| Library / Tipiṭaka / திபிடக • Tipiṭaka / அங்கு³த்தரனிகாய (அட்ட²கதா²) • Aṅguttaranikāya (aṭṭhakathā) |
8. பசலாயமானஸுத்தவண்ணனா
8. Pacalāyamānasuttavaṇṇanā
61. அட்ட²மே பசலாயமானோதி தங் கா³மங் உபனிஸ்ஸாய ஏகஸ்மிங் வனஸண்டே³ ஸமணத⁴ம்மங் கரொந்தோ ஸத்தாஹங் சங்கமனவீரியேன நிம்மதி²தத்தா கிலந்தக³த்தோ சங்கமனகோடியங் பசலாயமானோ நிஸின்னோ ஹோதி. பசலாயஸி நோதி நித்³தா³யஸி நு. அனுமஜ்ஜித்வாதி பரிமஜ்ஜித்வா. ஆலோகஸஞ்ஞந்தி மித்³த⁴வினோத³னஆலோகஸஞ்ஞங். தி³வாஸஞ்ஞந்தி தி³வாதிஸஞ்ஞங். யதா² தி³வா ததா² ரத்திந்தி யதா² தி³வா ஆலோகஸஞ்ஞா அதி⁴ட்டி²தா, ததா² நங் ரத்திம்பி அதி⁴ட்ட²ஹெய்யாஸி. யதா² ரத்திங் ததா² தி³வாதி யதா² ச தே ரத்திங் ஆலோகஸஞ்ஞா அதி⁴ட்டி²தா, ததா² நங் தி³வாபி அதி⁴ட்ட²ஹெய்யாஸி. ஸப்பபா⁴ஸந்தி தி³ப்³ப³சக்கு²ஞாணத்தா²ய ஸஹோபா⁴ஸங். பச்சா²புரேஸஞ்ஞீதி புரதோ ச பச்ச²தோ ச அபி⁴ஹரணஸஞ்ஞாய ஸஞ்ஞாவா. அந்தோக³தேஹி இந்த்³ரியேஹீதி ப³ஹி அவிக்கி²த்தேஹி அந்தோ அனுபவிட்டே²ஹேவ பஞ்சஹி இந்த்³ரியேஹி. மித்³த⁴ஸுக²ந்தி நித்³தா³ஸுக²ங். எத்தகேன டா²னேன ப⁴க³வா தே²ரஸ்ஸ மித்³த⁴வினோத³னகம்மட்டா²னங் கதே²ஸி. ஸொண்ட³ந்தி மானஸொண்ட³ங். கிச்சகரணீயானீதி எத்த² அவஸ்ஸங் கத்தப்³பா³னி கிச்சானி, இதரானி கரணீயானி. மங்குபா⁴வோதி நித்தேஜதா தோ³மனஸ்ஸதா. எத்தகேன டா²னேன ஸத்தா²ரா தே²ரஸ்ஸ பி⁴க்கா²சாரவத்தங் கதி²தங்.
61. Aṭṭhame pacalāyamānoti taṃ gāmaṃ upanissāya ekasmiṃ vanasaṇḍe samaṇadhammaṃ karonto sattāhaṃ caṅkamanavīriyena nimmathitattā kilantagatto caṅkamanakoṭiyaṃ pacalāyamāno nisinno hoti. Pacalāyasi noti niddāyasi nu. Anumajjitvāti parimajjitvā. Ālokasaññanti middhavinodanaālokasaññaṃ. Divāsaññanti divātisaññaṃ. Yathā divā tathā rattinti yathā divā ālokasaññā adhiṭṭhitā, tathā naṃ rattimpi adhiṭṭhaheyyāsi. Yathā rattiṃ tathā divāti yathā ca te rattiṃ ālokasaññā adhiṭṭhitā, tathā naṃ divāpi adhiṭṭhaheyyāsi. Sappabhāsanti dibbacakkhuñāṇatthāya sahobhāsaṃ. Pacchāpuresaññīti purato ca pacchato ca abhiharaṇasaññāya saññāvā. Antogatehi indriyehīti bahi avikkhittehi anto anupaviṭṭheheva pañcahi indriyehi. Middhasukhanti niddāsukhaṃ. Ettakena ṭhānena bhagavā therassa middhavinodanakammaṭṭhānaṃ kathesi. Soṇḍanti mānasoṇḍaṃ. Kiccakaraṇīyānīti ettha avassaṃ kattabbāni kiccāni, itarāni karaṇīyāni. Maṅkubhāvoti nittejatā domanassatā. Ettakena ṭhānena satthārā therassa bhikkhācāravattaṃ kathitaṃ.
இதா³னி ப⁴ஸ்ஸே பரியந்தகாரிதாய ஸமாத³பேதுங் தஸ்மாதிஹாதிஆதி³மாஹ. தத்த² விக்³கா³ஹிககத²ந்தி ‘‘ந த்வங் இமங் த⁴ம்மவினயங் ஆஜானாஸீ’’திஆதி³னயப்பவத்தா விக்³கா³ஹிககதா². நாஹங் மொக்³க³ல்லானாதிஆதி³ பாபமித்தஸங்ஸக்³க³விவஜ்ஜனத்த²ங் வுத்தங். கித்தாவதா நு கோ²தி கித்தகேன நு கோ². தண்ஹாஸங்க²யவிமுத்தோ ஹோதீதி தண்ஹாஸங்க²யே நிப்³பா³னே தங் ஆரம்மணங் கத்வா விமுத்தசித்ததாய தண்ஹாஸங்க²யவிமுத்தோ நாம ஸங்கி²த்தேன கித்தாவதா ஹோதி. யாய படிபத்தியா தண்ஹாஸங்க²யவிமுத்தோ ஹோதி, தமேவ கீ²ணாஸவஸ்ஸ பி⁴க்கு²னோ புப்³ப³பா⁴க³படிபத³ங் ஸங்கி²த்தேன தே³ஸேதா²தி புச்ச²தி. அச்சந்தனிட்டோ²தி க²யவயஸங்கா²தங் அந்தங் அதீதாதி அச்சந்தா, அச்சந்தா நிட்டா² அஸ்ஸாதி அச்சந்தனிட்டோ², ஏகந்தனிட்டோ² ஸததனிட்டோ²தி அத்தோ². அச்சந்தயோக³க்கே²மீதி அச்சந்தங் யோக³க்கே²மீ, நிச்சயோக³க்கே²மீதி அத்தோ². அச்சந்தப்³ரஹ்மசாரீதி அச்சந்தங் ப்³ரஹ்மசாரீ, நிச்சப்³ரஹ்மசாரீதி அத்தோ². அச்சந்தங் பரியோஸானமஸ்ஸாதி புரிமனயேனேவ அச்சந்தபரியோஸானோ. ஸெட்டோ² தே³வமனுஸ்ஸானந்தி தே³வானஞ்ச மனுஸ்ஸானஞ்ச ஸெட்டோ² உத்தமோ. ஏவரூபோ பி⁴க்கு² கித்தாவதா ஹோதி, ஸங்கே²பேனேவ தஸ்ஸ படிபத்திங் கதே²தா²தி யாசதி.
Idāni bhasse pariyantakāritāya samādapetuṃ tasmātihātiādimāha. Tattha viggāhikakathanti ‘‘na tvaṃ imaṃ dhammavinayaṃ ājānāsī’’tiādinayappavattā viggāhikakathā. Nāhaṃ moggallānātiādi pāpamittasaṃsaggavivajjanatthaṃ vuttaṃ. Kittāvatā nu khoti kittakena nu kho. Taṇhāsaṅkhayavimutto hotīti taṇhāsaṅkhaye nibbāne taṃ ārammaṇaṃ katvā vimuttacittatāya taṇhāsaṅkhayavimutto nāma saṃkhittena kittāvatā hoti. Yāya paṭipattiyā taṇhāsaṅkhayavimutto hoti, tameva khīṇāsavassa bhikkhuno pubbabhāgapaṭipadaṃ saṃkhittena desethāti pucchati. Accantaniṭṭhoti khayavayasaṅkhātaṃ antaṃ atītāti accantā, accantā niṭṭhā assāti accantaniṭṭho, ekantaniṭṭho satataniṭṭhoti attho. Accantayogakkhemīti accantaṃ yogakkhemī, niccayogakkhemīti attho. Accantabrahmacārīti accantaṃ brahmacārī, niccabrahmacārīti attho. Accantaṃ pariyosānamassāti purimanayeneva accantapariyosāno. Seṭṭho devamanussānanti devānañca manussānañca seṭṭho uttamo. Evarūpo bhikkhu kittāvatā hoti, saṅkhepeneva tassa paṭipattiṃ kathethāti yācati.
ஸப்³பே³ த⁴ம்மா நாலங் அபி⁴னிவேஸாயாதி எத்த² ஸப்³பே³ த⁴ம்மா நாம பஞ்சக்க²ந்தா⁴ த்³வாத³ஸாயதனானி அட்டா²ரஸ தா⁴துயோ, தே ஸப்³பே³பி தண்ஹாதி³ட்டி²வஸேன அபி⁴னிவேஸாய நாலங் ந பரியத்தா ந ஸமத்தா ந யுத்தா. கஸ்மா? க³ஹிதாகாரேன அதிட்ட²னதோ. தே ஹி நிச்சா ஸுகா² அத்தாதி க³ஹிதாபி அனிச்சா து³க்கா² அனத்தாவ ஸம்பஜ்ஜந்தி. தஸ்மா நாலங் அபி⁴னிவேஸாய. அபி⁴ஜானாதீதி அனிச்சங் து³க்க²ங் அனத்தாதி ஞாதபரிஞ்ஞாய அபி⁴ஜானாதி. பரிஜானாதீதி ததே²வ தீரணபரிஞ்ஞாய பரிஜானாதி. யங்கிஞ்சி வேத³னந்தி அந்தமஸோ பஞ்சவிஞ்ஞாணஸம்பயுத்தங் யங்கிஞ்சி அப்பமத்தகம்பி வேத³னங் அனுப⁴வதி. இமினா ப⁴க³வா தே²ரஸ்ஸ வேத³னாவஸேன ச வினிவட்டெத்வா அரூபபரிக்³க³ஹங் த³ஸ்ஸேஸி.
Sabbe dhammā nālaṃ abhinivesāyāti ettha sabbe dhammā nāma pañcakkhandhā dvādasāyatanāni aṭṭhārasa dhātuyo, te sabbepi taṇhādiṭṭhivasena abhinivesāya nālaṃ na pariyattā na samattā na yuttā. Kasmā? Gahitākārena atiṭṭhanato. Te hi niccā sukhā attāti gahitāpi aniccā dukkhā anattāva sampajjanti. Tasmā nālaṃ abhinivesāya. Abhijānātīti aniccaṃ dukkhaṃ anattāti ñātapariññāya abhijānāti. Parijānātīti tatheva tīraṇapariññāya parijānāti. Yaṃkiñci vedananti antamaso pañcaviññāṇasampayuttaṃ yaṃkiñci appamattakampi vedanaṃ anubhavati. Iminā bhagavā therassa vedanāvasena ca vinivaṭṭetvā arūpapariggahaṃ dassesi.
அனிச்சானுபஸ்ஸீதி அனிச்சதோ அனுபஸ்ஸந்தோ. விராகா³னுபஸ்ஸீதி எத்த² த்³வே விராகா³ க²யவிராகோ³ ச அச்சந்தவிராகோ³ ச. தத்த² ஸங்கா²ரானங் க²யங் க²யதோ பஸ்ஸனா விபஸ்ஸனாபி, அச்சந்தவிராக³ங் நிப்³பா³னங் விராக³தோ த³ஸ்ஸனமக்³க³ஞாணம்பி விராகா³னுபஸ்ஸனா. தது³ப⁴யஸமங்கி³புக்³க³லோ விராகா³னுபஸ்ஸீ நாம. தங் ஸந்தா⁴ய வுத்தங் – ‘‘விராகா³னுபஸ்ஸீ’’தி, விராக³தோ அனுபஸ்ஸந்தோதி அத்தோ². நிரோதா⁴னுபஸ்ஸிம்ஹிபி ஏஸேவ நயோ. நிரோதோ⁴பி ஹி க²யனிரோதோ⁴ அச்சந்தனிரோதோ⁴தி து³விதோ⁴யேவ. படினிஸ்ஸக்³கா³னுபஸ்ஸீதி எத்த² படினிஸ்ஸக்³கோ³ வுச்சதி வொஸ்ஸக்³கோ³. ஸோ ச பரிச்சாக³வொஸ்ஸக்³கோ³ பக்க²ந்த³னவொஸ்ஸக்³கோ³தி து³விதோ⁴ ஹோதி. தத்த² பரிச்சாக³வொஸ்ஸக்³கோ³தி விபஸ்ஸனா. ஸா ஹி தத³ங்க³வஸேன கிலேஸே ச க²ந்தே⁴ ச வொஸ்ஸஜதி. பக்க²ந்த³னவொஸ்ஸக்³கோ³தி மக்³கோ³. ஸோ ஹி நிப்³பா³னங் ஆரம்மணதோ பக்க²ந்த³தி. த்³வீஹிபி வா காரணேஹி ஸோ வொஸ்ஸக்³கோ³யேவ, ஸமுச்சே²த³வஸேன க²ந்தா⁴னங் கிலேஸானஞ்ச வொஸ்ஸஜனதோ நிப்³பா³னே ச பக்க²ந்த³னதோ. தஸ்மா கிலேஸே ச க²ந்தே⁴ ச பரிச்சஜதீதி பரிச்சாக³வொஸ்ஸக்³கோ³. நிரோதா⁴ய நிப்³பா³னதா⁴துயா சித்தங் பக்க²ந்த³தீதி பக்க²ந்த³னவொஸ்ஸக்³கோ³தி உப⁴யம்பேதங் மக்³கே³ ஸமேதி. தது³ப⁴யஸமங்கீ³ புக்³க³லோ இமாய படினிஸ்ஸக்³கா³னுபஸ்ஸனாய ஸமன்னாக³தத்தா படினிஸ்ஸக்³கா³னுபஸ்ஸீ நாம ஹோதி. தங் ஸந்தா⁴யேதங் வுத்தங். ந கிஞ்சி லோகே உபாதி³யதீதி கிஞ்சி ஏகம்பி ஸங்கா²ரக³தங் தண்ஹாவஸேன ந உபாதி³யதி ந க³ண்ஹாதி ந பராமஸதி. அனுபாதி³யங் ந பரிதஸ்ஸதீதி அக்³க³ண்ஹந்தோ தண்ஹாபரிதஸ்ஸனாய ந பரிதஸ்ஸதி. பச்சத்தங்யேவ பரினிப்³பா³யதீதி ஸயமேவ கிலேஸபரினிப்³பா³னேன பரினிப்³பா³யதி. கீ²ணா ஜாதீதிஆதி³னா பனஸ்ஸ பச்சவெக்க²ணா த³ஸ்ஸிதா. இதி ப⁴க³வா ஸங்கி²த்தேன கீ²ணாஸவஸ்ஸ புப்³ப³பா⁴க³ப்படிபத³ங் புச்சி²தோ ஸங்கி²த்தேனேவ கதே²ஸி. இத³ங் பன ஸுத்தங் தே²ரஸ்ஸ ஓவாதோ³பி அஹோஸி விபஸ்ஸனாபி. ஸோ இமஸ்மிங்யேவ ஸுத்தே விபஸ்ஸனங் வட்³டெ⁴த்வா அரஹத்தங் பத்தோதி.
Aniccānupassīti aniccato anupassanto. Virāgānupassīti ettha dve virāgā khayavirāgo ca accantavirāgo ca. Tattha saṅkhārānaṃ khayaṃ khayato passanā vipassanāpi, accantavirāgaṃ nibbānaṃ virāgato dassanamaggañāṇampi virāgānupassanā. Tadubhayasamaṅgipuggalo virāgānupassī nāma. Taṃ sandhāya vuttaṃ – ‘‘virāgānupassī’’ti, virāgato anupassantoti attho. Nirodhānupassimhipi eseva nayo. Nirodhopi hi khayanirodho accantanirodhoti duvidhoyeva. Paṭinissaggānupassīti ettha paṭinissaggo vuccati vossaggo. So ca pariccāgavossaggo pakkhandanavossaggoti duvidho hoti. Tattha pariccāgavossaggoti vipassanā. Sā hi tadaṅgavasena kilese ca khandhe ca vossajati. Pakkhandanavossaggoti maggo. So hi nibbānaṃ ārammaṇato pakkhandati. Dvīhipi vā kāraṇehi so vossaggoyeva, samucchedavasena khandhānaṃ kilesānañca vossajanato nibbāne ca pakkhandanato. Tasmā kilese ca khandhe ca pariccajatīti pariccāgavossaggo. Nirodhāya nibbānadhātuyā cittaṃ pakkhandatīti pakkhandanavossaggoti ubhayampetaṃ magge sameti. Tadubhayasamaṅgī puggalo imāya paṭinissaggānupassanāya samannāgatattā paṭinissaggānupassī nāma hoti. Taṃ sandhāyetaṃ vuttaṃ. Na kiñci loke upādiyatīti kiñci ekampi saṅkhāragataṃ taṇhāvasena na upādiyati na gaṇhāti na parāmasati. Anupādiyaṃ na paritassatīti aggaṇhanto taṇhāparitassanāya na paritassati. Paccattaṃyeva parinibbāyatīti sayameva kilesaparinibbānena parinibbāyati. Khīṇā jātītiādinā panassa paccavekkhaṇā dassitā. Iti bhagavā saṃkhittena khīṇāsavassa pubbabhāgappaṭipadaṃ pucchito saṃkhitteneva kathesi. Idaṃ pana suttaṃ therassa ovādopi ahosi vipassanāpi. So imasmiṃyeva sutte vipassanaṃ vaḍḍhetvā arahattaṃ pattoti.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / அங்கு³த்தரனிகாய • Aṅguttaranikāya / 8. பசலாயமானஸுத்தங் • 8. Pacalāyamānasuttaṃ
டீகா • Tīkā / ஸுத்தபிடக (டீகா) • Suttapiṭaka (ṭīkā) / அங்கு³த்தரனிகாய (டீகா) • Aṅguttaranikāya (ṭīkā) / 8. பசலாயமானஸுத்தவண்ணனா • 8. Pacalāyamānasuttavaṇṇanā
