| Library / Tipiṭaka / তিপিটক • Tipiṭaka / সংযুত্তনিকায (টীকা) • Saṃyuttanikāya (ṭīkā) |
৫. পব্বতূপমসুত্তৰণ্ণনা
5. Pabbatūpamasuttavaṇṇanā
১৩৬. খত্তিযাতি অভিসেকপ্পত্তা। ইস্সরিযমদো কামগেধো। পথৰিমণ্ডলস্স মহন্ততা তংনিৰাসিনং অনুযন্ততাতি সব্বমিদং যথিচ্ছিতস্স রাজকিচ্চস্স সুখেন সমিজ্ঝনস্স কারণকিত্তনং। যাদিসে রাজকিচ্চে উস্সুক্কং আপন্নো, তং ৰিত্থারতো দস্সেতুং ‘‘এস কিরা’’তিআদি ৰুত্তং। অন্তরগমনানীতি তিণ্ণং নিরন্তরগমনানং অন্তরন্তরা গমনানি। চোরা চিন্তযিংসূতি একো অন্তরভোগিকো রাজাপরাধিকো পঞ্চসতমনুস্সপরিৰারো চোরিযং করোন্তো ৰিচরতি, তে সন্ধায ৰুত্তং।
136.Khattiyāti abhisekappattā. Issariyamado kāmagedho. Pathavimaṇḍalassa mahantatā taṃnivāsinaṃ anuyantatāti sabbamidaṃ yathicchitassa rājakiccassa sukhena samijjhanassa kāraṇakittanaṃ. Yādise rājakicce ussukkaṃ āpanno, taṃ vitthārato dassetuṃ ‘‘esa kirā’’tiādi vuttaṃ. Antaragamanānīti tiṇṇaṃ nirantaragamanānaṃ antarantarā gamanāni. Corā cintayiṃsūti eko antarabhogiko rājāparādhiko pañcasatamanussaparivāro coriyaṃ karonto vicarati, te sandhāya vuttaṃ.
‘‘অযুত্তং তে কত’’ন্তি সচাহং ৰক্খামীতি যোজনা। ধুরৰিহারেতি রথস্স ধুরং ৰিয নগরস্স ধুরভূতে ৰিহারে। সন্থম্ভিতুন্তি ৰিস্সাসভাৰেন উপট্ঠাতুং। সদ্ধাযিকোতি সদ্ধায অযিতব্বো, সদ্ধেয্যোতি অত্থো। তেনাহ ‘‘সদ্ধাতব্বো’’তি। পচ্চযিকোতি পত্তিযাযিতব্বো। অব্ভসমং পুথুলভাৰেন। নিপ্পোথেন্তোতি নিম্মদ্দেন্তো। সণ্হকরণীযং অতিসণ্হং পিসন্তো নিসদপোতো ৰিয পিসন্তো।
‘‘Ayuttaṃ te kata’’nti sacāhaṃ vakkhāmīti yojanā. Dhuravihāreti rathassa dhuraṃ viya nagarassa dhurabhūte vihāre. Santhambhitunti vissāsabhāvena upaṭṭhātuṃ. Saddhāyikoti saddhāya ayitabbo, saddheyyoti attho. Tenāha ‘‘saddhātabbo’’ti. Paccayikoti pattiyāyitabbo. Abbhasamaṃ puthulabhāvena. Nippothentoti nimmaddento. Saṇhakaraṇīyaṃ atisaṇhaṃ pisanto nisadapoto viya pisanto.
ধম্মচরিযাতিআদিত্তম্পি সীসং চেলঞ্চ অজ্ঝুপেক্খিত্ৰা সম্মাপটিপত্তি এৰ কাতব্বা তস্সা এৰ পরলোকে পতিট্ঠাভাৰতো। আচিক্খামীতি কথেমি, কথেন্তো চ যথা তমত্থং সম্মদেৰ রাজা জানাতি, এৰং জানাপেমীতি । নিপ্ফত্তি যুদ্ধেন কাতব্বঅত্থসিদ্ধি। ৰিসিনোতি বন্ধতি যথাধিপ্পেতং চিত্তং এতেনাতি ৰিসযো, সমত্থভাৰো। মন্তসম্পন্নাতি সম্পন্নরাজমন্তা। মহাঅমচ্চাতি মহোসধাদিসদিসা নীতিসত্থছেকা অমচ্চপুরিসা। উপলাপেতুন্তি পরেসং অন্তরে ৰিরোধত্থং সঙ্গণ্হিতুং।
Dhammacariyātiādittampi sīsaṃ celañca ajjhupekkhitvā sammāpaṭipatti eva kātabbā tassā eva paraloke patiṭṭhābhāvato. Ācikkhāmīti kathemi, kathento ca yathā tamatthaṃ sammadeva rājā jānāti, evaṃ jānāpemīti . Nipphatti yuddhena kātabbaatthasiddhi. Visinoti bandhati yathādhippetaṃ cittaṃ etenāti visayo, samatthabhāvo. Mantasampannāti sampannarājamantā. Mahāamaccāti mahosadhādisadisā nītisatthachekā amaccapurisā. Upalāpetunti paresaṃ antare virodhatthaṃ saṅgaṇhituṃ.
দ্ৰেযেৰ পব্বতাতি পব্বতসদিসা দ্ৰেযেৰ গহিতা। রাজোৰাদেতি রাজোৰাদসুত্তে। আগতাৰ তত্তন্তিযা অনুরূপত্থং। ৰিলুম্পমানাতি ইতি-সদ্দো আদিঅত্থো। ৰিপত্তীতি ভোগপরিহানাদিৰিনাসো। হত্থিযুদ্ধাদীহি জরামরণং জিনিতুং ন সক্কা সত্তস্স অৰিসযভাৰতো। যেন পন জিনিতুং সক্কা, তং দস্সেন্তো ভগৰা ‘‘বুদ্ধে…পে॰… নিৰেসযে’’তি আহ। রতনত্তযে হি সদ্ধা নিৰিট্ঠা মূলজাতা পতিট্ঠিতা একন্ততো জরামরণৰিজযায হোতি। তেনাহ ‘‘তস্মা সদ্ধ’’ন্তি।
Dveyeva pabbatāti pabbatasadisā dveyeva gahitā. Rājovādeti rājovādasutte. Āgatāva tattantiyā anurūpatthaṃ. Vilumpamānāti iti-saddo ādiattho. Vipattīti bhogaparihānādivināso. Hatthiyuddhādīhi jarāmaraṇaṃ jinituṃ na sakkā sattassa avisayabhāvato. Yena pana jinituṃ sakkā, taṃ dassento bhagavā ‘‘buddhe…pe… nivesaye’’ti āha. Ratanattaye hi saddhā niviṭṭhā mūlajātā patiṭṭhitā ekantato jarāmaraṇavijayāya hoti. Tenāha ‘‘tasmā saddha’’nti.
পব্বতূপমসুত্তৰণ্ণনা নিট্ঠিতা।
Pabbatūpamasuttavaṇṇanā niṭṭhitā.
ততিযৰগ্গৰণ্ণনা নিট্ঠিতা।
Tatiyavaggavaṇṇanā niṭṭhitā.
সারত্থপ্পকাসিনিযা সংযুত্তনিকায-অট্ঠকথায
Sāratthappakāsiniyā saṃyuttanikāya-aṭṭhakathāya
কোসলসংযুত্তৰণ্ণনায লীনত্থপ্পকাসনা সমত্তা।
Kosalasaṃyuttavaṇṇanāya līnatthappakāsanā samattā.
Related texts:
তিপিটক (মূল) • Tipiṭaka (Mūla) / সুত্তপিটক • Suttapiṭaka / সংযুত্তনিকায • Saṃyuttanikāya / ৫. পব্বতূপমসুত্তং • 5. Pabbatūpamasuttaṃ
অট্ঠকথা • Aṭṭhakathā / সুত্তপিটক (অট্ঠকথা) • Suttapiṭaka (aṭṭhakathā) / সংযুত্তনিকায (অট্ঠকথা) • Saṃyuttanikāya (aṭṭhakathā) / ৫. পব্বতূপমসুত্তৰণ্ণনা • 5. Pabbatūpamasuttavaṇṇanā
