| Library / Tipiṭaka / திபிடக • Tipiṭaka / அபதா³ன-அட்ட²கதா² • Apadāna-aṭṭhakathā |
3. பச்சாக³மனியத்தே²ரஅபதா³னவண்ணனா
3. Paccāgamaniyattheraapadānavaṇṇanā
ஸிந்து⁴யா நதி³யா தீரேதிஆதி³கங் ஆயஸ்மதோ பச்சாக³மனியத்தே²ரஸ்ஸ அபதா³னங். அயம்பி புரிமபு³த்³தே⁴ஸு கதாதி⁴காரோ தத்த² தத்த² ப⁴வே விவட்டூபனிஸ்ஸயானி புஞ்ஞானி உபசினந்தோ விபஸ்ஸிஸ்ஸ ப⁴க³வதோ காலே ஸிந்து⁴யா க³ங்கா³ய ஸமீபே சக்கவாகயோனியங் நிப்³ப³த்தோ புப்³ப³ஸம்பா⁴ரயுத்தத்தா பாணினோ அகா²த³ந்தோ ஸேவாலமேவ ப⁴க்க²யந்தோ சரதி. தஸ்மிங் ஸமயே விபஸ்ஸிப⁴க³வா ஸத்தானுக்³க³ஹங் கரொந்தோ தத்த² அக³மாஸி. தஸ்மிங் க²ணே ஸோ சக்கவாகோ விஜ்ஜோதமானங் ப⁴க³வந்தங் தி³ஸ்வா பஸன்னமானஸோ துண்டே³ன ஸாலருக்க²தோ ஸாலபுப்ப²ங் சி²ந்தி³த்வா ஆக³ம்ம பூஜேஸி. ஸோ தேனேவ சித்தப்பஸாதே³ன ததோ சுதோ தே³வலோகே உப்பன்னோ அபராபரங் ச²காமாவசரஸம்பத்திங் அனுப⁴வித்வா ததோ சுதோ மனுஸ்ஸலோகே உப்பஜ்ஜித்வா சக்கவத்திஸம்பத்திஆத³யோ அனுப⁴வித்வா இமஸ்மிங் பு³த்³து⁴ப்பாதே³ ஏகஸ்மிங் குலகே³ஹே நிப்³ப³த்தோ விஞ்ஞுதங் பத்தோ புப்³ப³சரிதவஸேன ஸத்த²ரி பஸன்னோ பப்³ப³ஜித்வா நசிரஸ்ஸேவ அரஹா அஹோஸி, சக்கவாகோ ஹுத்வா ப⁴க³வந்தங் தி³ஸ்வா கத்த²சி க³ந்த்வா புப்ப²மாஹரித்வா பூஜிதத்தா புப்³ப³புஞ்ஞனாமேன பச்சாக³மனியத்தே²ரோதி பாகடோ.
Sindhuyā nadiyā tīretiādikaṃ āyasmato paccāgamaniyattherassa apadānaṃ. Ayampi purimabuddhesu katādhikāro tattha tattha bhave vivaṭṭūpanissayāni puññāni upacinanto vipassissa bhagavato kāle sindhuyā gaṅgāya samīpe cakkavākayoniyaṃ nibbatto pubbasambhārayuttattā pāṇino akhādanto sevālameva bhakkhayanto carati. Tasmiṃ samaye vipassibhagavā sattānuggahaṃ karonto tattha agamāsi. Tasmiṃ khaṇe so cakkavāko vijjotamānaṃ bhagavantaṃ disvā pasannamānaso tuṇḍena sālarukkhato sālapupphaṃ chinditvā āgamma pūjesi. So teneva cittappasādena tato cuto devaloke uppanno aparāparaṃ chakāmāvacarasampattiṃ anubhavitvā tato cuto manussaloke uppajjitvā cakkavattisampattiādayo anubhavitvā imasmiṃ buddhuppāde ekasmiṃ kulagehe nibbatto viññutaṃ patto pubbacaritavasena satthari pasanno pabbajitvā nacirasseva arahā ahosi, cakkavāko hutvā bhagavantaṃ disvā katthaci gantvā pupphamāharitvā pūjitattā pubbapuññanāmena paccāgamaniyattheroti pākaṭo.
13. அத்தனோ புப்³ப³கம்மங் ஸரித்வா ஸோமனஸ்ஸஜாதோ புப்³ப³சரிதாபதா³னங் பகாஸெந்தோ ஸிந்து⁴யா நதி³யா தீரேதிஆதி³மாஹ. ஸீதி ஸத்³த³ங் குருமானா து⁴னாதி கம்பதீதி ஸிந்து⁴, நத³தி ஸத்³த³ங் கரொந்தோ க³ச்ச²தீதி நதி³. சக்கவாகோ அஹங் ததா³தி சக்கங் ஸீக⁴ங் க³ச்ச²ந்தங் இவ உத³கே வா த²லே வா ஆகாஸே வா ஸீக⁴ங் வாதி க³ச்ச²தீதி சக்கவாகோ. ததா³ விபஸ்ஸிங் ப⁴க³வந்தங் த³ஸ்ஸனகாலே அஹங் சக்கவாகோ அஹோஸிந்தி அத்தோ². ஸுத்³த⁴ஸேவாலப⁴க்கோ²ஹந்தி அஞ்ஞகோ³சரஅமிஸ்ஸத்தா ஸுத்³த⁴ஸேவாலமேவ கா²த³ந்தோ அஹங் வஸாமி. பாபேஸு ச ஸுஸஞ்ஞதோதி புப்³ப³வாஸனாவஸேன பாபகரணே ஸுட்டு² ஸஞ்ஞதோ தீஹி த்³வாரேஹி ஸஞ்ஞதோ ஸுஸிக்கி²தோ.
13. Attano pubbakammaṃ saritvā somanassajāto pubbacaritāpadānaṃ pakāsento sindhuyā nadiyā tīretiādimāha. Sīti saddaṃ kurumānā dhunāti kampatīti sindhu, nadati saddaṃ karonto gacchatīti nadi. Cakkavāko ahaṃ tadāti cakkaṃ sīghaṃ gacchantaṃ iva udake vā thale vā ākāse vā sīghaṃ vāti gacchatīti cakkavāko. Tadā vipassiṃ bhagavantaṃ dassanakāle ahaṃ cakkavāko ahosinti attho. Suddhasevālabhakkhohanti aññagocaraamissattā suddhasevālameva khādanto ahaṃ vasāmi. Pāpesu ca susaññatoti pubbavāsanāvasena pāpakaraṇe suṭṭhu saññato tīhi dvārehi saññato susikkhito.
14. அத்³த³ஸங் விரஜங் பு³த்³த⁴ந்தி ராக³தோ³ஸமோஹவிரஹிதத்தா விரஜங் நிக்கிலேஸங் பு³த்³த⁴ங் அத்³த³ஸங் அத்³த³க்கி²ங். க³ச்ச²ந்தங் அனிலஞ்ஜஸேதி அனிலஞ்ஜஸே ஆகாஸபதே² க³ச்ச²ந்தங் பு³த்³த⁴ங். துண்டே³ன மய்ஹங் முக²துண்டே³ன தாலங் ஸாலபுப்ப²ங் பக்³க³ய்ஹ பக்³க³ஹெத்வா விபஸ்ஸிஸ்ஸாபி⁴ரோபயிங் விபஸ்ஸிஸ்ஸ ப⁴க³வதோ பூஜேஸிந்தி அத்தோ². ஸேஸங் ஸுவிஞ்ஞெய்யமேவாதி.
14.Addasaṃvirajaṃ buddhanti rāgadosamohavirahitattā virajaṃ nikkilesaṃ buddhaṃ addasaṃ addakkhiṃ. Gacchantaṃ anilañjaseti anilañjase ākāsapathe gacchantaṃ buddhaṃ. Tuṇḍena mayhaṃ mukhatuṇḍena tālaṃ sālapupphaṃ paggayha paggahetvā vipassissābhiropayiṃ vipassissa bhagavato pūjesinti attho. Sesaṃ suviññeyyamevāti.
பச்சாக³மனியத்தே²ரஅபதா³னவண்ணனா ஸமத்தா.
Paccāgamaniyattheraapadānavaṇṇanā samattā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / கு²த்³த³கனிகாய • Khuddakanikāya / அபதா³னபாளி • Apadānapāḷi / 3. பச்சாக³மனியத்தே²ரஅபதா³னங் • 3. Paccāgamaniyattheraapadānaṃ
