| Library / Tipiṭaka / திபிடக • Tipiṭaka / ஸாரத்த²தீ³பனீ-டீகா • Sāratthadīpanī-ṭīkā |
பப்³ப³ஜ்ஜூபஸம்பதா³கதா²வண்ணனா
Pabbajjūpasampadākathāvaṇṇanā
34. ‘‘அனுஜானாமி பி⁴க்க²வே’’திஆதி³காய பன பாளியா யோ பப்³ப³ஜ்ஜூபஸம்பதா³வினிச்ச²யோ வத்தப்³போ³, தங் வித்தா²ரதோ த³ஸ்ஸேதுங் ‘‘பப்³ப³ஜ்ஜாபெக்க²ங் குலபுத்தங் பப்³பா³ஜெந்தேனா’’திஆதி³மாஹ. தத்த² யே புக்³க³லா படிக்கி²த்தாதி ஸம்ப³ந்தோ⁴. ஸயங் பப்³பா³ஜேதப்³போ³தி கேஸச்சே²த³னாதீ³னி ஸயங் கரொந்தேன பப்³பா³ஜேதப்³போ³. கேஸச்சே²த³னங் காஸாயச்சா²த³னங் ஸரணதா³னந்தி ஹி இமானி தீணி கரொந்தோ ‘‘பப்³பா³ஜேதீ’’தி வுச்சதி. ஏதேஸு ஏகங் த்³வே வாபி கரொந்தோ ததா² வோஹரீயதியேவ, தஸ்மா ஏதங் பப்³பா³ஜேஹீதி கேஸச்சே²த³னங் காஸாயச்சா²த³னஞ்ச ஸந்தா⁴ய வுத்தங். உபஜ்ஜா²யங் உத்³தி³ஸ்ஸ பப்³பா³ஜேதீதி எத்தா²பி ஏஸேவ நயோ. க²ண்ட³ஸீமங் நெத்வாதி ப⁴ண்டு³கம்மாரோசனபரிஹரணத்த²ங் வுத்தங். தேன ஸபி⁴க்கு²கே விஹாரே அஞ்ஞம்பி ‘‘ஏதஸ்ஸ கேஸே சி²ந்தா³’’தி வத்துங் ந வட்டதி. பப்³பா³ஜெத்வாதி கேஸச்சே²த³னங் ஸந்தா⁴ய வத³தி. பி⁴க்கு²தோ அஞ்ஞோ பப்³பா³ஜேதுங் ந லப⁴தீதி ஸரணதா³னங் ஸந்தா⁴ய வுத்தங். தேனேவாஹ ‘‘ஸாமணேரோ பனா’’திஆதி³. ப⁴ப்³ப³ரூபோதி ப⁴ப்³ப³ஸபா⁴வோ. தமேவத்த²ங் பரியாயந்தரேன விபா⁴வேதி ‘‘ஸஹேதுகோ’’தி. ஞாதோதி பாகடோ. யஸஸ்ஸீதி பரிவாரஸம்பத்தியா ஸமன்னாக³தோ.
34. ‘‘Anujānāmi bhikkhave’’tiādikāya pana pāḷiyā yo pabbajjūpasampadāvinicchayo vattabbo, taṃ vitthārato dassetuṃ ‘‘pabbajjāpekkhaṃ kulaputtaṃ pabbājentenā’’tiādimāha. Tattha ye puggalā paṭikkhittāti sambandho. Sayaṃ pabbājetabboti kesacchedanādīni sayaṃ karontena pabbājetabbo. Kesacchedanaṃ kāsāyacchādanaṃ saraṇadānanti hi imāni tīṇi karonto ‘‘pabbājetī’’ti vuccati. Etesu ekaṃ dve vāpi karonto tathā voharīyatiyeva, tasmā etaṃ pabbājehīti kesacchedanaṃ kāsāyacchādanañca sandhāya vuttaṃ. Upajjhāyaṃuddissa pabbājetīti etthāpi eseva nayo. Khaṇḍasīmaṃ netvāti bhaṇḍukammārocanapariharaṇatthaṃ vuttaṃ. Tena sabhikkhuke vihāre aññampi ‘‘etassa kese chindā’’ti vattuṃ na vaṭṭati. Pabbājetvāti kesacchedanaṃ sandhāya vadati. Bhikkhuto añño pabbājetuṃ na labhatīti saraṇadānaṃ sandhāya vuttaṃ. Tenevāha ‘‘sāmaṇero panā’’tiādi. Bhabbarūpoti bhabbasabhāvo. Tamevatthaṃ pariyāyantarena vibhāveti ‘‘sahetuko’’ti. Ñātoti pākaṭo. Yasassīti parivārasampattiyā samannāgato.
வண்ணஸண்டா²னக³ந்தா⁴ஸயோகாஸவஸேன அஸுசிஜேகு³ச்ச²படிகூலபா⁴வங் பாகடங் கரொந்தேனாதி ஸம்ப³ந்தோ⁴. தத்த² கேஸா நாமேதே வண்ணதோபி படிகூலா, ஸண்டா²னதோபி க³ந்த⁴தோபி ஆஸயதோபி ஓகாஸதோபி படிகூலா. மனுஞ்ஞேபி (விஸுத்³தி⁴॰ 1.183; விப⁴॰ அட்ட²॰ 356; ஸாரத்த²॰ டீ॰ பாராஜிககண்ட³ 2.162) ஹி யாகு³பத்தே வா ப⁴த்தபத்தே வா கேஸவண்ணங் கிஞ்சி தி³ஸ்வா ‘‘கேஸமிஸ்ஸகமித³ங், ஹரத² ந’’ந்தி ஜிகு³ச்ச²ந்தி, ஏவங் கேஸா வண்ணதோ படிகூலா. ரத்திங் பு⁴ஞ்ஜந்தாபி கேஸஸண்டா²னங் அக்கவாகங் வா மகசிவாகங் வா சு²பித்வா ததே²வ ஜிகு³ச்ச²ந்தி, ஏவங் ஸண்டா²னதோ படிகூலா. தேலமக்க²னபுப்ப²தூ⁴மாதி³ஸங்கா²ரவிரஹிதானஞ்ச கேஸானங் க³ந்தோ⁴ பரமஜேகு³ச்சோ² ஹோதி, ததோ ஜேகு³ச்ச²தரோ அக்³கி³ம்ஹி பக்கி²த்தானங். கேஸா ஹி வண்ணஸண்டா²னதோ அப்படிகூலாபி ஸியுங், க³ந்தே⁴ன பன படிகூலாயேவ. யதா² ஹி த³ஹரஸ்ஸ குமாரகஸ்ஸ வச்சங் வண்ணதோ ஹலித்³தி³வண்ணங், ஸண்டா²னதோபி ஹலித்³தி³பிண்டி³ஸண்டா²னங். ஸங்காரட்டா²னே ச²ட்³டி³தஞ்ச உத்³து⁴மாதககாளஸுனக²ஸரீரங் வண்ணதோ தாலபக்கவண்ணங், ஸண்டா²னதோ வட்டெத்வா விஸ்ஸட்ட²முதி³ங்க³ஸண்டா²னங், தா³டா²பிஸ்ஸ ஸுமனமகுளஸதி³ஸா, தங் உப⁴யம்பி வண்ணஸண்டா²னதோ ஸியா அப்படிகூலங், க³ந்தே⁴ன பன படிகூலமேவ, ஏவங் கேஸாபி ஸியுங் வண்ணஸண்டா²னதோ அப்படிகூலா, க³ந்தே⁴ன பன படிகூலாயேவாதி. யதா² பன அஸுசிட்டா²னே கா³மனிஸ்ஸந்தே³ன ஜாதானி ஸூபெய்யபண்ணானி நாக³ரிகமனுஸ்ஸானங் ஜேகு³ச்சா²னி ஹொந்தி அபரிபோ⁴கா³னி, ஏவங் கேஸாபி புப்³ப³லோஹிதமுத்தகரீஸபித்தஸெம்ஹாதி³னிஸ்ஸந்தே³ன ஜாதத்தா பரமஜேகு³ச்சா²தி ஏவங் ஆஸயதோ படிகூலா. இமே ச கேஸா நாம கூ³த²ராஸிம்ஹி உட்டி²தகண்ணகங் விய ஏகதிங்ஸகொட்டா²ஸராஸிம்ஹி ஜாதா, தே ஸுஸானஸங்காரட்டா²னாதீ³ஸு ஜாதஸாகங் விய பரிகா²தீ³ஸு ஜாதகமலகுவலயாதி³புப்ப²ங் விய ச அஸுசிட்டா²னே ஜாதத்தா பரமஜேகு³ச்சா²தி ஏவங் ஓகாஸதோ படிகூலாதிஆதி³னா நயேன தசபஞ்சகஸ்ஸ வண்ணாதி³வஸேன படிகூலபா⁴வங் பகாஸெந்தேனாதி அத்தோ².
Vaṇṇasaṇṭhānagandhāsayokāsavasena asucijegucchapaṭikūlabhāvaṃ pākaṭaṃ karontenāti sambandho. Tattha kesā nāmete vaṇṇatopi paṭikūlā, saṇṭhānatopi gandhatopi āsayatopi okāsatopi paṭikūlā. Manuññepi (visuddhi. 1.183; vibha. aṭṭha. 356; sārattha. ṭī. pārājikakaṇḍa 2.162) hi yāgupatte vā bhattapatte vā kesavaṇṇaṃ kiñci disvā ‘‘kesamissakamidaṃ, haratha na’’nti jigucchanti, evaṃ kesā vaṇṇato paṭikūlā. Rattiṃ bhuñjantāpi kesasaṇṭhānaṃ akkavākaṃ vā makacivākaṃ vā chupitvā tatheva jigucchanti, evaṃ saṇṭhānato paṭikūlā. Telamakkhanapupphadhūmādisaṅkhāravirahitānañca kesānaṃ gandho paramajeguccho hoti, tato jegucchataro aggimhi pakkhittānaṃ. Kesā hi vaṇṇasaṇṭhānato appaṭikūlāpi siyuṃ, gandhena pana paṭikūlāyeva. Yathā hi daharassa kumārakassa vaccaṃ vaṇṇato haliddivaṇṇaṃ, saṇṭhānatopi haliddipiṇḍisaṇṭhānaṃ. Saṅkāraṭṭhāne chaḍḍitañca uddhumātakakāḷasunakhasarīraṃ vaṇṇato tālapakkavaṇṇaṃ, saṇṭhānato vaṭṭetvā vissaṭṭhamudiṅgasaṇṭhānaṃ, dāṭhāpissa sumanamakuḷasadisā, taṃ ubhayampi vaṇṇasaṇṭhānato siyā appaṭikūlaṃ, gandhena pana paṭikūlameva, evaṃ kesāpi siyuṃ vaṇṇasaṇṭhānato appaṭikūlā, gandhena pana paṭikūlāyevāti. Yathā pana asuciṭṭhāne gāmanissandena jātāni sūpeyyapaṇṇāni nāgarikamanussānaṃ jegucchāni honti aparibhogāni, evaṃ kesāpi pubbalohitamuttakarīsapittasemhādinissandena jātattā paramajegucchāti evaṃ āsayato paṭikūlā. Ime ca kesā nāma gūtharāsimhi uṭṭhitakaṇṇakaṃ viya ekatiṃsakoṭṭhāsarāsimhi jātā, te susānasaṅkāraṭṭhānādīsu jātasākaṃ viya parikhādīsu jātakamalakuvalayādipupphaṃ viya ca asuciṭṭhāne jātattā paramajegucchāti evaṃ okāsato paṭikūlātiādinā nayena tacapañcakassa vaṇṇādivasena paṭikūlabhāvaṃ pakāsentenāti attho.
நிஜ்ஜீவனிஸ்ஸத்தபா⁴வங் வா பாகடங் கரொந்தேனாதி இமே கேஸா நாம ஸீஸகடாஹபலிவேட²னசம்மே ஜாதா. தத்த² யதா² வம்மிகமத்த²கே ஜாதேஸு குந்த²திணேஸு ந வம்மிகமத்த²கோ ஜானாதி ‘‘மயி குந்த²திணானி ஜாதானீ’’தி, நாபி குந்த²திணானி ஜானந்தி ‘‘மயங் வம்மிகமத்த²கே ஜாதானீ’’தி, ஏவமேவ ந ஸீஸகடாஹபலிவேட²னசம்மங் ஜானாதி ‘‘மயி கேஸா ஜாதா’’தி, நாபி கேஸா ஜானந்தி ‘‘மயங் ஸீஸகடாஹபலிவேட²னசம்மே ஜாதா’’தி. அஞ்ஞமஞ்ஞங் ஆபோ⁴க³பச்சவெக்க²ணரஹிதா ஏதே த⁴ம்மா. இதி கேஸா நாம இமஸ்மிங் ஸரீரே பாடியேக்கோ கொட்டா²ஸோ அசேதனோ அப்³யாகதோ ஸுஞ்ஞோ நிஸ்ஸத்தோ த²த்³தோ⁴ பத²வீதா⁴தூதிஆதி³னா நயேன நிஜ்ஜீவனிஸ்ஸத்தபா⁴வங் பகாஸெந்தேன. புப்³பே³தி புரிமபு³த்³தா⁴னங் ஸந்திகே. மத்³தி³தஸங்கா²ரோதி நாமரூபவவத்தா²னேன சேவ பச்சயபரிக்³க³ஹவஸேன ச ஞாணேன பரிமத்³தி³தஸங்கா²ரோ. பா⁴விதபா⁴வனோதி கலாபஸம்மஸனாதி³னா ஸப்³ப³ஸோ குஸலபா⁴வனாய பூரணேன பா⁴விதபா⁴வனோ.
Nijjīvanissattabhāvaṃ vā pākaṭaṃ karontenāti ime kesā nāma sīsakaṭāhapaliveṭhanacamme jātā. Tattha yathā vammikamatthake jātesu kunthatiṇesu na vammikamatthako jānāti ‘‘mayi kunthatiṇāni jātānī’’ti, nāpi kunthatiṇāni jānanti ‘‘mayaṃ vammikamatthake jātānī’’ti, evameva na sīsakaṭāhapaliveṭhanacammaṃ jānāti ‘‘mayi kesā jātā’’ti, nāpi kesā jānanti ‘‘mayaṃ sīsakaṭāhapaliveṭhanacamme jātā’’ti. Aññamaññaṃ ābhogapaccavekkhaṇarahitā ete dhammā. Iti kesā nāma imasmiṃ sarīre pāṭiyekko koṭṭhāso acetano abyākato suñño nissatto thaddho pathavīdhātūtiādinā nayena nijjīvanissattabhāvaṃ pakāsentena. Pubbeti purimabuddhānaṃ santike. Madditasaṅkhāroti nāmarūpavavatthānena ceva paccayapariggahavasena ca ñāṇena parimadditasaṅkhāro. Bhāvitabhāvanoti kalāpasammasanādinā sabbaso kusalabhāvanāya pūraṇena bhāvitabhāvano.
அதி³ன்னங் ந வட்டதீதி எத்த² பப்³ப³ஜ்ஜா ந ருஹதீதி வத³ந்தி. அனுஞ்ஞாதஉபஸம்பதா³தி ஞத்திசதுத்த²கம்மேன அனுஞ்ஞாதஉபஸம்பதா³. டா²னகரணஸம்பத³ந்தி எத்த² உராதீ³னி டா²னானி, ஸங்வுதாதீ³னி கரணானீதி வேதி³தப்³பா³னி. அனுனாஸிகந்தங் கத்வா தா³னகாலே அந்தரா விச்சே²த³ங் அகத்வா தா³தப்³பா³னீதி த³ஸ்ஸேதுங் ‘‘ஏகஸம்ப³ந்தா⁴னீ’’தி வுத்தங். விச்சி²ந்தி³த்வாதி ம-காரந்தங் கத்வா தா³னஸமயே விச்சே²த³ங் கத்வா. ஸப்³ப³மஸ்ஸ கப்பியாகப்பியங் ஆசிக்கி²தப்³ப³ந்தி த³ஸஸிக்கா²பத³வினிமுத்தங் பராமாஸாபராமாஸாதி³பே⁴த³ங் கப்பியாகப்பியங் ஆசிக்கி²தப்³ப³ங். ஆபி⁴ஸமாசாரிகேஸு வினேதப்³போ³தி இமினா ஸேகி²யஉபஜ்ஜா²யவத்தாதி³ஆபி⁴ஸமாசாரிகஸீலமனேன பூரேதப்³ப³ங், தத்த² ச கத்தப்³ப³ஸ்ஸ அகரணே அகத்தப்³ப³ஸ்ஸ ச கரணே த³ண்ட³கம்மாரஹோ ஹோதீதி தீ³பேதி.
Adinnaṃna vaṭṭatīti ettha pabbajjā na ruhatīti vadanti. Anuññātaupasampadāti ñatticatutthakammena anuññātaupasampadā. Ṭhānakaraṇasampadanti ettha urādīni ṭhānāni, saṃvutādīni karaṇānīti veditabbāni. Anunāsikantaṃ katvā dānakāle antarā vicchedaṃ akatvā dātabbānīti dassetuṃ ‘‘ekasambandhānī’’ti vuttaṃ. Vicchinditvāti ma-kārantaṃ katvā dānasamaye vicchedaṃ katvā. Sabbamassa kappiyākappiyaṃ ācikkhitabbanti dasasikkhāpadavinimuttaṃ parāmāsāparāmāsādibhedaṃ kappiyākappiyaṃ ācikkhitabbaṃ. Ābhisamācārikesu vinetabboti iminā sekhiyaupajjhāyavattādiābhisamācārikasīlamanena pūretabbaṃ, tattha ca kattabbassa akaraṇe akattabbassa ca karaṇe daṇḍakammāraho hotīti dīpeti.
பப்³ப³ஜ்ஜூபஸம்பதா³கதா²வண்ணனா நிட்டி²தா.
Pabbajjūpasampadākathāvaṇṇanā niṭṭhitā.
Related texts:
திபிடக (மூல) • Tipiṭaka (Mūla) / வினயபிடக • Vinayapiṭaka / மஹாவக்³க³பாளி • Mahāvaggapāḷi / 9. பப்³ப³ஜ்ஜூபஸம்பதா³கதா² • 9. Pabbajjūpasampadākathā
அட்ட²கதா² • Aṭṭhakathā / வினயபிடக (அட்ட²கதா²) • Vinayapiṭaka (aṭṭhakathā) / மஹாவக்³க³-அட்ட²கதா² • Mahāvagga-aṭṭhakathā / பப்³ப³ஜ்ஜாகதா² • Pabbajjākathā
டீகா • Tīkā / வினயபிடக (டீகா) • Vinayapiṭaka (ṭīkā) / வஜிரபு³த்³தி⁴-டீகா • Vajirabuddhi-ṭīkā / பப்³ப³ஜ்ஜாகதா²வண்ணனா • Pabbajjākathāvaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / விமதிவினோத³னீ-டீகா • Vimativinodanī-ṭīkā / பப்³ப³ஜ்ஜாகதா²வண்ணனா • Pabbajjākathāvaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / பாசித்யாதி³யோஜனாபாளி • Pācityādiyojanāpāḷi / 7. பப்³ப³ஜ்ஜாகதா² • 7. Pabbajjākathā
