங் குஸசீராதீ³னி…பே॰… யாவ ந ஸம்படிச்ச²தி, தாவ தங் லத்³தி⁴ ரக்க²தி, ஸம்படிச்சி²தமத்தே தித்தி²யபக்கந்தகோ ஹோதீ’’தி வுத்தங். நக்³கோ³வ ஆஜீவகானங் உபஸ்ஸயங் க³ச்ச²தி, பத³வாரே பத³வாரே து³க்கடந்தி ‘‘ஆஜீவகோ ப⁴விஸ்ஸ’’ந்தி அஸுத்³த⁴சித்தேன க³மனபச்சயா து³க்கடங் வுத்தங். நக்³கே³ன ஹுத்வா க³மனபச்சயாபி பத³வாரே து³க்கடா ந முச்சதியேவாதி ஸாரத்த²தீ³பனியங் (ஸாரத்த²॰ டீ॰ மஹாவக்³க³ 3.110) வுத்தங்.

    139. Titthiyapakkantakakathāyaṃ tesaṃ liṅge ādinnamatte titthiyapakkantako hotīti ‘‘titthiyo bhavissāmī’’ti gatassa liṅgaggahaṇeneva tesaṃ laddhipi gahitāyeva hotīti katvā vuttaṃ. Kenaci pana ‘‘tesaṃ liṅge ādinnamatte laddhiyā gahitāyapi aggahitāyapi titthiyapakkantako hotī’’ti vuttaṃ, taṃ na gahetabbaṃ. Na hi ‘‘titthiyo bhavissāmī’’ti gatassa liṅgasampaṭicchanato aññaṃ laddhiggahaṇaṃ nāma atthi. Liṅgasampaṭicchaneneva hi so gahitaladdhiko hoti. Teneva ‘‘vīmaṃsanatthaṃ kusacīrādīni…pe… yāva na sampaṭicchati, tāva taṃ laddhi rakkhati, sampaṭicchitamatte titthiyapakkantako hotī’’ti vuttaṃ. Naggova ājīvakānaṃ upassayaṃ gacchati, padavāre padavāre dukkaṭanti ‘‘ājīvako bhavissa’’nti asuddhacittena gamanapaccayā dukkaṭaṃ vuttaṃ. Naggena hutvā gamanapaccayāpi padavāre dukkaṭā na muccatiyevāti sāratthadīpaniyaṃ (sārattha. ṭī. mahāvagga 3.110) vuttaṃ.

    விமதிவினோத³னியங் (வி॰ வி॰ டீ॰ மஹாவக்³க³ 2.110) பன – தித்தி²யபக்கந்தகாதி³கதா²ஸு தேஸங் லிங்கே³ ஆதி³ன்னமத்தேதி வீமங்ஸாதி³அதி⁴ப்பாயங் வினா ‘‘தித்தி²யோ ப⁴விஸ்ஸாமீ’’தி ஸன்னிட்டா²னவஸேன லிங்கே³ காயேன தா⁴ரிதமத்தே. ஸயமேவாதி தித்தி²யானங் ஸந்திகங் அக³ந்த்வா ஸயமேவ ஸங்கா⁴ராமேபி குஸசீராதீ³னி நிவாஸேதி. ஆஜீவகோ ப⁴விஸ்ஸந்தி…பே॰… க³ச்ச²தீதி ஆஜீவகானங் ஸந்திகே தேஸங் பப்³ப³ஜனவிதி⁴னா ‘‘ஆஜீவகோ ப⁴விஸ்ஸாமீ’’தி க³ச்ச²தி. தஸ்ஸ ஹி தித்தி²யபா⁴வூபக³மனங் பதி ஸன்னிட்டா²னே விஜ்ஜமானேபி ‘‘க³ந்த்வா ப⁴விஸ்ஸாமீ’’தி பரிகப்பிதத்தா பத³வாரே து³க்கடமேவ வுத்தங். து³க்கடந்தி பாளியா அவுத்தேபி மேது²னாதீ³ஸு வுத்தபுப்³ப³பயோக³து³க்கடானுலோமதோ வுத்தங். ஏதேன ச ஸன்னிட்டா²னவஸேன லிங்கே³ ஸம்படிச்சி²தே பாராஜிகங், ததோ புரிமபயோகே³ து²ல்லச்சயஞ்ச வத்தப்³ப³மேவ. து²ல்லச்சயக்க²ணே நிவத்தந்தோபி ஆபத்திங் தே³ஸாபெத்வா முச்சதி ஏவாதி த³ட்ட²ப்³ப³ங். யதா² செத்த², ஏவங் ஸங்க⁴பே⁴தே³பி லோஹிதுப்பாதே³பி பி⁴க்கூ²னங் புப்³ப³பயோகா³தீ³ஸு து³க்கடது²ல்லச்சயபாராஜிகாஹி முச்சனஸீமா ச வேதி³தப்³பா³. ஸாஸனவிருத்³த⁴தாயெத்த² ஆதி³கம்மிகானம்பி அனாபத்தி ந வுத்தா. பப்³ப³ஜ்ஜாயபி அப⁴ப்³ப³தாத³ஸ்ஸனத்த²ங் பனேதே அஞ்ஞே ச பாராஜிககண்டே³ விஸுங் ஸிக்கா²பதே³ன பாராஜிகாதி³ங் அத³ஸ்ஸெத்வா இத⁴ அப⁴ப்³பே³ஸு ஏவ வுத்தாதி வேதி³தப்³ப³ங்.

    Vimativinodaniyaṃ (vi. vi. ṭī. mahāvagga 2.110) pana – titthiyapakkantakādikathāsu tesaṃ liṅge ādinnamatteti vīmaṃsādiadhippāyaṃ vinā ‘‘titthiyo bhavissāmī’’ti sanniṭṭhānavasena liṅge kāyena dhāritamatte. Sayamevāti titthiyānaṃ santikaṃ agantvā sayameva saṅghārāmepi kusacīrādīni nivāseti. Ājīvako bhavissanti…pe… gacchatīti ājīvakānaṃ santike tesaṃ pabbajanavidhinā ‘‘ājīvako bhavissāmī’’ti gacchati. Tassa hi titthiyabhāvūpagamanaṃ pati sanniṭṭhāne vijjamānepi ‘‘gantvā bhavissāmī’’ti parikappitattā padavāre dukkaṭameva vuttaṃ. Dukkaṭanti pāḷiyā avuttepi methunādīsu vuttapubbapayogadukkaṭānulomato vuttaṃ. Etena ca sanniṭṭhānavasena liṅge sampaṭicchite pārājikaṃ, tato purimapayoge thullaccayañca vattabbameva. Thullaccayakkhaṇe nivattantopi āpattiṃ desāpetvā muccati evāti daṭṭhabbaṃ. Yathā cettha, evaṃ saṅghabhedepi lohituppādepi bhikkhūnaṃ pubbapayogādīsu dukkaṭathullaccayapārājikāhi muccanasīmā ca veditabbā. Sāsanaviruddhatāyettha ādikammikānampi anāpatti na vuttā. Pabbajjāyapi abhabbatādassanatthaṃ panete aññe ca pārājikakaṇḍe visuṃ sikkhāpadena pārājikādiṃ adassetvā idha abhabbesu eva vuttāti veditabbaṃ.

    தங் லத்³தீ⁴தி தித்தி²யவேஸே ஸெட்ட²பா⁴வக்³க³ஹணமேவ ஸந்தா⁴ய வுத்தங். தேஸஞ்ஹி தித்தி²யானங் ஸஸ்ஸதாதி³க்³கா³ஹங் க³ண்ஹந்தோபி லிங்கே³ அஸம்படிச்சி²தே தித்தி²யபக்கந்தகோ ந ஹோதி, தங் லத்³தி⁴ங் அக்³க³ஹெத்வாபி ‘‘ஏதேஸங் வதசரியா ஸுந்த³ரா’’தி லிங்க³ங் ஸம்படிச்ச²ந்தோ தித்தி²யபக்கந்தகோ ஹோதி ஏவ. லத்³தி⁴யா அபா⁴வேனாதி பி⁴க்கு²பா⁴வே ஸாலயதாய தித்தி²யபா⁴வூபக³மனலத்³தி⁴யா அபா⁴வேன. ஏதேன ச ஆபதா³ஸு குஸசீராதி³ங் பாருபந்தஸ்ஸபி நக்³க³ஸ்ஸ விய அனாபத்தீதி த³ஸ்ஸேதி. உபஸம்பன்னபி⁴க்கு²னா கதி²தோதி எத்த² ஸங்க⁴பே⁴த³கோபி உபஸம்பன்னபி⁴க்கு²னாவ கதி²தோ, மாதுகா⁴தகாத³யோ பன அனுபஸம்பன்னேனாதிபி த³ட்ட²ப்³ப³ந்தி ஆக³தங்.

    Taṃ laddhīti titthiyavese seṭṭhabhāvaggahaṇameva sandhāya vuttaṃ. Tesañhi titthiyānaṃ sassatādiggāhaṃ gaṇhantopi liṅge asampaṭicchite titthiyapakkantako na hoti, taṃ laddhiṃ aggahetvāpi ‘‘etesaṃ vatacariyā sundarā’’ti liṅgaṃ sampaṭicchanto titthiyapakkantako hoti eva. Laddhiyā abhāvenāti bhikkhubhāve sālayatāya titthiyabhāvūpagamanaladdhiyā abhāvena. Etena ca āpadāsu kusacīrādiṃ pārupantassapi naggassa viya anāpattīti dasseti. Upasampannabhikkhunā kathitoti ettha saṅghabhedakopi upasampannabhikkhunāva kathito, mātughātakādayo pana anupasampannenātipi daṭṭhabbanti āgataṃ.

    140. திரச்சா²னகதா²யங் ‘‘யோ கோசி அமனுஸ்ஸஜாதியோ, ஸப்³போ³வ இமஸ்மிங் அத்தே² திரச்சா²னக³தோதி வேதி³தப்³போ³’’தி ஏதேன ஏஸோ மனுஸ்ஸஜாதியோ ஏவ ப⁴க³வதோ ஸாஸனே பப்³ப³ஜிதுங் வா உபஸம்பஜ்ஜிதுங் வா லப⁴தி, ந ததோ அஞ்ஞேதி தீ³பேதி. தேனாஹ ப⁴க³வா ‘‘தும்ஹே கொ²த்த² நாகா³ அவிருள்ஹித⁴ம்மா இமஸ்மிங் த⁴ம்மவினயே’’தி (மஹாவ॰ 111).

    140. Tiracchānakathāyaṃ ‘‘yo koci amanussajātiyo, sabbova imasmiṃ atthe tiracchānagatoti veditabbo’’ti etena eso manussajātiyo eva bhagavato sāsane pabbajituṃ vā upasampajjituṃ vā labhati, na tato aññeti dīpeti. Tenāha bhagavā ‘‘tumhe khottha nāgā aviruḷhidhammā imasmiṃ dhammavinaye’’ti (mahāva. 111).

    141. ஆனந்தரியகதா²யங் திரச்சா²னாதி³அமனுஸ்ஸஜாதிதோ மனுஸ்ஸஜாதிகானஞ்ஞேவ புத்தேஸு மெத்தாத³யோபி திக்க²விஸதா³ ஹொந்தி லோகுத்தரகு³ணா வியாதி ஆஹ ‘‘மனுஸ்ஸித்தி²பூ⁴தா ஜனிகா மாதா’’தி. யதா² மனுஸ்ஸானஞ்ஞேவ குஸலபவத்தி திக்க²விஸதா³, ஏவங் அகுஸலபவத்திபீதி ஆஹ ‘‘ஸயம்பி மனுஸ்ஸஜாதிகேனேவா’’திஆதி³. அத² வா யதா² ஸமானஜாதியஸ்ஸ விகோபனே கம்மங் க³ருதரங், ந ததா² விஜாதியஸ்ஸாதி ஆஹ ‘‘மனுஸ்ஸித்தி²பூ⁴தா’’தி. புத்தஸம்ப³ந்தே⁴ன மாதுபிதுஸமஞ்ஞா , த³த்தகித்திமாதி³வஸேனபி புத்தவோஹாரோ லோகே தி³ஸ்ஸதி, ஸோ ச கோ² பரியாயதோதி நிப்பரியாயஸித்³த⁴தங் த³ஸ்ஸேதுங் ‘‘ஜனிகா மாதா’’தி வுத்தங். யதா² மனுஸ்ஸத்தபா⁴வே டி²தஸ்ஸேவ குஸலத⁴ம்மானங் திக்க²விஸத³ஸூரபா⁴வாபத்தி யதா² தங் திண்ணம்பி போ³தி⁴ஸத்தானங் போ³தி⁴த்தயனிப்³ப³த்தியங், ஏவங் மனுஸ்ஸத்தபா⁴வே டி²தஸ்ஸேவ அகுஸலத⁴ம்மானம்பி திக்க²விஸத³ஸூரபா⁴வாபத்தீதி ஆஹ ‘‘ஸயம்பி மனுஸ்ஸஜாதிகேனேவா’’தி. ஆனந்தரியேனாதி எத்த² சுதிஅனந்தரங் நிரயே படிஸந்தி⁴ப²லங் அனந்தரங் நாம, தஸ்மிங் அனந்தரே ஜனகத்தேன நியுத்தங் ஆனந்தரியங், தேன. அத² வா சுதிஅனந்தரங் ப²லங் அனந்தரங் நாம, தஸ்மிங் அனந்தரே நியுத்தங், தன்னிப்³ப³த்தனேன அனந்தரகரணஸீலங், அனந்தரப்பயோஜனங் வா ஆனந்தரியங், தேன ஆனந்தரியேன மாதுகா⁴தககம்மேன. பிதுகா⁴தகேபி ‘‘யேன மனுஸ்ஸபூ⁴தோ ஜனகோ பிதா ஸயம்பி மனுஸ்ஸஜாதிகேனேவ ஸதா ஸஞ்சிச்ச ஜீவிதா வோரோபிதோ, அயங் ஆனந்தரியேன பிதுகா⁴தககம்மேன பிதுகா⁴தகோ’’திஆதி³னா ஸப்³ப³ங் வேதி³தப்³ப³ந்தி ஆஹ ‘‘பிதுகா⁴தகேபி ஏஸேவ நயோ’’தி.

    141. Ānantariyakathāyaṃ tiracchānādiamanussajātito manussajātikānaññeva puttesu mettādayopi tikkhavisadā honti lokuttaraguṇā viyāti āha ‘‘manussitthibhūtā janikā mātā’’ti. Yathā manussānaññeva kusalapavatti tikkhavisadā, evaṃ akusalapavattipīti āha ‘‘sayampimanussajātikenevā’’tiādi. Atha vā yathā samānajātiyassa vikopane kammaṃ garutaraṃ, na tathā vijātiyassāti āha ‘‘manussitthibhūtā’’ti. Puttasambandhena mātupitusamaññā , dattakittimādivasenapi puttavohāro loke dissati, so ca kho pariyāyatoti nippariyāyasiddhataṃ dassetuṃ ‘‘janikā mātā’’ti vuttaṃ. Yathā manussattabhāve ṭhitasseva kusaladhammānaṃ tikkhavisadasūrabhāvāpatti yathā taṃ tiṇṇampi bodhisattānaṃ bodhittayanibbattiyaṃ, evaṃ manussattabhāve ṭhitasseva akusaladhammānampi tikkhavisadasūrabhāvāpattīti āha ‘‘sayampi manussajātikenevā’’ti. Ānantariyenāti ettha cutianantaraṃ niraye paṭisandhiphalaṃ anantaraṃ nāma, tasmiṃ anantare janakattena niyuttaṃ ānantariyaṃ, tena. Atha vā cutianantaraṃ phalaṃ anantaraṃ nāma, tasmiṃ anantare niyuttaṃ, tannibbattanena anantarakaraṇasīlaṃ, anantarappayojanaṃ vā ānantariyaṃ, tena ānantariyena mātughātakakammena. Pitughātakepi ‘‘yena manussabhūto janako pitā sayampi manussajātikeneva satā sañcicca jīvitā voropito, ayaṃ ānantariyena pitughātakakammena pitughātako’’tiādinā sabbaṃ veditabbanti āha ‘‘pitughātakepi eseva nayo’’ti.

    பரிவத்திதலிங்க³ம்பி மாதரங் வா பிதரங் வா ஜீவிதா வோரோபெந்தஸ்ஸ ஆனந்தரியகம்மங் ஹோதியேவ. ஸதிபி ஹி லிங்க³பரிவத்தே ஸோ ஏவ ஏககம்மனிப்³ப³த்தோ ப⁴வங்க³ப்பப³ந்தோ⁴ ஜீவிதப்பப³ந்தோ⁴, ந அஞ்ஞோதி. யோ பன ஸயங் மனுஸ்ஸோ திரச்சா²னபூ⁴தங் பிதரங் வா மாதரங் வா, ஸயங் வா திரச்சா²னபூ⁴தோ மனுஸ்ஸபூ⁴தங், திரச்சா²னோயேவ வா திரச்சா²னபூ⁴தங் ஜீவிதா வோரோபேதி, தஸ்ஸ கம்மங் ஆனந்தரியங் ந ஹோதி, பா⁴ரியங் பன ஹோதி, ஆனந்தரியங் ஆஹச்சேவ திட்ட²தி. ஏளகசதுக்கங் ஸங்கா³மசதுக்கங் சோரசதுக்கஞ்செத்த² கதே²தப்³ப³ங். ‘‘ஏளகங் மாரேமீ’’தி அபி⁴ஸந்தி⁴னாபி ஹி ஏளகட்டா²னே டி²தங் மனுஸ்ஸோ மனுஸ்ஸபூ⁴தங் மாதரங் வா பிதரங் வா மாரெந்தோ ஆனந்தரியங் பு²ஸதி மரணாதி⁴ப்பாயேனேவ ஆனந்தரியவத்து²னோ விகோபிதத்தா. ஏளகாபி⁴ஸந்தி⁴னா, பன மாதாபிதிஅபி⁴ஸந்தி⁴னா வா ஏளகங் மாரெந்தோ ஆனந்தரியங் ந பு²ஸதி ஆனந்தரியவத்து²னோ அபா⁴வதோ. மாதாபிதிஅபி⁴ஸந்தி⁴னா மாதாபிதரோ மாரெந்தோ பு²ஸ்ஸதேவ. ஏஸ நயோ இதரஸ்மிம்பி சதுக்கத்³வயே. யதா² ச மாதாபிதூஸு, ஏவங் அரஹந்தேஸு ஏதானி சதுக்கானி வேதி³தப்³பா³னி. ஸப்³ப³த்த² ஹி புரிமங் அபி⁴ஸந்தி⁴சித்தங் அப்பமாணங், வத⁴கசித்தங், பன ததா³ரம்மணஜீவிதிந்த்³ரியஞ்ச பமாணங். கதானந்தரியகம்மோ ச ‘‘தஸ்ஸ கம்மஸ்ஸ விபாகங் படிபா³ஹெஸ்ஸாமீ’’தி ஸகலசக்கவாளங் மஹாசேதியப்பமாணேஹி கஞ்சனதூ²பேஹி பூரெத்வாபி ஸகலசக்கவாளங் பூரெத்வா நிஸின்னஸ்ஸ பி⁴க்கு²ஸங்க⁴ஸ்ஸ மஹாதா³னங் த³த்வாபி பு³த்³த⁴ஸ்ஸ ப⁴க³வதோ ஸங்கா⁴டிகண்ணங் அமுஞ்சந்தோ விசரித்வாபி காயஸ்ஸ பே⁴தா³ நிரயமேவ உபபஜ்ஜதி, பப்³ப³ஜ்ஜஞ்ச ந லப⁴தி. பிதுகா⁴தகே வேஸியா புத்தோதி உபலக்க²ணமத்தங், குலித்தி²யா அதிசாரினியா புத்தோபி அத்தனோ பிதரங் அஜானித்வா கா⁴ந்தெந்தோபி பிதுகா⁴தகோவ ஹோதி.

    Parivattitaliṅgampi mātaraṃ vā pitaraṃ vā jīvitā voropentassa ānantariyakammaṃ hotiyeva. Satipi hi liṅgaparivatte so eva ekakammanibbatto bhavaṅgappabandho jīvitappabandho, na aññoti. Yo pana sayaṃ manusso tiracchānabhūtaṃ pitaraṃ vā mātaraṃ vā, sayaṃ vā tiracchānabhūto manussabhūtaṃ, tiracchānoyeva vā tiracchānabhūtaṃ jīvitā voropeti, tassa kammaṃ ānantariyaṃ na hoti, bhāriyaṃ pana hoti, ānantariyaṃ āhacceva tiṭṭhati. Eḷakacatukkaṃ saṅgāmacatukkaṃ coracatukkañcettha kathetabbaṃ. ‘‘Eḷakaṃ māremī’’ti abhisandhināpi hi eḷakaṭṭhāne ṭhitaṃ manusso manussabhūtaṃ mātaraṃ vā pitaraṃ vā mārento ānantariyaṃ phusati maraṇādhippāyeneva ānantariyavatthuno vikopitattā. Eḷakābhisandhinā, pana mātāpitiabhisandhinā vā eḷakaṃ mārento ānantariyaṃ na phusati ānantariyavatthuno abhāvato. Mātāpitiabhisandhinā mātāpitaro mārento phussateva. Esa nayo itarasmimpi catukkadvaye. Yathā ca mātāpitūsu, evaṃ arahantesu etāni catukkāni veditabbāni. Sabbattha hi purimaṃ abhisandhicittaṃ appamāṇaṃ, vadhakacittaṃ, pana tadārammaṇajīvitindriyañca pamāṇaṃ. Katānantariyakammo ca ‘‘tassa kammassa vipākaṃ paṭibāhessāmī’’ti sakalacakkavāḷaṃ mahācetiyappamāṇehi kañcanathūpehi pūretvāpi sakalacakkavāḷaṃ pūretvā nisinnassa bhikkhusaṅghassa mahādānaṃ datvāpi buddhassa bhagavato saṅghāṭikaṇṇaṃ amuñcanto vicaritvāpi kāyassa bhedā nirayameva upapajjati, pabbajjañca na labhati. Pitughātake vesiyā puttoti upalakkhaṇamattaṃ, kulitthiyā aticāriniyā puttopi attano pitaraṃ ajānitvā ghāntentopi pitughātakova hoti.

    அரஹந்தகா⁴தககம்மே அவஸேஸந்தி அனாகா³மிஆதி³கங். அயமெத்த² ஸங்கே²போ, வித்தா²ரோ பன ததியபாராஜிகவண்ணனாதோ க³ஹேதப்³போ³.

    Arahantaghātakakamme avasesanti anāgāmiādikaṃ. Ayamettha saṅkhepo, vitthāro pana tatiyapārājikavaṇṇanāto gahetabbo.

    ‘‘து³ட்ட²சித்தேனா’’தி வுத்தமேவத்த²ங் விபா⁴வேதி ‘‘வத⁴கசித்தேனா’’தி. வத⁴கசேதனாய ஹி தூ³ஸிதங் சித்தங் இத⁴ து³ட்ட²சித்தங் நாம. லோஹிதங் உப்பாதே³தீதி எத்த² ததா²க³தஸ்ஸ அபே⁴ஜ்ஜகாயதாய பரூபக்கமேன சம்மச்சே²த³ங் கத்வா லோஹிதபக்³க⁴ரணங் நாம நத்தி², ஸரீரஸ்ஸ பன அந்தோயேவ ஏகஸ்மிங் டா²னே லோஹிதங் ஸமோஸரதி, ஆகா⁴தேன பகுப்பமானங் ஸஞ்சிதங் ஹோதி. தே³வத³த்தேன பவித்³த⁴ஸிலதோ பி⁴ஜ்ஜித்வா க³தா ஸக்க²லிகாபி ததா²க³தஸ்ஸ பாத³ந்தங் பஹரி, ப²ரஸுனா பஹடோ விய பாதோ³ அந்தோலோஹிதோயேவ அஹோஸி. ஜீவகோ பன ததா²க³தஸ்ஸ ருசியா ஸத்த²கேன சம்மங் சி²ந்தி³த்வா தம்ஹா டா²னா து³ட்ட²லோஹிதங் நீஹரித்வா பா²ஸுமகாஸி, தேனஸ்ஸ புஞ்ஞகம்மமேவ அஹோஸி. தேனாஹ ‘‘ஜீவகோ வியா’’திஆதி³.

    ‘‘Duṭṭhacittenā’’ti vuttamevatthaṃ vibhāveti ‘‘vadhakacittenā’’ti. Vadhakacetanāya hi dūsitaṃ cittaṃ idha duṭṭhacittaṃ nāma. Lohitaṃ uppādetīti ettha tathāgatassa abhejjakāyatāya parūpakkamena cammacchedaṃ katvā lohitapaggharaṇaṃ nāma natthi, sarīrassa pana antoyeva ekasmiṃ ṭhāne lohitaṃ samosarati, āghātena pakuppamānaṃ sañcitaṃ hoti. Devadattena paviddhasilato bhijjitvā gatā sakkhalikāpi tathāgatassa pādantaṃ pahari, pharasunā pahaṭo viya pādo antolohitoyeva ahosi. Jīvako pana tathāgatassa ruciyā satthakena cammaṃ chinditvā tamhā ṭhānā duṭṭhalohitaṃ nīharitvā phāsumakāsi, tenassa puññakammameva ahosi. Tenāha ‘‘jīvako viyā’’tiādi.

    அத² யே பரினிப்³பு³தே ததா²க³தே சேதியங் பி⁴ந்த³ந்தி, போ³தி⁴ங் சி²ந்த³ந்தி, தா⁴தும்ஹி உபக்கமந்தி, தேஸங் கிங் ஹோதீதி? பா⁴ரியங் கம்மங் ஹோதி ஆனந்தரியஸதி³ஸங். ஸதா⁴துகங் பன தூ²பங் வா படிமங் வா பா³த⁴மானங் போ³தி⁴ஸாக²ங் சி²ந்தி³துங் வட்டதி. ஸசேபி தத்த² நிலீனா ஸகுணா சேதியே வச்சங் பாதெந்தி, சி²ந்தி³துங் வட்டதியேவ. பரிபோ⁴க³சேதியதோ ஹி ஸரீரசேதியங் க³ருதரங். சேதியவத்து²ங் பி⁴ந்தி³த்வா க³ச்ச²ந்தே போ³தி⁴மூலேபி சி²ந்தி³த்வா ஹரிதுங் வட்டதி. யா பன போ³தி⁴ஸாகா² போ³தி⁴க⁴ரங் பா³த⁴தி, தங் கே³ஹரக்க²ணத்த²ங் சி²ந்தி³துங் ந லப⁴தி. போ³தி⁴அத்தா²ய ஹி கே³ஹங், ந கே³ஹத்தா²ய போ³தி⁴. ஆஸனக⁴ரேபி ஏஸேவ நயோ. யஸ்மிங் பன ஆஸனக⁴ரே தா⁴து நிஹிதா ஹோதி, தஸ்ஸ ரக்க²ணத்தா²ய தங் ஸாக²ங் சி²ந்தி³துங் வட்டதி. போ³தி⁴ஜக்³க³னத்த²ங் ஓஜோஹரணஸாக²ங் வா பூதிட்டா²னங் வா சி²ந்தி³துங் வட்டதியேவ, ஸத்து² ரூபகாயபடிஜக்³க³னே விய புஞ்ஞம்பி ஹோதி.

    Atha ye parinibbute tathāgate cetiyaṃ bhindanti, bodhiṃ chindanti, dhātumhi upakkamanti, tesaṃ kiṃ hotīti? Bhāriyaṃ kammaṃ hoti ānantariyasadisaṃ. Sadhātukaṃ pana thūpaṃ vā paṭimaṃ vā bādhamānaṃ bodhisākhaṃ chindituṃ vaṭṭati. Sacepi tattha nilīnā sakuṇā cetiye vaccaṃ pātenti, chindituṃ vaṭṭatiyeva. Paribhogacetiyato hi sarīracetiyaṃ garutaraṃ. Cetiyavatthuṃ bhinditvā gacchante bodhimūlepi chinditvā harituṃ vaṭṭati. Yā pana bodhisākhā bodhigharaṃ bādhati, taṃ geharakkhaṇatthaṃ chindituṃ na labhati. Bodhiatthāya hi gehaṃ, na gehatthāya bodhi. Āsanagharepi eseva nayo. Yasmiṃ pana āsanaghare dhātu nihitā hoti, tassa rakkhaṇatthāya taṃ sākhaṃ chindituṃ vaṭṭati. Bodhijagganatthaṃ ojoharaṇasākhaṃ vā pūtiṭṭhānaṃ vā chindituṃ vaṭṭatiyeva, satthu rūpakāyapaṭijaggane viya puññampi hoti.

    ஸங்க⁴பே⁴தே³ சதுன்னங் கம்மானந்தி அபலோகனாதீ³னங் சதுன்னங் கம்மானங். அயங் ஸங்க⁴பே⁴த³கோதி பகதத்தங் பி⁴க்கு²ங் ஸந்தா⁴ய வுத்தங். புப்³பே³ ஏவ பாராஜிகங் ஸமாபன்னோ வா வத்தா²தி³தோ³ஸேன விபன்னுபஸம்பதோ³ வா ஸங்க⁴ங் பி⁴ந்த³ந்தோபி ஆனந்தரியங் ந பு²ஸதி, ஸங்கோ⁴ பன பி⁴ன்னோவ ஹோதி, பப்³ப³ஜ்ஜா சஸ்ஸ ந வாரிதாதி த³ட்ட²ப்³ப³ங்.

    Saṅghabhede catunnaṃ kammānanti apalokanādīnaṃ catunnaṃ kammānaṃ. Ayaṃ saṅghabhedakoti pakatattaṃ bhikkhuṃ sandhāya vuttaṃ. Pubbe eva pārājikaṃ samāpanno vā vatthādidosena vipannupasampado vā saṅghaṃ bhindantopi ānantariyaṃ na phusati, saṅgho pana bhinnova hoti, pabbajjā cassa na vāritāti daṭṭhabbaṃ.

    பி⁴க்கு²னீதூ³ஸனே இச்ச²மானந்தி ஓதா³தவத்த²வஸனங் இச்ச²மானங். தேனேவாஹ ‘‘கி³ஹிபா⁴வே ஸம்படிச்சி²தமத்தேயேவா’’தி. நேவ பப்³ப³ஜ்ஜா அத்தீ²தி யோஜனா. யோ ச படிக்கி²த்தே அப⁴ப்³பே³ ச புக்³க³லே ஞத்வா பப்³பா³ஜேதி, உபஸம்பாதே³தி வா, து³க்கடங். அஜானந்தஸ்ஸ ஸப்³ப³த்த² அனாபத்தீதி வேதி³தப்³ப³ங்.

    Bhikkhunīdūsane icchamānanti odātavatthavasanaṃ icchamānaṃ. Tenevāha ‘‘gihibhāve sampaṭicchitamatteyevā’’ti. Neva pabbajjā atthīti yojanā. Yo ca paṭikkhitte abhabbe ca puggale ñatvā pabbājeti, upasampādeti vā, dukkaṭaṃ. Ajānantassa sabbattha anāpattīti veditabbaṃ.

    142. க³ப்³ப⁴மாஸேஹி ஸத்³தி⁴ங் வீஸதி வஸ்ஸானி அஸ்ஸாதி க³ப்³ப⁴வீஸோ. ஹாயனவட்³ட⁴னந்தி க³ப்³ப⁴மாஸேஸு அதி⁴கேஸு உத்தரி ஹாயனங், ஊனேஸு வட்³ட⁴னந்தி வேதி³தப்³ப³ங். ஏகூனவீஸதிவஸ்ஸந்தி த்³வாத³ஸ மாஸே மாதுகுச்சி²ஸ்மிங் வஸித்வா மஹாபவாரணாய ஜாதகாலதோ பட்டா²ய ஏகூனவீஸதிவஸ்ஸங். பாடிபத³தி³வஸேதி பச்சி²மிகாய வஸ்ஸூபக³மனதி³வஸே. ‘‘திங்ஸரத்திதி³வோ மாஸோ’’தி (அ॰ நி॰ 3.71; 8.43; விப⁴॰ 1023) வசனதோ ‘‘சத்தாரோ மாஸா பரிஹாயந்தீ’’தி வுத்தங். வஸ்ஸங் உக்கட்³ட⁴ந்தீதி வஸ்ஸங் உத்³த⁴ங் கட்³ட⁴ந்தி, ததியஸங்வச்ச²ரே ஏகமாஸஸ்ஸ அதி⁴கத்தா மாஸபரிச்சஜனவஸேன வஸ்ஸங் உத்³த⁴ங் கட்³ட⁴ந்தீதி அத்தோ², தஸ்மா ததியோ ஸங்வச்ச²ரோ தேரஸமாஸிகோ ஹோதி. ஸங்வச்ச²ரஸ்ஸ பன த்³வாத³ஸமாஸிகத்தா அட்டா²ரஸஸு வஸ்ஸேஸு அதி⁴கமாஸே விஸுங் க³ஹெத்வா ‘‘ச² மாஸா வட்³ட⁴ந்தீ’’தி வுத்தங். ததோதி ச²மாஸதோ. நிக்கங்கா² ஹுத்வாதி அதி⁴கமாஸேஹி ஸத்³தி⁴ங் பரிபுண்ணவீஸதிவஸ்ஸத்தா நிப்³பே³மதிகா ஹுத்வா. யங் பன வுத்தங் தீஸுபி க³ண்டி²பதே³ஸு ‘‘அட்டா²ரஸன்னங்யேவ வஸ்ஸானங் அதி⁴கமாஸே க³ஹெத்வா க³ணிதத்தா ஸேஸவஸ்ஸத்³வயஸ்ஸபி அதி⁴கதி³வஸானி ஹொந்தி, தானி அதி⁴கதி³வஸானி ஸந்தா⁴ய ‘நிக்கங்கா² ஹுத்வா’தி வுத்த’’ந்தி, தங் ந க³ஹேதப்³ப³ங். ந ஹி த்³வீஸு வஸ்ஸேஸு அதி⁴கதி³வஸானி நாம விஸுங் உபலப்³ப⁴ந்தி ததியே வஸ்ஸே வஸ்ஸுக்கட்³ட⁴னவஸேன அதி⁴கமாஸே பரிச்சத்தேயேவ அதிரேகமாஸஸம்ப⁴வதோ, தஸ்மா த்³வீஸு வஸ்ஸேஸு அதிரேகதி³வஸானி விஸுங் ந ஸம்ப⁴வந்தி.

    142. Gabbhamāsehi saddhiṃ vīsati vassāni assāti gabbhavīso. Hāyanavaḍḍhananti gabbhamāsesu adhikesu uttari hāyanaṃ, ūnesu vaḍḍhananti veditabbaṃ. Ekūnavīsativassanti dvādasa māse mātukucchismiṃ vasitvā mahāpavāraṇāya jātakālato paṭṭhāya ekūnavīsativassaṃ. Pāṭipadadivaseti pacchimikāya vassūpagamanadivase. ‘‘Tiṃsarattidivo māso’’ti (a. ni. 3.71; 8.43; vibha. 1023) vacanato ‘‘cattāro māsā parihāyantī’’ti vuttaṃ. Vassaṃ ukkaḍḍhantīti vassaṃ uddhaṃ kaḍḍhanti, tatiyasaṃvacchare ekamāsassa adhikattā māsapariccajanavasena vassaṃ uddhaṃ kaḍḍhantīti attho, tasmā tatiyo saṃvaccharo terasamāsiko hoti. Saṃvaccharassa pana dvādasamāsikattā aṭṭhārasasu vassesu adhikamāse visuṃ gahetvā ‘‘cha māsā vaḍḍhantī’’ti vuttaṃ. Tatoti chamāsato. Nikkaṅkhā hutvāti adhikamāsehi saddhiṃ paripuṇṇavīsativassattā nibbematikā hutvā. Yaṃ pana vuttaṃ tīsupi gaṇṭhipadesu ‘‘aṭṭhārasannaṃyeva vassānaṃ adhikamāse gahetvā gaṇitattā sesavassadvayassapi adhikadivasāni honti, tāni adhikadivasāni sandhāya ‘nikkaṅkhā hutvā’ti vutta’’nti, taṃ na gahetabbaṃ. Na hi dvīsu vassesu adhikadivasāni nāma visuṃ upalabbhanti tatiye vasse vassukkaḍḍhanavasena adhikamāse pariccatteyeva atirekamāsasambhavato, tasmā dvīsu vassesu atirekadivasāni visuṃ na sambhavanti.

    ‘‘தே த்³வே மாஸே க³ஹெத்வா வீஸதி வஸ்ஸானி பரிபுண்ணானி ஹொந்தீ’’தி கஸ்மா வுத்தங், ஏகூனவீஸதிவஸ்ஸம்ஹி ச புன அபரஸ்மிங் வஸ்ஸே பக்கி²த்தே வீஸதி வஸ்ஸானி பரிபுண்ணானி ஹொந்தீதி ஆஹ ‘‘எத்த² பன…பே॰… வுத்த’’ந்தி. அனேகத்த²த்தா நிபாதானங் பன-ஸத்³தோ³ ஹிஸத்³த³த்தோ², எத்த² ஹீதி வுத்தங் ஹோதி. இத³ஞ்ஹி வுத்தஸ்ஸேவத்த²ஸ்ஸ ஸமத்த²னவஸேன வுத்தங். இமினா ச இமங் தீ³பேதி – யங் வுத்தங் ‘‘ஏகூனவீஸதிவஸ்ஸங் ஸாமணேரங் நிக்க²மனீயபுண்ணமாஸிங் அதிக்கம்ம பாடிபத³தி³வஸே உபஸம்பாதெ³ந்தீ’’தி, தத்த² க³ப்³ப⁴மாஸேபி க³ஹெத்வா த்³வீஹி மாஸேஹி அபரிபுண்ணவீஸதிவஸ்ஸங் ஸந்தா⁴ய ‘‘ஏகூனவீஸதிவஸ்ஸ’’ந்தி வுத்தங், தஸ்மா அதி⁴கமாஸேஸு த்³வீஸு க³ஹிதேஸு ஏவ வீஸதி வஸ்ஸானி பரிபுண்ணானி நாம ஹொந்தீதி. தஸ்மாதி யஸ்மா க³ப்³ப⁴மாஸாபி க³ணனூபகா³ ஹொந்தி, தஸ்மா. ஏகவீஸதிவஸ்ஸோ ஹோதீதி ஜாததி³வஸதோ பட்டா²ய வீஸதிவஸ்ஸோ ஸமானோ க³ப்³ப⁴மாஸேஹி ஸத்³தி⁴ங் ஏகவீஸதிவஸ்ஸோ ஹோதி. அஞ்ஞங் உபஸம்பாதே³தீதி உபஜ்ஜா²யோ, கம்மவாசாசரியோ வா ஹுத்வா உபஸம்பாதே³தீதி ஸாரத்த²தீ³பனியங் (ஸாரத்த²॰ டீ॰ பாசித்திய 3.406) ஆக³தங்.

    ‘‘Te dve māse gahetvā vīsati vassāni paripuṇṇāni hontī’’ti kasmā vuttaṃ, ekūnavīsativassamhi ca puna aparasmiṃ vasse pakkhitte vīsati vassāni paripuṇṇāni hontīti āha ‘‘ettha pana…pe… vutta’’nti. Anekatthattā nipātānaṃ pana-saddo hisaddattho, ettha hīti vuttaṃ hoti. Idañhi vuttassevatthassa samatthanavasena vuttaṃ. Iminā ca imaṃ dīpeti – yaṃ vuttaṃ ‘‘ekūnavīsativassaṃ sāmaṇeraṃ nikkhamanīyapuṇṇamāsiṃ atikkamma pāṭipadadivase upasampādentī’’ti, tattha gabbhamāsepi gahetvā dvīhi māsehi aparipuṇṇavīsativassaṃ sandhāya ‘‘ekūnavīsativassa’’nti vuttaṃ, tasmā adhikamāsesu dvīsu gahitesu eva vīsati vassāni paripuṇṇāni nāma hontīti. Tasmāti yasmā gabbhamāsāpi gaṇanūpagā honti, tasmā. Ekavīsativasso hotīti jātadivasato paṭṭhāya vīsativasso samāno gabbhamāsehi saddhiṃ ekavīsativasso hoti. Aññaṃ upasampādetīti upajjhāyo, kammavācācariyo vā hutvā upasampādetīti sāratthadīpaniyaṃ (sārattha. ṭī. pācittiya 3.406) āgataṃ.

    க³ப்³பே⁴ ஸயிதகாலேன ஸத்³தி⁴ங் வீஸதிமங் வஸ்ஸங் பரிபுண்ணமஸ்ஸாதி க³ப்³ப⁴வீஸோ. நிக்க²மனீயபுண்ணமாஸீதி ஸாவணமாஸஸ்ஸ புண்ணமியா ஆஸாள்ஹீபுண்ணமியா அனந்தரபுண்ணமீ. பாடிபத³தி³வஸேதி பச்சி²மிகாய வஸ்ஸூபனாயிகாய, த்³வாத³ஸ மாஸே மாதுகுச்சி²ஸ்மிங் வஸித்வா மஹாபவாரணாய ஜாதங் உபஸம்பாதெ³ந்தீதி அத்தோ². ‘‘திங்ஸரத்திதி³வோ மாஸோ, த்³வாத³ஸமாஸிகோ ஸங்வச்ச²ரோ’’தி வசனதோ ‘‘சத்தாரோ மாஸா பரிஹாயந்தீ’’தி வுத்தங். வஸ்ஸங் உக்கட்³ட⁴ந்தீதி வஸ்ஸங் உத்³த⁴ங் கட்³ட⁴ந்தி, ‘‘ஏகமாஸங் அதி⁴கமாஸோ’’தி ச²ட்³டெ³த்வா வஸ்ஸங் உபக³ச்ச²ந்தீதி அத்தோ², தஸ்மா ததியோ ததியோ ஸங்வச்ச²ரோ தேரஸமாஸிகோ ஹோதி. தே த்³வே மாஸே க³ஹெத்வாதி நிக்க²மனீயபுண்ணமாஸதோ யாவ ஜாததி³வஸபூ⁴தா மஹாபவாரணா, தாவ யே த்³வே மாஸா அனாக³தா, தேஸங் அத்தா²ய அதி⁴கமாஸதோ லத்³தே⁴ த்³வே மாஸே க³ஹெத்வா. தேனாஹ ‘‘யோ பவாரெத்வா வீஸதிவஸ்ஸோ ப⁴விஸ்ஸதீ’’திஆதி³. ‘‘நிக்கங்கா² ஹுத்வா’’தி இத³ங் அட்டா²ரஸன்னங் வஸ்ஸானங் ஏவ அதி⁴கமாஸே க³ஹெத்வா ததோ வீஸதியா வஸ்ஸேஸுபி சாதுத்³த³ஸீனங் அத்தா²ய சதுன்னங் மாஸானங் பரிஹாபனேன ஸப்³ப³தா² பரிபுண்ணவீஸதிவஸ்ஸதங் ஸந்தா⁴ய வுத்தங்.

    Gabbhe sayitakālena saddhiṃ vīsatimaṃ vassaṃ paripuṇṇamassāti gabbhavīso. Nikkhamanīyapuṇṇamāsīti sāvaṇamāsassa puṇṇamiyā āsāḷhīpuṇṇamiyā anantarapuṇṇamī. Pāṭipadadivaseti pacchimikāya vassūpanāyikāya, dvādasa māse mātukucchismiṃ vasitvā mahāpavāraṇāya jātaṃ upasampādentīti attho. ‘‘Tiṃsarattidivo māso, dvādasamāsiko saṃvaccharo’’ti vacanato ‘‘cattāro māsā parihāyantī’’ti vuttaṃ. Vassaṃ ukkaḍḍhantīti vassaṃ uddhaṃ kaḍḍhanti, ‘‘ekamāsaṃ adhikamāso’’ti chaḍḍetvā vassaṃ upagacchantīti attho, tasmā tatiyo tatiyo saṃvaccharo terasamāsiko hoti. Te dve māse gahetvāti nikkhamanīyapuṇṇamāsato yāva jātadivasabhūtā mahāpavāraṇā, tāva ye dve māsā anāgatā, tesaṃ atthāya adhikamāsato laddhe dve māse gahetvā. Tenāha ‘‘yo pavāretvā vīsativasso bhavissatī’’tiādi. ‘‘Nikkaṅkhā hutvā’’ti idaṃ aṭṭhārasannaṃ vassānaṃ eva adhikamāse gahetvā tato vīsatiyā vassesupi cātuddasīnaṃ atthāya catunnaṃ māsānaṃ parihāpanena sabbathā paripuṇṇavīsativassataṃ sandhāya vuttaṃ.

    பவாரெத்வா வீஸதிவஸ்ஸோ ப⁴விஸ்ஸதீதி மஹாபவாரணாதி³வஸே அதிக்கந்தே க³ப்³ப⁴வஸ்ஸேன ஸஹ வீஸதிவஸ்ஸோ ப⁴விஸ்ஸதீதி அத்தோ². தஸ்மாதி யஸ்மா க³ப்³ப⁴மாஸாபி க³ணனூபகா³ ஹொந்தி, தஸ்மா. ஏகவீஸதிவஸ்ஸோதி ஜாதியா வீஸதிவஸ்ஸங் ஸந்தா⁴ய வுத்தங். அஞ்ஞங் உபஸம்பாதே³தீதி உபஜ்ஜா²யோ, ஆசரியோ வா ஹுத்வா உபஸம்பாதே³தி. ஸோபீதி உபஸம்பாதெ³ந்தோபி அனுபஸம்பன்னோதி விமதிவினோத³னியங் (வி॰ வி॰ டீ॰ பாசித்திய 2.406) ஆக³தங்.

    Pavāretvā vīsativasso bhavissatīti mahāpavāraṇādivase atikkante gabbhavassena saha vīsativasso bhavissatīti attho. Tasmāti yasmā gabbhamāsāpi gaṇanūpagā honti, tasmā. Ekavīsativassoti jātiyā vīsativassaṃ sandhāya vuttaṃ. Aññaṃ upasampādetīti upajjhāyo, ācariyo vā hutvā upasampādeti. Sopīti upasampādentopi anupasampannoti vimativinodaniyaṃ (vi. vi. ṭī. pācittiya 2.406) āgataṃ.

    எத்த² ஸியா – அட்ட²கதா²டீகாஸு ‘‘அட்டா²ரஸஸு வஸ்ஸேஸு ச² மாஸா வட்³ட⁴ந்தீ’’தி வுத்தங், இதா³னி பன ‘‘ஏகூனவீஸதியா வஸ்ஸேஸு ஸத்த மாஸா அதி⁴கா’’தி வத³ந்தி, கத²மெத்த² விஞ்ஞாதப்³ப³ந்தி? வுச்சதே – அட்ட²கதா²டீகாஸு ஸாஸனவோஹாரேன லோகியக³திங் அனுபக³ம்ம தீஸு தீஸு ஸங்வச்ச²ரேஸு மாஸச²ட்³ட³னங் க³ஹெத்வா ‘‘அட்டா²ரஸஸு வஸ்ஸேஸு ச² மாஸா வட்³ட⁴ந்தீ’’தி வுத்தங், இதா³னி பன வேத³வோஹாரேன சந்த³ஸூரியக³திஸங்கா²தங் திதி²ங் க³ஹெத்வா க³ணெந்தோ ‘‘ஏகூனவீஸதியா வஸ்ஸேஸு ஸத்த மாஸா அதி⁴கா’’தி வத³ந்தீதி, தங் வஸ்ஸூபனாயிககதா²யங் ஆவி ப⁴விஸ்ஸதி.

    Ettha siyā – aṭṭhakathāṭīkāsu ‘‘aṭṭhārasasu vassesu cha māsā vaḍḍhantī’’ti vuttaṃ, idāni pana ‘‘ekūnavīsatiyā vassesu satta māsā adhikā’’ti vadanti, kathamettha viññātabbanti? Vuccate – aṭṭhakathāṭīkāsu sāsanavohārena lokiyagatiṃ anupagamma tīsu tīsu saṃvaccharesu māsachaḍḍanaṃ gahetvā ‘‘aṭṭhārasasu vassesu cha māsā vaḍḍhantī’’ti vuttaṃ, idāni pana vedavohārena candasūriyagatisaṅkhātaṃ tithiṃ gahetvā gaṇento ‘‘ekūnavīsatiyā vassesu satta māsā adhikā’’ti vadantīti, taṃ vassūpanāyikakathāyaṃ āvi bhavissati.

    143. மாதா வா மதா ஹோதீதி ஸம்ப³ந்தோ⁴. ஸோயேவாதி பப்³ப³ஜ்ஜாபெக்கோ² ஏவ.

    143. Mātā vā matā hotīti sambandho. Soyevāti pabbajjāpekkho eva.

    144. ‘‘ஏகஸீமாயஞ்ச அஞ்ஞேபி பி⁴க்கூ² அத்தீ²தி இமினா ஏகஸீமாயங் பி⁴க்கு²ம்ஹி அஸதி ப⁴ண்டு³கம்மாரோசனகிச்சங் நத்தீ²தி த³ஸ்ஸேதி. க²ண்ட³ஸீமாய வா ட²த்வா நதீ³ஸமுத்³தா³தீ³னி வா க³ந்த்வா பப்³பா³ஜேதப்³போ³தி ஏதேன ஸப்³பே³ ஸீமட்ட²கபி⁴க்கூ² ஆபுச்சி²தப்³பா³, அனாபுச்சா² பப்³பா³ஜேதுங் ந வட்டதீதி தீ³பேதி.

    144.‘‘Ekasīmāyañcaaññepi bhikkhū atthīti iminā ekasīmāyaṃ bhikkhumhi asati bhaṇḍukammārocanakiccaṃ natthīti dasseti. Khaṇḍasīmāya vā ṭhatvā nadīsamuddādīni vā gantvā pabbājetabboti etena sabbe sīmaṭṭhakabhikkhū āpucchitabbā, anāpucchā pabbājetuṃ na vaṭṭatīti dīpeti.

    145. அனாமட்ட²பிண்ட³பாதந்தி அக்³க³ஹிதஅக்³க³ங் பிண்ட³பாதங். ஸாமணேரபா⁴க³ஸமகோ ஆமிஸபா⁴கோ³தி எத்த² கிஞ்சாபி ஸாமணேரானங் ஆமிஸபா⁴க³ஸ்ஸ ஸமகமேவ தீ³யமானத்தா விஸுங் ஸாமணேரபா⁴கோ³ நாம நத்தி², ஹெட்டா² க³ச்ச²ந்தங் பன ப⁴த்தங் கதா³சி மந்த³ங் ப⁴வெய்ய, தஸ்மா உபரி அக்³க³ஹெத்வா ஸாமணேரபாளியாவ க³ஹெத்வா தா³தப்³போ³தி அதி⁴ப்பாயோ. நியதபப்³ப³ஜ்ஜஸ்ஸேவ சாயங் பா⁴கோ³ தீ³யதி. தேனேவ ‘‘அபக்கங் பத்த’’ந்திஆதி³ வுத்தங். அஞ்ஞே வா பி⁴க்கூ² தா³துகாமா ஹொந்தீதி ஸம்ப³ந்தோ⁴.

    145.Anāmaṭṭhapiṇḍapātanti aggahitaaggaṃ piṇḍapātaṃ. Sāmaṇerabhāgasamako āmisabhāgoti ettha kiñcāpi sāmaṇerānaṃ āmisabhāgassa samakameva dīyamānattā visuṃ sāmaṇerabhāgo nāma natthi, heṭṭhā gacchantaṃ pana bhattaṃ kadāci mandaṃ bhaveyya, tasmā upari aggahetvā sāmaṇerapāḷiyāva gahetvā dātabboti adhippāyo. Niyatapabbajjasseva cāyaṃ bhāgo dīyati. Teneva ‘‘apakkaṃ patta’’ntiādi vuttaṃ. Aññe vā bhikkhū dātukāmā hontīti sambandho.

    146. ஸயங் பப்³பா³ஜேதப்³போ³தி கேஸச்சே²த³னாதீ³னி ஸயங் கரொந்தேன பப்³பா³ஜேதப்³போ³. கேஸச்சே²த³னங் காஸாயச்சா²த³னங் ஸரணதா³னந்தி ஹி இமானி தீணி கரொந்தோ ‘‘பப்³பா³ஜேதீ’’தி வுச்சதி, தேஸு ஏகங் த்³வே வாபி கரொந்தோ ததா² வோஹரீயதியேவ, தஸ்மா ஏதங் பப்³பா³ஜேஹீதி கேஸச்சே²த³னங் காஸாயச்சா²த³னஞ்ச ஸந்தா⁴ய வுத்தங். உபஜ்ஜா²யங் உத்³தி³ஸ்ஸ பப்³பா³ஜேதீதி எத்தா²பி ஏஸேவ நயோ. க²ண்ட³ஸீமங் நெத்வாதி ப⁴ண்டு³கம்மாரோசனபரிஹரணத்த²ங் வுத்தங். தேன ஸபி⁴க்கு²கே விஹாரே அஞ்ஞம்பி ‘‘ஏதஸ்ஸ கேஸே சி²ந்தா³’’தி வத்துங் ந வட்டதி. பப்³பா³ஜெத்வாதி கேஸச்சே²த³னங் ஸந்தா⁴ய வத³தி. பி⁴க்கு²தோ அஞ்ஞோ பப்³பா³ஜேதுங் ந லப⁴தீதி ஸரணதா³னங் ஸந்தா⁴ய வுத்தங். தேனேவாஹ ‘‘ஸாமணேரோ பனா’’திஆதீ³தி ஸாரத்த²தீ³பனியங் (ஸாரத்த² டீ॰ மஹாவக்³க³ 3.34) ஆக³தங். விமதிவினோத³னியங் (வி॰ வி॰ டீ॰ மஹாவக்³க³ 2.34) பன – ஸயங் பப்³பா³ஜேதப்³போ³தி எத்த² ‘‘கேஸமஸ்ஸுங் ஓஹாரெத்வா’’திஆதி³வசனதோ கேஸச்சே²த³னகாஸாயச்சா²த³னஸரணதா³னானி பப்³ப³ஜனங் நாம, தேஸு பச்சி²மத்³வயங் பி⁴க்கூ²ஹி ஏவ காதப்³ப³ங், காரேதப்³ப³ங் வா. பப்³பா³ஜேஹீதி இத³ங் திவித⁴ம்பி ஸந்தா⁴ய வுத்தங். க²ண்ட³ஸீமங் நெத்வாதி ப⁴ண்டு³கம்மாரோசனபரிஹரணத்த²ங். பி⁴க்கூ²னஞ்ஹி அனாரோசெத்வா ஏகஸீமாய ‘‘ஏதஸ்ஸ கேஸே சி²ந்தா³’’தி அஞ்ஞங் ஆணாபேதும்பி ந வட்டதி. பப்³பா³ஜெத்வாதி கேஸாதி³ச்சே²த³னமேவ ஸந்தா⁴ய வுத்தங் ‘‘காஸாயானி அச்சா²தெ³த்வா’’தி விஸுங் வுத்தத்தா. பப்³பா³ஜேதுங் ந லப⁴தீதி ஸரணதா³னங் ஸந்தா⁴ய வுத்தங். அனுபஸம்பன்னேன பி⁴க்கு²ஆணத்தியா தி³ன்னம்பி ஸரணங் ந ருஹதீதி வுத்தங்.

    146.Sayaṃ pabbājetabboti kesacchedanādīni sayaṃ karontena pabbājetabbo. Kesacchedanaṃ kāsāyacchādanaṃ saraṇadānanti hi imāni tīṇi karonto ‘‘pabbājetī’’ti vuccati, tesu ekaṃ dve vāpi karonto tathā voharīyatiyeva, tasmā etaṃ pabbājehīti kesacchedanaṃ kāsāyacchādanañca sandhāya vuttaṃ. Upajjhāyaṃ uddissa pabbājetīti etthāpi eseva nayo. Khaṇḍasīmaṃ netvāti bhaṇḍukammārocanapariharaṇatthaṃ vuttaṃ. Tena sabhikkhuke vihāre aññampi ‘‘etassa kese chindā’’ti vattuṃ na vaṭṭati. Pabbājetvāti kesacchedanaṃ sandhāya vadati. Bhikkhuto añño pabbājetuṃ na labhatīti saraṇadānaṃ sandhāya vuttaṃ. Tenevāha ‘‘sāmaṇero panā’’tiādīti sāratthadīpaniyaṃ (sārattha ṭī. mahāvagga 3.34) āgataṃ. Vimativinodaniyaṃ (vi. vi. ṭī. mahāvagga 2.34) pana – sayaṃ pabbājetabboti ettha ‘‘kesamassuṃ ohāretvā’’tiādivacanato kesacchedanakāsāyacchādanasaraṇadānāni pabbajanaṃ nāma, tesu pacchimadvayaṃ bhikkhūhi eva kātabbaṃ, kāretabbaṃ vā. Pabbājehīti idaṃ tividhampi sandhāya vuttaṃ. Khaṇḍasīmaṃ netvāti bhaṇḍukammārocanapariharaṇatthaṃ. Bhikkhūnañhi anārocetvā ekasīmāya ‘‘etassa kese chindā’’ti aññaṃ āṇāpetumpi na vaṭṭati. Pabbājetvāti kesādicchedanameva sandhāya vuttaṃ ‘‘kāsāyāni acchādetvā’’ti visuṃ vuttattā. Pabbājetuṃ na labhatīti saraṇadānaṃ sandhāya vuttaṃ. Anupasampannena bhikkhuāṇattiyā dinnampi saraṇaṃ na ruhatīti vuttaṃ.

    வஜிரபு³த்³தி⁴டீகாயம்பி (வஜிர டீ॰ மஹாவக்³க³ 34) – க²ண்ட³ஸீமங் நெத்வாதி ப⁴ண்டு³கம்மாரோசனபரிஹரணத்த²ங் வுத்தங், தேன ஸபி⁴க்கு²கே விஹாரே அஞ்ஞம்பி ‘‘ஏதஸ்ஸ கேஸே சி²ந்தா³’’தி வத்துங் ந வட்டதி. ‘‘பப்³பா³ஜெத்வா’’தி இமஸ்ஸ அதி⁴ப்பாயபகாஸனத்த²ங் ‘‘காஸாயானி அச்சா²தெ³த்வா ஏஹீ’’தி வுத்தங். உபஜ்ஜா²யோ சே கேஸமஸ்ஸுஓரோபனாதீ³னி அகத்வா பப்³ப³ஜ்ஜத்த²ங் ஸரணானி தே³தி, ந ருஹதி பப்³ப³ஜ்ஜா. கம்மவாசாய ஸாவெத்வா உபஸம்பாதே³தி, ருஹதி உபஸம்பதா³. அபத்தசீவரானங் உபஸம்பதா³ஸித்³தி⁴த³ஸ்ஸனதோ, கம்மவிபத்தியா அபா⁴வதோ சேதங் யுஜ்ஜதேவாதி ஏகே. ஹோதி செத்த² –

    Vajirabuddhiṭīkāyampi (vajira ṭī. mahāvagga 34) – khaṇḍasīmaṃ netvāti bhaṇḍukammārocanapariharaṇatthaṃ vuttaṃ, tena sabhikkhuke vihāre aññampi ‘‘etassa kese chindā’’ti vattuṃ na vaṭṭati. ‘‘Pabbājetvā’’ti imassa adhippāyapakāsanatthaṃ ‘‘kāsāyāni acchādetvā ehī’’ti vuttaṃ. Upajjhāyo ce kesamassuoropanādīni akatvā pabbajjatthaṃ saraṇāni deti, na ruhati pabbajjā. Kammavācāya sāvetvā upasampādeti, ruhati upasampadā. Apattacīvarānaṃ upasampadāsiddhidassanato, kammavipattiyā abhāvato cetaṃ yujjatevāti eke. Hoti cettha –

    ‘‘ஸலிங்க³ஸ்ஸேவ பப்³ப³ஜ்ஜா, விலிங்க³ஸ்ஸாபி சேதரா;

    ‘‘Saliṅgasseva pabbajjā, viliṅgassāpi cetarā;

    அபேதபுப்³ப³வேஸஸ்ஸ, தங்த்³வயா இதி சாபரே’’தி.

    Apetapubbavesassa, taṃdvayā iti cāpare’’ti.

    பி⁴க்கு²னா ஹி ஸஹத்தே²ன வா ஆணத்தியா வா தி³ன்னமேவ காஸாவங் வட்டதி, அதி³ன்னங் ந வட்டதீதி பன ஸந்தெஸ்வேவ காஸாவேஸு, நாஸந்தேஸு அஸம்ப⁴வதோதி தேஸங் அதி⁴ப்பாயோதி ஆக³தோ.

    Bhikkhunā hi sahatthena vā āṇattiyā vā dinnameva kāsāvaṃ vaṭṭati, adinnaṃ na vaṭṭatīti pana santesveva kāsāvesu, nāsantesu asambhavatoti tesaṃ adhippāyoti āgato.

    ப⁴ப்³ப³ரூபோதி ப⁴ப்³ப³ஸபா⁴வோ. தமேவத்த²ங் பரியாயந்தரேன விபா⁴வேதி ‘‘ஸஹேதுகோ’’தி. ஞாதோதி பாகடோ. யஸஸ்ஸீதி பரிவாரஸம்பத்தியா ஸமன்னாக³தோ.

    Bhabbarūpoti bhabbasabhāvo. Tamevatthaṃ pariyāyantarena vibhāveti ‘‘sahetuko’’ti. Ñātoti pākaṭo. Yasassīti parivārasampattiyā samannāgato.

    வண்ணஸண்டா²னக³ந்தா⁴ஸயோகாஸவஸேன அஸுசிஜேகு³ச்ச²படிகூலபா⁴வங் பாகடங் கரொந்தேனாதி ஸம்ப³ந்தோ⁴. தத்த² கேஸா நாமேதே வண்ணதோபி படிகூலா, ஸண்டா²னதோபி க³ந்த⁴தோபி ஆஸயதோபி ஓகாஸதோபி படிகூலா. மனுஞ்ஞேபி ஹி யாகு³பத்தே வா ப⁴த்தபத்தே வா கேஸவண்ணங் கிஞ்சி தி³ஸ்வா ‘‘கேஸமிஸ்ஸகமித³ங், ஹரத² ந’’ந்தி ஜிகு³ச்ச²ந்தி, ஏவங் கேஸா வண்ணதோ படிகூலா. ரத்திங் பு⁴ஞ்ஜந்தாபி கேஸஸண்டா²னங் அக்கவாகங் வா மகசிவாகங் வா சு²பித்வா ததே²வ ஜிகு³ச்ச²ந்தி, ஏவங் ஸண்டா²னதோபி படிகூலா. தேலமக்க²னபுப்ப²தூ⁴மாதி³ஸங்கா²ரவிரஹிதானஞ்ச கேஸானங் க³ந்தோ⁴ பரமஜேகு³ச்சோ² ஹோதி. ததோ ஜேகு³ச்ச²தரோ அக்³கி³ம்ஹி பக்கி²த்தானங். கேஸா ஹி வண்ணஸண்டா²னதோ அப்படிகூலாபி ஸியுங், க³ந்தே⁴ன பன படிகூலாயேவ. யதா² ஹி த³ஹரஸ்ஸ குமாரகஸ்ஸ வச்சங் வண்ணதோ ஹலித்³தி³வண்ணங், ஸண்டா²னதோ ஹலித்³தி³பிண்டி³ஸண்டா²னங். ஸங்கரட்டா²னே ச²ட்³டி³தஞ்ச உத்³து⁴மாதககாளஸுனக²ஸரீரங் வண்ணதோ தாலபக்கவண்ணங், ஸண்டா²னதோ வட்டெத்வா விஸ்ஸட்ட²முதி³ங்க³ஸண்டா²னங், தா³டா²பிஸ்ஸ ஸுமனமகுளஸதி³ஸா, தங் உப⁴யம்பி வண்ணஸண்டா²னதோ ஸியா அப்படிகூலங், க³ந்தே⁴ன பன படிகூலமேவ, ஏவங் கேஸாபி ஸியுங் வண்ணஸண்டா²னதோ அப்படிகூலா, க³ந்தே⁴ன பன படிகூலாயேவாதி.

    Vaṇṇasaṇṭhānagandhāsayokāsavasena asucijegucchapaṭikūlabhāvaṃ pākaṭaṃ karontenāti sambandho. Tattha kesā nāmete vaṇṇatopi paṭikūlā, saṇṭhānatopi gandhatopi āsayatopi okāsatopi paṭikūlā. Manuññepi hi yāgupatte vā bhattapatte vā kesavaṇṇaṃ kiñci disvā ‘‘kesamissakamidaṃ, haratha na’’nti jigucchanti, evaṃ kesā vaṇṇato paṭikūlā. Rattiṃ bhuñjantāpi kesasaṇṭhānaṃ akkavākaṃ vā makacivākaṃ vā chupitvā tatheva jigucchanti, evaṃ saṇṭhānatopi paṭikūlā. Telamakkhanapupphadhūmādisaṅkhāravirahitānañca kesānaṃ gandho paramajeguccho hoti. Tato jegucchataro aggimhi pakkhittānaṃ. Kesā hi vaṇṇasaṇṭhānato appaṭikūlāpi siyuṃ, gandhena pana paṭikūlāyeva. Yathā hi daharassa kumārakassa vaccaṃ vaṇṇato haliddivaṇṇaṃ, saṇṭhānato haliddipiṇḍisaṇṭhānaṃ. Saṅkaraṭṭhāne chaḍḍitañca uddhumātakakāḷasunakhasarīraṃ vaṇṇato tālapakkavaṇṇaṃ, saṇṭhānato vaṭṭetvā vissaṭṭhamudiṅgasaṇṭhānaṃ, dāṭhāpissa sumanamakuḷasadisā, taṃ ubhayampi vaṇṇasaṇṭhānato siyā appaṭikūlaṃ, gandhena pana paṭikūlameva, evaṃ kesāpi siyuṃ vaṇṇasaṇṭhānato appaṭikūlā, gandhena pana paṭikūlāyevāti.

    யதா² பன அஸுசிட்டா²னே கா³மனிஸ்ஸந்தே³ன ஜாதானி ஸூபெய்யபண்ணானி நாக³ரிகமனுஸ்ஸானங் ஜேகு³ச்சா²னி ஹொந்தி அபரிபோ⁴கா³னி, ஏவங் கேஸாபி புப்³ப³லோஹிதமுத்தகரீஸபித்தஸெம்ஹாதி³னிஸ்ஸந்தே³ன ஜாதத்தா பரமஜேகு³ச்சா²தி. ஏவங் ஆஸயதோபி படிகூலா. இமே ச கேஸா நாம கூ³த²ராஸிம்ஹி உட்டி²தகண்ணகா விய ஏகதிங்ஸகொட்டா²ஸராஸிம்ஹி ஜாதா, தே ஸுஸானஸங்காரட்டா²னாதீ³ஸு ஜாதஸாகங் விய, பரிகா²தீ³ஸு ஜாதகமலகுவலயாதி³புப்ப²ங் விய ச அஸுசிட்டா²னே ஜாதத்தா பரமஜேகு³ச்சா²தி ஏவங் ஓகாஸதோ படிகூலாதிஆதி³னா நயேன தசபஞ்சகஸ்ஸ வண்ணாதி³வஸேன படிகூலபா⁴வங் பகாஸெந்தேனாதி அத்தோ².

    Yathā pana asuciṭṭhāne gāmanissandena jātāni sūpeyyapaṇṇāni nāgarikamanussānaṃ jegucchāni honti aparibhogāni, evaṃ kesāpi pubbalohitamuttakarīsapittasemhādinissandena jātattā paramajegucchāti. Evaṃ āsayatopi paṭikūlā. Ime ca kesā nāma gūtharāsimhi uṭṭhitakaṇṇakā viya ekatiṃsakoṭṭhāsarāsimhi jātā, te susānasaṅkāraṭṭhānādīsu jātasākaṃ viya, parikhādīsu jātakamalakuvalayādipupphaṃ viya ca asuciṭṭhāne jātattā paramajegucchāti evaṃ okāsato paṭikūlātiādinā nayena tacapañcakassa vaṇṇādivasena paṭikūlabhāvaṃ pakāsentenāti attho.

    நிஜ்ஜீவனிஸ்ஸத்தபா⁴வங் வா பாகடங் கரொந்தேனாதி இமே கேஸா நாம ஸீஸகடாஹபலிவேட²னசம்மே ஜாதா, தத்த² யதா² வம்மிகமத்த²கே ஜாதேஸு குண்ட²திணேஸு ந வம்மிகமத்த²கோ ஜானாதி ‘‘மயி குண்ட²திணானி ஜாதானீ’’தி, நாபி குண்ட²திணானி ஜானந்தி ‘‘மயங் வம்மிகமத்த²கே ஜாதானீ’’தி. ஏவமேவ ந ஸீஸகடாஹபலிவேட²னசம்மங் ஜானாதி ‘‘மயி கேஸா ஜாதா’’தி, நாபி கேஸா ஜானந்தி ‘‘மயங் ஸீஸகடாஹபலிவேட²னசம்மே ஜாதா’’தி, அஞ்ஞமஞ்ஞங் ஆபோ⁴க³பச்சவெக்க²ணரஹிதா ஏதே த⁴ம்மா. இதி ‘‘கேஸா நாம இமஸ்மிங் ஸரீரே பாடியேக்கோ கொட்டா²ஸோ அசேதனோ அப்³யாகதோ ஸுஞ்ஞோ நிஸ்ஸத்தோ த²த்³தோ⁴ பத²வீதா⁴தூ’’திஆதி³னா நயேன நிஜ்ஜீவனிஸ்ஸத்தபா⁴வங் பகாஸெந்தேன. புப்³பே³தி புரிமபு³த்³தா⁴னங் ஸந்திகே. மத்³தி³தஸங்கா²ரோதி நாமரூபவவத்தா²னேன சேவ பச்சயபரிக்³க³ஹவஸேன ச ஞாணேன பரிமத்³தி³தஸங்கா²ரோ. பா⁴விதபா⁴வனோதி கலாபஸம்மஸனாதி³னா ஸப்³ப³ஸோ குஸலபா⁴வனாய பூரணேன பா⁴விதபா⁴வனோ . அதி³ன்னங் ந வட்டதீதி எத்த² ‘‘பப்³ப³ஜ்ஜா ந ருஹதீதி வத³ந்தீ’’தி ஸாரத்த²தீ³பனியங் (ஸாரத்த²॰ டீ॰ மஹாவக்³க³ 3.34) வுத்தங்.

    Nijjīvanissattabhāvaṃ vā pākaṭaṃ karontenāti ime kesā nāma sīsakaṭāhapaliveṭhanacamme jātā, tattha yathā vammikamatthake jātesu kuṇṭhatiṇesu na vammikamatthako jānāti ‘‘mayi kuṇṭhatiṇāni jātānī’’ti, nāpi kuṇṭhatiṇāni jānanti ‘‘mayaṃ vammikamatthake jātānī’’ti. Evameva na sīsakaṭāhapaliveṭhanacammaṃ jānāti ‘‘mayi kesā jātā’’ti, nāpi kesā jānanti ‘‘mayaṃ sīsakaṭāhapaliveṭhanacamme jātā’’ti, aññamaññaṃ ābhogapaccavekkhaṇarahitā ete dhammā. Iti ‘‘kesā nāma imasmiṃ sarīre pāṭiyekko koṭṭhāso acetano abyākato suñño nissatto thaddho pathavīdhātū’’tiādinā nayena nijjīvanissattabhāvaṃ pakāsentena. Pubbeti purimabuddhānaṃ santike. Madditasaṅkhāroti nāmarūpavavatthānena ceva paccayapariggahavasena ca ñāṇena parimadditasaṅkhāro. Bhāvitabhāvanoti kalāpasammasanādinā sabbaso kusalabhāvanāya pūraṇena bhāvitabhāvano . Adinnaṃ na vaṭṭatīti ettha ‘‘pabbajjā na ruhatīti vadantī’’ti sāratthadīpaniyaṃ (sārattha. ṭī. mahāvagga 3.34) vuttaṃ.

    விமதிவினோத³னியங் (வி॰ வி॰ டீ॰ மஹாவக்³க³ 2.34) பன – யஸஸ்ஸீதி பரிவாரஸம்பன்னோ. நிஜ்ஜீவனிஸ்ஸத்தபா⁴வந்தி ‘‘கேஸா நாம இமஸ்மிங் ஸரீரே பாடியேக்கோ கொட்டா²ஸோ அசேதனோ அப்³யாகதோ ஸுஞ்ஞோ நிஸ்ஸத்தோ த²த்³தோ⁴ பத²வீதா⁴தூ’’திஆதி³னயங் ஸங்க³ண்ஹாதி, ஸப்³ப³ங் விஸுத்³தி⁴மக்³கே³ (விஸுத்³தி⁴॰ 1.311) ஆக³தனயேன க³ஹேதப்³ப³ங். புப்³பே³தி புப்³ப³பு³த்³து⁴ப்பாதே³ஸு . மத்³தி³தஸங்கா²ரோதி விபஸ்ஸனாவஸேன வுத்தங். பா⁴விதபா⁴வனோதி ஸமத²வஸேனபி.

    Vimativinodaniyaṃ (vi. vi. ṭī. mahāvagga 2.34) pana – yasassīti parivārasampanno. Nijjīvanissattabhāvanti ‘‘kesā nāma imasmiṃ sarīre pāṭiyekko koṭṭhāso acetano abyākato suñño nissatto thaddho pathavīdhātū’’tiādinayaṃ saṅgaṇhāti, sabbaṃ visuddhimagge (visuddhi. 1.311) āgatanayena gahetabbaṃ. Pubbeti pubbabuddhuppādesu . Madditasaṅkhāroti vipassanāvasena vuttaṃ. Bhāvitabhāvanoti samathavasenapi.

    காஸாயானி திக்க²த்துங் வா…பே॰… படிக்³கா³ஹாபேதப்³போ³தி எத்த² ‘‘ஸப்³ப³து³க்க²னிஸ்ஸரணத்தா²ய இமங் காஸாவங் க³ஹெத்வா’’தி வா ‘‘தங் காஸாவங் த³த்வா’’தி வா வத்வா ‘‘பப்³பா³ஜேத² மங், ப⁴ந்தே, அனுகம்பங் உபாதா³யா’’தி ஏவங் யாசனபுப்³ப³கங் சீவரங் படிச்சா²பேதி. அதா²பீதிஆதி³ திக்க²த்துங் படிக்³கா³ஹாபனதோ பரங் கத்தப்³ப³விதி⁴த³ஸ்ஸனங், அதா²பீதி ததோ பரம்பீதி அத்தோ². கேசி பன ‘‘சீவரங் அப்படிக்³கா³ஹாபெத்வா பப்³பா³ஜனப்பகாரபே⁴த³த³ஸ்ஸனத்த²ங் ‘அதா²பீ’தி வுத்தங். அதா²பீதி அத² வாதி அத்தோ²’’தி வத³ந்தி. அதி³ன்னங் ந வட்டதீதி இமினா பப்³ப³ஜ்ஜா ந ருஹதீதி த³ஸ்ஸேதி.

    Kāsāyāni tikkhattuṃ vā…pe… paṭiggāhāpetabboti ettha ‘‘sabbadukkhanissaraṇatthāya imaṃ kāsāvaṃ gahetvā’’ti vā ‘‘taṃ kāsāvaṃ datvā’’ti vā vatvā ‘‘pabbājetha maṃ, bhante, anukampaṃ upādāyā’’ti evaṃ yācanapubbakaṃ cīvaraṃ paṭicchāpeti. Athāpītiādi tikkhattuṃ paṭiggāhāpanato paraṃ kattabbavidhidassanaṃ, athāpīti tato parampīti attho. Keci pana ‘‘cīvaraṃ appaṭiggāhāpetvā pabbājanappakārabhedadassanatthaṃ ‘athāpī’ti vuttaṃ. Athāpīti atha vāti attho’’ti vadanti. Adinnaṃ na vaṭṭatīti iminā pabbajjā na ruhatīti dasseti.

    147. பாதே³ வந்தா³பெத்வாதி பாதா³பி⁴முக²ங் நமாபெத்வா. தூ³ரே வந்த³ந்தோபி ஹி பாதே³ வந்த³தீதி வுச்சதீதி. உபஜ்ஜா²யேன வாதி எத்த² யஸ்ஸ ஸந்திகே உபஜ்ஜ²ங் க³ண்ஹாதி, அயங் உபஜ்ஜா²யோ. யங் ஆபி⁴ஸமாசாரிகேஸு வினயனத்தா²ய ஆசரியங் கத்வா நிய்யாதெந்தி, அயங் ஆசரியோ. ஸசே பன உபஜ்ஜா²யோ ஸயமேவ ஸப்³ப³ங் ஸிக்கா²பேதி, அஞ்ஞம்பி ந நிய்யாதேதி, உபஜ்ஜா²யோவஸ்ஸ ஆசரியோபி ஹோதி. யதா² உபஸம்பதா³காலே ஸயமேவ கம்மவாசங் வாசெந்தோ உபஜ்ஜா²யோவ கம்மவாசாசரியோபி ஹோதீதி வுத்தங்.

    147.Pāde vandāpetvāti pādābhimukhaṃ namāpetvā. Dūre vandantopi hi pāde vandatīti vuccatīti. Upajjhāyena vāti ettha yassa santike upajjhaṃ gaṇhāti, ayaṃ upajjhāyo. Yaṃ ābhisamācārikesu vinayanatthāya ācariyaṃ katvā niyyātenti, ayaṃ ācariyo. Sace pana upajjhāyo sayameva sabbaṃ sikkhāpeti, aññampi na niyyāteti, upajjhāyovassa ācariyopi hoti. Yathā upasampadākāle sayameva kammavācaṃ vācento upajjhāyova kammavācācariyopi hotīti vuttaṃ.

    அனுஞ்ஞாதஉபஸம்பதா³தி ஞத்திசதுத்த²கம்மேன அனுஞ்ஞாதஉபஸம்பதா³. டா²னகரணஸம்பத³ந்தி எத்த² உரஆதீ³னி டா²னானி, ஸங்வுதாதீ³னி கரணானீதி வேதி³தப்³பா³னி. அனுனாஸிகந்தங் கத்வா தா³னகாலே அந்தராவிச்சே²த³ங் அகத்வா தா³தப்³பா³னீதி த³ஸ்ஸேதுங் ‘‘ஏகஸம்ப³ந்தா⁴னீ’’தி வுத்தங். விச்சி²ந்தி³த்வாதி ம-காரந்தங் கத்வா தா³னஸமயே விச்சே²த³ங் கத்வா.

    Anuññātaupasampadāti ñatticatutthakammena anuññātaupasampadā. Ṭhānakaraṇasampadanti ettha uraādīni ṭhānāni, saṃvutādīni karaṇānīti veditabbāni. Anunāsikantaṃ katvā dānakāle antarāvicchedaṃ akatvā dātabbānīti dassetuṃ ‘‘ekasambandhānī’’ti vuttaṃ. Vicchinditvāti ma-kārantaṃ katvā dānasamaye vicchedaṃ katvā.

    148. ஸப்³ப³மஸ்ஸ கப்பியாகப்பியங் ஆசிக்கி²தப்³ப³ந்தி த³ஸஸிக்கா²பத³வினிமுத்தங் பராமாஸாபராமாஸாதி³பே⁴த³ங் கப்பியாகப்பியங் ஆசிக்கி²தப்³ப³ங். ஆபி⁴ஸமாசாரிகேஸு வினேதப்³போ³தி இமினா ‘‘ஸேகி²யஉபஜ்ஜா²யவத்தாதி³ஆபி⁴ஸமாசாரிகஸீலமனேன பூரேதப்³ப³ங். தத்த² ச கத்தப்³ப³ஸ்ஸ அகரணே, அகத்தப்³ப³ஸ்ஸ ச கரணே த³ண்ட³கம்மாரஹோ ஹோதீதி தீ³பேதீதி ஸாரத்த²தீ³பனியங் (ஸாரத்த²॰ டீ॰ மஹாவக்³க³ 3.34) வுத்தங். அனுனாஸிகந்தங் கத்வா தா³னகாலே அந்தராவிச்சே²தோ³ ந காதப்³போ³தி ஆஹ ‘‘ஏகஸம்ப³ந்தா⁴னீ’’தி. ஆபி⁴ஸமாசாரிகேஸு வினேதப்³போ³தி இமினா ஸேகி²யவத்தாக்க²ந்த⁴கவத்தேஸு, அஞ்ஞேஸு ச ஸுக்கவிஸ்ஸட்டி²ஆதி³லோகவஜ்ஜஸிக்கா²பதே³ஸு ச ஸாமணேரேஹி வத்திதப்³ப³ங், தத்த² அவத்தமானோ அலஜ்ஜீ த³ண்ட³கம்மாரஹோ ச ஹோதீதி த³ஸ்ஸேதீதி விமதிவினோத³னியங் (வி॰ வி॰ டீ॰ மஹாவக்³க³ 2.34).

    148.Sabbamassakappiyākappiyaṃ ācikkhitabbanti dasasikkhāpadavinimuttaṃ parāmāsāparāmāsādibhedaṃ kappiyākappiyaṃ ācikkhitabbaṃ. Ābhisamācārikesu vinetabboti iminā ‘‘sekhiyaupajjhāyavattādiābhisamācārikasīlamanena pūretabbaṃ. Tattha ca kattabbassa akaraṇe, akattabbassa ca karaṇe daṇḍakammāraho hotīti dīpetīti sāratthadīpaniyaṃ (sārattha. ṭī. mahāvagga 3.34) vuttaṃ. Anunāsikantaṃ katvā dānakāle antarāvicchedo na kātabboti āha ‘‘ekasambandhānī’’ti. Ābhisamācārikesu vinetabboti iminā sekhiyavattākkhandhakavattesu, aññesu ca sukkavissaṭṭhiādilokavajjasikkhāpadesu ca sāmaṇerehi vattitabbaṃ, tattha avattamāno alajjī daṇḍakammāraho ca hotīti dassetīti vimativinodaniyaṃ (vi. vi. ṭī. mahāvagga 2.34).

    உராதீ³னி டா²னானி நாம, ஸங்வுதாதீ³னி கரணானி நாம. அனுனாஸிகந்தங் கத்வா ஏகஸம்ப³ந்த⁴ங் கத்வா தா³னகாலே அந்தரா அட்ட²த்வா வத்தப்³ப³ங், விச்சி²ந்தி³த்வா தா³னகாலேபி யதா²வுத்தட்டா²னே ஏவ விச்சே²தோ³, அஞ்ஞத்ர ந வட்டதீதி லிகி²தங், அனுனாஸிகந்தே தீ³யமானே க²லித்வா ‘‘பு³த்³த⁴ங் ஸரணங் க³ச்சா²மீ’’தி ம-காரேன மிஸ்ஸீபூ⁴தே கெ²த்தே ஓதிண்ணத்தா வட்டதீதி உபதிஸ்ஸத்தே²ரோ. மிஸ்ஸங் கத்வா வத்துங் வட்டதி, வசனகாலே பன அனுனாஸிகட்டா²னே விச்சே²த³ங் அகத்வா வத்தப்³ப³ந்தி த⁴ம்மஸிரித்தே²ரோ. ‘‘ஏவங் கம்மவாசாயம்பீ’’தி வுத்தங். உப⁴தோஸுத்³தி⁴யாவ வட்டதீதி எத்த² மஹாதே²ரோ பதிதத³ந்தாதி³காரணதாய அசதுரஸ்ஸங் கத்வா வத³தி, ப்³யத்தஸாமணேரோ ஸமீபே டி²தோ பப்³ப³ஜ்ஜாபெக்க²ங் ப்³யத்தங் வதா³பேதி, மஹாதே²ரேன அவுத்தங் வதா³பேதீதி ந வட்டதி. கம்மவாசாய இதரோ பி⁴க்கு² சே வத³தி, வட்டதீதி. ஸங்கோ⁴ ஹி கம்மங் கரோதி, ந புக்³க³லோதி. ந, நானாஸீமபவத்தகம்மவாசாஸாமஞ்ஞனயேன படிக்கி²பிதப்³ப³த்தா. அத² தே²ரேன சதுரஸ்ஸங் வுத்தங் பப்³ப³ஜ்ஜாபெக்க²ங் வத்துங் அஸக்கொந்தங் ஸாமணேரோ ஸயங் வத்வா வதா³பேதி, உப⁴தோஸுத்³தி⁴ ஏவ ஹோதி தே²ரேன வுத்தஸ்ஸேவ வுத்தத்தா. ‘‘பு³த்³த⁴ங் ஸரணங் க³ச்ச²ந்தோ அஸாதா⁴ரணே பு³த்³த⁴கு³ணங், த⁴ம்மங் ஸரணங் க³ச்ச²ந்தோ நிப்³பா³னங், ஸங்க⁴ங் ஸரணங் க³ச்ச²ந்தோ ஸெக்க²த⁴ம்மங் அஸெக்க²த⁴ம்மஞ்ச ஸரணங் க³ச்ச²தீ’’தி அக்³க³ஹிதக்³க³ஹணவஸேன யோஜனா காதப்³பா³. அஞ்ஞதா² ஸரணத்தயஸங்கரதோ³ஸோ. ஸப்³ப³மஸ்ஸ கப்பியாகப்பியந்தி த³ஸஸிக்கா²பத³வினிமுத்தங் பராமாஸாபராமாஸாதி³பே⁴த³ங். ‘‘ஆபி⁴ஸமாசாரிகேஸு வினேதப்³போ³’’தி வசனதோ ஸேகி²யஉபஜ்ஜா²யவத்தாதி³ஆபி⁴ஸமாசாரிகஸீலமனேன பூரேதப்³ப³ங். தத்த² சாரித்தஸ்ஸ அகரணே, வாரித்தஸ்ஸ கரணே த³ண்ட³கம்மாரஹோ ஹோதீ’’தி தீ³பேதீதி வஜிரபு³த்³தி⁴டீகாயங் (வஜிர॰ டீ॰ மஹாவக்³க³ 34) ஆக³தோ.

    Urādīni ṭhānāni nāma, saṃvutādīni karaṇāni nāma. Anunāsikantaṃ katvā ekasambandhaṃ katvā dānakāle antarā aṭṭhatvā vattabbaṃ, vicchinditvā dānakālepi yathāvuttaṭṭhāne eva vicchedo, aññatra na vaṭṭatīti likhitaṃ, anunāsikante dīyamāne khalitvā ‘‘buddhaṃ saraṇaṃ gacchāmī’’ti ma-kārena missībhūte khette otiṇṇattā vaṭṭatīti upatissatthero. Missaṃ katvā vattuṃ vaṭṭati, vacanakāle pana anunāsikaṭṭhāne vicchedaṃ akatvā vattabbanti dhammasiritthero. ‘‘Evaṃ kammavācāyampī’’ti vuttaṃ. Ubhatosuddhiyāva vaṭṭatīti ettha mahāthero patitadantādikāraṇatāya acaturassaṃ katvā vadati, byattasāmaṇero samīpe ṭhito pabbajjāpekkhaṃ byattaṃ vadāpeti, mahātherena avuttaṃ vadāpetīti na vaṭṭati. Kammavācāya itaro bhikkhu ce vadati, vaṭṭatīti. Saṅgho hi kammaṃ karoti, na puggaloti. Na, nānāsīmapavattakammavācāsāmaññanayena paṭikkhipitabbattā. Atha therena caturassaṃ vuttaṃ pabbajjāpekkhaṃ vattuṃ asakkontaṃ sāmaṇero sayaṃ vatvā vadāpeti, ubhatosuddhi eva hoti therena vuttasseva vuttattā. ‘‘Buddhaṃ saraṇaṃ gacchanto asādhāraṇe buddhaguṇaṃ, dhammaṃ saraṇaṃ gacchanto nibbānaṃ, saṅghaṃ saraṇaṃ gacchanto sekkhadhammaṃ asekkhadhammañca saraṇaṃ gacchatī’’ti aggahitaggahaṇavasena yojanā kātabbā. Aññathā saraṇattayasaṅkaradoso. Sabbamassa kappiyākappiyanti dasasikkhāpadavinimuttaṃ parāmāsāparāmāsādibhedaṃ. ‘‘Ābhisamācārikesu vinetabbo’’ti vacanato sekhiyaupajjhāyavattādiābhisamācārikasīlamanena pūretabbaṃ. Tattha cārittassa akaraṇe, vārittassa karaṇe daṇḍakammāraho hotī’’ti dīpetīti vajirabuddhiṭīkāyaṃ (vajira. ṭī. mahāvagga 34) āgato.

    அனுஜானாமி பி⁴க்க²வே ஸாமணேரானங் த³ஸ ஸிக்கா²பதா³னீதிஆதீ³ஸு ஸிக்கி²தப்³பா³னி பதா³னி ஸிக்கா²பதா³னி, ஸிக்கா²கொட்டா²ஸாதி அத்தோ². ஸிக்கா²ய வா பதா³னி ஸிக்கா²பதா³னி, அதி⁴ஸீலஅதி⁴சித்தஅதி⁴பஞ்ஞாஸிக்கா²னங் அதி⁴க³முபாயோதி அத்தோ². அத்த²தோ பன காமாவசரகுஸலசித்தஸம்பயுத்தா விரதியோ, தங்ஸம்பயுத்தத⁴ம்மா பனெத்த² தக்³க³ஹணேனேவ க³ஹேதப்³பா³. பாணோதி பரமத்த²தோ ஜீவிதிந்த்³ரியங், தஸ்ஸ அதிபாதனங் பப³ந்த⁴வஸேன பவத்திதுங் அத³த்வா ஸத்தா²தீ³ஹி அதிக்கம்ம அபி⁴ப⁴வித்வா பாதனங் பாணாதிபாதோ, பாணவதோ⁴தி அத்தோ². ஸோ பன அத்த²தோ பாணே பாணஸஞ்ஞினோ ஜீவிதிந்த்³ரியுபச்சே²த³கஉபக்கமஸமுட்டா²பிகா வத⁴கசேதனாவ, தஸ்மா பாணாதிபாதா வேரமணி, வேரஹேதுதாய வேரஸங்கா²தங் பாணாதிபாதாதி³பாபத⁴ம்மங் மணதி நீஹரதீதி விரதி ‘‘வேரமணீ’’தி வுச்சதி. விரமதி ஏதாயாதி வா ‘‘விரமதீ’’தி வத்தப்³பே³ நிருத்தினயேன ‘‘வேரமணீ’’தி ஸமாதா³னவிரதி வுத்தா. ஏஸ நயோ ஸேஸேஸுபி.

    Anujānāmibhikkhave sāmaṇerānaṃ dasa sikkhāpadānītiādīsu sikkhitabbāni padāni sikkhāpadāni, sikkhākoṭṭhāsāti attho. Sikkhāya vā padāni sikkhāpadāni, adhisīlaadhicittaadhipaññāsikkhānaṃ adhigamupāyoti attho. Atthato pana kāmāvacarakusalacittasampayuttā viratiyo, taṃsampayuttadhammā panettha taggahaṇeneva gahetabbā. Pāṇoti paramatthato jīvitindriyaṃ, tassa atipātanaṃ pabandhavasena pavattituṃ adatvā satthādīhi atikkamma abhibhavitvā pātanaṃ pāṇātipāto, pāṇavadhoti attho. So pana atthato pāṇe pāṇasaññino jīvitindriyupacchedakaupakkamasamuṭṭhāpikā vadhakacetanāva, tasmā pāṇātipātā veramaṇi, verahetutāya verasaṅkhātaṃ pāṇātipātādipāpadhammaṃ maṇati nīharatīti virati ‘‘veramaṇī’’ti vuccati. Viramati etāyāti vā ‘‘viramatī’’ti vattabbe niruttinayena ‘‘veramaṇī’’ti samādānavirati vuttā. Esa nayo sesesupi.

    அதி³ன்னஸ்ஸ ஆதா³னங் அதி³ன்னாதா³னங், தெ²ய்யசேதனா. அப்³ரம்ஹசரியந்தி அஸெட்ட²சரியங், மக்³கே³னமக்³க³படிபத்திஸமுட்டா²பிகா மேது²னசேதனா. முஸாதி அபூ⁴தவத்து², தஸ்ஸ வாதோ³ அபூ⁴தங் ஞத்வாவ பூ⁴ததோ விஞ்ஞாபனசேதனா முஸாவாதோ³. பிட்ட²பூவாதி³னிப்³ப³த்தா ஸுரா சேவ புப்பா²ஸவாதி³பே⁴த³ங் மேரயஞ்ச ஸுராமேரயங். ததே³வ மத³னீயட்டே²ன மஜ்ஜஞ்சேவ பமாத³காரணட்டே²ன பமாத³ட்டா²னஞ்ச, தங் யாய சேதனாய பிவதி, தஸ்ஸா ஏவங் அதி⁴வசனங்.

    Adinnassa ādānaṃ adinnādānaṃ, theyyacetanā. Abramhacariyanti aseṭṭhacariyaṃ, maggenamaggapaṭipattisamuṭṭhāpikā methunacetanā. Musāti abhūtavatthu, tassa vādo abhūtaṃ ñatvāva bhūtato viññāpanacetanā musāvādo. Piṭṭhapūvādinibbattā surā ceva pupphāsavādibhedaṃ merayañca surāmerayaṃ. Tadeva madanīyaṭṭhena majjañceva pamādakāraṇaṭṭhena pamādaṭṭhānañca, taṃ yāya cetanāya pivati, tassā evaṃ adhivacanaṃ.

    அருணுக்³க³மனதோ பட்டா²ய யாவ மஜ்ஜ²ன்ஹிகா, அயங் அரியானங் போ⁴ஜனஸ்ஸ காலோ நாம, தத³ஞ்ஞோ விகாலோ. பு⁴ஞ்ஜிதப்³ப³ட்டே²ன போ⁴ஜனந்தி இத⁴ ஸப்³ப³ங் யாவகாலிகங் வுச்சதி, தஸ்ஸ அஜ்ஜோ²ஹரணங் இத⁴ உத்தரபத³லோபேன போ⁴ஜனந்தி அதி⁴ப்பேதங். விகாலே போ⁴ஜனங் அஜ்ஜோ²ஹரணங் விகாலபோ⁴ஜனங், விகாலே வாயாவகாலிகஸ்ஸ போ⁴ஜனங் அஜ்ஜோ²ஹரணங் விகாலபோ⁴ஜனந்திபி அத்தோ² க³ஹேதப்³போ³, தங் அத்த²தோ விகாலே யாவகாலிகஅஜ்ஜோ²ஹரணசேதனாவ.

    Aruṇuggamanato paṭṭhāya yāva majjhanhikā, ayaṃ ariyānaṃ bhojanassa kālo nāma, tadañño vikālo. Bhuñjitabbaṭṭhena bhojananti idha sabbaṃ yāvakālikaṃ vuccati, tassa ajjhoharaṇaṃ idha uttarapadalopena bhojananti adhippetaṃ. Vikāle bhojanaṃ ajjhoharaṇaṃ vikālabhojanaṃ, vikāle vāyāvakālikassa bhojanaṃ ajjhoharaṇaṃ vikālabhojanantipi attho gahetabbo, taṃ atthato vikāle yāvakālikaajjhoharaṇacetanāva.

    ஸாஸனஸ்ஸ அனநுலோமத்தா விஸூகங் படாணீபூ⁴தங் த³ஸ்ஸனங் ‘‘விஸூகத³ஸ்ஸனங், நச்சகீ³தாதி³த³ஸ்ஸனஸவனானஞ்சேவ வட்டகயுத்³த⁴ஜூதகீளாதி³ஸப்³ப³கீளானஞ்ச நாமங். த³ஸ்ஸனந்தி செத்த² பஞ்சன்னம்பி விஞ்ஞாணானங் யதா²ஸகங் விஸயஸ்ஸ ஆலோசனஸபா⁴வதாய த³ஸ்ஸனஸத்³தே³ன ஸங்க³ஹேதப்³ப³த்தா ஸவனம்பி ஸங்க³ஹிதங். நச்சகீ³தவாதி³தஸத்³தே³ஹி செத்த² அத்தனோ நச்சனகா³யனாதீ³னிபி ஸங்க³ஹிதானீதி த³ட்ட²ப்³ப³ங்.

    Sāsanassa ananulomattā visūkaṃ paṭāṇībhūtaṃ dassanaṃ ‘‘visūkadassanaṃ, naccagītādidassanasavanānañceva vaṭṭakayuddhajūtakīḷādisabbakīḷānañca nāmaṃ. Dassananti cettha pañcannampi viññāṇānaṃ yathāsakaṃ visayassa ālocanasabhāvatāya dassanasaddena saṅgahetabbattā savanampi saṅgahitaṃ. Naccagītavāditasaddehi cettha attano naccanagāyanādīnipi saṅgahitānīti daṭṭhabbaṃ.

    மாலாதி ப³த்³த⁴மப³த்³த⁴ங் வா புப்ப²ங், அந்தமஸோ ஸுத்தாதி³மயம்பி அலங்காரத்தா²ய பிளந்தி⁴யமானங் மாலாத்வேவ வுச்சதி. க³ந்த⁴ந்தி வாஸசுண்ணாதி³விலேபனதோ அஞ்ஞங் யங் கிஞ்சி க³ந்த⁴ஜாதங். விலேபனந்தி பிஸித்வா க³ஹிதங் ச²விராக³கரணஞ்சேவ க³ந்த⁴ஜாதஞ்ச. தா⁴ரணங் நாம பிளந்த⁴னங். மண்ட³னங் நாம ஊனட்டா²னபூரணங். க³ந்த⁴வஸேன, ச²விராக³வஸேன வா ஸாதி³யனங் விபூ⁴ஸனங் நாம, மாலாதீ³ஸு வா தா⁴ரணாதீ³னி யதா²க்கமங் யோஜேதப்³பா³னி. தேஸங் தா⁴ரணாதீ³னங் டா²னங் காரணங் வீதிக்கமசேதனா.

    Mālāti baddhamabaddhaṃ vā pupphaṃ, antamaso suttādimayampi alaṅkāratthāya piḷandhiyamānaṃ mālātveva vuccati. Gandhanti vāsacuṇṇādivilepanato aññaṃ yaṃ kiñci gandhajātaṃ. Vilepananti pisitvā gahitaṃ chavirāgakaraṇañceva gandhajātañca. Dhāraṇaṃ nāma piḷandhanaṃ. Maṇḍanaṃ nāma ūnaṭṭhānapūraṇaṃ. Gandhavasena, chavirāgavasena vā sādiyanaṃ vibhūsanaṃ nāma, mālādīsu vā dhāraṇādīni yathākkamaṃ yojetabbāni. Tesaṃ dhāraṇādīnaṃ ṭhānaṃ kāraṇaṃ vītikkamacetanā.

    உச்சாதி உச்ச-ஸத்³தே³ன ஸமானத்தோ² நிபாதோ. உச்சாஸயனங் வுச்சதி பமாணாதிக்கந்தங் ஆஸந்தா³தி³. மஹாஸயனங் அகப்பியத்த²ரணேஹி அத்த²தங் ஸலோஹிதவிதானஞ்ச. ஏதேஸு ஹி ஆஸனங் ஸயனஞ்ச உச்சாஸயனமஹாஸயனஸத்³தே³ஹி க³ஹிதானி உத்தரபத³லோபேன. ஜாதரூபரஜதபடிக்³க³ஹணாதி எத்த² ரஜதஸத்³தே³ன தா³ருமாஸகாதி³ ஸப்³ப³ங் ரூபியங் ஸங்க³ஹிதங். முத்தாமணிஆத³யோபெத்த² த⁴ஞ்ஞக்கெ²த்தவத்தா²த³யோ ச ஸங்க³ஹிதாதி த³ட்ட²ப்³பா³. படிக்³க³ஹண-ஸத்³தே³ன பன படிக்³கா³ஹாபனஸாதி³யனானிபி ஸங்க³ஹிதானி.

    Uccāti ucca-saddena samānattho nipāto. Uccāsayanaṃ vuccati pamāṇātikkantaṃ āsandādi. Mahāsayanaṃ akappiyattharaṇehi atthataṃ salohitavitānañca. Etesu hi āsanaṃ sayanañca uccāsayanamahāsayanasaddehi gahitāni uttarapadalopena. Jātarūparajatapaṭiggahaṇāti ettha rajatasaddena dārumāsakādi sabbaṃ rūpiyaṃ saṅgahitaṃ. Muttāmaṇiādayopettha dhaññakkhettavatthādayo ca saṅgahitāti daṭṭhabbā. Paṭiggahaṇa-saddena pana paṭiggāhāpanasādiyanānipi saṅgahitāni.

    149. ஸேனாஸனக்³கா³ஹோ ச படிப்பஸ்ஸம்ப⁴ந்தீதி இமினா வஸ்ஸச்சே²த³ங் த³ஸ்ஸேதி. உபஸம்பன்னானம்பி பாராஜிகஸமாபத்தியா ஸரணக³மனாதி³ஸாமணேரபா⁴வஸ்ஸபி வினஸ்ஸனதோ ஸேனாஸனக்³கா³ஹோ ச படிப்பஸ்ஸம்ப⁴தி, ஸங்க⁴லாப⁴ம்பி தே ந லப⁴ந்தீதி வேதி³தப்³ப³ங். புரிமிகாய புன ஸரணானி க³ஹிதானீதி ஸரணக³ஹணேன ஸஹ தத³ஹேவஸ்ஸ வஸ்ஸூபக³மனம்பி த³ஸ்ஸேதி. பச்சி²மிகாய வஸ்ஸாவாஸிகந்தி வஸ்ஸாவாஸிகலாப⁴க்³க³ஹணத³ஸ்ஸனமத்தமேவேதங், ததோ புரேபி வா பச்சா²பி வா வஸ்ஸாவாஸிகஞ்ச சீவரமாஸேஸு ஸங்கே⁴ உப்பன்னகாலசீவரஞ்ச புரிமிகாய உபக³ந்த்வா அவிபன்னஸீலோ ஸாமணேரோ லப⁴தி ஏவ. ஸசே பச்சி²மிகாய க³ஹிதானீதி பச்சி²மிகாய வஸ்ஸூபக³மனஞ்ச சி²ன்னவஸ்ஸதஞ்ச த³ஸ்ஸேதி. தஸ்ஸ ஹி காலசீவரலாபோ⁴ ந பாபுணாதி, தஸ்மா ‘‘அபலோகெத்வா லாபோ⁴ தா³தப்³போ³’’தி வுத்தங். வஸ்ஸாவாஸிகலாபோ⁴ பன யதி³ ஸேனாஸனஸ்ஸாமிகா தா³யகா ஸேனாஸனகு³த்தத்தா²ய பச்சி²மிகாய உபக³ந்த்வா வத்தங் கத்வா அத்தனோ ஸேனாஸனே வஸந்தஸ்ஸபி வஸ்ஸாவாஸிகங் தா³தப்³ப³ந்தி வத³ந்தி, அனபலோகெத்வாபி தா³தப்³போ³வ. யங் பன ஸாரத்த²தீ³பனியங் (ஸாரத்த²॰ டீ॰ மஹாவக்³க³ 3.108) ‘‘பச்சி²மிகாய வஸ்ஸாவாஸிகங் லச்ச²தீதி பச்சி²மிகாய புன வஸ்ஸங் உபக³தத்தா லச்ச²தீ’’தி வுத்தங், தம்பி வஸ்ஸாவாஸிகே தா³யகானங் இமங் அதி⁴ப்பாயங் நிஸ்ஸாய வுத்தஞ்சே, ஸுந்த³ரங், ஸங்கி⁴கங், காலசீவரம்பி ஸந்தா⁴ய வுத்தஞ்சே, ந யுஜ்ஜதீதி வேதி³தப்³ப³ங்.

    149.Senāsanaggāho ca paṭippassambhantīti iminā vassacchedaṃ dasseti. Upasampannānampi pārājikasamāpattiyā saraṇagamanādisāmaṇerabhāvassapi vinassanato senāsanaggāho ca paṭippassambhati, saṅghalābhampi te na labhantīti veditabbaṃ. Purimikāya puna saraṇāni gahitānīti saraṇagahaṇena saha tadahevassa vassūpagamanampi dasseti. Pacchimikāya vassāvāsikanti vassāvāsikalābhaggahaṇadassanamattamevetaṃ, tato purepi vā pacchāpi vā vassāvāsikañca cīvaramāsesu saṅghe uppannakālacīvarañca purimikāya upagantvā avipannasīlo sāmaṇero labhati eva. Sace pacchimikāya gahitānīti pacchimikāya vassūpagamanañca chinnavassatañca dasseti. Tassa hi kālacīvaralābho na pāpuṇāti, tasmā ‘‘apaloketvā lābho dātabbo’’ti vuttaṃ. Vassāvāsikalābho pana yadi senāsanassāmikā dāyakā senāsanaguttatthāya pacchimikāya upagantvā vattaṃ katvā attano senāsane vasantassapi vassāvāsikaṃ dātabbanti vadanti, anapaloketvāpi dātabbova. Yaṃ pana sāratthadīpaniyaṃ (sārattha. ṭī. mahāvagga 3.108) ‘‘pacchimikāya vassāvāsikaṃ lacchatīti pacchimikāya puna vassaṃ upagatattā lacchatī’’ti vuttaṃ, tampi vassāvāsike dāyakānaṃ imaṃ adhippāyaṃ nissāya vuttañce, sundaraṃ, saṅghikaṃ, kālacīvarampi sandhāya vuttañce, na yujjatīti veditabbaṃ.

    ந அஜானித்வாதி ‘‘ஸுரா’’தி அஜானித்வா பிவதோ பாணாதிபாதாவேரமணிஆதி³ஸப்³ப³ஸீலபே⁴த³ங் ஸரணபே⁴த³ஞ்ச ந ஆபஜ்ஜதி. அகுஸலங் பன ஸுராபானாவேரமணிஸீலபே⁴தோ³ ச ஹோதி மாலாதி³தா⁴ரணாதீ³ஸு வியாதி த³ட்ட²ப்³ப³ங். இதரானீதி விகாலபோ⁴ஜனாவேரமணிஆதீ³னி. தானிபி ஹி ஸஞ்சிச்ச வீதிக்கமந்தஸ்ஸ தங் தங் பி⁴ஜ்ஜதி ஏவ, இதரீதரேஸங் பன அபி⁴ஜ்ஜனேன நாஸனங்கா³னி ந ஹொந்தி. தேனேவ ‘‘ஏதேஸு பி⁴ன்னேஸூ’’தி பே⁴த³வசனங் வுத்தங்.

    Na ajānitvāti ‘‘surā’’ti ajānitvā pivato pāṇātipātāveramaṇiādisabbasīlabhedaṃ saraṇabhedañca na āpajjati. Akusalaṃ pana surāpānāveramaṇisīlabhedo ca hoti mālādidhāraṇādīsu viyāti daṭṭhabbaṃ. Itarānīti vikālabhojanāveramaṇiādīni. Tānipi hi sañcicca vītikkamantassa taṃ taṃ bhijjati eva, itarītaresaṃ pana abhijjanena nāsanaṅgāni na honti. Teneva ‘‘etesu bhinnesū’’ti bhedavacanaṃ vuttaṃ.

    அச்சயங் தே³ஸாபேதப்³போ³தி ‘‘அச்சயோ மங் ப⁴ந்தே அச்சாக³மா’’திஆதி³னா ஸங்க⁴மஜ்ஜே² தே³ஸாபெத்வா ஸரணஸீலங் தா³தப்³ப³ந்தி அதி⁴ப்பாயோ பாராஜிகத்தா தேஸங். தேனாஹ ‘‘லிங்க³னாஸனாய நாஸேதப்³போ³’’தி. அயமேவ ஹி நாஸனா இதா⁴தி⁴ப்பேதாதி லிங்க³னாஸனாகாரணேஹி பாணாதிபாதாதீ³ஹி அவண்ணபா⁴ஸனாதீ³னங் ஸஹ பதிதத்தா வுத்தங். நனு ச கண்டகஸாமணேரோபி மிச்சா²தி³ட்டி²கோ ஏவ, தஸ்ஸ ச ஹெட்டா² த³ண்ட³கம்மனாஸனாவ வுத்தா, இத⁴ பன மிச்சா²தி³ட்டி²கஸ்ஸ லிங்க³னாஸனா வுச்சதி, கோ இமேஸங் பே⁴தோ³தி சோத³னங் மனஸி நிதா⁴யாஹ ‘‘ஸஸ்ஸதுச்சே²தா³னஞ்ஹி அஞ்ஞதரதி³ட்டி²கோ’’தி. எத்த² சாயங் அதி⁴ப்பாயோ – யோ ஹி ‘‘அத்தா இஸ்ஸரோ’’தி வா ‘‘நிச்சோ து⁴வோ’’திஆதி³னா வா ‘‘அத்தா உச்சி²ஜ்ஜிஸ்ஸதி வினஸ்ஸிஸ்ஸதீ’’திஆதி³னா வா தித்தி²யபரிகப்பிதங் யங் கிஞ்சி ஸஸ்ஸதுச்சே²த³தி³ட்டி²ங் த³ள்ஹங் க³ஹெத்வா வோஹரதி, தஸ்ஸ ஸா பாராஜிகட்டா²னங் ஹோதி, ஸோ ச லிங்க³னாஸனாய நாஸேதப்³போ³. யோ பன ஈதி³ஸங் தி³ட்டி²ங் அக்³க³ஹெத்வா ஸாஸனிகோவ ஹுத்வா கேவலங் பு³த்³த⁴வசனாதி⁴ப்பாயங் விபரீததோ க³ஹெத்வா பி⁴க்கூ²ஹி ஓவதி³யமானோபி அப்படினிஸ்ஸஜ்ஜித்வா வோஹரதி, தஸ்ஸ ஸா தி³ட்டி² பாராஜிகங் ந ஹோதி, ஸோ பன கண்டகனாஸனாய ஏவ நாஸேதப்³போ³தி விமதிவினோத³னியங். இமஸ்மிங் டா²னே ஸாரத்த²தீ³பனியங் த³ஸஸிக்கா²பத³தோ பட்டா²ய வித்தா²ரதோ வண்ணனா ஆக³தா, ஸா போராணடீகாயங் ஸப்³ப³ஸோ பொத்த²கங் ஆருள்ஹா, தஸ்மா இத⁴ ந வித்தா²ரயிம்ஹ.

    Accayaṃ desāpetabboti ‘‘accayo maṃ bhante accāgamā’’tiādinā saṅghamajjhe desāpetvā saraṇasīlaṃ dātabbanti adhippāyo pārājikattā tesaṃ. Tenāha ‘‘liṅganāsanāya nāsetabbo’’ti. Ayameva hi nāsanā idhādhippetāti liṅganāsanākāraṇehi pāṇātipātādīhi avaṇṇabhāsanādīnaṃ saha patitattā vuttaṃ. Nanu ca kaṇṭakasāmaṇeropi micchādiṭṭhiko eva, tassa ca heṭṭhā daṇḍakammanāsanāva vuttā, idha pana micchādiṭṭhikassa liṅganāsanā vuccati, ko imesaṃ bhedoti codanaṃ manasi nidhāyāha ‘‘sassatucchedānañhi aññataradiṭṭhiko’’ti. Ettha cāyaṃ adhippāyo – yo hi ‘‘attā issaro’’ti vā ‘‘nicco dhuvo’’tiādinā vā ‘‘attā ucchijjissati vinassissatī’’tiādinā vā titthiyaparikappitaṃ yaṃ kiñci sassatucchedadiṭṭhiṃ daḷhaṃ gahetvā voharati, tassa sā pārājikaṭṭhānaṃ hoti, so ca liṅganāsanāya nāsetabbo. Yo pana īdisaṃ diṭṭhiṃ aggahetvā sāsanikova hutvā kevalaṃ buddhavacanādhippāyaṃ viparītato gahetvā bhikkhūhi ovadiyamānopi appaṭinissajjitvā voharati, tassa sā diṭṭhi pārājikaṃ na hoti, so pana kaṇṭakanāsanāya eva nāsetabboti vimativinodaniyaṃ. Imasmiṃ ṭhāne sāratthadīpaniyaṃ dasasikkhāpadato paṭṭhāya vitthārato vaṇṇanā āgatā, sā porāṇaṭīkāyaṃ sabbaso potthakaṃ āruḷhā, tasmā idha na vitthārayimha.

    150. ‘‘அத்தனோ பரிவேணந்தி இத³ங் புக்³க³லிகங் ஸந்தா⁴ய வுத்த’’ந்தி க³ண்டி²பதே³ஸு வுத்தங். அயங் பனெத்த² க³ண்டி²பத³காரானங் அதி⁴ப்பாயோ – வஸ்ஸக்³கே³ன பத்தஸேனாஸனந்தி இமினா தஸ்ஸ வஸ்ஸக்³கே³ன பத்தங் ஸங்கி⁴கஸேனாஸனங் வுத்தங். அத்தனோ பரிவேணந்தி இமினாபி தஸ்ஸேவ புக்³க³லிகஸேனாஸனங் வுத்தந்தி. அயங் பனெத்த² அம்ஹாகங் க²ந்தி – யத்த² வா வஸதீதி இமினா ஸங்கி⁴கங் வா ஹோது புக்³க³லிகங் வா, தஸ்ஸ நிப³த்³த⁴வஸனகஸேனாஸனங் வுத்தங். யத்த² வா படிக்கமதீதி இமினா பன யங் ஆசரியுபஜ்ஜா²யஸ்ஸ வஸனட்டா²னங் உபட்டா²னாதி³னிமித்தங் நிப³த்³த⁴ங் பவிஸதி, தங் ஆசரியுபஜ்ஜா²யானங் பவிஸனட்டா²னங் வுத்தங், தஸ்மா தது³ப⁴யங் த³ஸ்ஸேதுங் ‘‘உப⁴யேனபி அத்தனோ பரிவேணஞ்ச வஸ்ஸக்³கே³ன பத்தஸேனாஸனஞ்ச வுத்த’’ந்தி ஆஹ. தத்த² அத்தனோ பரிவேணந்தி இமினா ஆசரியுபஜ்ஜா²யானங் நிவாஸனட்டா²னங் த³ஸ்ஸிதங், வஸ்ஸக்³கே³ன பத்தஸேனாஸனந்தி இமினா பன தஸ்ஸ வஸனட்டா²னங், தஸ்மா தது³ப⁴யம்பி ஸங்கி⁴கங் வா ஹோது புக்³க³லிகங் வா, ஆவரணங் காதப்³ப³மேவாதி. முக²த்³வாரிகந்தி முக²த்³வாரேன பு⁴ஞ்ஜிதப்³ப³ங். த³ண்ட³கம்மங் கத்வாதி த³ண்ட³கம்மங் யோஜெத்வா. த³ண்டெ³ந்தி வினெந்தி ஏதேனாதி த³ண்டோ³, ஸோயேவ கத்தப்³ப³த்தா கம்மந்தி த³ண்ட³கம்மங், ஆவரணாதி³. த³ண்ட³கம்மமஸ்ஸ கரோதா²தி அஸ்ஸ த³ண்ட³கம்மங் யோஜேத² ஆணாபேத². த³ண்ட³கம்மந்தி வா நிக்³க³ஹகம்மங், தஸ்மா நிக்³க³ஹமஸ்ஸ கரோதா²தி வுத்தங் ஹோதி. ஏஸ நயோ ஸப்³ப³த்த² ஈதி³ஸேஸு டா²னேஸு.

    150.‘‘Attano pariveṇanti idaṃ puggalikaṃ sandhāya vutta’’nti gaṇṭhipadesu vuttaṃ. Ayaṃ panettha gaṇṭhipadakārānaṃ adhippāyo – vassaggena pattasenāsananti iminā tassa vassaggena pattaṃ saṅghikasenāsanaṃ vuttaṃ. Attano pariveṇanti imināpi tasseva puggalikasenāsanaṃ vuttanti. Ayaṃ panettha amhākaṃ khanti – yattha vā vasatīti iminā saṅghikaṃ vā hotu puggalikaṃ vā, tassa nibaddhavasanakasenāsanaṃ vuttaṃ. Yattha vā paṭikkamatīti iminā pana yaṃ ācariyupajjhāyassa vasanaṭṭhānaṃ upaṭṭhānādinimittaṃ nibaddhaṃ pavisati, taṃ ācariyupajjhāyānaṃ pavisanaṭṭhānaṃ vuttaṃ, tasmā tadubhayaṃ dassetuṃ ‘‘ubhayenapi attano pariveṇañca vassaggena pattasenāsanañca vutta’’nti āha. Tattha attano pariveṇanti iminā ācariyupajjhāyānaṃ nivāsanaṭṭhānaṃ dassitaṃ, vassaggena pattasenāsananti iminā pana tassa vasanaṭṭhānaṃ, tasmā tadubhayampi saṅghikaṃ vā hotu puggalikaṃ vā, āvaraṇaṃ kātabbamevāti. Mukhadvārikanti mukhadvārena bhuñjitabbaṃ. Daṇḍakammaṃ katvāti daṇḍakammaṃ yojetvā. Daṇḍenti vinenti etenāti daṇḍo, soyeva kattabbattā kammanti daṇḍakammaṃ, āvaraṇādi. Daṇḍakammamassa karothāti assa daṇḍakammaṃ yojetha āṇāpetha. Daṇḍakammanti vā niggahakammaṃ, tasmā niggahamassa karothāti vuttaṃ hoti. Esa nayo sabbattha īdisesu ṭhānesu.

    ஸேனாஸனக்³கா³ஹோ ச படிப்பஸ்ஸம்ப⁴ந்தீதி இமினா சி²ன்னவஸ்ஸோ ஹோதீதி தீ³பேதி. ஸசே ஆகிண்ணதோ³ஸோவ ஹோதி, ஆயதிங் ஸங்வரே ந திட்ட²தி, நிக்கட்³டி⁴தப்³போ³தி எத்த² ஸசே யாவததியங் வுச்சமானோ ந ஓரமதி, ஸங்க⁴ங் அபலோகெத்வா நாஸேதப்³போ³, புன பப்³ப³ஜ்ஜங் யாசமானோபி அபலோகெத்வா பப்³பா³ஜேதப்³போ³தி வத³ந்தி. பச்சி²மிகாய வஸ்ஸாவாஸிகங் லச்ச²தீதி பச்சி²மிகாய புன வஸ்ஸங் உபக³தத்தா லச்ச²தி. அபலோகெத்வா லாபோ⁴ தா³தப்³போ³தி சி²ன்னவஸ்ஸதாய வுத்தங். இதரானி பஞ்ச ஸிக்கா²பதா³னீதி விகாலபோ⁴ஜனாதீ³னி பஞ்ச. அச்சயங் தே³ஸாபேதப்³போ³தி ‘‘அச்சயோ மங் ப⁴ந்தே அச்சாக³மா’’திஆதி³னா நயேன தே³ஸாபேதப்³போ³தி ஸாரத்த²தீ³பனியங் (ஸாரத்த²॰ டீ॰ மஹாவக்³க³ 3.108) வுத்தங்.

    Senāsanaggāho ca paṭippassambhantīti iminā chinnavasso hotīti dīpeti. Sace ākiṇṇadosova hoti, āyatiṃ saṃvare na tiṭṭhati, nikkaḍḍhitabboti ettha sace yāvatatiyaṃ vuccamāno na oramati, saṅghaṃ apaloketvā nāsetabbo, puna pabbajjaṃ yācamānopi apaloketvā pabbājetabboti vadanti. Pacchimikāya vassāvāsikaṃ lacchatīti pacchimikāya puna vassaṃ upagatattā lacchati. Apaloketvā lābho dātabboti chinnavassatāya vuttaṃ. Itarāni pañca sikkhāpadānīti vikālabhojanādīni pañca. Accayaṃ desāpetabboti ‘‘accayo maṃ bhante accāgamā’’tiādinā nayena desāpetabboti sāratthadīpaniyaṃ (sārattha. ṭī. mahāvagga 3.108) vuttaṃ.

    இதி வினயஸங்க³ஹஸங்வண்ணனாபூ⁴தே வினயாலங்காரே

    Iti vinayasaṅgahasaṃvaṇṇanābhūte vinayālaṅkāre

    பப்³ப³ஜ்ஜாவினிச்ச²யகதா²லங்காரோ நாம

    Pabbajjāvinicchayakathālaṅkāro nāma

    த்³வாவீஸதிமோ பரிச்சே²தோ³.

    Dvāvīsatimo paricchedo.

    உபஸம்பதா³வினிச்ச²யகதா²

    Upasampadāvinicchayakathā

    ஏவங் பப்³ப³ஜ்ஜாவினிச்ச²யங் கதெ²த்வா தத³னந்தரங் உபஸம்பதா³வினிச்ச²யோ கதே²தப்³போ³, ஏவங் ஸந்தேபி அட்ட²கதா²யங் உபஸம்பதா³வினிச்ச²யகதா² பாளிவண்ணனாவஸேனேவ ஆக³தா, நோ பாளிமுத்தகவினிச்ச²யவஸேன, இமஸ்ஸ பன பகரணஸ்ஸ பாளிமுத்தகவினிச்ச²யகதா²பூ⁴தத்தா தமகதெ²த்வா நிஸ்ஸயவினிச்ச²யோ ஏவ ஆசரியேன கதி²தோ, மயங் பன உபஸம்பதா³வினிச்ச²யஸ்ஸ அதிஸுகு²மத்தா அதிக³ம்பீ⁴ரத்தா ஸுது³ல்லப⁴த்தா ஸாஸனானுக்³க³ஹத்த²ங் ஆசரியேன அவுத்தம்பி ஸமந்தபாஸாதி³கதோ நீஹரித்வா விமதிவினோத³னீஆதி³ப்பகரணேஸு ஆக³தவினிச்ச²யேன அலங்கரித்வா தங் வினிச்ச²யங் கத²யிஸ்ஸாம.

    Evaṃ pabbajjāvinicchayaṃ kathetvā tadanantaraṃ upasampadāvinicchayo kathetabbo, evaṃ santepi aṭṭhakathāyaṃ upasampadāvinicchayakathā pāḷivaṇṇanāvaseneva āgatā, no pāḷimuttakavinicchayavasena, imassa pana pakaraṇassa pāḷimuttakavinicchayakathābhūtattā tamakathetvā nissayavinicchayo eva ācariyena kathito, mayaṃ pana upasampadāvinicchayassa atisukhumattā atigambhīrattā sudullabhattā sāsanānuggahatthaṃ ācariyena avuttampi samantapāsādikato nīharitvā vimativinodanīādippakaraṇesu āgatavinicchayena alaṅkaritvā taṃ vinicchayaṃ kathayissāma.

    தேன கோ² பன ஸமயேனாதி யேன ஸமயேன ப⁴க³வதா ‘‘ந பி⁴க்க²வே அனுபஜ்ஜா²யகோ’’திஆதி³ஸிக்கா²பத³ங் அபஞ்ஞத்தங் ஹோதி, தேன ஸமயேன. அனுபஜ்ஜா²யகந்தி உபஜ்ஜ²ங் அகா³ஹாபெத்வா ஸப்³பே³ன ஸப்³ப³ங் உபஜ்ஜா²யவிரஹிதங், ஏவங் உபஸம்பன்னா நேவ த⁴ம்மதோ ந ஆமிஸதோ ஸங்க³ஹங் லப⁴ந்தி, தே பரிஹாயந்தியேவ, ந வட்³ட⁴ந்தி. ந பி⁴க்க²வே அனுபஜ்ஜா²யகோதி உபஜ்ஜ²ங் அகா³ஹாபெத்வா நிருபஜ்ஜா²யகோ ந உபஸம்பாதே³தப்³போ³, யோ உபஸம்பாதெ³ய்ய, ஆபத்தி து³க்கடஸ்ஸாதி ஸிக்கா²பத³பஞ்ஞத்திதோ பட்டா²ய ஏவங் உபஸம்பாதெ³ந்தஸ்ஸ ஆபத்தி ஹோதி, கம்மங் பன ந குப்பதி. கேசி ‘‘குப்பதீ’’தி வத³ந்தி, தங் ந க³ஹேதப்³ப³ங். ‘‘ஸங்கே⁴ன உபஜ்ஜா²யேனா’’திஆதீ³ஸுபி உப⁴தொப்³யஞ்ஜனகுபஜ்ஜா²யபரியோஸானேஸு ஏஸேவ நயோ.

    Tena kho pana samayenāti yena samayena bhagavatā ‘‘na bhikkhave anupajjhāyako’’tiādisikkhāpadaṃ apaññattaṃ hoti, tena samayena. Anupajjhāyakanti upajjhaṃ agāhāpetvā sabbena sabbaṃ upajjhāyavirahitaṃ, evaṃ upasampannā neva dhammato na āmisato saṅgahaṃ labhanti, te parihāyantiyeva, na vaḍḍhanti. Na bhikkhave anupajjhāyakoti upajjhaṃ agāhāpetvā nirupajjhāyako na upasampādetabbo, yo upasampādeyya, āpatti dukkaṭassāti sikkhāpadapaññattito paṭṭhāya evaṃ upasampādentassa āpatti hoti, kammaṃ pana na kuppati. Keci ‘‘kuppatī’’ti vadanti, taṃ na gahetabbaṃ. ‘‘Saṅghena upajjhāyenā’’tiādīsupi ubhatobyañjanakupajjhāyapariyosānesu eseva nayo.

    அபத்தகா ஹத்தே²ஸு பிண்டா³ய சரந்தீதி யோ ஹத்தே²ஸு பிண்டோ³ லப்³ப⁴தி, தத³த்தா²ய சரந்தி. ஸெய்யதா²பி தித்தி²யாதி யதா² ஆஜீவகனாமகா தித்தி²யா. ஸூபப்³யஞ்ஜனேஹி மிஸ்ஸெத்வா ஹத்தே²ஸு ட²பிதபிண்ட³மேவ ஹி தே பு⁴ஞ்ஜந்தி. ஆபத்தி து³க்கடஸ்ஸாதி ஏவங் உபஸம்பாதெ³ந்தஸ்ஸேவ ஆபத்தி ஹோதி, கம்மங் பன ந குப்பதி, அசீவரகாதி³வத்தூ²ஸுபி ஏஸேவ நயோ.

    Apattakā hatthesu piṇḍāya carantīti yo hatthesu piṇḍo labbhati, tadatthāya caranti. Seyyathāpi titthiyāti yathā ājīvakanāmakā titthiyā. Sūpabyañjanehi missetvā hatthesu ṭhapitapiṇḍameva hi te bhuñjanti. Āpatti dukkaṭassāti evaṃ upasampādentasseva āpatti hoti, kammaṃ pana na kuppati, acīvarakādivatthūsupi eseva nayo.

    யாசிதகேனாதி ‘‘யாவ உபஸம்பத³ங் கரோம, தாவ தே³தா²’’தி யாசித்வா க³ஹிதேன, தாவகாலிகேனாதி அத்தோ². ஈதி³ஸேன ஹி பத்தேன வா சீவரேன வா பத்தசீவரேன வா உபஸம்பாதெ³ந்தஸ்ஸேவ ஆபத்தி ஹோதி, கம்மங் பன ந குப்பதி, தஸ்மா பரிபுண்ணபத்தசீவரோவ உபஸம்பாதே³தப்³போ³. ஸசே தஸ்ஸ நத்தி², ஆசரியுபஜ்ஜா²யா சஸ்ஸ தா³துகாமா ஹொந்தி , அஞ்ஞே வா பி⁴க்கூ², நிரபெக்கே²ஹி விஸ்ஸஜ்ஜெத்வா அதி⁴ட்டா²னூபக³ங் பத்தசீவரங் தா³தப்³ப³ங்.

    Yācitakenāti ‘‘yāva upasampadaṃ karoma, tāva dethā’’ti yācitvā gahitena, tāvakālikenāti attho. Īdisena hi pattena vā cīvarena vā pattacīvarena vā upasampādentasseva āpatti hoti, kammaṃ pana na kuppati, tasmā paripuṇṇapattacīvarova upasampādetabbo. Sace tassa natthi, ācariyupajjhāyā cassa dātukāmā honti , aññe vā bhikkhū, nirapekkhehi vissajjetvā adhiṭṭhānūpagaṃ pattacīvaraṃ dātabbaṃ.

    கொ³த்தேனபி அனுஸ்ஸாவேதுந்தி ‘‘மஹாகஸ்ஸபஸ்ஸ உபஸம்பதா³பெக்கோ²’’தி ஏவங் கொ³த்தங் வத்வா அனுஸ்ஸாவேதுங் அனுஜானாமீதி அத்தோ². த்³வே ஏகானுஸ்ஸாவனேதி த்³வே ஏகதோ அனுஸ்ஸாவனே, ஏகேன ஏகஸ்ஸ, அஞ்ஞேன இதரஸ்ஸாதி ஏவங் த்³வீஹி வா ஆசரியேஹி ஏகேன வா ஏகக்க²ணே கம்மவாசங் அனுஸ்ஸாவெந்தேஹி உபஸம்பாதே³துங் அனுஜானாமீதி அத்தோ². த்³வே தயோ ஏகானுஸ்ஸாவனே காதுங், தஞ்ச கோ² ஏகேன உபஜ்ஜா²யேனாதி த்³வே வா தயோ வா ஜனே புரிமனயேனேவ ஏகதோ அனுஸ்ஸாவனே காதுங் அனுஜானாமி, தஞ்ச கோ² அனுஸ்ஸாவனகிரியங் ஏகேன உபஜ்ஜா²யேன அனுஜானாமீதி அத்தோ². தஸ்மா ஏகேன ஆசரியேன த்³வே வா தயோ வா அனுஸ்ஸாவேதப்³பா³. த்³வீஹி வா தீஹி வா ஆசரியேஹி விஸுங் விஸுங் ஏகேன ஏகஸ்ஸாதி ஏவங் ஏகப்பஹாரேனேவ த்³வே திஸ்ஸோ வா கம்மவாசா காதப்³பா³. ஸசே பன நானாசரியா நானுபஜ்ஜா²யா ஹொந்தி, திஸ்ஸத்தே²ரோ ஸுமனத்தே²ரஸ்ஸ ஸத்³தி⁴விஹாரிகங், ஸுமனத்தே²ரோ திஸ்ஸத்தே²ரஸ்ஸ ஸத்³தி⁴விஹாரிகங் அனுஸ்ஸாவேதி, அஞ்ஞமஞ்ஞஞ்ச க³ணபூரகா ஹொந்தி, வட்டதி. ஸசே நானுபஜ்ஜா²யா ஹொந்தி, ஏகோ ஆசரியோ ஹோதி, ‘‘ந த்வேவ நானுபஜ்ஜா²யேனா’’தி படிக்கி²த்தத்தா ந வட்டதி. இத³ங் ஸந்தா⁴ய ஹி ஏஸ படிக்கே²போ.

    Gottenapi anussāvetunti ‘‘mahākassapassa upasampadāpekkho’’ti evaṃ gottaṃ vatvā anussāvetuṃ anujānāmīti attho. Dve ekānussāvaneti dve ekato anussāvane, ekena ekassa, aññena itarassāti evaṃ dvīhi vā ācariyehi ekena vā ekakkhaṇe kammavācaṃ anussāventehi upasampādetuṃ anujānāmīti attho. Dve tayo ekānussāvane kātuṃ, tañca kho ekenaupajjhāyenāti dve vā tayo vā jane purimanayeneva ekato anussāvane kātuṃ anujānāmi, tañca kho anussāvanakiriyaṃ ekena upajjhāyena anujānāmīti attho. Tasmā ekena ācariyena dve vā tayo vā anussāvetabbā. Dvīhi vā tīhi vā ācariyehi visuṃ visuṃ ekena ekassāti evaṃ ekappahāreneva dve tisso vā kammavācā kātabbā. Sace pana nānācariyā nānupajjhāyā honti, tissatthero sumanattherassa saddhivihārikaṃ, sumanatthero tissattherassa saddhivihārikaṃ anussāveti, aññamaññañca gaṇapūrakā honti, vaṭṭati. Sace nānupajjhāyā honti, eko ācariyo hoti, ‘‘na tveva nānupajjhāyenā’’ti paṭikkhittattā na vaṭṭati. Idaṃ sandhāya hi esa paṭikkhepo.

    பட²மங் உபஜ்ஜ²ங் கா³ஹாபேதப்³போ³தி எத்த² வஜ்ஜாவஜ்ஜங் உபனிஜ்ஜா²யதீதி உபஜ்ஜா², தங் உபஜ்ஜ²ங் ‘‘உபஜ்ஜா²யோ மே, ப⁴ந்தே, ஹோஹீ’’தி ஏவங் வதா³பெத்வா கா³ஹாபேதப்³போ³. வித்தா²யந்தீதி வித்த²த்³த⁴க³த்தா ஹொந்தி. யங் ஜாதந்தி யங் தவ ஸரீரே ஜாதங் நிப்³ப³த்தங் விஜ்ஜமானங், தங் ஸங்க⁴மஜ்ஜே² புச்ச²ந்தே ஸந்தங் அத்தீ²தி வத்தப்³ப³ந்திஆதி³. உல்லும்பது மந்தி உத்³த⁴ரது மங்.

    Paṭhamaṃ upajjhaṃ gāhāpetabboti ettha vajjāvajjaṃ upanijjhāyatīti upajjhā, taṃ upajjhaṃ ‘‘upajjhāyo me, bhante, hohī’’ti evaṃ vadāpetvā gāhāpetabbo. Vitthāyantīti vitthaddhagattā honti. Yaṃ jātanti yaṃ tava sarīre jātaṃ nibbattaṃ vijjamānaṃ, taṃ saṅghamajjhe pucchante santaṃ atthīti vattabbantiādi. Ullumpatu manti uddharatu maṃ.

    தாவதே³வாதி உபஸம்பன்னஸமனந்தரமேவ. சா²யா மேதப்³பா³தி ஏகபோரிஸா வா த்³விபோரிஸா வாதி சா²யா மேதப்³பா³. உதுப்பமாணங் ஆசிக்கி²தப்³ப³ந்தி ‘‘வஸ்ஸானோ ஹேமந்தோ கி³ம்ஹோ’’தி உதுப்பமாணங் ஆசிக்கி²தப்³ப³ங். எத்த² ச உதுயேவ உதுப்பமாணங். ஸசே வஸ்ஸானாத³யோ அபரிபுண்ணா ஹொந்தி, யத்தகேஹி தி³வஸேஹி யஸ்ஸ யோ உது அபரிபுண்ணோ, தே தி³வஸே ஸல்லக்கெ²த்வா ஸோ தி³வஸபா⁴கோ³ ஆசிக்கி²தப்³போ³. அத² வா ‘‘அயங் நாம உது, ஸோ ச கோ² பரிபுண்ணோ அபரிபுண்ணோ வா’’தி ஏவங் உதுப்பமாணங் ஆசிக்கி²தப்³ப³ங், ‘‘புப்³ப³ண்ஹோ வா ஸாயன்ஹோ வா’’தி ஏவங் தி³வஸபா⁴கோ³ ஆசிக்கி²தப்³போ³. ஸங்கீ³தீதி இத³மேவ ஸப்³ப³ங் ஏகதோ கத்வா ‘‘த்வங் கிங் லப⁴ஸி, கா தே சா²யா, கிங் உதுப்பமாணங், கோ தி³வஸபா⁴கோ³’’தி புட்டோ² ‘‘இத³ங் நாம லபா⁴மி வஸ்ஸங் வா ஹேமந்தங் வா கி³ம்ஹங் வா, அயங் மே சா²யா, இத³ங் உதுப்பமாணங், அயங் தி³வஸபா⁴கோ³தி வதெ³ய்யாஸீ’’தி ஏவங் ஆசிக்கி²தப்³ப³ங்.

    Tāvadevāti upasampannasamanantarameva. Chāyā metabbāti ekaporisā vā dviporisā vāti chāyā metabbā. Utuppamāṇaṃ ācikkhitabbanti ‘‘vassāno hemanto gimho’’ti utuppamāṇaṃ ācikkhitabbaṃ. Ettha ca utuyeva utuppamāṇaṃ. Sace vassānādayo aparipuṇṇā honti, yattakehi divasehi yassa yo utu aparipuṇṇo, te divase sallakkhetvā so divasabhāgo ācikkhitabbo. Atha vā ‘‘ayaṃ nāma utu, so ca kho paripuṇṇo aparipuṇṇo vā’’ti evaṃ utuppamāṇaṃ ācikkhitabbaṃ, ‘‘pubbaṇho vā sāyanho vā’’ti evaṃ divasabhāgo ācikkhitabbo. Saṅgītīti idameva sabbaṃ ekato katvā ‘‘tvaṃ kiṃ labhasi, kā te chāyā, kiṃ utuppamāṇaṃ, ko divasabhāgo’’ti puṭṭho ‘‘idaṃ nāma labhāmi vassaṃ vā hemantaṃ vā gimhaṃ vā, ayaṃ me chāyā, idaṃ utuppamāṇaṃ, ayaṃ divasabhāgoti vadeyyāsī’’ti evaṃ ācikkhitabbaṃ.

    ஓஹாயாதி ச²ட்³டெ³த்வா. து³தியங் தா³துந்தி உபஸம்பத³மாளகதோ பரிவேணங் க³ச்ச²ந்தஸ்ஸ து³தியகங் தா³துங் அனுஜானாமி, சத்தாரி ச அகரணீயானி ஆசிக்கி²துந்தி அத்தோ². பண்டு³பலாஸோதி பண்டு³வண்ணோ பத்தோ. ப³ந்த⁴னா பவுத்தோதி வண்டதோ பதிதோ. அப⁴ப்³போ³ ஹரிதத்தா²யாதி புன ஹரிதோ ப⁴விதுங் அப⁴ப்³போ³. புது²ஸிலாதி மஹாஸிலா. அயங் ஸமந்தபாஸாதி³கதோ நீஹரித்வா ஆப⁴தோ உபஸம்பதா³வினிச்ச²யோ.

    Ohāyāti chaḍḍetvā. Dutiyaṃ dātunti upasampadamāḷakato pariveṇaṃ gacchantassa dutiyakaṃ dātuṃ anujānāmi, cattāri ca akaraṇīyāni ācikkhitunti attho. Paṇḍupalāsoti paṇḍuvaṇṇo patto. Bandhanā pavuttoti vaṇṭato patito. Abhabbo haritatthāyāti puna harito bhavituṃ abhabbo. Puthusilāti mahāsilā. Ayaṃ samantapāsādikato nīharitvā ābhato upasampadāvinicchayo.

    அனுபஜ்ஜா²யாதி³வத்தூ²ஸு ஸிக்கா²பத³ங் அபஞ்ஞத்தந்தி ‘‘ந அனுபஜ்ஜா²யகோ உபஸம்பாதே³தப்³போ³’’தி (மஹாவ॰ 117) இதே⁴வ பஞ்ஞாபியமானங் ஸிக்கா²பத³ங் ஸந்தா⁴ய வுத்தங். கம்மங் பன ந குப்பதீதி இத³ங் உபஜ்ஜா²யாபா⁴வேபி ‘‘இத்த²ன்னாமஸ்ஸ உபஸம்பதா³பெக்கா² இத்த²ன்னாமேன உபஜ்ஜா²யேனா’’தி மதஸ்ஸ வா விப்³ப⁴ந்தஸ்ஸ வா புராணஉபஜ்ஜா²யஸ்ஸ, அஞ்ஞஸ்ஸ வா யஸ்ஸ கஸ்ஸசி அவிஜ்ஜமானஸ்ஸபி நாமேன ஸப்³ப³த்த² உபஜ்ஜா²யகித்தனஸ்ஸ கதத்தா வுத்தங். யதி³ ஹி உபஜ்ஜா²யகித்தனங் ந கரெய்ய, ‘‘புக்³க³லங் ந பராமஸதீ’’தி வுத்தகம்மவிபத்தி ஏவ ஸியா. தேனேவ பாளியங் (மஹாவ॰ 117) ‘‘அனுபஜ்ஜா²யக’’ந்தி வுத்தங், அட்ட²கதா²யம்பி (மஹாவ॰ அட்ட²॰ 117) அஸ்ஸ ‘‘உபஜ்ஜா²யங் அகித்தெத்வா’’தி அவத்வா ‘‘உபஜ்ஜா²யங் அகா³ஹாபெத்வா ஸப்³பே³ன ஸப்³ப³ங் உபஜ்ஜா²யவிரஹிதங்’’ இச்சேவ அத்தோ² வுத்தோ. பாளியங் ஸங்கே⁴ன உபஜ்ஜா²யேனாதி ‘‘அயங் இத்த²ன்னாமோ ஸங்க⁴ஸ்ஸ உபஸம்பதா³பெக்கோ², இத்த²ன்னாமோ ஸங்க⁴ங் உபஸம்பத³ங் யாசதி ஸங்கே⁴ன உபஜ்ஜா²யேனா’’தி ஏவங் கம்மவாசாய ஸங்க⁴மேவ உபஜ்ஜா²யங் கித்தெத்வாதி அத்தோ². ஏவங் க³ணேன உபஜ்ஜா²யேனாதி எத்தா²பி ‘‘அயங் இத்த²ன்னாமோ க³ணஸ்ஸ உபஸம்பதா³பெக்கோ²’’திஆதி³னா யோஜனா வேதி³தப்³பா³. ஏவங் வுத்தேபி கம்மங் ந குப்பதி ஏவ து³க்கடஸ்ஸேவ வுத்தத்தா, அஞ்ஞதா² ‘‘ஸோ ச புக்³க³லோ அனுபஸம்பன்னோ’’தி வதெ³ய்ய. தேனாஹ ‘‘ஸங்கே⁴னா’’திஆதி³. தத்த² பண்ட³காதி³உபஜ்ஜா²யேஹி கரியமானேஸு கம்மேஸு பண்ட³காதி³கே வினாவ யதி³ பஞ்சவக்³கா³தி³க³ணோ பூரதி, கம்மங் ந குப்பதி, இதரதா² குப்பதீதி வேதி³தப்³ப³ங்.

    Anupajjhāyādivatthūsu sikkhāpadaṃ apaññattanti ‘‘na anupajjhāyako upasampādetabbo’’ti (mahāva. 117) idheva paññāpiyamānaṃ sikkhāpadaṃ sandhāya vuttaṃ. Kammaṃ pana na kuppatīti idaṃ upajjhāyābhāvepi ‘‘itthannāmassa upasampadāpekkhā itthannāmena upajjhāyenā’’ti matassa vā vibbhantassa vā purāṇaupajjhāyassa, aññassa vā yassa kassaci avijjamānassapi nāmena sabbattha upajjhāyakittanassa katattā vuttaṃ. Yadi hi upajjhāyakittanaṃ na kareyya, ‘‘puggalaṃ na parāmasatī’’ti vuttakammavipatti eva siyā. Teneva pāḷiyaṃ (mahāva. 117) ‘‘anupajjhāyaka’’nti vuttaṃ, aṭṭhakathāyampi (mahāva. aṭṭha. 117) assa ‘‘upajjhāyaṃ akittetvā’’ti avatvā ‘‘upajjhāyaṃ agāhāpetvā sabbena sabbaṃ upajjhāyavirahitaṃ’’ icceva attho vutto. Pāḷiyaṃ saṅghena upajjhāyenāti ‘‘ayaṃ itthannāmo saṅghassa upasampadāpekkho, itthannāmo saṅghaṃ upasampadaṃ yācati saṅghena upajjhāyenā’’ti evaṃ kammavācāya saṅghameva upajjhāyaṃ kittetvāti attho. Evaṃ gaṇena upajjhāyenāti etthāpi ‘‘ayaṃ itthannāmo gaṇassa upasampadāpekkho’’tiādinā yojanā veditabbā. Evaṃ vuttepi kammaṃ na kuppati eva dukkaṭasseva vuttattā, aññathā ‘‘so ca puggalo anupasampanno’’ti vadeyya. Tenāha ‘‘saṅghenā’’tiādi. Tattha paṇḍakādiupajjhāyehi kariyamānesu kammesu paṇḍakādike vināva yadi pañcavaggādigaṇo pūrati, kammaṃ na kuppati, itarathā kuppatīti veditabbaṃ.

    அபத்தசீவரவத்தூ²ஸுபி பத்தசீவரானங் அபா⁴வேபி ‘‘பரிபுண்ணஸ்ஸ பத்தசீவர’’ந்தி கம்மவாசாய ஸாவிதத்தா கம்மகோபங் அவத்வா து³க்கடமேவ வுத்தங். இதரதா² ஸாவனாய ஹாபனதோ கம்மகோபோ ஏவ ஸியா. கேசி பன ‘‘பட²மங் அனுஞ்ஞாதகம்மவாசாயங் உபஸம்பன்னா விய இதா³னிபி ‘பரிபுண்ணஸ்ஸ பத்தசீவர’ந்தி அவத்வா கம்மவாசாய உபஸம்பன்னாபி ஸூபஸம்பன்னா ஏவா’’தி வத³ந்தி, தங் ந யுத்தங். அனுஞ்ஞாதகாலதோ பட்டா²ய ஹி அபராமஸனங் ஸாவனாய ஹாபனவிபத்தி ஏவ ஹோதி ‘‘இத்த²ன்னாமோ ஸங்க⁴ங் உபஸம்பத³ங் யாசதீ’’தி பத³ஸ்ஸ ஹாபனே விய . தம்பி ஹி பச்சா² அனுஞ்ஞாதங், ‘‘ஸங்க⁴ங், ப⁴ந்தே, உபஸம்பத³ங் யாசாமீ’’திஆதி³வாக்யேன அயாசெத்வா தம்பி உபஸம்பாதெ³ந்தோ ‘‘அயங் இத்த²ன்னாமோ ஸங்க⁴ங் உபஸம்பத³ங் யாசதீ’’தி வத்வாவ யதி³ கம்மவாசங் கரோதி, கம்மங் ஸுகதமேவ ஹோதி. நோ சே, விபன்னங். ஸப்³ப³பச்சா² ஹி அனுஞ்ஞாதகம்மவாசதோ கிஞ்சிபி பரிஹாபேதுங் ந வட்டதி, ஸாவனாய ஹாபனமேவ ஹோதி, அஞ்ஞே வா பி⁴க்கூ² தா³துகாமா ஹொந்தீதி ஸம்ப³ந்தோ⁴, அயமெத்த² விமதிவினோத³னியா (வி॰ வி॰ டீ॰ மஹாவக்³க³ 2.117) ஆப⁴தோ வினிச்ச²யோ. ஸாரத்த²தீ³பனீவினிச்ச²யோ பன இதே⁴வ அந்தோக³தா⁴ ஹோதி அப்பதரத்தா அவிஸேஸத்தா ச.

    Apattacīvaravatthūsupi pattacīvarānaṃ abhāvepi ‘‘paripuṇṇassa pattacīvara’’nti kammavācāya sāvitattā kammakopaṃ avatvā dukkaṭameva vuttaṃ. Itarathā sāvanāya hāpanato kammakopo eva siyā. Keci pana ‘‘paṭhamaṃ anuññātakammavācāyaṃ upasampannā viya idānipi ‘paripuṇṇassa pattacīvara’nti avatvā kammavācāya upasampannāpi sūpasampannā evā’’ti vadanti, taṃ na yuttaṃ. Anuññātakālato paṭṭhāya hi aparāmasanaṃ sāvanāya hāpanavipatti eva hoti ‘‘itthannāmo saṅghaṃ upasampadaṃ yācatī’’ti padassa hāpane viya . Tampi hi pacchā anuññātaṃ, ‘‘saṅghaṃ, bhante, upasampadaṃ yācāmī’’tiādivākyena ayācetvā tampi upasampādento ‘‘ayaṃ itthannāmo saṅghaṃ upasampadaṃ yācatī’’ti vatvāva yadi kammavācaṃ karoti, kammaṃ sukatameva hoti. No ce, vipannaṃ. Sabbapacchā hi anuññātakammavācato kiñcipi parihāpetuṃ na vaṭṭati, sāvanāya hāpanameva hoti, aññe vā bhikkhū dātukāmā hontīti sambandho, ayamettha vimativinodaniyā (vi. vi. ṭī. mahāvagga 2.117) ābhato vinicchayo. Sāratthadīpanīvinicchayo pana idheva antogadhā hoti appatarattā avisesattā ca.

    வஜிரபு³த்³தி⁴டீகாயங் (வஜிர॰ டீ॰ மஹாவக்³க³ 117) பன ‘‘கேசி குப்பதீதி வத³ந்தி, தங் ந க³ஹேதப்³ப³’’ந்தி யங் வுத்தங், தங் ‘‘பஞ்சவக்³க³கரணீயஞ்சே, பி⁴க்க²வே, கம்மங், பி⁴க்கு²னிபஞ்சமோ கம்மங் கரெய்ய, அகம்மங் ந ச கரணீய’’ந்திஆதி³னா (மஹாவ॰ 390) நயேன வுத்தத்தா பண்ட³கானங் க³ணபூரணபா⁴வே ஏவ கம்மங் குப்பதி, ந ஸப்³ப³ந்தி கத்வா ஸுவுத்தங், இதரதா² ‘‘பண்ட³குபஜ்ஜா²யேன கம்மங் கரெய்ய, அகம்மங் ந ச கரணீய’’ந்திஆதி³காய பாளியா ப⁴விதப்³ப³ங் ஸியா. யதா² அபரிபுண்ணபத்தசீவரஸ்ஸ உபஸம்பாத³னகாலே கம்மவாசாயங் ‘‘பரிபுண்ணஸ்ஸ பத்தசீவர’’ந்தி அஸந்தங் வத்து²ங் கித்தெத்வா உபஸம்பதா³ய கதாய தஸ்மிங் அஸந்தேபி உபஸம்பதா³ ருஹதி, ஏவங் ‘‘அயங் பு³த்³த⁴ரக்கி²தோ ஆயஸ்மதோ த⁴ம்மரக்கி²தஸ்ஸ உபஸம்பதா³பெக்கோ²’’தி அவத்து²ங் பண்ட³குபஜ்ஜா²யாதி³ங், அஸந்தங் வா வத்து²ங் கித்தெத்வா கதாயபி க³ணபூரகானமத்தி²தாய உபஸம்பதா³ ருஹதேவ. ‘‘ந, பி⁴க்க²வே, பண்ட³குபஜ்ஜா²யேன உபஸம்பாதே³தப்³போ³, யோ உபஸம்பாதெ³ய்ய, ஆபத்தி து³க்கடஸ்ஸ, ஸோ ச புக்³க³லோ அனுபஸம்பன்னோ’’திஆதி³வசனஸ்ஸ அபா⁴வா அயமத்தோ² ஸித்³தோ⁴வ ஹோதி. ந ஹி பு³த்³தா⁴ வத்தப்³ப³யுத்தங் ந வத³ந்தி. தேன வுத்தங் ‘‘யோ பன பி⁴க்கு² ஜானங் ஊனவீஸதிவஸ்ஸங் …பே॰… ஸோ ச புக்³க³லோ அனுபஸம்பன்னோ’’திஆதி³ (பாசி॰ 403). ததா² ‘‘ப்³யத்தேன பி⁴க்கு²னா படிப³லேன ஸங்கோ⁴ ஞாபேதப்³போ³’’தி (மஹாவ॰ 71) வசனதோ தெ²ய்யஸங்வாஸகாதி³ஆசரியேஹி அனுஸ்ஸாவனாய கதாய உபஸம்பதா³ ந ருஹதி தேஸங் அபி⁴க்கு²த்தாதி வசனம்பி ந க³ஹேதப்³ப³ங்.

    Vajirabuddhiṭīkāyaṃ (vajira. ṭī. mahāvagga 117) pana ‘‘keci kuppatīti vadanti, taṃ na gahetabba’’nti yaṃ vuttaṃ, taṃ ‘‘pañcavaggakaraṇīyañce, bhikkhave, kammaṃ, bhikkhunipañcamo kammaṃ kareyya, akammaṃ na ca karaṇīya’’ntiādinā (mahāva. 390) nayena vuttattā paṇḍakānaṃ gaṇapūraṇabhāve eva kammaṃ kuppati, na sabbanti katvā suvuttaṃ, itarathā ‘‘paṇḍakupajjhāyena kammaṃ kareyya, akammaṃ na ca karaṇīya’’ntiādikāya pāḷiyā bhavitabbaṃ siyā. Yathā aparipuṇṇapattacīvarassa upasampādanakāle kammavācāyaṃ ‘‘paripuṇṇassa pattacīvara’’nti asantaṃ vatthuṃ kittetvā upasampadāya katāya tasmiṃ asantepi upasampadā ruhati, evaṃ ‘‘ayaṃ buddharakkhito āyasmato dhammarakkhitassa upasampadāpekkho’’ti avatthuṃ paṇḍakupajjhāyādiṃ, asantaṃ vā vatthuṃ kittetvā katāyapi gaṇapūrakānamatthitāya upasampadā ruhateva. ‘‘Na, bhikkhave, paṇḍakupajjhāyena upasampādetabbo, yo upasampādeyya, āpatti dukkaṭassa, so ca puggalo anupasampanno’’tiādivacanassa abhāvā ayamattho siddhova hoti. Na hi buddhā vattabbayuttaṃ na vadanti. Tena vuttaṃ ‘‘yo pana bhikkhu jānaṃ ūnavīsativassaṃ …pe… so ca puggalo anupasampanno’’tiādi (pāci. 403). Tathā ‘‘byattena bhikkhunā paṭibalena saṅgho ñāpetabbo’’ti (mahāva. 71) vacanato theyyasaṃvāsakādiācariyehi anussāvanāya katāya upasampadā na ruhati tesaṃ abhikkhuttāti vacanampi na gahetabbaṃ.

    கிஞ்ச பி⁴ய்யோ – ‘‘இமானி சத்தாரி கம்மானி பஞ்சஹாகாரேஹி விபஜ்ஜந்தீ’’திஆதி³னா (பரி॰ 482) நயேன கம்மானங் ஸம்பத்திவிபத்தியா கதி²யமானாய ‘‘ஸத்தஹி ஆகாரேஹி கம்மானி விபஜ்ஜந்தி வத்து²தோ வா ஞத்திதோ வா அனுஸ்ஸாவனதோ வா ஸீமதோ வா பரிஸதோ வா உபஜ்ஜா²யதோ வா ஆசரியதோ வா’’தி அகதி²தத்தா ந க³ஹேதப்³ப³ங். ‘‘பரிஸதோ வா’’தி வசனேன ஆசரியுபஜ்ஜா²யானங் வா ஸங்க³ஹோ கதோதி சே? ந, ‘‘த்³வாத³ஸஹி ஆகாரேஹி பரிஸதோ கம்மானி விபஜ்ஜந்தீ’’தி ஏதஸ்ஸ விப⁴ங்கே³ தேஸமனாமட்ட²த்தா, அயமத்தோ² யஸ்மா தத்த² தத்த² ஸரூபேன வுத்தபாளிவஸேனேவ ஸக்கா ஜானிதுங், தஸ்மா நயமுக²ங் த³ஸ்ஸெத்வா ஸங்கி²த்தோதி அயமஸ்ஸ யுத்திக³வேஸனாதி வுத்தங்.

    Kiñca bhiyyo – ‘‘imāni cattāri kammāni pañcahākārehi vipajjantī’’tiādinā (pari. 482) nayena kammānaṃ sampattivipattiyā kathiyamānāya ‘‘sattahi ākārehi kammāni vipajjanti vatthuto vā ñattito vā anussāvanato vā sīmato vā parisato vā upajjhāyato vā ācariyato vā’’ti akathitattā na gahetabbaṃ. ‘‘Parisato vā’’ti vacanena ācariyupajjhāyānaṃ vā saṅgaho katoti ce? Na, ‘‘dvādasahi ākārehi parisato kammāni vipajjantī’’ti etassa vibhaṅge tesamanāmaṭṭhattā, ayamattho yasmā tattha tattha sarūpena vuttapāḷivaseneva sakkā jānituṃ, tasmā nayamukhaṃ dassetvā saṃkhittoti ayamassa yuttigavesanāti vuttaṃ.

    தத்ரித³ங் விசாரேதப்³ப³ங் – அனுபஜ்ஜா²யகங் உபஸம்பாதெ³ந்தா தே பி⁴க்கூ² யதா²வுத்தனயேன அபூ⁴தங் வத்து²ங் கித்தயிங்ஸு, உதா³ஹு முஸாவாத³ப⁴யா தானேவ பதா³னி ந ஸாவேஸுந்தி. கிஞ்செத்த² – யதி³ தாவ உபஜ்ஜா²யாபா⁴வதோ ந ஸாவேஸுங், ‘‘புக்³க³லங் ந பராமஸதீ’’தி வுத்தவிபத்திப்பஸங்கோ³ ஹோதி, அத² ஸாவேஸுங், முஸாவாதோ³ நேஸங் ப⁴வதீதி? வுச்சதே – ஸாவேஸுங்யேவ யதா²வுத்தவிபத்திப்பஸங்க³ப⁴யா, ‘‘கம்மங் பன ந குப்பதீ’’தி அட்ட²கதா²யங் வுத்தத்தா ச. ந, முஸாவாத³ஸ்ஸ அஸம்ப⁴வதோ, முஸாவாதே³னபி கம்மஸம்ப⁴வதோ ச. ந ஹி ஸக்கா முஸாவாதே³ன கம்மவிபத்திஸம்பத்திங் காதுந்தி. தஸ்மா ‘‘அனுபஜ்ஜா²யகங் உபஸம்பாதெ³ந்தீ’’தி வசனஸ்ஸ ச உப⁴யதோ³ஸவினிமுத்தோ அத்தோ² பரியேஸிதப்³போ³.

    Tatridaṃ vicāretabbaṃ – anupajjhāyakaṃ upasampādentā te bhikkhū yathāvuttanayena abhūtaṃ vatthuṃ kittayiṃsu, udāhu musāvādabhayā tāneva padāni na sāvesunti. Kiñcettha – yadi tāva upajjhāyābhāvato na sāvesuṃ, ‘‘puggalaṃ na parāmasatī’’ti vuttavipattippasaṅgo hoti, atha sāvesuṃ, musāvādo nesaṃ bhavatīti? Vuccate – sāvesuṃyeva yathāvuttavipattippasaṅgabhayā, ‘‘kammaṃ pana na kuppatī’’ti aṭṭhakathāyaṃ vuttattā ca. Na, musāvādassa asambhavato, musāvādenapi kammasambhavato ca. Na hi sakkā musāvādena kammavipattisampattiṃ kātunti. Tasmā ‘‘anupajjhāyakaṃ upasampādentī’’ti vacanassa ca ubhayadosavinimutto attho pariyesitabbo.

    அயஞ்செத்த² யுத்தி – யதா² புப்³பே³ பப்³ப³ஜ்ஜுபஸம்பது³பஜ்ஜா²யேஸு விஜ்ஜமானேஸுபி உபஜ்ஜா²யக்³க³ஹணக்கமேன அக்³க³ஹிதத்தா ‘‘தேன கோ² பன ஸமயேன பி⁴க்கூ² அனுபஜ்ஜா²யக’’ந்திஆதி³ வுத்தங், ததா² இதா⁴பி உபஜ்ஜா²யஸ்ஸ விஜ்ஜமானஸ்ஸேவ ஸதோ அக்³க³ஹிதத்தா ‘‘அனுபஜ்ஜா²யகங் உபஸம்பாதெ³ந்தீ’’தி வுத்தங். கம்மவாசாசரியேன பன ‘‘க³ஹிதோ தேன உபஜ்ஜா²யோ’’தி ஸஞ்ஞாய உபஜ்ஜா²யங் கித்தெத்வா கம்மவாசங் ஸாவேதப்³ப³ங். கேனசி வா காரணேன காயஸாமக்³கி³ங் அதெ³ந்தஸ்ஸ உபஜ்ஜா²யஸ்ஸ ச²ந்த³ங் க³ஹெத்வா கம்மவாசங் ஸாவேதி, உபஜ்ஜா²யோ வா உபஸம்பதா³பெக்க²ஸ்ஸ உபஜ்ஜ²ங் த³த்வா பச்சா² உபஸம்பன்னே தஸ்மிங் தாதி³ஸே வத்து²ஸ்மிங் ஸமனுயுஞ்ஜியமானோ வா அஸமனுயுஞ்ஜியமானோ வா உபஜ்ஜா²யதா³னதோ புப்³பே³ ஏவ ஸாமணேரோ படிஜானாதி, ஸிக்கா²பச்சக்கா²தகோ வா அந்திமவத்து²அஜ்ஜா²பன்னகோ வா படிஜானாதி, ச²ந்த³ஹாரகாத³யோ விய உபஜ்ஜா²யோ வா அஞ்ஞஸீமாக³தோ ஹோதி. கம்மவாசா ருஹதீதி வத்வா ‘‘அனுஜானாமி பி⁴க்க²வே பச்சந்திமேஸு ஜனபதே³ஸு வினயத⁴ரபஞ்சமேன க³ணேன உபஸம்பத³’’ந்தி வுத்தத்தா. கேசி ‘‘வினயத⁴ரபஞ்சமேன உபஜ்ஜா²யேன ஸன்னிஹிதேனேவ ப⁴விதப்³ப³’’ந்தி வத³ந்தீதி போராணக³ண்டி²பதே³ வுத்தங். ஸோ ச பாடோ² அப்பமாணோ மஜ்ஜி²மேஸு ஜனபதே³ஸு தஸ்ஸ வசனஸ்ஸாபா⁴வதோ. அஸன்னிஹிதேபி உபஜ்ஜா²யே கம்மவாசா ருஹதீதி ஆபஜ்ஜதீதி சே? ந. கஸ்மா? கம்மஸம்பத்தியங் ‘‘புக்³க³லங் பராமஸதீ’’தி வுத்தபாடோ²வ நோ பமாணங். ந ஹி தத்த² அஸன்னிஹிதோ உபஜ்ஜா²யஸங்கா²தோ புக்³க³லோ பராமஸனங் அரஹதி, தஸ்மா தத்த² ஸங்க⁴பராமஸனங் விய புக்³க³லபராமஸனங் வேதி³தப்³ப³ங். ஸங்கே⁴ன க³ணேன உபஜ்ஜா²யேன உபஸம்பாதெ³ந்தி தேஸங் அத்த²தோ புக்³க³லத்தா, பண்ட³காதி³உபஜ்ஜா²யேன உபஸம்பாதெ³ந்தி உபஸம்பாத³னகாலே அவிதி³தத்தாதி போராணா.

    Ayañcettha yutti – yathā pubbe pabbajjupasampadupajjhāyesu vijjamānesupi upajjhāyaggahaṇakkamena aggahitattā ‘‘tena kho pana samayena bhikkhū anupajjhāyaka’’ntiādi vuttaṃ, tathā idhāpi upajjhāyassa vijjamānasseva sato aggahitattā ‘‘anupajjhāyakaṃ upasampādentī’’ti vuttaṃ. Kammavācācariyena pana ‘‘gahito tena upajjhāyo’’ti saññāya upajjhāyaṃ kittetvā kammavācaṃ sāvetabbaṃ. Kenaci vā kāraṇena kāyasāmaggiṃ adentassa upajjhāyassa chandaṃ gahetvā kammavācaṃ sāveti, upajjhāyo vā upasampadāpekkhassa upajjhaṃ datvā pacchā upasampanne tasmiṃ tādise vatthusmiṃ samanuyuñjiyamāno vā asamanuyuñjiyamāno vā upajjhāyadānato pubbe eva sāmaṇero paṭijānāti, sikkhāpaccakkhātako vā antimavatthuajjhāpannako vā paṭijānāti, chandahārakādayo viya upajjhāyo vā aññasīmāgato hoti. Kammavācā ruhatīti vatvā ‘‘anujānāmi bhikkhave paccantimesu janapadesu vinayadharapañcamena gaṇena upasampada’’nti vuttattā. Keci ‘‘vinayadharapañcamena upajjhāyena sannihiteneva bhavitabba’’nti vadantīti porāṇagaṇṭhipade vuttaṃ. So ca pāṭho appamāṇo majjhimesu janapadesu tassa vacanassābhāvato. Asannihitepi upajjhāye kammavācā ruhatīti āpajjatīti ce? Na. Kasmā? Kammasampattiyaṃ ‘‘puggalaṃ parāmasatī’’ti vuttapāṭhova no pamāṇaṃ. Na hi tattha asannihito upajjhāyasaṅkhāto puggalo parāmasanaṃ arahati, tasmā tattha saṅghaparāmasanaṃ viya puggalaparāmasanaṃ veditabbaṃ. Saṅghena gaṇena upajjhāyena upasampādenti tesaṃ atthato puggalattā, paṇḍakādiupajjhāyena upasampādenti upasampādanakāle aviditattāti porāṇā.

    அபத்தசீவரங் உபஸம்பாதெ³ந்தீதி கம்மவாசாசரியோ ‘‘பரிபுண்ணஸ்ஸ பத்தசீவர’’ந்தி ஸஞ்ஞாய, கேவலங் அத்த²ஸம்பத்திங் அனபெக்கி²த்வா ஸந்தபத³னீஹாரேன வா ‘‘பரிபுண்ணஸ்ஸ பத்தசீவர’’ந்தி கம்மவாசங் ஸாவேதி. யதா² ஏதரஹி மதவிப்பவுத்தமாதாபிதிகோபி ‘‘அனுஞ்ஞாதோஸி மாதாபிதூஹீ’’தி புட்டோ² ‘‘ஆம ப⁴ந்தே’’தி வத³தி, கிங் ப³ஹுனா? அயங் பனெத்த² ஸாரோ – ‘‘தஸ்மிங் ஸமயே சத்தாரி கம்மானி பஞ்சஹாகாரேஹி விபஜ்ஜந்தீ’’தி லக்க²ணஸ்ஸ ந தாவ பஞ்ஞத்தத்தா அனுபஜ்ஜா²யகாதி³ங் உபஸம்பாதெ³ந்தி. வஜ்ஜனீயபுக்³க³லானங் அவுத்தத்தா பண்ட³குபஜ்ஜா²யாதி³ங் உபஸம்பாதெ³ந்தி, தேரஸந்தராயபுச்சா²ய அத³ஸ்ஸனத்தா அபத்தசீவரகங் உபஸம்பாதெ³ந்தி, ‘‘அனுஜானாமி பி⁴க்க²வே ஞத்திசதுத்தே²ன கம்மேன உபஸம்பாதே³து’’ந்தி (மஹாவ॰ 69) ஏவங் ஸப்³ப³பட²மங் அனுஞ்ஞாதாய கம்மவாசாய ‘‘பரிபுண்ணஸ்ஸ பத்தசீவர’’ந்தி அவசனமெத்த² ஸாத⁴கந்தி வேதி³தப்³ப³ங். தஞ்ஹி வசனங் அனுக்கமேனானுஞ்ஞாதந்தி.

    Apattacīvaraṃupasampādentīti kammavācācariyo ‘‘paripuṇṇassa pattacīvara’’nti saññāya, kevalaṃ atthasampattiṃ anapekkhitvā santapadanīhārena vā ‘‘paripuṇṇassa pattacīvara’’nti kammavācaṃ sāveti. Yathā etarahi matavippavuttamātāpitikopi ‘‘anuññātosi mātāpitūhī’’ti puṭṭho ‘‘āma bhante’’ti vadati, kiṃ bahunā? Ayaṃ panettha sāro – ‘‘tasmiṃ samaye cattāri kammāni pañcahākārehi vipajjantī’’ti lakkhaṇassa na tāva paññattattā anupajjhāyakādiṃ upasampādenti. Vajjanīyapuggalānaṃ avuttattā paṇḍakupajjhāyādiṃ upasampādenti, terasantarāyapucchāya adassanattā apattacīvarakaṃ upasampādenti, ‘‘anujānāmi bhikkhave ñatticatutthena kammena upasampādetu’’nti (mahāva. 69) evaṃ sabbapaṭhamaṃ anuññātāya kammavācāya ‘‘paripuṇṇassa pattacīvara’’nti avacanamettha sādhakanti veditabbaṃ. Tañhi vacanaṃ anukkamenānuññātanti.

    இத³ங் தாவ ஸப்³ப³தா² ஹோது, ‘‘மூக³ங் பப்³பா³ஜெந்தி ப³தி⁴ரங் பப்³பா³ஜெந்தீ’’தி இத³ங் கத²ங் ஸம்ப⁴விதுமரஹதி ஆதி³தோ பட்டா²ய ‘‘அனுஜானாமி பி⁴க்க²வே இமேஹி தீஹி ஸரணக³மனேஹி பப்³ப³ஜ்ஜ’’ந்திஆதி³னா அனுஞ்ஞாதத்தாதி? வுச்சதே – ‘‘ஏவஞ்ச பன, பி⁴க்க²வே, பப்³பா³ஜேதப்³போ³தி, ஏவங் வதே³ஹீதி வத்தப்³போ³…பே॰… ததியம்பி ஸங்க⁴ங் ஸரணங் க³ச்சா²மீ’’தி எத்த² ‘‘ஏவங் வதே³ஹீதி வத்தப்³போ³’’தி இமஸ்ஸ வசனஸ்ஸ மிச்சா² அத்த²ங் க³ஹெத்வா மூக³ங் பப்³பா³ஜேஸுங். ‘‘ஏவங் வதே³ஹீ’’தி தங் பப்³ப³ஜ்ஜாபெக்க²ங் ஆணாபெத்வா ஸயங் உபஜ்ஜா²யேன வத்தப்³போ³ ‘‘ததியம்பி ஸங்க⁴ங் ஸரணங் க³ச்சா²மீ’’தி, ஸோ பப்³ப³ஜ்ஜாபெக்கா² ததா² ஆணத்தோ உபஜ்ஜா²யவசனஸ்ஸ அனு அனு வத³து வா மா வா, தத்த² தத்த² ப⁴க³வா ‘‘காயேன விஞ்ஞாபேதி, வாசாய விஞ்ஞாபேதி, காயேன வாசாய விஞ்ஞாபேதி, க³ஹிதோ ஹோதி உபஜ்ஜா²யோ. தி³ன்னோ ஹோதி ச²ந்தோ³, தி³ன்னா ஹோதி பாரிஸுத்³தி⁴, தி³ன்னா ஹோதி பவாரணா’’தி வத³தி . தத³னுமானேன வா காயேன தேன பப்³ப³ஜ்ஜாபெக்கே²ன விஞ்ஞத்தங் ஹோதி ஸரணக³மனந்தி வா லோகேபி காயேன விஞ்ஞாபெந்தோ ஏவங் வத³தீதி வுச்சதி, தங் பரியாயங் க³ஹெத்வா மூக³ங் பப்³பா³ஜெந்தீதி வேதி³தப்³ப³ங். போராணக³ண்டி²பதே³ ‘‘மூக³ங் கத²ங் பப்³பா³ஜெந்தீதி புச்ச²ங் கத்வா தஸ்ஸ காயபஸாத³ஸம்ப⁴வதோ காயேன பஹாரங் த³த்வா ஹத்த²முத்³தா³ய விஞ்ஞாபெத்வா பப்³பா³ஜேஸு’’ந்தி வுத்தங். கிங் ப³ஹுனா?

    Idaṃ tāva sabbathā hotu, ‘‘mūgaṃ pabbājenti badhiraṃ pabbājentī’’ti idaṃ kathaṃ sambhavitumarahati ādito paṭṭhāya ‘‘anujānāmi bhikkhave imehi tīhi saraṇagamanehi pabbajja’’ntiādinā anuññātattāti? Vuccate – ‘‘evañca pana, bhikkhave, pabbājetabboti, evaṃ vadehīti vattabbo…pe… tatiyampi saṅghaṃ saraṇaṃ gacchāmī’’ti ettha ‘‘evaṃ vadehīti vattabbo’’ti imassa vacanassa micchā atthaṃ gahetvā mūgaṃ pabbājesuṃ. ‘‘Evaṃ vadehī’’ti taṃ pabbajjāpekkhaṃ āṇāpetvā sayaṃ upajjhāyena vattabbo ‘‘tatiyampi saṅghaṃ saraṇaṃ gacchāmī’’ti, so pabbajjāpekkhā tathā āṇatto upajjhāyavacanassa anu anu vadatu vā mā vā, tattha tattha bhagavā ‘‘kāyena viññāpeti, vācāya viññāpeti, kāyena vācāya viññāpeti, gahito hoti upajjhāyo. Dinno hoti chando, dinnā hoti pārisuddhi, dinnā hoti pavāraṇā’’ti vadati . Tadanumānena vā kāyena tena pabbajjāpekkhena viññattaṃ hoti saraṇagamananti vā lokepi kāyena viññāpento evaṃ vadatīti vuccati, taṃ pariyāyaṃ gahetvā mūgaṃ pabbājentīti veditabbaṃ. Porāṇagaṇṭhipade ‘‘mūgaṃ kathaṃ pabbājentīti pucchaṃ katvā tassa kāyapasādasambhavato kāyena pahāraṃ datvā hatthamuddāya viññāpetvā pabbājesu’’nti vuttaṃ. Kiṃ bahunā?

    அயங் பனெத்த² ஸாரோ – யதா² புப்³பே³ பப்³ப³ஜ்ஜாதி⁴காரே வத்தமானே பப்³ப³ஜ்ஜாபி⁴லாபங் உபச்சி²ந்தி³த்வா ‘‘பண்ட³கோ, பி⁴க்க²வே, அனுபஸம்பன்னோ ந உபஸம்பாதே³தப்³போ³’’திஆதி³னா (மஹாவ॰ 109) நயேன உபஸம்பத³வஸேனேவ அபி⁴லாபோ கதோ. தெ²ய்யஸங்வாஸகபதே³ அஸம்ப⁴வதோ கிஞ்சாபி ஸோ ந கதோ, பப்³ப³ஜ்ஜாவ தத்த² கதா, ஸப்³ப³த்த² பன உபஸம்பதா³பி⁴லாபேன அதி⁴ப்பேதா தத³னுபா⁴வதோ உபஸம்பதா³ய, பப்³ப³ஜ்ஜாய வாரிதாய உபஸம்பதா³ வாரிதா ஹோதீதி கத்வா, ததா² இத⁴ உபஸம்பதா³தி⁴காரே வத்தமானே உபஸம்பதா³பி⁴லாபங் உபச்சி²ந்தி³த்வா உபஸம்பத³மேவ ஸந்தா⁴ய பப்³ப³ஜ்ஜாபி⁴லாபோ கதோதி வேதி³தப்³போ³. காமங் ஸோ ந கத்தப்³போ³, மூக³பதே³ அஸம்ப⁴வதோ தஸ்ஸ வஸேன ஆதி³தோ பட்டா²ய உபஸம்பதா³பி⁴லாபோவ கத்தப்³போ³ விய தி³ஸ்ஸதி, ததா²பி தஸ்ஸேவ மூக³பத³ஸ்ஸ வஸேன ஆதி³தோ பட்டா²ய பப்³ப³ஜ்ஜாபி⁴லாபோவ கதோ மிச்சா²க³ஹணனிவாரணத்த²ங். கத²ங்? ‘‘மூகோ³, பி⁴க்க²வே, அபத்தோ ஓஸாரணங், தஞ்சே ஸங்கோ⁴ ஓஸாரேதி, ஸோஸாரிதோ’’தி (மஹாவ॰ 396) வசனதோ ஹி மூகோ³ உபஸம்பன்னோ ஹோதீதி ஸித்³த⁴ங், ஸோ கேவலங் உபஸம்பன்னோவ ஹோதி, ந பன பப்³ப³ஜிதோ தஸ்ஸ பப்³ப³ஜ்ஜாய அஸம்ப⁴வதோதி மிச்சா²கா³ஹோ ஹோதி, தங் பரிவஜ்ஜாபெத்வா யோ உபஸம்பன்னோ, ஸோ பப்³ப³ஜிதோவ ஹோதி. பப்³ப³ஜிதோ பன அத்தி² கோசி உபஸம்பன்னோ, அத்தி² கோசி அனுபஸம்பன்னோதி இமங் ஸம்மாகா³ஹங் உப்பாதே³தி ப⁴க³வாதி வேதி³தப்³ப³ங்.

    Ayaṃ panettha sāro – yathā pubbe pabbajjādhikāre vattamāne pabbajjābhilāpaṃ upacchinditvā ‘‘paṇḍako, bhikkhave, anupasampanno na upasampādetabbo’’tiādinā (mahāva. 109) nayena upasampadavaseneva abhilāpo kato. Theyyasaṃvāsakapade asambhavato kiñcāpi so na kato, pabbajjāva tattha katā, sabbattha pana upasampadābhilāpena adhippetā tadanubhāvato upasampadāya, pabbajjāya vāritāya upasampadā vāritā hotīti katvā, tathā idha upasampadādhikāre vattamāne upasampadābhilāpaṃ upacchinditvā upasampadameva sandhāya pabbajjābhilāpo katoti veditabbo. Kāmaṃ so na kattabbo, mūgapade asambhavato tassa vasena ādito paṭṭhāya upasampadābhilāpova kattabbo viya dissati, tathāpi tasseva mūgapadassa vasena ādito paṭṭhāya pabbajjābhilāpova kato micchāgahaṇanivāraṇatthaṃ. Kathaṃ? ‘‘Mūgo, bhikkhave, apatto osāraṇaṃ, tañce saṅgho osāreti, sosārito’’ti (mahāva. 396) vacanato hi mūgo upasampanno hotīti siddhaṃ, so kevalaṃ upasampannova hoti, na pana pabbajito tassa pabbajjāya asambhavatoti micchāgāho hoti, taṃ parivajjāpetvā yo upasampanno, so pabbajitova hoti. Pabbajito pana atthi koci upasampanno, atthi koci anupasampannoti imaṃ sammāgāhaṃ uppādeti bhagavāti veditabbaṃ.

    அபிச தேஸங் ஹத்த²ச்சி²ன்னாதீ³னங் பப்³ப³ஜிதானங் ஸுபப்³ப³ஜிதபா⁴வதீ³பனத்த²ங், பப்³ப³ஜ்ஜாபா⁴வஸங்கானிவாரணத்த²ஞ்செத்த² பப்³ப³ஜ்ஜாபி⁴லாபோ கதோ. கத²ங்? ‘‘ந, பி⁴க்க²வே, ஹத்த²ச்சி²ன்னோ பப்³பா³ஜேதப்³போ³’’திஆதி³னா (மஹாவ॰ 119) படிக்கே²பேன, ‘‘பப்³ப³ஜிதா ஸுபப்³ப³ஜிதா’’தி வுத்தட்டா²னாபா⁴வேன ச தேஸங் பப்³ப³ஜ்ஜாபா⁴வஸங்கா ப⁴வெய்ய, யதா² பஸங்கா ப⁴வே, ததா² பஸங்கங் ட²பெய்ய. க²ந்த⁴கே உபஸம்பத³ங் ஸந்தா⁴ய ‘‘ஹத்த²ச்சி²ன்னோ, பி⁴க்க²வே, அபத்தோ ஓஸாரணங், தஞ்சே ஸங்கோ⁴ ஓஸாரேதி, ஸோஸாரிதோ’’திஆதி³னா (மஹாவ॰ 396) நயேன ப⁴க³வா நிவாரேதி. தேனேவ நயேன பப்³ப³ஜிதா பனேதே ஸப்³பே³பி ஸுபப்³ப³ஜிதா ஏவாதி தீ³பேதி. அஞ்ஞதா² ஸப்³பே³பேதே உபஸம்பன்னாவ ஹொந்தி, ந பப்³ப³ஜிதாதி அயமனிட்ட²ப்பஸங்கோ³ ஆபஜ்ஜதி. கத²ங்? ‘‘ஹத்த²ச்சி²ன்னோ, பி⁴க்க²வே, ந பப்³பா³ஜேதப்³போ³, பப்³ப³ஜிதோ நாஸேதப்³போ³’’தி வா ‘‘ந, பி⁴க்க²வே, ஹத்த²ச்சி²ன்னோ பப்³பா³ஜேதப்³போ³, யோ பப்³பா³ஜெய்ய, ஆபத்தி து³க்கடஸ்ஸ, ஸோ ச அபப்³ப³ஜிதோ’’தி (மஹாவ॰ 119) வா தந்தியா ட²பிதாய சம்பெய்யக்க²ந்த⁴கே ‘‘ஸோஸாரிதோ’’தி வுத்தத்தா கேவலங் ‘‘இமே ஹத்த²ச்சி²ன்னாத³யோ உபஸம்பன்னாவ ஹொந்தி, ந பப்³ப³ஜிதா’’தி வா ‘‘உபஸம்பன்னாபி சே பப்³ப³ஜிதா, நாஸேதப்³பா³’’தி வா அனிட்ட²கொட்டா²ஸோ ஆபஜ்ஜதீதி அதி⁴ப்பாயோ.

    Apica tesaṃ hatthacchinnādīnaṃ pabbajitānaṃ supabbajitabhāvadīpanatthaṃ, pabbajjābhāvasaṅkānivāraṇatthañcettha pabbajjābhilāpo kato. Kathaṃ? ‘‘Na, bhikkhave, hatthacchinno pabbājetabbo’’tiādinā (mahāva. 119) paṭikkhepena, ‘‘pabbajitā supabbajitā’’ti vuttaṭṭhānābhāvena ca tesaṃ pabbajjābhāvasaṅkā bhaveyya, yathā pasaṅkā bhave, tathā pasaṅkaṃ ṭhapeyya. Khandhake upasampadaṃ sandhāya ‘‘hatthacchinno, bhikkhave, apatto osāraṇaṃ, tañce saṅgho osāreti, sosārito’’tiādinā (mahāva. 396) nayena bhagavā nivāreti. Teneva nayena pabbajitā panete sabbepi supabbajitā evāti dīpeti. Aññathā sabbepete upasampannāva honti, na pabbajitāti ayamaniṭṭhappasaṅgo āpajjati. Kathaṃ? ‘‘Hatthacchinno, bhikkhave, na pabbājetabbo, pabbajito nāsetabbo’’ti vā ‘‘na, bhikkhave, hatthacchinno pabbājetabbo, yo pabbājeyya, āpatti dukkaṭassa, so ca apabbajito’’ti (mahāva. 119) vā tantiyā ṭhapitāya campeyyakkhandhake ‘‘sosārito’’ti vuttattā kevalaṃ ‘‘ime hatthacchinnādayo upasampannāva honti, na pabbajitā’’ti vā ‘‘upasampannāpi ce pabbajitā, nāsetabbā’’ti vā aniṭṭhakoṭṭhāso āpajjatīti adhippāyo.

    இத³ங் பனெத்த² விசாரேதப்³ப³ங் – ‘‘ஸோ ச அபப்³ப³ஜிதோ’’தி வசனாபா⁴வதோ மூக³ஸ்ஸ பப்³ப³ஜ்ஜாஸித்³தி⁴பஸங்க³தோ பப்³ப³ஜ்ஜாபி ஏகதோஸுத்³தி⁴யா ஹோதீதி அயமனிட்ட²கொட்டா²ஸோ கத²ங் நாபஜ்ஜதீதி? பப்³ப³ஜ்ஜாபி⁴லாபேன உபஸம்பதா³ இதா⁴தி⁴ப்பேதாதி ஸம்மாகா³ஹேன நாபஜ்ஜதீதி, அஞ்ஞதா² யதா²ப்³யஞ்ஜனங் அத்தே² க³ஹிதே யதா²பஞ்ஞத்தது³க்கடாபா⁴வஸங்கா²தோ அபரோ அனிட்ட²கொட்டா²ஸோ ஆபஜ்ஜதி. கத²ங்? ‘‘ந, பி⁴க்க²வே, மூகோ³ பப்³பா³ஜேதப்³போ³, யோ பப்³பா³ஜெய்ய, ஆபத்தி து³க்கடஸ்ஸா’’தி வுத்தது³க்கடங் பப்³ப³ஜ்ஜாபரியோஸானே ஹோதி, ந தஸ்ஸாவிப்பகதாய. புப்³ப³பயோக³து³க்கடமேவ ஹி பட²மங் ஆபஜ்ஜதி, தஸ்மா மூக³ஸ்ஸ பப்³ப³ஜ்ஜாபரியோஸானஸ்ஸேவ அபா⁴வதோ இமஸ்ஸ து³க்கடஸ்ஸ ஓகாஸோ ச ந ஸப்³ப³காலங் ஸம்ப⁴வெய்ய, உபஸம்பதா³வஸேன பன அத்தே² க³ஹிதே ஸம்ப⁴வதி கம்மனிப்³ப³த்திதோ. தேனேவ பாளியங் ‘‘ந, பி⁴க்க²வே, பண்ட³கோ உபஸம்பாதே³தப்³போ³, யோ உபஸம்பாதெ³ய்ய, ஆபத்தி து³க்கடஸ்ஸா’’தி து³க்கடங் ந பஞ்ஞத்தங். அபஞ்ஞத்தத்தா புப்³ப³பயோக³து³க்கடமேவ செத்த² ஸம்ப⁴வதி, நேதரங். எத்தாவதா ஸித்³த⁴மேதங் பப்³ப³ஜ்ஜாபி⁴லாபேன உபஸம்பதா³வ தத்த² அதி⁴ப்பேதா, ந பப்³ப³ஜ்ஜாதி. எத்தா²ஹ ஸாமணேரபப்³ப³ஜ்ஜா ந காயபயோக³தோ ஹோதீதி கத²ங் பஞ்ஞாயதீதி? வுச்சதே – காயேன விஞ்ஞாபேதீதிஆதி³த்திகா த³ஸ்ஸனதோதி ஆக³தோ.

    Idaṃ panettha vicāretabbaṃ – ‘‘so ca apabbajito’’ti vacanābhāvato mūgassa pabbajjāsiddhipasaṅgato pabbajjāpi ekatosuddhiyā hotīti ayamaniṭṭhakoṭṭhāso kathaṃ nāpajjatīti? Pabbajjābhilāpena upasampadā idhādhippetāti sammāgāhena nāpajjatīti, aññathā yathābyañjanaṃ atthe gahite yathāpaññattadukkaṭābhāvasaṅkhāto aparo aniṭṭhakoṭṭhāso āpajjati. Kathaṃ? ‘‘Na, bhikkhave, mūgo pabbājetabbo, yo pabbājeyya, āpatti dukkaṭassā’’ti vuttadukkaṭaṃ pabbajjāpariyosāne hoti, na tassāvippakatāya. Pubbapayogadukkaṭameva hi paṭhamaṃ āpajjati, tasmā mūgassa pabbajjāpariyosānasseva abhāvato imassa dukkaṭassa okāso ca na sabbakālaṃ sambhaveyya, upasampadāvasena pana atthe gahite sambhavati kammanibbattito. Teneva pāḷiyaṃ ‘‘na, bhikkhave, paṇḍako upasampādetabbo, yo upasampādeyya, āpatti dukkaṭassā’’ti dukkaṭaṃ na paññattaṃ. Apaññattattā pubbapayogadukkaṭameva cettha sambhavati, netaraṃ. Ettāvatā siddhametaṃ pabbajjābhilāpena upasampadāva tattha adhippetā, na pabbajjāti. Etthāha sāmaṇerapabbajjā na kāyapayogato hotīti kathaṃ paññāyatīti? Vuccate – kāyena viññāpetītiādittikā dassanatoti āgato.

    ‘‘கொ³த்தேனபி அனுஸ்ஸாவேது’’ந்தி (மஹாவ॰ 122) வசனதோ யேன வோஹாரேன வோஹரதி, தேன வட்டதீதி ஸித்³த⁴ங், தஸ்மா ‘‘கோ நாமோ தே உபஜ்ஜா²யோ’’தி புட்டே²னபி கொ³த்தமேவ நாமங் கத்வா வத்தப்³ப³ந்தி ஸித்³த⁴ங் ஹோதி, தஸ்மா சதுப்³பி³தே⁴ஸு நாமேஸு யேன கேனசி நாமேன அனுஸ்ஸாவனா காதப்³பா³தி வத³ந்தி. ஏகஸ்ஸ ப³ஹூனி நாமானி ஹொந்தி, தத்த² ஏகங் நாமங் ஞத்தியா, ஏகங் அனுஸ்ஸாவனாய காதுங் ந வட்டதி, அத்த²தோ ப்³யஞ்ஜனதோ ச அபி⁴ன்னாஹி அனுஸ்ஸாவனாஹி ப⁴விதப்³ப³ந்தி. கிஞ்சாபி ‘‘இத்த²ன்னாமோ இத்த²ன்னாமஸ்ஸ ஆயஸ்மதோ’’தி பாளியங் ‘‘ஆயஸ்மதோ’’தி பத³ங் பச்சா² வுத்தங், கம்மவாசாபாளியங் பன ‘‘அயங் பு³த்³த⁴ரக்கி²தோ ஆயஸ்மதோ த⁴ம்மரக்கி²தஸ்ஸா’’தி பட²மங் லிக²ந்தி, தங் உப்படிபாடியா வுத்தந்தி ந பச்சேதப்³ப³ங். பாளியஞ்ஹி ‘‘இத்த²ன்னாமோ இத்த²ன்னாமஸ்ஸா’’தி அத்த²மத்தங் த³ஸ்ஸிதங், தஸ்மா பாளியங் அவுத்தோபி ‘‘அயங் பு³த்³த⁴ரக்கி²தோ ஆயஸ்மதோ த⁴ம்மரக்கி²தஸ்ஸா’’தி கம்மவாசாபாளியங் பயோகோ³ த³ஸ்ஸிதோ. ‘‘ந மே தி³ட்டோ² இதோ புப்³பே³ இச்சாயஸ்மா ஸாரிபுத்தோ’’தி ச ‘‘ஆயஸ்மா ஸாரிபுத்தோ அத்த²குஸலோ’’தி ச பட²மங் ‘‘ஆயஸ்மா’’தி பயோக³ஸ்ஸ த³ஸ்ஸனதோதி வத³ந்தி. கத்த²சி ‘‘ஆயஸ்மதோ பு³த்³த⁴ரக்கி²தஸ்ஸா’’தி வத்வா கத்த²சி கேவலங் ‘‘பு³த்³த⁴ரக்கி²தஸ்ஸா’’தி ஸாவேதி, ஸாவனங் ஹாபேதீதி ந வுச்சதி நாமஸ்ஸ அஹாபிதத்தாதி ஏகே. ஸசே கத்த²சி ‘‘ஆயஸ்மதோ பு³த்³த⁴ரக்கி²தஸ்ஸா’’தி வத்வா கத்த²சி ‘‘பு³த்³த⁴ரக்கி²தஸ்ஸாயஸ்மதோ’’தி ஸாவேதி, பாடா²னுரூபத்தா கெ²த்தமேவ ஓதிண்ணந்திபி ஏகே. ப்³யஞ்ஜனபே⁴த³ப்பஸங்க³தோ அனுஸ்ஸாவனானங் தங் ந வட்டதீதி வத³ந்தி. ஸசே பன ஸப்³ப³ட்டா²னேபி ஏகேனேவ பகாரேன வத³தி, வட்டதி.

    ‘‘Gottenapi anussāvetu’’nti (mahāva. 122) vacanato yena vohārena voharati, tena vaṭṭatīti siddhaṃ, tasmā ‘‘ko nāmo te upajjhāyo’’ti puṭṭhenapi gottameva nāmaṃ katvā vattabbanti siddhaṃ hoti, tasmā catubbidhesu nāmesu yena kenaci nāmena anussāvanā kātabbāti vadanti. Ekassa bahūni nāmāni honti, tattha ekaṃ nāmaṃ ñattiyā, ekaṃ anussāvanāya kātuṃ na vaṭṭati, atthato byañjanato ca abhinnāhi anussāvanāhi bhavitabbanti. Kiñcāpi ‘‘itthannāmo itthannāmassa āyasmato’’ti pāḷiyaṃ ‘‘āyasmato’’ti padaṃ pacchā vuttaṃ, kammavācāpāḷiyaṃ pana ‘‘ayaṃ buddharakkhito āyasmato dhammarakkhitassā’’ti paṭhamaṃ likhanti, taṃ uppaṭipāṭiyā vuttanti na paccetabbaṃ. Pāḷiyañhi ‘‘itthannāmo itthannāmassā’’ti atthamattaṃ dassitaṃ, tasmā pāḷiyaṃ avuttopi ‘‘ayaṃ buddharakkhito āyasmato dhammarakkhitassā’’ti kammavācāpāḷiyaṃ payogo dassito. ‘‘Na me diṭṭho ito pubbe iccāyasmā sāriputto’’ti ca ‘‘āyasmā sāriputto atthakusalo’’ti ca paṭhamaṃ ‘‘āyasmā’’ti payogassa dassanatoti vadanti. Katthaci ‘‘āyasmato buddharakkhitassā’’ti vatvā katthaci kevalaṃ ‘‘buddharakkhitassā’’ti sāveti, sāvanaṃ hāpetīti na vuccati nāmassa ahāpitattāti eke. Sace katthaci ‘‘āyasmato buddharakkhitassā’’ti vatvā katthaci ‘‘buddharakkhitassāyasmato’’ti sāveti, pāṭhānurūpattā khettameva otiṇṇantipi eke. Byañjanabhedappasaṅgato anussāvanānaṃ taṃ na vaṭṭatīti vadanti. Sace pana sabbaṭṭhānepi ekeneva pakārena vadati, vaṭṭati.

    ஏகானுஸ்ஸாவனேதி எத்த² ஏகதோ அனுஸ்ஸாவனங் ஏதேஸந்தி ஏகானுஸ்ஸாவனாதி அஸமானாதி⁴கரணவிஸயோ பா³ஹிரத்த²ஸமாஸோதி த³ட்ட²ப்³ப³ங். தேனேவாஹ ‘‘த்³வே ஏகதோ அனுஸ்ஸாவனே’’தி. தத்த² ஏகதோதி ஏகக்க²ணேதி அத்தோ², விப⁴த்திஅலோபேன சாயங் நித்³தே³ஸோ. புரிமனயேனேவ ஏகதோ அனுஸ்ஸாவனே காதுந்தி ‘‘ஏகேன ஏகஸ்ஸ, அஞ்ஞேன இதரஸ்ஸா’’திஆதி³னா புப்³பே³ வுத்தனயேன த்³வீஹி வா தீஹி வா ஆசரியேஹி ஏகேன வா ஏகதோ அனுஸ்ஸாவனே காதுங். வஜ்ஜாவஜ்ஜங் உபனிஜ்ஜா²யதீதி உபஜ்ஜா²தி இமினா உபஜ்ஜா²யஸத்³த³ஸமானத்தோ² உபஜ்ஜா²ஸத்³தோ³பீதி அத்த²ங் த³ஸ்ஸேதீதி ஸாரத்த²தீ³பனியங் (ஸாரத்த²॰ டீ॰ மஹாவக்³க³ 3.123).

    Ekānussāvaneti ettha ekato anussāvanaṃ etesanti ekānussāvanāti asamānādhikaraṇavisayo bāhiratthasamāsoti daṭṭhabbaṃ. Tenevāha ‘‘dve ekato anussāvane’’ti. Tattha ekatoti ekakkhaṇeti attho, vibhattialopena cāyaṃ niddeso. Purimanayeneva ekato anussāvane kātunti ‘‘ekena ekassa, aññena itarassā’’tiādinā pubbe vuttanayena dvīhi vā tīhi vā ācariyehi ekena vā ekato anussāvane kātuṃ. Vajjāvajjaṃ upanijjhāyatīti upajjhāti iminā upajjhāyasaddasamānattho upajjhāsaddopīti atthaṃ dassetīti sāratthadīpaniyaṃ (sārattha. ṭī. mahāvagga 3.123).

    கொ³த்தேனாபீதி ‘‘ஆயஸ்மதோ பிப்பலிஸ்ஸ உபஸம்பதா³பெக்கோ²’’தி ஏவங் நாமங் அவத்வா கொ³த்தனாமேனபீதி அத்தோ², தேன ‘‘கோ நாமோ தே உபஜ்ஜா²யோ’’தி புட்டே²ன கொ³த்தனாமேன ‘‘ஆயஸ்மா கஸ்ஸபோ’’தி வத்தப்³ப³ந்தி ஸித்³த⁴ங் ஹோதி. தஸ்மா அஞ்ஞம்பி யங் கிஞ்சி தஸ்ஸ நாமங் பஸித்³த⁴ங், தஸ்மிங் வா க²ணே ஸுக²க்³க³ஹணத்த²ங் நாமங் பஞ்ஞாபிதங், தங் ஸப்³ப³ங் க³ஹெத்வாபி அனுஸ்ஸாவனா காதப்³பா³. யதா² உபஜ்ஜா²யஸ்ஸ, ஏவங் உபஸம்பதா³பெக்க²ஸ்ஸாபி கொ³த்தாதி³னாமேன தங்க²ணிகனாமேன ச அனுஸ்ஸாவனங் காதுங் வட்டதி, தஸ்மிம்பி க²ணே ‘‘அயங் திஸ்ஸோ’’தி வா ‘‘நாகோ³’’தி வா நாமங் கரொந்தேஹி அனுஸாஸகஸம்முதிதோ பட²மமேவ காதப்³ப³ங். ஏவங் அகத்வாபி அந்தராயிகத⁴ம்மானுஸாஸனபுச்ச²னகாலேஸு ‘‘கின்னாமோஸி, அஹங் ப⁴ந்தே நாகோ³ நாம, கோ நாமோ தே உபஜ்ஜா²யோ, உபஜ்ஜா²யோ மே ப⁴ந்தே திஸ்ஸோ நாமா’’திஆதி³னா விஞ்ஞாபெந்தேன உபி⁴ன்னம்பி சித்தே ‘‘மமேதங் நாம’’ந்தி யதா² ஸஞ்ஞங் உப்பஜ்ஜதி, ஏவங் விஞ்ஞாபேதப்³ப³ங். ஸசே பன தஸ்மிங் க²ணே பகதினாமேன வத்வா பச்சா² ‘‘திஸ்ஸோ நாமா’’தி அபுப்³ப³னாமேன அனுஸ்ஸாவேதி, ந வட்டதி.

    Gottenāpīti ‘‘āyasmato pippalissa upasampadāpekkho’’ti evaṃ nāmaṃ avatvā gottanāmenapīti attho, tena ‘‘ko nāmo te upajjhāyo’’ti puṭṭhena gottanāmena ‘‘āyasmā kassapo’’ti vattabbanti siddhaṃ hoti. Tasmā aññampi yaṃ kiñci tassa nāmaṃ pasiddhaṃ, tasmiṃ vā khaṇe sukhaggahaṇatthaṃ nāmaṃ paññāpitaṃ, taṃ sabbaṃ gahetvāpi anussāvanā kātabbā. Yathā upajjhāyassa, evaṃ upasampadāpekkhassāpi gottādināmena taṅkhaṇikanāmena ca anussāvanaṃ kātuṃ vaṭṭati, tasmimpi khaṇe ‘‘ayaṃ tisso’’ti vā ‘‘nāgo’’ti vā nāmaṃ karontehi anusāsakasammutito paṭhamameva kātabbaṃ. Evaṃ akatvāpi antarāyikadhammānusāsanapucchanakālesu ‘‘kinnāmosi, ahaṃ bhante nāgo nāma, ko nāmo te upajjhāyo, upajjhāyo me bhante tisso nāmā’’tiādinā viññāpentena ubhinnampi citte ‘‘mametaṃ nāma’’nti yathā saññaṃ uppajjati, evaṃ viññāpetabbaṃ. Sace pana tasmiṃ khaṇe pakatināmena vatvā pacchā ‘‘tisso nāmā’’ti apubbanāmena anussāveti, na vaṭṭati.

    தத்த² ச கிஞ்சாபி உபஜ்ஜா²யஸ்ஸேவ நாமங் அக்³க³ஹெத்வா யேன கேனசி நாமேன ‘‘திஸ்ஸஸ்ஸ உபஸம்பதா³பெக்கோ²’’திஆதி³னாபி புக்³க³லே பராமட்டே² கம்மங் ஸுகதமேவ ஹோதி அனுபஜ்ஜா²யகாதீ³னங் உபஸம்பதா³கம்மங் விய உபஜ்ஜா²யஸ்ஸ அபா⁴வேபி அப⁴ப்³ப³த்தேபி கம்மவாசாய புக்³க³லே பராமட்டே² கம்மஸ்ஸ ஸிஜ்ஜ²னதோ. உபஸம்பதா³பெக்க²ஸ்ஸ பன யதா²ஸகங் நாமங் வினா அஞ்ஞேன நாமேன அனுஸ்ஸாவிதே கம்மங் குப்பதி, ஸோ அனுபஸம்பன்னோவ ஹோதி. தத்த² டி²தோ அஞ்ஞோ அனுபஸம்பன்னோ விய க³ஹிதனாமஸ்ஸ வத்து²புக்³க³லஸ்ஸ தத்த² அபா⁴வா, ஏதஸ்ஸ ச நாமஸ்ஸ அனுஸ்ஸாவனாய அவுத்தத்தா. தஸ்மா உபஸம்பதா³பெக்க²ஸ்ஸ பகதினாமங் பரிவத்தெத்வா அபுப்³பே³ன நாகா³தி³னாமேன அனுஸ்ஸாவிதுகாமேன படிகச்சேவ ‘‘த்வங் நாகோ³’’திஆதி³னா விஞ்ஞாபெத்வா அனுஸாஸனஅந்தராயிகத⁴ம்மாபுச்ச²னக்க²ணேஸுபி தஸ்ஸ ச ஸங்க⁴ஸ்ஸ ச யதா² பாகடங் ஹோதி, ததா² பகாஸெத்வாவ நாகா³தி³னாமேன அனுஸ்ஸாவேதப்³ப³ங். ஏகஸ்ஸ ப³ஹூனி நாமானி ஹொந்தி, தேஸு ஏகங் க³ஹேதுங் வட்டதி.

    Tattha ca kiñcāpi upajjhāyasseva nāmaṃ aggahetvā yena kenaci nāmena ‘‘tissassa upasampadāpekkho’’tiādināpi puggale parāmaṭṭhe kammaṃ sukatameva hoti anupajjhāyakādīnaṃ upasampadākammaṃ viya upajjhāyassa abhāvepi abhabbattepi kammavācāya puggale parāmaṭṭhe kammassa sijjhanato. Upasampadāpekkhassa pana yathāsakaṃ nāmaṃ vinā aññena nāmena anussāvite kammaṃ kuppati, so anupasampannova hoti. Tattha ṭhito añño anupasampanno viya gahitanāmassa vatthupuggalassa tattha abhāvā, etassa ca nāmassa anussāvanāya avuttattā. Tasmā upasampadāpekkhassa pakatināmaṃ parivattetvā apubbena nāgādināmena anussāvitukāmena paṭikacceva ‘‘tvaṃ nāgo’’tiādinā viññāpetvā anusāsanaantarāyikadhammāpucchanakkhaṇesupi tassa ca saṅghassa ca yathā pākaṭaṃ hoti, tathā pakāsetvāva nāgādināmena anussāvetabbaṃ. Ekassa bahūni nāmāni honti, tesu ekaṃ gahetuṃ vaṭṭati.

    யங் பன உபஸம்பதா³பெக்க²உபஜ்ஜா²யானங் ஏகத்த² க³ஹிதங் நாமங் ததே³வ ஞத்தியா, ஸப்³ப³த்த² அனுஸ்ஸாவனாஸு ச க³ஹேதப்³ப³ங். க³ஹிததோ ஹி அஞ்ஞஸ்மிங் க³ஹிதே ப்³யஞ்ஜனங் பி⁴ன்னங் நாம ஹோதி, கம்மங் விபஜ்ஜதி. அத்த²தோ ஹி ப்³யஞ்ஜனதோ ச அபி⁴ன்னா ஏவ ஞத்தி அனுஸ்ஸாவனா ச வட்டந்தி. உபஜ்ஜா²யனாமஸ்ஸ பன புரதோ ‘‘ஆயஸ்மதோ திஸ்ஸஸ்ஸா’’திஆதி³னா ஆயஸ்மந்தபத³ங் ஸப்³ப³த்த² யோஜெத்வாபி அனுஸ்ஸாவேதி. ததா² அயோஜிதேபி தோ³ஸோ நத்தி².

    Yaṃ pana upasampadāpekkhaupajjhāyānaṃ ekattha gahitaṃ nāmaṃ tadeva ñattiyā, sabbattha anussāvanāsu ca gahetabbaṃ. Gahitato hi aññasmiṃ gahite byañjanaṃ bhinnaṃ nāma hoti, kammaṃ vipajjati. Atthato hi byañjanato ca abhinnā eva ñatti anussāvanā ca vaṭṭanti. Upajjhāyanāmassa pana purato ‘‘āyasmato tissassā’’tiādinā āyasmantapadaṃ sabbattha yojetvāpi anussāveti. Tathā ayojitepi doso natthi.

    பாளியங் (மஹாவ॰ 126) பன கிஞ்சாபி ‘‘இத்த²ன்னாமஸ்ஸ ஆயஸ்மதோ’’தி பச்ச²தோ ‘‘ஆயஸ்மதோ’’தி பத³ங் வுத்தங், ததா²பி ‘‘ஆயஸ்மா ஸாரிபுத்தோ அத்த²குஸலோ’’திஆதி³னா நாமஸ்ஸ புரதோ ‘ஆயஸ்மந்தபத³’யோக³ஸ்ஸ த³ஸ்ஸனதோ புரதோவ பயோகோ³ யுத்ததரோ, தஞ்ச ஏகத்த² யோஜெத்வா அஞ்ஞத்த² அயோஜிதேபி ஏகத்த² புரதோ யோஜெத்வா அஞ்ஞத்த² பச்ச²தோ யோஜனேபி ஸாவனாய ஹாபனங் நாம ந ஹோதி நாமஸ்ஸ அஹாபிதத்தா. தேனேவ பாளியம்பி ‘‘இத்த²ன்னாமஸ்ஸ ஆயஸ்மதோ’’தி ஏகத்த² யோஜெத்வா ‘‘இத்த²ன்னாமேன உபஜ்ஜா²யேனா’’திஆதீ³ஸு ‘‘ஆயஸ்மதோ’’தி ந யோஜிதந்தி வத³ந்தி. தஞ்ச கிஞ்சாபி ஏவங், ததா²பி ஸப்³ப³ட்டா²னேபி ஏகேனேவ பகாரேன யோஜெத்வா ஏவ வா அயோஜெத்வா வா அனுஸ்ஸாவனங் பஸத்த²தரந்தி க³ஹேதப்³ப³ங்.

    Pāḷiyaṃ (mahāva. 126) pana kiñcāpi ‘‘itthannāmassa āyasmato’’ti pacchato ‘‘āyasmato’’ti padaṃ vuttaṃ, tathāpi ‘‘āyasmā sāriputto atthakusalo’’tiādinā nāmassa purato ‘āyasmantapada’yogassa dassanato puratova payogo yuttataro, tañca ekattha yojetvā aññattha ayojitepi ekattha purato yojetvā aññattha pacchato yojanepi sāvanāya hāpanaṃ nāma na hoti nāmassa ahāpitattā. Teneva pāḷiyampi ‘‘itthannāmassa āyasmato’’ti ekattha yojetvā ‘‘itthannāmena upajjhāyenā’’tiādīsu ‘‘āyasmato’’ti na yojitanti vadanti. Tañca kiñcāpi evaṃ, tathāpi sabbaṭṭhānepi ekeneva pakārena yojetvā eva vā ayojetvā vā anussāvanaṃ pasatthataranti gahetabbaṃ.

    ஏகதோ ஸஹேவ ஏகஸ்மிங் க²ணே அனுஸ்ஸாவனங் ஏதேஸந்தி ஏகானுஸ்ஸாவனா, உபஸம்பதா³பெக்கா², ஏதே ஏகானுஸ்ஸாவனே காதுங். தேனாஹ ‘‘ஏகதோஅனுஸாவனே’’தி. இத³ஞ்ச ஏகங் பத³ங் விப⁴த்திஅலோபேன த³ட்ட²ப்³ப³ங். ஏகேன வாதி த்³வின்னம்பி ஏகஸ்மிங் க²ணே ஏகாய ஏவ கம்மவாசாய அனுஸ்ஸாவனே ஏகேன ஆசரியேனாதி அத்தோ². ‘‘அயங் பு³த்³த⁴ரக்கி²தோ ச அயங் த⁴ம்மரக்கி²தோ ச ஆயஸ்மதோ ஸங்க⁴ரக்கி²தஸ்ஸ உபஸம்பதா³பெக்கோ²’’திஆதி³னா நயேன ஏகேன ஆசரியேன த்³வின்னமேகஸ்மிங் க²ணே அனுஸ்ஸாவனநயோ த³ட்ட²ப்³போ³, இமினாவ நயேன திண்ணம்பி ஏகேன ஆசரியேன ஏகக்க²ணே அனுஸ்ஸாவனங் வேதி³தப்³ப³ங்.

    Ekato saheva ekasmiṃ khaṇe anussāvanaṃ etesanti ekānussāvanā, upasampadāpekkhā, ete ekānussāvane kātuṃ. Tenāha ‘‘ekatoanusāvane’’ti. Idañca ekaṃ padaṃ vibhattialopena daṭṭhabbaṃ. Ekena vāti dvinnampi ekasmiṃ khaṇe ekāya eva kammavācāya anussāvane ekena ācariyenāti attho. ‘‘Ayaṃ buddharakkhito ca ayaṃ dhammarakkhito ca āyasmato saṅgharakkhitassa upasampadāpekkho’’tiādinā nayena ekena ācariyena dvinnamekasmiṃ khaṇe anussāvananayo daṭṭhabbo, imināva nayena tiṇṇampi ekena ācariyena ekakkhaṇe anussāvanaṃ veditabbaṃ.

    புரிமனயேனேவ ஏகதோ அனுஸ்ஸாவனே காதுந்தி ‘‘ஏகேன ஏகஸ்ஸ, அஞ்ஞேன இதரஸ்ஸா’’திஆதி³னா புப்³பே³ வுத்தனயேன த்³வின்னங் த்³வீஹி வா திண்ணங் தீஹி வா ஆசரியேஹி, ஏகேன வா ஆசரியேன தயோபி ஏகதோஅனுஸ்ஸாவனே காதுந்தி அத்தோ². ‘‘தஞ்ச கோ² ஏகேன உபஜ்ஜா²யேன, ந த்வேவ நானுபஜ்ஜா²யேனா’’தி இத³ங் ஏகேன ஆசரியேன த்³வீஹி வா தீஹி வா உபஜ்ஜா²யேஹி த்³வே வா தயோ வா உபஸம்பதா³பெக்கே² ஏகக்க²ணே ஏகாய அனுஸ்ஸாவனாய ஏகானுஸ்ஸாவனே காதுங் ந வட்டதீதி படிக்கே²பபத³ங், ந பன நானாசரியேஹி நானுபஜ்ஜா²யேஹி தயோ ஏகானுஸ்ஸாவனே காதுங் ந வட்டதீதி ஆஹ ‘‘ஸசே பன நானாசரியா நானுபஜ்ஜா²யா…பே॰… வட்டதீ’’தி. யஞ்செத்த² ‘‘திஸ்ஸத்தே²ரோ ஸுமனத்தே²ரஸ்ஸ ஸத்³தி⁴விஹாரிகங், ஸுமனத்தே²ரோ திஸ்ஸத்தே²ரஸ்ஸ ஸத்³தி⁴விஹாரிக’’ந்தி ஏவங் உபஜ்ஜா²யேஹி அஞ்ஞமஞ்ஞங் ஸத்³தி⁴விஹாரிகானங் அனுஸ்ஸாவனகரணங் வுத்தங், தங் உபலக்க²ணமத்தங். தஸ்மா ஸசே திஸ்ஸத்தே²ரோ ஸுமனத்தே²ரஸ்ஸ ஸத்³தி⁴விஹாரிகங், ஸுமனத்தே²ரோ நந்த³த்தே²ரஸ்ஸ ஸத்³தி⁴விஹாரிகங் அனுஸ்ஸாவேதி, அஞ்ஞமஞ்ஞஞ்ச க³ணபூரகா ஹொந்தி, வட்டதி ஏவ. ஸசே பன உபஜ்ஜா²யோ ஸயமேவ அத்தனோ ஸத்³தி⁴விஹாரிகங் அனுஸ்ஸாவேதி, எத்த² வத்தப்³ப³மேவ நத்தி², கம்மங் ஸுகதமேவ ஹோதி, அனுபஜ்ஜா²யகஸ்ஸபி யேன கேனசி அனுஸ்ஸாவிதே உபஸம்பதா³ ஹோதி, கிமங்க³ங் பன ஸஉபஜ்ஜா²யகஸ்ஸ உபஜ்ஜா²யேனேவ அனுஸ்ஸாவனேதி த³ட்ட²ப்³ப³ங். தேனேவ நவட்டனபக்க²ங் த³ஸ்ஸேதுங் ‘‘ஸசே பனா’’திஆதி³மாஹ.

    Purimanayenevaekato anussāvane kātunti ‘‘ekena ekassa, aññena itarassā’’tiādinā pubbe vuttanayena dvinnaṃ dvīhi vā tiṇṇaṃ tīhi vā ācariyehi, ekena vā ācariyena tayopi ekatoanussāvane kātunti attho. ‘‘Tañca kho ekena upajjhāyena, na tveva nānupajjhāyenā’’ti idaṃ ekena ācariyena dvīhi vā tīhi vā upajjhāyehi dve vā tayo vā upasampadāpekkhe ekakkhaṇe ekāya anussāvanāya ekānussāvane kātuṃ na vaṭṭatīti paṭikkhepapadaṃ, na pana nānācariyehi nānupajjhāyehi tayo ekānussāvane kātuṃ na vaṭṭatīti āha ‘‘sace pana nānācariyā nānupajjhāyā…pe… vaṭṭatī’’ti. Yañcettha ‘‘tissatthero sumanattherassa saddhivihārikaṃ, sumanatthero tissattherassa saddhivihārika’’nti evaṃ upajjhāyehi aññamaññaṃ saddhivihārikānaṃ anussāvanakaraṇaṃ vuttaṃ, taṃ upalakkhaṇamattaṃ. Tasmā sace tissatthero sumanattherassa saddhivihārikaṃ, sumanatthero nandattherassa saddhivihārikaṃ anussāveti, aññamaññañca gaṇapūrakā honti, vaṭṭati eva. Sace pana upajjhāyo sayameva attano saddhivihārikaṃ anussāveti, ettha vattabbameva natthi, kammaṃ sukatameva hoti, anupajjhāyakassapi yena kenaci anussāvite upasampadā hoti, kimaṅgaṃ pana saupajjhāyakassa upajjhāyeneva anussāvaneti daṭṭhabbaṃ. Teneva navaṭṭanapakkhaṃ dassetuṃ ‘‘sace panā’’tiādimāha.

    உபஜ்ஜா²தி உபஜ்ஜா²யஸத்³த³ஸமானத்தோ² ஆகாரந்தோ உபஜ்ஜா²ஸத்³தோ³தி த³ஸ்ஸேதி. உபஜ்ஜா²ய-ஸத்³தோ³ ஏவ வா உபஜ்ஜா², உபயோக³பச்சத்தவசனேஸு ய-கார லோபங் கத்வா ஏவங் வுத்தோ கரணவசனாதீ³ஸு உபஜ்ஜா²ஸத்³த³ஸ்ஸ பயோகா³பா⁴வாதி த³ட்ட²ப்³ப³ங். பாளியங் அத்தனாவ அத்தானங் ஸம்மன்னிதப்³ப³ந்தி அத்தனாவ கத்துபூ⁴தேன கரணபூ⁴தேன அத்தானமேவ கம்மபூ⁴தங் பதி ஸம்மன்னநகிச்சங் காதப்³ப³ங், அத்தானந்தி வா பச்சத்தே உபயோக³வசனங், அத்தனாவ அத்தா ஸம்மன்னிதப்³போ³தி அத்தோ². ந கேவலஞ்ச எத்தே²வ, அஞ்ஞத்ராபி தேரஸஸம்முதிஆதீ³ஸு இமினாவ லக்க²ணேன அத்தனாவ அத்தா ஸம்மன்னிதப்³போ³வ. அபிச ஸயங் கம்மாரஹத்தா அத்தானங் முஞ்சித்வா சதுவக்³கா³தி³கோ க³ணோ ஸப்³ப³த்த² இச்சி²தப்³போ³.

    Upajjhāti upajjhāyasaddasamānattho ākāranto upajjhāsaddoti dasseti. Upajjhāya-saddo eva vā upajjhā, upayogapaccattavacanesu ya-kāra lopaṃ katvā evaṃ vutto karaṇavacanādīsu upajjhāsaddassa payogābhāvāti daṭṭhabbaṃ. Pāḷiyaṃ attanāva attānaṃ sammannitabbanti attanāva kattubhūtena karaṇabhūtena attānameva kammabhūtaṃ pati sammannanakiccaṃ kātabbaṃ, attānanti vā paccatte upayogavacanaṃ, attanāva attā sammannitabboti attho. Na kevalañca ettheva, aññatrāpi terasasammutiādīsu imināva lakkhaṇena attanāva attā sammannitabbova. Apica sayaṃ kammārahattā attānaṃ muñcitvā catuvaggādiko gaṇo sabbattha icchitabbo.

    ஸச்சகாலோதி ‘‘நிகூ³ஹிஸ்ஸாமீ’’தி வஞ்சனங் பஹாய ஸச்சஸ்ஸேவ தே இச்சி²தப்³ப³காலோ. பூ⁴தகாலோதி வஞ்சனாய அபா⁴வேபி மனுஸ்ஸத்தாதி³வத்து²னோ பூ⁴ததாய அவஸ்ஸங் இச்சி²தப்³ப³காலோ, இதரதா² கம்மகோபாதி³அந்தராயோ ஹோதீதி அதி⁴ப்பாயோ. மங்கூதி அதோ⁴முகோ². உத்³த⁴ரதூதி அனுபஸம்பன்னபா⁴வதோ உபஸம்பத்தியங் பதிட்ட²பேதூதி அத்தோ².

    Saccakāloti ‘‘nigūhissāmī’’ti vañcanaṃ pahāya saccasseva te icchitabbakālo. Bhūtakāloti vañcanāya abhāvepi manussattādivatthuno bhūtatāya avassaṃ icchitabbakālo, itarathā kammakopādiantarāyo hotīti adhippāyo. Maṅkūti adhomukho. Uddharatūti anupasampannabhāvato upasampattiyaṃ patiṭṭhapetūti attho.

    ஸப்³ப³கம்மவாசாஸு அத்த²கோஸல்லத்த²ங் பனெத்த² உபஸம்பத³கம்மவாசாய ஏவமத்தோ² த³ட்ட²ப்³போ³ – ஸுணாதூதி ஸவனாணத்தியங் பட²மபுரிஸேகவசனங். தஞ்ச கிஞ்சாபி யோ ஸோ ஸங்கோ⁴ ஸவனகிரியாயங் நியோஜீயதி, தஸ்ஸ ஸம்முக²த்தா ‘‘ஸுணாஹீ’’தி மஜ்ஜி²மபுரிஸவசனேன வத்தப்³ப³ங், ததா²பி யஸ்மா ஸங்க⁴ஸத்³த³ஸன்னிதா⁴னே பட²மபுரிஸப்பயோகோ³வ ஸத்³த³விதூ³ஹி ஸமாசிண்ணோ ப⁴வந்தப⁴க³வந்தஆயஸ்மாதி³ஸத்³த³ஸன்னிதா⁴னேஸு விய ‘‘அதி⁴வாஸேது மே ப⁴வங் கோ³தமோ (பாரா॰ 22), ஏதஸ்ஸ ஸுக³த காலோ, யங் ப⁴க³வா ஸாவகானங் ஸிக்கா²பத³ங் பஞ்ஞபெய்ய (பாரா॰ 21), பக்கமதாயஸ்மா (பாரா॰ 436), ஸுணந்து மே ஆயஸ்மந்தோ’’திஆதீ³ஸு (மஹாவ॰ 168). தஸ்மா இத⁴ பட²மபுரிஸப்பயோகோ³ கதோ. அத² வா கா³ரவவஸேனேதங் வுத்தங். க³ருட்டா²னியேஸு ஹி கா³ரவவஸேன மஜ்ஜி²மபுரிஸபயோகு³ப்பத்தியம்பி பட²மபுரிஸப்பயோக³ங் பயுஜ்ஜந்தி ‘‘தே³ஸேது ஸுக³தோ த⁴ம்ம’’ந்திஆதீ³ஸு (தீ³॰ நி॰ 2.66; ம॰ நி॰ 2.338; மஹாவ॰ 8) வியாதி த³ட்ட²ப்³ப³ங். கேசி பன ‘‘ப⁴ந்தே ஆவுஸோதி பதே³ அபெக்கி²த்வா இத⁴ பட²மபுரிஸப்பயோகோ³’’தி வத³ந்தி, தங் ந ஸுந்த³ரங் ‘‘ஆசரியோ மே, ப⁴ந்தே, ஹோஹி (மஹாவ॰ 77), இங்கா⁴வுஸோ உபாலி, இமங் பப்³ப³ஜிதங் அனுயுஞ்ஜாஹீ’’திஆதீ³ஸு (பாரா॰ 517) தப்பயோகே³பி மஜ்ஜி²மபுரிஸப்பயோக³ஸ்ஸேவ த³ஸ்ஸனதோ.

    Sabbakammavācāsu atthakosallatthaṃ panettha upasampadakammavācāya evamattho daṭṭhabbo – suṇātūti savanāṇattiyaṃ paṭhamapurisekavacanaṃ. Tañca kiñcāpi yo so saṅgho savanakiriyāyaṃ niyojīyati, tassa sammukhattā ‘‘suṇāhī’’ti majjhimapurisavacanena vattabbaṃ, tathāpi yasmā saṅghasaddasannidhāne paṭhamapurisappayogova saddavidūhi samāciṇṇo bhavantabhagavantaāyasmādisaddasannidhānesu viya ‘‘adhivāsetu me bhavaṃ gotamo (pārā. 22), etassa sugata kālo, yaṃ bhagavā sāvakānaṃ sikkhāpadaṃ paññapeyya (pārā. 21), pakkamatāyasmā (pārā. 436), suṇantu me āyasmanto’’tiādīsu (mahāva. 168). Tasmā idha paṭhamapurisappayogo kato. Atha vā gāravavasenetaṃ vuttaṃ. Garuṭṭhāniyesu hi gāravavasena majjhimapurisapayoguppattiyampi paṭhamapurisappayogaṃ payujjanti ‘‘desetu sugato dhamma’’ntiādīsu (dī. ni. 2.66; ma. ni. 2.338; mahāva. 8) viyāti daṭṭhabbaṃ. Keci pana ‘‘bhante āvusoti pade apekkhitvā idha paṭhamapurisappayogo’’ti vadanti, taṃ na sundaraṃ ‘‘ācariyo me, bhante, hohi (mahāva. 77), iṅghāvuso upāli, imaṃ pabbajitaṃ anuyuñjāhī’’tiādīsu (pārā. 517) tappayogepi majjhimapurisappayogasseva dassanato.

    மேதி யோ ஸாவேதி, தஸ்ஸ அத்தனித்³தே³ஸே ஸாமிவசனங். ப⁴ந்தேதி ஆலபனத்தே² வுட்³டே⁴ஸு ஸகா³ரவவசனங், ‘‘ஆவுஸோ’’தி பத³ங் பன நவகேஸு. தது³ப⁴யம்பி நிபாதோ ‘‘தும்ஹே ப⁴ந்தே தும்ஹே ஆவுஸோ’’தி ப³ஹூஸுபி ஸமானரூபத்தா. ஸங்கோ⁴தி அவிஸேஸதோ சதுவக்³கா³தி³கே பகதத்தபுக்³க³லஸமூஹே வத்ததி. இத⁴ பன பச்சந்திமேஸு ஜனபதே³ஸு பஞ்சவக்³க³தோ பட்டா²ய, மஜ்ஜி²மேஸு ஜனபதே³ஸு த³ஸவக்³க³தோ பட்டா²ய ஸங்கோ⁴தி க³ஹேதப்³போ³. தத்ராயங் பிண்ட³த்தோ² – ப⁴ந்தே, ஸங்கோ⁴ மம வசனங் ஸுணாதூதி. இத³ஞ்ச நவகதரேன வத்தப்³ப³வசனங். ஸசே பன அனுஸ்ஸாவகோ ஸப்³பே³ஹி பி⁴க்கூ²ஹி வுட்³ட⁴தரோ ஹோதி, ‘‘ஸுணாது மே, ஆவுஸோ ஸங்கோ⁴’’தி வத்தப்³ப³ங். ஸோபி சே ‘‘ப⁴ந்தே’’தி வதெ³ய்ய, நவகதரோ வா ‘‘ஆவுஸோ’’தி, கம்மகோபோ நத்தி². கேசி பன ‘‘ஏகத்த² ‘ஆவுஸோ’தி வத்வா அஞ்ஞத்த² ‘ப⁴ந்தே’தி வுத்தேபி நத்தி² தோ³ஸோ உப⁴யேனபி ஆலபனஸ்ஸ ஸிஜ்ஜ²னதோ’’தி வத³ந்தி.

    Meti yo sāveti, tassa attaniddese sāmivacanaṃ. Bhanteti ālapanatthe vuḍḍhesu sagāravavacanaṃ, ‘‘āvuso’’ti padaṃ pana navakesu. Tadubhayampi nipāto ‘‘tumhe bhante tumhe āvuso’’ti bahūsupi samānarūpattā. Saṅghoti avisesato catuvaggādike pakatattapuggalasamūhe vattati. Idha pana paccantimesu janapadesu pañcavaggato paṭṭhāya, majjhimesu janapadesu dasavaggato paṭṭhāya saṅghoti gahetabbo. Tatrāyaṃ piṇḍattho – bhante, saṅgho mama vacanaṃ suṇātūti. Idañca navakatarena vattabbavacanaṃ. Sace pana anussāvako sabbehi bhikkhūhi vuḍḍhataro hoti, ‘‘suṇātu me, āvuso saṅgho’’ti vattabbaṃ. Sopi ce ‘‘bhante’’ti vadeyya, navakataro vā ‘‘āvuso’’ti, kammakopo natthi. Keci pana ‘‘ekattha ‘āvuso’ti vatvā aññattha ‘bhante’ti vuttepi natthi doso ubhayenapi ālapanassa sijjhanato’’ti vadanti.

    இதா³னி யமத்த²ங் ஞாபேதுகாமோ ‘‘ஸுணாதூ’’தி ஸங்க⁴ங் ஸவனே நியோஜேதி, தங் ஞாபெந்தோ ‘‘அயங் இத்த²ன்னாமோ’’திஆதி³மாஹ. தத்த² அயந்தி உபஸம்பதா³பெக்க²ஸ்ஸ ஹத்த²பாஸே ஸன்னிஹிதபா⁴வத³ஸ்ஸனங், தேன ச ஹத்த²பாஸே டி²தஸ்ஸேவ உபஸம்பதா³ ருஹதீதி ஸிஜ்ஜ²தி ஹத்த²பாஸதோ ப³ஹி டி²தஸ்ஸ ‘‘அய’’ந்தி ந வத்தப்³ப³தோ. தேனேவ அனுஸாஸகஸம்முதியங் ஸோ ஹத்த²பாஸதோ ப³ஹி டி²தத்தா ‘‘அய’’ந்தி ந வுத்தோ, தஸ்மா உபஸம்பதா³பெக்கோ² அனுபஸம்பன்னோ ஹத்த²பாஸே ட²பேதப்³போ³. அயங் இத்த²ன்னாமோதி அயங்-ஸத்³தோ³ ச அவஸ்ஸங் பயுஜ்ஜிதப்³போ³, ஸோ ச இமஸ்மிங் பட²மனாமபயோகே³ ஏவாதி க³ஹேதப்³ப³ங். ‘‘இத்த²ன்னாமோ’’தி இத³ங் அனியமதோ தஸ்ஸ நாமத³ஸ்ஸனங், உப⁴யேனபி அயங் பு³த்³த⁴ரக்கி²தோதிஆதி³னாமங் த³ஸ்ஸேதி. ‘‘உபஸம்பதா³பெக்கோ²’’தி பி⁴ன்னாதி⁴கரணவிஸயே ப³ஹுப்³பீ³ஹிஸமாஸோ, உபஸம்பத³ங் மே ஸங்கோ⁴ அபெக்க²மானோதி அத்தோ². தஸ்ஸ ச உபஜ்ஜா²யதங் ஸமங்கி³பா⁴வேன த³ஸ்ஸேதுங் ‘‘இத்த²ன்னாமஸ்ஸ ஆயஸ்மதோ’’தி வுத்தங். ஏதேன ‘‘அயங் பு³த்³த⁴ரக்கி²தோ ஆயஸ்மதோ த⁴ம்மரக்கி²தஸ்ஸ ஸத்³தி⁴விஹாரிகபூ⁴தோ உபஸம்பதா³பெக்கோ²’’தி ஏவமாதி³னா நயேன நாமயோஜனாய ஸஹ அத்தோ² த³ஸ்ஸிதோ. எத்த² ச ‘‘ஆயஸ்மதோ’’தி பத³ங் அவத்வாபி ‘‘அயங் பு³த்³த⁴ரக்கி²தோ த⁴ம்மரக்கி²தஸ்ஸ உபஸம்பதா³பெக்கோ²’’தி வத்துங் வட்டதி. தேனேவ பாளியங் ‘‘இத்த²ன்னாமேன உபஜ்ஜா²யேனா’’தி எத்த² ‘‘ஆயஸ்மதோ’’தி பத³ங் ந வுத்தங். யஞ்செத்த² வத்தப்³ப³ங், தங் ஹெட்டா² வுத்தமேவ.

    Idāni yamatthaṃ ñāpetukāmo ‘‘suṇātū’’ti saṅghaṃ savane niyojeti, taṃ ñāpento ‘‘ayaṃ itthannāmo’’tiādimāha. Tattha ayanti upasampadāpekkhassa hatthapāse sannihitabhāvadassanaṃ, tena ca hatthapāse ṭhitasseva upasampadā ruhatīti sijjhati hatthapāsato bahi ṭhitassa ‘‘aya’’nti na vattabbato. Teneva anusāsakasammutiyaṃ so hatthapāsato bahi ṭhitattā ‘‘aya’’nti na vutto, tasmā upasampadāpekkho anupasampanno hatthapāse ṭhapetabbo. Ayaṃ itthannāmoti ayaṃ-saddo ca avassaṃ payujjitabbo, so ca imasmiṃ paṭhamanāmapayoge evāti gahetabbaṃ. ‘‘Itthannāmo’’ti idaṃ aniyamato tassa nāmadassanaṃ, ubhayenapi ayaṃ buddharakkhitotiādināmaṃ dasseti. ‘‘Upasampadāpekkho’’ti bhinnādhikaraṇavisaye bahubbīhisamāso, upasampadaṃ me saṅgho apekkhamānoti attho. Tassa ca upajjhāyataṃ samaṅgibhāvena dassetuṃ ‘‘itthannāmassa āyasmato’’ti vuttaṃ. Etena ‘‘ayaṃ buddharakkhito āyasmato dhammarakkhitassa saddhivihārikabhūto upasampadāpekkho’’ti evamādinā nayena nāmayojanāya saha attho dassito. Ettha ca ‘‘āyasmato’’ti padaṃ avatvāpi ‘‘ayaṃ buddharakkhito dhammarakkhitassa upasampadāpekkho’’ti vattuṃ vaṭṭati. Teneva pāḷiyaṃ ‘‘itthannāmena upajjhāyenā’’ti ettha ‘‘āyasmato’’ti padaṃ na vuttaṃ. Yañcettha vattabbaṃ, taṃ heṭṭhā vuttameva.

    நனு செத்த² உபஜ்ஜா²யோபி உபஸம்பதா³பெக்கோ² விய ஹத்த²பாஸே டி²தோ ஏவ இச்சி²தப்³போ³, அத² கஸ்மா ‘‘அயங் இத்த²ன்னாமோ இமஸ்ஸ இத்த²ன்னாமஸ்ஸ உபஸம்பதா³பெக்கோ²’’தி ஏவங் உபஜ்ஜா²யஸ்ஸ நாமபராமஸனேபி இத³ங்-ஸத்³த³ப்பயோகோ³ ந கதோதி? நாயங் விரோதோ⁴ உபஜ்ஜா²யஸ்ஸ அபா⁴வேபி கம்மகோபாபா⁴வதோ. கேவலஞ்ஹி கம்மனிப்³ப³த்தியா ஸந்தபத³வஸேன அவிஜ்ஜமானஸ்ஸபி உபஜ்ஜா²யஸ்ஸ நாமகித்தனங் அனுபஜ்ஜா²யஸ்ஸ உபஸம்பதா³தீ³ஸுபி கரீயதி, தஸ்மா உபஜ்ஜா²யஸ்ஸ அஸன்னிஹிதாயபி தப்பராமஸனமத்தேனேவ கம்மஸித்³தி⁴தோ ‘‘இமஸ்ஸா’’தி நித்³தி³ஸிதுங் ந வட்டதீதி.

    Nanu cettha upajjhāyopi upasampadāpekkho viya hatthapāse ṭhito eva icchitabbo, atha kasmā ‘‘ayaṃ itthannāmo imassa itthannāmassa upasampadāpekkho’’ti evaṃ upajjhāyassa nāmaparāmasanepi idaṃ-saddappayogo na katoti? Nāyaṃ virodho upajjhāyassa abhāvepi kammakopābhāvato. Kevalañhi kammanibbattiyā santapadavasena avijjamānassapi upajjhāyassa nāmakittanaṃ anupajjhāyassa upasampadādīsupi karīyati, tasmā upajjhāyassa asannihitāyapi tapparāmasanamatteneva kammasiddhito ‘‘imassā’’ti niddisituṃ na vaṭṭatīti.

    பரிஸுத்³தோ⁴ அந்தராயிகேஹி த⁴ம்மேஹீதி அப⁴ப்³ப³த்தாதி³கேஹி உபஸம்பதா³ய அவத்து²கரேஹி சேவ பஞ்சாபா³த⁴ஹத்த²ச்சி²ன்னாதீ³ஹி ஆபத்திகரேஹி ச அந்தராயிகஸபா⁴வேஹி பரிமுத்தோ. ஏவங் வுத்தே ஏவ ஆபத்திமத்தகரேஹி பஞ்சாபா³தா⁴தீ³ஹி அபரிமுத்தஸ்ஸபி உபஸம்பதா³ ருஹதி, நாஞ்ஞதா². பரிபுண்ணஸ்ஸ பத்தசீவரந்தி பரிபுண்ணமஸ்ஸ உபஸம்பதா³பெக்க²ஸ்ஸ பத்தசீவரங். ஏவங் வுத்தே ஏவ அபத்தசீவரஸ்ஸபி உபஸம்பதா³ ருஹதி, நாஞ்ஞதா². உபஸம்பத³ங் யாசதீதி ‘‘ஸங்க⁴ங், ப⁴ந்தே, உபஸம்பத³ங் யாசாமீ’’திஆதி³னா (மஹாவ॰ 126) யாசாபிதபா⁴வங் ஸந்தா⁴ய வுத்தங். ஏவங் தேன ஸங்கே⁴ அயாசிதேபி ‘‘இத்த²ன்னாமோ ஸங்க⁴ங் உபஸம்பத³ங் யாசதீ’’தி வுத்தே ஏவ கம்மங் அவிபன்னங் ஹோதி, நாஞ்ஞதா². உபஜ்ஜா²யேனாதி உபஜ்ஜா²யேன கரணபூ⁴தேன, இத்த²ன்னாமங் உபஜ்ஜா²யங் கத்வா கம்மபூ⁴தங் உபஸம்பத³ங் தா³துங் நிப்பா²தே³துங் கத்துபூ⁴தங் ஸங்க⁴ங் யாசதீதி அத்தோ². யாசதா⁴துனோ பன த்³விகம்மகத்தா ‘‘ஸங்க⁴ங் உபஸம்பத³’’ந்தி த்³வே கம்மபதா³னி வுத்தானி.

    Parisuddho antarāyikehi dhammehīti abhabbattādikehi upasampadāya avatthukarehi ceva pañcābādhahatthacchinnādīhi āpattikarehi ca antarāyikasabhāvehi parimutto. Evaṃ vutte eva āpattimattakarehi pañcābādhādīhi aparimuttassapi upasampadā ruhati, nāññathā. Paripuṇṇassa pattacīvaranti paripuṇṇamassa upasampadāpekkhassa pattacīvaraṃ. Evaṃ vutte eva apattacīvarassapi upasampadā ruhati, nāññathā. Upasampadaṃ yācatīti ‘‘saṅghaṃ, bhante, upasampadaṃ yācāmī’’tiādinā (mahāva. 126) yācāpitabhāvaṃ sandhāya vuttaṃ. Evaṃ tena saṅghe ayācitepi ‘‘itthannāmo saṅghaṃ upasampadaṃ yācatī’’ti vutte eva kammaṃ avipannaṃ hoti, nāññathā. Upajjhāyenāti upajjhāyena karaṇabhūtena, itthannāmaṃ upajjhāyaṃ katvā kammabhūtaṃ upasampadaṃ dātuṃ nipphādetuṃ kattubhūtaṃ saṅghaṃ yācatīti attho. Yācadhātuno pana dvikammakattā ‘‘saṅghaṃ upasampada’’nti dve kammapadāni vuttāni.

    யதி³ ஸங்க⁴ஸ்ஸ பத்தகல்லந்தி எத்த² பத்தோ காலோ இமஸ்ஸ கம்மஸ்ஸாதி பத்தகாலங், அபலோகனாதி³சதுப்³பி³த⁴ங் ஸங்க⁴க³ணகம்மங், ததே³வ ஸகத்தே² ய-பச்சயேன ‘‘பத்தகல்ல’’ந்தி வுச்சதி. இத⁴ பன ஞத்திசதுத்த²உபஸம்பதா³கம்மங் அதி⁴ப்பேதங், தங் காதுங் ஸங்க⁴ஸ்ஸ பத்தகல்லங் ஜாதங். யதீ³தி அனுமதிக³ஹணவஸேன கம்மஸ்ஸ பத்தகல்லதங் ஞாபேதி, யோ ஹி கோசி தத்த² அபத்தகல்லதங் மஞ்ஞிஸ்ஸதி, ஸோ வக்க²தி. இமமேவ ஹி அத்த²ங் ஸந்தா⁴ய அனுஸ்ஸாவனாஸு ‘‘யஸ்ஸாயஸ்மதோ க²மதி…பே॰… ஸோ பா⁴ஸெய்யா’’தி (மஹாவ॰ 127) வுத்தங். ததே³தங் பத்தகல்லங் வத்து²ஸம்பதா³, அந்தராயிகேஹி த⁴ம்மேஹி சஸ்ஸ பரிஸுத்³த⁴தா, ஸீமாஸம்பதா³, பரிஸாஸம்பதா³, புப்³ப³கிச்சனிட்டா²னந்தி இமேஹி பஞ்சஹி அங்கே³ஹி ஸங்க³ஹிதங்.

    Yadi saṅghassa pattakallanti ettha patto kālo imassa kammassāti pattakālaṃ, apalokanādicatubbidhaṃ saṅghagaṇakammaṃ, tadeva sakatthe ya-paccayena ‘‘pattakalla’’nti vuccati. Idha pana ñatticatutthaupasampadākammaṃ adhippetaṃ, taṃ kātuṃ saṅghassa pattakallaṃ jātaṃ. Yadīti anumatigahaṇavasena kammassa pattakallataṃ ñāpeti, yo hi koci tattha apattakallataṃ maññissati, so vakkhati. Imameva hi atthaṃ sandhāya anussāvanāsu ‘‘yassāyasmato khamati…pe… so bhāseyyā’’ti (mahāva. 127) vuttaṃ. Tadetaṃ pattakallaṃ vatthusampadā, antarāyikehi dhammehi cassa parisuddhatā, sīmāsampadā, parisāsampadā, pubbakiccaniṭṭhānanti imehi pañcahi aṅgehi saṅgahitaṃ.

    தத்த² வத்து²ஸம்பதா³ நாம யதா²வுத்தேஹி ஏகாத³ஸஅப⁴ப்³ப³புக்³க³லேஹி சேவ அந்திமவத்து²அஜ்ஜா²பன்னேஹி ச அஞ்ஞோ பரிபுண்ணவீஸதிவஸ்ஸோ அனுபஸம்பன்னபூ⁴தோ மனுஸ்ஸபுரிஸோ. ஏதஸ்மிஞ்ஹி புக்³க³லே ஸதி ஏவ இத³ங் ஸங்க⁴ஸ்ஸ உபஸம்பதா³கம்மங் பத்தகல்லங் நாம ஹோதி, நாஸதி, கதஞ்ச குப்பமேவ ஹோதி.

    Tattha vatthusampadā nāma yathāvuttehi ekādasaabhabbapuggalehi ceva antimavatthuajjhāpannehi ca añño paripuṇṇavīsativasso anupasampannabhūto manussapuriso. Etasmiñhi puggale sati eva idaṃ saṅghassa upasampadākammaṃ pattakallaṃ nāma hoti, nāsati, katañca kuppameva hoti.

    அந்தராயிகேஹி த⁴ம்மேஹி சஸ்ஸ பரிஸுத்³த⁴தா நாம யதா²வுத்தஸ்ஸேவ உபஸம்பதா³வத்து²பூ⁴தஸ்ஸ புக்³க³லஸ்ஸ யே இமே ப⁴க³வதா படிக்கி²த்தா பஞ்சாபா³த⁴பு²ட்ட²தாத³யோ மாதாபிதூஹி அனநுஞ்ஞாததாபஅயோஸானா சேவ ஹத்த²ச்சி²ன்னாத³யோ ச தோ³ஸத⁴ம்மா காரகஸங்க⁴ஸ்ஸ ஆபத்தாதி³அந்தராயஹேதுதாய ‘‘அந்தராயிகா’’தி வுச்சந்தி, தேஹி அந்தராயிகேஹி தோ³ஸத⁴ம்மேஹி பரிமுத்ததா, இமிஸ்ஸா ச ஸதி ஏவ இத³ங் கம்மங் பத்தகல்லங் நாம ஹோதி, நாஸதி, கதங் பன கம்மங் ஸுகதமேவ ஹோதி ட²பெத்வா ஊனவீஸதிவஸ்ஸங் புக்³க³லங்.

    Antarāyikehi dhammehi cassa parisuddhatā nāma yathāvuttasseva upasampadāvatthubhūtassa puggalassa ye ime bhagavatā paṭikkhittā pañcābādhaphuṭṭhatādayo mātāpitūhi ananuññātatāpaayosānā ceva hatthacchinnādayo ca dosadhammā kārakasaṅghassa āpattādiantarāyahetutāya ‘‘antarāyikā’’ti vuccanti, tehi antarāyikehi dosadhammehi parimuttatā, imissā ca sati eva idaṃ kammaṃ pattakallaṃ nāma hoti, nāsati, kataṃ pana kammaṃ sukatameva hoti ṭhapetvā ūnavīsativassaṃ puggalaṃ.

    ஸீமாஸம்பதா³ பன உபோஸத²க்க²ந்த⁴கே (மஹாவ॰ 138 ஆத³யோ) வக்க²மானநயேன ஸப்³ப³தோ³ஸரஹிதாய ப³த்³தா⁴ப³த்³த⁴வஸேனேவ து³விதா⁴ய ஸீமாய வஸேன வேதி³தப்³பா³. தாதி³ஸாய ஹி ஸீமாய ஸதி ஏவ இத³ங் கம்மங் பத்தகல்லங் நாம ஹோதி, நாஸதி, கதஞ்ச கம்மங் விபஜ்ஜதி.

    Sīmāsampadā pana uposathakkhandhake (mahāva. 138 ādayo) vakkhamānanayena sabbadosarahitāya baddhābaddhavaseneva duvidhāya sīmāya vasena veditabbā. Tādisāya hi sīmāya sati eva idaṃ kammaṃ pattakallaṃ nāma hoti, nāsati, katañca kammaṃ vipajjati.

    பரிஸாஸம்பதா³ பன யே இமே உபஸம்பதா³கம்மஸ்ஸ ஸப்³ப³ந்திமேன பரிச்சே²தே³ன கம்மப்பத்தா த³ஸஹி வா பஞ்சஹி வா அனூனாபாராஜிகங் அனாபன்னா அனுக்கி²த்தா ச ஸமானஸங்வாஸகா பி⁴க்கூ², தேஸங் ஏகஸீமாய ஹத்த²பாஸங் அவிஜஹித்வா டா²னங், ச²ந்தா³ரஹானஞ்ச ச²ந்த³ஸ்ஸ ஆனயனங், ஸம்முகீ²பூ⁴தானஞ்ச அப்படிகோஸனங், உபஸம்பதா³பெக்க²ரஹிதானங் உபோஸத²க்க²ந்த⁴கே படிக்கி²த்தானங் க³ஹட்டா²தி³அனுபஸம்பன்னானஞ்சேவ பாராஜிகுக்கி²த்தகனானாஸங்வாஸகபி⁴க்கு²னீனஞ்ச வஜ்ஜனீயபுக்³க³லானங் ஸங்க⁴ஸ்ஸ ஹத்த²பாஸே அபா⁴வோ சாதி இமேஹி சதூஹி அங்கே³ஹி ஸங்க³ஹிதா. ஏவரூபாய ச பரிஸாஸம்பதா³ய ஸதி ஏவ இத³ங் பத்தகல்லங் நாம ஹோதி, நாஸதி. தத்த² புரிமானங் திண்ணங் அங்கா³னங் அஞ்ஞதரஸ்ஸபி அபா⁴வே கதங் கம்மங் விபஜ்ஜதி, ந பச்சி²மஸ்ஸ.

    Parisāsampadā pana ye ime upasampadākammassa sabbantimena paricchedena kammappattā dasahi vā pañcahi vā anūnāpārājikaṃ anāpannā anukkhittā ca samānasaṃvāsakā bhikkhū, tesaṃ ekasīmāya hatthapāsaṃ avijahitvā ṭhānaṃ, chandārahānañca chandassa ānayanaṃ, sammukhībhūtānañca appaṭikosanaṃ, upasampadāpekkharahitānaṃ uposathakkhandhake paṭikkhittānaṃ gahaṭṭhādianupasampannānañceva pārājikukkhittakanānāsaṃvāsakabhikkhunīnañca vajjanīyapuggalānaṃ saṅghassa hatthapāse abhāvo cāti imehi catūhi aṅgehi saṅgahitā. Evarūpāya ca parisāsampadāya sati eva idaṃ pattakallaṃ nāma hoti, nāsati. Tattha purimānaṃ tiṇṇaṃ aṅgānaṃ aññatarassapi abhāve kataṃ kammaṃ vipajjati, na pacchimassa.

    புப்³ப³கிச்சனிட்டா²னங் நாம யானிமானி ‘‘பட²மங் உபஜ்ஜ²ங் கா³ஹாபேதப்³போ³’’திஆதி³னா பாளியங் (மஹாவ॰ 126) வுத்தானி ‘‘உபஜ்ஜா²கா³ஹாபனங், பத்தசீவராசிக்க²ணங், ததோ தங் ஹத்த²பாஸதோ ப³ஹி பேஸெத்வா அனுஸாஸகஸம்முதிகம்மகரணங், ஸம்மதேன ச க³ந்த்வா அனுஸாஸனங், தேன ச பட²மதரங் ஆக³ந்த்வா ஸங்க⁴ஸ்ஸ ஞத்திங் ஞாபெத்வா உபஸம்பதா³பெக்க²ங் ‘ஆக³ச்சா²ஹீ’தி ஹத்த²பாஸே ஏவ அப்³பா⁴னங், தேன பி⁴க்கூ²னங் பாதே³ வந்தா³பெத்வா உபஸம்பதா³யாசாபனங், ததோ அந்தராயிகத⁴ம்மபுச்ச²கஸம்முதிகம்மகரணங், ஸம்மதேன ச புச்ச²ன’’ந்தி இமானி அட்ட² புப்³ப³கிச்சானி, தேஸங் ஸப்³பே³ஸங் யாதா²வதோ கரணேன நிட்டா²னங். ஏதஸ்மிஞ்ச புப்³ப³கிச்சனிட்டா²பனே ஸதி ஏவ இத³ங் ஸங்க⁴ஸ்ஸ உபஸம்பதா³கம்மங் பத்தகல்லங் நாம ஹோதி, நாஸதி. ஏதேஸு பன புப்³ப³கம்மேஸு அகதேஸுபி கதங் கம்மங் யதா²வுத்தேஸு வத்து²ஸம்பத்திஆதீ³ஸு விஜ்ஜமானேஸு அகுப்பமேவ ஹோதி. ததே³வமெத்த² பத்தகல்லங் இமேஹி பஞ்சஹி அங்கே³ஹி ஸங்க³ஹிதந்தி வேதி³தப்³ப³ங். இமினாவ நயேன ஹெட்டா² வுத்தேஸு, வக்க²மானேஸு ச ஸப்³பே³ஸு கம்மேஸு பத்தகல்லதா யதா²ரஹங் யோஜெத்வா ஞாதப்³பா³.

    Pubbakiccaniṭṭhānaṃ nāma yānimāni ‘‘paṭhamaṃ upajjhaṃ gāhāpetabbo’’tiādinā pāḷiyaṃ (mahāva. 126) vuttāni ‘‘upajjhāgāhāpanaṃ, pattacīvarācikkhaṇaṃ, tato taṃ hatthapāsato bahi pesetvā anusāsakasammutikammakaraṇaṃ, sammatena ca gantvā anusāsanaṃ, tena ca paṭhamataraṃ āgantvā saṅghassa ñattiṃ ñāpetvā upasampadāpekkhaṃ ‘āgacchāhī’ti hatthapāse eva abbhānaṃ, tena bhikkhūnaṃ pāde vandāpetvā upasampadāyācāpanaṃ, tato antarāyikadhammapucchakasammutikammakaraṇaṃ, sammatena ca pucchana’’nti imāni aṭṭha pubbakiccāni, tesaṃ sabbesaṃ yāthāvato karaṇena niṭṭhānaṃ. Etasmiñca pubbakiccaniṭṭhāpane sati eva idaṃ saṅghassa upasampadākammaṃ pattakallaṃ nāma hoti, nāsati. Etesu pana pubbakammesu akatesupi kataṃ kammaṃ yathāvuttesu vatthusampattiādīsu vijjamānesu akuppameva hoti. Tadevamettha pattakallaṃ imehi pañcahi aṅgehi saṅgahitanti veditabbaṃ. Imināva nayena heṭṭhā vuttesu, vakkhamānesu ca sabbesu kammesu pattakallatā yathārahaṃ yojetvā ñātabbā.

    இத்த²ன்னாமங் உபஸம்பாதெ³ய்யாதி உபஸம்பதா³னிப்பா²த³னேன தங்ஸமங்கி³ங் கரெய்ய கரோதூதி பத்த²னாயங், விதி⁴ம்ஹி வா இத³ங் த³ட்ட²ப்³ப³ங். யதா² ஹி ‘‘தே³வத³த்தங் ஸுகா²பெய்யா’’தி வுத்தே ஸுக²மஸ்ஸ நிப்பா²தெ³த்வா தங் ஸுக²ஸமங்கி³னங் கரெய்யாதி அத்தோ² ஹோதி, ஏவமிதா⁴பி உபஸம்பத³மஸ்ஸ நிப்பா²தெ³த்வா தங் உபஸம்பதா³ஸமங்கி³னங் கரெய்யாதி அத்தோ². பயோஜகப்³யாபாரே சேதங். யதா² ஸுக²யந்தங் கிஞ்சி ஸுத்³த⁴கத்தாரங் கோசி ஹேதுகத்தா ஸுக²ஹேதுனிப்பா²த³னேன ஸுகா²பெய்யாதி வுச்சதி, ஏவமிதா⁴பி உபஸம்பஜ்ஜந்தங் ஸுத்³த⁴கத்தாரங் புக்³க³லங் ஹேதுகத்துபூ⁴தோ ஸங்கோ⁴ உபஸம்பதா³ஹேதுனிப்பா²த³னேன உபஸம்பாதெ³ய்யாதி வுத்தோ. ஏதேன ச ஸுக²ங் விய ஸுக²தா³யகேன ஸங்கே⁴ன புக்³க³லஸ்ஸ தீ³யமானா ததா²பவத்தபரமத்த²த⁴ம்மே உபாதா³ய அரியஜனபஞ்ஞத்தா உபஸம்பதா³ நாம ஸம்முதிஸச்சதா அத்தீ²தி ஸமத்தி²தங் ஹோதி. எத்த² ச ‘‘இத்த²ன்னாமோ ஸங்க⁴ங் உபஸம்பத³ங் யாசதீ’’தி (மஹாவ॰ 127) வுத்தத்தா பரிவாஸாதீ³ஸு விய யாசனானுகு³ணங் ‘‘இத்த²ன்னாமஸ்ஸ உபஸம்பத³ங் த³தெ³ய்யா’’தி அவத்வா ‘‘இத்த²ன்னாமங் உபஸம்பாதெ³ய்யா’’தி வுத்தத்தா இத³ங் உபஸம்பதா³கம்மங் தா³னே அஸங்க³ஹெத்வா கம்மலக்க²ணே ஏவ ஸங்க³ஹிதந்தி த³ட்ட²ப்³ப³ங். இமினா நயேன ‘‘இத்த²ன்னாமங் உபஸம்பாதே³தி, உபஸம்பன்னோ ஸங்கே⁴னா’’தி எத்தா²பி அத்தோ² வேதி³தப்³போ³. கேவலஞ்ஹி தத்த² வத்தமானகாலஅதீதகாலவஸேன, இத⁴ பன அனாமட்ட²காலவஸேனாதி எத்தகமேவ விஸேஸோ.

    Itthannāmaṃ upasampādeyyāti upasampadānipphādanena taṃsamaṅgiṃ kareyya karotūti patthanāyaṃ, vidhimhi vā idaṃ daṭṭhabbaṃ. Yathā hi ‘‘devadattaṃ sukhāpeyyā’’ti vutte sukhamassa nipphādetvā taṃ sukhasamaṅginaṃ kareyyāti attho hoti, evamidhāpi upasampadamassa nipphādetvā taṃ upasampadāsamaṅginaṃ kareyyāti attho. Payojakabyāpāre cetaṃ. Yathā sukhayantaṃ kiñci suddhakattāraṃ koci hetukattā sukhahetunipphādanena sukhāpeyyāti vuccati, evamidhāpi upasampajjantaṃ suddhakattāraṃ puggalaṃ hetukattubhūto saṅgho upasampadāhetunipphādanena upasampādeyyāti vutto. Etena ca sukhaṃ viya sukhadāyakena saṅghena puggalassa dīyamānā tathāpavattaparamatthadhamme upādāya ariyajanapaññattā upasampadā nāma sammutisaccatā atthīti samatthitaṃ hoti. Ettha ca ‘‘itthannāmo saṅghaṃ upasampadaṃ yācatī’’ti (mahāva. 127) vuttattā parivāsādīsu viya yācanānuguṇaṃ ‘‘itthannāmassa upasampadaṃ dadeyyā’’ti avatvā ‘‘itthannāmaṃ upasampādeyyā’’ti vuttattā idaṃ upasampadākammaṃ dāne asaṅgahetvā kammalakkhaṇe eva saṅgahitanti daṭṭhabbaṃ. Iminā nayena ‘‘itthannāmaṃ upasampādeti, upasampanno saṅghenā’’ti etthāpi attho veditabbo. Kevalañhi tattha vattamānakālaatītakālavasena, idha pana anāmaṭṭhakālavasenāti ettakameva viseso.

    ஏஸா ஞத்தீதி ‘‘ஸங்கோ⁴ ஞாபேதப்³போ³’’தி வுத்தஞாபனா ஏஸா. இத³ஞ்ச அனுஸ்ஸாவனானம்பி ஸப்³பா⁴வஸூசனத்த²ங் வுச்சதி. அவஸ்ஸஞ்சேதங் வத்தப்³ப³மேவ. ஞத்திகம்மே ஏவ தங் ந வத்தப்³ப³ங். தத்த² பன ய்ய-காரே வுத்தமத்தே ஏவ ஞத்திகம்மங் நிட்டி²தங் ஹோதீதி த³ட்ட²ப்³ப³ங். க²மதீதி ருச்சதி. உபஸம்பதா³தி ஸங்கே⁴ன தீ³யமானா நிப்பா²தி³யமானா உபஸம்பதா³, யஸ்ஸ க²மதி, ஸோ துண்ஹஸ்ஸாதி யோஜனா. துண்ஹீதி ச அகத²னத்தே² நிபாதோ, அகத²னகோ அஸ்ஸ ப⁴வெய்யாதி அத்தோ². க²மதி ஸங்க⁴ஸ்ஸ இத்த²ன்னாமஸ்ஸ உபஸம்பதா³தி பகதேன ஸம்ப³ந்தோ⁴. தத்த² காரணமாஹ ‘‘தஸ்மா துண்ஹீ’’தி. தத்த² ‘‘ஆஸீ’’தி ஸேஸோ. யஸ்மா ‘‘யஸ்ஸ நக்க²மதி, ஸோ பா⁴ஸெய்யா’’தி திக்க²த்துங் வுச்சமானோபி ஸங்கோ⁴ துண்ஹீ நிரவோ அஹோஸி, தஸ்மா க²மதி ஸங்க⁴ஸ்ஸாதி அத்தோ². ஏவந்தி இமினா பகாரேன. துண்ஹீபா⁴வேனேவேதங் ஸங்க⁴ஸ்ஸ ருச்சனபா⁴வங் தா⁴ரயாமி, பு³ஜ்ஜா²மி ஜானாமீதி அத்தோ². இதி-ஸத்³தோ³ பரிஸமாபனத்தே² கதோ, ஸோ ச கம்மவாசாய அனங்க³ங், தஸ்மா அனுஸ்ஸாவகேன ‘‘தா⁴ரயாமீ’’தி எத்த² மி-காரபரியோஸானமேவ வத்வா நிட்ட²பேதப்³ப³ங், இதி-ஸத்³தோ³ ந பயுஜ்ஜிதப்³போ³தி த³ட்ட²ப்³ப³ங். இமினா நயேன ஸப்³ப³கம்மவாசானமத்தோ² வேதி³தப்³போ³.

    Esā ñattīti ‘‘saṅgho ñāpetabbo’’ti vuttañāpanā esā. Idañca anussāvanānampi sabbhāvasūcanatthaṃ vuccati. Avassañcetaṃ vattabbameva. Ñattikamme eva taṃ na vattabbaṃ. Tattha pana yya-kāre vuttamatte eva ñattikammaṃ niṭṭhitaṃ hotīti daṭṭhabbaṃ. Khamatīti ruccati. Upasampadāti saṅghena dīyamānā nipphādiyamānā upasampadā, yassa khamati, so tuṇhassāti yojanā. Tuṇhīti ca akathanatthe nipāto, akathanako assa bhaveyyāti attho. Khamati saṅghassa itthannāmassa upasampadāti pakatena sambandho. Tattha kāraṇamāha ‘‘tasmā tuṇhī’’ti. Tattha ‘‘āsī’’ti seso. Yasmā ‘‘yassa nakkhamati, so bhāseyyā’’ti tikkhattuṃ vuccamānopi saṅgho tuṇhī niravo ahosi, tasmā khamati saṅghassāti attho. Evanti iminā pakārena. Tuṇhībhāvenevetaṃ saṅghassa ruccanabhāvaṃ dhārayāmi, bujjhāmi jānāmīti attho. Iti-saddo parisamāpanatthe kato, so ca kammavācāya anaṅgaṃ, tasmā anussāvakena ‘‘dhārayāmī’’ti ettha mi-kārapariyosānameva vatvā niṭṭhapetabbaṃ, iti-saddo na payujjitabboti daṭṭhabbaṃ. Iminā nayena sabbakammavācānamattho veditabbo.

    ஏகபோரிஸா வாதிஆதி³ ஸத்தானங் ஸரீரசா²யங் பாதே³ஹி மினித்வா ஜானநப்பகாரத³ஸ்ஸனங். ச²ஸத்தபத³பரிமிதா ஹி சா²யா ‘‘போரிஸா’’தி வுச்சதி, இத³ஞ்ச உதுப்பமாணாசிக்க²ணாதி³ ச ஆக³ந்துகேஹி ஸத்³தி⁴ங் வீமங்ஸித்வா வுட்³ட⁴னவபா⁴வங் ஞத்வா வந்த³னவந்தா³பனாதி³கரணத்த²ங் வுத்தங். ஏதி ஆக³ச்ச²தி, க³ச்ச²தி சாதி உது, ஸோவ பமீயதே அனேன ஸங்வச்ச²ரந்தி பமாணந்தி ஆஹ ‘‘உதுயேவ உதுப்பமாண’’ந்தி. அபரிபுண்ணாதி உபஸம்பதா³தி³வஸேன அபரிபுண்ணா. யதி³ உதுவேமஜ்ஜே² உபஸம்பாதி³தோ, ததா³ தஸ்மிங் உதும்ஹி அவஸிட்ட²தி³வஸாசிக்க²ணங் தி³வஸபா⁴கா³சிக்க²ணந்தி த³ஸ்ஸேதி. தேனாஹ ‘‘யத்தகேஹி தி³வஸேஹி யஸ்ஸ யோ உது அபரிபுண்ணோ, தே தி³வஸே’’தி. தத்த² யஸ்ஸ தங்க²ணங் லத்³தூ⁴பஸம்பத³ஸ்ஸ புக்³க³லஸ்ஸ ஸம்ப³ந்தீ⁴ யோ உது யத்தகேஹி தி³வஸேஹி அபரிபுண்ணோ, தே தி³வஸேதி யோஜனா.

    Ekaporisāvātiādi sattānaṃ sarīrachāyaṃ pādehi minitvā jānanappakāradassanaṃ. Chasattapadaparimitā hi chāyā ‘‘porisā’’ti vuccati, idañca utuppamāṇācikkhaṇādi ca āgantukehi saddhiṃ vīmaṃsitvā vuḍḍhanavabhāvaṃ ñatvā vandanavandāpanādikaraṇatthaṃ vuttaṃ. Eti āgacchati, gacchati cāti utu, sova pamīyate anena saṃvaccharanti pamāṇanti āha ‘‘utuyeva utuppamāṇa’’nti. Aparipuṇṇāti upasampadādivasena aparipuṇṇā. Yadi utuvemajjhe upasampādito, tadā tasmiṃ utumhi avasiṭṭhadivasācikkhaṇaṃ divasabhāgācikkhaṇanti dasseti. Tenāha ‘‘yattakehi divasehi yassa yo utu aparipuṇṇo, te divase’’ti. Tattha yassa taṅkhaṇaṃ laddhūpasampadassa puggalassa sambandhī yo utu yattakehi divasehi aparipuṇṇo, te divaseti yojanā.

    சா²யாதி³கமேவ ஸப்³ப³ங் ஸங்க³ஹெத்வா கா³யிதப்³ப³தோ கதே²தப்³ப³தோ ஸங்கீ³தீதி ஆஹ ‘‘இத³மேவா’’திஆதி³. தத்த² ஏகதோ கத்வா ஆசிக்கி²தப்³ப³ங். த்வங் கிங் லப⁴ஸீதி த்வங் உபஸம்பாத³னகாலே கதரவஸ்ஸங், கதரஉதுஞ்ச லப⁴ஸி, கதரஸ்மிங் தே உபஸம்பதா³ லத்³தா⁴தி அத்தோ². வஸ்ஸந்தி வஸ்ஸானஉது, இத³ஞ்ச ஸங்வச்ச²ராசிக்க²ணங் வினா வுத்தம்பி ந விஞ்ஞாயதீதி இமினா உதுஆசிக்க²ணேனேவ ஸாஸனவஸ்ஸேஸு வா கலியுக³வஸ்ஸாதீ³ஸு வா ஸஹஸ்ஸிமே வா ஸதிமே வா அஸுகஉதுங் லபா⁴மீதி த³ஸ்ஸிதந்தி த³ட்ட²ப்³ப³ங். சா²யாதி இத³ங் பாளியங் ஆக³தபடிபாடிங் ஸந்தா⁴ய வுத்தங், வத்தப்³ப³கம்மதோ பன கலியுக³வஸ்ஸாதீ³ஸு ஸப்³ப³தே³ஸபஸித்³தே⁴ஸு அஸுகவஸ்ஸே அஸுகஉதும்ஹி அஸுகமாஸே அஸுககண்ஹே வா ஸுக்கே வா பக்கே² அஸுகே திதி²வாரவிஸேஸயுத்தே புப்³ப³ண்ஹாதி³தி³வஸபா⁴கே³ எத்தகே சா²யாபமாணே, நாடி³காபமாணே வா மயா உபஸம்பதா³ லத்³தா⁴தி வதெ³ய்யாஸீதி ஏவங் ஆசிக்கி²தப்³ப³ங். இத³ங் ஸுட்டு² உக்³க³ஹெத்வா ஆக³ந்துகேஹி வுட்³ட⁴படிபாடிங் ஞத்வா படிபஜ்ஜாஹீதி வத்தப்³ப³ங். இதி எத்தகோ கதா²மக்³கோ³ விமதிவினோத³னியங் ஆக³தோ. வஜிரபு³த்³தி⁴டீகானயோ பன ஏகச்சோ இதே⁴வ ஸங்க³ஹங் க³தோ, ஏகச்சோ அஸன்னிட்டா²னவினிச்ச²யத்தா ஸங்ஸயஹேதுகோ ஹோதி, தஸ்மா இத⁴ ந க³ஹிதோதி.

    Chāyādikameva sabbaṃ saṅgahetvā gāyitabbato kathetabbato saṅgītīti āha ‘‘idamevā’’tiādi. Tattha ekato katvā ācikkhitabbaṃ. Tvaṃ kiṃ labhasīti tvaṃ upasampādanakāle kataravassaṃ, katarautuñca labhasi, katarasmiṃ te upasampadā laddhāti attho. Vassanti vassānautu, idañca saṃvaccharācikkhaṇaṃ vinā vuttampi na viññāyatīti iminā utuācikkhaṇeneva sāsanavassesu vā kaliyugavassādīsu vā sahassime vā satime vā asukautuṃ labhāmīti dassitanti daṭṭhabbaṃ. Chāyāti idaṃ pāḷiyaṃ āgatapaṭipāṭiṃ sandhāya vuttaṃ, vattabbakammato pana kaliyugavassādīsu sabbadesapasiddhesu asukavasse asukautumhi asukamāse asukakaṇhe vā sukke vā pakkhe asuke tithivāravisesayutte pubbaṇhādidivasabhāge ettake chāyāpamāṇe, nāḍikāpamāṇe vā mayā upasampadā laddhāti vadeyyāsīti evaṃ ācikkhitabbaṃ. Idaṃ suṭṭhu uggahetvā āgantukehi vuḍḍhapaṭipāṭiṃ ñatvā paṭipajjāhīti vattabbaṃ. Iti ettako kathāmaggo vimativinodaniyaṃ āgato. Vajirabuddhiṭīkānayo pana ekacco idheva saṅgahaṃ gato, ekacco asanniṭṭhānavinicchayattā saṃsayahetuko hoti, tasmā idha na gahitoti.

    இதி வினயஸங்க³ஹஸங்வண்ணனாபூ⁴தே வினயாலங்காரே

    Iti vinayasaṅgahasaṃvaṇṇanābhūte vinayālaṅkāre

    உபஸம்பதா³வினிச்ச²யகதா²லங்காரோ.

    Upasampadāvinicchayakathālaṅkāro.




    Next: 23. நிஸ்ஸயவினிச்ச²யகதா² • 23. Nissayavinicchayakathā


    © 1991-2023 The Titi Tudorancea Bulletin | Titi Tudorancea® is a Registered Trademark | Terms of use and privacy policy
    Contact