| Library / Tipiṭaka / តិបិដក • Tipiṭaka / សំយុត្តនិកាយ • Saṃyuttanikāya |
១១. បភង្គុសុត្តំ
11. Pabhaṅgusuttaṃ
៣២. សាវត្ថិនិទានំ។ ‘‘បភង្គុញ្ច, ភិក្ខវេ, ទេសេស្សាមិ អប្បភង្គុញ្ច។ តំ សុណាថ។ កិញ្ច, ភិក្ខវេ, បភង្គុ, កិំ អប្បភង្គុ? រូបំ , ភិក្ខវេ, បភង្គុ។ យោ តស្ស និរោធោ វូបសមោ អត្ថង្គមោ, ឥទំ អប្បភង្គុ។ វេទនា បភង្គុ។ យោ តស្សា និរោធោ វូបសមោ អត្ថង្គមោ, ឥទំ អប្បភង្គុ។ សញ្ញា បភង្គុ… សង្ខារា បភង្គុ។ យោ តេសំ និរោធោ វូបសមោ អត្ថង្គមោ, ឥទំ អប្បភង្គុ។ វិញ្ញាណំ បភង្គុ។ យោ តស្ស និរោធោ វូបសមោ អត្ថង្គមោ, ឥទំ អប្បភង្គូ’’តិ។ ឯកាទសមំ។
32. Sāvatthinidānaṃ. ‘‘Pabhaṅguñca, bhikkhave, desessāmi appabhaṅguñca. Taṃ suṇātha. Kiñca, bhikkhave, pabhaṅgu, kiṃ appabhaṅgu? Rūpaṃ , bhikkhave, pabhaṅgu. Yo tassa nirodho vūpasamo atthaṅgamo, idaṃ appabhaṅgu. Vedanā pabhaṅgu. Yo tassā nirodho vūpasamo atthaṅgamo, idaṃ appabhaṅgu. Saññā pabhaṅgu… saṅkhārā pabhaṅgu. Yo tesaṃ nirodho vūpasamo atthaṅgamo, idaṃ appabhaṅgu. Viññāṇaṃ pabhaṅgu. Yo tassa nirodho vūpasamo atthaṅgamo, idaṃ appabhaṅgū’’ti. Ekādasamaṃ.
ភារវគ្គោ តតិយោ។
Bhāravaggo tatiyo.
តស្សុទ្ទានំ –
Tassuddānaṃ –
ភារំ បរិញ្ញំ អភិជានំ, ឆន្ទរាគំ ចតុត្ថកំ;
Bhāraṃ pariññaṃ abhijānaṃ, chandarāgaṃ catutthakaṃ;
អស្សាទា ច តយោ វុត្តា, អភិនន្ទនមដ្ឋមំ;
Assādā ca tayo vuttā, abhinandanamaṭṭhamaṃ;
ឧប្បាទំ អឃមូលញ្ច, ឯកាទសមោ បភង្គូតិ។
Uppādaṃ aghamūlañca, ekādasamo pabhaṅgūti.
Related texts:
អដ្ឋកថា • Aṭṭhakathā / សុត្តបិដក (អដ្ឋកថា) • Suttapiṭaka (aṭṭhakathā) / សំយុត្តនិកាយ (អដ្ឋកថា) • Saṃyuttanikāya (aṭṭhakathā) / ១១. បភង្គុសុត្តវណ្ណនា • 11. Pabhaṅgusuttavaṇṇanā
ដីកា • Tīkā / សុត្តបិដក (ដីកា) • Suttapiṭaka (ṭīkā) / សំយុត្តនិកាយ (ដីកា) • Saṃyuttanikāya (ṭīkā) / ១១. បភង្គុសុត្តវណ្ណនា • 11. Pabhaṅgusuttavaṇṇanā
