| Library / Tipiṭaka / তিপিটক • Tipiṭaka / ৰিমানৰত্থু-অট্ঠকথা • Vimānavatthu-aṭṭhakathā |
২. পভস্সরৰিমানৰণ্ণনা
2. Pabhassaravimānavaṇṇanā
পভস্সরৰরৰণ্ণনিভেতি পভস্সরৰিমানং। তস্স কা উপ্পত্তি? ভগৰা রাজগহে ৰিহরতি। তেন চ সমযেন রাজগহে অঞ্ঞতরো উপাসকো মহামোগ্গল্লানত্থেরে অভিপ্পসন্নো হোতি। তস্সেকা ধীতা সদ্ধা পসন্না, সাপি থেরে গরুচিত্তীকারবহুলা হোতি। অথেকদিৰসং আযস্মা মহামোগ্গল্লানো রাজগহে পিণ্ডায চরন্তো তং কুলং উপসঙ্কমি। সা থেরং দিস্ৰা সোমনস্সজাতা আসনং পঞ্ঞাপেত্ৰা থেরে তত্থ নিসিন্নে সুমনমালায পূজেত্ৰা মধুরং গুল়ফাণিতং থেরস্স পত্তে আকিরি, থেরো অনুমোদিতুকামো নিসীদি। সা ঘরাৰাসস্স বহুকিচ্চতায অনোকাসতং পৰেদেত্ৰা ‘‘অঞ্ঞস্মিং দিৰসে ধম্মং সোস্সামী’’তি থেরং ৰন্দিত্ৰা উয্যোজেসি। তদহেৰ চ সা কালং কত্ৰা তাৰতিংসেসু নিব্বত্তি। তং আযস্মা মহামোগ্গল্লানো উপসঙ্কমিত্ৰা ইমাহি গাথাহি পুচ্ছি –
Pabhassaravaravaṇṇanibheti pabhassaravimānaṃ. Tassa kā uppatti? Bhagavā rājagahe viharati. Tena ca samayena rājagahe aññataro upāsako mahāmoggallānatthere abhippasanno hoti. Tassekā dhītā saddhā pasannā, sāpi there garucittīkārabahulā hoti. Athekadivasaṃ āyasmā mahāmoggallāno rājagahe piṇḍāya caranto taṃ kulaṃ upasaṅkami. Sā theraṃ disvā somanassajātā āsanaṃ paññāpetvā there tattha nisinne sumanamālāya pūjetvā madhuraṃ guḷaphāṇitaṃ therassa patte ākiri, thero anumoditukāmo nisīdi. Sā gharāvāsassa bahukiccatāya anokāsataṃ pavedetvā ‘‘aññasmiṃ divase dhammaṃ sossāmī’’ti theraṃ vanditvā uyyojesi. Tadaheva ca sā kālaṃ katvā tāvatiṃsesu nibbatti. Taṃ āyasmā mahāmoggallāno upasaṅkamitvā imāhi gāthāhi pucchi –
৬৯৭.
697.
‘‘পভস্সরৰরৰণ্ণনিভে, সুরত্তৰত্থৰসনে।
‘‘Pabhassaravaravaṇṇanibhe, surattavatthavasane;
মহিদ্ধিকে চন্দনরুচিরগত্তে,
Mahiddhike candanaruciragatte,
কা ত্ৰং সুভে দেৰতে ৰন্দসে মমং॥
Kā tvaṃ subhe devate vandase mamaṃ.
৬৯৮.
698.
‘‘পল্লঙ্কো চ তে মহগ্ঘো, নানারতনচিত্তিতো রুচিরো।
‘‘Pallaṅko ca te mahaggho, nānāratanacittito ruciro;
যত্থ ত্ৰং নিসিন্না ৰিরোচসি, দেৰরাজারিৰ নন্দনে ৰনে॥
Yattha tvaṃ nisinnā virocasi, devarājāriva nandane vane.
৬৯৯.
699.
‘‘কিং ত্ৰং পুরে সুচরিতমাচরী ভদ্দে, কিস্স কম্মস্স ৰিপাকং।
‘‘Kiṃ tvaṃ pure sucaritamācarī bhadde, kissa kammassa vipākaṃ;
অনুভোসি দেৰলোকস্মিং, দেৰতে পুচ্ছিতাচিক্খ।
Anubhosi devalokasmiṃ, devate pucchitācikkha;
কিস্স কম্মস্সিদং ফল’’ন্তি॥
Kissa kammassidaṃ phala’’nti.
৬৯৭. তত্থ পভস্সরৰরৰণ্ণনিভেতি নিভাতি দিব্বতীতি নিভা, ৰণ্ণোৰ নিভা ৰণ্ণনিভা, অতিৰিয ওভাসনতো পভস্সরা ছৰিদোসাভাৰেন ৰরা উত্তমা ৰণ্ণনিভা এতিস্সাতি পভস্সরৰরৰণ্ণনিভা। আমন্তনৰসেন ‘‘পভস্সরৰরৰণ্ণনিভে’’তি ৰুত্তং। সুরত্তৰত্থৰসনেতি সুট্ঠু রত্তৰত্থনিৰত্থে। চন্দনরুচিরগত্তেতি চন্দনানুলিত্তং ৰিয রুচিরগত্তে, গোসীতচন্দনেন বহলতরানুলিত্তং ৰিয সুরত্তমনুঞ্ঞসরীরাৰযৰেতি অত্থো, চন্দনানুলেপেন ৰা রুচিরগত্তে।
697. Tattha pabhassaravaravaṇṇanibheti nibhāti dibbatīti nibhā, vaṇṇova nibhā vaṇṇanibhā, ativiya obhāsanato pabhassarā chavidosābhāvena varā uttamā vaṇṇanibhā etissāti pabhassaravaravaṇṇanibhā. Āmantanavasena ‘‘pabhassaravaravaṇṇanibhe’’ti vuttaṃ. Surattavatthavasaneti suṭṭhu rattavatthanivatthe. Candanaruciragatteti candanānulittaṃ viya ruciragatte, gosītacandanena bahalatarānulittaṃ viya surattamanuññasarīrāvayaveti attho, candanānulepena vā ruciragatte.
এৰং থেরেন পুট্ঠা দেৰতা ইমাহি গাথাহি ব্যাকাসি –
Evaṃ therena puṭṭhā devatā imāhi gāthāhi byākāsi –
৭০০.
700.
‘‘পিণ্ডায তে চরন্তস্স, মালং ফাণিতঞ্চ অদদং ভন্তে।
‘‘Piṇḍāya te carantassa, mālaṃ phāṇitañca adadaṃ bhante;
তস্স কম্মস্সিদং ৰিপাকং, অনুভোমি দেৰলোকস্মিং॥
Tassa kammassidaṃ vipākaṃ, anubhomi devalokasmiṃ.
৭০১.
701.
‘‘হোতি চ মে অনুতাপো, অপরদ্ধং দুক্খিতঞ্চ মে ভন্তে।
‘‘Hoti ca me anutāpo, aparaddhaṃ dukkhitañca me bhante;
সাহং ধম্মং নাস্সোসিং, সুদেসিতং ধম্মরাজেন॥
Sāhaṃ dhammaṃ nāssosiṃ, sudesitaṃ dhammarājena.
৭০২.
702.
‘‘তং তং ৰদামি ভদ্দন্তে, যস্স মে অনুকম্পিযো কোচি।
‘‘Taṃ taṃ vadāmi bhaddante, yassa me anukampiyo koci;
ধম্মেসু তং সমাদপেথ, সুদেসিতং ধম্মরাজেন॥
Dhammesu taṃ samādapetha, sudesitaṃ dhammarājena.
৭০৩.
703.
‘‘যেসং অত্থি সদ্ধা বুদ্ধে, ধম্মে চ সঙ্ঘরতনে।
‘‘Yesaṃ atthi saddhā buddhe, dhamme ca saṅgharatane;
তে মং অতিৰিরোচন্তি, আযুনা যসসা সিরিযা॥
Te maṃ ativirocanti, āyunā yasasā siriyā.
৭০৪.
704.
‘‘পতাপেন ৰণ্ণেন উত্তরিতরা, অঞ্ঞে মহিদ্ধিকতরা মযা দেৰা’’তি॥
‘‘Patāpena vaṇṇena uttaritarā, aññe mahiddhikatarā mayā devā’’ti.
৭০০. তত্থ মালন্তি সুমনপুপ্ফং। ফাণিতন্তি উচ্ছুরসং গহেত্ৰা কতফাণিতং।
700. Tattha mālanti sumanapupphaṃ. Phāṇitanti ucchurasaṃ gahetvā kataphāṇitaṃ.
৭০১. অনুতাপোতি ৰিপ্পটিসারো। তস্স কারণমাহ ‘‘অপরদ্ধং দুক্খতঞ্চ মে ভন্তে’’তি । ইদানি তং সরূপতো দস্সেতি ‘‘সাহং ধম্মং নাস্সোসি’’ন্তি, সা অহং তদা তৰ দেসেতুকামস্স ধম্মং ন সুণিং। কীদিসং? সুদেসিতং ধম্মরাজেনাতি, সম্মাসম্বুদ্ধেন আদিকল্যাণাদিতায একন্তনিয্যানিকতায চ স্ৰাখাতন্তি অত্থো।
701.Anutāpoti vippaṭisāro. Tassa kāraṇamāha ‘‘aparaddhaṃ dukkhatañca me bhante’’ti . Idāni taṃ sarūpato dasseti ‘‘sāhaṃ dhammaṃ nāssosi’’nti, sā ahaṃ tadā tava desetukāmassa dhammaṃ na suṇiṃ. Kīdisaṃ? Sudesitaṃ dhammarājenāti, sammāsambuddhena ādikalyāṇāditāya ekantaniyyānikatāya ca svākhātanti attho.
৭০২. তন্তি তস্মা ধম্মরাজেন সুদেসিতত্তা অসৰনস্স চ মাদিসানং অনুতাপহেতুভাৰতো। তন্তি তুৰং, তুয্হন্তি অত্থো। যস্সাতি যো অস্স। অনুকম্পিযোতি অনুকম্পিতব্বো। কোচীতি যো কোচি। ধম্মেসূতি সীলাদিধম্মেসু। ‘‘ধম্মে হী’’তি ৰা পাঠো, সাসনধম্মেতি অত্থো। হীতি নিপাতমত্তং, ৰচনৰিপল্লাসো ৰা। তন্তি অনুকম্পিতব্বপুগ্গলং। সুদেসিতন্তি সুট্ঠু দেসিতং।
702.Tanti tasmā dhammarājena sudesitattā asavanassa ca mādisānaṃ anutāpahetubhāvato. Tanti tuvaṃ, tuyhanti attho. Yassāti yo assa. Anukampiyoti anukampitabbo. Kocīti yo koci. Dhammesūti sīlādidhammesu. ‘‘Dhamme hī’’ti vā pāṭho, sāsanadhammeti attho. Hīti nipātamattaṃ, vacanavipallāso vā. Tanti anukampitabbapuggalaṃ. Sudesitanti suṭṭhu desitaṃ.
৭০৩-৪. তে মং অতিৰিরোচন্তীতি তে রতনত্তযে পসন্না দেৰপুত্তা মং অতিক্কমিত্ৰা ৰিরোচন্তি। পতাপেনাতি তেজসা আনুভাৰেন। অঞ্ঞেতি যে অঞ্ঞে। মযাতি নিস্সক্কে করণৰচনং। ৰণ্ণেন উত্তরিতরা মহিদ্ধিকতরা চ দেৰা, তে রতনত্তযে অভিপ্পসন্নাযেৰাতি দস্সেতি। সেসং ৰুত্তনযমেৰ।
703-4.Te maṃ ativirocantīti te ratanattaye pasannā devaputtā maṃ atikkamitvā virocanti. Patāpenāti tejasā ānubhāvena. Aññeti ye aññe. Mayāti nissakke karaṇavacanaṃ. Vaṇṇena uttaritarā mahiddhikatarā ca devā, te ratanattaye abhippasannāyevāti dasseti. Sesaṃ vuttanayameva.
পভস্সরৰিমানৰণ্ণনা নিট্ঠিতা।
Pabhassaravimānavaṇṇanā niṭṭhitā.
Related texts:
তিপিটক (মূল) • Tipiṭaka (Mūla) / সুত্তপিটক • Suttapiṭaka / খুদ্দকনিকায • Khuddakanikāya / ৰিমানৰত্থুপাল়ি • Vimānavatthupāḷi / ২. পভস্সরৰিমানৰত্থু • 2. Pabhassaravimānavatthu
