| Library / Tipiṭaka / तिपिटक • Tipiṭaka / अङ्गुत्तरनिकाय • Aṅguttaranikāya |
९. पब्बतराजसुत्तं
9. Pabbatarājasuttaṃ
४९. ‘‘हिमवन्तं, भिक्खवे, पब्बतराजं निस्साय महासाला तीहि वड्ढीहि वड्ढन्ति। कतमाहि तीहि? साखापत्तपलासेन वड्ढन्ति, तचपपटिकाय वड्ढन्ति , फेग्गुसारेन वड्ढन्ति। हिमवन्तं, भिक्खवे, पब्बतराजं निस्साय महासाला इमाहि तीहि वड्ढीहि वड्ढन्ति।
49. ‘‘Himavantaṃ, bhikkhave, pabbatarājaṃ nissāya mahāsālā tīhi vaḍḍhīhi vaḍḍhanti. Katamāhi tīhi? Sākhāpattapalāsena vaḍḍhanti, tacapapaṭikāya vaḍḍhanti , pheggusārena vaḍḍhanti. Himavantaṃ, bhikkhave, pabbatarājaṃ nissāya mahāsālā imāhi tīhi vaḍḍhīhi vaḍḍhanti.
‘‘एवमेवं खो, भिक्खवे, सद्धं कुलपतिं निस्साय अन्तो जनो तीहि वड्ढीहि वड्ढति। कतमाहि तीहि? सद्धाय वड्ढति, सीलेन वड्ढति, पञ्ञाय वड्ढति। सद्धं, भिक्खवे, कुलपतिं निस्साय अन्तो जनो इमाहि तीहि वड्ढीहि वड्ढती’’ति।
‘‘Evamevaṃ kho, bhikkhave, saddhaṃ kulapatiṃ nissāya anto jano tīhi vaḍḍhīhi vaḍḍhati. Katamāhi tīhi? Saddhāya vaḍḍhati, sīlena vaḍḍhati, paññāya vaḍḍhati. Saddhaṃ, bhikkhave, kulapatiṃ nissāya anto jano imāhi tīhi vaḍḍhīhi vaḍḍhatī’’ti.
‘‘यथापि पब्बतो सेलो, अरञ्ञस्मिं ब्रहावने।
‘‘Yathāpi pabbato selo, araññasmiṃ brahāvane;
तं रुक्खा उपनिस्साय, वड्ढन्ते ते वनप्पती॥
Taṃ rukkhā upanissāya, vaḍḍhante te vanappatī.
‘‘तथेव सीलसम्पन्नं, सद्धं कुलपतिं इध।
‘‘Tatheva sīlasampannaṃ, saddhaṃ kulapatiṃ idha;
उपनिस्साय वड्ढन्ति, पुत्तदारा च बन्धवा।
Upanissāya vaḍḍhanti, puttadārā ca bandhavā;
अमच्चा ञातिसङ्घा च, ये चस्स अनुजीविनो॥
Amaccā ñātisaṅghā ca, ye cassa anujīvino.
‘‘त्यास्स सीलवतो सीलं, चागं सुचरितानि च।
‘‘Tyāssa sīlavato sīlaṃ, cāgaṃ sucaritāni ca;
‘‘इध धम्मं चरित्वान, मग्गं सुगतिगामिनं।
‘‘Idha dhammaṃ caritvāna, maggaṃ sugatigāminaṃ;
नन्दिनो देवलोकस्मिं, मोदन्ति कामकामिनो’’ति॥ नवमं।
Nandino devalokasmiṃ, modanti kāmakāmino’’ti. navamaṃ;
Footnotes:
Related texts:
अट्ठकथा • Aṭṭhakathā / सुत्तपिटक (अट्ठकथा) • Suttapiṭaka (aṭṭhakathā) / अङ्गुत्तरनिकाय (अट्ठकथा) • Aṅguttaranikāya (aṭṭhakathā) / ९. पब्बतराजसुत्तवण्णना • 9. Pabbatarājasuttavaṇṇanā
टीका • Tīkā / सुत्तपिटक (टीका) • Suttapiṭaka (ṭīkā) / अङ्गुत्तरनिकाय (टीका) • Aṅguttaranikāya (ṭīkā) / ९. पब्बतराजसुत्तवण्णना • 9. Pabbatarājasuttavaṇṇanā
