| Library / Tipiṭaka / ਤਿਪਿਟਕ • Tipiṭaka / ਅਙ੍ਗੁਤ੍ਤਰਨਿਕਾਯ (ਅਟ੍ਠਕਥਾ) • Aṅguttaranikāya (aṭṭhakathā) |
੮. ਪਚਲਾਯਮਾਨਸੁਤ੍ਤવਣ੍ਣਨਾ
8. Pacalāyamānasuttavaṇṇanā
੬੧. ਅਟ੍ਠਮੇ ਪਚਲਾਯਮਾਨੋਤਿ ਤਂ ਗਾਮਂ ਉਪਨਿਸ੍ਸਾਯ ਏਕਸ੍ਮਿਂ વਨਸਣ੍ਡੇ ਸਮਣਧਮ੍ਮਂ ਕਰੋਨ੍ਤੋ ਸਤ੍ਤਾਹਂ ਚਙ੍ਕਮਨવੀਰਿਯੇਨ ਨਿਮ੍ਮਥਿਤਤ੍ਤਾ ਕਿਲਨ੍ਤਗਤ੍ਤੋ ਚਙ੍ਕਮਨਕੋਟਿਯਂ ਪਚਲਾਯਮਾਨੋ ਨਿਸਿਨ੍ਨੋ ਹੋਤਿ। ਪਚਲਾਯਸਿ ਨੋਤਿ ਨਿਦ੍ਦਾਯਸਿ ਨੁ। ਅਨੁਮਜ੍ਜਿਤ੍વਾਤਿ ਪਰਿਮਜ੍ਜਿਤ੍વਾ। ਆਲੋਕਸਞ੍ਞਨ੍ਤਿ ਮਿਦ੍ਧવਿਨੋਦਨਆਲੋਕਸਞ੍ਞਂ। ਦਿવਾਸਞ੍ਞਨ੍ਤਿ ਦਿવਾਤਿਸਞ੍ਞਂ। ਯਥਾ ਦਿવਾ ਤਥਾ ਰਤ੍ਤਿਨ੍ਤਿ ਯਥਾ ਦਿવਾ ਆਲੋਕਸਞ੍ਞਾ ਅਧਿਟ੍ਠਿਤਾ, ਤਥਾ ਨਂ ਰਤ੍ਤਿਮ੍ਪਿ ਅਧਿਟ੍ਠਹੇਯ੍ਯਾਸਿ। ਯਥਾ ਰਤ੍ਤਿਂ ਤਥਾ ਦਿવਾਤਿ ਯਥਾ ਚ ਤੇ ਰਤ੍ਤਿਂ ਆਲੋਕਸਞ੍ਞਾ ਅਧਿਟ੍ਠਿਤਾ, ਤਥਾ ਨਂ ਦਿવਾਪਿ ਅਧਿਟ੍ਠਹੇਯ੍ਯਾਸਿ। ਸਪ੍ਪਭਾਸਨ੍ਤਿ ਦਿਬ੍ਬਚਕ੍ਖੁਞਾਣਤ੍ਥਾਯ ਸਹੋਭਾਸਂ। ਪਚ੍ਛਾਪੁਰੇਸਞ੍ਞੀਤਿ ਪੁਰਤੋ ਚ ਪਚ੍ਛਤੋ ਚ ਅਭਿਹਰਣਸਞ੍ਞਾਯ ਸਞ੍ਞਾવਾ। ਅਨ੍ਤੋਗਤੇਹਿ ਇਨ੍ਦ੍ਰਿਯੇਹੀਤਿ ਬਹਿ ਅવਿਕ੍ਖਿਤ੍ਤੇਹਿ ਅਨ੍ਤੋ ਅਨੁਪવਿਟ੍ਠੇਹੇવ ਪਞ੍ਚਹਿ ਇਨ੍ਦ੍ਰਿਯੇਹਿ। ਮਿਦ੍ਧਸੁਖਨ੍ਤਿ ਨਿਦ੍ਦਾਸੁਖਂ। ਏਤ੍ਤਕੇਨ ਠਾਨੇਨ ਭਗવਾ ਥੇਰਸ੍ਸ ਮਿਦ੍ਧવਿਨੋਦਨਕਮ੍ਮਟ੍ਠਾਨਂ ਕਥੇਸਿ। ਸੋਣ੍ਡਨ੍ਤਿ ਮਾਨਸੋਣ੍ਡਂ। ਕਿਚ੍ਚਕਰਣੀਯਾਨੀਤਿ ਏਤ੍ਥ ਅવਸ੍ਸਂ ਕਤ੍ਤਬ੍ਬਾਨਿ ਕਿਚ੍ਚਾਨਿ, ਇਤਰਾਨਿ ਕਰਣੀਯਾਨਿ। ਮਙ੍ਕੁਭਾવੋਤਿ ਨਿਤ੍ਤੇਜਤਾ ਦੋਮਨਸ੍ਸਤਾ। ਏਤ੍ਤਕੇਨ ਠਾਨੇਨ ਸਤ੍ਥਾਰਾ ਥੇਰਸ੍ਸ ਭਿਕ੍ਖਾਚਾਰવਤ੍ਤਂ ਕਥਿਤਂ।
61. Aṭṭhame pacalāyamānoti taṃ gāmaṃ upanissāya ekasmiṃ vanasaṇḍe samaṇadhammaṃ karonto sattāhaṃ caṅkamanavīriyena nimmathitattā kilantagatto caṅkamanakoṭiyaṃ pacalāyamāno nisinno hoti. Pacalāyasi noti niddāyasi nu. Anumajjitvāti parimajjitvā. Ālokasaññanti middhavinodanaālokasaññaṃ. Divāsaññanti divātisaññaṃ. Yathā divā tathā rattinti yathā divā ālokasaññā adhiṭṭhitā, tathā naṃ rattimpi adhiṭṭhaheyyāsi. Yathā rattiṃ tathā divāti yathā ca te rattiṃ ālokasaññā adhiṭṭhitā, tathā naṃ divāpi adhiṭṭhaheyyāsi. Sappabhāsanti dibbacakkhuñāṇatthāya sahobhāsaṃ. Pacchāpuresaññīti purato ca pacchato ca abhiharaṇasaññāya saññāvā. Antogatehi indriyehīti bahi avikkhittehi anto anupaviṭṭheheva pañcahi indriyehi. Middhasukhanti niddāsukhaṃ. Ettakena ṭhānena bhagavā therassa middhavinodanakammaṭṭhānaṃ kathesi. Soṇḍanti mānasoṇḍaṃ. Kiccakaraṇīyānīti ettha avassaṃ kattabbāni kiccāni, itarāni karaṇīyāni. Maṅkubhāvoti nittejatā domanassatā. Ettakena ṭhānena satthārā therassa bhikkhācāravattaṃ kathitaṃ.
ਇਦਾਨਿ ਭਸ੍ਸੇ ਪਰਿਯਨ੍ਤਕਾਰਿਤਾਯ ਸਮਾਦਪੇਤੁਂ ਤਸ੍ਮਾਤਿਹਾਤਿਆਦਿਮਾਹ। ਤਤ੍ਥ વਿਗ੍ਗਾਹਿਕਕਥਨ੍ਤਿ ‘‘ਨ ਤ੍વਂ ਇਮਂ ਧਮ੍ਮવਿਨਯਂ ਆਜਾਨਾਸੀ’’ਤਿਆਦਿਨਯਪ੍ਪવਤ੍ਤਾ વਿਗ੍ਗਾਹਿਕਕਥਾ। ਨਾਹਂ ਮੋਗ੍ਗਲ੍ਲਾਨਾਤਿਆਦਿ ਪਾਪਮਿਤ੍ਤਸਂਸਗ੍ਗવਿવਜ੍ਜਨਤ੍ਥਂ વੁਤ੍ਤਂ। ਕਿਤ੍ਤਾવਤਾ ਨੁ ਖੋਤਿ ਕਿਤ੍ਤਕੇਨ ਨੁ ਖੋ। ਤਣ੍ਹਾਸਙ੍ਖਯવਿਮੁਤ੍ਤੋ ਹੋਤੀਤਿ ਤਣ੍ਹਾਸਙ੍ਖਯੇ ਨਿਬ੍ਬਾਨੇ ਤਂ ਆਰਮ੍ਮਣਂ ਕਤ੍વਾ વਿਮੁਤ੍ਤਚਿਤ੍ਤਤਾਯ ਤਣ੍ਹਾਸਙ੍ਖਯવਿਮੁਤ੍ਤੋ ਨਾਮ ਸਂਖਿਤ੍ਤੇਨ ਕਿਤ੍ਤਾવਤਾ ਹੋਤਿ। ਯਾਯ ਪਟਿਪਤ੍ਤਿਯਾ ਤਣ੍ਹਾਸਙ੍ਖਯવਿਮੁਤ੍ਤੋ ਹੋਤਿ, ਤਮੇવ ਖੀਣਾਸવਸ੍ਸ ਭਿਕ੍ਖੁਨੋ ਪੁਬ੍ਬਭਾਗਪਟਿਪਦਂ ਸਂਖਿਤ੍ਤੇਨ ਦੇਸੇਥਾਤਿ ਪੁਚ੍ਛਤਿ। ਅਚ੍ਚਨ੍ਤਨਿਟ੍ਠੋਤਿ ਖਯવਯਸਙ੍ਖਾਤਂ ਅਨ੍ਤਂ ਅਤੀਤਾਤਿ ਅਚ੍ਚਨ੍ਤਾ, ਅਚ੍ਚਨ੍ਤਾ ਨਿਟ੍ਠਾ ਅਸ੍ਸਾਤਿ ਅਚ੍ਚਨ੍ਤਨਿਟ੍ਠੋ, ਏਕਨ੍ਤਨਿਟ੍ਠੋ ਸਤਤਨਿਟ੍ਠੋਤਿ ਅਤ੍ਥੋ। ਅਚ੍ਚਨ੍ਤਯੋਗਕ੍ਖੇਮੀਤਿ ਅਚ੍ਚਨ੍ਤਂ ਯੋਗਕ੍ਖੇਮੀ, ਨਿਚ੍ਚਯੋਗਕ੍ਖੇਮੀਤਿ ਅਤ੍ਥੋ। ਅਚ੍ਚਨ੍ਤਬ੍ਰਹ੍ਮਚਾਰੀਤਿ ਅਚ੍ਚਨ੍ਤਂ ਬ੍ਰਹ੍ਮਚਾਰੀ, ਨਿਚ੍ਚਬ੍ਰਹ੍ਮਚਾਰੀਤਿ ਅਤ੍ਥੋ। ਅਚ੍ਚਨ੍ਤਂ ਪਰਿਯੋਸਾਨਮਸ੍ਸਾਤਿ ਪੁਰਿਮਨਯੇਨੇવ ਅਚ੍ਚਨ੍ਤਪਰਿਯੋਸਾਨੋ। ਸੇਟ੍ਠੋ ਦੇવਮਨੁਸ੍ਸਾਨਨ੍ਤਿ ਦੇવਾਨਞ੍ਚ ਮਨੁਸ੍ਸਾਨਞ੍ਚ ਸੇਟ੍ਠੋ ਉਤ੍ਤਮੋ। ਏવਰੂਪੋ ਭਿਕ੍ਖੁ ਕਿਤ੍ਤਾવਤਾ ਹੋਤਿ, ਸਙ੍ਖੇਪੇਨੇવ ਤਸ੍ਸ ਪਟਿਪਤ੍ਤਿਂ ਕਥੇਥਾਤਿ ਯਾਚਤਿ।
Idāni bhasse pariyantakāritāya samādapetuṃ tasmātihātiādimāha. Tattha viggāhikakathanti ‘‘na tvaṃ imaṃ dhammavinayaṃ ājānāsī’’tiādinayappavattā viggāhikakathā. Nāhaṃ moggallānātiādi pāpamittasaṃsaggavivajjanatthaṃ vuttaṃ. Kittāvatā nu khoti kittakena nu kho. Taṇhāsaṅkhayavimutto hotīti taṇhāsaṅkhaye nibbāne taṃ ārammaṇaṃ katvā vimuttacittatāya taṇhāsaṅkhayavimutto nāma saṃkhittena kittāvatā hoti. Yāya paṭipattiyā taṇhāsaṅkhayavimutto hoti, tameva khīṇāsavassa bhikkhuno pubbabhāgapaṭipadaṃ saṃkhittena desethāti pucchati. Accantaniṭṭhoti khayavayasaṅkhātaṃ antaṃ atītāti accantā, accantā niṭṭhā assāti accantaniṭṭho, ekantaniṭṭho satataniṭṭhoti attho. Accantayogakkhemīti accantaṃ yogakkhemī, niccayogakkhemīti attho. Accantabrahmacārīti accantaṃ brahmacārī, niccabrahmacārīti attho. Accantaṃ pariyosānamassāti purimanayeneva accantapariyosāno. Seṭṭho devamanussānanti devānañca manussānañca seṭṭho uttamo. Evarūpo bhikkhu kittāvatā hoti, saṅkhepeneva tassa paṭipattiṃ kathethāti yācati.
ਸਬ੍ਬੇ ਧਮ੍ਮਾ ਨਾਲਂ ਅਭਿਨਿવੇਸਾਯਾਤਿ ਏਤ੍ਥ ਸਬ੍ਬੇ ਧਮ੍ਮਾ ਨਾਮ ਪਞ੍ਚਕ੍ਖਨ੍ਧਾ ਦ੍વਾਦਸਾਯਤਨਾਨਿ ਅਟ੍ਠਾਰਸ ਧਾਤੁਯੋ, ਤੇ ਸਬ੍ਬੇਪਿ ਤਣ੍ਹਾਦਿਟ੍ਠਿવਸੇਨ ਅਭਿਨਿવੇਸਾਯ ਨਾਲਂ ਨ ਪਰਿਯਤ੍ਤਾ ਨ ਸਮਤ੍ਤਾ ਨ ਯੁਤ੍ਤਾ। ਕਸ੍ਮਾ? ਗਹਿਤਾਕਾਰੇਨ ਅਤਿਟ੍ਠਨਤੋ। ਤੇ ਹਿ ਨਿਚ੍ਚਾ ਸੁਖਾ ਅਤ੍ਤਾਤਿ ਗਹਿਤਾਪਿ ਅਨਿਚ੍ਚਾ ਦੁਕ੍ਖਾ ਅਨਤ੍ਤਾવ ਸਮ੍ਪਜ੍ਜਨ੍ਤਿ। ਤਸ੍ਮਾ ਨਾਲਂ ਅਭਿਨਿવੇਸਾਯ। ਅਭਿਜਾਨਾਤੀਤਿ ਅਨਿਚ੍ਚਂ ਦੁਕ੍ਖਂ ਅਨਤ੍ਤਾਤਿ ਞਾਤਪਰਿਞ੍ਞਾਯ ਅਭਿਜਾਨਾਤਿ। ਪਰਿਜਾਨਾਤੀਤਿ ਤਥੇવ ਤੀਰਣਪਰਿਞ੍ਞਾਯ ਪਰਿਜਾਨਾਤਿ। ਯਂਕਿਞ੍ਚਿ વੇਦਨਨ੍ਤਿ ਅਨ੍ਤਮਸੋ ਪਞ੍ਚવਿਞ੍ਞਾਣਸਮ੍ਪਯੁਤ੍ਤਂ ਯਂਕਿਞ੍ਚਿ ਅਪ੍ਪਮਤ੍ਤਕਮ੍ਪਿ વੇਦਨਂ ਅਨੁਭવਤਿ। ਇਮਿਨਾ ਭਗવਾ ਥੇਰਸ੍ਸ વੇਦਨਾવਸੇਨ ਚ વਿਨਿવਟ੍ਟੇਤ੍વਾ ਅਰੂਪਪਰਿਗ੍ਗਹਂ ਦਸ੍ਸੇਸਿ।
Sabbe dhammā nālaṃ abhinivesāyāti ettha sabbe dhammā nāma pañcakkhandhā dvādasāyatanāni aṭṭhārasa dhātuyo, te sabbepi taṇhādiṭṭhivasena abhinivesāya nālaṃ na pariyattā na samattā na yuttā. Kasmā? Gahitākārena atiṭṭhanato. Te hi niccā sukhā attāti gahitāpi aniccā dukkhā anattāva sampajjanti. Tasmā nālaṃ abhinivesāya. Abhijānātīti aniccaṃ dukkhaṃ anattāti ñātapariññāya abhijānāti. Parijānātīti tatheva tīraṇapariññāya parijānāti. Yaṃkiñci vedananti antamaso pañcaviññāṇasampayuttaṃ yaṃkiñci appamattakampi vedanaṃ anubhavati. Iminā bhagavā therassa vedanāvasena ca vinivaṭṭetvā arūpapariggahaṃ dassesi.
ਅਨਿਚ੍ਚਾਨੁਪਸ੍ਸੀਤਿ ਅਨਿਚ੍ਚਤੋ ਅਨੁਪਸ੍ਸਨ੍ਤੋ। વਿਰਾਗਾਨੁਪਸ੍ਸੀਤਿ ਏਤ੍ਥ ਦ੍વੇ વਿਰਾਗਾ ਖਯવਿਰਾਗੋ ਚ ਅਚ੍ਚਨ੍ਤવਿਰਾਗੋ ਚ। ਤਤ੍ਥ ਸਙ੍ਖਾਰਾਨਂ ਖਯਂ ਖਯਤੋ ਪਸ੍ਸਨਾ વਿਪਸ੍ਸਨਾਪਿ, ਅਚ੍ਚਨ੍ਤવਿਰਾਗਂ ਨਿਬ੍ਬਾਨਂ વਿਰਾਗਤੋ ਦਸ੍ਸਨਮਗ੍ਗਞਾਣਮ੍ਪਿ વਿਰਾਗਾਨੁਪਸ੍ਸਨਾ। ਤਦੁਭਯਸਮਙ੍ਗਿਪੁਗ੍ਗਲੋ વਿਰਾਗਾਨੁਪਸ੍ਸੀ ਨਾਮ। ਤਂ ਸਨ੍ਧਾਯ વੁਤ੍ਤਂ – ‘‘વਿਰਾਗਾਨੁਪਸ੍ਸੀ’’ਤਿ, વਿਰਾਗਤੋ ਅਨੁਪਸ੍ਸਨ੍ਤੋਤਿ ਅਤ੍ਥੋ। ਨਿਰੋਧਾਨੁਪਸ੍ਸਿਮ੍ਹਿਪਿ ਏਸੇવ ਨਯੋ। ਨਿਰੋਧੋਪਿ ਹਿ ਖਯਨਿਰੋਧੋ ਅਚ੍ਚਨ੍ਤਨਿਰੋਧੋਤਿ ਦੁવਿਧੋਯੇવ। ਪਟਿਨਿਸ੍ਸਗ੍ਗਾਨੁਪਸ੍ਸੀਤਿ ਏਤ੍ਥ ਪਟਿਨਿਸ੍ਸਗ੍ਗੋ વੁਚ੍ਚਤਿ વੋਸ੍ਸਗ੍ਗੋ। ਸੋ ਚ ਪਰਿਚ੍ਚਾਗવੋਸ੍ਸਗ੍ਗੋ ਪਕ੍ਖਨ੍ਦਨવੋਸ੍ਸਗ੍ਗੋਤਿ ਦੁવਿਧੋ ਹੋਤਿ। ਤਤ੍ਥ ਪਰਿਚ੍ਚਾਗવੋਸ੍ਸਗ੍ਗੋਤਿ વਿਪਸ੍ਸਨਾ। ਸਾ ਹਿ ਤਦਙ੍ਗવਸੇਨ ਕਿਲੇਸੇ ਚ ਖਨ੍ਧੇ ਚ વੋਸ੍ਸਜਤਿ। ਪਕ੍ਖਨ੍ਦਨવੋਸ੍ਸਗ੍ਗੋਤਿ ਮਗ੍ਗੋ। ਸੋ ਹਿ ਨਿਬ੍ਬਾਨਂ ਆਰਮ੍ਮਣਤੋ ਪਕ੍ਖਨ੍ਦਤਿ। ਦ੍વੀਹਿਪਿ વਾ ਕਾਰਣੇਹਿ ਸੋ વੋਸ੍ਸਗ੍ਗੋਯੇવ, ਸਮੁਚ੍ਛੇਦવਸੇਨ ਖਨ੍ਧਾਨਂ ਕਿਲੇਸਾਨਞ੍ਚ વੋਸ੍ਸਜਨਤੋ ਨਿਬ੍ਬਾਨੇ ਚ ਪਕ੍ਖਨ੍ਦਨਤੋ। ਤਸ੍ਮਾ ਕਿਲੇਸੇ ਚ ਖਨ੍ਧੇ ਚ ਪਰਿਚ੍ਚਜਤੀਤਿ ਪਰਿਚ੍ਚਾਗવੋਸ੍ਸਗ੍ਗੋ। ਨਿਰੋਧਾਯ ਨਿਬ੍ਬਾਨਧਾਤੁਯਾ ਚਿਤ੍ਤਂ ਪਕ੍ਖਨ੍ਦਤੀਤਿ ਪਕ੍ਖਨ੍ਦਨવੋਸ੍ਸਗ੍ਗੋਤਿ ਉਭਯਮ੍ਪੇਤਂ ਮਗ੍ਗੇ ਸਮੇਤਿ। ਤਦੁਭਯਸਮਙ੍ਗੀ ਪੁਗ੍ਗਲੋ ਇਮਾਯ ਪਟਿਨਿਸ੍ਸਗ੍ਗਾਨੁਪਸ੍ਸਨਾਯ ਸਮਨ੍ਨਾਗਤਤ੍ਤਾ ਪਟਿਨਿਸ੍ਸਗ੍ਗਾਨੁਪਸ੍ਸੀ ਨਾਮ ਹੋਤਿ। ਤਂ ਸਨ੍ਧਾਯੇਤਂ વੁਤ੍ਤਂ। ਨ ਕਿਞ੍ਚਿ ਲੋਕੇ ਉਪਾਦਿਯਤੀਤਿ ਕਿਞ੍ਚਿ ਏਕਮ੍ਪਿ ਸਙ੍ਖਾਰਗਤਂ ਤਣ੍ਹਾવਸੇਨ ਨ ਉਪਾਦਿਯਤਿ ਨ ਗਣ੍ਹਾਤਿ ਨ ਪਰਾਮਸਤਿ। ਅਨੁਪਾਦਿਯਂ ਨ ਪਰਿਤਸ੍ਸਤੀਤਿ ਅਗ੍ਗਣ੍ਹਨ੍ਤੋ ਤਣ੍ਹਾਪਰਿਤਸ੍ਸਨਾਯ ਨ ਪਰਿਤਸ੍ਸਤਿ। ਪਚ੍ਚਤ੍ਤਂਯੇવ ਪਰਿਨਿਬ੍ਬਾਯਤੀਤਿ ਸਯਮੇવ ਕਿਲੇਸਪਰਿਨਿਬ੍ਬਾਨੇਨ ਪਰਿਨਿਬ੍ਬਾਯਤਿ। ਖੀਣਾ ਜਾਤੀਤਿਆਦਿਨਾ ਪਨਸ੍ਸ ਪਚ੍ਚવੇਕ੍ਖਣਾ ਦਸ੍ਸਿਤਾ। ਇਤਿ ਭਗવਾ ਸਂਖਿਤ੍ਤੇਨ ਖੀਣਾਸવਸ੍ਸ ਪੁਬ੍ਬਭਾਗਪ੍ਪਟਿਪਦਂ ਪੁਚ੍ਛਿਤੋ ਸਂਖਿਤ੍ਤੇਨੇવ ਕਥੇਸਿ। ਇਦਂ ਪਨ ਸੁਤ੍ਤਂ ਥੇਰਸ੍ਸ ਓવਾਦੋਪਿ ਅਹੋਸਿ વਿਪਸ੍ਸਨਾਪਿ। ਸੋ ਇਮਸ੍ਮਿਂਯੇવ ਸੁਤ੍ਤੇ વਿਪਸ੍ਸਨਂ વਡ੍ਢੇਤ੍વਾ ਅਰਹਤ੍ਤਂ ਪਤ੍ਤੋਤਿ।
Aniccānupassīti aniccato anupassanto. Virāgānupassīti ettha dve virāgā khayavirāgo ca accantavirāgo ca. Tattha saṅkhārānaṃ khayaṃ khayato passanā vipassanāpi, accantavirāgaṃ nibbānaṃ virāgato dassanamaggañāṇampi virāgānupassanā. Tadubhayasamaṅgipuggalo virāgānupassī nāma. Taṃ sandhāya vuttaṃ – ‘‘virāgānupassī’’ti, virāgato anupassantoti attho. Nirodhānupassimhipi eseva nayo. Nirodhopi hi khayanirodho accantanirodhoti duvidhoyeva. Paṭinissaggānupassīti ettha paṭinissaggo vuccati vossaggo. So ca pariccāgavossaggo pakkhandanavossaggoti duvidho hoti. Tattha pariccāgavossaggoti vipassanā. Sā hi tadaṅgavasena kilese ca khandhe ca vossajati. Pakkhandanavossaggoti maggo. So hi nibbānaṃ ārammaṇato pakkhandati. Dvīhipi vā kāraṇehi so vossaggoyeva, samucchedavasena khandhānaṃ kilesānañca vossajanato nibbāne ca pakkhandanato. Tasmā kilese ca khandhe ca pariccajatīti pariccāgavossaggo. Nirodhāya nibbānadhātuyā cittaṃ pakkhandatīti pakkhandanavossaggoti ubhayampetaṃ magge sameti. Tadubhayasamaṅgī puggalo imāya paṭinissaggānupassanāya samannāgatattā paṭinissaggānupassī nāma hoti. Taṃ sandhāyetaṃ vuttaṃ. Na kiñci loke upādiyatīti kiñci ekampi saṅkhāragataṃ taṇhāvasena na upādiyati na gaṇhāti na parāmasati. Anupādiyaṃ na paritassatīti aggaṇhanto taṇhāparitassanāya na paritassati. Paccattaṃyeva parinibbāyatīti sayameva kilesaparinibbānena parinibbāyati. Khīṇā jātītiādinā panassa paccavekkhaṇā dassitā. Iti bhagavā saṃkhittena khīṇāsavassa pubbabhāgappaṭipadaṃ pucchito saṃkhitteneva kathesi. Idaṃ pana suttaṃ therassa ovādopi ahosi vipassanāpi. So imasmiṃyeva sutte vipassanaṃ vaḍḍhetvā arahattaṃ pattoti.
Related texts:
ਤਿਪਿਟਕ (ਮੂਲ) • Tipiṭaka (Mūla) / ਸੁਤ੍ਤਪਿਟਕ • Suttapiṭaka / ਅਙ੍ਗੁਤ੍ਤਰਨਿਕਾਯ • Aṅguttaranikāya / ੮. ਪਚਲਾਯਮਾਨਸੁਤ੍ਤਂ • 8. Pacalāyamānasuttaṃ
ਟੀਕਾ • Tīkā / ਸੁਤ੍ਤਪਿਟਕ (ਟੀਕਾ) • Suttapiṭaka (ṭīkā) / ਅਙ੍ਗੁਤ੍ਤਰਨਿਕਾਯ (ਟੀਕਾ) • Aṅguttaranikāya (ṭīkā) / ੮. ਪਚਲਾਯਮਾਨਸੁਤ੍ਤવਣ੍ਣਨਾ • 8. Pacalāyamānasuttavaṇṇanā
