| Library / Tipiṭaka / ತಿಪಿಟಕ • Tipiṭaka / ಮಹಾವಗ್ಗಪಾಳಿ • Mahāvaggapāḷi |
೯. ಪಬ್ಬಜ್ಜೂಪಸಮ್ಪದಾಕಥಾ
9. Pabbajjūpasampadākathā
೩೪. ತೇನ ಖೋ ಪನ ಸಮಯೇನ ಭಿಕ್ಖೂ ನಾನಾದಿಸಾ ನಾನಾಜನಪದಾ ಪಬ್ಬಜ್ಜಾಪೇಕ್ಖೇ ಚ ಉಪಸಮ್ಪದಾಪೇಕ್ಖೇ ಚ ಆನೇನ್ತಿ – ಭಗವಾ ನೇ ಪಬ್ಬಾಜೇಸ್ಸತಿ ಉಪಸಮ್ಪಾದೇಸ್ಸತೀತಿ। ತತ್ಥ ಭಿಕ್ಖೂ ಚೇವ ಕಿಲಮನ್ತಿ ಪಬ್ಬಜ್ಜಾಪೇಕ್ಖಾ ಚ ಉಪಸಮ್ಪದಾಪೇಕ್ಖಾ ಚ। ಅಥ ಖೋ ಭಗವತೋ ರಹೋಗತಸ್ಸ ಪಟಿಸಲ್ಲೀನಸ್ಸ ಏವಂ ಚೇತಸೋ ಪರಿವಿತಕ್ಕೋ ಉದಪಾದಿ – ‘‘ಏತರಹಿ ಖೋ ಭಿಕ್ಖೂ ನಾನಾದಿಸಾ ನಾನಾಜನಪದಾ ಪಬ್ಬಜ್ಜಾಪೇಕ್ಖೇ ಚ ಉಪಸಮ್ಪದಾಪೇಕ್ಖೇ ಚ ಆನೇನ್ತಿ – ಭಗವಾ ನೇ ಪಬ್ಬಾಜೇಸ್ಸತಿ ಉಪಸಮ್ಪಾದೇಸ್ಸತೀತಿ। ತತ್ಥ ಭಿಕ್ಖೂ ಚೇವ ಕಿಲಮನ್ತಿ ಪಬ್ಬಜ್ಜಾಪೇಕ್ಖಾ ಚ ಉಪಸಮ್ಪದಾಪೇಕ್ಖಾ ಚ। ಯಂನೂನಾಹಂ ಭಿಕ್ಖೂನಂ ಅನುಜಾನೇಯ್ಯಂ – ತುಮ್ಹೇವ ದಾನಿ, ಭಿಕ್ಖವೇ, ತಾಸು ತಾಸು ದಿಸಾಸು ತೇಸು ತೇಸು ಜನಪದೇಸು ಪಬ್ಬಾಜೇಥ ಉಪಸಮ್ಪಾದೇಥಾ’’ತಿ। ಅಥ ಖೋ ಭಗವಾ ಸಾಯನ್ಹಸಮಯಂ ಪಟಿಸಲ್ಲಾನಾ ವುಟ್ಠಿತೋ ಏತಸ್ಮಿಂ ನಿದಾನೇ ಏತಸ್ಮಿಂ ಪಕರಣೇ ಧಮ್ಮಿಂ ಕಥಂ ಕತ್ವಾ ಭಿಕ್ಖೂ ಆಮನ್ತೇಸಿ – ‘‘ಇಧ ಮಯ್ಹಂ, ಭಿಕ್ಖವೇ, ರಹೋಗತಸ್ಸ ಪಟಿಸಲ್ಲೀನಸ್ಸ ಏವಂ ಚೇತಸೋ ಪರಿವಿತಕ್ಕೋ ಉದಪಾದಿ – ‘ಏತರಹಿ ಖೋ ಭಿಕ್ಖೂ ನಾನಾದಿಸಾ ನಾನಾಜನಪದಾ ಪಬ್ಬಜ್ಜಾಪೇಕ್ಖೇ ಚ ಉಪಸಮ್ಪದಾಪೇಕ್ಖೇ ಚ ಆನೇನ್ತಿ ಭಗವಾ ನೇ ಪಬ್ಬಾಜೇಸ್ಸತಿ ಉಪಸಮ್ಪಾದೇಸ್ಸತೀತಿ, ತತ್ಥ ಭಿಕ್ಖೂ ಚೇವ ಕಿಲಮನ್ತಿ ಪಬ್ಬಜ್ಜಾಪೇಕ್ಖಾ ಚ ಉಪಸಮ್ಪದಾಪೇಕ್ಖಾ ಚ, ಯಂನೂನಾಹಂ ಭಿಕ್ಖೂನಂ ಅನುಜಾನೇಯ್ಯಂ ತುಮ್ಹೇವ ದಾನಿ, ಭಿಕ್ಖವೇ, ತಾಸು ತಾಸು ದಿಸಾಸು ತೇಸು ತೇಸು ಜನಪದೇಸು ಪಬ್ಬಾಜೇಥ ಉಪಸಮ್ಪಾದೇಥಾ’’’ತಿ, ಅನುಜಾನಾಮಿ, ಭಿಕ್ಖವೇ, ತುಮ್ಹೇವ ದಾನಿ ತಾಸು ತಾಸು ದಿಸಾಸು ತೇಸು ತೇಸು ಜನಪದೇಸು ಪಬ್ಬಾಜೇಥ ಉಪಸಮ್ಪಾದೇಥ। ಏವಞ್ಚ ಪನ, ಭಿಕ್ಖವೇ, ಪಬ್ಬಾಜೇತಬ್ಬೋ ಉಪಸಮ್ಪಾದೇತಬ್ಬೋ –
34. Tena kho pana samayena bhikkhū nānādisā nānājanapadā pabbajjāpekkhe ca upasampadāpekkhe ca ānenti – bhagavā ne pabbājessati upasampādessatīti. Tattha bhikkhū ceva kilamanti pabbajjāpekkhā ca upasampadāpekkhā ca. Atha kho bhagavato rahogatassa paṭisallīnassa evaṃ cetaso parivitakko udapādi – ‘‘etarahi kho bhikkhū nānādisā nānājanapadā pabbajjāpekkhe ca upasampadāpekkhe ca ānenti – bhagavā ne pabbājessati upasampādessatīti. Tattha bhikkhū ceva kilamanti pabbajjāpekkhā ca upasampadāpekkhā ca. Yaṃnūnāhaṃ bhikkhūnaṃ anujāneyyaṃ – tumheva dāni, bhikkhave, tāsu tāsu disāsu tesu tesu janapadesu pabbājetha upasampādethā’’ti. Atha kho bhagavā sāyanhasamayaṃ paṭisallānā vuṭṭhito etasmiṃ nidāne etasmiṃ pakaraṇe dhammiṃ kathaṃ katvā bhikkhū āmantesi – ‘‘idha mayhaṃ, bhikkhave, rahogatassa paṭisallīnassa evaṃ cetaso parivitakko udapādi – ‘etarahi kho bhikkhū nānādisā nānājanapadā pabbajjāpekkhe ca upasampadāpekkhe ca ānenti bhagavā ne pabbājessati upasampādessatīti, tattha bhikkhū ceva kilamanti pabbajjāpekkhā ca upasampadāpekkhā ca, yaṃnūnāhaṃ bhikkhūnaṃ anujāneyyaṃ tumheva dāni, bhikkhave, tāsu tāsu disāsu tesu tesu janapadesu pabbājetha upasampādethā’’’ti, anujānāmi, bhikkhave, tumheva dāni tāsu tāsu disāsu tesu tesu janapadesu pabbājetha upasampādetha. Evañca pana, bhikkhave, pabbājetabbo upasampādetabbo –
ಪಠಮಂ ಕೇಸಮಸ್ಸುಂ ಓಹಾರಾಪೇತ್ವಾ 1, ಕಾಸಾಯಾನಿ ವತ್ಥಾನಿ ಅಚ್ಛಾದಾಪೇತ್ವಾ, ಏಕಂಸಂ ಉತ್ತರಾಸಙ್ಗಂ ಕಾರಾಪೇತ್ವಾ, ಭಿಕ್ಖೂನಂ ಪಾದೇ ವನ್ದಾಪೇತ್ವಾ, ಉಕ್ಕುಟಿಕಂ ನಿಸೀದಾಪೇತ್ವಾ, ಅಞ್ಜಲಿಂ ಪಗ್ಗಣ್ಹಾಪೇತ್ವಾ, ಏವಂ ವದೇಹೀತಿ ವತ್ತಬ್ಬೋ – ಬುದ್ಧಂ ಸರಣಂ ಗಚ್ಛಾಮಿ, ಧಮ್ಮಂ ಸರಣಂ ಗಚ್ಛಾಮಿ, ಸಙ್ಘಂ ಸರಣಂ ಗಚ್ಛಾಮಿ; ದುತಿಯಮ್ಪಿ ಬುದ್ಧಂ ಸರಣಂ ಗಚ್ಛಾಮಿ, ದುತಿಯಮ್ಪಿ ಧಮ್ಮಂ ಸರಣಂ ಗಚ್ಛಾಮಿ, ದುತಿಯಮ್ಪಿ ಸಙ್ಘಂ ಸರಣಂ ಗಚ್ಛಾಮಿ; ತತಿಯಮ್ಪಿ ಬುದ್ಧಂ ಸರಣಂ ಗಚ್ಛಾಮಿ, ತತಿಯಮ್ಪಿ ಧಮ್ಮಂ ಸರಣಂ ಗಚ್ಛಾಮಿ, ತತಿಯಮ್ಪಿ ಸಙ್ಘಂ ಸರಣಂ ಗಚ್ಛಾಮೀ’’ತಿ। ‘‘ಅನುಜಾನಾಮಿ, ಭಿಕ್ಖವೇ, ಇಮೇಹಿ ತೀಹಿ ಸರಣಗಮನೇಹಿ ಪಬ್ಬಜ್ಜಂ ಉಪಸಮ್ಪದ’’ನ್ತಿ।
Paṭhamaṃ kesamassuṃ ohārāpetvā 2, kāsāyāni vatthāni acchādāpetvā, ekaṃsaṃ uttarāsaṅgaṃ kārāpetvā, bhikkhūnaṃ pāde vandāpetvā, ukkuṭikaṃ nisīdāpetvā, añjaliṃ paggaṇhāpetvā, evaṃ vadehīti vattabbo – buddhaṃ saraṇaṃ gacchāmi, dhammaṃ saraṇaṃ gacchāmi, saṅghaṃ saraṇaṃ gacchāmi; dutiyampi buddhaṃ saraṇaṃ gacchāmi, dutiyampi dhammaṃ saraṇaṃ gacchāmi, dutiyampi saṅghaṃ saraṇaṃ gacchāmi; tatiyampi buddhaṃ saraṇaṃ gacchāmi, tatiyampi dhammaṃ saraṇaṃ gacchāmi, tatiyampi saṅghaṃ saraṇaṃ gacchāmī’’ti. ‘‘Anujānāmi, bhikkhave, imehi tīhi saraṇagamanehi pabbajjaṃ upasampada’’nti.
ತೀಹಿ ಸರಣಗಮನೇಹಿ ಉಪಸಮ್ಪದಾಕಥಾ ನಿಟ್ಠಿತಾ।
Tīhi saraṇagamanehi upasampadākathā niṭṭhitā.
Footnotes:
Related texts:
ಅಟ್ಠಕಥಾ • Aṭṭhakathā / ವಿನಯಪಿಟಕ (ಅಟ್ಠಕಥಾ) • Vinayapiṭaka (aṭṭhakathā) / ಮಹಾವಗ್ಗ-ಅಟ್ಠಕಥಾ • Mahāvagga-aṭṭhakathā / ಪಬ್ಬಜ್ಜಾಕಥಾ • Pabbajjākathā
ಟೀಕಾ • Tīkā / ವಿನಯಪಿಟಕ (ಟೀಕಾ) • Vinayapiṭaka (ṭīkā) / ಸಾರತ್ಥದೀಪನೀ-ಟೀಕಾ • Sāratthadīpanī-ṭīkā / ಪಬ್ಬಜ್ಜೂಪಸಮ್ಪದಾಕಥಾವಣ್ಣನಾ • Pabbajjūpasampadākathāvaṇṇanā
ಟೀಕಾ • Tīkā / ವಿನಯಪಿಟಕ (ಟೀಕಾ) • Vinayapiṭaka (ṭīkā) / ವಜಿರಬುದ್ಧಿ-ಟೀಕಾ • Vajirabuddhi-ṭīkā / ಪಬ್ಬಜ್ಜಾಕಥಾವಣ್ಣನಾ • Pabbajjākathāvaṇṇanā
ಟೀಕಾ • Tīkā / ವಿನಯಪಿಟಕ (ಟೀಕಾ) • Vinayapiṭaka (ṭīkā) / ವಿಮತಿವಿನೋದನೀ-ಟೀಕಾ • Vimativinodanī-ṭīkā / ಪಬ್ಬಜ್ಜಾಕಥಾವಣ್ಣನಾ • Pabbajjākathāvaṇṇanā
ಟೀಕಾ • Tīkā / ವಿನಯಪಿಟಕ (ಟೀಕಾ) • Vinayapiṭaka (ṭīkā) / ಪಾಚಿತ್ಯಾದಿಯೋಜನಾಪಾಳಿ • Pācityādiyojanāpāḷi / ೭. ಪಬ್ಬಜ್ಜಾಕಥಾ • 7. Pabbajjākathā
