| Library / Tipiṭaka / திபிடக • Tipiṭaka / விமானவத்து²-அட்ட²கதா² • Vimānavatthu-aṭṭhakathā |
2. பப⁴ஸ்ஸரவிமானவண்ணனா
2. Pabhassaravimānavaṇṇanā
பப⁴ஸ்ஸரவரவண்ணனிபே⁴தி பப⁴ஸ்ஸரவிமானங். தஸ்ஸ கா உப்பத்தி? ப⁴க³வா ராஜக³ஹே விஹரதி. தேன ச ஸமயேன ராஜக³ஹே அஞ்ஞதரோ உபாஸகோ மஹாமொக்³க³ல்லானத்தே²ரே அபி⁴ப்பஸன்னோ ஹோதி. தஸ்ஸேகா தீ⁴தா ஸத்³தா⁴ பஸன்னா, ஸாபி தே²ரே க³ருசித்தீகாரப³ஹுலா ஹோதி. அதே²கதி³வஸங் ஆயஸ்மா மஹாமொக்³க³ல்லானோ ராஜக³ஹே பிண்டா³ய சரந்தோ தங் குலங் உபஸங்கமி. ஸா தே²ரங் தி³ஸ்வா ஸோமனஸ்ஸஜாதா ஆஸனங் பஞ்ஞாபெத்வா தே²ரே தத்த² நிஸின்னே ஸுமனமாலாய பூஜெத்வா மது⁴ரங் கு³ளபா²ணிதங் தே²ரஸ்ஸ பத்தே ஆகிரி, தே²ரோ அனுமோதி³துகாமோ நிஸீதி³. ஸா க⁴ராவாஸஸ்ஸ ப³ஹுகிச்சதாய அனோகாஸதங் பவேதெ³த்வா ‘‘அஞ்ஞஸ்மிங் தி³வஸே த⁴ம்மங் ஸொஸ்ஸாமீ’’தி தே²ரங் வந்தி³த்வா உய்யோஜேஸி. தத³ஹேவ ச ஸா காலங் கத்வா தாவதிங்ஸேஸு நிப்³ப³த்தி. தங் ஆயஸ்மா மஹாமொக்³க³ல்லானோ உபஸங்கமித்வா இமாஹி கா³தா²ஹி புச்சி² –
Pabhassaravaravaṇṇanibheti pabhassaravimānaṃ. Tassa kā uppatti? Bhagavā rājagahe viharati. Tena ca samayena rājagahe aññataro upāsako mahāmoggallānatthere abhippasanno hoti. Tassekā dhītā saddhā pasannā, sāpi there garucittīkārabahulā hoti. Athekadivasaṃ āyasmā mahāmoggallāno rājagahe piṇḍāya caranto taṃ kulaṃ upasaṅkami. Sā theraṃ disvā somanassajātā āsanaṃ paññāpetvā there tattha nisinne sumanamālāya pūjetvā madhuraṃ guḷaphāṇitaṃ therassa patte ākiri, thero anumoditukāmo nisīdi. Sā gharāvāsassa bahukiccatāya anokāsataṃ pavedetvā ‘‘aññasmiṃ divase dhammaṃ sossāmī’’ti theraṃ vanditvā uyyojesi. Tadaheva ca sā kālaṃ katvā tāvatiṃsesu nibbatti. Taṃ āyasmā mahāmoggallāno upasaṅkamitvā imāhi gāthāhi pucchi –
697.
697.
‘‘பப⁴ஸ்ஸரவரவண்ணனிபே⁴, ஸுரத்தவத்த²வஸனே;
‘‘Pabhassaravaravaṇṇanibhe, surattavatthavasane;
மஹித்³தி⁴கே சந்த³னருசிரக³த்தே,
Mahiddhike candanaruciragatte,
கா த்வங் ஸுபே⁴ தே³வதே வந்த³ஸே மமங்.
Kā tvaṃ subhe devate vandase mamaṃ.
698.
698.
‘‘பல்லங்கோ ச தே மஹக்³கோ⁴, நானாரதனசித்திதோ ருசிரோ;
‘‘Pallaṅko ca te mahaggho, nānāratanacittito ruciro;
யத்த² த்வங் நிஸின்னா விரோசஸி, தே³வராஜாரிவ நந்த³னே வனே.
Yattha tvaṃ nisinnā virocasi, devarājāriva nandane vane.
699.
699.
‘‘கிங் த்வங் புரே ஸுசரிதமாசரீ ப⁴த்³தே³, கிஸ்ஸ கம்மஸ்ஸ விபாகங்;
‘‘Kiṃ tvaṃ pure sucaritamācarī bhadde, kissa kammassa vipākaṃ;
அனுபோ⁴ஸி தே³வலோகஸ்மிங், தே³வதே புச்சி²தாசிக்க²;
Anubhosi devalokasmiṃ, devate pucchitācikkha;
கிஸ்ஸ கம்மஸ்ஸித³ங் ப²ல’’ந்தி.
Kissa kammassidaṃ phala’’nti.
697. தத்த² பப⁴ஸ்ஸரவரவண்ணனிபே⁴தி நிபா⁴தி தி³ப்³ப³தீதி நிபா⁴, வண்ணோவ நிபா⁴ வண்ணனிபா⁴, அதிவிய ஓபா⁴ஸனதோ பப⁴ஸ்ஸரா ச²விதோ³ஸாபா⁴வேன வரா உத்தமா வண்ணனிபா⁴ ஏதிஸ்ஸாதி பப⁴ஸ்ஸரவரவண்ணனிபா⁴. ஆமந்தனவஸேன ‘‘பப⁴ஸ்ஸரவரவண்ணனிபே⁴’’தி வுத்தங். ஸுரத்தவத்த²வஸனேதி ஸுட்டு² ரத்தவத்த²னிவத்தே². சந்த³னருசிரக³த்தேதி சந்த³னானுலித்தங் விய ருசிரக³த்தே, கோ³ஸீதசந்த³னேன ப³ஹலதரானுலித்தங் விய ஸுரத்தமனுஞ்ஞஸரீராவயவேதி அத்தோ², சந்த³னானுலேபேன வா ருசிரக³த்தே.
697. Tattha pabhassaravaravaṇṇanibheti nibhāti dibbatīti nibhā, vaṇṇova nibhā vaṇṇanibhā, ativiya obhāsanato pabhassarā chavidosābhāvena varā uttamā vaṇṇanibhā etissāti pabhassaravaravaṇṇanibhā. Āmantanavasena ‘‘pabhassaravaravaṇṇanibhe’’ti vuttaṃ. Surattavatthavasaneti suṭṭhu rattavatthanivatthe. Candanaruciragatteti candanānulittaṃ viya ruciragatte, gosītacandanena bahalatarānulittaṃ viya surattamanuññasarīrāvayaveti attho, candanānulepena vā ruciragatte.
ஏவங் தே²ரேன புட்டா² தே³வதா இமாஹி கா³தா²ஹி ப்³யாகாஸி –
Evaṃ therena puṭṭhā devatā imāhi gāthāhi byākāsi –
700.
700.
‘‘பிண்டா³ய தே சரந்தஸ்ஸ, மாலங் பா²ணிதஞ்ச அத³த³ங் ப⁴ந்தே;
‘‘Piṇḍāya te carantassa, mālaṃ phāṇitañca adadaṃ bhante;
தஸ்ஸ கம்மஸ்ஸித³ங் விபாகங், அனுபோ⁴மி தே³வலோகஸ்மிங்.
Tassa kammassidaṃ vipākaṃ, anubhomi devalokasmiṃ.
701.
701.
‘‘ஹோதி ச மே அனுதாபோ, அபரத்³த⁴ங் து³க்கி²தஞ்ச மே ப⁴ந்தே;
‘‘Hoti ca me anutāpo, aparaddhaṃ dukkhitañca me bhante;
ஸாஹங் த⁴ம்மங் நாஸ்ஸோஸிங், ஸுதே³ஸிதங் த⁴ம்மராஜேன.
Sāhaṃ dhammaṃ nāssosiṃ, sudesitaṃ dhammarājena.
702.
702.
‘‘தங் தங் வதா³மி ப⁴த்³த³ந்தே, யஸ்ஸ மே அனுகம்பியோ கோசி;
‘‘Taṃ taṃ vadāmi bhaddante, yassa me anukampiyo koci;
த⁴ம்மேஸு தங் ஸமாத³பேத², ஸுதே³ஸிதங் த⁴ம்மராஜேன.
Dhammesu taṃ samādapetha, sudesitaṃ dhammarājena.
703.
703.
‘‘யேஸங் அத்தி² ஸத்³தா⁴ பு³த்³தே⁴, த⁴ம்மே ச ஸங்க⁴ரதனே;
‘‘Yesaṃ atthi saddhā buddhe, dhamme ca saṅgharatane;
தே மங் அதிவிரோசந்தி, ஆயுனா யஸஸா ஸிரியா.
Te maṃ ativirocanti, āyunā yasasā siriyā.
704.
704.
‘‘பதாபேன வண்ணேன உத்தரிதரா, அஞ்ஞே மஹித்³தி⁴கதரா மயா தே³வா’’தி.
‘‘Patāpena vaṇṇena uttaritarā, aññe mahiddhikatarā mayā devā’’ti.
700. தத்த² மாலந்தி ஸுமனபுப்ப²ங். பா²ணிதந்தி உச்சு²ரஸங் க³ஹெத்வா கதபா²ணிதங்.
700. Tattha mālanti sumanapupphaṃ. Phāṇitanti ucchurasaṃ gahetvā kataphāṇitaṃ.
701. அனுதாபோதி விப்படிஸாரோ. தஸ்ஸ காரணமாஹ ‘‘அபரத்³த⁴ங் து³க்க²தஞ்ச மே ப⁴ந்தே’’தி . இதா³னி தங் ஸரூபதோ த³ஸ்ஸேதி ‘‘ஸாஹங் த⁴ம்மங் நாஸ்ஸோஸி’’ந்தி, ஸா அஹங் ததா³ தவ தே³ஸேதுகாமஸ்ஸ த⁴ம்மங் ந ஸுணிங். கீதி³ஸங்? ஸுதே³ஸிதங் த⁴ம்மராஜேனாதி, ஸம்மாஸம்பு³த்³தே⁴ன ஆதி³கல்யாணாதி³தாய ஏகந்தனிய்யானிகதாய ச ஸ்வாகா²தந்தி அத்தோ².
701.Anutāpoti vippaṭisāro. Tassa kāraṇamāha ‘‘aparaddhaṃ dukkhatañca me bhante’’ti . Idāni taṃ sarūpato dasseti ‘‘sāhaṃ dhammaṃ nāssosi’’nti, sā ahaṃ tadā tava desetukāmassa dhammaṃ na suṇiṃ. Kīdisaṃ? Sudesitaṃ dhammarājenāti, sammāsambuddhena ādikalyāṇāditāya ekantaniyyānikatāya ca svākhātanti attho.
702. தந்தி தஸ்மா த⁴ம்மராஜேன ஸுதே³ஸிதத்தா அஸவனஸ்ஸ ச மாதி³ஸானங் அனுதாபஹேதுபா⁴வதோ. தந்தி துவங், துய்ஹந்தி அத்தோ². யஸ்ஸாதி யோ அஸ்ஸ. அனுகம்பியோதி அனுகம்பிதப்³போ³. கோசீதி யோ கோசி. த⁴ம்மேஸூதி ஸீலாதி³த⁴ம்மேஸு. ‘‘த⁴ம்மே ஹீ’’தி வா பாடோ², ஸாஸனத⁴ம்மேதி அத்தோ². ஹீதி நிபாதமத்தங், வசனவிபல்லாஸோ வா. தந்தி அனுகம்பிதப்³ப³புக்³க³லங். ஸுதே³ஸிதந்தி ஸுட்டு² தே³ஸிதங்.
702.Tanti tasmā dhammarājena sudesitattā asavanassa ca mādisānaṃ anutāpahetubhāvato. Tanti tuvaṃ, tuyhanti attho. Yassāti yo assa. Anukampiyoti anukampitabbo. Kocīti yo koci. Dhammesūti sīlādidhammesu. ‘‘Dhamme hī’’ti vā pāṭho, sāsanadhammeti attho. Hīti nipātamattaṃ, vacanavipallāso vā. Tanti anukampitabbapuggalaṃ. Sudesitanti suṭṭhu desitaṃ.
703-4. தே மங் அதிவிரோசந்தீதி தே ரதனத்தயே பஸன்னா தே³வபுத்தா மங் அதிக்கமித்வா விரோசந்தி. பதாபேனாதி தேஜஸா ஆனுபா⁴வேன. அஞ்ஞேதி யே அஞ்ஞே. மயாதி நிஸ்ஸக்கே கரணவசனங். வண்ணேன உத்தரிதரா மஹித்³தி⁴கதரா ச தே³வா, தே ரதனத்தயே அபி⁴ப்பஸன்னாயேவாதி த³ஸ்ஸேதி. ஸேஸங் வுத்தனயமேவ.
703-4.Te maṃ ativirocantīti te ratanattaye pasannā devaputtā maṃ atikkamitvā virocanti. Patāpenāti tejasā ānubhāvena. Aññeti ye aññe. Mayāti nissakke karaṇavacanaṃ. Vaṇṇena uttaritarā mahiddhikatarā ca devā, te ratanattaye abhippasannāyevāti dasseti. Sesaṃ vuttanayameva.
பப⁴ஸ்ஸரவிமானவண்ணனா நிட்டி²தா.
Pabhassaravimānavaṇṇanā niṭṭhitā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / கு²த்³த³கனிகாய • Khuddakanikāya / விமானவத்து²பாளி • Vimānavatthupāḷi / 2. பப⁴ஸ்ஸரவிமானவத்து² • 2. Pabhassaravimānavatthu
