| Library / Tipiṭaka / তিপিটক • Tipiṭaka / সংযুত্তনিকায (অট্ঠকথা) • Saṃyuttanikāya (aṭṭhakathā) |
৫. পব্বতূপমসুত্তৰণ্ণনা
5. Pabbatūpamasuttavaṇṇanā
১৩৬. পঞ্চমে মুদ্ধাৰসিত্তানন্তি খত্তিযাভিসেকেন মুদ্ধনি অৰসিত্তানং কতাভিসেকানং। কামগেধপরিযুট্ঠিতানন্তি কামেসু গেধেন পরিযুট্ঠিতানং অভিভূতানং। জনপদত্থাৰরিযপ্পত্তানন্তি জনপদে থিরভাৰপ্পত্তানং। রাজকরণীযানীতি রাজকম্মানি রাজূহি কত্তব্বকিচ্চানি। তেসু খ্ৰাহন্তি তেসু অহং। উসুক্কমাপন্নোতি ব্যাপারং আপন্নো। এস কির রাজা দিৰসস্স তিক্খত্তুং ভগৰতো উপট্ঠানং গচ্ছতি, অন্তরাগমনানি বহূনিপি হোন্তি। তস্স নিবদ্ধং গচ্ছতো বলকাযো মহাপি হোতি অপ্পোপি। অথেকদিৰসং পঞ্চসতা চোরা চিন্তযিংসু – ‘‘অযং রাজা অৰেলায অপ্পেন বলেন সমণস্স গোতমস্স উপট্ঠানং গচ্ছতি, অন্তরামগ্গে নং গহেত্ৰা রজ্জং গণ্হিস্সামা’’তি। তে অন্ধৰনে নিলীযিংসু। রাজানো চ নাম মহাপুঞ্ঞা হোন্তি। অথ তেসংযেৰ অব্ভন্তরতো একো পুরিসো নিক্খমিত্ৰা রঞ্ঞো আরোচেসি। রাজা মহন্তং বলকাযং আদায অন্ধৰনং পরিৰারেত্ৰা তে সব্বে গহেত্ৰা অন্ধৰনতো যাৰ নগরদ্ৰারা মগ্গস্স উভোসু পস্সেসু যথা অঞ্ঞমঞ্ঞং চক্খুনা চক্খুং উপনিবন্ধিত্ৰা ওলোকেন্তি, এৰং আসন্নানি সূলানি রোপাপেত্ৰা সূলেসু উত্তাসেসি। ইদং সন্ধায এৰমাহ।
136. Pañcame muddhāvasittānanti khattiyābhisekena muddhani avasittānaṃ katābhisekānaṃ. Kāmagedhapariyuṭṭhitānanti kāmesu gedhena pariyuṭṭhitānaṃ abhibhūtānaṃ. Janapadatthāvariyappattānanti janapade thirabhāvappattānaṃ. Rājakaraṇīyānīti rājakammāni rājūhi kattabbakiccāni. Tesu khvāhanti tesu ahaṃ. Usukkamāpannoti byāpāraṃ āpanno. Esa kira rājā divasassa tikkhattuṃ bhagavato upaṭṭhānaṃ gacchati, antarāgamanāni bahūnipi honti. Tassa nibaddhaṃ gacchato balakāyo mahāpi hoti appopi. Athekadivasaṃ pañcasatā corā cintayiṃsu – ‘‘ayaṃ rājā avelāya appena balena samaṇassa gotamassa upaṭṭhānaṃ gacchati, antarāmagge naṃ gahetvā rajjaṃ gaṇhissāmā’’ti. Te andhavane nilīyiṃsu. Rājāno ca nāma mahāpuññā honti. Atha tesaṃyeva abbhantarato eko puriso nikkhamitvā rañño ārocesi. Rājā mahantaṃ balakāyaṃ ādāya andhavanaṃ parivāretvā te sabbe gahetvā andhavanato yāva nagaradvārā maggassa ubhosu passesu yathā aññamaññaṃ cakkhunā cakkhuṃ upanibandhitvā olokenti, evaṃ āsannāni sūlāni ropāpetvā sūlesu uttāsesi. Idaṃ sandhāya evamāha.
অথ সত্থা চিন্তেসি – ‘‘সচাহং ৰক্খামি, ‘মহারাজ, মাদিসে নাম সম্মাসম্বুদ্ধে ধুরৰিহারে ৰসন্তে তযা এৰরূপং দারুণং কম্মং কতং, অযুত্তং তে কত’ন্তি, অথাযং রাজা মঙ্কু হুত্ৰা সন্থম্ভিতুং ন সক্কুণেয্য, পরিযাযেন ধম্মং কথেন্তস্সেৰ মে সল্লক্খেস্সতী’’তি ধম্মদেসনং আরভন্তো তং কিং মঞ্ঞসীতিআদিমাহ। তত্থ সদ্ধাযিকোতি সদ্ধাতব্বো, যস্স ত্ৰং ৰচনং সদ্দহসীতি অত্থো। পচ্চযিকোতি তস্সেৰ ৰেৰচনং, যস্স ৰচনং পত্তিযাযসীতি অত্থো। অব্ভসমন্তি আকাসসমং। নিপ্পোথেন্তো আগচ্ছতীতি পথৰিতলতো যাৰ অকনিট্ঠব্রহ্মলোকা সব্বে সত্তে সণ্হকরণীযং তিণচুণ্ণং ৰিয করোন্তো পিসন্তো আগচ্ছতি।
Atha satthā cintesi – ‘‘sacāhaṃ vakkhāmi, ‘mahārāja, mādise nāma sammāsambuddhe dhuravihāre vasante tayā evarūpaṃ dāruṇaṃ kammaṃ kataṃ, ayuttaṃ te kata’nti, athāyaṃ rājā maṅku hutvā santhambhituṃ na sakkuṇeyya, pariyāyena dhammaṃ kathentasseva me sallakkhessatī’’ti dhammadesanaṃ ārabhanto taṃ kiṃ maññasītiādimāha. Tattha saddhāyikoti saddhātabbo, yassa tvaṃ vacanaṃ saddahasīti attho. Paccayikoti tasseva vevacanaṃ, yassa vacanaṃ pattiyāyasīti attho. Abbhasamanti ākāsasamaṃ. Nippothento āgacchatīti pathavitalato yāva akaniṭṭhabrahmalokā sabbe satte saṇhakaraṇīyaṃ tiṇacuṇṇaṃ viya karonto pisanto āgacchati.
অঞ্ঞত্র ধম্মচরিযাযাতি ঠপেত্ৰা ধম্মচরিযং অঞ্ঞং কাতব্বং নত্থি, দসকুসলকম্মপথসঙ্খাতা ধম্মচরিযাৰ কত্তব্বা, ভন্তেতি – সমচরিযাদীনি তস্সেৰ ৰেৰচনানি। আরোচেমীতি আচিক্খামি। পটিৰেদযামীতি জানাপেমি। অধিৰত্ততীতি অজ্ঝোত্থরতি। হত্থিযুদ্ধানীতি নাল়াগিরিসদিসে হেমকপ্পনে নাগে অভিরুয্হ যুজ্ঝিতব্বযুদ্ধানি। গতীতি নিপ্ফত্তি। ৰিসযোতি ওকাসো, সমত্থভাৰো ৰা। ন হি সক্কা তেহি জরামরণং পটিবাহিতুং । মন্তিনো মহামত্তাতি মন্তসম্পন্না মহোসধৰিধুরপণ্ডিতাদিসদিসা মহাঅমচ্চা। ভূমিগতন্তি মহালোহকুম্ভিযো পূরেত্ৰা ভূমিযং ঠপিতং। ৰেহাসট্ঠন্তি চম্মপসিব্বকে পূরেত্ৰা তুলাসঙ্ঘাটাদীসু লগ্গেত্ৰা চেৰ নিয্যুহাদীসু চ পূরেত্ৰা ঠপিতং। উপলাপেতুন্তি অঞ্ঞমঞ্ঞং ভিন্দিতুং। যথা দ্ৰে জনা একেন মগ্গেন ন গচ্ছন্তি এৰং কাতুং।
Aññatra dhammacariyāyāti ṭhapetvā dhammacariyaṃ aññaṃ kātabbaṃ natthi, dasakusalakammapathasaṅkhātā dhammacariyāva kattabbā, bhanteti – samacariyādīni tasseva vevacanāni. Ārocemīti ācikkhāmi. Paṭivedayāmīti jānāpemi. Adhivattatīti ajjhottharati. Hatthiyuddhānīti nāḷāgirisadise hemakappane nāge abhiruyha yujjhitabbayuddhāni. Gatīti nipphatti. Visayoti okāso, samatthabhāvo vā. Na hi sakkā tehi jarāmaraṇaṃ paṭibāhituṃ . Mantino mahāmattāti mantasampannā mahosadhavidhurapaṇḍitādisadisā mahāamaccā. Bhūmigatanti mahālohakumbhiyo pūretvā bhūmiyaṃ ṭhapitaṃ. Vehāsaṭṭhanti cammapasibbake pūretvā tulāsaṅghāṭādīsu laggetvā ceva niyyuhādīsu ca pūretvā ṭhapitaṃ. Upalāpetunti aññamaññaṃ bhindituṃ. Yathā dve janā ekena maggena na gacchanti evaṃ kātuṃ.
নভং আহচ্চাতি আকাসং পূরেত্ৰা। এৰং জরা চ মচ্চু চাতি ইধ দ্ৰেযেৰ পব্বতা গহিতা, রাজোৰাদে পন ‘‘জরা আগচ্ছতি সব্বযোব্বনং ৰিলুম্পমানা’’তি এৰং জরা মরণং ব্যাধি ৰিপত্তীতি চত্তারোপেতে আগতাৰ। তস্মাতি যস্মা হত্থিযুদ্ধাদীহি জরামরণং জিনিতুং ন সক্কা, তস্মা। সদ্ধং নিৰেসযেতি সদ্ধং নিৰেসেয্য, পতিট্ঠাপেয্যাতি। পঞ্চমং।
Nabhaṃ āhaccāti ākāsaṃ pūretvā. Evaṃ jarā ca maccu cāti idha dveyeva pabbatā gahitā, rājovāde pana ‘‘jarā āgacchati sabbayobbanaṃ vilumpamānā’’ti evaṃ jarā maraṇaṃ byādhi vipattīti cattāropete āgatāva. Tasmāti yasmā hatthiyuddhādīhi jarāmaraṇaṃ jinituṃ na sakkā, tasmā. Saddhaṃ nivesayeti saddhaṃ niveseyya, patiṭṭhāpeyyāti. Pañcamaṃ.
ততিযো ৰগ্গো।
Tatiyo vaggo.
ইতি সারত্থপ্পকাসিনিযা
Iti sāratthappakāsiniyā
সংযুত্তনিকায-অট্ঠকথায
Saṃyuttanikāya-aṭṭhakathāya
কোসলসংযুত্তৰণ্ণনা নিট্ঠিতা।
Kosalasaṃyuttavaṇṇanā niṭṭhitā.
Related texts:
তিপিটক (মূল) • Tipiṭaka (Mūla) / সুত্তপিটক • Suttapiṭaka / সংযুত্তনিকায • Saṃyuttanikāya / ৫. পব্বতূপমসুত্তং • 5. Pabbatūpamasuttaṃ
টীকা • Tīkā / সুত্তপিটক (টীকা) • Suttapiṭaka (ṭīkā) / সংযুত্তনিকায (টীকা) • Saṃyuttanikāya (ṭīkā) / ৫. পব্বতূপমসুত্তৰণ্ণনা • 5. Pabbatūpamasuttavaṇṇanā
