| Library / Tipiṭaka / д̇ибидага • Tipiṭaka / ан̇г̇уд̇д̇аранигааяа (дийгаа) • Aṅguttaranikāya (ṭīkā) |
8. бажалааяамаанасуд̇д̇аван̣н̣анаа
8. Pacalāyamānasuttavaṇṇanā
61. адтамз аалогасан̃н̃ам̣ манаси гарзяяаасийд̇и д̣̇иваа ваа рад̇д̇им̣ ваа суурияабаж̇ж̇од̇ажанд̣̇аман̣иаад̣̇ийнам̣ аалогам̣ ‘‘аалого’’д̇и манаси гарзяяааси. ид̣̇ам̣ вуд̇д̇ам̣ ход̇и – суурияажанд̣̇аалогаад̣̇им̣ д̣̇иваа рад̇д̇ин̃жа убалад̣̇д̇хам̣ яат̇аалад̣̇д̇хавасзнзва манаси гарзяяааси, жид̇д̇з табзяяааси. яат̇аа д̇з субхаавид̇аалогагасин̣асса вияа гасин̣аалого яад̣̇ижчагам̣ яаавад̣̇ижчаган̃жа со аалого рад̇д̇ияам̣ убад̇идтад̇и, язна д̇ад̇т̇а д̣̇иваасан̃н̃ам̣ табзяяааси, д̣̇иваа вияа виг̇ад̇ат̇инамид̣̇д̇хова бхавзяяаасийд̇и. д̇знааха ‘‘яат̇аа д̣̇иваа д̇ат̇аа рад̇д̇и’’нд̇и. ид̇и вивадзна жзд̇асаад̇и звам̣ абихид̇зна жид̇д̇зна т̇инамид̣̇д̇хабид̇хаанзна абихид̇ад̇д̇аа. абарияонад̣̇д̇хзнаад̇и саманд̇ад̇о анонад̣̇д̇хзна асан̃чаад̣̇ид̇зна. сахобхаасанд̇и сан̃аан̣обхаасам̣. т̇инамид̣̇д̇хавинод̣̇анааалогоби ваа ход̇у гасин̣аалогоби ваа баригаммаалогоби ваа, убаггилзсаалого вияа саб̣б̣ояам̣ аалого н̃аан̣асамудтаановаад̇и. язсам̣ агаран̣з буг̇г̇ало махааж̇аанияо ход̇и, д̇аани авассам̣ гаад̇аб̣б̣аани. яаани агаад̇умби вадданд̇и, сад̇и самавааяз гаад̇аб̣б̣ад̇о д̇аани гаран̣ийяаанийд̇и ааха ‘‘ид̇араани гаран̣ийяааний’’д̇и. ат̇а ваа гад̇д̇аб̣б̣аани гаммаани гаран̣ам̣ араханд̇ийд̇и гаран̣ийяаани. ид̇араани гижжаанийд̇иби вад̣̇анд̇и.
61. Aṭṭhame ālokasaññaṃ manasi kareyyāsīti divā vā rattiṃ vā sūriyapajjotacandamaṇiādīnaṃ ālokaṃ ‘‘āloko’’ti manasi kareyyāsi. Idaṃ vuttaṃ hoti – sūriyacandālokādiṃ divā rattiñca upaladdhaṃ yathāladdhavaseneva manasi kareyyāsi, citte ṭhapeyyāsi. Yathā te subhāvitālokakasiṇassa viya kasiṇāloko yadicchakaṃ yāvadicchakañca so āloko rattiyaṃ upatiṭṭhati, yena tattha divāsaññaṃ ṭhapeyyāsi, divā viya vigatathinamiddhova bhaveyyāsīti. Tenāha ‘‘yathā divā tathā ratti’’nti. Iti vivaṭena cetasāti evaṃ apihitena cittena thinamiddhapidhānena apihitattā. Apariyonaddhenāti samantato anonaddhena asañchāditena. Sahobhāsanti sañāṇobhāsaṃ. Thinamiddhavinodanaālokopi vā hotu kasiṇālokopi vā parikammālokopi vā, upakkilesāloko viya sabboyaṃ āloko ñāṇasamuṭṭhānovāti. Yesaṃ akaraṇe puggalo mahājāniyo hoti, tāni avassaṃ kātabbāni. Yāni akātumpi vaṭṭanti, sati samavāye kātabbato tāni karaṇīyānīti āha ‘‘itarāni karaṇīyānī’’ti. Atha vā kattabbāni kammāni karaṇaṃ arahantīti karaṇīyāni. Itarāni kiccānītipi vadanti.
аад̣̇инаяаббавад̇д̇аа виг̇г̇аахигагат̇аад̇и ‘‘на д̇вам̣ имам̣ д̇хаммавинаяам̣ ааж̇аанааси, ахам̣ имам̣ д̇хаммавинаяам̣ ааж̇аанаами, гим̣ д̇вам̣ имам̣ д̇хаммавинаяам̣ ааж̇ааниссаси, мижчаабадибанно д̇вамаси, ахамасми саммаабадибанно, сахид̇ам̣ мз, асахид̇ам̣ д̇з, бурзважанийяам̣ бажчаа аважа, бажчааважанийяам̣ бурз аважа, ад̇хижин̣н̣ам̣ д̇з вибараавад̇д̇ам̣, ааробид̇о д̇з ваад̣̇о, ниг̇г̇ахид̇о д̇вамаси. жара ваад̣̇аббамогкааяа, ниб̣б̣зтзхи ваа сажз бахосий’’д̇и (д̣̇ий. ни. 1.18; ма. ни. 3.41) звам̣бавад̇д̇аа гат̇аа. д̇ад̇т̇а сахид̇ам̣ мзд̇и (д̣̇ий. ни. адта. 1.18) маяхам̣ важанам̣ сахид̇ам̣ силидтам̣, ад̇т̇аяуд̇д̇ам̣ гааран̣аяуд̇д̇анд̇и ад̇т̇о. сахид̇анд̇и ваа буб̣б̣аабараавируд̣̇д̇хам̣. асахид̇ам̣ д̇зд̇и д̇уяхам̣ важанам̣ асахид̇ам̣ асилидтам̣. ад̇хижин̣н̣ам̣ д̇з вибараавад̇д̇анд̇и яам̣ д̇уяхам̣ д̣̇ийгхарад̇д̇аажин̣н̣авасзна суббаг̇ун̣ам̣, д̇ам̣ маяхам̣ згаважанзнзва вибараавад̇д̇ам̣ баривад̇д̇ид̇ваа тид̇ам̣, на гин̃жи ж̇аанаасийд̇и ад̇т̇о. ааробид̇о д̇з ваад̣̇од̇и маяаа д̇ава ваад̣̇з д̣̇осо ааробид̇о. жара ваад̣̇аббамогкааяаад̇и д̣̇осаможанад̇т̇ам̣ жара вижара, д̇ад̇т̇а д̇ад̇т̇а г̇анд̇ваа сигкаад̇и ад̇т̇о. ниб̣б̣зтзхи ваа сажз бахосийд̇и ат̇а саяам̣ бахоси, ид̣̇аани зва ниб̣б̣зтзхийд̇и ад̇т̇о.
Ādinayappavattā viggāhikakathāti ‘‘na tvaṃ imaṃ dhammavinayaṃ ājānāsi, ahaṃ imaṃ dhammavinayaṃ ājānāmi, kiṃ tvaṃ imaṃ dhammavinayaṃ ājānissasi, micchāpaṭipanno tvamasi, ahamasmi sammāpaṭipanno, sahitaṃ me, asahitaṃ te, purevacanīyaṃ pacchā avaca, pacchāvacanīyaṃ pure avaca, adhiciṇṇaṃ te viparāvattaṃ, āropito te vādo, niggahito tvamasi. Cara vādappamokkhāya, nibbeṭhehi vā sace pahosī’’ti (dī. ni. 1.18; ma. ni. 3.41) evaṃpavattā kathā. Tattha sahitaṃ meti (dī. ni. aṭṭha. 1.18) mayhaṃ vacanaṃ sahitaṃ siliṭṭhaṃ, atthayuttaṃ kāraṇayuttanti attho. Sahitanti vā pubbāparāviruddhaṃ. Asahitaṃ teti tuyhaṃ vacanaṃ asahitaṃ asiliṭṭhaṃ. Adhiciṇṇaṃ te viparāvattanti yaṃ tuyhaṃ dīgharattāciṇṇavasena suppaguṇaṃ, taṃ mayhaṃ ekavacaneneva viparāvattaṃ parivattitvā ṭhitaṃ, na kiñci jānāsīti attho. Āropito te vādoti mayā tava vāde doso āropito. Cara vādappamokkhāyāti dosamocanatthaṃ cara vicara, tattha tattha gantvā sikkhāti attho. Nibbeṭhehi vā sace pahosīti atha sayaṃ pahosi, idāni eva nibbeṭhehīti attho.
д̇ан̣хаа саб̣б̣асо кийяанд̇и зд̇т̇аад̇и д̇ан̣хаасан̇каяо, д̇асмим̣. д̇ан̣хаасан̇каязд̇и жа ид̣̇ам̣ висаяз бхумманд̇и ааха ‘‘д̇ам̣ аарамман̣ам̣ гад̇ваа’’д̇и. вимуд̇д̇ажид̇д̇ад̇ааяаад̇и саб̣б̣асам̣гилзсзхи виббаяуд̇д̇ажид̇д̇ад̇ааяа. абарабхааг̇з бадибад̣̇аа наама арияасажжаабхисамаяо. саа саасанажаариг̇ожараа бажжад̇д̇ам̣ взд̣̇ид̇аб̣б̣ад̇од̇и ааха ‘‘буб̣б̣абхааг̇аббадибад̣̇ам̣ сам̣кид̇д̇зна д̣̇зсзт̇аад̇и бужчад̇ий’’д̇и. агуббад̇хаммад̇ааяа каяаваяасан̇каад̇ам̣ анд̇ам̣ ад̇ийд̇аад̇и ажжанд̇аа, со зва абарихааяанасабхаавад̇д̇аа ажжанд̇аа нидтаа ассаад̇и ажжанд̇анидтаа. д̇знааха ‘‘зганд̇анидто сад̇ад̇анидтод̇и ад̇т̇о’’д̇и. на хи бадивид̣̇д̇хасса логуд̇д̇арад̇хаммасса д̣̇ассаннам̣ губбаннам̣ наама ад̇т̇и. ажжанд̇амзва жад̇уухи яог̇зхи кзмо зд̇асса ад̇т̇ийд̇и ажжанд̇аяог̇агкзмий. маг̇г̇аб̣рахмажарияасса вусид̇ад̇д̇аа д̇асса жа абарихааяанасабхаавад̇д̇аа ажжанд̇ам̣ б̣рахмажаарийд̇и ажжанд̇аб̣рахмажаарий. д̇знааха ‘‘нижжаб̣рахмажаарийд̇и ад̇т̇о’’д̇и. барияосаананд̇и маг̇г̇аб̣рахмажарияабарияабарияосаанам̣ ваддад̣̇угкабарияосаанан̃жа.
Taṇhā sabbaso khīyanti etthāti taṇhāsaṅkhayo, tasmiṃ. Taṇhāsaṅkhayeti ca idaṃ visaye bhummanti āha ‘‘taṃ ārammaṇaṃ katvā’’ti. Vimuttacittatāyāti sabbasaṃkilesehi vippayuttacittatāya. Aparabhāge paṭipadā nāma ariyasaccābhisamayo. Sā sāsanacārigocarā paccattaṃ veditabbatoti āha ‘‘pubbabhāgappaṭipadaṃ saṃkhittena desethāti pucchatī’’ti. Akuppadhammatāya khayavayasaṅkhātaṃ antaṃ atītāti accantā, so eva aparihāyanasabhāvattā accantā niṭṭhā assāti accantaniṭṭhā. Tenāha ‘‘ekantaniṭṭho satataniṭṭhoti attho’’ti. Na hi paṭividdhassa lokuttaradhammassa dassannaṃ kuppannaṃ nāma atthi. Accantameva catūhi yogehi khemo etassa atthīti accantayogakkhemī. Maggabrahmacariyassa vusitattā tassa ca aparihāyanasabhāvattā accantaṃ brahmacārīti accantabrahmacārī. Tenāha ‘‘niccabrahmacārīti attho’’ti. Pariyosānanti maggabrahmacariyapariyapariyosānaṃ vaṭṭadukkhapariyosānañca.
бан̃жагканд̇хаад̇и бан̃жубаад̣̇аанагканд̇хаа. саггааяасаб̣б̣ан̃хи санд̇хааяа ид̇ха ‘‘саб̣б̣з д̇хаммаа’’д̇и вуд̇д̇ам̣ вибассанаависаяасса ад̇хиббзд̇ад̇д̇аа. д̇асмаа ааяад̇анад̇хаад̇уяоби д̇аг̇г̇ад̇игаа зва д̣̇адтаб̣б̣аа. д̇знааха бхаг̇аваа ‘‘наалам̣ абхинивзсааяаа’’д̇и. на яуд̇д̇аа абхинивзсааяа ‘‘зд̇ам̣ мама, зсо мз ад̇д̇аа’’д̇и аж̇жхосаанааяа. ‘‘аламзва ниб̣б̣инд̣̇ид̇ум̣ алам̣ вираж̇ж̇ид̇у’’нд̇иаад̣̇ийсу (д̣̇ий. ни. 2.272; сам̣. ни. 2.124, 128, 134, 143) вияа алам̣-сад̣̇д̣̇о яуд̇д̇ад̇т̇оби ход̇ийд̇и ааха ‘‘на яуд̇д̇аа’’д̇и. самбаж̇ж̇анд̇ийд̇и бхаванд̇и. яад̣̇иби ‘‘д̇ад̇ияаа жад̇уд̇т̇ий’’д̇и ид̣̇ам̣ висуд̣̇д̇хид̣̇ваяам̣ абхин̃н̃аабан̃н̃аа, д̇асса бана сабажжаяанаамаруубад̣̇ассанабхаавад̇о сад̇и жа бажжаяабариг̇г̇ахз сабажжаяад̇д̇аа анижжанд̇и, наамаруубасса анижжад̇ааяа д̣̇угкам̣, д̣̇угкан̃жа анад̇д̇аад̇и ад̇т̇ад̇о лагкан̣ад̇д̇аяам̣ субаагадамзва ход̇ийд̇и ааха ‘‘анижжам̣ д̣̇угкам̣ анад̇д̇аад̇и н̃аад̇абарин̃н̃ааяа абхиж̇аанаад̇ий’’д̇и. д̇ат̇зва д̇ийран̣абарин̃н̃ааяаад̇и иминаа анижжаад̣̇ибхаавзна наалам̣ абхинивзсааяаад̇и наамаруубасса убасам̣харад̇и, на абхин̃н̃аабан̃н̃аанам̣ самбхаарад̇хаммаанам̣. буримааяа хи ад̇т̇ад̇о аабаннам̣ лагкан̣ад̇д̇аяам̣ г̇ан̣хаад̇и салагкан̣асаллагкан̣абарад̇д̇аа д̇ассаа. д̣̇уд̇ияааяа саруубад̇о д̇ассаа лагкан̣ад̇д̇аяааробанавасзна саммасанабхаавад̇о. згажид̇д̇агкан̣игад̇ааяа абхинибаад̇амад̇д̇ад̇ааяа жа аббамад̇д̇агамби. руубабариг̇г̇ахасса ол̣ааригабхаавад̇о аруубабариг̇г̇ахам̣ д̣̇ассзд̇и. д̣̇ассзнд̇о жа взд̣̇анааяа аасаннабхаавад̇о, висзсад̇о сукасаарааг̇ид̇ааяа, бхавассаад̣̇аг̇ад̇хид̇амаанасад̇ааяа жа т̇зрасса взд̣̇анаавасзна ниб̣б̣ад̇д̇зд̇ваа д̣̇ассзд̇и.
Pañcakkhandhāti pañcupādānakkhandhā. Sakkāyasabbañhi sandhāya idha ‘‘sabbe dhammā’’ti vuttaṃ vipassanāvisayassa adhippetattā. Tasmā āyatanadhātuyopi taggatikā eva daṭṭhabbā. Tenāha bhagavā ‘‘nālaṃ abhinivesāyā’’ti. Na yuttā abhinivesāya ‘‘etaṃ mama, eso me attā’’ti ajjhosānāya. ‘‘Alameva nibbindituṃ alaṃ virajjitu’’ntiādīsu (dī. ni. 2.272; saṃ. ni. 2.124, 128, 134, 143) viya alaṃ-saddo yuttatthopi hotīti āha ‘‘na yuttā’’ti. Sampajjantīti bhavanti. Yadipi ‘‘tatiyā catutthī’’ti idaṃ visuddhidvayaṃ abhiññāpaññā, tassa pana sapaccayanāmarūpadassanabhāvato sati ca paccayapariggahe sapaccayattā aniccanti, nāmarūpassa aniccatāya dukkhaṃ, dukkhañca anattāti atthato lakkhaṇattayaṃ supākaṭameva hotīti āha ‘‘aniccaṃ dukkhaṃ anattāti ñātapariññāya abhijānātī’’ti. Tatheva tīraṇapariññāyāti iminā aniccādibhāvena nālaṃ abhinivesāyāti nāmarūpassa upasaṃharati, na abhiññāpaññānaṃ sambhāradhammānaṃ. Purimāya hi atthato āpannaṃ lakkhaṇattayaṃ gaṇhāti salakkhaṇasallakkhaṇaparattā tassā. Dutiyāya sarūpato tassā lakkhaṇattayāropanavasena sammasanabhāvato. Ekacittakkhaṇikatāya abhinipātamattatāya ca appamattakampi. Rūpapariggahassa oḷārikabhāvato arūpapariggahaṃ dasseti. Dassento ca vedanāya āsannabhāvato, visesato sukhasārāgitāya, bhavassādagadhitamānasatāya ca therassa vedanāvasena nibbattetvā dasseti.
каяавирааг̇од̇и каяасан̇каад̇о вирааг̇о сан̇каараанам̣ балуж̇ж̇анаа. яам̣ ааг̇амма саб̣б̣асо сан̇каарзхи вираж̇ж̇анаа ход̇и, д̇ам̣ ниб̣б̣аанам̣ ажжанд̇авирааг̇о. нирод̇хаанубассимхибийд̇и нирод̇хаанубассибад̣̇зби. зсзва наяод̇и ад̇ид̣̇исид̇ваа д̇ам̣ згад̣̇зсзна виваранд̇о ‘‘нирод̇хоби хи…бз… д̣̇увид̇хоязваа’’д̇и ааха. канд̇хаанам̣ барижжаж̇анам̣ д̇аббадиб̣ад̣̇д̇хагилзсаббахаанавасзнаад̇и язнаагаарзна вибассанаа гилзсз баж̇ахад̇и, д̇знаагаарзна д̇ам̣нимид̇д̇агканд̇хз жа баж̇ахад̇ийд̇и вад̇д̇аб̣б̣ад̇ам̣ арахад̇ийд̇и ааха ‘‘саа хи…бз… воссаж̇ж̇ад̇ий’’д̇и. аарамман̣ад̇од̇и гижжасаад̇ханавасзна аарамман̣агаран̣ад̇о. зван̃хи маг̇г̇ад̇о ан̃н̃зсам̣ ниб̣б̣аанаарамман̣аанам̣ багканд̣̇анавоссаг̇г̇аабхааво сид̣̇д̇хова ход̇и. барижжаж̇анзна багканд̣̇анзна жаад̇и д̣̇вийхиби ваа гааран̣зхи. сод̇и маг̇г̇о. саб̣б̣зсам̣ канд̇хаанам̣ воссаж̇ж̇анам̣ д̇аббадиб̣ад̣̇д̇хасам̣гилзсаббахаанзна д̣̇адтаб̣б̣ам̣. яасмаа ваа вибассанаажид̇д̇ам̣ багканд̣̇ад̇ийд̇и маг̇г̇асамбаяуд̇д̇ажид̇д̇ам̣ санд̇хааяааха. маг̇г̇о жа самужчзд̣̇авасзна гилзсз канд̇хз жа барижжаж̇ад̇и, д̇асмаа яат̇ааггамам̣ вибассанаамаг̇г̇аанан̃жа васзна багканд̣̇анабарижжааг̇авоссаг̇г̇ааби взд̣̇ид̇аб̣б̣аа. д̇ад̣̇убхаяасаман̇г̇ийд̇и вибассанаасаман̇г̇ий маг̇г̇асаман̇г̇ий жа. ‘‘анижжаанубассанааяа нижжасан̃н̃ам̣ баж̇ахад̇ий’’д̇иаад̣̇иважанад̇о (бади. ма. 1.52) хи яат̇аа вибассанааяа гилзсаанам̣ барижжааг̇аббадиниссаг̇г̇о лаб̣бхад̇и, звам̣ ааяад̇им̣ д̇зхи гилзсзхи уббаад̣̇зд̇аб̣б̣агканд̇хаанамби барижжааг̇абадиниссаг̇г̇о вад̇д̇аб̣б̣о. багканд̣̇анабадиниссаг̇г̇о бана маг̇г̇з лаб̣бхамаанааяа зганд̇агааран̣абхууд̇ааяа вудтаанаг̇ааминивибассанааяа васзна взд̣̇ид̇аб̣б̣о. маг̇г̇з бана д̇ад̣̇убхаяамби н̃ааяааг̇ад̇амзва ниббарияааяад̇ова лаб̣бхамаанад̇д̇аа. д̇знааха ‘‘д̇ад̣̇убхаяасаман̇г̇ийбуг̇г̇ало’’д̇иаад̣̇и. бужчанд̇асса аж̇жхаасаяавасзна ‘‘на гин̃жи логз убаад̣̇ияад̇ий’’д̇и зд̇т̇а гаамубаад̣̇аанавасзна убаад̣̇ияанам̣ бадигкибад̇ийд̇и ааха ‘‘д̇ан̣хаавасзна на убаад̣̇ияад̇ий’’д̇и. д̇ан̣хаавасзна ваа асад̇и убаад̣̇ияанз д̣̇идтивасзна убаад̣̇ияанам̣ анавагаасамзваад̇и ‘‘д̇ан̣хаавасзна’’ижжзва вуд̇д̇ам̣. на бараамасад̇ийд̇и наад̣̇ияад̇и. д̣̇идтибараамаасавасзна ваа ‘‘нижжа’’нд̇иаад̣̇инаа на бараамасад̇и. сам̣кид̇д̇знзва гат̇зсийд̇и д̇асса аж̇жхаасаяавасзна бабан̃жам̣ агад̇ваа гат̇зси.
Khayavirāgoti khayasaṅkhāto virāgo saṅkhārānaṃ palujjanā. Yaṃ āgamma sabbaso saṅkhārehi virajjanā hoti, taṃ nibbānaṃ accantavirāgo. Nirodhānupassimhipīti nirodhānupassipadepi. Eseva nayoti atidisitvā taṃ ekadesena vivaranto ‘‘nirodhopi hi…pe… duvidhoyevā’’ti āha. Khandhānaṃ pariccajanaṃ tappaṭibaddhakilesappahānavasenāti yenākārena vipassanā kilese pajahati, tenākārena taṃnimittakkhandhe ca pajahatīti vattabbataṃ arahatīti āha ‘‘sā hi…pe… vossajjatī’’ti. Ārammaṇatoti kiccasādhanavasena ārammaṇakaraṇato. Evañhi maggato aññesaṃ nibbānārammaṇānaṃ pakkhandanavossaggābhāvo siddhova hoti. Pariccajanena pakkhandanena cāti dvīhipi vā kāraṇehi. Soti maggo. Sabbesaṃ khandhānaṃ vossajjanaṃ tappaṭibaddhasaṃkilesappahānena daṭṭhabbaṃ. Yasmā vā vipassanācittaṃ pakkhandatīti maggasampayuttacittaṃ sandhāyāha. Maggo ca samucchedavasena kilese khandhe ca pariccajati, tasmā yathākkamaṃ vipassanāmaggānañca vasena pakkhandanapariccāgavossaggāpi veditabbā. Tadubhayasamaṅgīti vipassanāsamaṅgī maggasamaṅgī ca. ‘‘Aniccānupassanāya niccasaññaṃ pajahatī’’tiādivacanato (paṭi. ma. 1.52) hi yathā vipassanāya kilesānaṃ pariccāgappaṭinissaggo labbhati, evaṃ āyatiṃ tehi kilesehi uppādetabbakkhandhānampi pariccāgapaṭinissaggo vattabbo. Pakkhandanapaṭinissaggo pana magge labbhamānāya ekantakāraṇabhūtāya vuṭṭhānagāminivipassanāya vasena veditabbo. Magge pana tadubhayampi ñāyāgatameva nippariyāyatova labbhamānattā. Tenāha ‘‘tadubhayasamaṅgīpuggalo’’tiādi. Pucchantassa ajjhāsayavasena ‘‘na kiñci loke upādiyatī’’ti ettha kāmupādānavasena upādiyanaṃ paṭikkhipatīti āha ‘‘taṇhāvasena na upādiyatī’’ti. Taṇhāvasena vā asati upādiyane diṭṭhivasena upādiyanaṃ anavakāsamevāti ‘‘taṇhāvasena’’icceva vuttaṃ. Na parāmasatīti nādiyati. Diṭṭhiparāmāsavasena vā ‘‘nicca’’ntiādinā na parāmasati. Saṃkhitteneva kathesīti tassa ajjhāsayavasena papañcaṃ akatvā kathesi.
бажалааяамаанасуд̇д̇аван̣н̣анаа нидтид̇аа.
Pacalāyamānasuttavaṇṇanā niṭṭhitā.
Related texts:
д̇ибидага (муула) • Tipiṭaka (Mūla) / суд̇д̇абидага • Suttapiṭaka / ан̇г̇уд̇д̇аранигааяа • Aṅguttaranikāya / 8. бажалааяамаанасуд̇д̇ам̣ • 8. Pacalāyamānasuttaṃ
адтагат̇аа • Aṭṭhakathā / суд̇д̇абидага (адтагат̇аа) • Suttapiṭaka (aṭṭhakathā) / ан̇г̇уд̇д̇аранигааяа (адтагат̇аа) • Aṅguttaranikāya (aṭṭhakathā) / 8. бажалааяамаанасуд̇д̇аван̣н̣анаа • 8. Pacalāyamānasuttavaṇṇanā
