| Library / Tipiṭaka / திபிடக • Tipiṭaka / ஸங்யுத்தனிகாய (அட்ட²கதா²) • Saṃyuttanikāya (aṭṭhakathā) |
5. பப்³ப³தூபமஸுத்தவண்ணனா
5. Pabbatūpamasuttavaṇṇanā
136. பஞ்சமே முத்³தா⁴வஸித்தானந்தி க²த்தியாபி⁴ஸேகேன முத்³த⁴னி அவஸித்தானங் கதாபி⁴ஸேகானங். காமகே³த⁴பரியுட்டி²தானந்தி காமேஸு கே³தே⁴ன பரியுட்டி²தானங் அபி⁴பூ⁴தானங். ஜனபத³த்தா²வரியப்பத்தானந்தி ஜனபதே³ தி²ரபா⁴வப்பத்தானங். ராஜகரணீயானீதி ராஜகம்மானி ராஜூஹி கத்தப்³ப³கிச்சானி. தேஸு க்²வாஹந்தி தேஸு அஹங். உஸுக்கமாபன்னோதி ப்³யாபாரங் ஆபன்னோ. ஏஸ கிர ராஜா தி³வஸஸ்ஸ திக்க²த்துங் ப⁴க³வதோ உபட்டா²னங் க³ச்ச²தி, அந்தராக³மனானி ப³ஹூனிபி ஹொந்தி. தஸ்ஸ நிப³த்³த⁴ங் க³ச்ச²தோ ப³லகாயோ மஹாபி ஹோதி அப்போபி. அதே²கதி³வஸங் பஞ்சஸதா சோரா சிந்தயிங்ஸு – ‘‘அயங் ராஜா அவேலாய அப்பேன ப³லேன ஸமணஸ்ஸ கோ³தமஸ்ஸ உபட்டா²னங் க³ச்ச²தி, அந்தராமக்³கே³ நங் க³ஹெத்வா ரஜ்ஜங் க³ண்ஹிஸ்ஸாமா’’தி. தே அந்த⁴வனே நிலீயிங்ஸு. ராஜானோ ச நாம மஹாபுஞ்ஞா ஹொந்தி. அத² தேஸங்யேவ அப்³ப⁴ந்தரதோ ஏகோ புரிஸோ நிக்க²மித்வா ரஞ்ஞோ ஆரோசேஸி. ராஜா மஹந்தங் ப³லகாயங் ஆதா³ய அந்த⁴வனங் பரிவாரெத்வா தே ஸப்³பே³ க³ஹெத்வா அந்த⁴வனதோ யாவ நக³ரத்³வாரா மக்³க³ஸ்ஸ உபோ⁴ஸு பஸ்ஸேஸு யதா² அஞ்ஞமஞ்ஞங் சக்கு²னா சக்கு²ங் உபனிப³ந்தி⁴த்வா ஓலோகெந்தி, ஏவங் ஆஸன்னானி ஸூலானி ரோபாபெத்வா ஸூலேஸு உத்தாஸேஸி. இத³ங் ஸந்தா⁴ய ஏவமாஹ.
136. Pañcame muddhāvasittānanti khattiyābhisekena muddhani avasittānaṃ katābhisekānaṃ. Kāmagedhapariyuṭṭhitānanti kāmesu gedhena pariyuṭṭhitānaṃ abhibhūtānaṃ. Janapadatthāvariyappattānanti janapade thirabhāvappattānaṃ. Rājakaraṇīyānīti rājakammāni rājūhi kattabbakiccāni. Tesu khvāhanti tesu ahaṃ. Usukkamāpannoti byāpāraṃ āpanno. Esa kira rājā divasassa tikkhattuṃ bhagavato upaṭṭhānaṃ gacchati, antarāgamanāni bahūnipi honti. Tassa nibaddhaṃ gacchato balakāyo mahāpi hoti appopi. Athekadivasaṃ pañcasatā corā cintayiṃsu – ‘‘ayaṃ rājā avelāya appena balena samaṇassa gotamassa upaṭṭhānaṃ gacchati, antarāmagge naṃ gahetvā rajjaṃ gaṇhissāmā’’ti. Te andhavane nilīyiṃsu. Rājāno ca nāma mahāpuññā honti. Atha tesaṃyeva abbhantarato eko puriso nikkhamitvā rañño ārocesi. Rājā mahantaṃ balakāyaṃ ādāya andhavanaṃ parivāretvā te sabbe gahetvā andhavanato yāva nagaradvārā maggassa ubhosu passesu yathā aññamaññaṃ cakkhunā cakkhuṃ upanibandhitvā olokenti, evaṃ āsannāni sūlāni ropāpetvā sūlesu uttāsesi. Idaṃ sandhāya evamāha.
அத² ஸத்தா² சிந்தேஸி – ‘‘ஸசாஹங் வக்கா²மி, ‘மஹாராஜ, மாதி³ஸே நாம ஸம்மாஸம்பு³த்³தே⁴ து⁴ரவிஹாரே வஸந்தே தயா ஏவரூபங் தா³ருணங் கம்மங் கதங், அயுத்தங் தே கத’ந்தி, அதா²யங் ராஜா மங்கு ஹுத்வா ஸந்த²ம்பி⁴துங் ந ஸக்குணெய்ய, பரியாயேன த⁴ம்மங் கதெ²ந்தஸ்ஸேவ மே ஸல்லக்கெ²ஸ்ஸதீ’’தி த⁴ம்மதே³ஸனங் ஆரப⁴ந்தோ தங் கிங் மஞ்ஞஸீதிஆதி³மாஹ. தத்த² ஸத்³தா⁴யிகோதி ஸத்³தா⁴தப்³போ³, யஸ்ஸ த்வங் வசனங் ஸத்³த³ஹஸீதி அத்தோ². பச்சயிகோதி தஸ்ஸேவ வேவசனங், யஸ்ஸ வசனங் பத்தியாயஸீதி அத்தோ². அப்³ப⁴ஸமந்தி ஆகாஸஸமங். நிப்போதெ²ந்தோ ஆக³ச்ச²தீதி பத²விதலதோ யாவ அகனிட்ட²ப்³ரஹ்மலோகா ஸப்³பே³ ஸத்தே ஸண்ஹகரணீயங் திணசுண்ணங் விய கரொந்தோ பிஸந்தோ ஆக³ச்ச²தி.
Atha satthā cintesi – ‘‘sacāhaṃ vakkhāmi, ‘mahārāja, mādise nāma sammāsambuddhe dhuravihāre vasante tayā evarūpaṃ dāruṇaṃ kammaṃ kataṃ, ayuttaṃ te kata’nti, athāyaṃ rājā maṅku hutvā santhambhituṃ na sakkuṇeyya, pariyāyena dhammaṃ kathentasseva me sallakkhessatī’’ti dhammadesanaṃ ārabhanto taṃ kiṃ maññasītiādimāha. Tattha saddhāyikoti saddhātabbo, yassa tvaṃ vacanaṃ saddahasīti attho. Paccayikoti tasseva vevacanaṃ, yassa vacanaṃ pattiyāyasīti attho. Abbhasamanti ākāsasamaṃ. Nippothento āgacchatīti pathavitalato yāva akaniṭṭhabrahmalokā sabbe satte saṇhakaraṇīyaṃ tiṇacuṇṇaṃ viya karonto pisanto āgacchati.
அஞ்ஞத்ர த⁴ம்மசரியாயாதி ட²பெத்வா த⁴ம்மசரியங் அஞ்ஞங் காதப்³ப³ங் நத்தி², த³ஸகுஸலகம்மபத²ஸங்கா²தா த⁴ம்மசரியாவ கத்தப்³பா³, ப⁴ந்தேதி – ஸமசரியாதீ³னி தஸ்ஸேவ வேவசனானி. ஆரோசேமீதி ஆசிக்கா²மி. படிவேத³யாமீதி ஜானாபேமி. அதி⁴வத்ததீதி அஜ்ஜொ²த்த²ரதி. ஹத்தி²யுத்³தா⁴னீதி நாளாகி³ரிஸதி³ஸே ஹேமகப்பனே நாகே³ அபி⁴ருய்ஹ யுஜ்ஜி²தப்³ப³யுத்³தா⁴னி. க³தீதி நிப்ப²த்தி. விஸயோதி ஓகாஸோ, ஸமத்த²பா⁴வோ வா. ந ஹி ஸக்கா தேஹி ஜராமரணங் படிபா³ஹிதுங் . மந்தினோ மஹாமத்தாதி மந்தஸம்பன்னா மஹோஸத⁴விது⁴ரபண்டி³தாதி³ஸதி³ஸா மஹாஅமச்சா. பூ⁴மிக³தந்தி மஹாலோஹகும்பி⁴யோ பூரெத்வா பூ⁴மியங் ட²பிதங். வேஹாஸட்ட²ந்தி சம்மபஸிப்³ப³கே பூரெத்வா துலாஸங்கா⁴டாதீ³ஸு லக்³கெ³த்வா சேவ நிய்யுஹாதீ³ஸு ச பூரெத்வா ட²பிதங். உபலாபேதுந்தி அஞ்ஞமஞ்ஞங் பி⁴ந்தி³துங். யதா² த்³வே ஜனா ஏகேன மக்³கே³ன ந க³ச்ச²ந்தி ஏவங் காதுங்.
Aññatra dhammacariyāyāti ṭhapetvā dhammacariyaṃ aññaṃ kātabbaṃ natthi, dasakusalakammapathasaṅkhātā dhammacariyāva kattabbā, bhanteti – samacariyādīni tasseva vevacanāni. Ārocemīti ācikkhāmi. Paṭivedayāmīti jānāpemi. Adhivattatīti ajjhottharati. Hatthiyuddhānīti nāḷāgirisadise hemakappane nāge abhiruyha yujjhitabbayuddhāni. Gatīti nipphatti. Visayoti okāso, samatthabhāvo vā. Na hi sakkā tehi jarāmaraṇaṃ paṭibāhituṃ . Mantino mahāmattāti mantasampannā mahosadhavidhurapaṇḍitādisadisā mahāamaccā. Bhūmigatanti mahālohakumbhiyo pūretvā bhūmiyaṃ ṭhapitaṃ. Vehāsaṭṭhanti cammapasibbake pūretvā tulāsaṅghāṭādīsu laggetvā ceva niyyuhādīsu ca pūretvā ṭhapitaṃ. Upalāpetunti aññamaññaṃ bhindituṃ. Yathā dve janā ekena maggena na gacchanti evaṃ kātuṃ.
நப⁴ங் ஆஹச்சாதி ஆகாஸங் பூரெத்வா. ஏவங் ஜரா ச மச்சு சாதி இத⁴ த்³வேயேவ பப்³ப³தா க³ஹிதா, ராஜோவாதே³ பன ‘‘ஜரா ஆக³ச்ச²தி ஸப்³ப³யொப்³ப³னங் விலும்பமானா’’தி ஏவங் ஜரா மரணங் ப்³யாதி⁴ விபத்தீதி சத்தாரோபேதே ஆக³தாவ. தஸ்மாதி யஸ்மா ஹத்தி²யுத்³தா⁴தீ³ஹி ஜராமரணங் ஜினிதுங் ந ஸக்கா, தஸ்மா. ஸத்³த⁴ங் நிவேஸயேதி ஸத்³த⁴ங் நிவேஸெய்ய, பதிட்டா²பெய்யாதி. பஞ்சமங்.
Nabhaṃ āhaccāti ākāsaṃ pūretvā. Evaṃ jarā ca maccu cāti idha dveyeva pabbatā gahitā, rājovāde pana ‘‘jarā āgacchati sabbayobbanaṃ vilumpamānā’’ti evaṃ jarā maraṇaṃ byādhi vipattīti cattāropete āgatāva. Tasmāti yasmā hatthiyuddhādīhi jarāmaraṇaṃ jinituṃ na sakkā, tasmā. Saddhaṃ nivesayeti saddhaṃ niveseyya, patiṭṭhāpeyyāti. Pañcamaṃ.
ததியோ வக்³கோ³.
Tatiyo vaggo.
இதி ஸாரத்த²ப்பகாஸினியா
Iti sāratthappakāsiniyā
ஸங்யுத்தனிகாய-அட்ட²கதா²ய
Saṃyuttanikāya-aṭṭhakathāya
கோஸலஸங்யுத்தவண்ணனா நிட்டி²தா.
Kosalasaṃyuttavaṇṇanā niṭṭhitā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / ஸங்யுத்தனிகாய • Saṃyuttanikāya / 5. பப்³ப³தூபமஸுத்தங் • 5. Pabbatūpamasuttaṃ
டீகா • Tīkā / ஸுத்தபிடக (டீகா) • Suttapiṭaka (ṭīkā) / ஸங்யுத்தனிகாய (டீகா) • Saṃyuttanikāya (ṭīkā) / 5. பப்³ப³தூபமஸுத்தவண்ணனா • 5. Pabbatūpamasuttavaṇṇanā
