| Library / Tipiṭaka / д̇ибидага • Tipiṭaka / махааваг̇г̇абаал̣и • Mahāvaggapāḷi |
9. баб̣б̣аж̇ж̇уубасамбад̣̇аагат̇аа
9. Pabbajjūpasampadākathā
34. д̇зна ко бана самаязна бхигкуу наанаад̣̇исаа наанааж̇анабад̣̇аа баб̣б̣аж̇ж̇аабзгкз жа убасамбад̣̇аабзгкз жа аанзнд̇и – бхаг̇аваа нз баб̣б̣ааж̇зссад̇и убасамбаад̣̇зссад̇ийд̇и. д̇ад̇т̇а бхигкуу жзва гиламанд̇и баб̣б̣аж̇ж̇аабзгкаа жа убасамбад̣̇аабзгкаа жа. ат̇а ко бхаг̇авад̇о рахог̇ад̇асса бадисаллийнасса звам̣ жзд̇асо баривид̇агго уд̣̇абаад̣̇и – ‘‘зд̇арахи ко бхигкуу наанаад̣̇исаа наанааж̇анабад̣̇аа баб̣б̣аж̇ж̇аабзгкз жа убасамбад̣̇аабзгкз жа аанзнд̇и – бхаг̇аваа нз баб̣б̣ааж̇зссад̇и убасамбаад̣̇зссад̇ийд̇и. д̇ад̇т̇а бхигкуу жзва гиламанд̇и баб̣б̣аж̇ж̇аабзгкаа жа убасамбад̣̇аабзгкаа жа. яам̣нуунаахам̣ бхигкуунам̣ ануж̇аанзяяам̣ – д̇умхзва д̣̇аани, бхигкавз, д̇аасу д̇аасу д̣̇исаасу д̇зсу д̇зсу ж̇анабад̣̇зсу баб̣б̣ааж̇зт̇а убасамбаад̣̇зт̇аа’’д̇и. ат̇а ко бхаг̇аваа сааяанхасамаяам̣ бадисаллаанаа вудтид̇о зд̇асмим̣ нид̣̇аанз зд̇асмим̣ багаран̣з д̇хаммим̣ гат̇ам̣ гад̇ваа бхигкуу ааманд̇зси – ‘‘ид̇ха маяхам̣, бхигкавз, рахог̇ад̇асса бадисаллийнасса звам̣ жзд̇асо баривид̇агго уд̣̇абаад̣̇и – ‘зд̇арахи ко бхигкуу наанаад̣̇исаа наанааж̇анабад̣̇аа баб̣б̣аж̇ж̇аабзгкз жа убасамбад̣̇аабзгкз жа аанзнд̇и бхаг̇аваа нз баб̣б̣ааж̇зссад̇и убасамбаад̣̇зссад̇ийд̇и, д̇ад̇т̇а бхигкуу жзва гиламанд̇и баб̣б̣аж̇ж̇аабзгкаа жа убасамбад̣̇аабзгкаа жа, яам̣нуунаахам̣ бхигкуунам̣ ануж̇аанзяяам̣ д̇умхзва д̣̇аани, бхигкавз, д̇аасу д̇аасу д̣̇исаасу д̇зсу д̇зсу ж̇анабад̣̇зсу баб̣б̣ааж̇зт̇а убасамбаад̣̇зт̇аа’’’д̇и, ануж̇аанаами, бхигкавз, д̇умхзва д̣̇аани д̇аасу д̇аасу д̣̇исаасу д̇зсу д̇зсу ж̇анабад̣̇зсу баб̣б̣ааж̇зт̇а убасамбаад̣̇зт̇а. зван̃жа бана, бхигкавз, баб̣б̣ааж̇зд̇аб̣б̣о убасамбаад̣̇зд̇аб̣б̣о –
34. Tena kho pana samayena bhikkhū nānādisā nānājanapadā pabbajjāpekkhe ca upasampadāpekkhe ca ānenti – bhagavā ne pabbājessati upasampādessatīti. Tattha bhikkhū ceva kilamanti pabbajjāpekkhā ca upasampadāpekkhā ca. Atha kho bhagavato rahogatassa paṭisallīnassa evaṃ cetaso parivitakko udapādi – ‘‘etarahi kho bhikkhū nānādisā nānājanapadā pabbajjāpekkhe ca upasampadāpekkhe ca ānenti – bhagavā ne pabbājessati upasampādessatīti. Tattha bhikkhū ceva kilamanti pabbajjāpekkhā ca upasampadāpekkhā ca. Yaṃnūnāhaṃ bhikkhūnaṃ anujāneyyaṃ – tumheva dāni, bhikkhave, tāsu tāsu disāsu tesu tesu janapadesu pabbājetha upasampādethā’’ti. Atha kho bhagavā sāyanhasamayaṃ paṭisallānā vuṭṭhito etasmiṃ nidāne etasmiṃ pakaraṇe dhammiṃ kathaṃ katvā bhikkhū āmantesi – ‘‘idha mayhaṃ, bhikkhave, rahogatassa paṭisallīnassa evaṃ cetaso parivitakko udapādi – ‘etarahi kho bhikkhū nānādisā nānājanapadā pabbajjāpekkhe ca upasampadāpekkhe ca ānenti bhagavā ne pabbājessati upasampādessatīti, tattha bhikkhū ceva kilamanti pabbajjāpekkhā ca upasampadāpekkhā ca, yaṃnūnāhaṃ bhikkhūnaṃ anujāneyyaṃ tumheva dāni, bhikkhave, tāsu tāsu disāsu tesu tesu janapadesu pabbājetha upasampādethā’’’ti, anujānāmi, bhikkhave, tumheva dāni tāsu tāsu disāsu tesu tesu janapadesu pabbājetha upasampādetha. Evañca pana, bhikkhave, pabbājetabbo upasampādetabbo –
батамам̣ гзсамассум̣ охаараабзд̇ваа 1, гаасааяаани вад̇т̇аани ажчаад̣̇аабзд̇ваа, згам̣сам̣ уд̇д̇араасан̇г̇ам̣ гаараабзд̇ваа, бхигкуунам̣ баад̣̇з ванд̣̇аабзд̇ваа, уггудигам̣ нисийд̣̇аабзд̇ваа, ан̃ж̇алим̣ баг̇г̇ан̣хаабзд̇ваа, звам̣ вад̣̇зхийд̇и вад̇д̇аб̣б̣о – б̣уд̣̇д̇хам̣ саран̣ам̣ г̇ажчаами, д̇хаммам̣ саран̣ам̣ г̇ажчаами, сан̇гхам̣ саран̣ам̣ г̇ажчаами; д̣̇уд̇ияамби б̣уд̣̇д̇хам̣ саран̣ам̣ г̇ажчаами, д̣̇уд̇ияамби д̇хаммам̣ саран̣ам̣ г̇ажчаами, д̣̇уд̇ияамби сан̇гхам̣ саран̣ам̣ г̇ажчаами; д̇ад̇ияамби б̣уд̣̇д̇хам̣ саран̣ам̣ г̇ажчаами, д̇ад̇ияамби д̇хаммам̣ саран̣ам̣ г̇ажчаами, д̇ад̇ияамби сан̇гхам̣ саран̣ам̣ г̇ажчаамий’’д̇и. ‘‘ануж̇аанаами, бхигкавз, имзхи д̇ийхи саран̣аг̇аманзхи баб̣б̣аж̇ж̇ам̣ убасамбад̣̇а’’нд̇и.
Paṭhamaṃ kesamassuṃ ohārāpetvā 2, kāsāyāni vatthāni acchādāpetvā, ekaṃsaṃ uttarāsaṅgaṃ kārāpetvā, bhikkhūnaṃ pāde vandāpetvā, ukkuṭikaṃ nisīdāpetvā, añjaliṃ paggaṇhāpetvā, evaṃ vadehīti vattabbo – buddhaṃ saraṇaṃ gacchāmi, dhammaṃ saraṇaṃ gacchāmi, saṅghaṃ saraṇaṃ gacchāmi; dutiyampi buddhaṃ saraṇaṃ gacchāmi, dutiyampi dhammaṃ saraṇaṃ gacchāmi, dutiyampi saṅghaṃ saraṇaṃ gacchāmi; tatiyampi buddhaṃ saraṇaṃ gacchāmi, tatiyampi dhammaṃ saraṇaṃ gacchāmi, tatiyampi saṅghaṃ saraṇaṃ gacchāmī’’ti. ‘‘Anujānāmi, bhikkhave, imehi tīhi saraṇagamanehi pabbajjaṃ upasampada’’nti.
д̇ийхи саран̣аг̇аманзхи убасамбад̣̇аагат̇аа нидтид̇аа.
Tīhi saraṇagamanehi upasampadākathā niṭṭhitā.
Footnotes:
Related texts:
адтагат̇аа • Aṭṭhakathā / винаяабидага (адтагат̇аа) • Vinayapiṭaka (aṭṭhakathā) / махааваг̇г̇а-адтагат̇аа • Mahāvagga-aṭṭhakathā / баб̣б̣аж̇ж̇аагат̇аа • Pabbajjākathā
дийгаа • Tīkā / винаяабидага (дийгаа) • Vinayapiṭaka (ṭīkā) / саарад̇т̇ад̣̇ийбаний-дийгаа • Sāratthadīpanī-ṭīkā / баб̣б̣аж̇ж̇уубасамбад̣̇аагат̇ааван̣н̣анаа • Pabbajjūpasampadākathāvaṇṇanā
дийгаа • Tīkā / винаяабидага (дийгаа) • Vinayapiṭaka (ṭīkā) / важ̇ираб̣уд̣̇д̇хи-дийгаа • Vajirabuddhi-ṭīkā / баб̣б̣аж̇ж̇аагат̇ааван̣н̣анаа • Pabbajjākathāvaṇṇanā
дийгаа • Tīkā / винаяабидага (дийгаа) • Vinayapiṭaka (ṭīkā) / вимад̇ивинод̣̇аний-дийгаа • Vimativinodanī-ṭīkā / баб̣б̣аж̇ж̇аагат̇ааван̣н̣анаа • Pabbajjākathāvaṇṇanā
дийгаа • Tīkā / винаяабидага (дийгаа) • Vinayapiṭaka (ṭīkā) / баажид̇яаад̣̇ияож̇анаабаал̣и • Pācityādiyojanāpāḷi / 7. баб̣б̣аж̇ж̇аагат̇аа • 7. Pabbajjākathā
