Library / Tipiṭaka / ཏིཔིཊཀ • Tipiṭaka / ཨངྒུཏྟརནིཀཱཡ • Aṅguttaranikāya

    ༨. པཙལཱཡམཱནསུཏྟཾ

    8. Pacalāyamānasuttaṃ

    ༦༡. ཨེཝཾ མེ སུཏཾ – ཨེཀཾ སམཡཾ བྷགཝཱ བྷགྒེསུ ཝིཧརཏི སུསུམཱརགིརེ བྷེསཀལཱ༹ཝནེ མིགདཱཡེ། ཏེན ཁོ པན སམཡེན ཨཱཡསྨཱ མཧཱམོགྒལླཱནོ མགདྷེསུ ཀལླཝཱལ༹པུཏྟགཱམེ 1 པཙལཱཡམཱནོ ནིསིནྣོ ཧོཏི། ཨདྡསཱ ཁོ བྷགཝཱ དིབྦེན ཙཀྑུནཱ ཝིསུདྡྷེན ཨཏིཀྐནྟམཱནུསཀེན ཨཱཡསྨནྟཾ མཧཱམོགྒལླཱནཾ མགདྷེསུ ཀལླཝཱལ༹པུཏྟགཱམེ པཙལཱཡམཱནཾ ནིསིནྣཾ། དིསྭཱ – སེཡྻཐཱཔི ནཱམ བལཝཱ པུརིསོ སམིཉྫིཏཾ ཝཱ བཱཧཾ པསཱརེཡྻ, པསཱརིཏཾ ཝཱ བཱཧཾ སམིཉྫེཡྻ, ཨེཝམེཝཾ – བྷགྒེསུ སུསུམཱརགིརེ བྷེསཀལཱ༹ཝནེ མིགདཱཡེ ཨནྟརཧིཏོ མགདྷེསུ ཀལླཝཱལ༹པུཏྟགཱམེ ཨཱཡསྨཏོ མཧཱམོགྒལླཱནསྶ སམྨུཁེ པཱཏུརཧོསི། ནིསཱིདི བྷགཝཱ པཉྙཏྟེ ཨཱསནེ། ནིསཛྫ ཁོ བྷགཝཱ ཨཱཡསྨནྟཾ མཧཱམོགྒལླཱནཾ ཨེཏདཝོཙ –

    61. Evaṃ me sutaṃ – ekaṃ samayaṃ bhagavā bhaggesu viharati susumāragire bhesakaḷāvane migadāye. Tena kho pana samayena āyasmā mahāmoggallāno magadhesu kallavāḷaputtagāme 2 pacalāyamāno nisinno hoti. Addasā kho bhagavā dibbena cakkhunā visuddhena atikkantamānusakena āyasmantaṃ mahāmoggallānaṃ magadhesu kallavāḷaputtagāme pacalāyamānaṃ nisinnaṃ. Disvā – seyyathāpi nāma balavā puriso samiñjitaṃ vā bāhaṃ pasāreyya, pasāritaṃ vā bāhaṃ samiñjeyya, evamevaṃ – bhaggesu susumāragire bhesakaḷāvane migadāye antarahito magadhesu kallavāḷaputtagāme āyasmato mahāmoggallānassa sammukhe pāturahosi. Nisīdi bhagavā paññatte āsane. Nisajja kho bhagavā āyasmantaṃ mahāmoggallānaṃ etadavoca –

    ‘‘པཙལཱཡསི ནོ ཏྭཾ, མོགྒལླཱན, པཙལཱཡསི ནོ ཏྭཾ, མོགྒལླཱནཱ’’ཏི? ‘‘ཨེཝཾ, བྷནྟེ’’ ། ‘‘ཏསྨཱཏིཧ, མོགྒལླཱན, ཡཐཱསཉྙིསྶ ཏེ ཝིཧརཏོ ཏཾ མིདྡྷཾ ཨོཀྐམཏི, ཏཾ སཉྙཾ མཱ མནསཱཀཱསི 3, ཏཾ སཉྙཾ མཱ བཧུལམཀཱསི 4། ཋཱནཾ ཁོ པནེཏཾ, མོགྒལླཱན, ཝིཛྫཏི ཡཾ ཏེ ཨེཝཾ ཝིཧརཏོ ཏཾ མིདྡྷཾ པཧཱིཡེཐ’’།

    ‘‘Pacalāyasi no tvaṃ, moggallāna, pacalāyasi no tvaṃ, moggallānā’’ti? ‘‘Evaṃ, bhante’’ . ‘‘Tasmātiha, moggallāna, yathāsaññissa te viharato taṃ middhaṃ okkamati, taṃ saññaṃ mā manasākāsi 5, taṃ saññaṃ mā bahulamakāsi 6. Ṭhānaṃ kho panetaṃ, moggallāna, vijjati yaṃ te evaṃ viharato taṃ middhaṃ pahīyetha’’.

    ‘‘ནོ ཙེ ཏེ ཨེཝཾ ཝིཧརཏོ ཏཾ མིདྡྷཾ པཧཱིཡེཐ, ཏཏོ ཏྭཾ, མོགྒལླཱན, ཡཐཱསུཏཾ ཡཐཱཔརིཡཏྟཾ དྷམྨཾ ཙེཏསཱ ཨནུཝིཏཀྐེཡྻཱསི ཨནུཝིཙཱརེཡྻཱསི, མནསཱ ཨནུཔེཀྑེཡྻཱསི། ཋཱནཾ ཁོ པནེཏཾ ཝིཛྫཏི ཡཾ ཏེ ཨེཝཾ ཝིཧརཏོ ཏཾ མིདྡྷཾ པཧཱིཡེཐ།

    ‘‘No ce te evaṃ viharato taṃ middhaṃ pahīyetha, tato tvaṃ, moggallāna, yathāsutaṃ yathāpariyattaṃ dhammaṃ cetasā anuvitakkeyyāsi anuvicāreyyāsi, manasā anupekkheyyāsi. Ṭhānaṃ kho panetaṃ vijjati yaṃ te evaṃ viharato taṃ middhaṃ pahīyetha.

    ‘‘ནོ ཙེ ཏེ ཨེཝཾ ཝིཧརཏོ ཏཾ མིདྡྷཾ པཧཱིཡེཐ, ཏཏོ ཏྭཾ, མོགྒལླཱན, ཡཐཱསུཏཾ ཡཐཱཔརིཡཏྟཾ དྷམྨཾ ཝིཏྠཱརེན སཛ྄ཛྷཱཡཾ ཀརེཡྻཱསི། ཋཱནཾ ཁོ པནེཏཾ ཝིཛྫཏི ཡཾ ཏེ ཨེཝཾ ཝིཧརཏོ ཏཾ མིདྡྷཾ པཧཱིཡེཐ།

    ‘‘No ce te evaṃ viharato taṃ middhaṃ pahīyetha, tato tvaṃ, moggallāna, yathāsutaṃ yathāpariyattaṃ dhammaṃ vitthārena sajjhāyaṃ kareyyāsi. Ṭhānaṃ kho panetaṃ vijjati yaṃ te evaṃ viharato taṃ middhaṃ pahīyetha.

    ‘‘ནོ ཙེ ཏེ ཨེཝཾ ཝིཧརཏོ ཏཾ མིདྡྷཾ པཧཱིཡེཐ, ཏཏོ ཏྭཾ, མོགྒལླཱན, ཨུབྷོ ཀཎྞསོཏཱནི ཨཱཝིཉྪེཡྻཱསི 7, པཱཎིནཱ གཏྟཱནི ཨནུམཛྫེཡྻཱསི། ཋཱནཾ ཁོ པནེཏཾ ཝིཛྫཏི ཡཾ ཏེ ཨེཝཾ ཝིཧརཏོ ཏཾ མིདྡྷཾ པཧཱིཡེཐ།

    ‘‘No ce te evaṃ viharato taṃ middhaṃ pahīyetha, tato tvaṃ, moggallāna, ubho kaṇṇasotāni āviñcheyyāsi 8, pāṇinā gattāni anumajjeyyāsi. Ṭhānaṃ kho panetaṃ vijjati yaṃ te evaṃ viharato taṃ middhaṃ pahīyetha.

    ‘‘ནོ ཙེ ཏེ ཨེཝཾ ཝིཧརཏོ ཏཾ མིདྡྷཾ པཧཱིཡེཐ, ཏཏོ ཏྭཾ, མོགྒལླཱན, ཨུཊྛཱཡཱསནཱ ཨུདཀེན ཨཀྑཱིནི ཨནུམཛྫིཏྭཱ 9 དིསཱ ཨནུཝིལོཀེཡྻཱསི , ནཀྑཏྟཱནི ཏཱརཀརཱུཔཱནི ཨུལློཀེཡྻཱསི། ཋཱནཾ ཁོ པནེཏཾ ཝིཛྫཏི ཡཾ ཏེ ཨེཝཾ ཝིཧརཏོ ཏཾ མིདྡྷཾ པཧཱིཡེཐ།

    ‘‘No ce te evaṃ viharato taṃ middhaṃ pahīyetha, tato tvaṃ, moggallāna, uṭṭhāyāsanā udakena akkhīni anumajjitvā 10 disā anuvilokeyyāsi , nakkhattāni tārakarūpāni ullokeyyāsi. Ṭhānaṃ kho panetaṃ vijjati yaṃ te evaṃ viharato taṃ middhaṃ pahīyetha.

    ‘‘ནོ ཙེ ཏེ ཨེཝཾ ཝིཧརཏོ ཏཾ མིདྡྷཾ པཧཱིཡེཐ, ཏཏོ ཏྭཾ, མོགྒལླཱན, ཨཱལོཀསཉྙཾ མནསི ཀརེཡྻཱསི, དིཝཱསཉྙཾ ཨདྷིཊྛཧེཡྻཱསི – ཡཐཱ དིཝཱ ཏཐཱ རཏྟིཾ ཡཐཱ རཏྟིཾ ཏཐཱ དིཝཱ། ཨིཏི ཝིཝཊེན 11 ཙེཏསཱ ཨཔརིཡོནདྡྷེན སཔྤབྷཱསཾ ཙིཏྟཾ བྷཱཝེཡྻཱསི། ཋཱནཾ ཁོ པནེཏཾ ཝིཛྫཏི ཡཾ ཏེ ཨེཝཾ ཝིཧརཏོ ཏཾ མིདྡྷཾ པཧཱིཡེཐ།

    ‘‘No ce te evaṃ viharato taṃ middhaṃ pahīyetha, tato tvaṃ, moggallāna, ālokasaññaṃ manasi kareyyāsi, divāsaññaṃ adhiṭṭhaheyyāsi – yathā divā tathā rattiṃ yathā rattiṃ tathā divā. Iti vivaṭena 12 cetasā apariyonaddhena sappabhāsaṃ cittaṃ bhāveyyāsi. Ṭhānaṃ kho panetaṃ vijjati yaṃ te evaṃ viharato taṃ middhaṃ pahīyetha.

    ‘‘ནོ ཙེ ཏེ ཨེཝཾ ཝིཧརཏོ ཏཾ མིདྡྷཾ པཧཱིཡེཐ, ཏཏོ ཏྭཾ, མོགྒལླཱན, པཙྪཱཔུརེསཉྙཱི 13 ཙངྐམཾ ཨདྷིཊྛཧེཡྻཱསི ཨནྟོགཏེཧི ཨིནྡྲིཡེཧི ཨབཧིགཏེན མཱནསེན། ཋཱནཾ ཁོ པནེཏཾ ཝིཛྫཏི ཡཾ ཏེ ཨེཝཾ ཝིཧརཏོ ཏཾ མིདྡྷཾ པཧཱིཡེཐ།

    ‘‘No ce te evaṃ viharato taṃ middhaṃ pahīyetha, tato tvaṃ, moggallāna, pacchāpuresaññī 14 caṅkamaṃ adhiṭṭhaheyyāsi antogatehi indriyehi abahigatena mānasena. Ṭhānaṃ kho panetaṃ vijjati yaṃ te evaṃ viharato taṃ middhaṃ pahīyetha.

    ‘‘ནོ ཙེ ཏེ ཨེཝཾ ཝིཧརཏོ ཏཾ མིདྡྷཾ པཧཱིཡེཐ, ཏཏོ ཏྭཾ, མོགྒལླཱན, དཀྑིཎེན པསྶེན སཱིཧསེཡྻཾ ཀཔྤེཡྻཱསི པཱདེ པཱདཾ ཨཙྩཱདྷཱཡ སཏོ སམྤཛཱནོ ཨུཊྛཱནསཉྙཾ མནསི ཀརིཏྭཱ། པཊིབུདྡྷེན ཙ 15 ཏེ, མོགྒལླཱན, ཁིཔྤཉྙེཝ པཙྩུཊྛཱཏབྦཾ – ‘ན སེཡྻསུཁཾ ན པསྶསུཁཾ ན མིདྡྷསུཁཾ ཨནུཡུཏྟོ ཝིཧརིསྶཱམཱི’ཏི། ཨེཝཉྷི ཏེ, མོགྒལླཱན, སིཀྑིཏབྦཾ།

    ‘‘No ce te evaṃ viharato taṃ middhaṃ pahīyetha, tato tvaṃ, moggallāna, dakkhiṇena passena sīhaseyyaṃ kappeyyāsi pāde pādaṃ accādhāya sato sampajāno uṭṭhānasaññaṃ manasi karitvā. Paṭibuddhena ca 16 te, moggallāna, khippaññeva paccuṭṭhātabbaṃ – ‘na seyyasukhaṃ na passasukhaṃ na middhasukhaṃ anuyutto viharissāmī’ti. Evañhi te, moggallāna, sikkhitabbaṃ.

    ‘‘ཏསྨཱཏིཧ, མོགྒལླཱན, ཨེཝཾ སིཀྑིཏབྦཾ – ‘ན ཨུཙྩཱསོཎྜཾ པགྒཧེཏྭཱ ཀུལཱནི ཨུཔསངྐམིསྶཱམཱི’ཏི། ཨེཝཉྷི ཏེ, མོགྒལླཱན, སིཀྑིཏབྦཾ། སཙེ, མོགྒལླཱན, བྷིཀྑུ ཨུཙྩཱསོཎྜཾ པགྒཧེཏྭཱ ཀུལཱནི ཨུཔསངྐམཏི, སནྟི ཧི, མོགྒལླཱན, ཀུལེསུ ཀིཙྩཀརཎཱིཡཱནི། ཡེཧི མནུསྶཱ ཨཱགཏཾ བྷིཀྑུཾ ན མནསི ཀརོནྟི, ཏཏྲ བྷིཀྑུསྶ ཨེཝཾ ཧོཏི – ‘ཀོསུ ནཱམ ཨིདཱནི མཾ ཨིམསྨིཾ ཀུལེ པརིབྷིནྡི, ཝིརཏྟརཱུཔཱ དཱནིམེ མཡི མནུསྶཱ’ཏི། ཨིཏིསྶ ཨལཱབྷེན མངྐུབྷཱཝོ, མངྐུབྷཱུཏསྶ ཨུདྡྷཙྩཾ, ཨུདྡྷཏསྶ ཨསཾཝརོ, ཨསཾཝུཏསྶ ཨཱརཱ ཙིཏྟཾ སམཱདྷིམྷཱ།

    ‘‘Tasmātiha, moggallāna, evaṃ sikkhitabbaṃ – ‘na uccāsoṇḍaṃ paggahetvā kulāni upasaṅkamissāmī’ti. Evañhi te, moggallāna, sikkhitabbaṃ. Sace, moggallāna, bhikkhu uccāsoṇḍaṃ paggahetvā kulāni upasaṅkamati, santi hi, moggallāna, kulesu kiccakaraṇīyāni. Yehi manussā āgataṃ bhikkhuṃ na manasi karonti, tatra bhikkhussa evaṃ hoti – ‘kosu nāma idāni maṃ imasmiṃ kule paribhindi, virattarūpā dānime mayi manussā’ti. Itissa alābhena maṅkubhāvo, maṅkubhūtassa uddhaccaṃ, uddhatassa asaṃvaro, asaṃvutassa ārā cittaṃ samādhimhā.

    ‘‘ཏསྨཱཏིཧ, མོགྒལླཱན, ཨེཝཾ སིཀྑིཏབྦཾ – ‘ན ཝིགྒཱཧིཀཀཐཾ ཀཐེསྶཱམཱི’ཏི། ཨེཝཉྷི ཏེ, མོགྒལླཱན, སིཀྑིཏབྦཾ། ཝིགྒཱཧིཀཱཡ, མོགྒལླཱན, ཀཐཱཡ སཏི ཀཐཱབཱཧུལླཾ པཱཊིཀངྑཾ, ཀཐཱབཱཧུལླེ སཏི ཨུདྡྷཙྩཾ, ཨུདྡྷཏསྶ ཨསཾཝརོ, ཨསཾཝུཏསྶ ཨཱརཱ ཙིཏྟཾ སམཱདྷིམྷཱ 17། ནཱཧཾ, མོགྒལླཱན, སབྦེཧེཝ སཾསགྒཾ ཝཎྞཡཱམི། ན པནཱཧཾ , མོགྒལླཱན, སབྦེཧེཝ སཾསགྒཾ ན ཝཎྞཡཱམི། སགཧཊྛཔབྦཛིཏེཧི ཁོ ཨཧཾ, མོགྒལླཱན, སཾསགྒཾ ན ཝཎྞཡཱམི 18། ཡཱནི ཙ ཁོ ཏཱནི སེནཱསནཱནི ཨཔྤསདྡཱནི ཨཔྤནིགྒྷོསཱནི ཝིཛནཝཱཏཱནི མནུསྶརཱཧསྶེཡྻཀཱནི 19 པཊིསལླཱནསཱརུཔྤཱནི ཏཐཱརཱུཔེཧི སེནཱསནེཧི སཾསགྒཾ 20 ཝཎྞཡཱམཱི’’ཏི།

    ‘‘Tasmātiha, moggallāna, evaṃ sikkhitabbaṃ – ‘na viggāhikakathaṃ kathessāmī’ti. Evañhi te, moggallāna, sikkhitabbaṃ. Viggāhikāya, moggallāna, kathāya sati kathābāhullaṃ pāṭikaṅkhaṃ, kathābāhulle sati uddhaccaṃ, uddhatassa asaṃvaro, asaṃvutassa ārā cittaṃ samādhimhā 21. Nāhaṃ, moggallāna, sabbeheva saṃsaggaṃ vaṇṇayāmi. Na panāhaṃ , moggallāna, sabbeheva saṃsaggaṃ na vaṇṇayāmi. Sagahaṭṭhapabbajitehi kho ahaṃ, moggallāna, saṃsaggaṃ na vaṇṇayāmi 22. Yāni ca kho tāni senāsanāni appasaddāni appanigghosāni vijanavātāni manussarāhasseyyakāni 23 paṭisallānasāruppāni tathārūpehi senāsanehi saṃsaggaṃ 24 vaṇṇayāmī’’ti.

    ཨེཝཾ ཝུཏྟེ ཨཱཡསྨཱ མཧཱམོགྒལླཱནོ བྷགཝནྟཾ ཨེཏདཝོཙ – ‘‘ཀིཏྟཱཝཏཱ ནུ ཁོ, བྷནྟེ, བྷིཀྑུ སཾཁིཏྟེན ཏཎྷཱསངྑཡཝིམུཏྟོ ཧོཏི ཨཙྩནྟནིཊྛོ ཨཙྩནྟཡོགཀྑེམཱི ཨཙྩནྟབྲཧྨཙཱརཱི ཨཙྩནྟཔརིཡོསཱནོ སེཊྛོ དེཝམནུསྶཱན’’ནྟི?

    Evaṃ vutte āyasmā mahāmoggallāno bhagavantaṃ etadavoca – ‘‘kittāvatā nu kho, bhante, bhikkhu saṃkhittena taṇhāsaṅkhayavimutto hoti accantaniṭṭho accantayogakkhemī accantabrahmacārī accantapariyosāno seṭṭho devamanussāna’’nti?

    ‘‘ཨིདྷ, མོགྒལླཱན, བྷིཀྑུནོ སུཏཾ ཧོཏི – ‘སབྦེ དྷམྨཱ ནཱལཾ ཨབྷིནིཝེསཱཡཱ’ཏི; ཨེཝཉྩེཏཾ, མོགྒལླཱན, བྷིཀྑུནོ སུཏཾ ཧོཏི – ‘སབྦེ དྷམྨཱ ནཱལཾ ཨབྷིནིཝེསཱཡཱ’ཏི། སོ སབྦཾ དྷམྨཾ ཨབྷིཛཱནཱཏི, སབྦཾ དྷམྨཾ ཨབྷིཉྙཱཡ སབྦཾ དྷམྨཾ པརིཛཱནཱཏི། སབྦཾ དྷམྨཾ པརིཉྙཱཡ ཡཾཀིཉྩི ཝེདནཾ ཝེདིཡཏི སུཁཾ ཝཱ དུཀྑཾ ཝཱ ཨདུཀྑམསུཁཾ ཝཱ། སོ ཏཱསུ ཝེདནཱསུ ཨནིཙྩཱནུཔསྶཱི ཝིཧརཏི, ཝིརཱགཱནུཔསྶཱི ཝིཧརཏི, ནིརོདྷཱནུཔསྶཱི ཝིཧརཏི, པཊིནིསྶགྒཱནུཔསྶཱི ཝིཧརཏི། སོ ཏཱསུ ཝེདནཱསུ ཨནིཙྩཱནུཔསྶཱི ཝིཧརནྟོ ཝིརཱགཱནུཔསྶཱི ཝིཧརནྟོ ནིརོདྷཱནུཔསྶཱི ཝིཧརནྟོ པཊིནིསྶགྒཱནུཔསྶཱི ཝིཧརནྟོ ན ཀིཉྩི 25 ལོཀེ ཨུཔཱདིཡཏི, ཨནུཔཱདིཡཾ ན པརིཏསྶཏི, ཨཔརིཏསྶཾ པཙྩཏྟཾཡེཝ པརིནིབྦཱཡཏི། ‘ཁཱིཎཱ ཛཱཏི, ཝུསིཏཾ བྲཧྨཙརིཡཾ, ཀཏཾ ཀརཎཱིཡཾ, ནཱཔརཾ ཨིཏྠཏྟཱཡཱ’ཏི པཛཱནཱཏི། ཨེཏྟཱཝཏཱ ཁོ, མོགྒལླཱན, བྷིཀྑུ སཾཁིཏྟེན ཏཎྷཱསངྑཡཝིམུཏྟོ ཧོཏི ཨཙྩནྟནིཊྛོ ཨཙྩནྟཡོགཀྑེམཱི ཨཙྩནྟབྲཧྨཙཱརཱི ཨཙྩནྟཔརིཡོསཱནོ སེཊྛོ དེཝམནུསྶཱན’’ནྟི། ཨཊྛམཾ།

    ‘‘Idha, moggallāna, bhikkhuno sutaṃ hoti – ‘sabbe dhammā nālaṃ abhinivesāyā’ti; evañcetaṃ, moggallāna, bhikkhuno sutaṃ hoti – ‘sabbe dhammā nālaṃ abhinivesāyā’ti. So sabbaṃ dhammaṃ abhijānāti, sabbaṃ dhammaṃ abhiññāya sabbaṃ dhammaṃ parijānāti. Sabbaṃ dhammaṃ pariññāya yaṃkiñci vedanaṃ vediyati sukhaṃ vā dukkhaṃ vā adukkhamasukhaṃ vā. So tāsu vedanāsu aniccānupassī viharati, virāgānupassī viharati, nirodhānupassī viharati, paṭinissaggānupassī viharati. So tāsu vedanāsu aniccānupassī viharanto virāgānupassī viharanto nirodhānupassī viharanto paṭinissaggānupassī viharanto na kiñci 26 loke upādiyati, anupādiyaṃ na paritassati, aparitassaṃ paccattaṃyeva parinibbāyati. ‘Khīṇā jāti, vusitaṃ brahmacariyaṃ, kataṃ karaṇīyaṃ, nāparaṃ itthattāyā’ti pajānāti. Ettāvatā kho, moggallāna, bhikkhu saṃkhittena taṇhāsaṅkhayavimutto hoti accantaniṭṭho accantayogakkhemī accantabrahmacārī accantapariyosāno seṭṭho devamanussāna’’nti. Aṭṭhamaṃ.




    Next: ༩. མེཏྟསུཏྟཾ • 9. Mettasuttaṃ




    Footnotes:
    1. ཀལླཝཱལམུཏྟགཱམེ (སྱཱ॰)
    2. kallavālamuttagāme (syā.)
    3. མཱ མནསིཀཱསི (སཱི॰), མནསི ཀརེཡྻཱསི (སྱཱ॰), མནསཱཀཱསི (ཀ॰)
    4. ཏཾ སཉྙཾ བཧུལཾ ཀརེཡྻཱསི (སྱཱ॰), ཏཾ སཉྙཾ བཧུལམཀཱསི (ཀ॰)
    5. mā manasikāsi (sī.), manasi kareyyāsi (syā.), manasākāsi (ka.)
    6. taṃ saññaṃ bahulaṃ kareyyāsi (syā.), taṃ saññaṃ bahulamakāsi (ka.)
    7. ཨཱཝིཉྫེཡྻཱསི (སཱི॰ སྱཱ॰)
    8. āviñjeyyāsi (sī. syā.)
    9. པནིཉྫིཏྭཱ (ཀ॰)
    10. paniñjitvā (ka.)
    11. ཝིཝཊྚེན (སྱཱ॰), མིདྡྷཝིགཏེན (ཀ॰)
    12. vivaṭṭena (syā.), middhavigatena (ka.)
    13. པཙྪཱཔུརེ ཏཐཱསཉྙཱི (ཀཏྠཙི)
    14. pacchāpure tathāsaññī (katthaci)
    15. པཊིབུདྡྷེནེཝ (སྱཱ॰)
    16. paṭibuddheneva (syā.)
    17. ནཱཧཾ མོགྒལཱན སབྦེཧེཝ སམགྒཾ ཝཎྞཡཱམི གཧཊྛེཧི། པབྦཛིཏེཧི ཁོ ཨཧཾ མོགྒལླཱན སམགྒཾ ཝཎྞཡཱམི (ཀ॰)
    18. ནཱཧཾ མོགྒལླཱན སབྦེཧེཝ སམགྒཾ ཝཎྞཡཱམི གཧཊྛེཧི, པབྦཛིཏེཧི ཁོ ཨཧཾ མོགྒལླཱན སམགྒཾ ཝཎྞཡཱམི (ཀ॰)
    19. མནུསྶརཱཧསེཡྻཀཱནི (སཱི॰ སྱཱ॰)
    20. སམགྒཾ (ཀ॰)
    21. nāhaṃ moggalāna sabbeheva samaggaṃ vaṇṇayāmi gahaṭṭhehi. pabbajitehi kho ahaṃ moggallāna samaggaṃ vaṇṇayāmi (ka.)
    22. nāhaṃ moggallāna sabbeheva samaggaṃ vaṇṇayāmi gahaṭṭhehi, pabbajitehi kho ahaṃ moggallāna samaggaṃ vaṇṇayāmi (ka.)
    23. manussarāhaseyyakāni (sī. syā.)
    24. samaggaṃ (ka.)
    25. ན ཙ ཀིཉྩི (སཱི॰ སྱཱ॰ ཀ॰) མ॰ ནི॰ ༡.༣༩༠ པསྶིཏབྦཾ
    26. na ca kiñci (sī. syā. ka.) ma. ni. 1.390 passitabbaṃ



    Related texts:



    ཨཊྛཀཐཱ • Aṭṭhakathā / སུཏྟཔིཊཀ (ཨཊྛཀཐཱ) • Suttapiṭaka (aṭṭhakathā) / ཨངྒུཏྟརནིཀཱཡ (ཨཊྛཀཐཱ) • Aṅguttaranikāya (aṭṭhakathā) / ༨. པཙལཱཡམཱནསུཏྟཝཎྞནཱ • 8. Pacalāyamānasuttavaṇṇanā

    ཊཱིཀཱ • Tīkā / སུཏྟཔིཊཀ (ཊཱིཀཱ) • Suttapiṭaka (ṭīkā) / ཨངྒུཏྟརནིཀཱཡ (ཊཱིཀཱ) • Aṅguttaranikāya (ṭīkā) / ༨. པཙལཱཡམཱནསུཏྟཝཎྞནཱ • 8. Pacalāyamānasuttavaṇṇanā


    © 1991-2023 The Titi Tudorancea Bulletin | Titi Tudorancea® is a Registered Trademark | Terms of use and privacy policy
    Contact