| Library / Tipiṭaka / तिपिटक • Tipiṭaka / संयुत्तनिकाय • Saṃyuttanikāya |
११. पभङ्गुसुत्तं
11. Pabhaṅgusuttaṃ
३२. सावत्थिनिदानं। ‘‘पभङ्गुञ्च, भिक्खवे, देसेस्सामि अप्पभङ्गुञ्च। तं सुणाथ। किञ्च, भिक्खवे, पभङ्गु, किं अप्पभङ्गु? रूपं , भिक्खवे, पभङ्गु। यो तस्स निरोधो वूपसमो अत्थङ्गमो, इदं अप्पभङ्गु। वेदना पभङ्गु। यो तस्सा निरोधो वूपसमो अत्थङ्गमो, इदं अप्पभङ्गु। सञ्ञा पभङ्गु… सङ्खारा पभङ्गु। यो तेसं निरोधो वूपसमो अत्थङ्गमो, इदं अप्पभङ्गु। विञ्ञाणं पभङ्गु। यो तस्स निरोधो वूपसमो अत्थङ्गमो, इदं अप्पभङ्गू’’ति। एकादसमं।
32. Sāvatthinidānaṃ. ‘‘Pabhaṅguñca, bhikkhave, desessāmi appabhaṅguñca. Taṃ suṇātha. Kiñca, bhikkhave, pabhaṅgu, kiṃ appabhaṅgu? Rūpaṃ , bhikkhave, pabhaṅgu. Yo tassa nirodho vūpasamo atthaṅgamo, idaṃ appabhaṅgu. Vedanā pabhaṅgu. Yo tassā nirodho vūpasamo atthaṅgamo, idaṃ appabhaṅgu. Saññā pabhaṅgu… saṅkhārā pabhaṅgu. Yo tesaṃ nirodho vūpasamo atthaṅgamo, idaṃ appabhaṅgu. Viññāṇaṃ pabhaṅgu. Yo tassa nirodho vūpasamo atthaṅgamo, idaṃ appabhaṅgū’’ti. Ekādasamaṃ.
भारवग्गो ततियो।
Bhāravaggo tatiyo.
तस्सुद्दानं –
Tassuddānaṃ –
भारं परिञ्ञं अभिजानं, छन्दरागं चतुत्थकं।
Bhāraṃ pariññaṃ abhijānaṃ, chandarāgaṃ catutthakaṃ;
अस्सादा च तयो वुत्ता, अभिनन्दनमट्ठमं।
Assādā ca tayo vuttā, abhinandanamaṭṭhamaṃ;
उप्पादं अघमूलञ्च, एकादसमो पभङ्गूति॥
Uppādaṃ aghamūlañca, ekādasamo pabhaṅgūti.
Related texts:
अट्ठकथा • Aṭṭhakathā / सुत्तपिटक (अट्ठकथा) • Suttapiṭaka (aṭṭhakathā) / संयुत्तनिकाय (अट्ठकथा) • Saṃyuttanikāya (aṭṭhakathā) / ११. पभङ्गुसुत्तवण्णना • 11. Pabhaṅgusuttavaṇṇanā
टीका • Tīkā / सुत्तपिटक (टीका) • Suttapiṭaka (ṭīkā) / संयुत्तनिकाय (टीका) • Saṃyuttanikāya (ṭīkā) / ११. पभङ्गुसुत्तवण्णना • 11. Pabhaṅgusuttavaṇṇanā
